Pakilistli, se kuali tlamantli tlen toTeotsij techmakatok

MASKE nochi maseualmej kinekij yolpakisej, ipan itlamia tonali nochi kiixnamikij miak tlaouijkayotl (2 Tim. 3:1). Tlauel miak tlamantli kichiua maseualmej amo ma yolpakikaj, pampa miakej kichiuaj tlen amo xitlauak, miakej mokokouaj, amo kipiaj tekitl o miki se akajya katli kiikneliaj. Uan toTeotsij itekipanojkauaj nojkia mokuesouaj uan nopa kichiua ayokmo tlauel ma yolpakikaj. Tlaj kiampa techpano, ¿tlake techpaleuis sampa tlauel ma tiyolpakikaj?

Tlaj tijnekij tijnankilisej ni tlajtlanili, achtoui moneki tijkuamachilisej tlake nelnelia kiijtosneki tiyolpakisej uan kenijkatsa se keskij maseualmej nojua yolpakij maske kiixnamikij tlaouijkayotl. Teipa tikitasej tlake techpaleuis nochipa ma tiyolpaktokaj uan nojkia tlake tijchiuasej tlaj tijnekij nojua tlauel tiyolpakisej.

¿TLAKE KIIJTOSNEKI PAKILISTLI?

Maske se akajya nochipa uetskatok amo kiijtosneki nelia yolpaktok. Ma timoiljuikaj ipan se akajya katli moiuintia. Maske tlauel uetska kema iuintitok, teipa kema tlalnamiki o monelyotia, ayokmo uetska uan sampa kiilnamiki ikuesoljuaj. Amo uejkaua paktok pampa amo nelnelia yolpakiyaya (Prov. 14:13).

Kema nelnelia tiyolpakij amo san tiuetskaj, pampa eli se tlamantli tlen kichiua tlauel ma tiyolpakikaj uan kuali ma tijyolmatikaj pampa tijpiaj se tlenijki o kema tijchixtokej se tlamantli tlen kuali. Kema nelnelia tiyolpakij, tiitstokej ika pakilistli maske uelis techpano tlen amo kuali (1 Tes. 1:6). Maske se akajya moyolkokoua pampa kipano tlen amo kuali, ya nojua kinextia pakilistli. Maske nopa apóstoles tlauel kinuijuitejkej pampa tlamachtiyayaj tlen Jesús, Biblia kiijtoua “kiskej ipan nopa ueyi tlasentilistli [...] yolpaktokej pampa toTeko kinkauilijtoya tlaijiyouisej ipampa kineltokaj itekiuejkayo Jesús” (Hech. 5:41). Maske amo yolpajkej pampa kinuijuitejkej, kena yolpaktoyaj pampa amo kitlauelkajtoyaj Jehová.

Kema titlakatij amo tijpiaj nopa kuali tlamantli, yon amo iselti yoli. ¿Kenke amo? Pampa san toTeotsij itonal techpaleuia ma tijnextikaj nopa kuali tlamantli. ToTeotsij itonal techpaleuia ma tijnextikaj tonemilis “tlen yankuik”, uan yeka nojkia ipan tonemilis tijnextiaj pakilistli (Efes. 4:24; Gál. 5:22). Uan kema tijnextiaj pakilistli, tikixnamikij tlaouijkayotl kej kinamiki.

UELIS TIJCHIUASEJ KEJ INIJUANTIJ

Jehová amo kinekiyaya ipan Tlaltipaktli ma mochiua tlen amo kuali, ya kinekiyaya nochi ma itstokaj ika pakilistli. Uan maske maseualmej kichiuaj tlen tlauel amo kuali, ya nojua tlauel yolpaktok. Biblia kiijtoua: “Kampa yajaya itstok [...] monextia chikaualistli uan ueyi pakilistli” (1 Crón. 16:27). Uan nojkia tlauel yolpaki kema kiita itekipanojkauaj kichiuaj tlen kuali (Prov. 27:11).

¿Kenijkatsa uelis tijchiuasej kej Jehová? Amo kinamiki tlauel timotekipachosej kema se keski tlamantli amo pano kej timoiljuijtoyaj. Amo kinamiki timokuesosej, kinamiki tikitasej san tlen kuali uan tijnextisej tijpiaj toyolo se tonali mopatlas kej nama tiitstokej.a

Biblia kiijtoua miakej toTeotsij itekipanojkauaj nojkia kinextijkej pakilistli maske kipixkej tlaouijkayotl, kej Abraham, katli kiixnamijki miak kuesoli pampa sekinok kinekiyayaj kichiuilisej tlen amo kuali (Gén. 12:10-20; 14:8-16; 16:4, 5; 20:1-18; 21:8, 9). Maske kipanok nopa, ya nochipa yolpaktoya, pampa motemachiyaya se tonali itstoskia ipan se yankuik Tlaltipaktli kampa Mesías tekichiuaskia (Gén. 22:15-18; Heb. 11:10). Jesús kiijtok: “Abraham pajki kema kimatki para teipa niualaskia, uan yajaya nechitak kema niualajki uan nelia kipixki pakilistli” (Juan 8:56). Tojuantij uelis tijchiuasej kej Abraham tlaj ika miak pakilistli timoyoliljuisej kenijkatsa kuali tiitstosej teipa (Rom. 8:21).

Kej Abraham, apóstol Pablo uan Silas nojkia mosentlalijkej ipan tlen toTeotsij kitenkajtok. Pampa kuali tlaneltokayayaj, nojua kinextijkej pakilistli maske kiixnamijkej tlaouijkayotl. Se tonali, tlauel kinuijuitejkej uan kintsajkej. Maske kinpanok nopa, Biblia kiijtoua “tlajkoyoual Pablo uan Silas momaijtouayayaj uan uikayayaj teouikatl” (Hech. 16:23-25). Amo yolpajkej san pampa motemachiyayaj ipan tlen kiseliskiaj, nojkia pampa kimajtoyaj kichijtoyaj tlen Jesús tlanauatijtoya. Tlaj tijnekij tijchiuasej kej inijuantij, moneki nochipa tikilnamikisej kenijkatsa techpaleuia tijtekipanosej Jehová ika nochi toyolo pampa kuali titlaneltokaj (Filip. 1:12-14).

Ipan ni tonali nojkia itstokej miakej toikniuaj katli nelnelia yolpakij maske kiixnamikij miak tlaouijkayotl, uan tojuantij uelis tijchiuasej kej inijuantij. Ma tikilnamikikaj tlen panok ipan noviembre 2013, ipan ueyi altepetl Filipinas, kema se chikauak ajakatl uan miak atl tlauel tlasosolok. Kisojsolok ininchaj kipano mil toikniuaj. George, katli eua ipan altepetl Tacloban, kiijtok: “Maske tlauel amo kuali tlen panotok, toikniuaj yolpaktokej. Amo nijmati tlake nikijtos, pampa nelnelia tlauel tiyolpakij”. Tlaj timoyoliljuiaj ipan nochi tlamantli tlen Jehová kichijtok uan tijtlaskamatiliaj, techpaleuis nojua ma tiyolpakikaj maske tikixnamikisej tlaouijkayotl. ¿Tlake seyok tlamantli techmakatok Jehová pampa kineki ma tiyolpaktokaj?

¿KENKE KINAMIKI TIJPIASEJ PAKILISTLI?

Nelnelia tlauel tiyolpakij pampa kuali timouampojchijtokej iuaya Jehová. San ya nopa tlauel ipati. Tikixmatij katli kinamiki kinauatis nochi. ¡Yaya toTeotsij, toTata uan toUampo! (Sal. 71:17, 18).

Nojkia tiyolpakij pampa tiyoltokej uan tiuelij timoyolpakiltiaj (Ecl. 3:12, 13). Uan pampa Jehová techpixtok ipan itlanechikol, tijmatij tlake mosentlalijtok kichiuas uan tlake kineki ma tijchiuakaj (Col. 1:9, 10). Yeka, tlauel kuali tijyolmatij uan timonejnemiltiaj kej kinamiki, uan amo tiitstokej kej maseualmej, katli amo yolpakij pampa amo kimatij kenke itstokej. Pablo kiijtok ni: “Axaka kiitstok, niyon kikaktok, niyon moiljuijtok, keja onpano yejyektsi nopa tlamantli tlen toTeko kisenkajtok para kinmakas nopa tlakamej tlen kiikneliaj. Pero tojuantij tijmatij tlen nopa yejyektsi tlamantli pampa toTeko technextilijtok ika itonaltsi” (1 Cor. 2:9, 10). Pampa tijmatij tlake mosentlalijtok kichiuas toTeotsij uan tlake kineki ma tijchiuakaj, kichiua nelnelia ma tijpiakaj pakilistli.

Ma tikitakaj sekinok tlamantli tlen Jehová kichijtok. Ya kichijki tlen monekiyaya pampa kinejki techtlapojpoljuis (1 Juan 2:12). Uan pampa tlauel tetlasojtla, kitenkajtok se tonali tiitstosej ipan se xochimili (Rom. 12:12). Uan ipan ni tonali, Jehová kichijtok ma tikinpiakaj toikniuaj ipan nochi Tlaltipaktli, uan sansejko tijueyichiuaj (Sal. 133:1). Nojkia, Biblia kiijtoua Jehová techmokuitlauia tlen Satanás uan iajakauaj (Sal. 91:11). Tlaj timoyoliljuisej ipan ni tlateochiualistli, techpaleuis nojua tlauel ma tiyolpakikaj (Filip. 4:4).

¿TLAKE TECHPALEUIS NOJUA TLAUEL MA TIYOLPAKIKAJ?

¿Uelis nojua tlauel tiyolpakisej? Jesús kiijtok: “Niinmechiljuijtok ni tlajtoli para uelis inkipiasej nopakilis uan inpaktosej tlauel hasta nelmiak” (Juan 15:11). Tlen kiijtok kinextia nopa pakilistli tlen tijpiaj uelis nojua tlauel momiakilijtias. Nopa pakilistli eli kejuak tlitl. Tlaj tijnekij nojua ma lemeni o ma xauani, moneki nojua tijyakatilisej kuauitl. Nojkia, tlaj tijnekij nojua tlauel tiyolpakisej, moneki tijpiasej toTeotsij itonal. Yeka, moneki nochipa tikiljuisej Jehová ma techmaka itonal uan timoyoliljuisej tlen tijpouaj ipan Biblia, pampa toTeotsij kichijki ma kiijkuilokaj ika itonal (Sal. 1:1, 2; Luc. 11:13).

Tlaj timosentlaliaj tijchiuasej tlen Jehová kipaktia, nojkia techpaleuis nojua tlauel ma tiyolpakikaj (Sal. 35:27; 112:1). ¿Kenke tikijtouaj nopa? Pampa kema Jehová techchijki, kichijki ma tijnekikaj tijchiuasej tlen ya kineki. Biblia kiijtoua: “Xijmakasi toTeko uan xijchiua tlen kiijtoua itlanauatiljuaj. San ya nopa tlen moneki kichiuasej nochi tlakamej” (Ecl. 12:13). Ni kiijtosneki toTeotsij kichijki ma tijnekikaj tijtekipanosej. Yeka tlauel tiyolpakij kema kiampa tijchiuaj.b

TLAUEL TECHPALEUIA KEMA TIYOLPAKIJ

Tlaj tijpiaj pakilistli, amo san techpaleuis kuali ma tijyolmatikaj, nojkia techpaleuis ipan sekinok tlamantli. Kema tijtekipanouaj toTeotsij ika pakilistli maske tijpiaj kuesoli, techpaleuia ma tijyolpakiltikaj (Deut. 16:15; 1 Tes. 5:16-18). Uan kema nelnelia tiyolpakij nojkia techpaleuia amo ma tijnekikaj titlatominpiasej, uan ma tijkauakaj miak tlamantli pampa tijnekij timosentlalisej tijpaleuisej toTeotsij iTlanauatijkayo (Mat. 13:44). Kema tijseliaj tlateochiualistli pampa kiampa tijchiuaj, techpaleuia nojua tlauel ma tiyolpakikaj uan kuali ma tijyolmatikaj. Uan nojkia tikinpaleuiaj sekinok ma yolpakikaj (Hech. 20:35; Filip. 1:3-5).

Nojkia, tlaj nojua tlauel tiyolpakisej techpaleuis amo tlauel ma timokokokaj. Biblia kiijtoua: “Yolpakilistli tepaleuia keja eliskia se kuali pajtli. Pero kema se tlakatl moyolkuesoua kitlamiltia ichikaualis keja se kokolistli tlen kiuatsa iomiyo” (Prov. 17:22). Se tepajtijketl katli tlamachtia ipan Universidad de Nebraska (Estados Unidos) kiijtok se tlamantli tlen Biblia nojkia tlamachtia. Kiijtok: “Tlaj nama tiyolpaki uan kuali tijyolmati, mitspaleuis amo tlauel ximokoko”.

Kej tikitakej, maske ipan ni tonali tikixnamikij miak tlaouijkayotl, uelis tijnextisej nelnelia tiyolpakij. Yeka, moneki tijpiasej toTeotsij itonal, uan ni uelis tijpiasej tlaj timomaijtosej, tijpouasej Biblia uan tlaj kuali timoyoliljuisej ipan tlen tijpouaj. Nojkia, tlaj tijnekij nojua tlauel tiyolpakisej, moneki timoyoliljuisej ipan nochi tlateochiualistli tlen tijpiaj, kuali titlaneltokasej kej sekinok toTeotsij itekipanojkauaj uan tijchiuasej kampeka tijyolpakiltisej Jehová. Kiampa tikitasej nelnelia tlen kiijtoua Salmo 64:10: “Tlakamej tlen itstokej xitlauakej kipakilismakasej toTeko, uan más motemachisej ipan ya uan kiueyimatisej”.