Julio

Nejin xa techelnamiktia se taman tein kichiujkej Abrahán uan Lot. Yejuan kinextijkej kualtakayot keman kinselijkej seki takalpanouanij akin amo kinixmatiaj, uan satepan kimatkej ke tein melauj katkaj ángeles (Gén. 18:2-5; 19:1-3). ¿Keniuj no uelis no tiknextiskej ke kuali tikinseliaj oksekin? Uelis tikinyoleuaskej tokniuan maj takuatij tochan oso maj techkalpanotij. Uan keman tokniuj takalpanojkej uan inamik yetoskej itech tonechikol, uelis tikinyoleuaskej maski amo tikinyekixmatiskej (3 Juan 5-8). Amo moneki tikchiuaskej se ueyi iluit nion tikuiskej miak tomin. Tiknekij tikinyolchikauaskej tokniuan, amo tiktemoskej maj techmoujkaitakan. Uan no, maj amo tikinyoleuakan sayoj akin no uelis kichiuaskej touan tein tejuan tikchiujkej (Luc. 10:42; 14:12-14). Maski tikpiaskej miak tekit, maj nochipa kuali tikinselikan oksekin. w16.01 1:11, 12

Jiova kinmaka iyektikatsin espíritu nochin taixpejpenalmej tein kichiua maj senkis kimatikan ke kinixpejpenkej maj yakan iluikak (2 Cor. 1:21, 22; 5:5). Kiyekmatij ke Dios kinixpejpenak. Sayoj ke Pedro kimelauak: “Ximofuerzajuikan de xikyekmatikan de ke Dios namechnotsak ya uan namechijitak ya ke xipoutinemikan iuan Cristo. Porin komo nanmofuerzajuijtiyoue, ijkuakon amo keman nanmoyojyolkueptiyoue tech namotakuautamatilis. Uan komo amo nanmoyojyolkueptiyoue tech namotakuautamatilis, ijkuakon Totajtsin Dios ika miak pakilis namechkalakitiu nepa kampa Totekotsin Jesucristo Totemakixtijkatsin tayekantinemis sen nachipa” (tejuan tiktalilijkej cursivas; 2 Ped. 1:10, 11). Nejin kijtosneki ke sejse tokniuj taixpejpenal moneki mochikauas nochipa kitakamatis Jiova. Yejuan kiseliskej nemilis ompa iluikak komo amo keman kikauaj (Heb. 3:1; Apoc. 2:10). w16.01 3:6, 7

Amo kuali yetok maj tikueyitalikan aksa oso maj okachi tiktakachiuakan ke oksekin, maski yeski taixpejpenal. Biblia techiluia maj no tiknextikan takuaujtamatilis kemej tein kinextiaj tayekananij, sayoj ke amo kijtoua maj tiktojtokakan se taltikpaknenkej kemej totaixyekankauj (Heb. 13:7). Melauak ke Biblia kijtoua ke sekin kinnamiki maj okachi tikinpoujkaitakan, amo porin taixpejpenalmej, ta porin chikauak tekitij itech tanojnotsalis uan tamachtilis (1 Tim. 5:17, TNM). Komo okachi tikintakachiuaj taixpejpenalmej, uelis tikchiuaskej maj mopinaujmatikan. Oso uelis tikchiuaskej maj moueyinekikan, uan nejon tel amo kuali yeskia (Rom. 12:3). ¡Amo tiknekij tikchiuaskej nion teyi tein kinuikas tokniuan taixpejpenalmej maj tajtakokan! (Luc. 17:2.) w16.01 4:9

Kuali timouikaskej iuan aksa kitelpia ipatiuj. Komo tiknekij tiksentokaskej ika nejon kuali uikalis, moneki tikyekpiaskej. Nejin amo kemej se tapalkat tein tel patiyoj tein sayoj takualnextia. Kuali timouikaskej iuan aksa tamati kemej se kualtsin xochit tein moneki se kiyekpias. Abrahán kimatia ke kuali mouikas iuan Jiova kitelpiaya ipatiuj. Yejua ika nochipa kiyekpiak nejon kuali uikalis. ¿Keniuj kichiuak? Abrahán nochipa kitemoj kitakamatis uan kipoujkaitas Dios. Kemej neskayot, keman yajtoya iniuan ichankauan uan itakeualuan itech altepet kampa Dios kinauatijka maj youi, nochipa kikauak maj yejuatsin kiixyekanani keman kiixpejpenaya teisa, yeskia se taman tein motelnekia oso amo semi. Se xiuit achto ke yoliskia Isaac, Jiova kinauatij maj kinneskayotiani itech ininnakayo nochin takamej akin nemiaj ichan. Ijkuak, Abrahán kipiaya 99 xiujmej. ¿Toni kichiuak? ¿Kitajtanij Jiova keyej kinauatiaya maj kichiua nejon? ¿Kitemoj motenpaleuis uan amo tatakamatis? Amo, ta yejua takuaujtamatik iuan Dios uan kitakamatik “itech nejon tonal” keman kiselij tanauatil (Gén. 17:10-14, 23). w16.02 1:9, 10

Se konet ueli kimati toni kuali uan toni amo kuali, uan ueli kiajsikamati tein kijtosneki se motemaktis iuan Jiova. Yejua ika, komo se telpoch kinextia ke yekyolmajsitok uan motemaktijya iuan Jiova, motelneki uan kuali yetok maj moaui (Prov. 20:7). ¿Toni kijtosneki maj aksa yekyolmajsito? Amo sayoj kijtosneki se kiajxitis oso se kipanauis 18 xiujmej. Biblia kijtoua ke kijtosneki se kimatis toni kuali uan toni amo kuali (Heb. 5:14). Kijtosneki se kimatis toni kuali uan se kinekis se kichiuas ika nochi se iyolo. Akin yekyolmajsitok mochikaua kiixnamikis tayejyekolismej uan amo moneki maj aksa kiluijto maj kichiua tein kuali. Komo timoauia, mochia xiueli xikchiua tein kuali hasta keman amo mitsitstoskej motatuan oso okseki taltikpakneminij (Filip. 2:12). w16.03 1:4, 5

Jonatán xa semi kimoujkaitaya tein kichiujka David. Nejin telpoch yolchikauak yekin kimiktijka ueyi takat Goliat uan kikechkotonak uan itsontekon kiuikilij Saúl, akin tekiuajtia Israel uan katka ipopaj Jonatán (1 Sam. 17:57). Jonatán senkis kineltokaya ke Dios kipaleuiaya David. Itech nejon tonal, Jonatán uan David peujkej tel kuali mouikaj. Motenkaujkej ke nochipa mosenpaleuiskiaj (1 Sam. 18:1-3). Uan ijkon kichiujkej. Semi se kimoujkaita maj Jonatán mochiuani tel kuali itasojikniuj David uan maj nochipa kipaleuiani. ¿Keyej? Porin Jonatán katka ikonetsin tekiuaj Saúl. Yejua ika mochiaya maj yejua mochiuani tekiuaj satepan ke ipopaj momikiliskia. Sayoj ke Jiova kiixtalijka ke akin kiixpataskia Saúl amo yeskia Jonatán, ta David. Maski ijkon, Jonatán kisentokak kuali mouikak iuan David. Keman Saúl kitemojtoya David porin kinekia kimiktis, Jonatán ika semi kitekipachoj itasojikniuj. Kemej kimatia ke David yetoya itech taluakyan ompa Hores, yajki kiitato uan kiyolchikauak maj kisentokani takuaujtamatini iuan Jiova. Yejua kiluij tajtolmej tein ixnesij itech tajkuilol tein axkan tikitaj (1 Sam. 23:16). w16.02 3:1, 2

Keman peuak tachijchiuaj, Jiova uan Jesús nochipa sentekitinij. No ijkon, itekitikauan Dios nochipa mosenpaleuianij keman kichiuaj tekimej tein yejuatsin kinmakani. Kemej neskayot, Noé uan ichankauan mosenpaleuijkej keman kichijchiujkej arca. Miak xiujmej satepan, israelitas sentekitikej keman kichijchiujkej tabernáculo, keman kikojkopinayaj uan keman kiuikayaj okseko keman moajsiaj taluakyan. Keman yetoyaya templo, israelitas mosenkuikatijkej uan kisentsotsonkej kualtsitsin nekuikatilmej tein ika kiueyichiujkej Jiova. Itekitikauan Dios uelik kichiujkej nochi nejon porin nochipa mosenpaleuijkej uan sentekitikej (Gén. 6:14-16, 22; Núm. 4:4-32; 1 Crón. 25:1-8). Yekinika itatojtokakauan Cristo no nochipa sentekitiaj. Tatitanil Pablo kijtoj ke yejuan tataman tein ueliaj kichiuayaj uan kipiayaj tataman tekimej, sayoj ke amo xexeliujtoyaj porin nochin kitojtokayaj Jesucristo. Kinneskayotij kemej inakayo se taltikpaknenkej, tein kipia tataman omit sayoj ke nochin sentapaleuiaj (1 Cor. 12:4-6, 12). w16.03 3:1, 2

Achto, komo aksa akin amo katka israelita kinekia kitekitilis Jiova, monekia yas uan kitemos xolal Israel (1 Rey. 8:41-43). Sayoj ke Jesús kiniluij imomachtijkauan tajtolmej tein ixnesij itech tajkuilol tein axkan tikitaj. Axkan yejuan monekiskia yaskej uan kintemoskej taltikpakneminij. Itech iluit Pentecostés itech xiuit 33, Jiova senkis kinextij ke kinekia maj itekitikauan tanojnotsanij noyampa taltikpak. Itech nejon tonal, kemej 120 akin pouiaj itech yankuik nechikol kiselijkej yektikatsin espíritu. Ompa, itech miak tataman tajtolmej peuak kinnojnotsaj judíos uan akin amo katkaj judíos sayoj ke taueyichiuayaj kemej judíos (Hech. 2:4-11). Satepan peuak kinnojnotsaj samaritanos. Uan itech xiuit 36 peuak kinnojnotsaj akin amo katkaj judíos. Senkis moitaya ke imomachtijkauan Jesús monekia kinixmatiltiskej iTajtol Dios nochin taltikpakneminij. w16.03 4:12

Itekitikauan Jiova nochipa kimatinij ke taltikpakneminij kuali kichiuaj teisa keman kuali kinnextilijkej keniuj kichiuaskej. Kemej neskayot, Abrahán kinuikak takamej akin kuali kinnextilijkaj keniuj tateuiskej keman moteuito iniuan akin kiixnamikiaj uan ijkon kimakixtij Lot (Gén. 14:14-16). Itech itonaluan David moajsiaj taltikpakneminij akin kuali kinnextilijkaj keniuj mokuikatiskej tein ika kiueyichiuayaj Jiova (1 Crón. 25:7). ¿Keyej moneki tikitaskej ke nejin motelneki itech totonaluan? Yekinika, porin moneki kemej yeskia timoteuiskej iuan Satanás uan tein onkak nikan taltikpak (Efes. 6:11-13). Ojpatika, porin moneki timochikauaskej tikueyitaliskej Jiova keman tikintapouiaj oksekin keniuj tamati yejuatsin (Heb. 13:15,16). Ijkon kemej itekitikauan Dios akin nenkej ne uejkauj, tejuan no moneki tikmatiskej keniuj tikchiuaskej teisa uan ijkon kuali kisas. Itech nechikol, Jiova kinnauatia tayekananij maj kinnextilikan okseki tokniuan keniuj kichiuaskej tekit. Achto ke se tayekankej kinextilis se tokniuj keniuj kichiuas tekit, uelis iuan kiixtajtoltis seki tajkuilolmej tein kipia Biblia. ¿Keyej? Porin ijkon kipaleuis maj kichiua tein kinextilis satepan (1 Tim. 4:6). w15 15/4 2:1, 2

Nejin amo kijtosneki ke Amokuali ueli kinmiktia nochin taltikpakneminij. Komo ijkon, ¿keyej kijtoua Biblia ke ueli kichiua maj timomikilikan? Yekinika, porin yejua kichiua maj taltikpakneminij motauelitakan uan maj tateuikan. Ojpatika, porin yejua kichiuak maj Adán uan Eva tajtakouanij uan yejua ika tinochin titajtakouaj uan timomikiliaj (Rom. 5:12). Tikajsikamatij keyej Jesús kijtoj ke Satanás se temiktijkej (Juan 8:44). Nochi nejin kinextia ke Satanás kipia miak chikaualis. Keman tikixnamikij Satanás, no tikinixnamikij itatojtokakauan. Iniuan akin kitojtokaj Satanás pouij amokuali ejekamej, akin kikaujkej Dios (Apoc. 12:3, 4). Itech Biblia moajsij seki tajkuilolmej tein kinextiaj ke yejuan okachi chikaujkej ke taltikpakneminij uan ke uelis kichiuaskej maj semi tajyouikan (Mat. 8:28-32; Mar. 5:1-5). Maj amo keman tikelkauakan ke Satanás uan amokuali ejekamej kipiaj miak chikaualis (Mat. 9:34). Sayoj uelis tikinixnamikiskej ika inepaleuil Jiova. w15 15/5 1:6, 7

¿Toni uelis tikonchiuas komo mitsonouijmaka tikonixtopeuas se taman auilnemilis? Yekinika, xikonita ke nejon uelis mitsonuikas xiontajtako (Rom. 7:22, 23). Xikontajtani Jiova maj mitsonmaka chikaualis (Filip. 4:6, 7, 13, TNM). Amo xionmoajsi kampa uelis tikonchiuas nejon tajtakol (Prov. 22:3). Uan keman moixpan moajsis se tayejyekolis, niman xikonixtopeua (Gén. 39:12). ¿Toni kichiuak Jesús keman Satanás kitemoj kichiuas maj tajtako? Amo mokauak maj Satanás kikajkayauani ika tein motenkauak kimakas. Nion tepitsin tanemilij itech nejon, ta yejua niman kinankilij: “Kijtoa in Tajkuilolamatsin de Dios” (Mat. 4:4-10). Jesús kuali kiixmatia iTajtol Dios. Yejua ika, keman Satanás kiyejyekoj, niman kielnamikik tajkuilolmej tein kipia Biblia. Komo tiknekij tiktaniskej Satanás, moneki amo timoajsiskej kampa uelis tiuetsiskej itech auilnemilis. w15 15/5 2:15, 16

Jiova semi tamatkej uan ueli kimati toni mochiuas satepan. Tejuan amo ueli tikmatij toni mochiuas satepan, sayoj ke kemaj ueli tiknextiaj tamatilis kemej Jiova. ¿Keniuj? Achto ke tikixpejpenaskej teisa, moneki tiknemiliskej keniuj techijtakos tejuan oso oksekin. Maj tikijtokan se neskayot, komo tejuatsin peua iuan tionmoixmati aksa, xikonelnamiki ke kemansa teouijmaka se kitsakuilis tein se kimachilia uan keman se kinejneki se motekas iuan aksa. ¿Keniuj uelis tikonnextis tamatilis? Keman amo tikontemoua tionmoajsis kampa uelis tikonchiuas tein amo kuali. Amo keman xikonchiua teisa tein kijtakos mokuali uikalis iuan Jiova. Amo xikonelkaua ke Dios kichia xikonnexti kuali taixejekolis. Komo amo tikonnextia, uelis tikonpias uejueyi kuejmolmej (Prov. 22:3). w15 15/5 4:10, 11

Maj tikelnamikikan tein kipanok tekiuaj David. Biblia kijtoua ke “ompa kalkuako kiuejkaitak se siuat akin mopajpaktoya” (2 Sam. 11:2). Siuat kipiaya inamik. Sayoj ke David amo okseko tachiak, ta kisentokak kiitstoya uan itech tanemilijtoya. Ika tamik, iuan motekak nejon siuat. Ineskayo Job uelis techtelpaleuis. Yejua kijtoj: “Se netenkaualis nikchiuak iuan noixtololouan” (Job 31:1, 7, 9). Motelneki tiktojtokaskej ineskayo uan tikchiuaskej “se netenkaualis” iuan toixtololouan. ¿Keyej? Porin nejon techpaleuis maj amo tikpiakan amo kuali tanejnekilis. Sayoj ke ¿toni kijtosneki tikchiuaskej “se netenkaualis” iuan toixtololouan? Kijtosneki tikixtaliskej amo keman tikitaskej aksa porin tiknejnekij iuan tiauilnemiskej. Uan komo ixnesi auilnemilis itech se computadora, itech se ueyi amat, se amatajkuilol oso kansaika, niman moneki okseko titachiaskej. Komo tikonnemilia ke se taman moneki tikonpatas, niman xikonchiua. Komo tiktakamatij Jiova, uelis tikixtopeuaskej auilnemilis uan tichipaujkanemiskej (Sant. 1:21-25). w15 15/6 3:12-14

Itech padrenuestro, Jesús kijtoj: “Amo xitechonuika tech in ouijkayot”. Nejin techelnamiktia tein kipanok Jesús satepan ke moauij. Jiova kikauak maj Satanás kitemouani maj Jesús “motajtakolmakani” (Mat. 4:1). ¿Keyej kikauak maj panouani nejon? Porin Adán uan Eva kiixtopeujkej Dios kemej taixyekankej uan monekia monankilis nejin netajtanilmej: Keman Jiova kinchijchiuak taltikpakneminij, ¿amo kuali kichiuak teisa? Keman se taltikpaknenkej akin amo kipia tajtakol kiyejyekoskej, ¿uelis amo kikauas Dios? ¿Okachi kuali moajsiskiaj taltikpakneminij komo ininselti moixyekanaj, kemej kiteajsikamatiltij Satanás? (Gén. 3:4, 5.) Jiova kiualtitanik Jesús nikan taltikpak maj kinankiliki nejon netajtanilmej. Sayoj ke nochi nejon netajtanilmej senkis monankilis satepan. Ijkuak, nochin akin nemiskej iluikak uan taltikpak kimatiskej ke yejuatsin Jiova akin okachi kuali taixyekankej. w15 15/6 5:12

Okachi ueyi tajyouilis peuas keman ixpoliuiskej nochin taneltokalismej tein amo melaujkej. Itech Biblia, nochin taneltokalismej tein amo melaujkej moixmatij kemej “ueyi pueblo Babilonia” tein “kinixyekantinemi nochi ne siuaauilnemini” (Apoc. 17:5-7). ¿Keyej moijtoua ke tamatij kemej se siuaauilnenkej? Porin taixyekananij itech nejon taneltokalismej amo kitakamatij Dios. Yejuan kinpaleuiaj taltikpaktekiuajyomej uan amo kipaleuiaj Jesús uan iTekiuajyo. Uan no, amo kichiuaj miak taman tein tamachtia Biblia porin kinekij okachi moueyitaliskej. Yejuan amo chipauak inintaueyichiualis, amo kichiuaj kemej tokniuan taixpejpenalmej (2 Cor. 11:2; Sant. 1:27; Apoc. 14:4). Sayoj ke ¿akoni kinixpolos nochin taneltokalismej tein amo melaujkej? Biblia kijtoua ke yeski “majtakti ikuakuau” se chichiltik “ueyi okuilin”, oso tapial. Nejon tapial kiixnextia Organización de las Naciones Unidas, uan majtakti ikuaomiyouan kiixnextia nochin tekiuajyomej tein pouij ompa. Biblia kijtoua ke Jiova kichiuas maj nejon tekiuajyomej kinixpolokan nochin taneltokalismej tein amo melaujkej (Apoc. 17:3, 16-18). w15 15/7 2:3, 4

Nejon katka se ueyi kuejmol porin itech nechikol tein moajsia Corinto ueliskiaj senkis moxexeloskej. Yejua ika Pablo kiniluij: “Ximoyektajtoluiyakan sanse uan ma amo ximokualankaxexelokan [...]. Ta, namechilia xisenyekyetokan se uan okse uan xiyeksentanemilitokan sanse uan no xisentaixejekojtiyakan” (1 Cor. 1:10, 11, 13). Axkan no moneki maj amo keman timoxexelokan itech nechikol (Rom. 16:17, 18). Okse tonal, Pablo kinelnamiktij tokniuan taixpejpenalmej ke yejuan pouij ompa iluikak uan ke amo moneki kitayekanaltiskej tein onkak nikan taltikpak (Filip. 3:17-20, TNM). No kijtoj ke taixpejpenalmej kemej yeskia kiixnextiaj Dios uan Cristo. Keman se aksa akin kiixnextia ialtepeuj moajsi itech okse ueyi altepet, amo mokalakia itech kuejmolmej tein onkak ompa nion itech inintaixyekanalis. No ijkon, tokniuan taixpejpenalmej amo mokalakiaj itech kuejmolmej tein onkak nikan taltikpak nion kipaleuiaj nion se tekiuajyot (2 Cor. 5:20). Tokniuan akin kichiaj nemiskej nikan taltikpak amo no mokalakiaj itech kuejmolmej tein onkak. Sayoj kipaleuiaj iTekiuajyo Dios. w15 15/7 3:9, 10

Titanemiliskej itech nejin tajkuilol techpaleuia maj titakuaujtamatikan ke Jiova semi techtasojta uan toka motekipachoua maski timopolouaj (1 Ped. 5:6, 7). Tejuan tikitaj Biblia kemej se taman tein kitelpia ipatiuj. ¿Keyej? Porin Jiova ika technojnotsa. Keman se tepopaj uan ikonetsin kuali monojnotsaj, okachi motasojtaj uan okachi takuaujtamatij se iuan okse. Jiova yejuatsin toTajtsin akin semi techtasojta. Uan maski amo ueli tikitaj nion tikakij, yejuatsin kemej yeskia technojnotsa ika Biblia. Yejua ika, moneki kemej yeskia kuali tikakiskej tein techiluia (Is. 30:20, 21). Keman tikixtajtoltiskej Biblia okachi tikixmatiskej uan titakuaujtamatiskej iuan Jiova, akin techixyekana uan techyekpia (Sal. 19:7-11; Prov. 1:33). w15 15/8 1:6, 7

Itech Xochital onkas seki taman tein semi techyolpaktis. ¿Katiyejua? Se, yejua ke nochin taltikpakneminij kipoujkaitaskej itokay Jiova tein yektik uan sayoj yejuatsin kitakamatiskej (Mat. 6:9, 10). Okse, yejua ke itech taltikpak sayoj moajsiskej taltikpakneminij akin amo kipiaskejok tajtakol, ijkon kemej Jiova nochipa kinekik. Uan no, yolik timochiujtiyaskej tiyektikej uan okachi kuali timouikaskej iuan Dios (Sal. 73:28). Tikyekmatij ke Jiova kichiuas nochi nejin. ¿Keyej? Porin Biblia kijtoua ke “Dios uelis nochi kichiuas” (Mat. 19:25, 26). Moneki timochikauaskej tikchiuaskej nochi tein tiueliskej tein techpaleuis maj tikselikan nemilis nochipaya. Yejua ika moneki tiknextiskej ika totachiualisuan ke tikneltokaj ke tamilis amo uejkaua ejkos (1 Tim. 6:19). Komo tiknekij tinemiskej itech Xochital, moneki axkan tikchiuaskej tein moneki tein techpaleuis keman tinemiskej ompa. w15 15/8 3:2, 3

Miak taman tein moita itech televisión, itech Internet, tein kipiaj películas, amaixmej uan nekuikatilmej uelis kijtakos tokuali uikalis iuan Dios. Tamatij kemej amo kuali tasojiknimej tein uelis kichiuaskej maj titakuaujtamatikan itech tein onkak nikan taltikpak kampa taixyekana Satanás uan maj amo titakuaujtamatikan iuan Jiova uan itech tein motenkaua kichiuas. Maj amo keman tikitakan, tikakikan nion maj tikixtajtoltikan teisa tein kichiuas maj tiknejnekikan tein amo kuali (Tito 2:12). Sayoj ke, itech inechikol Dios mochijchiuaj amaixmej, videos uan nepaleuilmej itech Internet tein techmachtiaj toni moneki tikchiuaskej uan ijkon tinemiskej nochipaya. Uan no, tikseliaj tamachtilis itech panoua 110,000 nechikolmej noyampa taltikpak. Tein tikakij itech nechikolmej uan itech uejueyi nechikolmej techpaleuia maj okachi titakuaujtamatikan iuan Jiova uan itech tein motenkaua kichiuas (Heb. 10:24, 25). w15 15/8 4:9, 11

Tiitekitikauan Jiova tiknekij tikmachtiskej totanemilil uan ijkon techpaleuis maj tikmatikan toni kuali uan toni amo kuali. Techpaleuis maj tikmachtikan komo tikixtajtoltiaj Biblia uan timomachtiaj tein ompa kijtoua. No moneki tiktasojtaskej itanauatiluan Dios uan titakuaujtamatiskej ke techpaleuiaj. Yejua ika tatitanil Pablo kijtoj: “Nitemaka nejin tanauatil porin moneki monextis netasojtalis ika se yolo chipauak uan se kuali tanemilil uan takuaujtamatilis maj monexti amo ika takajkayaualis” (1 Tim. 1:5, TNM). Komo kuali tikmachtiaj totanemilil uan tiktakamatij, titapaleuiskej maj nochin kuali mouikakan itech nechikol. No okachi tiktasojtaskej Jiova uan okachi iuan titakuaujtamatiskej. Uan no, tiknextiskej ke kuali iuan timouikaj uan ke tiknekij tikyolpaktiskej. Ijkon moitas keniuj yekmelauj titamatij. w15 15/9 2:2, 3

Jiova techchijchiuak uan techmakak tonemilis (Sal. 100:3-5). Yejua ika itech Biblia moijtoua ke “Adán katka ikoneu de Dios” (Luc. 3:38). Uan no, keman Jesús technextilij keniuj timotataujtiskej, techmachtij ke Jiova toTajtsin (Mat. 6:9). Ika nejin tikitaj ke Jiova techtasojta kemej se kuali tepopaj kintasojta ikoneuan. Seki taltikpakneminij ininpopaj kintajyouiltij keman katkaj konemej. Yejua ika yejuan xa kinouijmaka kinemiliskej ke se tepopaj tetasojta. Sayoj ke Jiova amo keman techtajyouiltis. Tein melauj, yejuatsin okachi kuali tepopaj akin uelis tikpiaskej (Sal. 27:10). Yejuatsin semi techtasojta uan techyekpia ika miak taman. Uan ijkon kemej okachi tikmachiliskej inetasojtalis, okachi tiktasojtaskej (Sant. 4:8). w15 15/9 4:3, 4

Kemej iuan titakuaujtamatij Jiova uan tiktasojtaj, nochipa tiktajtaniaj maj techpaleui. Uan achto ke tikixpejpenaskej teisa, timochikauaj tikmatiskej toni kinemilia. Itech itonaluan Samuel, israelitas tapolojtiyayaj keman moteuijtoyaj iniuan filisteos. Sayoj ke amo takuaujtamatkej iuan Jiova uan amo kitajtanijkej toni monekia kichiuaskej, ta kiuikakej arca tein kinelnamiktiaya netenkaualis itech neteuilis. Kinemilijkej ke ijkon Jiova kinpaleuiskia maj tatanikan. Sayoj ke amo kitemojkej kimatiskej toni kinemiliaya yejuatsin. Sayoj kichiujkej tein yejuan kiitakej ke kuali yetoya. ¿Toni kinualkuilij nejon? Momikilijkej 30,000 tateuianij israelitas. Uan tein okachi amo kuali, filisteos mokauilijkej arca (1 Sam. 4:2-4, 10, 11; Prov. 14:12). w15 15/9 5:16, 17

Moneki maj amo sayoj timokauakan ika tein tikajsikamatkej achto ke timoauiskiaj (Heb. 6:1, 2). Kemej neskayot, uelis timomachtiskej keniuj mochiuani seki taman tein Biblia achto kijtojka ke panoskia, porin nejon kichikaua totakuaujtamatilis. Uan no, keman timomachtijtoskej Biblia, moneki tiktemoskej tikitaskej ox tiknextijtokej itech tonemilis ke yekmelauj chikauak totakuaujtamatilis (Sant. 1:25; 2:24, 26). Tatitanil Pablo kijtoj ke akin tikchiuaj kemej Cristo uelis “timoyolmajxitiske ika ne totakuautamatilis” (Rom. 1:12). ¿Toni kijtosnekia? Ke totakuaujtamatilis okachi mochikaua keman tiyetokej iniuan tokniuan itech nechikol, okachiok iniuan tokniuan akin amo kikauanij Dios keman kipanouanij ouijkayomej (Sant. 1:3). Amo kuali tasojiknimej kijtakouaj totakuaujtamatilis, sayoj ke kuali tasojiknimej techpaleuiaj maj okachi titakuaujtamatikan (1 Cor. 15:33). Yejua ika Biblia techiluia maj amo timopolouilikan nechikolmej, porin ompa timoyolchikauaj tinochin (Heb. 10:24, 25). w15 15/10 2:2, 8, 9

Moneki titanemiliskej keman timomachtiaj achto ke titamachtitiuij ika Biblia. Maj titanemilikan itech se netajtanil oso se neskayot tein uelis kipaleuis akin tikmachtiaj maj mochiua itasojikniuj Dios. Komo titanemiliaj itech nejon techpaleuia maj okachi mochikaua totakuaujtamatilis uan maj titamachtikan ika yolpakilis. No moneki titanemiliskej achto ke titanojnotsatiuij (Esd. 7:10). Uelis tikixtajtoltiskej se capítulo itech amatajkuilol Hechos oso titanemiliskej itech versículos tein tikixtajtoltiskej oso amaixmej tein titemakaskej. Nejin no techpaleuis maj titanojnotsakan ika okachi yolpakilis (2 Tim. 1:6). Uan no, semi kuali maj tiknemilikan toni uelis kinpaleuis taltikpakneminij kampa titanojnotsaj uan toni uelis tikiniluiskej tein tapaleuis maj kinekikan kimatiskej okachi. Ijkon okachi kuali tiktekitiltiskej Biblia keman titanojnotsaskej (1 Cor. 2:4). w15 15/10 4:9

Xionmotajtani: “¿Kimatij nokoneuan keyej semi tamouilil maj se kiita auilnemilis? ¿Toni uelis kichiuas maj kinekikan kiitaskej auilnemilis? ¿Takuaujtamatij ke uelis nouan tajtoskej ika tein yeski taman? ¿Nechiluiskej komo kinyolnotsa kiitaskej auilnemilis?”. Maski mokoneuan semi nojnelmejok, uelis tikoniluis: “Komo kemansa tikajsi itech Internet teisa tein kinextia auilnemilis uan mitsyolnotsa tikitas, xinechilui. Amo ximoui nion ximotekipacho, nejua nikneki nimitspaleuis”. Keman tejuatsin tikonixpejpenas keniuj tionmoixpetanis, kuali xikonnemili toni neskayot tikonkauilis mokoneuan. Se tokniuj akin motokaytia Pranas kijtoua ke tetatmej uelis kiniluiskej ininkoneuan miak taman, sayoj ke konemej kichiuaskej tein kiitaskej ke kichiuaj inintatuan. Komo tejuatsin tikonixpejpena nekuikatilmej, películas uan amatajkuilolmej tein amo kipiaj tein amo kuali, mokoneuan xa no kichiuaskej nejon (Rom. 2:21-24). w15 15/11 1:12-14

Se taman tein axkan tikchiuaj uan ijkon tikinnojnotsaj okachi taltikpakneminij yejua tanojnotsalis kampa miakej panouaj. Timochikauaj titanojnotsaskej kampa ajsij autobuses, kampa ajsi tren, kampa kinketsaj teposmej uan tanamakaloyamej. Komo tejuatsin ayamo tionmoyolchikaua tiontanojnotsas kampa miakej panouaj, ¿toni uelis tikonchiuas? Xikontataujti Jiova uan xiontanemili itech tein kijtoj se tokniuj takalpanojkej. Yejua kijtoj ke ika se yankuik taman kemej titanojnotsaj yejua okse taman kemej tiktekitiliaj Jiova uan tiknextiliaj ke iuan titakuaujtamatij uan tiktakamatij. Yejua kiita ke ijkon se kinextilia Dios ke nochipa tikchiuaskej tein yejuatsin techtajtanis. Keman timoyolchikauaj uan peua tikchiuaj yankuik taman kemej moixtalia motanojnotsas, okachi kuali tiktekitiliaj Dios uan okachi titakuaujtamatij iuan (2 Cor. 12:9, 10). Miakej tokniuan kintelyolpaktia kintapouiskej taltikpakneminij nochi tein uelis kiajsiskej kampa timoteixmatiltiaj itech Internet. Mojmostaj akin nemij kampa okachi uejka kiitaj tein moajsi itech jw.org. w15 15/11 5:12, 13, 15

Traducción del Nuevo Mundo tein kisak itech xiuit 1984 itech tajtol inglés kikuia tajtol hebreo Seol itech Eclesiastés 9:10 uan itech okseki tajkuilolmej. Okseki Biblias itech tajtol inglés no kikuij. Sayoj ke itech miak tajtolmej, tajtol Seol amo ixnesi itech diccionarios uan amo moixmati. Miakej hasta kinemiliaj ke Seol moajsi kansaika itech taltikpak. Yejua ika, yankuixtok moijtoj ke uelis se kitajtolkepas tajtol hebreo Seol uan tajtol griego Hades kemej “Miketekoch”, kemej mokuik itech Biblia tein mokixtij itech xiuit 2013. No kipatakej tajtolmej tein achto mokuiaj ika okseki tajtolmej tein axkan mokuij. Mochikaujkej maj inintajtolkepalis no ajsitok yeskia sayoj ke maj okachi amo ouij se kiajsikamati. Kemej tikitaj, tekit tein kichiujkej tokniuan akin kitajtolkepaj amaixmej tapaleuij maj okachi kuali motajtolkepani Biblia itech tajtol inglés. w15 15/12 2:10, 12

Komo timotelkokouaj, Jiova techyolseuis uan techpaleuis. Yejua nejon kichiuak iniuan itekitikauan ne uejkauj. ¿Kijtosnekia David ke komo itech nejon tonalmej se taltikpaknenkej kipaleuiaya aksa akin amo kuali moajsia, nejon taltikpaknenkej amo keman momikiliskia? Amo. David kijtosnekia ke komo nejon taltikpaknenkej kokolispeuaya, Dios kipaleuiskia uan kiyekpiaskia (Sal. 41:3). Techyolchikaua tikmatiskej ke Jiova kimati tein tikijyouijtokej uan amo techelkaua. Yejuatsin techyolchikaua uan techmaka tamatilis tein techpaleuis maj tikxikokan se kokolis. Uan no, kichiua maj tonakayo ueli iselti moijkuanili seki kokolismej. w15 15/12 4:7

Keman Pablo kijkuiloj nejin tajtolmej inintech tanemilijtoya tokniuan akin tsaktoyaj porin amo kikauayaj Jiova. Pablo kiniluij tokniuan hebreos ke kuali tein kichiujtoyaj porin ‘kinyolikneliayaj ne presos’ (Heb. 10:34). Tokniuan hebreos uejka nemiaj. ¿Keniuj yejuan kipaleuijkej Pablo? Semi kitataujtijkej Dios maj kipaleuiani (Filip. 1:12-14; Heb. 13:18, 19). Itech nejin tonalmej, miakej tokniuan tsaktokej porin amo kikauaj Jiova. Tokniuan akin nemij ompakauin kinpaleuiaj ika miak taman. Sayoj ke timiakej tel uejka tinemij. ¿Keniuj uelis tikinpaleuiskej uan tiknextiskej ke amo tikinelkauaj? Komo nochipa tiktajtaniaj Dios maj kinpaleui. w16.01 1:13, 14

Dios kinchijchiuak taltikpakneminij maj nemikan nikan taltikpak, amo ne iluikak (Gén. 1:28; Sal. 37:29). Sayoj ke Jiova kinixpejpenak sekin maj yakan iluikak uan maj tekitikan kemej tekiuanij uan tiopixkamej. Keman Dios kinixpejpena ika iyektikatsin espíritu, mopata kemej tanemiliaj. Ijkuak, peua kichiaj nemiskej ompa iluikak (Efes. 1:18). Sayoj ke ¿keniuj kimati se tokniuj ke Dios kiixpejpenak? Xikonita tein Pablo kiniluij tokniuan taixpejpenalmej akin nemiaj Roma, akin Dios kinixpejpenak maj ‘chipaujkanentinemikan iixpantsinko Yejuatsin’. Yejua kiniluij: “Namejuan nankiselijke ya namoyolijtik in [y]ektikatsin [e]spíritu. Pero ne [y]ektikatsin [e]spíritu amo namechilpijtinemi uan amo no namechmakatinemi ten namoyolijtik se ejekat tenika nanyolmouiliske Totajtsin Dios. Ta, ne [y]ektikatsin [e]spíritu namechmachililtijtinemi ke nochi namejuan Dios namechchiuak ke nanitakpakoneuan. lka ya nojon ika in chikaualis de [y]ektikatsin [e]spíritu tiknotstinemij Totajtsin Dios ijkuin: ‘Abbaʼ, ten kijtosneki Notasojtajtsin” (Rom. 1:7; 8:15). Kemej tikitaj, ika iyektikatsin espíritu, Dios kichiua maj tokniuj kiyekmati ke kiixpejpenak maj youi iluikak uan maj tekiuajti iuan Jesús (1 Tes. 2:12, TNM). w16.01 3:8, 9

¿Keniuj tiknextiaj ke tikinpoujkaitaj tokniuan akin Dios kinixpejpenak maj yakan iluikak? Ika miak taman. Yekinika, amo tikintajtaniaj keniuj kimatkej ke taixpejpenalmej, porin itech nejin moneki amo timokalakiskej (2 Tes. 3:11). Uan no, amo tiknemiliaj ke ininnamik, inintatuan uan okseki ininchankauan no taixpejpenalmej. Nejin tatiochiualis amo se taman tein kalyetouanij mopanoltiliaj (1 Tes. 2:12, TNM). Uan amo no tiktajtaniaj aksa tein uelis kichiuas maj amo kuali momachili. Kemej neskayot, amo tiktajtaniaj se tokniuj siuat akin inamik taixpejpenal keniuj momachilia keman kinemilia ke inamik amo iuan yetos itech Xochital. Titakuaujtamatij ke Jiova techmakas nochi tein tiknekiskej keman timoajsiskej itech Xochital (Sal. 145:16). Keman tikinitaj tokniuan taixpejpenalmej kemej tikinitaj okseki tokniuan semi techpaleuia. ¿Keyej? Porin Biblia kijtoua ke itech nechikol uelis moajsiskej “takajkayaukataneltokani” akin hasta no kijtoskej ke taixpejpenalmej (Gál. 2:4, 5; 1 Juan 2:19). w16.01 4:10, 11