Agosto

Abrahán kuali mouikaya iuan Jiova porin nochipa iuan takuaujtamatia, hasta keman kichiuaskia seki taman tein amo ouij. Kimachiliaya ke uelia kitapouiaya tein yeski taman, hasta tein kiouijmakaya kiajsikamatis. Kemej neskayot, keman Jiova kiluij ke yaya kiixpoloti Sodoma uan Gomorra, Abrahán moteltekipachoj. ¿Keyej? Porin kinemiliaya ke momikiliskiaj akin yolkualmej iniuan akin amo yolkualmej. Xa itech tanemiliaya isobrino Lot uan ichankauan, akin nemiaj Sodoma. Sayoj ke Abrahán takuaujtamatia iuan Jiova, “Tamelaujkej itech nochi taltikpak”. Yejua ika kitapouij ika yolyemanilis nochi tein kitekipachouaya. ¿Keniuj kipaleuij Jiova? Yejuatsin amo yolijsiuik uan kipaleuij maj kiita ke teiknelijkej. Kiajsikamatiltij ke ijkuak kinmelaua taltikpakneminij, kintemoua akin yolkualmej uan kinmakixtia (Gén. 18:22-33). Moyekita ke taixmatilis tein Abrahán kiselij uan tein kipanok itech inemilis kipaleuij maj kiyekpiani ikuali uikalis iuan Jiova. w16.02 1:11, 12

Timiakej techyolpaktia tikinixmatiskej taltikpakneminij akin nochipa tepaleuiaj. Sayoj ke ¿techyolpaktia tein kichiuak Jonatán sayoj porin nochipa kipaleuij David? Amo. Tikuelitaj porin kiitaya ke okachi monekia kitakamatis tein Dios kiixtaliaya. Yejua ika nochipa kipaleuij David uan amo kinexikoluij. Yejuan nochipa mosenpaleuijkej uan kitakamatkej tein Jiova kiixtaliaya uan kichiujkej tein motenkaujkej se iuan okse. Tejuan no moneki tiktemoskej tikinnextiliskej ueyi netasojtalis tochankauan, totasojikniuan uan tokniuan itech nechikol (1 Tes. 2:10, 11). Sayoj ke okachi moneki tiknextiliskej ueyi netasojtalis Jiova, porin yejuatsin techchijchiuak (Apoc. 4:11). Tiknextiliskej Dios ueyi netasojtalis techualkuilia yolpakilis uan kichiua maj kuali timomachilikan. Sayoj ke tikmatij ke nochipa moneki tikchiuaskej tein Jiova kiixtalia, hasta keman ouij techkisas. w16.02 3:3, 4

Telpoch, komo tiyekyolmajsitok, moneki tiktakamatis Jiova hasta keman okachi ouij yeski. Amo uelis timonejnemiltis kemej itasojikniuj Dios itech Kali kampa tiMosentiliaj uan taman timonejnemiltis kampa timomachtia, ta moneki nochipa tikyolpaktis Dios hasta keman tikpanos tayejyekolismej (Efes. 4:14, 15). Tein melauj, tiyeskij titelpochmej oso tiuejueykejya, tinochin timopolouaj (Ecl. 7:20). Sayoj ke komo tikneki timoauis, moneki timotajtanis: ¿Nikixtalijtok niktakamatis Jiova, maski ouij yeski? Xiknemili toni tikchiuak keman yankuixtok tikpanok se tayejyekolis. ¿Uelik tikmatik toni kuali katka? Oso xa tikpanotok se taman kemej tein kipanok Daniel. Xa aksa mitsiluiani xiktekitilti tein ueli tikchiua uan ijkon tikpias se kuali nemilis. Keman tikpanoua tayejyekolismej kemej nejon, ¿ueli tikajsikamati toni kineki Jiova xikchiua? (Efes. 5:17.) w16.03 1:7-9

Axkan tinemij itech itamian tonalmej. Uan amo uejkaua tikpanoskej se “ueyi tajyouilis ten amo keman mochiuaya” achto (2 Tim. 3:1). Uan no, Satanás uan iamokuali ejekauan kinkixtijkej ompa iluikak uan taijtakojtokej itech taltikpak (Apoc. 12:9, 12). Tejuan tiktakamattokej tanauatil tein Jesús kitemakak keman titanojnotsaj noyampa taltikpak. Tikinixmatiltiaj kuali tanauatilmej okachi miak taltikpakneminij uan itech okachi miak tajtolmej kemej amo keman ijkon mochiujtoya. Komo tiknekij maj Dios techtatiochiui, moneki tikakiskej ika nejmachkayot tanauatilmej tein techmaka itech inechikol. Komo axkan titatakamatij, no titatakamatiskej itech okachi ueyi tajyouilis, keman ixpoliuis nochi tein kiixyekana Satanás (Mat. 24:21). Satepan, oksepa monekis maj techmakakan yankuik tanauatilmej keman tinemiskej itech Xochital. w16.03 4:16, 18

Se tonal, Jiova kichiuak maj tatitanil Juan kinitani chikome ángeles akin kikakistiltijtoyaj trompetas. Keman makuiltika ángel kikakistiltij itrompeta, Juan kiitak se “sitalin ten uetsik de eluiyaktsinko hasta nikan taltikpak”. Nejin “sitalin” ika se llave tatapoj itech se “ueyi taltekoch ten semi uejkatan” uan tel tatayouayan. Ompa, itech nejon ueyi taltekoch peuak kisa miak pokti. Uan itech pokti kiskej tel miak chapolimej. Sayoj ke nejin okuiltsitsin amo yajkej itech koujmej oso xiujmej, ta iniuan “ne tagayot ten amo taixkuaneskayotilme de Dios” (Apoc. 9:1-4). Juan kimatia ke chapolimej ueli semi taijtakouaj, kemej kichiujkej ompa Egipto itech itonaluan Moisés (Éx. 10:12-15). Chapolimej tein Juan kinitak kinixneskayotiaj tokniuan taixpejpenalmej akin kiteixmatiltijtokej ke taneltokalismej tein amo melaujkej ixpoliuitij. Uan miakej millones akin kichiaj nemiskej nochipaya nikan taltikpak kinpaleuiaj itech tanojnotsalis. Nochin kisenchiuaj nejin tekit tein ika kinpaleuianij miakej taltikpakneminij maj kisakan itech taneltokalismej tein amo melaujkej uan itech itaixyekanalis Satanás. w16.03 3:3

Se tayekankej moneki kimatis ox tokniuj akin kinextiliti keniuj kichiuas tekit tanemilia uan monejnemiltia kemej kinextia tamachtilis tein melauak. Uelis kimatis nejon komo iuan kiixtajtoltia Marcos 12:29, 30. Ompa, uelis kitajtanis keniuj kikuitok inemilis satepan ke motemaktij iuan Jiova. Nejon netajtanil uelis kiuikas maj ika tajtokan keniuj uelis se kitekitilis Jiova ika nochi se iyolo. No uelis kichiuas netataujtil iuan tokniuj uan kitajtanis Jiova maj kipaleui ika iespíritu uan ijkon uelis kichiuas tekimej tein kiselis. Keman tokniuj kikakis ke kitataujtia Jiova maj kipaleui, xa kiolinis maj okachi tapaleui itech nechikol. Keman se tayekankej peuas kinextilis se tokniuj keniuj kichiuas tekit, uelis kitapouis tanojnotsmej tein moajsij itech Biblia kemej tein moajsij itech 1 Reyes 19:19-21, Nehemías 7:2, Nehemías 13:13 uan Hechos 18:24-26. Nejin tanojnotsmej uan okseki kipaleuiskej tokniuj maj kiita ke motelneki maj se kinpaleui oksekin, maj se takuaujtamach uan maj se yolyemanik. Nejin kualneskayomej kemej yeskia tapalan tein tekitikej kitalilia tal. Kipaleuiskej tokniuj maj kemej yeskia moskalti, oso maj okachi kuali kitekitili Jiova uan maj kiajsikamati seki “kualtsitsin taman” tein kipia Biblia. w15 15/4 2:3, 4

Komo tiknekij timotokiskej iuan Jiova, motelneki maj nochipa titajtokan iuan. ¿Keniuj? Komo nochipa tiktataujtiaj (Sal. 142:2). Uan tikauaj maj yejuatsin technojnotsa keman nochipa tikixtajtoltiaj Biblia uan tiknemiliaj tein tikixtajtoltiaj (Is. 30:20, 21). Kemansa uelis amo tikyekitaskej keniuj Jiova kinankilia tonetataujtiluan. Sayoj ke komo tikiluiaj itech toni taman tiknekij maj techpaleui, uelis okachi tikyekitaskej keniuj technankilia. Ijkon, yejuatsin mochiuas okachi kuali totasojikniuj. Komo tiktapouiaj nochi tein techtekipachoua, yejuatsin motokis touan. Uelis tiksentokaskej timotokiskej iuan Jiova nochipaya. Yejua ika, maj tiksentokakan tikakikan keman mojmostaj timomachtiaj Biblia, uan maj tiksentokakan iuan titajtokan ika netataujtil. Komo ijkon tikchiuaj, okachi kuali timouikaskej iuan ijkon kemej panouaj tonalmej. Uan ika inepaleuil, uelis tikxikoskej kuejmolmej tein tikpiaskej. w15 15/4 3:3, 14, 16

Satanás semi tetajyouiltia. Yejua taixyekantokya nikan taltikpak, sayoj ke nejon kemej yeskia amo kiixuitia. Yejua ika kichiuani maj kintajyouiltikan yekmelauj itatojtokakauan Cristo itech yekinika siglo uan hasta itech totonaluan. Se tekuani tein mayantok amo kiiknelia tapial achto ke kimiktia nion satepan. No ijkon, Satanás amo kiniknelia akin kinixnamiki. Maj tiknemilikan keniuj kiixnamikik xolal Israel. Yejua kichiuak maj israelitas kemej Zimrí auilneminij uan maj oksekin kemej Guehazí mokuilianij tein amo ininaxka katka. Nochi nejin kiualkuik miak tajyouilis. Uan tikyekmatij ke Satanás semi kiyolpaktij keman uelik kinchiualtij nejon (Núm. 25:6-8, 14, 15; 2 Rey. 5:20-27). w15 15/5 1:8, 9

¿Keniuj uelis tiktaniskej Satanás? Jesús kijtoj ke komo titaxikouaj, uelis timakisaskej (Luc. 21:19). Nion se taltikpaknenkej uelis senkis techijtakos. Komo amo tikauaj Dios, amo akin uelis kiuejuelos tokuali uikalis iuan (Rom. 8:38, 39). Uan komo timomikiliaj sayoj ke amo keman tikaujkej Dios, amo no kijtosnekis ke Satanás tatanik, porin Jiova techajokuis (Juan 5:28, 29). Satepan ke Dios kiixpolos tein amo kuali tein mochiujtok nikan taltikpak, Cristo kitsakuas Satanás 1,000 xiujmej uan ijkon amo uelis taijtakosok (Apoc. 20:1-3). Satepan, kikajkauaskej uan oksepa kitemos kinkajkayauas taltikpakneminij, sayoj ke amo keman oksepa uelis kichiuas. Uan ompa, kiixpoloskej (Apoc. 20:7-10). Kemej tikitaj, Satanás amo kichia kiselis tein kuali satepan. ¡Sayoj ke tejuatsin kemaj! Yejua ika, xionmoyolchikaua, xikonsentoka xikonixnamiki Amokuali uan xikonsentoka xikonchikaua motakuaujtamatilis (1 Ped. 5:9). Uelis tikonyekmatis ke tejuatsin uelis tikontanis Satanás. w15 15/5 2:1, 18

Komo tiknextiaj tamatilis, tikyekitaskej toni tiknemiliaj. Tein se kinemilia tamati kemej tit. Komo tit tikuij kemej moneki, techpaleuis maj tikchiuakan seki taman tein kuali, kemej titakualchiuaskej. Sayoj ke komo amo tikuij kemej moneki, tit uelis kichichinos tochan uan hasta techmiktis. No ijkon, komo itech titanemiliaj tein Jiova techmachtia, techualkuilis tein kuali. Sayoj ke komo itech titanemiliaj tein amo kuali uan tiknemiliaj ke tiauilnentokej, uelis yekmelauj tikchiuaskej. Uan nejon uelis kichiuas maj amo timouikakanok iuan Jiova (Sant. 1:14, 15). Biblia kiyekijtoua ke amo kuali yetok maj kemej yeskia timoitakan ke tiauilnentokej. Jesús kijtoj ke komo se takat kisentoka kinemilia iuan motekas se siuat akin amo inamik, kemej yeskia kichiuakya itech “italnamikilis”, oso iyolo (Mat. 5:28). w15 15/5 4:11, 12, 14

Ika uejueyi tachiualismej tein kichiuak keman tanojnotsaya, Jesús kinextij ke yejua kintasojta nochin taltikpakneminij. Se tonal, moajsik iuan se takat akin kipiaya se ueyi kokolis tein monotsa lepra (Mar. 1:39, 40). Takat motelkokouaya ke hasta tapajtijkej Lucas kijtoj ke “kokotokatoya ninakayo” (Luc. 5:12). Biblia kijtoua ke ijkuak takat kiitak Jesús, motankuaketsak uan kiluij: “Totekotsin, komo tikonmonekiltia, kuali tionuelis tinechonchipauas” (tejuan tiktalilijkej cursivas). Yejua kimatia ke Jesús ueliskia kipajtis. Sayoj ke amo kimatia ox kinekia kichiuas nejon. Jesús kimatokak takat akin kipiaya lepra. Satepan kiluij: “Nikneki ma tejua xionchipauak ya de mokokolis”. Uan lepra niman poliuik (Luc. 5:13). Jesús kinextij ke kinteltasojta taltikpakneminij (Luc. 5:17). w15 15/6 2:3-5

Komo mitsonouijmaka tionmoijkuanilis amo kuali tanejnekilis, xikontajtani inepaleuil se tokniuj akin uejkaujya kitekitilijtok Jiova uan uelis kuali mitsonyolmajxitis ika tein kijtoua Biblia. Semi teouijmaka ika se tajtos tein se kimachilia komo se kipia se amo kuali tanejnekilis, sayoj ke moneki xikonchiua (Heb. 3:12, 13). Ijkon uelis tikonsentokas kuali tionmouikas iuan Jiova. Tayekananij itech nechikol yejuan akin okachi kuali uelis techpaleuiskej (Sant. 5:13-15, TNM). Komo tejuatsin tikonita auilnemilis, motelneki niman xiontajtani nepaleuil. ¿Keyej? Porin komo amo niman tikonchiua, okachi uelis mitsonuikas xiontajtako. Komo panoua nejon, semi tikonijtakos mochankauan uan motasojikniuan. Uan no, tikonchiuas maj taltikpakneminij amo kuali ika tajtokan Dios. Miakej kintajtanianij tayekananij maj kinpaleuikan uan kichiuanij tein kinyolmajxitianij. Nejon kinpaleuiani maj kisentokakan kuali mouikakan iuan Jiova uan maj kisentokakan pouikan itech nechikol (Sal. 141:5; Heb. 12:5, 6; Sant. 1:15). w15 15/6 3:15-17

Keman ixpoliuiskej nochin taneltokalismej tein amo melaujkej, ¿momikiliskej nochin akin ompa pouij? Amo. Seki taixyekananij itech taneltokalismej yoltoskejok uan kinextiskej ke amo keman tapaleuijkej itech taneltokalismej tein amo melaujkej (Zac. 13:5, 6). ¿Toni kipanos ixolal Dios keman ixpoliuiskej taneltokalismej tein amo melaujkej? Jesús kijtoj: “Tein melauj, komo amo motokotsoskiaj nejon tonalmej, amo akin momakixtiskia; sayoj ke kemej moajsiskej taixpejpenalmej, nejon tonalmej motokotsoskej” (Mat. 24:22, TNM). Itech inintonaluan yekinika itatojtokakauan Cristo, Jiova kichiuak maj motokotsouanij oso motsakuilianij tonalmej keman kiixnamikkej Jerusalén. Nejon tapaleuij maj cholouanij “taixpejpenalmej”. Itech totonaluan, Jiova no kichiuas maj motsakuili yekinika taman tein ika peuas okachi ueyi tajyouilis uan ijkon kimatampauis ixolal (Apoc. 17:16). Satepan keman panos nejin yekinika taman, taseujtos seki tonalmej. w15 15/7 2:5, 6

Tejuan tikixpejpenaj ox timokauaskej maj Satanás techuika maj tikchiuakan tein amo kuali oso amo (Mat. 6:13; Sant. 1:13-15). Keman Satanás kitemoj kichiuas maj tajtako, Jesús niman kiixtopeuak tayejyekolis tein kitalilij uan kiluij tein kijtoua iTajtol Dios. Jesús kiixtalij amo kikauas Jiova. Sayoj ke Satanás amo mosenkauak. Mochiak hasta keman oksepa ueliskia kiyejyekos (Luc. 4:13). Maski ijkon, Jesús nochipa kitakamatik Dios. Sayoj ke itech nejin tonalmej, Satanás kisentoka techyejyekoua porin kineki maj amo tiktakamatikan Jiova. Netajtanilmej tein kiskej keman Adán uan Eva kiixtopeujkej Dios kemej taixyekankej ayamo senkis monankiliaj. Yejua ika Jiova kisentoka kikaua maj Satanás kitemo kichiuas maj titajtakokan. Sayoj ke maj tikelnamikikan ke Dios amo techuika maj tikchiuakan tein amo kuali. Yejuatsin totech takuaujtamati uan techpaleuia. Sayoj ke amo techchikaujkauia maj tiktakamatikan. Techkaua maj tejuan tikixpejpenakan ox tiktakamatiskej oso amo. ¿Toni moneki tikchiuaskej komo tiknekij tikixtopeuaskej tein Satanás kitemoua maj tikchiuakan? Moneki kuali timouikaskej iuan Jiova uan nochipa tiktajtaniskej ika netataujtil maj techpaleui. w15 15/6 5:13, 14

Moneki tikpataskej totanemilil. Nejin techpaleuis maj amo keman tiknekikan tiknextiskej ke kampa tikayomej okachi kuali ke oksekin (Rom. 14:19). Maj tikitakan tein kipanok se tokniuj siuat akin monotsa Mirjeta. Yejua yolik itech se ueyi altepet tein monotsaya Yugoslavia. Moskaltij itech se xolal kampa taltikpakneminij kintauelitayaj akin katkaj kayomej Serbia. Sayoj ke kiajsikamatik ke Jiova amo kinemilia ke seki taltikpakneminij okachi ueyichiuanimej ke oksekin, uan ke Satanás kineki maj taltikpakneminij motauelitakan. Yejua ika tokniuj siuat mochikauak kipatas itanemilil. Sayoj ke ijkuak peuak se neteuilis itech ueyi altepet, Mirjeta oksepa peuak amo kinyekita akin katkaj kayomej Serbia. Nion kinekia kintapouis kuali tanauatilmej. Yejua kimatia ke nejon amo kuali katka, yejua ika kitajtanij Jiova maj kipaleuiani maj moijkuaniliani nejon tein kimachiliaya. Yejua kijtoua ke tanojnotsalis semi kipaleuiani. Amo kimachiliaok nejon tein amo kuali, porin keman tanojnotsa mochikaua kinextis inetasojtalis Jiova. w15 15/7 3:11-13

Maj tikitakan tein kipanok se takat akin tekiuajtik Judá akin motokaytij Jehosafat. Yejua amo kuali taixejekoj keman kipaleuij Acab, akin tekiuajtia Israel, ijkuak moteuito iniuan akin kayomej Siria. Cuatrocientos tanauatianij akin amo melaujkej kiluijkej Acab ke tataniskia. Sayoj ke se tanauatijkej akin melauak akin motokaytiaya Micaya kiluij Acab uan Jehosafat ke komo yayaj tateuitij, tapoloskiaj. Acab momikilij itech neteuilis, uan Jehosafat tekit makisak. Ompa, Jiova kititanik Jehú maj kimelauati Jehosafat porin amo kuali taixejekojka, sayoj ke no kinauatij maj kilui: “Moajsi seki taman tein kuali tein mitsajxilijkej” (2 Crón. 18:4, 5, 14-22, 33, 34; 19:1-3). Maski Jehosafat amo kuali taixejekoj, Jiova amo kielkauak nochi tein kuali tein kichiujka (2 Crón. 17:3-10). ¿Toni techmachtia nejin neskayot? Ke maski tinochin timopolouaj, komo timochikauaj tiksentokaskej tiktekitiliskej Jiova, yejuatsin kisentokas techtasojtas uan amo kielkauas tein kuali tein tikchiujkej. w15 15/8 1:8, 9

¿Keniuj uelis tikchiuaskej axkan tein moneki tein techpaleuis keman tinemiskej itech Xochital? Xiontanemili itech nejin neskayot. Keman aksa kiixtalia mokaltalitiuj itech okse ueyi altepet, ¿toni kichiua achto? Mochikaua nemis kemej yeskia ompa moajsiskiaya. Kemej neskayot, uelis peuas momachtis tajtol tein ompa mokui uan kiixmatis keniuj nemij. Xa no uelis kiyekojtiyas takual tein ompa kichiuaj. No ijkon, tejuan uelis tikchiuaskej tein moneki tein techpaleuis keman tinemiskej itech Xochital komo timochikauaj tinemiskej kemej yeskia ompa timoajsiskiajya. Miakej kinemiliaj ke amo moneki se kitakamatis Dios uan ke uelis se kichiuas tein se kinekis. ¿Toni kiualkuini nejon? Ke taltikpakneminij semi tajyouiaj uan amo yolpakij (Jer. 10:23). Sayoj ke tejuan tikmatij ke Jiova se taixyekankej tetasojtakej. Yejua ika tiktakamatij. Uan itech Xochital, nemilis okachi kuali yeski porin nochin taltikpakneminij kitakamatiskej Dios. w15 15/8 3:4, 5

Akin kichiuaj kemej Cristo moneki kuali kinixpejpenaskej inintasojikniuan, sayoj ke okachi moneki kuali kiixpejpenaskej akoni iuan monamiktiskej. Biblia techiluia ke moneki timonamiktiskej sayoj iuan se “taneltokakke” (1 Cor. 7:39). Nejin kijtosneki ke sayoj moneki timonamiktiskej iuan se itaixpantijkauj Jiova akin moauijya uan kitakamati itanauatiluan Dios. Komo timonamiktiaj iuan aksa akin kitasojta Jiova, yejua techpaleuis maj amo tikauakan Dios. Jiova kimati toni techpaleuis uan techyolpaktis. Uan nochipa kinnauatiani itekitikauan maj sayoj monamiktikan iniuan akin kitekitiliaj yejuatsin. Kemej neskayot, Jiova kinnauatij israelitas maj amo monamiktianij iniuan akin kinueyichiuayaj tiotsitsin. ¿Keyej? Porin yejuan kichiuaskiaj maj israelitas no kinueyichiuanij (Deut. 7:3, 4). w15 15/8 4:12, 13

Komo tiknekij tikmachtiskej totanemilil, amo sayoj moneki tikixtajtoltiskej Biblia uan tikelnamikiskej tanauatilmej uan miak taman tein ompa kijtoua. Moneki nochipa timomachtiskej, tiknemiliskej tein tikixtajtoltiaj uan tiktajtaniskej Jiova maj techpaleui maj tikchiuakan ijkon kemej timomachtiaj. Keman timomachtiaj Biblia, tiknekij okachi kuali tikixmatiskej Jiova. Tiknekij tikmatiskej keniuj tamati, toni kiuelita uan toni amo kiuelita. Komo okachi tikmachtiaj totanemilil, okachi titanemiliskej kemej Dios. Sayoj ke, kemansa xa amo kuali tikitaskej tein kichiuas se tokniuj itech se taman tein iselti moneki kiixpejpenas, kemej keniuj mopajtis. Sayoj ke moneki amo tikijijtoskej nion tiktemoskej tikchiuaskej maj kipata itanemilil. Tokniuj xa moneki okachi kuali kimachtis itanemilil (1 Cor. 8:11, 12). w15 15/9 2:4, 8, 10

Jiova kichijchiuak taltikpak ika nochi tein moneki tein tapaleuia maj tiyoltokan, sayoj ke no kichijchiuak maj takualtsinkan, maj kuali se momachili se nemis nikan uan maj se yolseujto (Is. 45:18). Keman tiknemiliaj keniuj kualtsin chijchiujtok taltikpak, tikitaj ke Jiova yekmelauj techtasojta (Job 38:4, 7; Sal. 8:3-5). Yejuatsin no kinextij ke techtasojta keman techchijchiuak kemej uelis tiknextiskej kualneskayomej tein yejuatsin kipia (Gén. 1:27). Yejua ika ueli tikmachiliaj ke techtasojta uan no ueli tiktasojtaj. Yejuatsin kimati ke nejon yekmelauj techyolpaktia, porin konemej yolpakij keman kimachiliaj ke inintatuan kintasojtaj. Uan no, Jesús techmachtij ke tiyolpakiskej komo iuan timotokiaj Jiova (Mat. 5:3). Biblia kijtoua ke yejuatsin “technenkajtatiochiuilia san ika de miak tataman para ma ijkon timoyolpaktijtiyakan” (1 Tim. 6:17; Sal. 145:16). w15 15/9 4:6, 7

Se takat akin kiteltasojtaya Jiova kijkuiloj ke ijkuak kipiaya uejueyi kuejmolmej, takuaujtamatia ke Dios kipaleuiskia uan kimakixtiskia (Sal. 42:5, 6). ¿Ijkon tionmomachilia tejuatsin? Uelis yeski ke tiontakuaujtamatiya iuan Jiova. Maski ijkon, tinochin uelis okachi titakuaujtamatiskej iuan. Biblia kijtoua: “Xitakuaujtamati iuan Jiova ika nochi moyolo, uan amo ximopaleui itech motaajsikamatilis. Itech nochi tein tikchiuas xiktemo Dios, uan yejuatsin kimelauas moojuan” (Prov. 3:5, 6). Jiova achto techtasojtak. Ijkon techmachtij maj tiktasojtakan yejuatsin (1 Juan 4:19). Nochipa moneki titanemiliskej itech nochi tein yejuatsin toka kichiuani uan ke techteltasojta. Maj tiknextilikan ke tiktasojtaj ika nochi toyolo, tonemilis, totanemilil uan tochikaualis (Mar. 12:30). w15 15/9 5:17-19

Keman tikinmachtiaj okseki taltikpakneminij tein Biblia kijtoua no techpaleuia maj mochikaua totakuaujtamatilis. ¿Keyej? Porin keman titanojnotsaj techpaleuia maj senkis titakuaujtamatikan iuan Jiova uan maj tiyolchikaujkej, ijkon kemej yekinika itatojtokakauan Cristo (Hech. 4:17-20; 13:46). Keman tikitaj keniuj Jiova kinankilia tonetataujtiluan uan techpaleuia, okachi mochikaua totakuaujtamatilis. Yejua nejon kinpanok Josué uan Caleb. Keman tapijpiatoj itech talmej tein Jiova motenkaujka kinmakas, yejuan kinextijkej ke semi takuaujtamatiaj. Ijkon kemej panotiyajkej xiujmej, inintakuaujtamatilis okachi mochikaujtiyajki porin kiitayaj ke Dios nochipa kinpaleuiaya. Yejua ika Josué kinyekiluij israelitas ke Jiova nochipa kichiujka nochi tein motenkaujka. Yejua ika kinyolmajxitij: “Xikmoujkatokakan Jiova uan xiktekitilikan” (Jos. 23:14; 24:14). Komo tejuan no titakuaujtamatij iuan Jiova, tikitaskej keniuj techpaleuia, uan totakuaujtamatilis okachi mochikauas (Sal. 34:8). w15 15/10 2:10, 11

Komo tikijkuilouaj seki tanemililmej tein moijtoua itech nechikolmej oso itech uejueyi nechikolmej, maj oksepa tikixtajtoltikan uan maj itech titanemilikan. Maj timotajtanikan: “¿Toni nechmachtia ika tein kijtoua Biblia uan inechikol Dios?”. No uelis titanemiliskej itech tein tikixtajtoltiaj itech amaix Tanejmachtijkej, ¡Despertad! uan itech amaixmej tein kisaj itech uejueyi nechikolmej. Oso keman tikixtajtoltiaj itech Anuario tein kipanok se tokniuj, maj titanemilikan itech nejon uan ijkon tikitaskej keniuj techpaleuis. Keman tikixtajtoltiaj amatajkuilolmej, semi kuali maj tiktsojkuilokan tanemililmej tein okachi tayekantokej oso maj tikijkuilokan teisa tanakastan kampa titaixtajtoltijtokej. Nejin techpaleuis maj tikelnamikikan seki tanemililmej tein motelnekij tein satepan uelis tikuiskej keman timomachtiskej se tanojnots oso keman tikalpanoskej se tokniuj oso aksa akin kineki kimatis okachi tein Biblia kijtoua. Keman titanemiliaj, okachi moneki maj tikuikan tiempo tein monekis uan ijkon tikitaskej keniuj techpaleuis tamachtilis uan tiktasojkamatiliskej Jiova. w15 15/10 4:9, 10

Se taman tein okachi kinyolpaktia tokniuan akin tetatmej, yejua keman ininkoneuan moauiaj. Se tokniuj siuat akin motokaytia Berenice, kipia naui konemej akin moauijkej achto ke kiajxitiskiaj 14 xiujmej. Kijtoua ke yejua uan inamik semi kinyolpaktiaya kiitaskej ke nochin ininkoneuan kiixtaliayaj kitekitiliskej Jiova. Sayoj ke no kintekipachouaya keman kinemiliayaj ke seki xiujmej satepan ininkoneuan yeskiaj telpochmej uan kipanoskiaj miak ouijkayomej. Se tapajtijkej kijtoua ke keman konemej mochiuaj telpochmej, semi kinouijmaka miak taman yejuan uan inintatuan. Seki tetatmej xa kinemiliaj ke ininkoneuan amo kinemiliaj tein kichiuaj uan ke kichiuaj seki taman kemej yeskia konemejok. Sayoj ke nejin tapajtijkej kimelaua ke itech xiujmej keman mochiuaj telpochmej, miak taman kinemiliaj keniuj kichiuaskej, mopapata kemej momachiliaj uan kinekij yetoskej iniuan inintasojikniuan. Tein melauj, telpochmej ueli kichiuaj miak taman tein kuali. Kemej neskayot, uelis kuali mouikaskej iuan Jiova, ijkon kemej kichiuak Jesús keman katka telpochok. No uelis okachi kuali momachtiskej tanojnotsaskej uan kichikauaskej inintanemilil tein kinpaleuis maj kinekikan okachi kuali kitekitiliskej Jiova. w15 15/11 2:1, 2

Se taman tein kinextia ke Jiova techtasojta yejua Tekiuajyot tein moajsi imako Mesías. Nejin Tekiuajyot se taixyekanalis tein kiixtalij Dios, uan yejuatsin kiixtalij se tekiuaj akin kintasojta taltikpakneminij uan kuali kimati keniuj kinixyekanas (Prov. 8:31). Nejin tekiuaj yejua Mesías, Jesucristo. Uan no, Dios kinixpejpenak 144,000 taltikpakneminij maj tekiuajtikan iuan Cristo ompa iluikak. Tein kinpanok itech ininnemilis nikan taltikpak kinpaleuis keman taixyekanaskej maj kinajsikamatikan taltikpakneminij (Apoc. 14:1). Keman Jesús nemik nikan taltikpak, okachi ika tanojnotsak iTekiuajyo Dios. Yejua kinnextilij imomachtijkauan maj kitataujtikan Dios maj uiki iTekiuajyo uan maj kiualkui tatiochiualismej. Biblia tamachtia ke iTekiuajyo Dios peuak taixyekana ompa iluikak itech xiuit 1914. Itech nejon xiuit uan hasta axkan mosentilianij akin nemijok nikan taltikpak uan pouiskej iniuan 144,000 akin tekiuajtiskej iuan Cristo ompa iluikak. No mosentilianij seki oloch taltikpakneminij akin makisaskej keman ixpoliuis nochi tein amo kuali uan nemiskej itech Xochital. Nejin oloch taltikpakneminij moixmatij kemej “uel miak tagayot” (Apoc. 7:9, 13, 14). w15 15/11 3:16, 18

Jiova yekinika kichijchiuak Jesús, akin tatitanil Juan kitokaytia “Tajtoltsin” (Juan 1:1). Jiova tajtouaya iuan Jesús uan kiluiaya tein kinemiliaya uan tein kimachiliaya (Juan 1:14, 17; Col. 1:15). Pablo kijtoua ke ángeles no monojnotsaj uan kipiaj inintajtol. Sayoj ke yejuan amo kikuij tajtol tein tejuan tikuij (1 Cor. 13:1). Jiova tel kuali kinixmati nochi millones ángeles uan taltikpakneminij akin kinchijchiuak. Yejuatsin ueli kinsenkaki tel miak netataujtilmej. Uan no, kiajsikamati tonetataujtiluan maski itech tataman tajtol tikchiuaskej. Uan keman techkaktok, no ueli kinixyekana ángeles uan kiniluia toni kichiuaskej. Dios ueli kichiua nochi nejin porin kemej tanemilia uan kemej tajtoua nion tepitsin tamati kemej tejuan titanemiliaj uan titajtouaj (Is. 55:8, 9). Yejuatsin technojnotsa kemej amo techouijmakas tikajsikamatiskej. w15 15/12 1:1, 2

Itech miak uejueyi altepemej, amo miakej taltikpakneminij uelij kipiaj se Biblia, porin patiyojkej oso teouijmaka se kiajsis. Kemej neskayot, ompa Ruanda, miakej taltikpakneminij akin momachtiayaj iniuan itaixpantijkauan Jiova amo kipatayaj ininnemilis porin amo kipiayaj Biblia. Tein kinamakayaj itech tiopan tein ompa moajsi semi patiyoj katka uan teouijmakaya se kiajsikamatis. Keman kisak Traducción del Nuevo Mundo itech inintajtol, seki kalyetouanij akin kinpiaj naui ininkoneuan kitasojkamatilijkej Jiova uan takeual takuaujtamach uan tamatkej. Achto amo ueliaj mokouiliayaj sejse, sayoj ke axkan nochin kipiaj ininBiblia. Kemej kinekij kinextiliskej Jiova ke kitasojkamatiliaj, kisenixtajtoltiaj mojmostaj. w15 15/12 2:15, 16

David xa kijkuiloj nejin tajtolmej keman Absalón kinekia kikuilis tekiuajyot. Uan kemej motelkokouaya, amo uelia kichiuaya nion teyi tein ika kitsakuiliskia. Yejua kimatia ke kipanotoya nejon kuejmolmej porin tajtakojka iuan Bat-seba (2 Sam. 12:7-14). Sayoj ke no kimatia ke Jiova kitapojpoluijka uan kitemoj inepaleuil keman mokokouaya. ¿Kichiaya David maj Jiova kichiuani se ueyi tachiualis tein ika kipajtiskia? Amo. Yejua kichiaya maj Dios kipaleuiani ijkon kemej kipaleuiskia taltikpaknenkej akin kinnextilia teiknelilis oksekin. David katka se kuali itasojikniuj Jiova, yejua ika uelia kitajtaniaya maj kiyolseuiani uan maj kiyekpiani keman mokokouaya (Sal. 41:3). No kitajtanij maj kipaleuiani maj pajti. Tejuan no uelis tiktajtaniskej Jiova tein David kitajtanij (Sal. 103:3). w15 15/12 4:8, 9

Tokniuan akin kinixpejpenkej maj yakan iluikak amo moneki maj aksa kinilui ke Dios kinixpejpenak. Jiova kichiua maj kiyekmatikan nejon. Tatitanil Juan kiniluia tokniuan taixpejpenalmej: “Namejuan namechixpejpenak akin yektik; uan nochin namejuan nankipiaj taixmatilis”. Uan no kiniluia: “Taixpejpenalis tein nankiselijkej itech kisentoka nanmotech, uan amo moneki maj aksa namechmachtijto” (1 Juan 2:20, 27, TNM). Semi melauak ke tinochin tiitekitikauan Jiova moneki maj techmachti, hasta tokniuan taixpejpenalmej. Sayoj ke yejuan amo moneki maj aksa kinyekilui ke Dios kinixpejpenak. Jiova kinpaleuia maj amo omeyolouakan ika iyektikatsin espíritu, okachi ueyi chikaualis tein onkak. w16.01 3:9, 10

Komo titakuaujtamatij iuan Jiova tiyolpakiskej ika tein tikpiaj. Sayoj ke ¿keniuj mouika maj se yolpaki uan maj se kintasojta tokniuan? Komo tiyolpakij ika tein tikpiaj, tikmatiskej ke okachi moneki ininka timotekipachoskej tokniuan ke tomin oso tein uelis tikouaskej (1 Tim. 6:6-8). Amo tikinijijtoskej tokniuan oso timokuejmoloskej porin amo kuali tein tikpanouaj. Amo no tikinnexikoluiskej oksekin nion tiknejnekiskej tiksentiliskej okachi miak taman, ta tikuelitaskej titemakaskej teisa (1 Tim. 6:17-19). Uan no, komo titakuaujtamatij iuan Jiova tikpiaskej yolchikaualis tein techpaleuis maj tikxikokan uejueyi ouijkayomej uan maj tikpiakan se kuali tanemilil (Heb. 13:6). Nejin techpaleuis maj tikinyolchikauakan tokniuan uan maj tikinyolseuikan (1 Tes. 5:14, 15). Komo titakuaujtamatij iuan Jiova, no tikpiaskej yolchikaualis keman peuas okachi ueyi tajyouilis, porin tikmatiskej ke yejuatsin amo uejkaua techmakixtis (Luc. 21:25-28). w16.01 1:16, 17

Itech miak xiujmej, keman kinpouayaj kanachi tokniuan kikuayaj pan uan tayiaj vino keman moelnamiki imikilis Jesús, xijxiujtika moitaya ke okachi amo miakej katkaj. Sayoj ke itech xiujmej tein panouanij, nejin tokniuan okachi momiakilianij. ¿Moneki techtekipachos nejin? Amo. Maj tikitakan keyej moneki amo techtekipachos. Dios kimati akoni taixpejpenal uan akoni amo. Sayoj ke tokniuan akin kinpouaj kanachi kikuajkej pan uan tayikej vino keman tikelnamikij imikilis Jesús amo ueli kimatij. Yejua ika, itech tapoual tein kinextia kanachimej kikuaj pan uan tayij vino no ompa pouij akin kinemiliaj ke Dios kinixpejpenak maski amo melauak. Kemej neskayot, sekin kikuayaj pan uan tayiaj vino, sayoj ke satepan amo ijkon kichiujkejok. Uan oksekin uelis kipiaskej se kokolis tein kinuikas maj kinemilikan ke yatij iluikak. Ika nochi nejin, amo tikyekmatij kanachi taixpejpenalmej moajsijok nikan taltikpak. Uan Biblia amo kijtoua kanachin nemiskejok keman peuas okachi ueyi tajyouilis. w16.01 4:12-14