¿TONI UELIS TIKCHIUASKEJ KEMAN TEL TAPATIYOUA?

Xitetayokoli teisa

Komo mitsouijkistok timoixpanoltis porin tapatiyouak, xa tiknemilia ke amo ueli tiktemaka tein tikpia. Sayoj ke, ¿tikonmatia ke komo tikintayokolia oksekin teisa mitsonpaleuis keman nochi tapatiyoua? Maj tikitakan keniuj uelis tikyekpiaskej totomin uan no tikinmakaskej oksekin tein tikpiaj.

KEYEJ MONEKI

Komo titetayokoliaj teisa, maski tsikitsin, kualtsin timomachiliaj uan tiyolpakij. Seki tapajtianij kijtouaj ke nejon kichiua maj tipaktokan uan maj kuali titanemilikan. Uelis techpaleuis maj tiyolseujtokan uan maj amo timoteltekipachokan, maj amo techkui presión uan nion maj techkui okseki kokolismej. No techpaleuis maj kuali timoseuikan keman tikochij.

“Okachi se yolpaki keman se kitemaka ke ijkuak temakaj” (Hechos 20:35).

Komo timomatij tikinpaleuiskej oksekin, keman tikinmakaj tomin oso okseki taman, no niman tikauaskej maj techpaleuikan keman monekis. Howard akin nemi Inglaterra, kijtoua: “Nosiuatsin uan nejua nochipa tikitstokej akoni uelis tiktayokoliskej teisa oso tikpaleuiskej. Ijkon amo no techouijmaka titajtaniskej maj techpaleuikan keman moneki”. Sayoj ke akin kitemakaj teisa ika nochi ininyolo, amo kichiaj maj kinkepilikan, maski ijkon kipiaskej miak taman tein kuali, porin kinpiaskej inintasojikniuan akin nochipa kinpaleuiskej keman monekis.

“Xiksentokakan xiktemakakan tein nankipiaj, uan namechmakaskej” (Lucas 6:38).

TONI UELIS TIKONCHIUAS

Xikinuanti oso xikinmaka oksekin tein tikpia. Nochipa uelis tikinuantis oksekin teisa maski tel amo teyi tikpia. Uelis tikinuantis maski sayoj emoltsin. Duncan uan ichankauan akin nemij Uganda, semi pobres, sayoj ke, kiuelitaj kitemakaskej tein kipiaj. Duncan kijtoua: “Nochi domingos nosiuatsin uan nejua tikyoleuaj aksa maj takuaki tochan uan tikuantij maski emoltsin. Semi tikuelitaj iniuan tietoskej oksekin”.

Keman tikinmakaskej oksekin tein tikpiaj moneki kuali tikixejekoskej para amo tikinkuejmolkalakiskej tochankauan (Job 17:5).

Xikonchiua nejin: Xikonuanti oso xikonmaka aksa se tapalol oso sayoj teisa tein uelis tayis. Komo teisa amo tikuiok, xikonmaka se motasojikniuj oso aksa akin tikixmati akin uelis kikuis.

No xikontemaka okseki taman. Onkak seki taman tein uelis tiktemakas uan amo moneki tikouas. Xa uelis timokuilis se rato para tikpaleuis aksa uan ijkon tiknextis ke ika timotekipachoua. No uelis tikiluis teisa tein kiyolchikauas. Yejua ika, xikinilui oksekin ke semi tikintasojta uan tiktasojkamati tein kichiuaj.

Xikonchiua nejin: Xikinpaleui oksekin maj kiyekchijchiuakan teisa ininkalijtik, oso xikintakouiti. Xikijkuilouili se motasojikniuj se amatsin oso xiktitanili se mensaje kampa tiktasojkamatilia tein kichiuak oso sayoj para tikiluis ke tikelnamikik.

Komo tikontemoua tikinmakas oksekin tein tikpia, tiyolpakis.

“Amo xikelkauakan nankichiuaskej tein kuali uan nankinpaleuiskej oksekin ika tein nankipiaj” (Hebreos 13:16).

Se takat uan se siuat akin monamiktijkejya kipaleuiaj se siuatsin akin xiuejya maj tachipaua ikalixpan. Siuatsin kinuikilia teisa tein tayiskej keman yejuan tachpantokej uan kiololojtokej xiuit.