Octubre

Jiova peuak kinixpejpena seki taltikpakneminij ika iyektikatsin espíritu satepan ke kiajokuik Jesús. Nesi ke itech nejon tonalmej nochin akin kichiuayaj kemej Cristo katkaj taixpejpenalmej. Satepan, tel miak xiujmej tel miakej akin kijtouayaj ke kichiuayaj kemej Cristo amo melauak ijkon monejnemiltiayaj. Maski ijkon, itech nejon xiujmej Jiova kinixpejpenak ika iyektikatsin espíritu akin yekmelauj kichiuayaj kemej Cristo akin amo semi miakej katkaj. Nejin tokniuan tamatiaj kemej trigo tein Jesús kijtoj ke moskaltiskia iuan amo kuali xiuit (Mat. 13:24-30). Itech itamian tonalmej, Jiova kisentokani kinixpejpenani taltikpakneminij maj pouikan iniuan 144,000. Komo tepitsin achto ke ejkos poliuilis Jiova kinixpejpena sekin, senkis tikmatij ke yejuatsin kichiujtok tein okachi kuali (Is. 45:9; Dan. 4:35; Rom. 9:11, 12, 16). Amo tiknekij tiyeskij kemej tekitinij akin Jesús ininka tajtoj itech se neskayot. Nejin tekitinij kijijtojkej ininteko porin nochin kinmakak sayoj se taxtauil maski oksekin sayoj tekitikej se hora (Mat. 20:8-15). w16.01 4:15

Itech nejin tonalmej Jiova amo techtajtania maj tikintemaktikan tokoneuan kemej netetayokolilmej. Sayoj ke kemaj techtajtania maj tiktakamatikan itanauatiluan. Xa kemansa amo tikajsikamatiskej keyej techmaka se tanauatil. Oso xa tikitaskej ke ouij tiktakamatiskej. Kemej neskayot, sekin xa techouijmaka tikteixmatiltiskej tein Biblia tamachtia porin tipinauaj uan techouijmaka titajtoskej iniuan akin amo tikinixmatij. Oksekin xa timouij amo timonejnemiltiskej kemej akin iniuan titekitij oso akin iniuan timomachtiaj (Éx. 23:2; 1 Tes. 2:2). ¿Toni uelis tikchiuaskej komo ijkon timomachiliaj? Maj tikelnamikikan kuali neskayot tein techkauilij Abrahán keman kinextij ueyi takuaujtamatilis uan yolchikaualis. Komo itech titanemiliaj tein kichiujkej takamej uan siuamej akin nochipa kitakamatkej Jiova ijkon kemej Abrahán, uelis tikchiuaskej kemej yejuan uan okachi kuali timouikaskej iuan (Heb. 12:1, 2). w16.02 1:3, 14

Keman Saúl kijtoj ke kinemiliaya kimiktis David, Jonatán monekik kiixpejpenas akoni kipaleuiskia: ipopaj oso David. Ouij katka nejon tein monekia kiixpejpenas, porin Jonatán kinekia kinyolpaktis nochin omen. ¿Toni kipaleuij maj kuali taixpejpenani? Yejua kimatia ke Dios kipaleuiaya David, amo Saúl. Yejua ika kiixpejpenak kipaleuis David. Yekinika kinejmachtij maj motatiani uan satepan kiluij Saúl maj amo kimiktiani David (1 Sam. 19:1-6). Komo tiktasojtaj Jiova, no okachi tiktayekanaltiskej tein kiyolpaktia yejuatsin uan amo tein kichiuaj kampa timomachtiaj, itech toaltepeuj oso tein kichiuaj seki mauiltianij. Maj tiknemilikan tein kipanok se tokniuj telpoch akin monotsa Henry. Yejua pouia iniuan akin mauiltiayaj ajedrez kampa momachtiaya uan kinekia tatanis keman motataniskiaj iniuan oksekin. Sayoj ke kemej nochi itamian semana mauiltiaya, amo yayaok tanojnotsati nion monechikouaya. Se tonal kiajsikamatik ke okachi kitayekanaltijtoya kaltamachtiloyan uan amo Jiova. Yejua ika kiixtalij amo mauiltisok (Mat. 6:33). w16.02 3:10, 12

Telpoch oso ichpoch, ¿keniuj uelis tikmatis ox yekmelauj tikneki timoauis porin moyolo mitsolinia? Se taman yejua keman tikita keniuj timotataujtia. Ximotajtani: “¿Miakpa niktataujtia Jiova oso amo? ¿Nikiluia tein yekmelauj nikmachilia, oso ika nitajtoua miak taman?”. Nejin mitspaleuis xikita ox kuali timouika iuan Dios (Sal. 25:4). Miakpa, Jiova kinankilia netataujtilmej ika Biblia. Yejua ika, okse taman tein mitspaleuis xikmati ox tikneki okachi timotokis iuan Jiova uan tiktekitilis ika nochi moyolo yejua komo tikita keniuj timomachtia Biblia (Jos. 1:8). Ximotajtani: “¿Nimomattok nimomachtis Biblia nochi semanas? ¿Amo nitapoloua keman ixyetok nitaueyichiuas iniuan nochankauan?”. Nejin netajtanilmej mitspaleuiskej xikita ox yekmelauj tikneki timoauis porin moyolo mitsolinia. w16.03 1:11, 13

Semi techyolpaktia tikixtajtoltiskej itech Anuario nochi tein mochiua itech tanojnotsalis noyampa taltikpak. Se taman tein techpaleuia maj amo tixexeliujtokan yejua uejueyi nechikolmej tein uejkauaj eyi tonal, kampa tinochin tikakij tanojnotsmej, ixneskayomej uan tamouisolmej tein techyolchikauaj maj tikmakakan Jiova tein okachi kuali. No techpaleuia maj amo tixexeliujtokan keman xijxiujtika tikelnamikij imikilis Jesús itech tonal 14 itech metsti judío nisán, satepan ke pankalaki Tonaltsin (1 Cor. 11:23-26). Seki semana achto ke tikelnamikiskej, tikinyoleuaj nochin akin tiueliskej maj touan mosentilikan itech nejin nechikol tein motelneki. Ijkon tiktakamatij itanauatil Jesús uan tiknextiliaj Jiova ke tiktasojkamatiliaj tein toka kichiuak. Toselti amo ueli tikinnojnotsaj nochin taltikpakneminij. Sayoj ke timosenpaleuiaj. Nejin tapaleuiani maj tikinixmatiltikan millones taltikpakneminij akoni Jiova uan tikinpaleuianij maj kiueyichiuakan. w16.03 3:4, 6, 7

Keman kimachtijtoskej se tokniuj maj kichiua teisa, moneki kimatis kichiuas ika tein Biblia tayolmajxitia uan amo sayoj porin moneki kitakamatis se tanauatil. Kemej neskayot, komo kitajtaniaj se tokniuj maj tachipaua kaltenoj kampa timosentiliaj uan maj amo kikaua maj taapalyan, uelis kiixtajtoltiliskej Tito 2:10. Uelis kimelauiliskej ke komo kichiua nejon, tapaleuijtos maj mokualnexti tamachtilis tein melauak. No uelis kiluiskej maj kinemili keniuj kintelpaleuis tokniuan akin xiuejkejya komo tachipaua. Nejon tein kiluiskej kipaleuis tokniuj maj amo sayoj kichiua porin kinauatiaj, ta porin ika nejon kinpaleuia oksekin. Keman tokniuj kiitas keniuj tekit tein kichiua kinpaleuia tokniuan, kuali momachilis. Uan no, keman tokniuj kichiuas tein kiyolmajxitiaj, tayekankej moneki kiluis ke kuali tein kichiua. Nejon kipaleuis maj okachi kuali kitekitili Jiova, kemej yeskia kiatekiaj se tatok maj moskalti. w15 15/4 2:7, 8

¿Tikonpiani se kuejmol tein ouij uan tionmomachiliani moselti? Xa amo mitsonmakakejok tekit oso tikonpiak kuejmolmej kaltamachtiloyan. Xa tikonpiak se kokolis oso tikonpiak se ueyi kuejmol. Xa tionmoyolkokoj ijkuak tikonitak ke amo akin mitsonpaleuiaya. Tikmatij ke seki kuejmolmej semi ouijkej uan amo ueli kiyektalia taltikpaknenkej. ¿Toni uelis tikonchiuas? Biblia techiluia maj titakuaujtamatikan iuan Jiova (Prov. 3:5, 6). ¿Yekmelauj uelis iuan titakuaujtamatiskej? ¡Kemaj! Itech Biblia ixnesij miak tanojnotsmej tein techyekmatiltiaj ke Jiova yekmelauj kinpaleuia itekitikauan. Komo tejuatsin tikonpia se kuejmol uan amo akin mitsonpaleuia, amo xionyolijsiui. Xikonchiua kemej Pablo uan xikonita keniuj itech nejon kuejmol uelis tikonnextis ke senkis tiontakuaujtamati iuan Jiova. No xikonita kemej se taman kampa uelis tikonitas keniuj Jiova mitsonyekpia. Nejon kichiuas okachi xiontakuaujtamati iuan Jiova uan okachi kuali xionmouika iuan. w15 15/4 4:3-5

Jiova se Dios akin semi tetasojta (1 Juan 4:8). Satanás sayoj ueli kichiua maj taltikpakneminij kiixnamikikan Dios keman kinkajkayaua. ¿Keniuj? Kichiua maj taltikpakneminij amo “[kimachilikan] ke moneki motokiskej iuan Dios” (Mat. 5:3, TNM). Amokuali kinkajkayauani tel miakej taltikpakneminij porin amo kineki maj kiixmatikan keniuj yekmelauj tamati Dios. Satanás kimati ke Jiova kineki maj sayoj yejuatsin tikueyichiuakan (Éx. 20:5). Yejua ika, okachi kinkajkayaua taltikpakneminij ika taneltokalismej tein amo melaujkej. Semi yolpaki keman kichiua maj taltikpakneminij kinueyichiuakan ininuejkaujtatuan, tein onkak iluikak uan taltikpak, tapialmej uan okseki taman, sayoj ke amo Jiova. Itech itonaluan tanauatijkej Isaías no ijkon panouaya iniuan israelitas. Jiova kitemoj kinpaleuis keman kijtoj ke taneltokalis tein amo melauak tamati kemej takual tein amo kuali. Yejuatsin kiniluij ke amo taixejekol katka maj kiixtaujtonij teisa tein amo kinixuitiskia. Uan no kijtoj: “Xinechkakikan ika nejmachkayot, uan xikuakan tein kuali” (Is. 55:2). w15 15/5 1:14, 15

Uelis tikmatiskej ke Abel nochipa itech tanemiliaya nejon netenkaualis. Kemej neskayot, xa motajtanij akoni kouat kixokoliskia uan kiajsikamatik ke yejua akin kinpaleuiskia taltikpakneminij maj oksepa amo kipiakan tajtakol. Yejua takuaujtamatia ke Dios nochipa kichiua tein motenkaua. Yejua ika, keman kimakak Jiova se netetayokolil, yejuatsin kiselij ika miak pakilis (Gén. 4:3-5; Heb. 11:4). Noé no takuaujtamatik itech tein Dios motenkaua kichiuas. Yejua ika amo momikilij keman ualaj Tetsaujkakiouit (Heb. 11:7). Kemej senkis takuaujtamatia, satepan keman panok Tetsaujkakiouit kimakak Dios tapialmej kemej netetayokolilmej (Gén. 8:20). Satepan, se takat akin motokaytiaya Nemrod mochiuak tekiuaj uan kitemoj maj taltikpakneminij kiixnamikinij Jiova (Gén. 10:8-12). Sayoj ke Noé kisentokaya senkis takuaujtamatia. Ijkon kemej Abel, Noé xa tanemilij itech tonal keman Dios kitamis tajtakol uan mikilis. Uan xa tanemilij itech tonal keman ixpoliuiskej nochin tekiuanij akin tetajyouiltiaj. Tejuan no uelis titanemiliskej itech nejon tonal, tein amo uejkauaok mochiuas (Rom. 6:23). w15 15/5 3:4, 6

Seki taltikpakneminij nochipa motekipachojtokej porin kinemiliaj ke kinpanos miak taman tein amo kuali. Komo tejuan ijkon titanemiliaj, uelis tikokolispeuaskej uan amo titakuaujtamatiskejok iuan Jiova. Maj tikelnamikikan tajtolmej tein ixnesij itech tajkuilol tein axkan tikitaj. ¿Toni uelis tikonchiuas komo moajsi teisa tein semi mitsontekipachoua? Iuan xiontajto aksa akin no kitekitilia Jiova uan kuali mitsonixmati. Uelis yeski semej motatuan, monamik oso aksa akin kuali iuan tionmouika. Yejuan uelis mitsonyolchikauaskej xiontakuaujtamati iuan Jiova uan mitsonpaleuiskej amo semi xionmotekipachook. Jiova okachi kuali techajsikamati kemej amo akin ueli kichiua uan uelis techpaleuis keman techtekipachos teisa. Pablo kijkuiloj: “Amo teyika ximoyolkuejmolokan. Ta, nachipa ximoteixpantikan iixpantsinko Totajtsin Dios ika namonetatatautilis uan xiktasojkamachilikan Dios. Uan no xiktajtanilikan Dios nochi ten namechpoloa. Uan ika por namonetatatautilis Dios namechtayokolijtiyas ne yolseuilis ten kachi kuika uelilis hasta amo uelis se kajsikamatis ok de keniu. Uan nijin mouiskayolseuilis, ma yejua kinyekantinemis namoyolojuan uan namotamachilisuan” (Filip. 4:6, 7). Yejua ika, komo tejuatsin semi tionmotekipachoua, itech xiontanemili nochi nepaleuil tein Jiova techmaka uan ijkon uelis tiksentokaskej kuali timouikaskej iuan. Kemej neskayot, techpaleuia inintechkopa tokniuan itech nechikol, tayekananij, takeual takuaujtamach, ángeles uan Jesús. w15 15/5 4:16, 17

Kampa ika norte itech templo, moajsia se ueyi tepan aichkual. Ompa yayaj miakej taltikpakneminij porin kinemiliayaj ke pajtiskiaj. Jesús kiiknelij se takat akin amo uelia ojtokaya. Tel achtook ke Jesús yoliskia nikan taltikpak, nejon takat ipa mokokouayaya (Juan 5:6-9). Jesús kitajtanij takat ox kinekia pajtis. Yejua tanankilij ika tayokol ke kemaj kinekia, sayoj ke amo uelia porin amo akin kipaleuiaya maj mopankalakiani itech ueyi tepan aichkual. Ompa, Jesús kiluij maj kichiuani se taman tein moitaya ke amo ueliskia kichiuas. Kiluij maj moketsani, maj kiajokuini itapech uan maj nejnemini. ¡Uan takat ijkon kichiuak! Nejin ueyi tachiualis kichiua maj titanemilikan itech uejueyi tachiualismej tein amo uejkaua Jesús kichiuas itech Xochital. Sayoj ke no techmachtia ke Jesús kinteltasojta taltikpakneminij. Yejua yajki itech nejon ueyi tepan aichkual porin kintemouaya taltikpakneminij akin monekia maj kinpaleuikan. Tejuan moneki tikchiuaskej kemej yejua uan tikintemoskej taltikpakneminij akin motekipachojtokej porin mochiua miak taman tein amo kuali itech nejin taltikpak. w15 15/6 2:8-10

Keman Jesús peuak kichiua netataujtil kijtoj “ToTajtsin”. Nejin techelnamiktia ke Jiova inintajtsin nochin tokniuan takamej uan siuamej akin moajsij noyampa taltikpak (1 Ped. 2:17). Tokniuan taixpejpenalmej kiluiaj Jiova “Notasojtajtsin” porin yejuatsin kinselij kemej ikoneuan (Rom. 8:15-17). ¿Uan keyej akin kichiaj nemiskej nikan taltikpak no ueli kijtouaj ke Jiova inintajtsin? Porin Jiova kinmaka nemilis uan nochi tein kinpoloua. Uan satepan no mochiuaskej ikoneuan Dios, keman amo kipiaskejok tajtakol uan kinextiskej ke amo kikauaj yejuatsin keman Satanás oksepa kitemos kinkajkayauas (Rom. 8:21; Apoc. 20:7, 8). Tetatmej akin kichiuaj kemej Cristo ueli kinmakaj ininkoneuan se netetayokolil tein kitelpia ipatiuj. ¿Katiyejua? Keman kinmachtiaj keniuj kichiuaskej netataujtil uan maj kiitakan Jiova kemej inintajtsin. Okachi kuali netetayokolil tein tetatmej ueli kinmakaj ininkoneuan yejua keman kinmachtiaj ke Jiova yekmelauj nemi uan ke uelis kuali iuan mouikaskej. w15 15/6 4:4-6

Keman tikijtouaj “xitechonajchiuili den chikaualis den amokuali”, tiktajtanijtokej Jiova maj techpaleui maj Satanás amo techuika maj tikchiuakan tein amo kuali. ¿Keniuj tiknextiaj ke tiknekij maj techpaleui? Keman timochikauaj ‘amo tipoujtinemiskej ok iuan in taltikpakuanij’ nion tiktasojtaj tein onkak nikan taltikpak (Juan 15:19; 1 Juan 2:15-17). Amo uejkaua, Jiova kitsakuas Satanás uan kiixpolos tein amo kuali tein mochiujtok itech nejin taltikpak. Sayoj ke, hasta maj ejko nejon tonal, moneki tikelnamikiskej ke Satanás tel kualantok porin kimati ke amo kipiaok miak tonalmej. Kichiuas tein yeski uan ijkon kitemos maj amo tiksentokakan tiktekitilikanok Jiova. Yejua ika moneki tiksentokaskej tiktajtaniskej Dios maj techpaleui maj Satanás amo techuika maj tikchiuakan tein amo kuali (Apoc. 12:12, 17). Komo tiknekij tinemiskej keman amo moajsisok Satanás, moneki maj tiksentokakan tiktajtanikan Dios maj uiki iTekiuajyo, maj moueyitali itokay uan maj mochiua itanejnekilis nikan taltikpak. Maj titakuaujtamatikan ke yejuatsin mojmostaj techmakas tein techpoloua tein ika timoixpanoltiskej uan tein techpaleuis maj tiksentokakan tiktakamatikan (Mat. 6:9-13). w15 15/6 5:12, 17, 18

¿Toni panos itech nejon tonalmej? Amo senkis tikmatij. Sayoj ke xa tel ouij se moixpanoltis uan xa monekis tikauaskej miak taman. Itech xolal Jerusalén, akin kichiuayaj kemej Cristo monekik kisaskej ininchan uan kipanoskej tel miak ouijkayomej (Mar. 13:15-18). Yejua ika moneki timotajtaniskej: “¿Uelis nikauas miak taman tein nikpia? ¿Nikixtalia nikchiuas tein yeski tein nechpaleuis maj amo nikaua Jiova?”. Xa amo tiknemilianij, sayoj ke ijkuak, sayoj tejuan tiktekitilijtoskej toDios. Uan monekis tikchiuaskej maski tikpanotoskej miak ouijkayomej, ijkon kemej kichiuak Daniel (Dan. 6:10, 11). Itech okachi ueyi tajyouilis amo tikteixmatiltiskejok “kuali tanauatilmej ika tekiuajyot”. Ijkuak, tamisya tonalmej keman monekia motanojnotsas. Yeskij tonalmej keman ejkosya “tamilis” (Mat. 24:14, TNM). Ika yolchikaualis tikinmatiltiskej nochin taltikpakneminij toni kinpanoti. Xa nejin tein tikinmatiltiskej kinextis ke nochi tein kiixyekana Satanás senkis ixpoliuis. w15 15/7 2:3, 8, 9

Jesús kijtoj ke sekin hasta techtauelitaskiaj porin amo timonejnemiltiaj kemej yejuan. Sayoj ke maj tikelnamikikan ke miakej nion tepitsin kiixmatij iTekiuajyo Dios. Yejua ika amo kiajsikamatij keyej tikitaj ke motelneki tikpaleuiskej sayoj nejon Tekiuajyot. Komo tiknekij tikueyitaliskej Jiova, moneki timochikauaskej nochipa tiktakamatiskej maski oksekin techiluiskej oso techchiuiliskej tein amo kuali (Dan. 3:16-18). Telpochmej uan ichpochmej xa kinouijmaka amo monejnemiltiskej kemej oksekin. Sekin xa mouij amo kitajpaloskej bandera oso amo tapaleuiskej keman kichiuaj teisa tein ika kiueyitaliaj altepet. Yejua ika tetatmej moneki kinpaleuiskej maj kinextikan yolchikaualis kampa momachtiaj. ¿Keniuj? Keman taueyichiuaj kemej kalyetouanij uelis ika tajtoskej keniuj kiita Jiova maj se kitajpalo bandera uan okseki taman kemej nejon. Uan no, uelis kinmachtiskej maj kuali kimelauakan tein kineltokaj uan ika poujkaitalis (Rom. 1:16). Uan komo moneki, tetatmej uelis kinnojnotsaskej tamachtianij uan kinmelauiliskej tein tikneltokaj. w15 15/7 3:15, 16

Jiova kinextij ke techtasojta keman kiualtitanik iKonetsin “para maj tejuan tikpiakan ne nachipa nemilis” (1 Juan 4:9). Tatitanil Pablo kimelauak: “Semi oui de tikneltokaj ke aksa taltikpaktagat momikilis para kipaleuis de okse tagat ten yolchipauak. Pero acha ueliskia onkaskia se aksa ten moixeuis de ijkon kichiuas, de momikiliskia para kipaleuiskia se tagat ten melau yolkuali”. Sayoj ke no kijtoj ke Dios technextilij ke semi techtasojta keman kiualtitanik iKonetsin maj toka momikiliki “maski tejuan tech ne tonal tikatkaj semi titajtakolejke” (Rom. 5:6-8). Imikilis Jesús techpaleuia maj timochiuakan tiitasojikniuan Dios uan nejon yejua tein okachi kinextia ke techteltasojta. Techtelyolpaktia tikmatiskej ke komo amo tikauaj Dios, yejuatsin techmakas okachi kuali nemilis itech Xochital. Tikyekmatij ke imikilis Jesús yejua tein okachi kinextia ke Jiova techtasojta. w15 15/8 1:13, 15

Yeski se ueyi tatiochiualis tiktekitiliskej Dios itech Xochital keman taixyekantos. Yejua ika, axkanya tikchiuaj ika yolpakilis tein moixtalia itech inechikol. Sayoj ke kemansa no uelis technauatiskej maj tikchiuakan okse taman tekit. Kemej neskayot, seki tokniuan akin tekitiaj itech sucursal tein moajsi Estados Unidos kintitankej okseko maj tapaleuitij. Uan seki tokniuan takalpanouanij kinixtalijkej maj kichiuakan tekit kemej precursor especial porin xiuejkejya oso kipanotokej okseki taman. Nochin nejin tokniuan kinyolpaktia tein kichiuaj, uan Jiova semi kintatiochiuijtok. Komo tejuan no tiknekij tiyolpakiskej uan maj Jiova techtatiochiui, moneki tiktajtaniskej maj techpaleui, tikchiuaskej nochi tein tiueliskej itech itekiyo uan tiyolpakiskej ika tein yeski tekit tein kiixtaliskej maj tikchiuakan (Prov. 10:22). Uan komo itech Xochital tiknekij tinemiskej kampa okachi tikuelitaj, sayoj ke itech inechikol Dios techiluiaj maj tinemikan okseko, tikyekmatij ke amo semi techtekipachos kani tinemiskej oso toni tekit tikpiaskej, ta semi tiktasojkamatiliskej Jiova porin techkauak maj tinemikan itech Xochital. w15 15/8 3:8

Itech itonaluan Noé, tel miakej taltikpakneminij nochipa sayoj kinemiliayaj kichiuaskej tein amo kuali. Sayoj ke yejua amo keman mouikak iniuan akin amo kitasojtayaj Jiova. Okachi kuali, kitemouaya yetos nochipa iuan inamik, ikoneuan uan isiuamouan, uan nochin yejuan kitayekanaltijkej kichijchiuaskej arca uan kiteixmatiltiskej tein yaya mochiuati (2 Ped. 2:5). Nejin kinpaleuij maj makisanij keman mochiuak Tetsaujkakiouit. Itech nejin tonalmej, tinochin tiualeuaj itechkopa Noé uan ichankauan. Yejua ika moneki tiktasojkamatiskej maj yejuan tatakamatinij uan maj amo mouikanij iniuan akin kichiuayaj tein amo kuali. No ijkon, yekinika itatojtokakauan Cristo no tatakamatkej uan amo mouikakej iniuan akin amo kitasojtayaj Jiova. Nejin kinpaleuij maj makisanij keman kiixpolojkej Jerusalén itech xiuit 70 (Luc. 21:20-22). w15 15/8 4:17, 18

Komo tiknekij maj neixpetanilis techpaleui, moneki timoyekpiaskej ika toni neixpetanilis tikixpejpenaj uan kanachi tiempo tikuij. ¿Keniuj totanemilil techpaleuia maj kuali titaixpejpenakan? Biblia kijtoua maj amo keman tikchiuakan tein amo kuali, kemej tiauilnemiskej, tikinueyichiuaskej tiotsitsin, tiktekitiltiskej naualot, timoteuiskej, tiyaskej iluimej kampa motelchiua tein amo kuali oso titauanaskej. Pablo kijtoj ke akin kichiuaj nejon amo kiseliskej iTekiuajyo Dios (Gál. 5:19-21, TNM). Yejua ika, maj timotajtanikan: “¿Nechkaua notanemilil maj nimoixpetani ika neauiltilis kampa moita tateuilis oso kampa kinextia ke se altepet okachi kuali, oso tein kichiua maj nitateui? ¿Nechkaua notanemilil maj nikita películas kampa monextia ke kuali maj se auilnemi, maj se tauana oso maj se kitekitilti naualot?”. w15 15/9 2:11, 12

Biblia kijtoua ke Jiova amo techchijchiuak kemej uelis toselti tikixtaliskej tein kuali yetok uan tein amo kuali yetok. Yejuatsin kimati tein okachi techpaleuis. Yejua ika, sayoj komo tiktakamatij uan tikpoujkaitaj uelis tiyolpakiskej uan tikpiaskej yolseuilis. Jiova techmachtiani nejin taman tein motelneki porin techtasojta. Se kuali tepopaj kitemoua maj ikoneuan kipiakan se kuali nemilis satepan uan kineki maj yolpakikan. Sayoj ke, tein melauj, miakej taltikpakneminij itech nejin tonalmej amo kimatij toni kinpanoti satepan. Kitayekanaltiaj tel tekitiskej uan kipiaskej miak taman tein amo uejkauas (Sal. 90:10). Sayoj ke akin tiktekitiliaj Jiova timotasojkamatij porin yejuatsin techmachtiani keniuj tiyolpakiskej axkan uan motenkaua techmakas miak tatiochiualismej satepan. w15 15/9 4:10, 11

Ne uejkauj, miakej kiitakej keniuj Dios kipaleuij xolal Israel. Kemej neskayot, Jiova kichiuak mouiskatekimej oso uejueyi tachiualismej tein ika kipaleuij ixolal maj kisani Egipto uan maj tatanini itech miak neteuilismej (Jos. 9:3, 9, 10). Miakej tekiuanij amo kinekkej kineltokaskej ke katka Jiova akin kipaleuijtoya ixolal. Yejua ika tapolojkej itech neteuilis. Xiujmej satepan, se tekiuaj miakpa uelik kiitak keniuj Dios kipaleuiaya ixolal. Motokaytiaya Acab uan semi amo yolkuali katka. Elías kitajtanij Jiova maj kiualtitanini tit, uan Jiova kinankilij inetataujtil. Elías no kiluij Acab ke Jiova kichiuaskia maj tel kioui. Uan yejua nejon tein panok (1 Rey. 18:22-45). Sayoj ke Acab amo kinekik kineltokas ke Jiova kichiujka nochi nejin mouiskatekimej. ¿Toni techmachtiaj nejin uan okseki neskayomej? Ke komo tiknekij tikitaskej keniuj Dios techpaleuia, moneki tiktemoskej tikitaskej keniuj kichiuati. w15 15/10 1:4, 5

Maj amo keman tiomeyolouakan ke komo titakuaujtamatij iuan Jiova uan tikchiuaj tein techtajtania, yejuatsin techpaleuis. Pablo kijtoj ke Dios kipia chikaualis tein ika techpaleuis kemej nion ueli tiknemiliaj (Efes. 3:20). Tejuan tikchiuaj nochi tein tiuelij uan ijkon tiktekitiliaj Dios, sayoj ke tikmatij ke amo nochi ueli tikchiuaj. Yejua ika timochikauaj uan titakuaujtamatij ke Jiova techtatiochiuis. Tein melauj, semi tiktasojkamatij maj yejuatsin techpaleui. Jiova motenkaua ke techmakas tein yeski tein tiktajtaniskej komo mouika ika itanejnekilis (1 Juan 5:14). Yejua ika tikmatij ke komo tiktajtaniaj okachi takuaujtamatilis, yejuatsin techmakas. Uan no, tikpiaskej okachi chikauak totakuaujtamatilis uan yejuatsin kiitas ke technamiki tikseliskej tatiochiualis tein kiualkuis iTekiuajyo (2 Tes. 1:3, 5). w15 15/10 2:16-18

Titanemiliskej itech Jiova uan Jesús uelis techpaleuis maj tiyekyolmajsitokan uan maj tikpiakan chikauak totakuaujtamatilis (Heb. 5:14; 6:1). Komo amo semi titanemiliaj itech Jiova, timouejkatilijtiyaskej iuan uan xa hasta senkis tikauaskej (Heb. 3:12). Jesús tanejmachtij ke akin amo kiseliaj ika nochi ininyolo tein kiixtajtoltiaj itech Biblia, uelis mouejkatiliskej iuan Jiova porin “moyolkuejmolojtinemij” uan “kinyoltilantok ok in ricojyot. Uan no mopakiltijtinemij ok tech nintanejnekilis” (Luc. 8:14, 15). Yejua ika motelneki maj nochipa titanemilikan itech Biblia uan maj mojmostaj okachi kuali tikixmatikan Jiova. Nejon techolinis maj timochikauakan tiksentokaskej tiknextiskej ikualneskayouan uan tikchiuaskej kemej yejuatsin (2 Cor. 3:18, TNM). Komo timochikauaj, uelis nochipaya tiksentokaskej tikixmatiskej Dios uan kemej tamati. ¡Se tel ueyi tatiochiualis! (Ecl. 3:11.) w15 15/10 4:13, 14

Tejuatsin tikonneki maj mokoneuan kuali mouikakan iuan Jiova. Uan yejuatsin mitsonmakatok tanauatil xikonmachti uan xikonmelaua mokoneuan (Efes. 6:4). Yejua ika moneki tikonmachtis nochipa ika Biblia. Xiontanemili itech nejin. ¿Keyej tejuatsin tikontitani mokoneuan maj yakan kaltamachtiloyan? Porin tikonmati ke tein ompa kinmachtiskej kinpaleuis satepan. Yejua ika okachi moneki nochipa tikonuikas mokoneuan nechikolmej, uejueyi nechikolmej uan nantaueyichiuaskej kemej kalyetouanij. Xikonelnamiki ke komo kiixmatij Jiova uelis makisaskej. Yejua ika xikonpaleui maj kinyolpakti kiixmatiskej Jiova uan maj kiajsikamatikan ke yejuatsin uelis kinnextilis maj kuali taixpejpenakan. Uan xikonmachti ke motelneki maj tanojnotsakan. Xikonchiua kemej Jesús uan xikonpaleui mokoneuan maj kinyolpakti kiniluiskej taltikpakneminij tein kijtoua Biblia. w15 15/11 2:6

Jiova kiixtalij maj takat taixyekana kalijtik. Sayoj ke nejon amo kijtosneki ke uelis ininka mauiltis ichankauan, ta Jiova kichia maj kinnextili netasojtalis. Semi melauak ke Biblia kijtoua ke takat kiixyekana inamik. Sayoj ke no kijtoua ke moneki kipoujkaitas (1 Ped. 3:7). ¿Keniuj takat uelis kipoujkaitas inamik? Keman kiita toni kipoloua uan kichiua tein kiyolpaktia nochipa keman ueli. Biblia kiniluia takamej: “Moneki xikintasojtatiyakan namosiuauan ijkon keme Totekotsin Cristo kinyoltasojta itaneltokakauan [...] hasta motemaktij ma kimiktikan para kixtauas den nintajtakoluan” (Efes. 5:25). Kemej tikitaj, Jesús kinteltasojtaya imomachtijkauan hasta motemakak ininka momikilis. Komo takat kichiua kemej Jesús uan kinextilia netasojtalis inamik, siuat okachi amo kiouijmakas kitasojtas, kipoujkaitas uan tapaleuis itech tein kiixpejpenas (Tito 2:3-5). w15 15/11 4:6, 7

Miakej akin kichiuayaj kemej Cristo okachi tajtouayaj griego uan amo hebreo. Kemej tajtol griego yejua tein okachi kikuiaj taltikpakneminij, amatajkuilolmej Mateo, Marcos, Lucas uan Juan moijkuilojkej itech nejon tajtol. Amamej tein Pablo kijkuiloj uan okseki amatajkuilolmej tein moajsij itech Biblia no moijkuilojkej itech griego. Keman akin kijkuilojkej Escrituras Griegas kinekiaj kijkuiloskej tajtolmej tein moajsiaj itech Escrituras Hebreas, miakpa kikixtiayaj itech Septuaginta, porin ompa motajtolkepkaya itech griego. Kemansa, kemej ijkuiliujtoyaj nejon tajtolmej itech Septuaginta tepitsin mopataya ika tein ijkuiliujtoya itech Escrituras Hebreas tein yekinika mochijchiujkej. Maski ijkon, nejon amatajkuilolmej tein kitajtolkepkej taltikpakneminij tajtakolejkej, pouij itech Biblia tein axkan tikpiaj. ¿Toni techmachtia nochi nejin? Ke Jiova amo kinemilia ke se tajtol oso se xolal okachi kuali ke okseki (Hech. 10:34). w15 15/12 1:8, 9

Biblia kijtoua ke onkak “tonal keman amo teyi se kijtos” (Ecl. 3:7). Nejin kijtosneki ke kemansa monekis amo titajtoskej. Kemej neskayot, keman oksekin tajtojtokej, tiknextiaj poujkaitalis keman sayoj titakakij uan amo teyi tikijtouaj (Job 6:24). Keman tikmatij seki taman tein amo moneki momatis, moneki amo tikintapouiskej oksekin (Prov. 20:19). Uan keman aksa techiluia teisa tein techkuejmoloua, moneki tiyolseujtoskej uan amo teyi tikijtoskej (Sal. 4:4). Sayoj ke kemansa semi kuali maj titajtokan (Ecl. 3:7). Kemej neskayot, uelis titajtoskej keman tiknekij tikueyichiuaskej Jiova, tikinyolchikauaskej oksekin oso tikijtoskej tein tikmachiliaj uan tein techpoloua. Ijkon tiknextiliaj Jiova ke tiktasojkamatij maj techmakani totajtol, porin keman se totasojikniuj techmaka se netetayokolil tein kitelpia ipatiuj, tiknekij tel kuali tiktekitiltiskej. w15 15/12 3:4, 5

Itech nejin tonalmej, nion se tokniuj ueli kichiua uejueyi tachiualismej tein ika techpajtis (1 Cor. 12:9). Sayoj ke sekin kinekij techpaleuiskej maj okachi kuali tiyetokan uan xa techiluiskej toni uelis tikchiuaskej, maski amo tikintajtaniskej. Semi melauak ke seki taman tein techiluiskej uelis techpaleuis. Kemej neskayot, Pablo kimatia ke Timoteo kemansa mopoxkokouaya, xa porin tayia at tein amo chipauak. Yejua ika kiyolmajxitij maj tayiani tepitsin vino. Sayoj ke moneki timoyekpiaskej ika tein techiluiskej maj tikchiuakan. Se tokniuj xa kitemos kichiuas maj titayikan se taman pajti oso xiujpaj. Oso xa techiluis toni taman takual moneki tikuaskej oso toni amo. Xa techiluis ke nejon kipaleuij se ichankauj akin no kipiaya se kuejmol kemej tein tikpiaj. Sayoj ke nejon amo kijtosneki ke no techpaleuis. Miakej taltikpakneminij uelis kinpaleuis se taman tapajtilis, sayoj ke oksekin uelis kinijtakos (Prov. 27:12). w15 15/12 4:13

Kemej tinochin titajtakouanij, technamiki timomikiliskej (Rom. 5:12). Sayoj ke kemej Dios semi techtasojta, kiualtitanik iKonetsin maj toka momikiliki (Heb. 2:9). Sayoj ke imikilis Cristo kichiuas okachi miak taman tein kuali. Senkis kiixpolos mikilis (Is. 25:7, 8; 1 Cor. 15:22, 26). Nochin akin takuaujtamatiskej iuan Jesús yolpakiskej uan yolseujtoskej nochipaya, sekin ne iluikak iuan Cristo uan sekin nikan taltikpak (Rom. 6:23; Apoc. 5:9, 10). Sayoj ke netetayokolil tein Dios techmakak kipia okseki taman tein kuali. ¿Toni? Taltikpak yeski se xochital, akin mokokouaj pajtiskej uan mikemej oksepa nemiskej (Is. 33:24; 35:5, 6; Juan 5:28, 29). Semi tiktasojtaj Jiova uan Jesús porin techmakakej nejin tel kualtsin netetayokolil (2 Cor. 9:15). w16.01 2:5, 6

Keman Dios kiixpejpena se tokniuj ika yektikatsin espíritu, nejon tokniuj mopata kemej tanemilia. ¿Keniuj? Achto ke kimatiltiskiaj ke yas iluikak, yejua kichiaya nemis nochipaya nikan taltikpak. Xa kinekia kiitas tonal keman Jiova kichiuas se xochital uan kijkuanis nochi tein amo kuali. Uelis yeski ke kinemiliaya ke yetoyaya itech Xochital uan kiselijtoya se ichankauj oso se itasojikniuj akin momikilij. Uan xa kichiaya kichijchiuas ichan uan kikuas takilot tein kitemakaskiaj koujmej tein yejua kitokaskia (Is. 65:21-23). Sayoj ke keman Jiova kiixpejpenak maj youi iluikak, itanemilil mopatak. ¿Keyej? ¿Xa yeski porin tel tayokoxtoya oso tel tajyouij? ¿Xa porin peuak kinemilia ke nemis nochipaya itech taltikpak tel amo kualtsin yeski uan amo yolpakis? ¿Xa porin peuak kinejneki kimatis keniuj yeski nemilis ompa iluikak? Amo. Mopatak itanemilil porin Jiova ijkon kiixtalij. Keman Dios kiixpejpena se tokniuj maj youi iluikak, ika iyektikatsin espíritu kichiua maj mopata kemej tanemilia uan netetayokolil tein kichia kiselis. w16.01 3:11, 13

Jiova kichijchiuak nochi tein onkak. Amo onkak okse aksa akin okachi tamatkej uan chikauak ke yejuatsin. Se tonal, Job kijtoj ke kiajsikamatik ke Dios ueli kichiua nochi tein kiixtalia. Amo teyi onkak tein amo uelis kichiuas (Job 42:2). Uan no, amo moneki maj aksa kipaleui. Maski ijkon, kinkaua oksekin maj tekitikan iuan. Ijkon kinnextilia ke kinteltasojta. Dios yekinika kichijchiuak iKonetsin, Jesús. Ompa kimakak iKonetsin se tekit tein motelneki. Kikauak maj kipaleui keman kichijchiuak nochi okseki taman (Juan 1:1, 2, 18). Jiova kimakak Jesús nejin ueyi tatiochiualis uan kinmatiltij oksekin (Col. 1:15-17, TNM). w16.01 5:1, 2