Noviembre

Nejin amo kijtosneki ke Abrahán amo kinekia nemisok. Biblia kijtoua ke “kichiaya altepet tein kipia kuajkuali tatsineualonimej, tein Dios kiixtalij uan kichijchiuak” (Heb. 11:10, TNM). Xikonnemili keniuj Abrahán tel yolpakis keman nemis itech Xochital uan uelis okachi kichikauas ikuali uikalis iuan Dios. Kiyolpaktis kimatis ke neskayot tein kikauak ika itakuaujtamatilis kinpaleuij tel miak xiujmej itekitikauan Dios. Kimatis ke tein kichiuak iuan Isaac itech nejon tepet kiixnextij se taman tein motelneki tein mochiuak satepan (Heb. 11:19). Uan kimatis ke tayokol tein kimachilij keman yaya kimiktiti Isaac kinpaleuij tel miakej akin amo kikauaj Dios maj kiajsikamatikan tayokol tein Jiova kimachilij keman kiualtitanik Jesús maj momikiliki ininka taltikpakneminij (Juan 3:16). w16.02 1:15, 16

Uelis tiknextiskej ke tiknekij tikyolpaktiskej Jiova keman se tokniuj akin kipia tanauatil techchiuilia tein amo kuali. Dios kiixtalij Saúl kemej tekiuaj, sayoj ke Saúl kichiuilij ikonetsin tein amo kuali. Yejua amo kiajsikamatia keyej Jonatán kiteltasojtaya David. Yejua ika, keman Jonatán kitemoj kipaleuis David, Saúl tel kualanik uan kipinaujtij ininixpan miakej. Sayoj ke Jonatán kisentokak kipoujkaitak ipopaj. Uan no kinextij ke kinekia okachi kiyolpaktis Jiova uan kisentokas kipaleuis David, akin Dios kiixpejpenka maj kiixpata Saúl kemej tekiuaj ompa Israel (1 Sam. 20:31-41). Axkan, tayekananij mochikauaj kichiuaskej tein kuali iniuan nochin itech nechikol. Sayoj ke kemej tajtakouanij, xa kemansa amo kiyekajsikamatij keyej tikchiuaj teisa (1 Sam. 1:13-17). Komo kemansa techchiuiliaj tein amo kuali, maj amo tikauakan Jiova. w16.02 3:14, 15

Seki telpochmej kijtouaj ke motemaktijkejya iuan Jiova, sayoj ke kiitaj ke ayamo uelis moauiskej. Sayoj ke nejon amo taixejekol. Tein melauj, nejon telpochmej amo kiajsikamatij ke se motemaktis uan se moauis amo sayoj se taman kijtosneki. Keman se motemaktia se kichiua se netataujtil kampa se motenkaua iuan Jiova ke se kitekitilis nochipaya. Uan satepan se moauia uan ijkon nochin kimatiskej ke se kimaktilijya Jiova se inemilis. Yejua ika, achto ke timoauis moneki kuali tikajsikamatis toni kijtosneki se motemaktis iuan Dios. Keman se motemaktia iuan Jiova, se kiluijtok ke axkan iaxkaya se inemilis. Se motenkaua ke nochipa se kitayekanaltis se kitekitilis. Yejua ika moneki amo tikauilmatiskej (Mat. 5:33). w16.03 1:14, 15

Tatitanil Pablo ika tajtoj se inakayo uan ijkon kimelauak ke tinochin akin tikchiuaj kemej Cristo uelis titapaleuiskej itech nechikol maj amo tixexeliujtokan uan maj tiktojtokakan Jesús, akin tamati kemej tsontekon (Efes. 4:16). Yejua ika, yeski titelpochmej oso tixiuejkejya, kuali tiyetoskej oso tikpiaskej se kokolis, ¿keniuj uelis titapaleuiskej maj kuali timouikakan itech nechikol? Jesús kinixtalijtok tayekananij maj taixyekanakan itech nechikol. Uan yejua kineki maj tikinpoujkaitakan uan maj tikchiuakan tein techiluiaj (Heb. 13:7, 17). Tein melauj, kemansa ouij techkisa. Sayoj ke komo tiktajtaniaj Jiova maj techpaleui, yejuatsin techmakas iyektikatsin espíritu uan techpaleuis maj titatakamatikan. Komo tiyolyemankej uan titekitij iniuan tayekananij, okachi titapaleuiskej itech nechikol. Amo tixexeliujtoskej uan okachi timotasojtaskej. w16.03 3:8, 9

Keman seki tokniuan katkaj okachi telpochmej, inintatuan amo kinyolchikaujkej maj kiixtalianij kiajsiskej tekimej tein kinpaleuiskia maj okachi kitekitilianij Jiova. Yejua ika amo keman semi kitayekanaltijkej itekiyo Dios (Mat. 10:24). Tayekankej moneki kitemos kuali mouikas iuan tokniuj akin kineki kiselis seki tekimej itech nechikol uan kiluis ke itech nechikol moneki inepaleuil. Moneki iuan motalis uan kinextilis tajkuilolmej itech Biblia tein kipaleuiskej maj kinemili keniuj kikuini inemilis satepan ke motemaktij iuan Jiova (Ecl. 5:4; Is. 6:8; Mat. 6:24, 33, TNM; Luc. 9:57-62; 1 Cor. 15:58; 2 Cor. 5:15; 13:5). Tayekankej uelis kitajtanis: “¿Toni timotenkauak iuan Jiova keman iuan timotemaktij? ¿Keniuj tiknemilia ke momachilij yejuatsin keman timoauij?” (Prov. 27:11). “¿Keniuj momachilij Satanás?” (1 Ped. 5:8.) Moneki kiixtajtoltis tajkuilolmej kemej nejin, porin uelis ajsis itech iyolo tokniuj uan kiolinis maj kipata itanemilil. w15 15/4 2:9, 11

¿Keyej Jiova amo nochipa niman technankilia keman tiktataujtiaj? Techpaleuis maj tikajsikamatikan komo tikelnamikij ke Biblia kijtoua ke Jiova yejua toPopaj uan tejuan tiikoneuan (Sal. 103:13). Tetatmej amo nochipa kinmakaj ininkoneuan nochi tein tajtanij. Uan ijkuak kemaj kinmakaj teisa, amo nochipa niman kichiuaj. Uan no, konemej kemansa tajtanij se taman uan tepitsin satepan amo kinekijok. Tetatmej no kimatij komo konemej tajtantokej teisa tein uelis kinijtakos yejuan oso oksekin. Komo nochipa niman kinmakaskiaj ininkoneuan nochi tein tajtanij, tetatmej mochiuaskiaj kemej inintakeualuan. Sayoj ke tetatmej kimatij toni kinpoloua ininkoneuan uan kemanian okachi kuali uelis kinmakaskej. Iuan Jiova no ijkon panoua. Yejuatsin techtasojta, kimati toni techpoloua uan kemanian okachi kuali uelis techmakas. Yejua ika moneki tikmatiskej timochiaskej uan tikitaskej keniuj Jiova technankilia (Is. 29:16; 45:9). w15 15/4 4:6, 7

Nochi tein amo kuali tein mochiujtok amo uejkaua tamiti. Satanás kineki maj sayoj totech titanemilikan uan maj tiktemokan sayoj tejuan timoyolpaktiskej ika tein onkak nikan taltikpak. Kineki maj tikneltokakan ke uejkauaok poliui keman ejkos tamilis oso hasta ke amo keman ejkos. Sayoj ke nejon se takajkayaualis. Maj titachixtokan uan maj amo tikelkauakan ke tinemij itech itamian tonalmej (Mat. 16:22, 23; 24:42). Satanás kineki maj tikneltokakan ke Jiova amo techtasojta uan ke amo keman techtapojpoluis. Sayoj ke nejon no se takajkayaualis. Biblia kijtoua: “Yejuatsin amo keman kelkauatiu de keniu namejuan nanmotekitiltijke para Dios. Uan no Yejuatsin amo keman kelkauatiu de keniu [nankitasojtaj]” (Heb. 6:10). Kemej tikitaj, Jiova kipatiuita nochi tein tikchiuaj keman tiktekitiliaj (1 Cor. 15:58). Tein melauj, yejua Satanás akin Jiova amo kitasojta uan akin amo kitapojpoluis. Yejua ika maj amo timokauakan maj Amokuali techkajkayaua. w15 15/5 1:16-19

Abrahán kimatia ke achto Jiova kichiujka tein motenkaujka, uan senkis kineltokaya ke no ijkon kichiuaskia satepan. Kemej takuaujtamatia, nochipa kichiuak tein yejuatsin kinauatij. Kemej neskayot, kikauak ichan itech xolal Ur uan amo kemanok mokaltalij itech se xolal. Yejua kimatia ke nion se xolal moajsiskia nochipaya, porin tekiuanij akin ompa taixyekanayaj amo kitekitiliayaj Jiova (Jos. 24:2). Ika nochi iyolo kichiaya tonal keman Jiova taixyekanas semanauak taltikpak nochipaya. Biblia kijtoua ke itaixyekanalis Dios yejua “altepet tein kipia kuajkuali tatsineualonimej, tein Dios kichijchiuak” (Heb. 11:10, TNM). Abrahán, Abel, Enoc, Noé uan okseki itekitikauan Dios kineltokayaj ke onkaskia se neajokuilis. Ijkon kemej okachi tanemiliayaj itech tonalmej keman nemiskiaj nochipaya itech Xochital, okachi takuaujtamatiaj iuan Jiova (Heb. 11:15, 16). w15 15/5 3:8, 9

Keman Jesús yetoya nikan taltikpak, kichiuak miak uejueyi tachiualismej tein se kimoujkaita. Komo tikixtajtoltiaj itech Biblia kampa ika tajtoua nejon uejueyi tachiualismej, okachi mochikauas totakuaujtamatilis (Mat. 9:35; Luc. 9:11). Jesús uelik kichiuak nejon uejueyi tachiualismej porin Jiova kimakak ichikaualis. Yejua ika tatitanil Pablo kijtoj ke “Cristo yejua ne kualkui in chikaualis [...] de Dios”. Sayoj ke ¿toni techmachtiaj uejueyi tachiualismej tein kichiuak Jesús? Techmachtiaj miak taman (Hech. 2:22). Kemej neskayot, techmatiltiaj ke ijkuak Jesús tekiuajtitos 1,000 xiujmej, kichiuas uejueyi tachiualismej tein ika kinpaleuis nochin akin nemiskej nikan taltikpak. No techpaleuiaj maj okachi kuali tikixmatikan ikualneskayouan yejua uan Jiova. w15 15/6 1:1, 2

Jesús kimatia ke Jiova kipajtijka nejin siuat. Yejua ika kiluij: “Ika por nojon motakuautamatilis ten tikpia, tejua tipajtik ya”. Satepan kiluij maj yani uan maj amo motekipachouani (Mar. 5:34). Jesús kinteltasojta taltikpakneminij, okachiok akin mokokouaj. ¡Satanás semi taman! Yejua kineki maj tikneltokakan ke amo teyi tichiuanimej uan ke amo akin techtasojta. Uejueyi tachiualismej tein kichiuak Jesús kinextiaj ke yejua toka motekipachoua uan kitekipachoua kuejmolmej tein tikpiaj. Uelis tiktasojkamatiskej porin tikpiaj se tekiuaj uan se tiopixkat akin techteltasojta (Heb. 4:15). Komo amo timokokouaj, uelis techouijmakas tikajsikamatiskej tein kimachiliaj akin uejkaujya kintajyouiltijtok se kokolis. Sayoj ke uelis tikchiuaskej kemej Jesús. Maski yejua amo keman kipiak se kokolis, kinajsikamatia akin mokokouayaj uan kinikneliaya (1 Ped. 3:8). ¡Maj tikchiuakan ijkon kemej kuali neskayot tein techkauilij! w15 15/6 2:11, 12

Tiitaixpantijkauan Jiova tikpiaj tatiochiualis tikixmatiskej itokay Dios uan tipouiskej itech ixolal tein kipia nejon tokayit (Is. 43:10; Hech. 15:14). Itech padrenuestro, Jesús techmachtij maj tiktajtanikan Jiova: “Maj moueyitali motokay” (Mat. 6:9, TNM). Komo tiktajtaniaj nejon, no monekiskia tiktajtaniskej maj techpaleui maj amo tikchiuakan oso tikijtokan teisa tein uelis kichiuas maj amo kuali ika tajtokan itokay. Maj amo tikchiuakan kemej seki tokniuan itech yekinika siglo akin tamachtiayaj se taman sayoj ke kichiuayaj okse, kemej ixnesi itech tajkuilol tein axkan tikitaj. Jiova senkis kiueyitalis itokay keman kinixpolos nochin akin kiixtopeuaj kemej tekiuaj (Ezeq. 38:22, 23). Satepan, taltikpakneminij kinijkuaniliskej tajtakol. Uan nochin akin nemiskej iluikak uan taltikpak kiueyichiuaskej Jiova uan kiueyitaliskej itokay tein yektik. Ijkuak, Jiova “tayekantinemis ipan nochi ten ongak” (1 Cor. 15:28). w15 15/6 4:7, 10

Itech Escrituras Hebreas, tajtolmej kampa se mometstajtalia no mokui keman ika motajtoua templo tein moajsia itech ne uejkauj xolal Israel (1 Crón. 28:2; Sal. 132:7). Jiova kiitaya ke templo semi kualtsin katka, porin itekitikauan nikan taltikpak ompa ueliaj kiueyichiuayaj (Is. 60:13). ¿Toni techpaleuia axkan maj tikueyichiuakan Dios? Amo se kali, kemej katka templo. Axkan, Dios kiixtalij se taman tein kinpaleuia taltikpakneminij maj uelikan mochiuakan itasojikniuan uan maj uelikan kiueyichiuakan. Nejin sayoj ueli mochiua porin Jesús kitemakak inemilis kemej netetayokolil. Nejin tein kemej yeskia se templo, okachi kiueyitalia Jiova. Peuak moajsi itech xiuit 29, keman Jesús moauij uan kiselij tekit kemej tayekankatiopixkat itech nejin templo (Heb. 9:11, 12). w15 15/7 1:1-3

Ijkuak, Jesús kinmakas inintaxtauil akin amo kikaujkej Dios uan kintatsakuiltis akin kinekepilijkej (Mat. 24:46, 47, 50, 51; 25:19, 28-30). ¿Keniuj kichiuas nejon? Yejua kimelauak: “Nejuatsin ni Yektagatsin nimoualuikas ika chikaualis keme ueyi chiuke de rey, nechyeualojtiualaske nochi niángeles itakeualuan in Totajtsin Dios. Uan Nejuatsin nimotalis tech ne nomouiskaseuilojkan kampa ne notaixejekokan uan kampa ne no takualtsinkan. Uan ijkon in ángeles kinsentiliske nochi in pueblojuani de nochi pueblojme den taltikpak noixpantsinko Nejuatsin. Uan Nejuatsin ni Cristo nikinsejsekotalis se uan okse, ijkon keme ne tapixke kinsejsekotalia in ichkame uan in chivos. Uan Nejuatsin ni Cristo nikinyektalis noyekmakopaka in ichkame; uan in chivos nikintalis noopochkopaka” (Mat. 25:31-33). Nikan kijtoua ke Jesús kiitas toni kinamiki kiselis sejse taltikpaknenkej. Komo kiita ke aksa kikauak Dios, kiixtalis ke yejua poui iniuan “chivos” oso cabras uan kiixtalis ke kinamiki senkis ixpoliuis. Sayoj ke, komo kiita ke aksa amo kikauak Dios, kiixtalis ke yejua poui iniuan “ichkame” uan kikauas maj nemi nochipaya (Mat. 25:46, TNM). w15 15/7 2:11, 12

Tinochin techyolpaktia tataman takual, tajtol, tein momattokej kichiuaskej uan tein onkak kampa timoskaltijkej. Sayoj ke moneki amo tiknemiliskej ke tein tikuelitaj tejuan okachi kuali ke tein kiuelitaj oksekin. ¿Keyej? Porin Jiova kichiuak miak taman tein ika tiyolpakiskej tinochin (Sal. 104:24; Apoc. 4:11). Yejua ika amo teyi ika tapaleuia maj tiknemilikan ke ijkon kemej tikchiuaj teisa okachi kuali ke tein kichiuaj oksekin. Jiova kineki maj nochi tataman taltikpakneminij kiixmatikan, kiueyichiuakan uan maj nemikan nochipaya (Juan 3:16; 1 Tim. 2:3, 4). Yejua ika moneki tikakiskej tein kinemiliaj tokniuan komo amo kitapanauilia tein kijtoua Jiova, maski amo tanemiliskej kemej tejuan. Komo ijkon tikchiuaj, okachi tiyolpakiskej uan kuali timouikaskej iniuan tokniuan. Kemej tikitakejya, sayoj tikpaleuiaj Jiova uan iTekiuajyo. Yejua ika, amo timokalakiaj itech kuejmolmej tein onkak nikan taltikpak, amo timoueyichiuaj nion timotatanij iniuan oksekin. Semi tiktasojkamatij maj Jiova techmachti maj tiktemokan maj onka yolseuilis uan maj tiyolyemankej. w15 15/7 3:17, 18

¿Keniuj uelis tiknextiliskej Jiova ke tiktasojtaj? Se taman, keman tikteixmatiltiaj ika yolpakilis tein kichiuati iTekiuajyo (Mat. 24:14; 28:19, 20). Okse taman, keman amo tikauaj ijkuak tikpanouaj ouijkayomej kampa moneki tiknextiskej ox tiksentokaskej titakuaujtamatiskej iuan (Sal. 84:11; Sant. 1:2-5). Maski tikpiaskej uejueyi ouijkayomej, Jiova kimati tein tikpanotokej uan techpaleuis porin techteltasojta (Sal. 56:8). Moajsi seki taman kemej uelis tiknextiliskej Jiova ke tiktasojtaj. Yekinika, ijkuak titanemiliaj itech nochi itachijchiualis tein kualtsin. Ojpatika, keman kuali timomachtiaj Biblia. Expatika, keman nochipa tikchiuaj netataujtil porin tiktemouaj okachi kuali timouikaskej iuan Jiova. Uan naujpatika, keman titanemiliaj itech imikilis Jesús tein kitelpia ipatiuj (1 Juan 2:1, 2). Komo tikchiuaj nejin, senkis tikneltokaskej ke Jiova techtasojta uan okachi tiktasojtaskej. w15 15/8 1:6, 17, 18

Itech Xochital xa kemansa monekis maj amo tiyolijsiuikan. Kemej neskayot, xa tikinitaskej keniuj yolpakij oksekin keman moajokuij ininchankauan uan inintasojikniuan. Sayoj ke tejuan xa monekis timochiaskej maj moajokuikan tochankauan uan totasojikniuan. Komo techpanoua nejon, ¿tiyolpakiskej iniuan oksekin uan amo tiyolijsiuiskej? (Rom. 12:15.) Komo axkan tikchiaj ika nejmachkayot maj Jiova kichiua tein motenkauak, no ijkon tikchiuaskej satepan. No uelis tikchiuaskej tein moneki tein techpaleuis keman tinemiskej itech Xochital komo amo tiyolijsiuij keman mopata kemej momelauaya se tamachtilis ika Biblia. ¿Timomachtiaj ika nejmachkayot nejon tein momelaua uan amo tiyolijsiuij keman amo senkis tikajsikamatij? Komo axkan amo tiyolijsiuij, itech Xochital okachi amo ouij techkisas amo tiyolijsiuiskej keman Jiova techmakas yankuik tanauatilmej (Prov. 4:18; Juan 16:12). w15 15/8 3:9, 10

Tatitanil Pablo kiniluij tokniuan akin nemiaj Éfeso ke yejuan ueliskiaj yekyolmajsitoskej kemej Cristo. Komo kinekiaj ijkon mochiuaskej, monekia kuali mouikaskej uan kisentokaskej kiixmatiskej Jesús. Keman Pablo kintajkuilouilij tokniuan akin pouiaj itech nechikol tein moajsia Éfeso, onkayaj miakej tokniuan akin yekyolmajsitoyaj uan miak xiujmejya kitekitilijtoyaj Jiova. Sayoj ke no moajsiaj tokniuan akin monekia kichikauaskejok ininkuali uikalis iuan Dios. Nejon no panoua itech miak nechikolmej axkan. Miakej tokniuan miak xiujmejya kitekitilijtokej Jiova. Sayoj ke oksekin ayamo kipiaj chikauak inintakuaujtamatilis, kemej tokniuan akin yekin moauiaj. Nochin yejuan moneki mochikauaskej yeskij yekyolmajsitokej. ¿Uan tejuatsin? ¿Tikonnextijtok ke tionyekyolmajsitokya? (Col. 2:6, 7.) w15 15/9 1:2, 3

Miakej uelis kinemiliskej ke keman se mauiltia tepaleuia maj kuali se momachili uan maj kuali se moajsi. Sayoj ke ¿komo tikuelitaj timauiltiskej iniuan miakej? Proverbios 13:20 kijtoua: “Akin nentinemi iniuan akin tamatinij mochiuas tamatkej, sayoj ke akin mouika iniuan akin amo tamatij kipias ouijkayot”. Kemej tikitaj, komo tiknekij kuali tikixpejpenaskej keniuj uan akoni iuan timoixpetaniskej, moneki tikmachtiskej totanemilil ika Biblia. ¿Toni tikonita ke okachi moneki? ¿Tionyas nechikolmej, tiontetapouis kuali tanauatilmej uan tionmomachtis Biblia, oso tionmoixpetanis? Jesús kijtoj ke moneki tiksentokaskej tiktemoskej yekinika iTekiuajyo Dios. Uan no kijtoj: “No xiktemokan ne yekchipaukanemilis ten Dios kuelita. Uan ijkon Yejuatsin namechyolmajxitis uan nankiseliske nochi ten monekis” (Mat. 6:33). Keman tikixpejpenaskej keniuj tikuiskej totiempo, totanemilil monekiskia techelnamiktis nejin tayolmajxitilis tein kijtoj Jesús. w15 15/9 2:13, 15

Keman Jiova kiitak ke Caín yaya kichiuati se taman tein tel amo kuali, kitemoj kipaleuis. Sayoj ke Caín amo kitakamatik uan yejua ika semi tajyouij (Gén. 4:11-13). Okse tonal, Jiova kiitak ke se itekitikauj akin motokaytiaya Baruc sioujtoya uan semi yolkuetaujtoya porin kinemilijtoya tein amo kipaleuiaya. Yejua ika Jiova kiluij ke monekia kipatas itanemilil. Baruc kitakamatik, uan nejon kipaleuij maj makisa (Jer. 45:2-5). Jiova techyekana uan techmelaua porin techtasojta. Yejuatsin techmelaua keman moneki, uan no techpaleuia maj tikpiakan okachi kualneskayomej (Heb. 12:6). Jiova kinpaleuij itekitikauan akin nenkej ne uejkauj maj kinextianij okachi kualneskayomej. w15 15/9 4:12, 13

Gabaonitas kineltokakej ke Jiova kipaleuijtoya xolal Israel maj tatani itech neteuilismej. Se siuat akin no kineltokak ke Jiova kipaleuijtoya ixolal motokaytij Rahab. Yejua kitekakilijka ke Jiova kikixtij xolal Israel ompa Egipto. Keman ome tapijpianij israelitas ajsikej ichan, yejua kiniluij ke takuaujtamatia ke Jiova kinpaleuiskia maj moaxkatilikan talmej kampa yejua nemia. Uan maski kimatia ke komo takuaujtamatia iuan Jiova ueliskia kipolos inemilis yejua uan ichankauan, takuaujtamatia ke Dios kinmakixtiskia (Jos. 2:9-13; 4:23, 24). Nejin uan okseki neskayomej techpaleuiaj maj tikajsikamatikan toni kijtosneki se kiitas “imay” Dios. Komo kuali tikixmatij Jiova uan ikualneskayouan, ueli tikitaj “imay” oso keniuj techpaleuia. Nejin techolinia maj tiknekikan tikchiuaskej kemej itekitikauan Dios akin nenkej ne uejkauj akin kineltokakej ke yejuatsin kinpaleuia itekitikauan. w15 15/10 1:6, 7, 9

Maski Biblia kijtoua ke Jesús kiteltasojtaya Marta, no kintasojtaya uan kinpoujkaitaya okseki siuamej. Kemej neskayot, kitasojtaya María, okse iikniuj Lázaro. Uan no semi kitasojtaya imomaj, María (Juan 19:25-27). Sayoj ke ¿keyej Jesús kitasojtaya Marta? Porin Marta katka kualtakat uan tel tekitikej, uan okachiok porin semi takuaujtamatia iuan Jiova. Marta kiyekmatia ke Jesús katka Mesías akin moijtojka ualaskia uan kineltokaya nochi tein yejua tamachtiaya (Juan 11:21-27). Maski ijkon, tajtakolej katka uan kemansa mopolouaya. Kemej neskayot, keman Jesús takalpanojtoya ichan Marta uan María, Marta kikualauij iikniuj uan kiluij Jesús: “Totekotsin, ¿xe amo tikyolmachilia ke nokniu María nechkauak [noselti] ika nochi nijin tekit? Xikili nokniu María ma nechpaleuiki” (Luc. 10:38-42). w15 15/10 3:1, 2

Keman titanemiliaj itech Jiova uan Jesús no techpaleuia maj tiksentokakan tiktekitilijtokan Jiova ika yolpakilis. Uan nejon yolpakilis kichiuas maj no yolpakikan tokniuan uan taltikpakneminij akin tikinnojnotsaj. Uan no, keman titanemiliaj itech tein Jiova kichiuak keman kiualtitanik iKonetsin maj toka momikiliki, okachi tikajsikamatij ke semi kipia ipatiuj kuali timouikaskej iuan (Rom. 3:24). Se tokniuj akin kayot Sudáfrica uan motokaytia Mark tsaktoya eyi xiuit porin amo kikauak Jiova. Yejua kijtoua ke keman se tanemilia, tamati kemej keman se moixpetaniti kansaika kampa amo se ixmati, sayoj ke semi teyolpaktia tein se kiitstiuj. Keman okachi tanemilia, okachi kiajsikamati miak taman kemej Jiova tamati. Uan no, keman yolkuetaui oso motekipachoua, kiixtajtoltia Biblia uan satepan tanemilia itech tein kiixtajtoltij. Nejon kipaleuia maj moyolseui. w15 15/10 4:15

Nochipa keman tejuatsin tikonixpejpenas teisa tein mokoneuan amo kiajsikamatiskej, xikontemo kemanian uelis tikonmelauilis keyej tikonixpejpenak nejon. Ijkon xa okachi kinekiskej tatakamatiskej. Se tokniuj takat akin kipia naui ikoneuan kijtoua ke ijkuak konemej moskaltijtokej okachi takuaujtamatij iniuan inintatuan keman yejuan kinmelauiliaj keyej kiixtaliaj seki taman. Nejin kinpaleuia maj kiajsikamatikan ke inintatuan kitemouaj tein okachi tapaleuis keman kiixpejpenaj seki taman. Xikonelnamiki ke mokoneuan amo nojnelmejok. Yejuan momachtijtokej kuali taixejekoskej uan ininselti taixpejpenaskej (Rom. 12:1). Nejin tepopaj no kimelaua ke telpochmej moneki kimatiskej ke moneki amo taixpejpenaskej sayoj ika tein kimachiliaj. Yejua ika, xikonnexti yolyemanilis uan xikonmelauili motelpoch keyej tikonixpejpenak seki taman. Nejon tapaleuis maj no ijkon kichiuakan. Uan no kiitaskej ke tejuatsin tikonpoujkaita uan ke tikonita kemej akin uejueykejya. w15 15/11 2:11

Itech nochi taltikpak moajsij tel miakej taltikpakneminij akin kitekitiliaj Jiova. ¿Keniuj moneki tikinitaskej? (Rom. 12:10.) Tatitanil Pedro kijkuiloj ke komo tiktakamatij Dios, tikintasojtaskej tokniuan ika nochi toyolo. Uan no kijtoj ke motelneki maj akin tikchiuaj kemej Cristo timonextilikan ueyi netasojtalis (1 Ped. 1:22; 4:8). Amo moajsi okse xolal kemej kampa tipouij tiitekitikauan Jiova. ¿Keyej? Porin tikintasojtaj tokniuan ika nochi toyolo. Uan no, tiktasojtaj Jiova uan tiktakamatij itanauatiluan. Uan yejua ika, yejuatsin techmaka iyektikatsin espíritu. Nejin espíritu yejua okachi ueyi chikaualis tein onkak uan techpaleuia maj kuali timouikakan iniuan tokniuan noyampa taltikpak (1 Juan 4:20, 21). w15 15/11 4:8, 9

Jiova amo techchikaujkauia maj timomachtikan se taman tajtol uan ijkon uelis tikixmatiskej oso tikmatiskej tein motenkauani (Apoc. 7:9, 10). Tejuan titajtouaj miak tataman tajtolmej. Sayoj ke nejin amo kitsakuilia Jiova maj technojnotsa. ¿Keyej? Porin yejuatsin kiyekitani maj itajtoluan mokepa itech miak tajtolmej. Kemej neskayot, itech Biblia sayoj moajsij seki tajtolmej tein Jesús kijtoj itech tajtol tein yejua kikuik (Mat. 27:46; Mar. 5:41; 7:34; 14:36). Sayoj ke Jiova kichiuak maj itajtoluan Jesús moijkuilouanij uan satepan maj mokepanij itech tajtol griego uan okseki tajtolmej. Uan no, itajtoluan Dios moixmatij hasta axkan porin yejuatsin kichiuak maj judíos uan akin kichiuaj kemej Cristo miakpa kimaijkuilouanij. Uan nejon tein kijkuilojkej mokepak itech okseki miak tajtolmej. Kemej 400 xiujmej satepan ke nemik Jesús, se tajkuilojkej akin tel taneltokaya kijtoj ke itamachtilisuan Jesús mokepkajya itech miak tajtolmej tein mokuij itech miak uejueyi altepemej, kemej Siria, Egipto, India, Persia uan Etiopía. w15 15/12 1:10, 11

Komo titajtouaj keman amo moneki, uelis yeski ke taltikpakneminij amo kiajsikamatiskej tein tikiniluiaj oso amo kikakiskej. Kemej neskayot, itech metsti marzo xiuit 2011, chikauak talolinik uan ueyiat moajkotamotak itech seki xolalmej tein pouij Japón uan semi tauejueloj. Momikilijkej panoua 15,000 taltikpakneminij. Ininchankauan uan inintasojikniuan miakej tokniuan no momikilijkej. Sayoj ke yejuan kinekiaj kinpaleuiskej akin ompakauin nemiaj ika tein kijtoua Biblia. Maski ijkon, kiixtalijkej ke ijkuak amo ika kinnojnotsaskej neajokuilis. ¿Keyej? Porin ompa miakej taltikpakneminij pouij itech taneltokalis budismo uan amo semi kiixmatij Biblia. Yejua ika tokniuan kitayekanaltijkej kinyolseuiskej uan kinmelauiliskej keyej mochiua tein amo kuali. w15 15/12 3:7

Seki taltikpakneminij oso tanamakanij xa techiluiskej ke kipiaj se taman pajti tein techpajtis. Sayoj ke xa kichiuaj sayoj porin kinekij kitaniskej miak tomin. Moneki amo tikseliskej tein yeski taman sayoj porin tiknekij okachi kuali timomachiliskej uan tinemiskej okachi tonalmej. Komo tiknextiaj tamatilis, timoyekpiaskej ika tein techiluiskej maj tikchiuakan, okachiok komo akin techiluia amo kiselij tamachtilis tein monekia. Moneki timotajtaniskej: “¿Nikyekmati ke kinpaleuiani oksekin nejon pajti oso xiujpaj, oso kikuaskej oso amo seki taman takual? Uan komo kinpaleuiani, ¿keniuj nikmati ke no nechpaleuis? ¿Moneki niktemos okachi nikmatis uan niktajtanis aksa akin momachtij nejon?” (Deut. 17:6). w15 15/12 4:14, 15

Pablo kimatia ke komo tiktasojkamatij inetasojtalis Jesús, tiknekiskej tiktasojtaskej uan tinemiskej kemej yejua monejnemiltij. Keman kuali tikajsikamatij tein Jiova toka kichiuak, timochikauaj tinemiskej kemej Jesús kineki maj tinemikan. ¿Keniuj tikchiuaj nejin? Moneki tiktojtokaskej ineskayo Cristo “ika miak nejmachkayot” (1 Ped. 2:21, TNM; 1 Juan 2:6). Keman tiktakamatij Dios uan Cristo, tiknextiaj ke tikintasojtaj. Jesús kijtoj: “Nochi nekes ten kixmatoske uan kitakamatijtinemij notanauatiluan, yejuan nojonkes melau nechyektasojtaj. Uan ijkon Notajtsin Dios no kintasojta nochi nekes ten nechtasojtaj. Uan nikintasojtatiyas nekes ten nechtasojtaske” (Juan 14:21; 1 Juan 5:3). Yejua ika maj timotajtanikan: “¿Itech toni nikchiujtokya kemej Jesús? ¿Onkak teisa tein uelis okachi nikyekchiuas?”. Motelneki maj timotajtanikan nejin, porin nochi tein onkak nikan taltikpak techtanejnektia maj tikchiuakan tein nochin kichiuaj (Rom. 12:2). w16.01 2:7-9

¿Tikonmachilia ke okachi tikonuelita tiontanojnotsas ke okseki tokniuan? ¿Mitsonyolpaktia tionmomachtis Biblia uan tikonmatis hasta “tamachilisme den kachi ouijke” tein kinextiaj keniuj tamati Dios? (1 Cor. 2:10.) ¿Tikonmachilia ke Jiova mitsonpaleuiani maj tel kuali mitsonnankilikan itech tanojnotsalis? ¿Tikonneki tikonchiuas tein Dios kineki ika nochi moyolo? ¿Tikonteltasojta tokniuan uan tikonmachilia ke moneki tikonpaleuis maj kitekitilikan Jiova? ¿Tikonitani ke Dios mitsonpaleuiani itech miak taman tein tikonpanouani itech monemilis? Komo tiontanankilij ke kemaj, ¿kinextia nejon ke tejuatsin tiontaixpejpenal? Amo, porin nochin itekitikauan Dios uelis ijkon momachiliskej maski amo taixpejpenalmej. Ika iyektikatsin espíritu, Jiova ueli kinmaka chikaualis nochin itekitikauan, yeski yaskej iluikak oso nemiskej nikan taltikpak. Tein melauj, komo tejuatsin tionmotajtanijtok ox tiontaixpejpenal, nejon kijtosneki ke amo. w16.01 3:14, 15

Jesús semi kiyolpaktij tekitis iuan iPopaj porin kichiuak miak taman uan porin kimatia ke kitasojtaya. ¿No uelis ijkon timomachiliskej tejuan? Jesús kijtoj ke semi tiyolpakij keman titemakaj teisa uan no keman tikseliaj teisa (Hech. 20:35). Keman techmachtijkej tein Biblia tamachtia, semi tiyolpakkej. Sayoj ke keman no tikinmachtiaj oksekin, no semi tiyolpakij. ¿Keyej? Porin tikitaj ke yejuan semi yolpakij keman kiajsikamatij tein Biblia tamachtia uan peuaj kiixmatij Dios. Techyolpaktia tikitaskej keniuj kipataj miak taman tein achto kichiuayaj uan kemej tamatiaj. Tikmatij ke keman mochiuaj itasojikniuan Dios ueli kichiaj nemiskej nochipaya (2 Cor. 5:20). Tein melauj, tanojnotsalis yejua tekit tein okachi moneki mochiuas uan tein okachi uelis techyolpaktis. w16.01 5:6, 7