Febrero

Tiitaixpantijkauan Jiova tikpiaj se taman tein kitelpia ipatiuj. Kuali timouikaj iuan Jiova. Motelneki maj tiktemokan tikchikauaskej nejon kuali uikalis nochi tein tiueliskej. ¿Keyej? Porin tein onkak nikan taltikpak kampa Satanás taixyekantok uan kemej titajtakouanij, uelis kijtakos nejon kuali uikalis. ¿Tikonita Jiova kemej se yekmelauj motasojikniuj? ¿Tikonuelitaskia okachi tikonchikauas mokuali uikalis iuan? Santiago 4:8, tajkuilol tein axkan tikitaj, techiluia keniuj uelis tikchiuaskej. Kinextia ke tejuan uan Jiova moneki tikchiuaskej teisa uan ijkon uelis kuali timouikaskej. Komo tejuatsin tionmotokia iuan Jiova, yejuatsin motokis mouan. Keman okachi tionmotokis iuan, okachi mochikauas mokuali uikalis iuan uan okachi tikonitas kemej yekmelauj motasojikniuj. Uan tejuatsin tionmomachilis kemej Jesús keman kijtoj: “Akin nechualtitanik yekmelauj nemi”. Uan no kijtoj: “Nejua nikixmati” (Juan 7:28, 29, TNM). w15 15/4 3:1, 2

Xa se mochankauj kikalankixtijkej itech nechikol. Tejuatsin tikonmati ke Biblia kijtoua maj amo titajtokan iniuan akin kinkalankixtijkej (1 Cor. 5:11; 2 Juan 10). Sayoj ke kemej semi tikontasojta mochankauj, xa tikonnemilis ke nejon tanauatil semi ouij se kitakamatis. ¿Keniuj uelis mitsonpaleuis Jiova? Yejuatsin mitsonmakas chikaualis tein monekis uan ijkon amo tikonkauas Dios uan no tikontakamatis. Xiontakuaujtamati iuan Jiova uan itech nejon ouijkayot xikontemo keniuj okachi tionmotokis iuan yejuatsin. Moneki tiktasojtaskej Jiova okachi ke okse aksa (Mat. 22:37, 38). ¿Keyej? Porin yejua nejon tein okachi kinpaleuis tochankauan, yeski itekitikauan Jiova oso amo. Uan komo mitsontekipachoua kemej monejnemiltia se mochankauj akin kikalankixtijkej itech nechikol, xikontapoui Jiova keniuj tionmomachilia (Filip. 4:6, 7). w15 15/4 4:14, 16

Se moyolpaktis porin se kipia teisa tein kuali oso se kichiuak teisa tein kuali amo kijtosneki ke amo kuali yetok. Kemej neskayot, amo moneki timopinaujmatiskej ika tochankauan, tein timomattokej tikchiuaskej oso kampa tiyolkej (Hech. 21:39). Sayoj ke komo timoueyinekij, uelis tikijtakoskej tokuali uikalis iniuan oksekin, uan okachiok, tokuali uikalis iuan Jiova. Ueyinekilis uelis techuikas maj amo tikuelitakan maj techyolmajxitikan uan maj amo tikchiuakan tein techyolmajxitiaj (Sal. 141:5). Akin moueyinekij kimachiliaj ke tel ueyichiuanimej uan kinemiliaj ke okachi kuali kichiuaj teisa ke oksekin. Jiova amo kiyolpaktia maj taltikpakneminij ijkon tanemilikan (Ezeq. 33:28; Amós 6:8). Sayoj ke Satanás kitelyolpaktia maj taltikpakneminij moueyinekikan kemej yejua. Tikyekmatij ke semi yolpakik keman Nemrod, Faraón, uan Absalón motelueyichiujkej (Gén. 10:8, 9; Éx. 5:1, 2; 2 Sam. 15:4-6). w15 15/5 2:5, 6

Keman Jesús yetoya nikan taltikpak, kichiuak ijkon kemej iTajtsin uan kinmakak miakej taltikpakneminij tein kinpolouaya (1 Cor. 1:24). Sayoj ke nejon amo kichiuak porin kinekia kinextis ke kipiaya miak chikaualis. Kichiuak porin yekmelauj kinekia kinpaleuis. Kemej neskayot, maj tikitakan tein kijtoua Mateo 14:14-21. Tel miakej taltikpakneminij akin ualeuayaj itech tataman xolalmej ojtokakej uan ajsitoj kampa moajsia Jesús (Mat. 14:13). Keman tapoyauik, imomachtijkauan kiitakej ke taltikpakneminij sioujtoyaj uan mayanayaj. Yejua ika kiluijkej Jesús maj kiniluiani nochin maj yanij uan maj mokouilianij tein kikuaskiaj. ¿Toni kichiuak Jesús? Kintamakak nejon tel miakej taltikpakneminij ika sayoj makuil pan uan ome amichimej. Uan kinmakak miak takual, porin Biblia kijtoua ke nochin takuajkej hasta ixuikej. Tein kikuajkej kinmakak chikaualis tein kinpaleuiskia maj taxikouanij keman mokepaskiaj ininchan kampa semi uejka katka (Luc. 9:10-17). Mokauak miak takual, ta imomachtijkauan kipexontijkej 12 chikiujmej. w15 15/6 1:8, 9

Maski itech nejin tonalmej semi moita auilnemilis, Jiova uelis techpaleuis maj tichipaujkanemikan. Tinochin titajtakouanij. Yejua ika uelis techyoltilanas seki taman tein amo kuali, ijkon kemej amichimej kinyoltilana takual tein ika kinkitskiaj. ¿Toni moneki tikchiuaskej komo tiknemiliaj teisa tein amo kuali? Moneki niman timoijkuaniliskej nejon tanemilil. Komo amo timoijkuaniliaj, nejon tanejnekilis okachi moskaltis. Uan keman timoajsiskej kampa uelis tikchiuaskej tein tiknemiliaj, xa titajtakoskej (Sant. 1:14, 15). Yejua ika, komo tiknekij tikyolpaktiskej Jiova, moneki timoyekpiaskej ika tein tiknemiliaj. Komo timoijkuaniliaj amo kuali tanejnekilis, amo tiauilnemiskej nion tikijyouiskej tein amo kuali tein kiualkui nejon tajtakol (Gál. 5:16). w15 15/6 3:1-3

Kemej 6,000 xiujmej achtoya, nikan taltikpak mochiuaya itanejnekilis Dios. Yejua ika kijtoj ke nochi “tel kuali katka” (Gén. 1:31). Sayoj ke Satanás taixnamikik, uan tel miakej taltikpakneminij itech nejon tonal uan hasta axkan peuak amo kichiuaj tein Dios kineki. Maski ijkon, axkan moajsij panoua chikueyi millones itekitikauan Jiova, akin amo sayoj tajtanij maj mochiua itanejnekilis nikan taltikpak, ta no mochikauaj kichiuaskej. Mochikauaj kiyolpaktiskej Jiova uan kintapouiskej oksekin ika yolpakilis tein iTekiuajyo kichiuas. Tiitekitikauan Dios tiksentokaskej titajtaniskej maj mochiua itanejnekilis nikan taltikpak hasta keman yejuatsin kinixpolos akin kitauelitaj. Ompa, taltikpak mochiuas se xochital uan tel miakej akin momikilijkej oksepa nemiskej (Juan 5:28, 29). Semi tiyolpakiskej keman oksepa tikinitaskej tochankauan uan totasojikniuan akin momikilijkej. w15 15/6 4:15, 17

Miakpa, itech toamaixuan moijtoua ke itech ixolal Dios kemej yeskia moajsij itech se xochital. ¿Keyej? Porin Jiova kinmaka yolseuilis akin ompa pouij. Nejin kiyeknextia ke sayoj yejuan kiueyichiuaj Dios kemej yejuatsin kiixtalij. Uan ueli kiueyichiuaj Dios porin imikilis Cristo kinpaleuia (Mal. 3:18). Semi techyolpaktia tikmatiskej ke itech xiuit 1919 uan hasta axkan, Jiova kinkauani taltikpakneminij tajtakouanij maj kiyekpiakan uan maj kipatauakan nejin xochital. ¿Tiontapaleuijtok tejuatsin maj ijkon mochiua? ¿Tikonpatiuita ueyi tatiochiualis tiontekitis iuan Jiova uan ijkon tikonueyitalis nikan taltikpak? w15 15/7 1:10, 11

Gog kiixnamikis ixolal Dios keman nemiskejok taixpejpenalmej nikan taltikpak. ¿Toni tikchiuaskej keman peuas nejon taixnamikilis? Biblia kijtoua: “Amo monekis nantateuiskej itech nejin neteuilis. Ximoketsakan, amo teyi xikchiuakan, uan xikitakan keniuj Jiova namechmakixtia”. Uan no kijtoua: “Amo ximouikan nion ximotelmoujtikan” (2 Crón. 20:17). Kemej tikitakejya, tepitsin satepan keman Gog peuas taixnamikis, tokniuan taixpejpenalmej akin nemiskejok nikan taltikpak kinuikaskej iluikak. ¿Toni panos satepan? Apocalipsis 17:14 kimelaua ke akin kiixnamikiskej ixolal Dios “kiteuiske Yejuatsin ten tamati keme ichkatsin”. Sayoj ke no kijtoua ke Cristo uan “nochi nekes ten Totajtsin Dios kinijitak uan kinnotsak ma takuautamatinemikan iuan” kintaniskej (tejuan tiktalilijkej cursivas). Nejin kinextia ke Jesús uan 144,000 tekiuanij ne iluikak kimakixtiskej ixolal Dios nikan taltikpak. w15 15/7 2:16

Jiova techyoleua maj tiyakan nechikolmej. Uan yejuatsin kiita keniuj timotakentiaj keman tiyouij uan tein tikchiuaj ompa. Yejua ika tiknekij tikchiuaskej nochi tein taixejekol. Jiova kineki maj tejuan uan akin tikinyoleuaj kualtsin timomachilikan itech Kali kampa tiMosentiliaj. Sayoj ke amo tiknekij tikchiuaskej teisa tein kinextis ke amo tikpoujkaitaj nechikolmej. Yejua ika amo titakentiyouij kemej ijkuak tipaxalotij oso timauiltitij. Amo no timotajkuilouilijtokej iuan aksa, nion titajtojtokej iniuan oksekin, nion titakuajtokej nion titatayitokej keman mochiujtok nechikol. Uan no, tetatmej kinmachtiaj ininkoneuan ke amo kuali yetok maj tsitsikuintokan nion mauiltijtokan. Itech Kali kampa tiMosentiliaj tikueyichiuatij Jiova uan timomachtitij keniuj tamati yejuatsin. Yejua ika, ompa amo ika titajtouaj tanamakalis oso ika tein nion tepitsin mouika ika itekiyo Dios (no xikonita Nehemías 13:7, 8). Maj tikelnamikikan ke keman Jesús kinitak seki taltikpakneminij tanamakatoyaj itech templo, tel kualanik uan kinkalantokak (Juan 2:13-17). w15 15/7 4:7, 8

Biblia kijtoua ke taltikpakneminij okachi mochiuaskej tel amo yolkualmej itech itamian tonalmej (2 Tim. 3:13; Mat. 24:21; Apoc. 12:12). Yejua ika, maski ipa mochiujtokya tein amo kuali, tikmatij ke kisentokas okachi motaouijkantalis. Sayoj ke ¿kijtosneki nejon ke achto ke ejkos tamilis moneki okachi mochiuas tein amo kuali? Sekin xa kinemiliskej ke achto ke peuas okachi ueyi tajyouilis, itech nochi uejueyi altepemej moneki onkas mayan, kokolismej uan neteuilismej (Apoc. 7:14). Sayoj ke nejon amo panos. ¿Keyej? Porin komo panoskia nejon, nochin taltikpakneminij kiajsikamatiskiaj ke mochiujtokya tein achtook moijtojka. Hasta akin amo kineltokaj tein Biblia kijtoua kiitaskiaj nejon. Sayoj ke Jesús kijtoj ke tel miakej taltikpakneminij amo kiajsikamatiskej ke nentokej itech itamian tonalmej. Yejua kijtoj ke nion kimattoskej keman ejkos tamilis porin monejnemiltijtokej kemej yeskia amo teyi panoti (Mat. 24:37-39). ¿Toni tikajsikamatij keman tiknemiliaj tein kijtoj Jesús? Ke amo moneki tikchiaskej maj okachi motaouijkantali achto ke peuas okachi ueyi tajyouilis, uan hasta maj nochin taltikpakneminij kineltokakan ke ejkotokya tamilis (Luc. 17:20, TNM; 2 Ped. 3:3, 4). w15 15/8 2:6, 7

Komo axkan tikchiuaj tein moneki tein techpaleuis keman tinemiskej itech Xochital, ¿timopolouilijtokej se okachi kuali nemilis? Amo. Tiktekitiliskej Jiova yejua tein okachi kuali tein uelis tikchiuaskej. Amo tiktekitiliaj porin aksa techchikaujkauia oso sayoj porin tiknekij timakisaskej keman ejkos tamilis. Tiktekitiliskej Dios uan kuali iuan timouikaskej techpaleuia maj okachi kuali tinemikan uan maj okachi tiyolpakikan. Ijkon techchijchiuak Jiova. Inetasojtalis uan itaixyekanalis yejua tein okachi kuali tein uelis tikpiaskej (Sal. 63:1, 2). Komo tikueyichiuaj Jiova ika nochi toyolo okachi tiyolpakiskej. Akin kitekitilianij Jiova miak xiujmejya kimatij ke okachi kuali tinemij keman tiktekitiliaj yejuatsin (Sal. 1:1-3; Is. 58:13, 14). w15 15/8 3:16

Takuaujtamatilis techpaleuia maj tikchiuakan seki taman tein moita ke amo ueliskia tikchiuaskej (Mat. 21:21, 22). Kemej neskayot, timiakej senkis tikpatanij kemej timonejnemiltiayaj. Uan taltikpakneminij akin ipa techixmatiaj kiitaj ke axkan amo timonejnemiltiajok kemej achto. Tikpatakej nochi nejon porin tiktasojtaj Jiova uan yejuatsin techpaleuij maj ijkon tikchiuanij (Col. 3:5-10). Uan no, kemej titakuaujtamatij timotemaktijkej iuan Jiova uan timochiujkej tiitasojikniuan. Nejin amo ueliskia tikchiuaskej komo Dios amo techpaleuiskia. Takuaujtamatilis no techpaleuia maj tikixnamikikan tayejyekolis tein techtalilia Satanás, akin kitelpia chikaualis (Efes. 6:16). Uan no, techpaleuia maj tikxikokan kuejmolmej. Jiova motenkaua touan ke komo iuan titakuaujtamatij uan tiktayekanaltiaj tiktekitiliskej, yejuatsin techmakas nochi tein techpoloua (Mat. 6:30-34). Uan komo titakuaujtamatij, techkauas maj tinemikan nochipaya itech Xochital (Juan 3:16). w15 15/9 3:4, 5

¿Keyej kijtoua Biblia ke Jiova achto techtasojtak? Porin kiualtitanik iKonetsin maj toka momikiliki “maski tejuan tech ne tonal tikatkaj semi titajtakolejke” (Rom. 5:8). Netasojtalis yejua kualneskayot tein okachi kinextia Jiova. Yejua ika, Jesús kijtoj ke tanauatil tein okachi tayekantok yejua nejin: “Xiktasojtakan in Toueyitekotsin to Dios ika nochi namoyolo uan ika nochi namotanejnekilis, uan ika nochi namotanemililis uan ika nochi namochikaualis” (Mar. 12:30). Jiova kineki maj tiktasojtakan ika nochi toyolo. Tikyolxokoliskiaj komo tiktasojtaj aksa oso teisa okachi ke yejuatsin. Sayoj ke netasojtalis tein tikpialiaj Jiova amo sayoj moneki yeski se taman tein tikmachiliaj. Yejuatsin no kineki maj tiktasojtakan ika nochi totanemilil uan ika nochi tochikaualis, tein kijtosneki, ika tein tiknemiliaj uan tikchiuaj (Miq. 6:8). w15 15/9 5:1-3

Kemansa xa amo tikitaskej ke Jiova techpaleuijtok. ¿Keyej? Porin xa semi techtekipachojtos kuejmolmej tein tikpiaj uan yejua ika amo tikelnamikiskej ke Jiova miakpa techpaleuiani achto. Yejua nejon kipanok Elías. Yejua semi yolchikauak katka. Sayoj ke keman tekiuaj Jezabel kinekik kimiktis, Elías kielkauak keniuj Jiova kipaleuijka achto. Kemej semi moujtoya, Biblia kijtoua ke kinekia mikis (1 Rey. 19:1-4). ¿Keniuj ueliskia kiajsis nepaleuil uan yolchikaualis? Komo kitemouaya inepaleuil Jiova (1 Rey. 19:14-18). Job no semi kitekipachojtoya kuejmolmej tein kipiaya, yejua ika amo kiitaya tein kipanotoya kemej Jiova kiitaya (Job 42:3-6). Kemansa tikpiaj kuejmolmej uan xa amo tikitaj ke Jiova techpaleuijtok. ¿Toni techpaleuis maj tikitakan? Komo tikixtajtoltiaj Biblia uan titanemiliaj itech itayolmajxitilis uan tein kipanokej seki itekitikauan Dios. Keman tikitaj keniuj nejon techpaleuia maj tikpiakan se kuali tanemilil ika kuejmolmej tein tikpanotokej, tikitaskej kemej yeskia Jiova technojnotstok. Ijkon, okachi tikitaskej Jiova kemej se akin yekmelauj nemi. w15 15/10 1:15, 16

Jesús amo kikauak maj nion teyi kitapololtiani maj amo kisentokani tanojnotsani. Kemej neskayot, se tonal tanojnotstoya itech xolal Capernaum. Keman matamik, miakej kitemouayaj kichiuaskej maj iniuan mokauani okachi tonalmej. Sayoj ke, yejua amo kinemilij ox mokauaskia, ta kinmelauilij ke monekia yas itech okseki xolalmej uan kisentokas kiteixmatiltis iTekiuajyo Dios (Luc. 4:42-44). Uan ijkon kichiuak. Uejuejka ojtokak uan ijkon uelik kinmatiltij kuali tanauatilmej nochin taltikpakneminij akin uelik. Uan maski amo tajtakolej katka, kemansa monekia moseuis porin tel tekitia (Luc. 8:23; Juan 4:6). Se tonal, Jesús kinmachtijtoya itatojtokakauan se taman tein motelneki. Ompa, se takat ejkok uan kitajtanij maj kipaleuiani maj kiyektali se kuejmol tein kipiaya. Takat kiluij: “Tamachtijke, nikneki xiknauati nokniu de ke ma nechxelouili ten poui notechkakopaka den nojon toherencia”. Sayoj ke Jesús amo kipaleuij (Luc. 12:13-15). w15 15/10 3:10, 11

Netasojtalis yejua tein Dios okachi kiixnextia. Yejuatsin amo sayoj kimachilia netasojtalis, ta yejuatsin netasojtalis. Nochi tein kichiua, netasojtalis kiolinia maj kichiua. Semi tiktasojkamatij maj nejin kualneskayot kioliniani maj kichijchiuani nochi tein onkak iluikak uan taltikpak. Tikmatij ke Jiova kitasojta nochi tein kichijchiuak. Yejua ika tikyekmatij ke kichiuas nochi tein motenkauak. Kemej neskayot, kemej techtasojta, “kitalij ya se tonal kuak Yejuatsin kinixkomakas in taltikpakuani ika ne ajsikataixejekolis”, oso ika melaujkayot, itechkopa iKonetsin, Jesucristo (Hech. 17:31). Tikyekmatij ke Jesús ijkon kichiuas. Ompa, nochin taltikpakneminij tatakamatinij nochipaya kipiaskej yekmelauj yolpakilis uan se tel kualtsin nemilis. w15 15/11 3:1, 2

Keman titanojnotsaj, taltikpakneminij tataman kemej tanankiliaj. Sekin techkakij, sayoj ke oksekin amo kinekij kikakiskej kuali tanauatilmej tein tikteixmatiltiaj. Maski amo kuali technankiliskej, Jiova kichia maj tikchiuakan tein kijtoua Biblia. Kemej tikintasojtaj, moneki tikmelauaskej tein tikneltokaj “ika yolyemanalis uan ika mouisyot” (1 Ped. 3:15). Hasta keman taltikpakneminij kualanij uan amo kinekij kikakiskej kuali tanauatilmej tein tikteixmatiltiaj, tikinnextiliaj netasojtalis uan tikchiuaj kemej Jesús kichiuak. Biblia kijtoua ke ijkuak “kikejkeloayaj Cristo, ijkuakon Yejuatsin amo teyika kinnankiliaya ika takejkelolis. Uan kuak kitajyouiltiayaj Cristo, ijkuakon Yejuatsin amo kinilij ke satepan no momakuepas”, ta kikauak tein kipanotoya imako Jiova (1 Ped. 2:23). Nejin kinextia ke keman taltikpakneminij techchiuiliskej tein amo kuali, moneki tiyeskij tiyolyemankej uan amo timomakepaskej, ta timochikauaskej tikchiuaskej tein kuali tein ika tikinpaleuiskej (1 Ped. 3:8, 9). w15 15/11 4:17, 18

Jesús nochipa kiniluiaya imomachtijkauan ke kintasojtaya (Juan 15:9). Uan no, nochipa iniuan yetoya (Mar. 6:31, 32; Juan 2:2; 21:12, 13). No ijkon, tejuatsin nochipa xikonilui mokoneuan ke tikontasojta. Xikonnextili ke ininka tionmotekipachoua (Prov. 4:3). Itech ueyi altepet Australia, se tokniuj akin monotsa Samuel kijtoua ke keman konetsinok katka, mojmostaj youak ipopaj kiixtajtoltiliaya amatajkuilol Tanojnotsmej itech Biblia uan kinankiliaya tein yeski netajtanil tein yejua kipiaya. Satepan kinauaya uan kipitsouaya oso kitennamikia keman yaya kochitiya. Xiujmej satepan, Samuel kimoujkaitak kimatis ke ichankauan ipopaj amo momattoyaj kinnauaskej ininkoneuan nion kinpitsoskej oso kintennamikiskej. Sayoj ke ipopaj mochikaujka kinextilis ke kiteltasojtaya. Nejon kichiuak maj Samuel nochipa yolpakini uan maj kuali momachiliani. Uan omen mochiujkej tel kuali tasojiknimej. Komo tejuatsin nochipa tikoniluia mokoneuan ke tikontasojta, yejuan no momachiliskej kemej Samuel. Yejua ika, xikonpitso oso xikontennamiki uan xikonnaua, uan iniuan xiontajto, iniuan xiontakua uan iniuan xionmauilti. w15 15/11 1:3, 4

Itech xiuit 1919, seki oloch taltikpakneminij akin momachtiayaj Biblia peuak pouij itech takeual takuaujtamach uan tamatkej. Itech nejon tonalmej, nejin takeual kinmachtiaya akin pouiaj itech ixolal Dios okachi itech tajtol inglés. Sayoj ke itech totonaluan, amaixmej tein ika tajtouaj Biblia tein kichijchiua nejin takeual moajsij itech panoua 700 tataman tajtolmej. Itekitikauan Dios no monekia kipiaskej se Biblia tein kuali tajtolkeptoskia uan amo ouij kiajsikamatiskiaj. Yejua ika kinixtalijkej seki tokniuan akin kitajtolkepaskiaj Biblia, akin kintokaytijkej Oloch Tokniuan akin Kitajtolkepaj Traducción del Nuevo Mundo. Yejuan kiamakixtijkej Biblia tein kitajtolkepkej itech chikuasen amatajkuilolmej, itech xiujmej 1950 hasta 1960. Yekinika amatajkuilol kitemakakej itech se ueyi nechikol itech tonal 2 metsti agosto xiuit 1950. Itech nejon tonal, tokniuj Nathan Knorr kijtoj ke kinekia maj Traducción del Nuevo Mundo kinpaleuiani tel miakej taltikpakneminij maj kiixmatikan Jiova. w15 15/12 1:15, 17

¿Toni techpaleuis maj tikajsikan kuali tajtolmej tein tikijtoskej? Uelis tikmatiskej yankuik taman kemej tikijtoskej teisa keman tikixtajtoltiskej Biblia uan toamaixuan. Uan komo amo tikmatij toni kijtosneki se tajtol, uelis tiktemoskej toni kijtosneki. No uelis tikitaskej ineskayo Jesús. Yejua kijtoj ke Jiova kinextilijka maj nochipa kijtouani tajtolmej tein kinyolchikauas uan kinyolseuis taltikpakneminij akin tajyouiaj (Is. 50:4). Uan no, moneki tiknemiliskej keniuj kinijtakos oksekin tein tikijtoskej (Sant. 1:19). Uelis timotajtaniskej: “Komo nikijtoua nejin, ¿toni kiajsikamatis okse taltikpaknenkej? ¿Keniuj momachilis?”. w15 15/12 3:12

Jesús kijtojka ke keman kiitaskiaj ke tateuianij kiyoualojkej xolal, tokniuan kayomej Judea uan Jerusalén monekiskia choloskej (Luc. 21:21-24). Panokajya 28 xiujmej keman Jesús tanejmachtijka nejon. Itech nejon xiujmej, itatojtokakauan Cristo kayomej Israel amo kikaujkej Dios maski kintajyouiltijkej uan kipanokej uejueyi ouijkayomej (Heb. 10:32-34). Sayoj ke amo uejkaua kipanoskiaj se okachi ueyi ouijkayot kampa monekiskia kinextiskej ox chikauak katka inintakuaujtamatilis (Mat. 24:20, 21; Heb. 12:4). Komo kinekiaj kitakamatiskej Jesús uan makisaskej, monekia taxikoskej uan takuaujtamatiskej kemej amo keman ijkon monektoya (Heb. 10:36-39). Yejua ika, Jiova kichiuak maj Pablo kinijkuilouiliani tokniuan se amat tein axkan tikixmatij kemej amat tein kintitanilij Hebreos. Nejin amat kinpaleuij ika tein satepan kipanoskiaj uan kinyolchikauak. w16.01 1:1, 2

Komo tiknekij maj Dios techtasojta, moneki tikintasojtaskej tokniuan (1 Juan 3:16). Ika ineskayo, Jesús technextilij keniuj uelis tikintasojtaskej oksekin. Keman nemia nikan taltikpak, okachi kinpaleuij akin katkaj yolyemankej. Kinpajtij akin mokokouayaj, akin koxojmej, akin amo tachiayaj, akin amo ueliaj takakiaj uan akin amo ueliaj tajtouayaj (Mat. 11:4, 5). Jesús nion tepitsin katka kemej tayekananij itech taneltokalis, porin yejua semi kiuelitaya kinmachtis akin kinekiaj kiixmatiskej Dios (Juan 7:49). Kintasojtaya akin katkaj yolyemankej uan kitemouaya keniuj kinpaleuis (Mat. 20:28). Tejuan uelis tiknemiliskej keniuj uelis tikinpaleuiskej tokniuan itech nechikol, okachiok akin xiuejkejya. Netasojtalis tein Dios techpialia moneki techolinis maj tikinnextilikan tokniuan ke tikintasojtaj. w16.01 2:12-14

¿Moneki tiktemoskej tikmatiskej inintokay tokniuan taixpejpenalmej akin mokauajok nikan taltikpak? Amo. ¿Keyej? Porin tein melauj amo ueli tikyekmatij ox yekmelauj yaskej iluikak. Melauak ke Dios kinixpejpenak maj yakan iluikak, sayoj ke uelis yaskej ompa komo amo keman kikauaj Jiova. Satanás kimati nejon uan kinkui “miakke takajkayauani” uan ika kitemoua kichiuas maj kikauakan Jiova (Mat. 24:24). Tokniuan taixpejpenalmej sayoj uelis kiyekmatiskej ke yaskej iluikak keman Jiova senkis kinselisya. Yejuatsin senkis kinselia tepitsin achto ke momikiliskej oso tepitsin achto ke peuas okachi ueyi tajyouilis (Apoc. 2:10; 7:3, 14). w16.01 4:2, 3

Tanojnotsalis se tekit tein motelneki, porin tapaleuia maj mochiua tein Dios kiixtalijtok maj kiselikan taltikpakneminij. Jiova kinekia maj nemikan nochipaya, uan nejon amo mopatak keman Adán tajtakoj. Jiova kiualtitanik iKonetsin maj toka kitemakaki inemilis uan ijkon techijkuanilis tajtakol uan mikilis. Sayoj ke komo tiknekij maj inemilis Jesús techpaleui uan tiknekij tinemiskej nochipaya, moneki tiktakamatiskej Dios. Jesús kinmachtij taltikpakneminij tein Dios kineki maj kichiuakan, uan kinnauatij imomachtijkauan maj no tamachtikan nejon. Yejua ika titanojnotsaj uan tikinpaleuiaj oksekin maj mochiuakan itasojikniuan Dios. Keman ijkon tikchiuaj, titekitij iuan Jiova uan titapaleuiaj maj taltikpakneminij momakixtikan uan maj amo kipiakanok tajtakol nion maj momikilikan. Uan no, tiknextiaj ke tikintasojtaj taltikpakneminij uan Jiova, akin “kimonekiltia ke nochi in taltikpakuani ma makisakan de nintajtakoluan para ma ijkon kajsikamatikij in melauak Tajtoltsin de Dios” (1 Tim. 2:4). w16.01 5:15, 16

Kemej Acaz amo kikauilij se kuali neskayot, Ezequías ueliskia kualanis iuan Jiova oso mochiuas amo yolkuali kemej ipopaj. Axkan, seki tokniuan amo kipanouanij tein tel amo kuali kemej Ezequías, sayoj ke kinemiliaj ke onkak keyej kualaniskej iuan Jiova oso iuan inechikol (Prov. 19:3). Oksekin kinemiliaj ke kemej ininchankauan amo kitakamatij Jiova, ixyetokya ke amo kipiaskej se kuali nemilis oso no kichiuaskej tein amo kuali tein kichiuaj inintatuan (Ezeq. 18:2, 3). Sayoj ke ¿melauak nejon? Tein kichiuak Ezequías kinextia ke nejon amo melauak. Amo keman onkak keyej tikualaniskej iuan Jiova. Yejuatsin amo itajtakol maj taltikpakneminij kinpano tein amo kuali (Job 34:10). Melauak ke tetatmej uelis kinnextiliskej ininkoneuan maj kuali oso maj amo kuali monejnemiltikan (Prov. 22:6; Col. 3:21). Sayoj ke nejon amo kijtosneki ke tein kichiuaj totatuan kinextis keniuj tiyeskij satepan. ¿Keyej? Porin Jiova techchijchiuak tinochin kemej uelis toselti titaixpejpenaskej (Deut. 30:19). w16.02 2:8-10

Abner kipaleuij Saúl keman kitemojtinemia David porin kinekia kimiktis, maski Abner kimatia ke Dios kiixpejpenka David maj yeskia tekiuaj ompa Israel (1 Sam. 26:1-5). Satepan ke Saúl momikilij, Abner amo kipaleuij David maj mochiua tekiuaj, ta kipaleuij okse ikonetsin Saúl. Hasta uelis yeski ke Abner kinekia mochiuas tekiuaj. Xa yejua ika motekak iuan se inamik tekiuaj Saúl (2 Sam. 2:8-10; 3:6-11). Absalón, semej ikoneuan tekiuaj David, amo katka yolyemanik, uan yejua ika amo kitakamatik tein Jiova kiixtalia. Maski kimatia ke Jiova kiixtalijka ipopaj kemej tekiuaj ompa Israel, yejua kinekia mochiuas tekiuaj. Yejua ika “kipiak se carro uan caballos uan cincuenta takamej maj tsikuinikan iixpan” (2 Sam. 15:1). Uan no, kichiuak maj miakej israelitas kipaleuianij. Uan hasta kitemoj kimiktis ipopaj (2 Sam. 15:13, 14; 17:1-4). Tein kichiujkej Abner uan Absalón techmachtia ke komo amo tiyolyemankej uan tiknekij tikpiaskej okachi tanauatil, techtelouijmakas tiktakamatiskej tein Jiova kiixtalia. Sayoj ke komo tiktasojtaj Jiova, amo tiktayekanaltiskej totanejnekilis. w16.02 4:9-11

Telpoch, komo tikpia takuaujtamatilis uan tikyekmati ke melauak tein tikneltoka, taixejekol maj se kichia xiknexti ika tein tikchiua. No moneki tiknextis ke ‘tichipaujkanemi’ (2 Ped. 3:11). ¿Keniuj? Kemej neskayot, xiknemili tein tikchiuani itech chikuasen metsti tein tipanokej. Keman monekik tikixejekos ox tikchiuas se taman tein amo kuali, ¿uelik tikmatik toni tein kuali uan toni tein amo kuali? (Heb. 5:14.) ¿Tikelnamiki keman amo tiknekik tikchiuas tein amo kuali oso tein mitsiluiayaj okseki telpochmej? ¿Tikaua se kuali neskayot kampa timomachtia? ¿Tikchiua tein mitsiluia Jiova, oso tein mitsiluiaj akin iniuan timomachtia porin amo tikneki maj mitspinaujtikan? (1 Ped. 4:3, 4.) Melauak ke tinochin titajtakouanij. Hasta akin miak xiujmejya kitekitilijtokej Dios kemansa xa pinauaj kijtoskej ke itaixpantijkauan Jiova. Sayoj ke akin motemaktijya iuan Dios moneki yolpakis porin itaixpantijkauj Jiova uan kinextis ika ichipaujkanemilis. w16.03 2:10, 11

Jiova nochipa kinmakani tanauatilmej itekitikauan, uan peuak keman moajsikej yekinika taltikpakneminij. Kemej neskayot, itech xochital tein moajsia Edén kitemakak tanauatilmej tein amo ouij se kiajsikamati tein kinpaleuiskia taltikpakneminij maj nemikan ika yolpakilis uan maj amo momikilianij (Gén. 2:15-17). Sayoj ke Adán uan Eva kiixtopeujkej itaixyekanalis. Eva kitajtolkakik kouat, uan Adán kitajtolkakik Eva. Yejua ika, nochin omen tajyouijkej uan momikilijkej uan kimatiaj ke amo oksepa nemiskej. Kemej amo tatakamatkej, tinochin timomikiliaj. Axkan, Jiova techmaka tanauatilmej uan techixyekana kemej uelis tikseliskej nemilis nochipaya. Yejuatsin tamati kemej se ichkatajpixkej akin ika netasojtalis kinixyekana iichkauan itech se ojti kampa amo teyi kinpanos. w16.03 4:2, 3