Diciembre

Biblia kijtoua ke Abrahán katka itasojikniuj Jiova (2 Crón. 20:7, nota; Is. 41:8; Sant. 2:23, TNM). Itech Biblia amo akinok ijkon kitokaytiaj. ¿Kijtosneki nejon ke amo akinok uelis yeski itasojikniuj Dios? Amo. Tinochin uelis tikpiaskej nejon tatiochiualis. ¿Keniuj tikmatij? Itech Biblia ininka motajtoua miakej takamej uan siuamej akin amo keman kikaujkej Jiova uan mochikaujkej kitakamatiskej, iuan takuaujtamatkej uan mochiujkej itasojikniuan. Yejuan “uel miakke taneltokani” akin tatitanil Pablo ininka tajtoj (Heb. 12:1). Yejuan kipiakej tatiochiualis yeskij itasojikniuan Dios. Maj nochipa tiknextikan takuaujtamatilis kemej yejuan (Heb. 6:11, 12). Komo ijkon tikchiuaj, tejuan no tikpiaskej tatiochiualis tiyeskij tiitasojikniuan Jiova nochipaya. w16.02 2:1, 2, 19

Ximonemili ke se motasojikniuj mitstayokolia se carro. Mitsmaka amamej uan mitsiluia ke yejua mokauilis llaves uan ke sayoj yejua uelis kinejnemiltis. ¿Tikijtoskia ke yekmelauj mitstayokolij nejon tepos? Keman aksa motemaktia, kiluia Dios: “Nonemilis moaxka”. Uan Jiova kinamiki kichias maj nejon taltikpaknenkej kichiua tein motenkauak. Sayoj ke xiknemili ke peua moixmati ichtaka iuan aksa akin amo itaixpantijkauj Jiova. Oso kiselia se tekit tein kichiua maj amo semi youi tanojnotsati oso monechiko. Nejon taltikpaknenkej amo kichiujtoskia tein motenkauak iuan Dios. Yeskia kemej akin mokauilia llaves tein ika se kinejnemiltia carro. Yejua ika, komo tikiluia Jiova ke monemilis iaxka, nochipa monekis tikchiuas tein yejuatsin kineki, maski kemansa amo yeski tein tejua tikneki. Nochipa moneki tikchiuaskej kemej Jesús, akin kijtoj tajtolmej tein ixnesij itech tajkuilol tein axkan tikitaj. w16.03 1:16, 17

Kemej 3,000 xiujmej achto, tanauatijkej Elías kiyoleuak telpoch Eliseo maj mochiua itapaleuijkauj. Eliseo niman kiselij itayoleualis. Yejua katka takuaujtamach uan kipaleuij tanauatijkej ika tekimej tein amo uejueyi (2 Rey. 3:11). Elías chikuasen xiuit kinextilij Eliseo keniuj kichiuaskia tekit. Keman Elías matamiskiaya tekit tein kipiaya ompa Israel, kiluij Eliseo ke amo monekiaok maj kisentokani kipaleuiani. Sayoj ke Eliseo kiixtalijka amo kikauas Elías. Komo titelpoch, ¿keniuj uelis tikchiuas kemej Eliseo? Xikchiua ika yolpakilis tein yeski tekit tein mitsmakaskej, maski amo uejueyi. Xikelnamiki ke tayekankej akin mitsnextilijtok keniuj tikchiuas tekit, motasojikniuj. Xikilui ke semi tiktasojkamati tein moka kichiua uan ke tikneki tiksentokas tiuelis tein mitsnextilia. Uan tein okachi moneki, xitakuaujtamach uan xikchiua tekimej tein mitsmakaskej. ¿Keyej? Porin ijkon tayekananij kiyekmatiskej ke Jiova kineki xikseli okachi tekimej itech nechikol (Sal. 101:6; 2 Tim. 2:2). w15 15/4 2:13, 14

Saúl kinekia maj Jonatán kiixpatani kemej tekiuaj, amo David (1 Sam. 20:31). Jonatán ueliskia kitayekanaltis itanejnekilis uan kitemos mochiuas tekiuaj. Sayoj ke kemej kitasojtaya Jiova uan kitakamatia tein yejua kiixtaliaya, kichiuak tein motenkaujka iuan itasojikniuj David. Tejuan no moneki tikchiuaskej tein timotenkauaj. Kemej neskayot, komo timotenkauaj tikchiuaskej se tekit, ijkon tikchiuaskej maski techouijmakas. Uan komo tikpiaj kuejmolmej iuan tonamik, amo tikajkayauaskej iuan okse, uan ijkon tiknextiskej ke tiktasojtaj Jiova (Mal. 2:13-16). Tiknekij nochipa tiktakamatiskej Dios maski tikpanotoskej ouijkayomej. Yejua ika, maj tiksentokakan tikintasojtakan tokniuan maski kemansa amo kichiuaskej tein tikchiayaj. Ijkon tikyolpaktiskej Jiova, uan nejon kichiuas maj okachi tiyolpakikan (Prov. 27:11). Uelis tikyekmatiskej ke yejuatsin nochipa techyekpias. w16.02 3:16, 17

Jiova kimati tein tisejsemej uelis tikxikoskej (Sal. 103:14). Yejuatsin nochipa techmaka chikaualis tein techpoloua. Kemansa xa tikmachiliaj ke amo titaxikouajok. Sayoj ke Jiova motenkaua ke komo tikmachiliaj ke amo uelis tikxikoskej se ueyi kuejmol, yejuatsin techpaleuis maj titaxikokan (1 Cor. 10:13, TNM). Titakuaujtamatij ke yejuatsin kimati toni yekmelauj uelis tikxikoskej, uan nejon semi techyolseuia. Komo Jiova amo niman mitsonnankilia keman tikontataujtia, amo xionyolijsiui. Xikonelnamiki ke yejuatsin kineki techpaleuis, sayoj ke kichia kichiuas keman okachi monekis. Biblia kijtoua ke Jiova kichia ika nejmachkayot kemanian uelis techpaleuis uan technextilis teiknelilis, porin yejuatsin yolmelauak. w15 15/4 4:8, 9

Itech taueyichiualis kemej kalyetouanij, tetatmej uan ininkoneuan mosenmachtiaj uan kiixmatij Jiova, ijkon okachi motasojtaj. Ijkuak, uelis momachtiskej tein kijtoskej itech tanojnotsalis. Nejin kinpaleuis maj okachi kuali tanojnotsakan. Keman sejsemej ika tajtouaj Jiova uan kiitaj ke nochin kalyetouanij kitasojtaj uan kinekij kiyolpaktiskej, nochin okachi kuali mouikaj. ¿Keniuj namikuanij uelis kisentokaskej kuali mouikaskej? Komo nochin omen kitasojtaj uan kisentekitiliaj Jiova, okachi kuali mouikaskej uan yolpakiskej. Motelneki maj monextilikan netasojtalis, ijkon kemej Abrahán uan Sara, Isaac uan Rebeca, uan Elqaná uan Ana (Gén. 26:8; 1 Sam. 1:5, 8). Ijkon amo xexeliujtoskej uan kuali mouikaskej iuan Dios (Ecl. 4:12). w16.03 3:12, 13

Satanás kinixnamiki tokniuan taixpejpenalmej akin mokauajok nikan taltikpak uan ‘okseki ichkamej’ (Juan 10:16). Kemej kimati ke amo miak tonalmej kipiaok, kitemoua kichiuas maj tel miakej itekitikauan Jiova amo takuaujtamatikanok iuan yejuatsin (Apoc. 12:9, 12). Yejua ika motelneki maj tiksentokakan tikixnamikikan. Sayoj ke ¿yekmelauj uelis tiktaniskej? Kemaj, porin Biblia kijtoua: “Xikixtopeuakan in amokuali Satanás uan ijkon yejua namechtapatauilis [oso namechtalkauis]” (Sant. 4:7). Miakej amo kineltokaj ke Satanás nemi. Yejuan kinemiliaj ke Satanás uan amokuali ejekamej sayoj ixnesij itech amatajkuilolmej, itech películas kampa temojmoujtiaj uan videojuegos. Uan kijtouaj ke sayoj akin amo yektanemiliaj kineltokaj ke nemij amokuali ejekamej. Tein melauj, Satanás kipaleuia maj taltikpakneminij amo kineltokakan ke yejua uan amokuali ejekamej nemij. ¿Keyej? Porin ijkon okachi ueli kinkajkayaua (2 Cor. 4:4). w15 15/5 2:1, 2

Itatuan Moisés kipaleuijkej maj kiixmati Jiova. Kinextilijkej ke yejuatsin motenkaujka ke kinmakixtiskia takeualmej hebreos uan kinmakaskia kani nemiskiaj (Gén. 13:14, 15; Éx. 2:5-10). Tikyekmatij ke Moisés nochipa kinemilij ke Jiova motenkaujka kinmakixtis takeualmej hebreos. Ijkon kemej okseki itekitikauan Dios, Moisés no kimatia ke Jiova motenkaua kinmakixtis taltikpakneminij itech mikilis (Job 14:14, 15; Heb. 11:17-19). Kemej Moisés nochipa tanemiliaya itech tein Dios motenkaua, kiajsikamatik ke yejuatsin semi kintasojta taltikpakneminij. Nejon kichiuak maj okachi kitasojtani uan maj okachi takuaujtamatini iuan. Uan no kipaleuij maj amo keman kikauani (Deut. 6:4, 5). Amo no mouik keman tekiuaj akin taixyekanaya Egipto kinekik kimiktis, porin kimatia ke Jiova kimakaskia itaxtauil satepan (Éx. 10:28, 29). w15 15/5 3:11-13

Jesús kichiuak iyekinika ueyi tachiualis itech se nenamiktilis tein mochiuak itech xolal Caná. Amo se kimati keyej, sayoj ke vino amo kinajsiskia nochin akin kinyoleujkaj itech iluit. Nejin kinpinaujkataliaya namikuanij, porin yejuan monekia kintakachiuaskej nochin akin kinyoleujkaj. Yejua ika, María kitajtanij Jesús maj kinpaleuiani namikuanij. ¿Keyej? Yejua kuali kiixmatia tein achtook moijtojka ke kichiuaskia Jesús uan kimatia ke kitokaytiskiaj “ikoneu de Totajtsin Dios in kachi ueyi chiuke” (Luc. 1:30-32; 2:52). Yejua ika María xa kinemiliaya ke Jesús ueliskia kinpaleuis. Tein kemaj tikyekmatij yejua ke María uan Jesús kinekiaj kinpaleuiskej nejon namikuanij. Yejua ika, Jesús kichiuak maj tel miak litro at mokepani itech tel kuali vino (Juan 2:6-11). Jesús amo kipiaya keyej kichiuas nejon ueyi tachiualis, sayoj ke kichiuak porin ininka motekipachouaya taltikpakneminij. Yejua kichiujtoya ijkon kemej Jiova, akin kiuelita kitemakas teisa. w15 15/6 1:3

Achto ke Jesús mokepaskia iluikak, imomachtijkauan kitajtanijkej nejin. Sayoj ke Jesús kiniluij ke ayamo ueliskiaj kimatiskej, uan kiniluij ke monekia kitayekanaltiskej tanojnotsalis (Hech. 1:7, 8). Uan no, kinmachtij maj tajtanikan maj uiki iTekiuajyo Dios uan kiniluij maj kichixtonij nejon tonal keman peuaskia taixyekanas. Yejua ika tejuan tiksentokaj tiktajtaniaj Jiova maj uiki iTekiuajyo. Itech xiuit 1876, Jiova kinpaleuij itekitikauan maj kiajsikamatikan ke Jesús peuaskia taixyekanas ompa iluikak itech xiuit 1914. Itech nejon xiuit, tokniuj Russell kijkuiloj tamachtilis “¿Kemanian tamij inintonaluan analtekojkayomej?”. Ompa kimelauaya ke “chikome xiuit” tein Daniel achtook ika tajtoj mouika ika tein Jesús kijtoj keman ika tajtoj “tonalme ke Dios kintekauilij ne analtekokayome” (Dan. 4:16; Luc. 21:24). Tamachtilis kimelauaya ke nejon tonalmej tamiskiaj itech xiuit 1914. w15 15/6 4:11, 12

Jesús semi kiyolkokouaya kiitas ke oksekin tajyouiayaj. Kemej neskayot, keman itasojikniuj Lázaro momikilij, semi tayokoyak keman kiitak ke ichankauan uan itasojikniuan moyolkokojtoyaj (Juan 11:33-36). Yejua kimatia ke yaya kiajokuiti Lázaro, sayoj ke maski ijkon, peuak choka. Amo mopinaujmatia kinextis senteixtenoj tein kimachiliaya. Kemej kiteltasojtaya Lázaro uan ichankauan, kitekitiltij ichikaualis Dios uan kiajokuik itasojikniuj (Juan 11:43, 44). Biblia kijtoua ke Jesús tamati kemej iTajtsin (Heb. 1:3). Yejua ika, uejueyi tachiualismej tein kichiuak Jesús kinextiaj ke Dios no kineki kiixpolos nochi tein kichiua maj titajyouikan, kemej kokolismej, tekokojkayot uan mikilis. Amo uejkaua, Jiova uan Jesús oksepa kinmakaskej ininnemilis tel miakej akin momikilijkej. Jesús kijtoj ke nochin mikemej “ual kisaske kampa ne animajtekochme” (Juan 5:28, 29). w15 15/6 2:13, 14

Miakej kinemiliaj ke keman momikiliskej yaskej iluikak uan ijkuak kiueyichiuaskej Dios. Sayoj ke tejuan tikmatij ke nejon amo melauak, ta tikmatij ke nikan uan axkanya moneki tikueyichiuaskej. Keman tikueyichiuaj Jiova, tikchiuaj kemej itekitikauan akin nenkej ne uejkauj uan amo keman kikaujkej (Sal. 99:2, 3, 5). Miakej itekitikauan Jiova, kemej Moisés, Aarón uan Samuel, ika nochi ininyolo kiueyichiujkej ijkon kemej Dios kiixtalij (Sal. 99:6, 7). Itech nejin tonalmej moajsij ome oloch taltikpakneminij akin kisenueyichiuaj Jiova. Yekinika oloch, yejuan tokniuan taixpejpenalmej, akin achto ke yaskej iluikak kampa tekitiskej kemej tiopixkamej iuan Jesús tapaleuiaj itech templo tein Dios kiixtalij tein moajsi nikan taltikpak. Uan ojpatika oloch, yejuan tel miakej ‘okseki ichkamej’ akin ika nochi ininyolo kinpaleuiaj tokniuan taixpejpenalmej (Juan 10:16). Sayoj ke tisejsemej moneki timotajtaniskej: “¿Nikueyichiua Dios kemej yejuatsin kiixtalij?”. w15 15/7 1:4, 5

Jiova achtook kitematiltiani toni mochiuas satepan. Uan itekitikauan nochipa kichianij ika nejmachkayot maj mochiua. Isaías, akin kijtojka ke Jiova kinpaleuiskia judíos maj kisanij Babilonia uan maj mokepanij Judá, kijtoj: “Yolpakij nochin akin kisentokaj itech mochiaj” (Is. 30:18). Miqueas no senkis kineltokaya ke mochiuaskia tein achtook moijtojka. Yejua ika kijtoj: “Niksentokas nitachixtos itech Jiova” (Miq. 7:7). Uan itekitikauan Dios tel miak xiujmej kichixtoyaj maj ejkoni Mesías akin moijtojka ualaskia (Luc. 3:15; 1 Ped. 1:10-12). No ijkon, tejuan tikchixtokej maj mochiua tein moijtojka ika iTekiuajyo Dios. Jesús yejua tekiuaj itech nejon Tekiuajyot uan amo uejkaua techmakixtis itech nejin taltikpak kampa mochiujtok tein tel amo kuali. Keman ejkos tamilis, kinixpolos akin amo yolkualmej uan kijkuanis nochi tein techtajyouiltia (1 Juan 5:19). Tamilis ijsiujka motokijtok, yejua ika moneki tikchiujtoskej tein moneki. w15 15/8 2:1, 2

Jiova kinnauatij israelitas maj kichijchiuanij se takenkal kampa kiueyichiuaskiaj (Éx. 25:8). Uan okachi satepan kinnauatij maj kichijchiuanij se templo (1 Rey. 8:27, 29). Keman israelitas kiskej Babilonia, peujkej monechikouaj itech sinagogas (Mar. 6:2; Juan 18:20; Hech. 15:21). Uan yekinika itatojtokakauan Cristo monechikouayaj ininchan tokniuan (Hech. 12:12; 1 Cor. 16:19). Itech nejin tonalmej, tiitaixpantijkauan Jiova tikueyichiuaj Dios itech tel miak Kalmej kampa tiMosentiliaj tein moajsij noyampa taltikpak. Jesús semi kipoujkaitaya templo tein moajsia Jerusalén. Keman imomachtijkauan kiitakej ke Jesús semi kitasojtaya templo, kielnamikkej tein kijtouaya tajtolmej tein ixnesij itech tajkuilol tein axkan tikitaj (Sal. 69:9). Tein melauj, se Kali kampa tiMosentiliaj amo “ichan Jiova”, kemej katka templo (2 Crón. 5:13; 33:4). Sayoj ke moneki tikpoujkaitaskej porin ompa tikueyichiuaj Jiova. w15 15/7 4:1, 2

¿Tikintapojpoluiskej oksekin uan tikinnextiliskej netasojtalis keman mopoloskej ijkuak Cristo taixyekantos 1,000 xiujmej? Komo axkan titetapojpoluiaj, amo ouij techkisas kuali timouikaskej iniuan oksekin itech Xochital (Efes. 4:2, 32). Itech Xochital monekis tiknextiskej kualneskayomej tein Jiova techmachtia axkan porin xa amo nochipa tikpiaskej nochi tein tiknejnekiskej. Uan xa monekis timochiaskej komo tiknekij tikpiaskej seki taman. Monekis tiyolpakiskej uan timotasojkamatiskej itech tein yeski taman tein tikpanotoskej. Komo tiknextiaj nejin kualneskayomej axkan, tiknextiaj ke tikchiujtokej tein moneki tein techpaleuis keman tinemiskej itech Xochital uan ke tiknekij tinemiskej kampa nochin kitakamatiskej Jiova (Heb. 2:5; 11:1). w15 15/8 3:11, 12

Amo nochi takilomej tein chikauayakejya sayoj se taman kemej tamatij. Uelis yeski taman kemej chijchiujtokej, sayoj ke keman chikauayaj kinextiaj seki taman ijkon kemej okseki koujtakilomej. Iniuan tokniuan akin yekyolmajsitokej no ijkon panoua. Amo sayoj se taman kemej tamatij. Xa kipiaj tataman xiujmej, tataman kemej nemij oso tataman tein kiuelitaj, sayoj ke kipiaj kualneskayomej tein kinextia ke yekyolmajsitokej. Yejuan kitojtokaj ika nejmachkayot ineskayo Jesús (1 Ped. 2:21). Yejua kijtoj ke moneki tiktasojtaskej Jiova ika nochi toyolo, ika nochi tonemilis uan ika nochi totanemililis. No kijtoj ke moneki tikintasojtaskej oksekin kemej tejuan timotasojtaj (Mat. 22:37-39). Tokniuan akin yekyolmajsitokej mochikauaj kitakamatiskej nejin tanauatilmej. Kinextiaj kemej monejnemiltiaj ke okachi kitayekanaltiaj yeskij itasojikniuan Jiova uan kintasojtaskej oksekin. w15 15/9 1:3-5

Komo kuali tikmachtiaj totanemilil, amo sayoj techiluis maj amo tikchiuakan tein amo kuali, ta no techiluis maj tikchiuakan tein kuali, kemej tikteixmatiltiskej kuali tanauatilmej. Totanemilil techolinis maj tikintapouikan taltikpakneminij keniuj tamati Dios, kajkalpan uan kampa yeski timoajsiskej. Yejua nejon kipanouaya Pablo. Yejua kijtoj ke monekia kisentokas tanojnotsas porin kimachiliaya ke ijkon monekia kichiuas (1 Cor. 9:16). Komo tikchiuaj kemej yejua, tikchiujtoskej tein moneki uan totanemilil amo techkuejmolos. Uan no, keman tikteixmatiltiaj kuali tanauatilmej, tiktemouaj maj inintanemilil taltikpakneminij kiseli nejon kuali tanauatilmej. Tikpiaskej se tanemilil tein kuali tamachtil motelneki porin techpaleuis maj tiktakamatikan itanauatiluan uan itamachtilisuan Jiova itech tonemilis. w15 15/9 2:16, 18

Jiova kikauak maj José, Moisés uan David kipanouanij uejueyi ouijkayomej. Itech nejon ouijkayomej kiajsikamatkej miak taman tein kinpaleuij keman Jiova kinmakak okachi uejueyi tekimej. Keman tikixtajtoltiaj itech Biblia ke Jiova kinpaleuia itekitikauan uan kinmachtia miak taman, tikitaj ke semi techtasojta. Keman timopolouaj, Jiova technextilia ke techtasojta komo tikseliaj itamelaualis. ¿Keniuj kinextia? Tanauatijkej Isaías kijtoj ke Jiova senkis techtapojpoluia (Is. 55:7). Uan tekiuaj David kuali kimelauak keniuj Jiova techtapojpoluia ika nejin tajtolmej: “Yejuatsin mitstapojpoluia nochi monepololuan uan kipajtia nochi tein mitskokoua; yejuatsin tajtani monemilis itech talkoyok uan mitsueyitalia ika iueyi netasojtalis tein amo tami uan teiknelilis” (Sal. 103:3, 4). Kemej tikitaj, Jiova nochipa kineki techtapojpoluis. Sayoj ke tejuan moneki tikseliskej itaixyekanalis uan itamelaualis uan tikpataskej tein monekis. Maj tikelnamikikan ke Jiova techmelaua porin techtasojta (Sal. 30:5). w15 15/9 4:13, 14

Marta takualchiujtoya uan kichiujtoya okseki taman tein tapaleuiskia maj Jesús kuali momachiliani. Keman Marta kiitak ke iikniuj amo kipaleuiaya, kualanik uan kiluij Jesús. Yejua kimatia ke Marta kichiujtoya tel miak taman. Yejua ika Jesús kiyemankailuij: “Marta, semi timoyolpolojtok uan timoyoltajyouiltijtok ika miak tataman tekit”. Uan no, kiluij ke xa kuali yeskia maj sayoj kichijchiuani se tapalol tein amo ouij. Ompa kiluij María ke kuali tein kichiujtoya porin kikaktoya ika nejmachkayot. Kijtoj ke yejua kiixpejpenka tein okachi kuali uan ke amo akin kikuiliskia (Luc. 10:38-42). Satepan, María xa kielkauak tein kikuaj nejon tonal, sayoj ke tikyekmatij ke amo keman kielkauak nochi tein kijtoj Jesús. Panoua 60 xiujmej satepan, tatitanil Juan kijtoj: “Jesús semi iuan motasojtaya in Marta uan iikniu María” (Juan 11:5). Yejua ika tikmatij ke Marta kiselij tein Jesús kiyolmajxitij uan kitekitilij Jiova ika nochi iyolo. w15 15/10 3:3, 4

Moajsi miak taman tein kinextia ke Jiova kisentoka kinpaleuia akin kinekij kiyolpaktiskej. Miakpa tikakinij keniuj Jiova kinankilia ininnetataujtiluan taltikpakneminij keman kitajtaniaj nepaleuil (Sal. 53:2). Kemej neskayot, se itaixpantijkauj Jiova akin motokaytia Allan tanojnotstoya itech se tal tein moajsi tatajko ueyiat ompa Filipinas. Se siuat peuak choka keman iuan tajtojtoya. ¿Toni kipanouaya? Allan kijtoua ke nejon kualkan siuat kitajtanijka Dios maj kikalpanouanij itaixpantijkauan Jiova uan moteltasojkamatia porin ijsiujka kinankilij inetataujtil. Moauij keman ayamo kiajxitiaya se xiuit momachtijtoya. Itech totonaluan, Jiova kinpaleuiani miakej itekitikauan. Kemej neskayot, achto ke mochiuaskiaj itaixpantijkauan, sekin tachichinayaj, kikuiaj drogas oso moixpetaniayaj ika auilnemilis. Miakej kijtouaj ke kitemouayaj kikauaskej nejon tein amo kuali, sayoj ke amo ueliaj. Sayoj ke keman kitajtanijkej Jiova maj kinpaleuiani, yejuatsin kinmakak “chikaukauelilis [tein] ualeutok imako”. Uan ijkon uelik kikaujkej nejon amo kuali tachiualismej (Sal. 37:23, 24). w15 15/10 1:10, 11

Sekin kiixtajtoltiaj Biblia, tanemiliaj uan motataujtiaj kualkan, oksekin keman moseuiaj tajkotonal, oksekin xa tiotakpa oso achto ke motekaskej. Uan oksekin xa tepitsin taixtajtoltiskej kualkan uan okse tepitsin youak (Jos. 1:8). Tein yeski hora tein tikchiuaskej, mojmostaj moneki tikixtajtoltiskej Biblia uan itech titanemiliskej uan maj amo tiktayekanaltikan okseki taman tein amo semi moneki. Jiova motenkaua kintatiochiuis nochin akin tanemiliaj itech Biblia uan mochikauaj kichiuaskej tein ompa momachtiaj (Sal. 1:1-3). Jesús kijtoj ke akin kikakij uan kitakamatij tein kijtoua Biblia okachi yolpakij (Luc. 11:28). Komo mojmostaj titanemiliaj itech Biblia, uelis tinemiskej kemej tikueyitaliskej Jiova uan yejua tein okachi moneki. Uan Dios techtatiochiuis axkan ika yolpakilis, uan se nemilis nochipaya itech Xochital (Sant. 1:25; Apoc. 1:3). w15 15/10 4:17, 18

Keman Jesús kinmelauilij imomachtijkauan ke yaya kimiktitij, Pedro kiluij maj moikneliani. Jesús kimatia ke Pedro kiluij nejon porin kitasojtaya. Sayoj ke no kimatia ke mopolojtoya. ¿Keniuj Jesús kipaleuij Pedro uan okseki imomachtijkauan? Yekinika kimelauak Pedro. Satepan kijtoj toni kinpanos akin amo kitakamatijok Jiova keman kipanouaj kuejmolmej. Uan satepan kijtoj ke Jiova kintatiochiuis akin motemakaj maj kintajyouiltikan porin kitekitiliaj (Mat. 16:21-27). Pedro kiajsikamatik toni monekia kichiuas (1 Ped. 2:20, 21). Xikontajtani Jiova maj mitsonpaleui xikonajsikamati mokoneuan uan xikonmati keniuj tikonpaleuis (Sal. 32:8). Xa tikonitas ke semej mokoneuan tayokoya oso ke amo kuali ininka tajtoua tokniuan. Tejuatsin xa tikonnemilis ke onkak teisa tein mokonetsin amo mitsontapouijtok. Amo ijsiujka xikonnemili ke kiichtakachiujtok teisa tein amo kuali. Sayoj ke no amo xikonchiua kemej yeskia amo teyi panoua oso xikonchia maj kuejmol iselti moyektali. Xa moneki xikonpaleui mokonetsin maj mochikaua itakuaujtamatilis. w15 15/11 2:12, 13

Tiitaixpantijkauan Jiova yekmelauj timotasojtaj uan tel kuali timouikaj. Nejin kinextia ke tipouij itech taneltokalis tein melauak. Jesús kijtoj: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35). Uan tatitanil Juan kijkuiloj ke komo tiknekij tiknextiskej ke tipouij iniuan “ikonetsitsin de Dios”, moneki tiktakamatiskej itanauatiluan uan tikintasojtaskej tokniuan. Uan ompa kijtoj: “Yejua nijin in tanojnotsalis ten achtopa ya namechkakiltijka de ke ma timosenpantasojtakan se uan okse” (1 Juan 3:10, 11). Kemej tiitaixpantijkauan Jiova timotasojtaj uan kuali timouikaj kinextia ke yekmelauj tiitatojtokakauan Cristo. No kinextia ke Dios techkui maj tikteixmatiltikan iTekiuajyo noyampa taltikpak (Mat. 24:14). w15 15/11 4:10, 11

Moneki tiknemiliskej keniuj nemij uan toni kineltokaj taltikpakneminij akin moajsij kampa tinemij. Ijkon tikmatiskej kemanian okachi uelis tikinnojnotsaskej. Kemej neskayot, komo niman titanankiliaj keman aksa kijtoua teisa tein techkuejmoloua, xa tikijtoskej teisa tein satepan tiknemiliskej maj amo tikijtouanij. Yejua ika, achto moneki timotajtaniskej: “¿Yekmelauj tel amo kuali tein kijtoj uan moneki maj nikyektali?”. Komo amo motelneki, xa okachi kuali maj amo teyi tikijtokan. Sayoj ke komo tikitaj ke moneki iuan titajtoskej, okachi kuali maj timochiakan hasta maj tiyolseujtokan (Prov. 15:28). No ijkon, keman tiknekiskej tikinyolchikauaskej tochankauan akin amo kitekitiliaj Jiova maj kiixmatikan yejuatsin, moneki maj amo tiyolijsiuikan, maj kuali tiknemilikan toni tikijtoskej uan maj tiktemokan kemanian okachi kinekiskej techkakiskej. w15 15/12 3:6, 8, 9

Moneki tiknextiskej tamatilis keman tikixpejpenaskej toni tikauaskej maj techchiuilikan tein ika kimatiskej toni kokolis tikpiaj oso toni tapajtilis tikseliskej. Okachiok moneki timoyekpiaskej komo tikitaj ke kemej aksa techmatiltisneki toni kokolis tikpiaj oso toni tapajtilis tikseliskej moita ke taman oso amo taixejekol. ¿Ueli techyekmelauilia keniuj tapaleuia? ¿Tikitaj ke teisa amo taixejekol itech tein techmelauilia? ¿Miakej tapajtianij kitekitiltiaj nejin? (Prov. 22:29.) Aksa uelis techiluis ke kiajsikej se taman pajti kansaika kampa tel uejka uan ke miakej tapajtianij ayamo kiixmatij. Sayoj ke ¿onkak tein kinextia ke yekmelauj moajsi nejon pajti? Oso xa hasta techiluis maj tikuikan se pajti tein kichijchiujkej ika se taman tein amo moneki momatis oso se chikaualis tein amo moixmati. Nejin uelis yeski tel tamouilil. Jiova amo kineki maj tiktekitiltikan naualot nion okseki taman tein mouika ika amo kuali ejekamej (Deut. 18:10-12; Is. 1:13). w15 15/12 4:16

Itech Biblia ininka motajtoua miakej itekitikauan Jiova akin amo keman kikaujkej uan kiselijkej iyektikatsin espíritu, sayoj ke amo yajkej iluikak. Semej yejua Juan Taauijkej. Jesús tel kuali ika tajtoj Juan, sayoj ke no kijtoj ke amo yaskia iluikak taixyekanatiuj kemej tekiuaj. Okse yejua David. Yektikatsin espíritu no kiixyekanak (1 Sam. 16:13). Nejon kipaleuij maj kiajsikamatini miak tamachtilismej tein ouijkej kemej tamati Jiova uan kijkuiloj seki amatajkuilolmej tein pouij itech Biblia (Mar. 12:36). Sayoj ke tatitanil Pedro kijtoj ke “David amo tejkok ne eluiyak” (Hech. 2:34). Ika iyektikatsin espíritu, Jiova kichiuak maj nejin takamej kichiuanij uejueyi taman, sayoj ke amo ika kinixpejpenak maj yakan iluikak. ¿Kijtosneki nejon ke amo kitekitiliayaj ika nochi ininyolo oso ke amo kinnamikia yaskej iluikak? Amo. Sayoj kijtosneki ke Jiova oksepa kinmakas ininnemilis itech Xochital nikan taltikpak (Juan 5:28, 29; Hech. 24:15). w16.01 3:16

Keman titekitij iuan aksa akin tiktasojtaj, okachi kuali timouikaj iuan. Okachi kuali tikixmatij ikualneskayouan uan tein kinemilia. Tikmatij toni kiixtalijtok kichiuas satepan uan toni kichiujtok tein kipaleuis maj kichiua nejon. Jesús tekitik iuan Jiova xa tel miak millones xiujmej achto ke ualaskia nikan taltikpak. Semi motasojtakej uan amo teyi uelia kinxelouaya. Tikyekmatij ke tel kuali mouikayaj porin yolpakiaj sentekitiskej uan mosenpaleuiskej. Jesús kitajtanij Jiova maj kinmatampauiani imomachtijkauan. ¿Keyej? Jesús kiluij: “Nomomachtijkauan ma poutinemikan sanse ijkon keme Tejuatsin uan Nejuatsin tisenpoutinemij sanse” (Juan 17:11). Keman tiktakamatij tein Dios techiluia itech Biblia uan titanojnotsaj, okachi kuali tikajsikamatij ikualneskayouan Jiova. Tikitaj ke titakuaujtamatiskej iuan uan tikchiuaskej tein yejuatsin technauatia yejua tein okachi kuali tein uelis tikchiuaskej. Uan komo timochikauaj timochiuaskej tiitasojikniuan, yejuatsin motokia touan (Sant. 4:8). Tanojnotsalis no tapaleuia maj okachi kuali timouikakan iniuan tokniuan, porin tikitaj keniuj mochikauaj kiyolpaktiskej Jiova. Uan no, tikitaj ke kipanouaj ouijkayomej tein tejuan tikpanouaj, kinyolpaktia tein tejuan techyolpaktia uan kiixtaliaj kichiuaskej tein tejuan no tikixtaliaj. w16.01 5:9, 10

Noemí kiixtalijtoya ajsis Israel. ¿Toni kichiuaskia Rut? ¿Mokepaskia Moab kampa moajsiaj ichankauan? ¿Oso kisentokaskia iuan Noemí? (Rut 1:1-8, 14.) Nejin tein Rut monekia kiixpejpenas semi ouij katka. ¿Keyej? Komo Rut kiixtaliaya mokepas Moab, ueliskia mokepas ichan, uan ichankauan xa ueliskiaj kiyekpiaskej. Uan no, kimatiaya keniuj nemiaj ompa uan tajtoskia itajtol. Noemí amo uelia kiyekiluiaya Rut ke ompa Israel no ijkon yeskia. Uan no, Noemí kitekipachouaya amo uelis kipaleuis maj oksepa monamikti oso maj kinpia ichankauan. Yejua ika kiluij Rut maj mokepani Moab. Kemej tikitakejya, Orpá mokepak “itech ixolal uan iuan itiotsitsin” (Rut 1:9-15). Sayoj ke Rut kiixtalij amo mokepas ialtepeuj nion kinueyichiuas nejon tiotsitsin. w16.02 2:4, 5

David uan takamej akin iuan yayaj moajsiaj itech taluakyan ompa Judá. Motatijtoyaj porin kimatiaj ke Saúl uan 3,000 tateuianij kitemouayaj David porin kinekiaj kimiktiskej. Se youak, David uan takamej akin iuan yayaj kiajsikej kampa Saúl uan itateuijkauan kochtoyaj. David uan se itateuijkauj akin monotsaya Abisai ichtakatsin ajsikej hasta kampa moajsia Saúl. Abisai kiluij maj kikauani maj kimikti Saúl. Sayoj ke David amo kikauak uan kiluij: “¿Akoni momaajokuini uan ijkon kijtakos itaixpejpenal Jiova uan amo kitatsakuiltianij?”. Uan satepan kijtoj: “¡Nion niknemilia, ijkon kemej kiita Jiova, maj nejua nimomaajokui uan ijkon nikijtakos itaixpejpenal Jiova!” (1 Sam. 26:8-12). David kimatia ke Saúl katka tekiuaj itech xolal Israel porin Jiova kiixpejpenka. Senkis kiajsikamatia ke komo kinekia kitakamatis tein Jiova kiixtalia, monekia kipoujkaitas Saúl. Yejua ika nion tepitsin kinemilij kijtakos. Axkan, Jiova no kichia maj tinochin tiitekitikauan tiktakamatikan tein yejuatsin kiixtalia uan maj tikinpoujkaitakan akin yejuatsin kinmakani tanauatil. w16.02 4:1, 2

¿Titelpoch uan tikneki timoauis? Se moauis yejua okachi ueyi tatiochiualis tein uelis se kipias. Sayoj ke, neauilis se taman tein moneki amo tikauilmatiskej. Keman se moauia, se kinextia ininixpan oksekin ke se kimaktilijya Jiova se inemilis. Ika okseki tajtolmej, se kinextia ke se motenkauakya iuan ke se kitekilis nochipaya uan ke yejua tein okachi se kitayekanaltis. Kemej nejin se netenkaualis tein motelneki, achto ke timoauis moneki tikyekitas ke ueli moselti titaixpejpena, ke tikneki timoauis porin yekmelauj tikneki tiktekitilis Dios uan ke kuali tikajsikamati tein kijtosneki se motemaktis iuan Dios. ¿Tiknemilia ke uelisya timoauis? Xa tiknemilis ke ayamo. Oso xa tiknemilis ke kemaj, sayoj ke motatuan mitsiluiaj ximochia okachi ximoskalti uan okachi kuali xitaixejeko. Sayoj ke amo ximotekipacho. Ximochikaua tikchiuas tein moneki uan ijkon amo uejkaua uelisya timoauis. w16.03 2:1, 2

Seki tokniuan kipiaj ininnamik akin amo itaixpantijkauj Jiova. ¿Keyej? Sekin xa mochiujkej itaixpantijkauan Jiova keman kipiayajya ininnamik, sayoj ke yejua amo kinekik momachtis. Komo ijkon, ¿toni uelis tikchiuaskej tein techpaleuis maj amo tixexeliujtokan iuan tonamik? Maj tikchiuakan tein tayolmajxitia Biblia, maski kemansa ouij techkisas. Satanás kitemoua kinijtakos kalyetouanij. Nejin yejua se taman tein kinextia ke namikuanij akin kitekitiliaj Jiova moneki amo xexeliujtoskej. Maski miak xiujmejya kipiaskej kemej namikuanij, moneki kinemiliskej toni uelis kichiuaskej uan kijtoskej tein kinpaleuis maj okachi kuali mouikakan. Yejuan uelis kinkauiliskej se kuali neskayot akin yekin monamiktiaj. Kemansa xa uelis kinyoleuaskej maj yakan keman taueyichiuaj kemej kalyetouanij. Ijkon yejuan uelis kiitaskej ke maski panoskej miak xiujmej, namikuanij moneki kisentokaskej kuali mouikaskej uan motasojtaskej (Tito 2:3-7). w16.03 3:14, 15