TLAMACHTILI 11

Xitlamachti ika nochi moyolo uan ika pakilistli

Romanos 12:11

TLEN MONEKI TIJCHIUAS: Kej tikamanaltis ma kinyololini katli mitstlakakiliaj.

Xijkualchijchiua moyolo. Kema timokualchijchiuas, ximoyoliljui kenke tlauel ipati tlen titlamachtis. Kuali ximomachti tlen tikixtomas, kiampa kema titlamachtis tijnextis tijneltoka tlen tikijtoua.
Ximoiljui ipan katli mitstlakakiliaj. Ximoiljui kenijkatsa tlauel kinpaleuis tlen tikiniljuis o tlen tijpouas. Ximoiljui kenijkatsa tikixtomas nopa tlamachtili, kiampa katli mitstlakakilisej kiitasej kenijkatsa kinpaleuis nopa tlamachtili uan kipatiitasej.
Xijchiua ma moyoliljuikaj ipan tlen tikinmachtia. Xikamanalti ika nochi moyolo. Xijnexti tlen tijyolmati; tlen tijnextis ipan moxayak uan kej timojmolinis ma mouika ika tlen titlamachtis.

Katli mitstlakakiliaj uelis mosentlalisej ipan seyok tlamantli tlaj amo tijpatlas kej tikojolinia moma o tlen tijnextia ipan moxayak. Kema tijnekis tijpankixtis se tlamachtili tlen tlauel ipati o tijnekis ma kichiuakaj tlen tikijtoua, xijchiua ika nochi moyolo. Maske kiampa tijchiuas, xijchiua san kema kinamiki.