Tlen maseualmej kinekij kimatisej

¿Kenke Mateo uan Lucas amo kiijkuilojkej sanse tlamantli tlen Jesús ichampoyouaj?

Mateo uan Lucas amo sanse kiijkuilojkej tlen kipanok Jesús kema eliyaya okichpil pampa sejse tlen inijuantij kiijkuilojkej tlen kimajtoyaj.

Mateo kiijkuilok tlen José kipanok. Kiijtoua tlake kichijki kema kimatki María konepiaskia, kema se iluikaejketl kiiljuik tlake panotoya uan kenijkatsa kichijki tlen iluikaejketl kiiljuik (Mat. 1:19-25). Mateo kiijkuilok se iluikaejketl kiiljuik José ma yaui Egipto ininuaya ichampoyouaj uan ya kichijki tlen kiiljuijkej. Nojkia kiijtoua ipan se temiktli se iluikaejketl kiiljuik ma tlakuepili altepetl Israel uan kiijtoua José tlakuepilik uan mochantito Nazaret (Mat. 2:13, 14, 19-23). Ipan nopa achtoui ome capítulos tlen pilamochtsi Mateo, José kitokaxtiaj chikompa imiakpa, uan María san najpa kitokaxtiaj.

Lucas kiijkuilok tlen María kipanok. Kiijtoua iluikaejketl Gabriel kipaxaloto María, uan ya kipaxaloto Elisabet, uan kiijtoua kenijkatsa María kiueyichijki Jehová (Luc. 1:26-56). Nojkia kiijtoua Simeón kiiljuik María kenijkatsa Jesús kitlaijiyouiltiskiaj. Uan kema kiijtoua tlen panok kema Jesús kipixtoya 12 xiuitl uan yajki ipan nopa teokali ininuaya ichampoyouaj, Lucas kiijkuilok tlen María kiijtok uan amo tlen José kiijtok. Nojkia kiijtoua María “kiajojki [...] ipan iyolo” nochi tlen Jesús kiijtok (Luc. 2:19, 34, 35, 48, 51). Ipan nopa achtoui ome capítulos tlen pilamochtsi Lucas, kitokaxtiaj María matlaktli uan ome imiakpa uan José san expa kitokaxtiaj. Mateo kiijkuilok tlake moiljuik uan tlake kichijki José uan Lucas kiijkuilok tlake moiljuik uan tlake kichijki María.

Mateo uan Lucas nojkia amo sanse kiijkuilojkej ajkia inijuantij elkej ininuejkapantatauaj José uan María. Mateo kiijkuilok ajkia inijuantij elkej José iuejkapantatauaj uan kiijtoua pampa Jesús eliyaya José itepotskone, kinamikiyaya kiselis David itlanauatijkayo. ¿Kenke ueliskia kiselis nopa tlanauatijkayotl? Pampa José eliyaya se iteipaixui David, pampa ualayaya tlen ichampoyouaj Salomón, katli eliyaya David ikone (Mat. 1:6, 16). Uan Lucas kiijkuilok ajkia elkej María iuejkapantatauaj uan nojkia kinextia Jesús kinamikiyaya kiselis nopa tlanauatijkayotl pampa eliyaya se iteipaixui David (Rom. 1:3). ¿Kenke ueliskia kiselis nopa tlanauatijkayotl? Pampa María nojkia eliyaya se iteipaixui David, pampa ualayaya tlen ichampoyouaj Natán, seyok David ikone (Luc. 3:31, 32). Tlaj María eliyaya Elí ikone, ¿kenke Lucas kiijkuilok Elí ikone eliyaya José? Pampa uejkajkia, ipan nopa amatl tlen tekichiuanij kichiuayayaj san kiijkuilouayayaj tlakamej inintoka. Uajka kema Lucas kiijkuilok José eliyaya Elí ikone, kiijtosneki eliyaya imontika (Luc. 3:23).

Tlen kiijkuilok Mateo uan Lucas kinextia Jesús eliyaya nopa Mesías. Nochi maseualmej kimatiyayaj Jesús eliyaya David iteipaixui, uan nopa fariseos uan saduceos nojkia kimajtoyaj nopa. Ipan ni tonali, tlen Mateo uan Lucas kiijkuilojkej techpaleuia kuali ma titlaneltokakaj uan kichiua ma timotemachikaj toTeotsij kiaxitis nochi tlen mosentlalijtok kichiuas.