Biblia kiijtoua tlen kichijkej miakej siuamej katli kiiknelijkej uan kitekipanojkej Jehová. Inijuantij elkej “temachmej ika nochi” tlen kichiuayayaj (1 Tim. 3:11). Uan ipan motlanechikol nojkia uelis tikinixmatis tosiuaikniuaj katli kuali tlaneltokaj uan tijyekos miak tlamantli tlen inijuantij. Tlaj nojua tiichpokatl, ximoiljui ipan se keskij tosiuaikniuaj katli kuali tlaneltokaj uan nojkia xijchiua kej inijuantij. Xikita tlake kuajkuali tlamantli kinextiaj ipan ininnemilis uan ximoiljui kenijkatsa nojkia uelis kiampa timonejnemiltis. Se siuatl katli amo moueyimati kuali mouampojchijtok iuaya Jehová uan kuali mouika ininuaya sekinok. Nojkia, pampa kiiknelia Jehová, kintlepanita katli kintekimakatok ma tlayakanakaj ipan tlanechikoli uan ipan ichaj (1 Cor. 11:3). w23.12 18, 19 párrs. 3-5

Jehová kineki se tlakatl ma kiikneli isiua, ma kimaka tlen kipoloua, ma kikuamachili tlen kiyolmati uan ma kipaleui kuali ma tlaneltoka. Tlaj tijpias tlalnamikilistli, tikintlepanitas siuamej uan tielis titemachtli, mitspaleuis kema timosiuajtis uan kuali tikinyakanas mochampoyouaj. Tlaj timosiuajtis uelis tikinpias mokoneuaj. Jehová eli se kuali tetaj, yeka uelis tijchiuas kej ya (Efes. 6:4). Ya miakpa kiiljuik Jesús kiikneliyaya uan yolpakiyaya ika tlen kichiuayaya (Mat. 3:17). Tlaj tikinpias mokoneuaj, moneki tikiniljuis tikiniknelia uan tijpatiita kema kuali kichiuaj se tlamantli. Kema tetajmej kichiuaj kej Jehová, kinpaleuiaj ininkoneuaj kuali ma tlaneltokakaj uan ma tlalnamikikaj. ¿Tlake uelis tijchiuas nama tlaj tijneki kuali tikiniskaltis mokoneuaj teipa? Moneki tijnextis tikiniknelia mochampoyouaj uan toikniuaj, nojkia moneki tikiniljuis tikiknelia uan tikinpatiita (Juan 15:9). w23.12 28 párrs. 17, 18

ToTeotsij itekipanojkauaj nojkia tikixnamikij tlaouijkayotl uan timokokouaj kej sekinok maseualmej. Nojkia techtlatsakuiltiaj katli amo kinekij ma tijtekipanokaj toTeotsij. Maske Jehová kikaua ma tikixnamikikaj tlaouijkayotl, ya kiijtojtok techpaleuis (Is. 41:10). Jehová uelis techpaleuis ma tiyolpakikaj, kuali ma tijtlapejpenikaj tlen tijchiuasej uan amo ma tijtlauelkauakaj maske tikixnamikisej uejueyi tlaouijkayotl. Jehová kiijtojtok techmakas “tlaseuilistli” ipan toyolo (Filip. 4:6, 7). Tijpiaj nopa tlaseuilistli pampa timouampojchijtokej iuaya Jehová, uan maseualmej amo uelij kikuamachiliaj kenke kiampa tijyolmatij. Uelis se tonali tlauel timomaijtok pampa tlauel timotekipachojtoya uan kema titlanki, ayokmo kiampa tijyolmatki pampa Jehová mitsmakak tlaseuilistli. w24.01 20 párr. 2; 21 párr. 4