Enero

Miakej tokniuan takalpanouanij kiitanij ke itech miak nechikolmej, tayekananij amo semi kixelojtokej tonalmej keman kinnextiliskej okseki tokniuan keniuj kichiuaskej tekit. Komo tejuatsin tiontayekankej, tikonmati ke motelneki se kinnextilis oksekin. No tikonmati ke moneki maj okachi tokniuan takamej tapaleuikan itech nechikolmej axkan uan itech nechikolmej tein satepan mopeualtiskej (Is. 60:22). Biblia kijtoua ke tayekananij moneki kinnextiliskej oksekin keniuj kichiuaskej tekit. Maski ijkon, tejuatsin xa tikonita ke ouij tikonxelos tonalmej keman uelis tikonchiuas nejon. ¿Keyej? Porin moneki tikonyekpias mochankauan uan tiontekitis. Uan no, moneki tikonchiuas tekit tein tikonpia itech nechikol uan okseki taman tein moneki niman tikonchiuas. Sayoj ke, itech nechikol okachi kuali moajsij keman yetokej tokniuan akin kimatij kichiuaskej tekit. w15 15/4 1:2, 3

Akin kimakaj okachi tekimej itech nechikol, moneki amo kinemilis ke niman moneki mopatas kemej mochiua teisa. Moneki kielnamikis ke itech nechikol sayoj moneki kipatas teisa keman monekis oso keman itech inechikol Jiova motemaka se yankuik tanauatil. Amo keman moneki kichiuas sayoj porin kineki. Komo kisentoka kichiua teisa kemej Biblia tayolmajxitia tein kinextilijkej tayekananij, kinextis ke kinpoujkaita. Uan no, tokniuan itech nechikol iuan takuaujtamatiskej. Keman kiuikasya seki xiujmej kemej tayekankej, uelis kipatas seki taman tein monekis tein kinpaleuis tokniuan itech nechikol maj kisentokakan kitojtokakan inechikol Jiova, tein nochipa kipata seki taman. Uan ijkon kemej panoskej tonalmej, Jiova kipaleuis maj ueli kichiua okachi miak taman ke tein kichiujkej akin kinextilijkej keniuj kichiuas tekimej (Juan 14:12). w15 15/4 2:17

Pablo kimakixtijkej “itech itenoj tekuani” (2 Tim. 4:17, TNM). Komo tejuatsin no tikonpanouani se ueyi kuejmol uan tionmomachilia kemej Pablo, ¿toni moneki tikonchiuas? Motelneki xiontakuaujtamati iuan Jiova. Kemej neskayot, xa moneki tikonyekpias se mochankauj akin mokokoua. Komo ijkon, tikyekmatij ke tikontajtaniani Jiova maj mitsonpaleui xikonpia chikaualis uan kuali xikonixejeko toni tikonchiuas. Uelis tionyolseuis porin tikonmati ke Jiova kiajsikamati tein tikonpanotok. Tikonmati ke yejuatsin mitsonpaleuis xiontaxiko uan amo xikonkaua. Sayoj ke, kemansa uelis tikonnemilis ke Jiova amo mitsonpaleuijtok. Tapajtianij xa tataman kinemiliaj keniuj kipajtiskej mochankauj. Oso xa tikonchiaya maj mochankauan mitsonyolseuianij, sayoj ke moita ke kichiuaj maj okachi mitsonouijmaka xikonxiko nejon ouijkayot. Keman ijkon tikonpanotos, motelneki xikonsentoka xikontajtani Jiova maj mitsonmaka chikaualis uan xikonsentoka iuan xionmotoki (1 Sam. 30:3, 6). Satepan, keman tikonajsikamatis keniuj mitsonpaleuij Jiova, mokuali uikalis iuan okachi mochikauas. w15 15/4 4:10, 11

Tiitekitikauan Jiova tikmatij ke Satanás kemaj nemi. ¿Keyej? Porin Biblia kijtoua ke yejua tajtoj iuan Eva ika se kouat (Gén. 3:1-5). No tajtoj iuan Jiova keman kiluij ke Job kitekitiliaya sayoj porin kinekia kiselis tein kuali (Job 1:9-12). Uan no, tajtoj iuan Jesús keman kitemoj kichiuas maj tajtako (Mat. 4:1-10). Uan keman Jesús kiixtalijkej kemej tekiuaj itech xiuit 1914, Satanás peuak kinixnamiki taixpejpenalmej akin mokauayajok nikan taltikpak (Apoc. 12:17). Uan itech nejin tonalmej, Amokuali kisentoka techixnamiki tinochin akin tiktekitiliaj Dios. Uelis tiktaniskej komo tiksentokaj tikixnamikij uan tikpiaj totakuaujtamatilis chikauak. Amo moajsi okse aksa maj okachi moueyineki ke Satanás. ¿Keyej tikijtouaj nejon? Porin moixeuij kijtos ke Jiova amo kinamiki techixyekanas. Uan no, kitemoj kichiuas maj taltikpakneminij kiueyichiuanij yejua uan amo Jiova. Kemej tikitaj, Satanás motelueyineki. Yejua ika, komo tiknekij tiktaniskej, moneki maj amo timoueyinekikan (1 Ped. 5:5). w15 15/5 2:3, 4

Jiova motenkaujtok techmakas se tel kualtsin nemilis satepan. Komo itech titanemiliaj nejon, okachi tiyolpakiskej uan tikpiaskej chikaualis tein techpaleuis maj tiksentokakan tiktekitilikan Dios. ¿Ueli tionmonemilia tikonchiujtok tein yejuatsin motenkaujtok mitsonmakas, yeski ne iluikak oso nikan taltikpak? Komo tejuatsin tikonchia tionnemis nikan taltikpak, xionmonemili ke tiontekititok iniuan motasojikniuan uan nannochin nantapaleuiaj maj nochi taltikpak mokepa se kualtsin xochital. Nejon tekit kiixyekanaskej taltikpakneminij akin moka motekipachoskej. Nochin kitasojtaskej Jiova ijkon kemej tejuatsin tikontasojta. Uan no, amo keman tionkokolispeuas uan tikonpias miak chikaualis, uan amo keman tionmotekipachos. Tionyolpakis porin uelis tikonkuis tein tikonmati tikonchiuas uan ijkon tikonpaleuis oksekin uan tikonueyichiuas Jiova. Uan keman mikemej moajokuiskej, xa uelis tikonpaleuis maj kiixmatikan Dios (Juan 17:3; Hech. 24:15). Keman titanemiliaj itech nochi nejin, tikmatij ke titanemilijtokej itech tein kemaj mochiuas, porin Biblia kijtoua (Is. 11:9; 33:24; 35:5-7; 65:22). w15 15/5 3:15

Ika ichikaualis Jiova, Jesús kichiuak maj onkani tel miak vino tein okachi kuali, kemej kinajsiskia tel miakej taltikpakneminij (Juan 2:6-11). Jesús amo keman kitekitiltij ichikaualis kemej ueliskia mopaleuis yejua. Kemej neskayot, ¿toni kichiuak keman Amokuali kitemouaya maj tajtakouani keman kiluij maj seki tet kikepani pan? Amo kinekik kichiuas (Mat. 4:2-4). Yejua kitekitiltiaya ichikaualis keman kichiuaya tein kuali tein ika kinpaleuiaya oksekin. ¿Keniuj uelis tikchiuaskej kemej yejua? Jesús kijtoj ke moneki timomatiskej tikchiuaskej tein kuali tein ika tikinpaleuiskej oksekin (Luc. 6:38). ¿Uan toni uelis tikchiuaskej? Uelis tikinyoleuaskej maj takuatij tochan. No uelis tepitsin iniuan tiyetoskej satepan ke tamis nechikol, xa keman tikakiskej aksa akin moneki momamachtis se tanojnots. Uan xa uelis tikinpaleuiskej akin momachtijtokej keniuj tanojnotsaskej. Nochipa keman tikuelitaj titemakaskej teisa uan tikinpaleuiaj oksekin, tikchiujtokej ijkon kemej Jesús. w15 15/6 1:3, 4, 6

Komo nochipa tiktakamatij Dios, uelis timakisaskej itech Armagedón. Nejin yeski semej okachi uejueyi tachiualismej tein mochiuani. Tepitsin satepan ke panos Armagedón, peuas tikitaskej okachi miak uejueyi tachiualismej. Nochin taltikpakneminij kinijkuanilijtiyaskej tajtakol (Is. 35:5, 6; Apoc. 21:4). Amo monekisok kikuiskej lentes, topilmej, muletas, tepos tein kinpaleuia maj uelikan takakikan nion sillas de ruedas. Akin makisaskej itech Armagedón tekitiskej uan ijkon kichiuaskej nejin taltikpak se xochital (Sal. 115:16). Keman kiixtajtoltiaj uejueyi tachiualismej tein kichiuak Jesús, akin pouij iniuan “uel miak tagayot” okachi takuaujtamatij ke amo uejkaua senkis amo kipiaskejok kokolis (Apoc. 7:9). Nejin uejueyi tachiualismej technextiliaj ke Jesús techteltasojta (Juan 10:11; 15:12, 13). Teiknelilis tein yejua kinextij no techelnamiktia ke Jiova kinteltasojta itekitikauan (Juan 5:19). w15 15/6 2:16, 17

Itech xiuit 1914, ompa Europa peuak se neteuilis tein ajsik noyampa taltikpak. Tel miakej taltikpakneminij mayanmikkej. Uan itech xiuit 1918, se ueyi kokolis tein kitokaytijkej gripe española kinmiktij okachi miakej taltikpakneminij ke neteuilis tein mochiuak. Nochi nejin pouik itech “neskayot” tein Jesús ika tajtoj (Mat. 24:3-8, TNM; Luc. 21:10, 11). Nejon kinextij ke yejua peuak taixyekana ompa iluikak itech xiuit 1914. Itech nejon xiuit, yejua “kitanito in amokuali taltikpakyetoni, uan kisentoka kachi ok tatantiu” (Apoc. 6:2). Jesús kinkixtij Satanás uan amokuali ejekamej ompa iluikak uan kinpantamotak nikan taltikpak. Satepan ke panok nejon, peuak mochiua nejin tajtolmej tein ixnesij itech tajkuilol tein axkan tikitaj. w15 15/6 4:13

Tatitanil Pablo kijtojka ke sekin kiixnamikiskiaj taneltokalis tein melauak uan peuaskiaj tamachtiskiaj tein amo melauak itech nechikol (Hech. 20:28-30; 2 Tes. 2:3, 4). Nejin peuak mochiua keman nechikol kampa kichiuaj kemej Cristo ayamo kiajxitiaya 100 xiujmej keman peuak moajsi. Ijkuak, semi ouij katka se kimatis akonimej katkaj yekmelauj itekitikauan Dios. Sayoj ke tel miak xiujmej satepan, Jiova, itechkopa Jesús, kiyeknextij akonimej kitekitilijtoyaj itech templo tein yejuatsin kiixtalij. Itech xiuit 1919 senkis moyeknextij akonimej kipiayaj itatiochiualis Dios uan kitekitilijtoyaj itech templo tein Jiova kiixtalij. Yejuan kipatakaj tein monekia itech inintaueyichiualis uan ijkon ueliskiaj kitekitiliskej Jiova kemej yejuatsin kiyolpaktia (Is. 4:2, 3; Mal. 3:1-4). Ijkuak, peuak mochiua se taman tein Pablo kiitak miak xiujmej achto. Ika ichikaualis, Jiova kichiuak maj Pablo kiitani se taman tein mochiuaskia satepan (2 Cor. 12:2-4). w15 15/7 1:6-8

Miakej taltikpakneminij kinemiliaj ke uelis tikitaskej Jesús keman ualas nikan taltikpak, uan ke kinuikas ne iluikak ika ininnakayo. ¿Yejua nejon tein kinpanos tokniuan taixpejpenalmej akin nemiskejok nikan taltikpak? Amo, porin Biblia tamachtia ke amo akin kiitas keman Jesús mokepas. Kijtoua ke ualas “mixtsalan tech ne ejekaixko” uan ke ne iluikak moajsis se ‘neskayot den ika monextis ke ualajtokya Yektagatsin’ (Mat. 24:30). Uan no, Biblia kijtoua ke “nakat uan esti” amo ueli kiseliaj iTekiuajyo Dios. Komo ijkon, ¿keniuj kinuikaskej iluikak taixpejpenalmej akin nemiskejok nikan taltikpak? Biblia kijtoua: “Dios techtakayojpatas ika ne ijsiukayot ijkon keme kuak se tetsilijkopi. Uan Dios techijsiukapatas kuak mokakis ne ten sayo tapitsalis den trompeta” (1 Cor. 15:50-53). Kemej tikitaj, tokniuan taixpejpenalmej akin amo kikauaj Dios uan nemiskejok nikan taltikpak ijsiujka kinsenuikaskej iluikak kemej espíritus. w15 15/7 2:14, 15

Itech Kali kampa tiMosentiliaj, ompa kampa okachi tikueyichiuaj Dios. Tejuan tikitaj nechikolmej kemej se netetayokolil tein yejuatsin techmaka. ¿Keyej? Porin techpaleuia maj okachi kuali timouikakan iuan. Uan no, inechikol Jiova techmaka yolchikaualis uan tamachtilis tein moneki ika nechikolmej. Se ueyi tatiochiualis maj Jiova uan Jesús techyoleuakan itech ‘ininmesa’ (1 Cor. 10:21, TNM). Jiova techiluia itech Biblia ke motelneki maj tikueyichiuatij itech nechikolmej uan maj timoyolchikauatij iniuan oksekin (Heb. 10:24, 25). Kemej tikpoujkaitaj Jiova, amo tiknekij timopolouiliskej nechikolmej; maski kemansa yekmelauj amo uelis tiyaskej. Tiknextiaj ke tikpoujkaitaj nechikolmej keman timomachtiaj achto uan ijkon uelis titanankiliske. w15 15/7 4:3, 4

¿Keyej moneki tiksentokaskej titachixtoskej uan tikchiujtoskej tein moneki? Se taman, porin Jesús technauatij maj titachixtokan uan maj tiijsatokan. Uan no, itech inechikol Jiova miakpa techiluianij maj tiksentokakan titachixtokan uan maj tikchiujtokan tein moneki tein techpaleuis keman ejkos tamilis uan maj tikelnamiktokan ke Jiova motenkaua kichiuas se xochital (2 Ped. 3:11-13, TNM). Yekinika itatojtokakauan Cristo monekia tachixtoskej uan kichiujtoskej tein monekia. Sayoj ke axkan tejuan okachi moneki maj titachixtokan. ¿Keyej? Porin Jesús peuak taixyekana itech xiuit 1914, uan ijkuak peuak timoajsij itech itamian tonalmej. Tein yejua kijtojka ke mochiuaskia itech itamian tonalmej mochiujtokya. Kemej neskayot, okachi mochiua tein amo kuali uan noyampa taltikpak moteixmatiltijtok kuali tanauatilmej (Mat. 24:3, 7-14, TNM). Jesús amo kijtoj kanachi uejkauaskia itamian tonalmej. Yejua ika, okachi moneki maj tikchiujtokan tein moneki porin tamilis ejkos keman amo tikmattoskej. w15 15/8 2:4, 5

Itech Xochital tiyolpakiskej porin kuali timouikaskej iuan Jiova (Mat. 5:3, TNM). Tikitaskej ke okachi moneki tiktekitiliskej Jiova uan semi techyolpaktis tikchiuaskej nejon. Yejua ika, komo tiknekij tikchiuaskej tein moneki tein techpaleuis keman tinemiskej itech Xochital, axkan moneki tiktayekanaltiskej tiktekitiliskej Jiova (Mat. 6:19-21). ¿Keniuj uelis okachi techyolpaktis tiktekitiliskej Jiova? Se taman, komo tikixtaliaj tikchiuaskej seki taman itech itekiyo Dios. Komo titelpoch oso tiichpoch, xiknemili keniuj uelis tikuis monemilis itech itekiyo Jiova. Xa uelis tikixtalis tikchiuas se taman tekit kampa tikuis miak tonalmej. Itech toamaixuan uelis tikajsis toni tataman tekit uelis se kichiuas. No uelis timonojnotsas iniuan tokniuan akin miak xiujmejya kichiuanij nejon tataman tekimej. Komo tikixtalia tiktekitilis Jiova, timomachtis miak taman tein mitspaleuis keman tinemis itech Xochital. w15 15/8 3:13, 14

Tokniuan akin yekyolmajsitokej kinextiaj kualneskayomej tein pouij itech itakilo espíritu. Yolseujtokej, amo yolijsiuij uan kuali se momachilia keman iniuan se yetok (Gál. 5:23). Kimatij kipiaskej se kuali tanemilil keman kipanouaj ouijkayomej uan amo kinemiliaj ke amo teyi ueli mochiuaok keman amo panoua tein kichiayaj. Keman momachtiaj Biblia, kitemouaj tayolmajxitilis tein kinpaleuis maj kimatikan toni kuali yetok uan toni amo kuali yetok, uan ompa kikuij tein momachtiaj uan ijkon uelis kuali taixpejpenaskej. Yolyemankej uan kimatij ke nochipa okachi kuali maj se kichiua tein techyolmajxitia uan technauatia Jiova. Uan no, kitetapouiaj kuali tanauatilmej ika yolpakilis uan kichiuaj nochi tein uelij tein tapaleuia maj nochin kuali mouikakan itech nechikol. Yeski miak xiujmejya tiktekitilijtokej Jiova oso ayamo, tinochin moneki timotajtaniskej: “¿Toni okachi moneki nikyekchiuas uan ijkon okachi nitamatis kemej Jesús?”. w15 15/9 1:6, 7

Imomachtijkauan Jesús kiitakej nejnentiyaya aixko itech ueyiat tein poui Galilea. Pedro kitajtanij Jesús ox ueliskia nejnemis aixko ijkon kemej yejua. Jesús kiluij ke kemaj. Yejua ika Pedro kisak itech barco uan peuak nejnemi kiajsiti Jesús. Sayoj ke satepan ke tepitsin nejnemik, peuak pankalaki. ¿Keyej? Porin kiitak chikaujkaejekat uan mouik. Yejua ika Pedro kitajtanij Jesús maj kipaleuiani. Jesús kimakitskij uan kiluij tajtolmej tein ixnesij itech tajkuilol tein axkan tikitaj (Mat. 14:24-32). Keman Jesús kinotsak Pedro, yejua kisak itech barco uan nejnemik aixko. ¿Keyej kichiuak nejon? Porin takuaujtamatia ke Jiova kipaleuiskia ijkon kemej kipaleuijtoya Jesús. Akin tikchiuaj kemej Cristo no tikchiujkej se taman kemej nejon. Keman timomachtijkej itech Biblia ke Jesús techyoleua maj timochiuakan tiimomachtijkauan, timotemaktijkej iuan Jiova uan timoauijkej. ¿Keyej? Porin semi titakuaujtamatiaj ke Jiova uan Jesús techpaleuiskiaj (Juan 14:1; 1 Ped. 2:21). w15 15/9 3:1, 3

Se kuali tepopaj kinyekpia ikoneuan ika tein uelis kinijtakos. Yejua nejon tein Jiova kichiua. Xiontanemili itech nejin neskayot. Keman tikitaj ke se teisa uelis kijtakos toixtololouan, nimantsin timoixtsakuaj porin tikinyekpiaj. No ijkon, Jiova ijsiujka kichiua tein moneki uan ijkon techmatampauia ika tein uelis techijtakos porin techtasojta (Zac. 2:8). Seki itekitikauan Dios momikilianij porin amo kikauaj yejuatsin. Nejon kipanok Esteban uan okseki itatojtokakauan Cristo. Ika nejin tikitaj ke Jiova amo nochipa kitsakuilia maj itekitikauan momikilikan. Sayoj ke kemaj kinmatampauia senoloch itekitikauan keman kinnejmachtia ika tataman tamekauilis tein Satanás kitalia toixpan (Efes. 6:10-12). Uelis tikajsiskej nejin tanejmachtilismej itech Biblia uan itech amatajkuilolmej tein mochijchiua itech inechikol Dios. Kemej neskayot, Jiova technejmachtia keniuj uelis techijtakos seki taman tein onkak itech Internet, komo tiktayekanaltiaj timotomintiskej uan keniuj no techijtakoua auilnemilis uan tateuilis tein moita itech seki películas, amatajkuilolmej uan videojuegos. Moyekita ke Jiova techtasojta uan kineki techmatampauis. w15 15/9 4:15, 17

Jiova kinpaleuiani itekitikauan keman moneki yaskej ininixpan tekiuanij uan tajtanij maj kinkauakan maj tanojnotsakan (Filip. 1:7). Keman seki tekiuanij kitemouanij kitaliskej se tanauatil tein kinextia ke amo uelis se tanojnotsas, tiyanij ininixpan uejueyi tamelauanij iniuan titajtotij. Itech xiuit 2000 hasta axkan tiktankejya 268 kuejmolmej ininixpan okachi uejueyi tamelauanij semanauak taltikpak; itech nejin tapoual, 24 tiktaninij ininixpan Tribunal Europeo de Derechos Humanos. Moyekita ke amo akin ueli kichiua maj Jiova amo kinpaleui itekitikauan (Is. 54:17). ¿Toni no kinextia ke Dios techpaleuijtok? Se taman tein kinextia yejua ke tanojnotsalis mochiujtok semanauak taltikpak (Mat. 24:14; Hech. 1:8). Okse taman yejua ke tinochin tiitekitikauan Dios kuali timouikaj, maski uejuejka tikayomej. Hasta seki taltikpakneminij akin amo kitekitiliaj Jiova kijtouaj: “Ueyi melau ke Totajtsin Dios namouan yetinemi” (1 Cor. 14:25). Kemej tikitaj, tikpiaj miak taman tein kinextia ke Dios techpaleuijtok (Is. 66:14). w15 15/10 1:13, 14

Tatitanil Pablo kijtoj maj tikchiuakan “keme yeskia amo teyi [ti]kitstinemij de ongak nikan taltikpak” (1 Cor. 7:29-31). Yejua ika moneki timoyekpiaskej uan ijkon amo tikteltekitiltiskej tein onkak itech nejin taltikpak. Amo nochi teijtakoua, sayoj ke komo amo tikchiuaj tein tayolmajxitij Pablo, tein onkak nikan taltikpak uelis kichiuas maj tikpolokan miak tiempo. Uan ijkon ueliskia amo tikyekchiuaskej tein okachi tayekantok: tiktekitiliskej Jiova (Efes. 5:15-17). ¿Itech toni uelis tikpoloskej totiempo? Itech neixpetanilis, tikixtajtoltiskej amaixmej, tikitaskej televisión, tipaxaloskej, tiktemoskej tein uelis timokouiliskej, timotajkuilouiliskej iuan aksa, tikitaskej kampa motematiltia tein mochiujtok itech okseki xolalmej oso keniuj mokaujkej mauiltianij, oso tiktemoskej okachi yankuik teposmej uan okseki taman tein pajpatiyoj. Miakej semi kitayekanaltiaj nejin uan amo ueli kikauaj (Ecl. 3:1, 6). Satanás kitemoua techtapololtis ika tein onkak nikan taltikpak ijkon kemej kitemoj kichiuas iniuan yekinika itatojtokakauan Cristo (2 Tim. 4:10). Sayoj ke Biblia techiluia tajtolmej tein ixnesij itech tajkuilol tein axkan tikitaj. w15 15/10 3:7, 8

Manóah uan inamik kipiaskiaj se konetsin. Takat semi yolpakik, sayoj ke no tanemilij itech ueyi tekit tein axkan kipiaskiaj. Itech nejon tonalmej, miakej israelitas kichiuayaj tein amo kuali. ¿Keniuj Manóah uan inamik ueliskiaj kimachtiskej ininkonetsin maj kitekitili uan maj kitasojta Jiova? Manóah kitajtanij Jiova maj oksepa kititanini ángel maj kiniluiani keniuj kiiskaltiskiaj konetsin (Juec. 13:1-8). Komo tejuatsin tikonpia konemej, tikyekmatij ke tikonajsikamati Manóah. Tejuatsin no moneki tikonmachtis mokoneuan maj kitekitilikan uan maj kitasojtakan Jiova (Prov. 1:8). ¿Toni mitsonpaleuis kuali xikonchiua nejin tekit tein tikonpia? Se taman, motelneki xikonchiua nochi semanas taueyichiualis kemej kalyetouanij. Nejon mitsonpaleuis xikonmachti mokoneuan keniuj tamati Jiova uan toni tamachtia Biblia (Deut. 6:6-9). ¿Toni no uelis mitsonpaleuis? w15 15/11 1:1, 2

Tejuatsin amo ueli tikonmati toni kinemiliaj mokoneuan kemej Jesús, sayoj ke uelis tikontemos tikonajsikamatis. Jiova mitsonpaleuis xikonita ininkualneskayouan. Uan komo kemansa mopolouaj, amo keman xikonijto ke amo yolkualmej oso ke amo keman kiyekchiuaskej teisa. Okachi kuali xikonilui ke tikonita ininkualneskayouan uan ke tikonmati ke kinekij kuali kichiuaskej teisa. Xikonita keniuj mochikauaj okachi kuali kichiuaskej teisa uan xikonilui ke semi kuali tein kichiuaj. Uan keman uelis, xikonmaka okachi tekimej tein kinpaleuis maj okachi kuali kichiuakan teisa. Yejua nejon kichiuak Jesús iniuan imomachtijkauan. Se xiuit uan tajko satepan ke kiixmatik, Jesús kiixtalij Natanael kemej tatitanil. Uan Natanael kuali kichiuak tekit tein Jesús kimakak (Luc. 6:13, 14; Hech. 1:13, 14). Amo keman xikonchiua maj mokoneuan kimachilikan ke amo teyi kuali kichiuaj. Okachi kuali xikonyolchikaua uan xikonilui ke kuali tein kichiujtokej. Xikonilui ke tejuatsin uan Jiova nanyolpakij nankiitaskej keniuj mochikauaj, uan ke uelis kikuiskej tein ueli kichiuaj uan ijkon kitekitiliskej Jiova. w15 15/11 2:15, 16

Keman itech xiuit 1914 peuak itamian tonalmej, sayoj moajsiaj kemej 5,000 itekitikauan Dios. Maski kipiakej kuejmolmej, nejon tokniuan taixpejpenalmej kisentokakej kiteixmatiltijkej kuali tanauatilmej porin kintasojtayaj oksekin uan kinpaleuiaya yektikatsin espíritu. ¿Toni kiualkuik nejon? Ke axkan kinsentilijtokej “uel miak tagayot” akin kichiaj nemiskej nochipaya nikan taltikpak. Axkan moajsij kemej chikueyi millones itaixpantijkauan Jiova. Nochin yejuan mosentiliaj itech panoua 115,400 nechikolmej tein moajsij noyampa taltikpak. ¡Uan kisentokaj okachi momiakiliaj! Kemej neskayot, itech metsti septiembre xiuit 2013 hasta metsti agosto xiuit 2014 moauijkej panoua 275,500 taltikpakneminij. Nejin kijtosneki ke sejse semana moauijkej kemej 5,300. Okachi momiakilijtokej itekitikauan Jiova porin titakuaujtamatij iuan Dios uan tikneltokaj ke yejuatsin itanemililuan tein ijkuiliujtok itech Biblia (1 Tes. 2:13). Maski Satanás techtauelita uan techixnamiki, tiksentokaj tiyolpakij porin kuali timouikaj iuan Jiova (2 Cor. 4:4). w15 15/11 4:12, 14, 16

Miak taixmatinij kiixtajtoltianij tel miak yekinika amatajkuilolmej tein mochijchiujkej ne uejkauj. ¿Uan toni kiajsinij? Ke sayoj onkak seki tajkuilolmej tein taman ijkuiliujtokej, uan amo kipata tein Biblia ika tajtoua porin sayoj tepitsin tein mopata. Akin momachtiaj Biblia uan kipiaj kuali ininyolo kiyekmatij ke ininmako kipiaj iTajtol Dios. Maski miakej kitemouanij kiixpoloskej, Biblia ueli moixtajtoltia axkan itech panoua 2,800 tataman tajtolmej. Amo moajsi okse amatajkuilol tein mokepani itech miak tajtolmej, maski miakej amo kineltokaj Dios. Melauak ke seki Biblias amo semi kuali motajtolkepanij oso ouij se kinixtajtoltia. Sayoj ke okachi miak Biblias tein kitajtolkepanij kinextiaj ke uelis tikchiaskej tein kuali satepan uan ke tinemiskej nochipaya. w15 15/12 1:13, 14

Tein tikijtouaj ueli kichiua maj oksekin okachi kuali momachilikan oso maj okachi amo kuali momachilikan. Miakej tetajyouiltiaj uan teyolxokoliaj ika tajtolmej tein kikuij, kemej yeskia ika se espada oso se flecha (Sal. 64:3). Peua ijkon tajtouaj ika tein kiitaj itech películas uan seki taman tein kisa itech televisión. Sayoj ke akin tikchiuaj kemej Cristo amo keman tikuij amo kuali tajtolmej oso tein teyolxokoliaj, nion ijkuak tiauiltajtouaj. Amo kijtosneki ke amo kuali yetok maj se kijto teisa tein teuetskitij, uan nejon uelis tapaleuis maj okachi se yolpaki keman se monojnotsa. Sayoj ke moneki amo keman tikijtoskej teisa tein teyolxokolia oso tikejkeloskej aksa sayoj porin tiknekij tikinuetskitiskej oksekin. Biblia kijtoua ke moneki amo tikijtoskej pitsotik tajtolmej nion tein amo kinextia poujkaitalis, ta maj ika titajtokan tein kinpaleuis uan tein kinyolchikauas oksekin (Efes. 4:29, 31). w15 15/12 3:10

Tein oloch taojtokaltianij itech yekinika siglo kijkuilojkej itamiampa nejin tajkuilol mokepani kemej “Kuali xiyetokan”. Maski nejin tajtolmej sayoj katka se taman kemej monauatiayaj, techelnamiktia ke tinochin totech moajsi maj tiknekikan kuali tiyetoskej. Kemej titajtakouanij, tiksentokaskej tikokolispeuaskej. Uan tikitakejya ke axkan amo uelis tikchiaskej maj Jiova kichiua se ueyi tachiualis tein ika techpajtis. Sayoj ke tikmatij ke satepan Dios kemaj senkis techijkuanilis kokolis. Tatitanil Juan ika tajtoj se “at ten kitemaka nemilis” uan “kuouit ten kitemaka nemilis” tein imaxiujyo “kualtia para kinpajtitiu nochi in taltikpakuani” (Apoc. 22:1, 2). ¿Ika tajtojtoya se taman xiujpaj tein uelis titayiskej axkan oso itech Xochital? Amo, ta kijtosnekia nochi tein Jiova uan Jesús kichiuaskej uan ijkon uelis tinemiskej nochipaya (Is. 35:5, 6). w15 15/12 4:17, 18

Jiova kijtoj ke itech totonaluan, “majtakti takamej” akin tajtouaj nochi tataman tajtolmej itech nochi altepemej kikitskiskiaj itaken se “judío” uan kijtoskiaj: “Tiknekij tiyaskej namouan, porin tikakinij ke Dios yetok namouan” (Zac. 8:23). “Judío” kinixnextia tokniuan akin Dios kinixpejpena ika iyektikatsin espíritu. Biblia no kintokaytia “Israel ten Yejuatsin moinaxkatilij” (Gál. 6:16). Uan “majtakti takamej” kinixnextiaj akin kichiaj nemiskej nochipaya nikan taltikpak. ¿Keyej kinekij yaskej iniuan tokniuan taixpejpenalmej? Porin kimatij ke Jiova kinselia uan porin kiitaj kemej se ueyi tatiochiualis iniuan kiueyichiuaskej Dios. Ijkon kemej Zacarías, Jesús tamachtij ke itekitikauan Dios kuali mouikaskiaj. Yejua kintokaytij “amo ueyi oloch ichkamej” akin kichiaj nemiskej ompa iluikak. Uan kintokaytij ‘okseki ichkamej’ akin kichiaj nemiskej nikan taltikpak. Jesús kijtoj ke nochin yejuan yeskiaj “sayo se sen oloch” ichkamej uan ke kitojtokaskiaj yejua kemej “sayo se tapixke” (Luc. 12:32, TNM; Juan 10:16). w16.01 4:1, 2

Moneki timoyekpiaskej porin tinemij itech tonalmej keman Satanás taixyekantok uan titajtakouanij. Komo amo ijkon tikchiuaj, uelis peuas titanemiliskej uan tikchiuaskej tein kichiuaj oksekin akin amo kitekitiliaj Jiova. Yejua ika moneki tikyekpiaskej tokuali uikalis iuan. Sayoj ke moneki tikchiuaskej se ueyi chikaujkayot. Kemej yeskia tiajkuitokej itech se ueyiat sayoj ke tikixnamiktokej. Komo amo tiknekij maj techuika ueyiat, moneki tiajkuiskej ika nochi tochikaualis. Tanojnotsalis techpaleuia maj tikyekpiakan tokuali uikalis iuan Jiova. ¿Keyej? Porin keman ika titajtouaj Dios uan Biblia, sayoj titanemiliaj itech tein okachi kuali uan tein okachi moneki. Amo titanemilijtokej itech tein kijtakoua totakuaujtamatilis. Tanojnotsalis kichikaua totakuaujtamatilis porin techelnamiktia tein Dios motenkaujtok uan itanauatiluan. Uan no, techpaleuia maj tiksentokakan tikpiakan kualneskayomej tein techpaleuia maj amo techijtako Satanás uan tein kiixyekantok (Efes. 6:14-17). Titanojnotsaskej, timomachtiskej uan tikinpaleuiskej tokniuan no techpaleuia maj tikyekpiakan tokuali uikalis iuan Jiova porin amo timoteltekipachouaj ika kuejmolmej tein tikpiaj. w16.01 5:12, 13

Rut kiteltasojtaya Jiova. Yejua ika se israelita akin monotsaya Boaz tel kuali ika tajtoj porin kitemoj maj Jiova kimatampauiani “iajtapaltampa” (Rut 2:12). Tein kijtoj Boaz techelnamiktia keman se totokonet mokalakia iajtapaltampa imomaj maj kimatampaui (Sal. 36:7; 91:1-4). Yejua nejon kichiuak Rut. Yejua kitemoj inetasojtalis Jiova uan maj yejuatsin kimatampauiani, uan Dios kitatiochiuij porin iuan takuaujtamatik. Rut amo keman moyolnonotsak porin kiixpejpenak kichiuas nejon. Axkan, miakej taltikpakneminij kiixmatij Jiova, sayoj ke amo kiixtaliaj kitemoskej maj kinmatampaui. Amo kiixtaliaj motemaktiskej iuan uan moauiskej. Komo tejuatsin ijkon tionmomachilia, ¿toni uelis mitsonpaleuis? Yekinika, xikonnemili keyej ayamo tikonixtalia tionmotemaktis iuan Jiova. Ojpatika, xikonelnamiki ke itech nejin taltikpak tinochin ipa tiktekitiliaj aksa, yeski Jiova oso semej tiotsitsin (Jos. 24:15). Tein okachi kuali tein uelis tikixtaliskej yejua tiktekitiliskej Dios akin melauak. Uan expatika, xikonelnamiki ke keman timotemaktiaj iuan Jiova, tiknextiaj ke titakuaujtamatij ke yejuatsin techmatampauis uan ke techpaleuis keman tikpiaskej tein yeski kuejmol. Yejua nejon tein Dios kichiuak iuan Rut. w16.02 2:6, 7

Keman Abisai kinekik kimiktis Saúl, kinekia senkis kipaleuis David. Sayoj ke amo kiajsikamatia ke komo kijtakouaya “itaixpejpenal Jiova”, amo kitakamattoskia tein Dios kiixtalia. David kemaj kiajsikamatia nejon, uan yejua ika amo kikauak Abisai maj kimiktiani Saúl (1 Sam. 26:9-11). ¿Toni techmachtia nejin nepolol tein kipiak Abisai? Ke ijkuak amo tikyekmatiskej akoni moneki tikyolpaktiskej, moneki tiknemiliskej toni tayolmajxitilis tein kitemaka Biblia techpaleuis maj kuali titaixpejpenakan. Totech moajsi maj tiknekikan tikchiuaskej tein kinyolpaktis akin tikintasojtaj, kemej tochankauan uan totasojikniuan. Sayoj ke moneki timoyekpiaskej, porin titajtakouanij uan tein tikmachiliaj uelis techkajkayauas uan techuikas maj amo tiktakamatikan tein Dios kiixtalia (Jer. 17:9). Yejua ika, komo se tochankauj oso se totasojikniuj kichiua teisa tein amo kuali uan kikaua Jiova, maj tikelnamikikan ke okachi moneki tikyolpaktiskej Dios uan amo se taltikpaknenkej (Mat. 22:37). w16.02 4:5, 6

Telpoch, nejin tajtolmej kinextiaj ke tejua moneki tikitas ke tikchiuas tein Dios kijtoua yejua tein okachi kuali. Xitanemili itech tein kipanok telpoch Timoteo. Yejua kuali kiixmatia tein tamachtia iTajtol Dios porin imomaj uan iueyinan kimachtijkej. Sayoj ke Pablo kiluij: “Xiktakamatiu nochi tanextililisme ten timomachtij ya uan ten tikyekneltokak ya” (tejuan tiktalilijkej cursivas; 2 Tim. 3:14, 15). Kemaj, Timoteo kineltokak ke tamachtilis tein melauak moajsia itech iTajtol Dios. Sayoj ke ¿keyej kineltokaya? ¿Sayoj porin imomaj uan iueyinan kiluijkej ke yejua tein melauak? Amo. Tein melauj kineltokaya porin ‘moyekixejekoltij’, oso tanemilij itech tein momachtijka, uan nejon kipaleuij maj kineltoka ke yejua tein melauak (1 Tes. 5:21). Komo timomachtia Biblia ika nejmachkayot, uelis tiknankilis netajtanilmej, tikmelauas tein ayamo tikyekajsikamati uan tikyekitas ox melauak tein tikneltoka (Hech. 17:11). w16.03 2:3, 4, 7

Keman israelitas yayaj Jerusalén iluichiuatij, nochin mosenpaleuiayaj. Motakuijkuiliayaj uan satepan mopaleuijtiyayaj keman ojtokatoyaj. Keman ajsiaj templo, kisenueyichiuayaj Jiova. Tejuan tikchiujtokej tein techpaleuis maj tinemikan itech yankuik taltikpak. Yejua ika motelneki maj no timosenpaleuikan uan maj tisentekitikan. Akin amo kiixmatij Jiova xexeliujtokej uan moteuiaj ika tein yeski taman. Sayoj ke ika inepaleuil yejuatsin, tejuan tiyolseujtokej uan tikajsikamatij tein tamachtia Biblia. Uan no, itech nejin itamian tonalmej okachi timosenpaleuiaj. Ijkon kemej kitematiltijkej Isaías uan Miqueas, tinochin tipankisaj itech “tepet tein iaxka Jiova” (Is. 2:2-4; Miq. 4:2-4). Komo tiksentokaj timosenpaleuiaj, tikseliskej miak tatiochiualismej. Amo uejkaua tikitaskej tonal keman tinochin tiksenueyichiuaskej Jiova nikan taltikpak. w16.03 3:16, 17

Seki tayekananij amo semi kixelouaj tonalmej keman kinnextiliskej oksekin keniuj kichiuaskej tekit. Xa kinemiliaj ke okachi tayekantok okseki taman uan moneki niman kichiuaskej. Oso xa kinemiliaj ke nechikol amo teyi kipanos. Tikmatij ke moajsi seki taman tein niman moneki mochiuas. Sayoj ke komo axkan amo kinnextiliaj oksekin keniuj kichiuaskej tekit, uelis kijtakojtoskej nechikol. Komo tayekananij sayoj kichiuaj tekit itech nechikol uan yejua ika amo uelijok kinnextiliaj oksekin keniuj kichiuaskej tekit, satepan itech nechikol amo moajsiskej miakej tokniuan takamej akin uelis kichiuaskej nochi tekit tein moneki. Amo keman maj tiknemilikan ke amo motelneki se kinnextilis oksekin keniuj kichiuaskej tekit. Tayekananij akin kinejnekij maj kuali yeto nechikol satepan, kixelouaj tonalmej keman kinnextiliskej oksekin. Akin kichiuaj nejin, kinextiaj ke kuali tayekananij uan tokniuan semi kitasojkamatij (1 Ped. 4:10). w15 15/4 1:4, 6, 7