¿TONI UELIS TIKCHIUASKEJ KEMAN TEL TAPATIYOUA?

Xikonneltoka ke nochi moyektalis

¿Tikitani ke kampa tionnemi okachi tapatiyoua uan amo semi miak tiktaniok? ¿Mitsontekipachoua maj amo ueliok xikinixpanolti mochankauan? Nejon uelis kichiuas maj mitstekipacho tein panos satepan. ¿Toni uelis mitsonpaleuis? Tikonneltokas ke nochi moyektalis.

KEYEJ MONEKI

Akin kineltokaj ke nochi moyektalis amo sayoj kichixtokej oso kichatokej maj mochiua tein kuali, ta mochikauaj kichiuaskej seki taman para kuali yetoskej. Seki tapajtianij kiitanij ke akin kineltokaj ke nochi moyektalis kichiuaj nejin:

Kisentokaj yolpakij maski kinpanoua tein amo kuali.
Niman kipataj tein moneki.
Kuali kiixejekouaj toni kichiuaskej para kuali nemiskej, uan nejon kinpaleuia maj paktokan.

TONI UELIS TIKONCHIUAS

Yekinika, xikonnemili keniuj Biblia uelis mitsonpaleuis axkan. Biblia techiluia toni uelis tikchiuaskej keman tapatiyoua. Uelis mitspaleuis xikonmachili ke amo tietok moselti uan xikonmati toni tikchiuas keman okachi motaouijkantalis.

“Tiyektanemilis uan kemej kuali titaixejekos, mitspaleuis kuali tikixtalis teisa” (Proverbios 2:11).

Ojpatika, xikonita toni kijtoua Biblia ke panos satepan. Keman tikonitas ke Biblia techiluia miak taman tein uelis techpaleuis, no tikonnekis tikmatis toni kijtoua ke panos satepan. Tikonmatis ke Dios kineki maj ‘tikchiakan tein kuali satepan’, uan techiluiani keyej uelis tikneltokaskej ke ijkon kichiuas (Jeremías 29:11). Biblia techiluia ke iTaixyekanalis Dios kiyektalis nochi.

¿TONI ITAIXYEKANALIS DIOS, UAN TONI KICHIUAS?

ITaixyekanalis Dios yejua se gobierno tein Dios kiixtalij ompa iluikak uan tein kinixyekanas nochin akin nemij nikan taltikpak (Daniel 2:44; Mateo 6:10). Keman taixyekantos amo akin tajyouis, amo akinok yeski pobre, nochin kualtsin nemiskej uan kipiaskej nochi tein monekis para yolpakiskej. Nejin textos kinextiaj ke ijkon kichiuas:

“Tiyolpakis uan kualtsin tinemis” (Salmo 128:2).

Akin nemiskej keman tekiuajtitos iTaixyekanalis Dios “amo nenkaj motekitiltiskej” (Isaías 65:23).

“Itech taltikpak mochiuas miak takual” (Salmo 72:16).

Miakej takuaujtamatij ke Dios kichiuas tein motenkaua porin kiyekneltokaj ke “yejua amo ueli takajkayaua” (Tito 1:2). ¿Tikonuelitaskia tikonitas toni kijtoua Biblia? Tein Biblia kijtoua ke mochiuas satepan mitspaleuis para tikmatis toni tikchiuas keman okachi tapatiyouas uan mitspaleuis amo xikmouili tein uelis panos satepan.