Kema tlanauatijketl Josías kipixtoya 26 xiuitl, tlanauatik ma kikualchijchiuakaj teokali. Kema kikualchijchiuayayaj, kipantijkej “nopa amatlapouali tlen kipixtoya nopa tlanauatili tlen TOTEKO kinmakak israelitajmej”. Kema Josías kikajki tlen kiijtouayaya nopa amatlapouali, nima kipatlak tlen monekiyaya pampa kinekiyaya kineltokas nopa Tlanauatili (2 Crón. 34:14, 19-21). ¿Nojkia mitspaktiskia mojmostla tijpouas Biblia? Tlaj ya tijchiua kampeka mojmostla tijpouas, ¿mitspaktia? ¿Tijchiua kampeka amo tikilkauas nopa versículos tlen uelis mitspaleuis? Kema Josías kipixtoya se 39 xiuitl, kitlapejpenik se tlamantli tlen kichijki ma miki. Amo kiiljuik Jehová ma kiyakana uan motemachik ipan tlen ya ueliyaya kichiua (2 Crón. 35:20-25). ¿Tlake techmachtia? Maske ya tiuejueyij o ya uejkajtok timomachtiaj Biblia, nojua moneki tijtemosej Jehová. Yeka moneki tikiljuisej ma techyakana, timomachtisej iTlajtol uan tikintlakakilisej toikniuaj katli kuali tlaneltokaj. Tlaj kiampa tijchiuaj, amo tlauel timokuapolosej uan tiyolpakisej (Sant. 1:25). w23.09 12 párrs. 15, 16

Biblia kiijtoua tlen kichijkej miakej siuamej katli kiiknelijkej uan kitekipanojkej Jehová. Inijuantij elkej “temachmej ika nochi” tlen kichiuayayaj (1 Tim. 3:11). Uan ipan motlanechikol nojkia uelis tikinixmatis tosiuaikniuaj katli kuali tlaneltokaj uan tijyekos miak tlamantli tlen inijuantij. Tlaj nojua tiichpokatl, ximoiljui ipan se keskij tosiuaikniuaj katli kuali tlaneltokaj uan nojkia xijchiua kej inijuantij. Xikita tlake kuajkuali tlamantli kinextiaj ipan ininnemilis uan ximoiljui kenijkatsa nojkia uelis kiampa timonejnemiltis. Se siuatl katli amo moueyimati kuali mouampojchijtok iuaya Jehová uan kuali mouika ininuaya sekinok. Nojkia, pampa kiiknelia Jehová, kintlepanita katli kintekimakatok ma tlayakanakaj ipan tlanechikoli uan ipan ichaj (1 Cor. 11:3). w23.12 18, 19 párrs. 3-5

Jehová kineki se tlakatl ma kiikneli isiua, ma kimaka tlen kipoloua, ma kikuamachili tlen kiyolmati uan ma kipaleui kuali ma tlaneltoka. Tlaj tijpias tlalnamikilistli, tikintlepanitas siuamej uan tielis titemachtli, mitspaleuis kema timosiuajtis uan kuali tikinyakanas mochampoyouaj. Tlaj timosiuajtis uelis tikinpias mokoneuaj. Jehová eli se kuali tetaj, yeka uelis tijchiuas kej ya (Efes. 6:4). Ya miakpa kiiljuik Jesús kiikneliyaya uan yolpakiyaya ika tlen kichiuayaya (Mat. 3:17). Tlaj tikinpias mokoneuaj, moneki tikiniljuis tikiniknelia uan tijpatiita kema kuali kichiuaj se tlamantli. Kema tetajmej kichiuaj kej Jehová, kinpaleuiaj ininkoneuaj kuali ma tlaneltokakaj uan ma tlalnamikikaj. ¿Tlake uelis tijchiuas nama tlaj tijneki kuali tikiniskaltis mokoneuaj teipa? Moneki tijnextis tikiniknelia mochampoyouaj uan toikniuaj, nojkia moneki tikiniljuis tikiknelia uan tikinpatiita (Juan 15:9). w23.12 28 párrs. 17, 18