Abril

Akin amo takuaujtamatij itech inemilis Jesús tein kitemakak, Dios kiita ke kiixnamikij yejuatsin. Yejua ika moneki tikinmatiltiskej ke uelis kuali mouikaskej iuan Dios. Tatitanil Juan kijkuiloj: “Nochi nekes ten takuautamatiske iuan ne Ikonetsin Dios, yejuan nojonkes kipiaske ne yek nemilis nachipa. Pero nochi ne naken amo kinekiske yek tatakamatiske iuan Ikonetsin Dios, yejuan nojonkes amo kipiaske ne yek nemilis. Ta, yejuan sayo kiseliske ne ueyi tatsakuiltilis ten Totajtsin Dios kinualtitanilis” (Juan 3:36). Techyolpaktia tikmatiskej ke inemilis Jesús tein kitemakak techpaleuia maj ueli timotokikan iuan Dios (2 Cor. 5:18-20). ‘Okseki ichkamej’ kinmatiltiaj taltikpakneminij tein yekmelauj tamachtia Biblia. Uan no kinpaleuiaj maj kuali mouikakan iuan Dios. Nejin se taman tein motelneki itech totanojnotsalis. w16.07 4:8-10

Jesús yekinika tajtanik maj mopoujkaita itokay Dios tein yektik. Kemej Jiova yektik, nochi tein kichiua no yektik, hasta itanauatiluan. Sayoj ke itech xochital tein moajsia Edén, Satanás kuali kinemilij keniuj taomeyolotis ke Dios amo kinamiki kinmakas tanauatilmej taltikpakneminij. Kitakajkayauilij uan kichiuak maj amo kuali ika motajto (Gén. 3:1-5). Jesús amo kichiuak kemej Satanás, ta yejua yekmelauj kitasojtaya itokay Dios. Yejua ika mochikauak kiueyitalis (Juan 17:25, 26). Ika itachiualisuan uan itamachtilis kinpaleuij oksekin maj kiitakan ke itanauatiluan Jiova melaujkej uan ke nochi tein techtajtania techpaleuia (Sal. 40:8-10). Jesús amo keman kikauak Jiova, ijkon kinextij ke se takat akin amo tajtakolej kemaj ueli senkis kitakamati Dios. w17.02 2:2-4

Ichkatsin yejua Jesucristo. Yejua “kinajchiuilis nintajtakoluan de nochi taltikpakuani” (Juan 1:29). Jesús sayoj yejua tekiuaj akin kitemakak inemilis uan ika kinmakixtij taltikpakneminij. “Yejuatsin in Tekotsin ten tayekantinemi ipan nochi okseki tekome. Uan Cristo Yejuatsin in ueyi Tayekanke inpan nochi oksekin tayekanani.” (Apoc. 17:14.) Xa timomachiliaj kemej ángeles akin mokuikatiaj uan kijtouaj: “Tejuatsin ten tiontamati keme ichkatsin, ten mitsonmiktijkaj ya, [...] mitsonnamiki ximoaxkatili nochi uelilisme uan ricojyot. Uan no mitsonnamiki ximoaxkatili nochi tamachilis uan kualtsiyo. Uan no xikonseli nochi ne mouistililis uan nochi ne ueyipanchiualis. Uan no xikonseli nochi ne mouiskachiualis” (Apoc. 5:12). Komo tikinueyitaliaj Jesús uan iTajtsin, uelis tinemiskej nochipaya (Sal. 2:11, 12; Juan 5:23). w17.03 1:3, 4

Jefté kuali kiixmatia nochi tein panoka itech xolal Israel. Nejin kipaleuij maj kiajsikamati toni kuali uan toni amo kuali ijkon kemej kiita Jiova (Juec. 11:12-27). Uan itech inemilis kitekitiltij tein momachtij itech Tanauatil keman taixpejpenak. Yejua kimatia ke Jiova amo kineki maj itekitikauan momakepakan, ta maj motasojtakan. Uan no, itech Tanauatil kiajsikamatik keniuj monekia kinitas oksekin, hasta akin kitauelitayaj (Éx. 23:5; Lev. 19:17, 18). Neskayot tein kikauak José xa no kipaleuij Jefté. Yejua xa kimatia ke José kintapojpoluij iikniuan maski yejuan kitauelitayaj (Gén. 37:4; 45:4, 5). Jefté xa tanemilij itech nejin neskayot, uan nejon kipaleuij maj kichiua tein Jiova kichiaya. Yejua xa kiteltayokoltij nochi tein iikniuan kichiuilijkej. Sayoj ke kisentokak kitekitilij Jiova uan kipaleuij ixolal (Juec. 11:1-3). w16.04 1:8, 9

Itekitikauan Dios nochipa kiitanij ke motelnekij nechikolmej. Kemej neskayot, yekinika itatojtokakauan Cristo kiteluelitayaj monechikoskej. Amo tiomeyolouaj ke tinochin tikteluelitaj tiyaskej nechikolmej. Sayoj ke sekin xa techouijmaka tiyaskej nochi nechikolmej. Xa moneki titekitiskej miak horas, moneki tikchiuaskej tel miak taman oso xa titelsioujtokej. Komo tikpatiuitaj nechikolmej, techpaleuis maj amo titapolokan. Seki tokniuan amo uelij youij nochi nechikolmej porin kipanotokej se ueyi ouijkayot. Kemej neskayot, xa motelkokouaj. Tayekananij uelis kinpaleuiskej maj kikakikan nechikolmej itech se grabación oso ika teléfono. w16.04 3:3

Keman titanemiliaj itech ininneskayo itekitikauan Jiova akin amo kikaujkej, uelis techpaleuis maj tiknextikan tamatilis uan techyolchikauas maj titaxikokan. Kemej neskayot, Sadrac, Mesac uan Abednego amo kinekkej kiueyichiuaskej se tiotsin tamachijchiuj tein kiixnextiaya tekiuajyot ompa Babilonia (Dan. 3:16-18). Nejin tein panok kinpaleuia axkan miakej tokniuan maj kipiakan yolchikaualis uan maj amo kiueyichiuakan bandera. Jesús amo kipaleuij nion se tekiuajyot nion mokalakij itech okseki taman tein kichiuaya maj taltikpakneminij moxexelokan. Kimatia ke kuali neskayot tein kikauaskia kinpaleuiskia itatojtokakauan. Yejua ika kinyolchikauak. Tokniuan uelis techyolchikauaskej komo kimatij tein tikpanotokej. Uelis tikiniluiskej maj kitataujtikan Jiova maj techpaleui. Sayoj ke tejuan no uelis tikinyolchikauaskej uan ininka timotataujtiskej (Mat. 7:12). w16.04 4:16, 18

¿Tajtanij tomin itaixpantijkauan Jiova itech Kalmej kampa Mosentiliaj oso keman kipiaj uejueyi nechikolmej? Amo. Tekit tein kichiuaj moixtaua ika tomin tein taltikpakneminij kitemakaj ika nochi ininyolo (2 Cor. 9:7). Maski amo kintaxtauiaj porin tamachtiaj tein kijtoua Biblia, itech xiuit 2015, horas tein tanojnotskej ajsik 1,930 millones uan sejse metsti kitemakakej panoua nueve millones nemachtilmej ika Biblia. Ika miak pakilis kitekitiltiaj inintomin uan kichiuaj nejin tekit. Se motelmachtijkej kijtoj ke tekit tein okachi kichiuaj itaixpantijkauan Jiova yejua tanojnotsaskej uan tamachtiskej. Uan kijtoj ke amo kintaxtauiaj akin kinixyekanaj. Komo ijkon, ¿keyej titanojnotsaj? Porin tiktasojtaj Jiova uan taltikpakneminij. Ika nejin mochiua tein kijtoua tajkuilol tein axkan tikitaj. w16.05 2:9

Kemej tikitaj, Biblia tamachtia ke moneki amo timoixpetaniskej ika tein kichiuas maj tiknemilikan oso maj tiknekikan tikchiuaskej tein pitsotik. Komo senkis tikajsikamatij tein Jiova kitasojta uan tein kitauelita, amo monekis tikintajtaniskej tokniuan toni amatajkuilolmej, películas oso neauiltilis uelis tikixpejpenaskej. Toselti uelis tikmatiskej. Keman moneki tikixpejpenaskej teisa, miakpa moajsi miak taman tein uelis tikchiuaskej uan tein kiyolpaktis Jiova. Sayoj ke komo moneki tikixpejpenaskej se taman tein motelneki, xa semi techpaleuis komo titajtouaj iuan se tayekankej oso okse tokniuj akin kinextia kuali taixejekolis (Tito 2:3-5; Sant. 5:13-15). Sayoj ke amo tiktajtaniskej maj techilui toni moneki tikixpejpenaskej, ta titanemiliskej ika nejmachkayot itech tein Biblia tamachtia uan ompa toselti titaixpejpenaskej (Heb. 5:14). Tatitanil Pablo kijtoj ke tisejsemej titanankiliskej iixpan Dios ika tein tikchiuaskej (Gál. 6:5). w16.05 3:15, 16

Jiova amo kinita taltikpakneminij kemej tejuan tikinitaj. Yejuatsin kiita iyolo sejse taltikpaknenkej uan kiita keniuj yekmelauj tamati (1 Sam. 16:7b). Se taman tein kinextia nejin yejua keman kipeualtij nechikol kampa kichiuaj kemej Cristo. Yejuatsin kichiuak maj tel miakej akin amo kinpoujkaitayaj kiixmatinij yejuatsin uan no iKonetsin (Juan 6:44). Semej katka se fariseo akin motokaytiaya Saulo. Jiova kiitak iyolo uan kiitak ke amo katka kemej sokit tein amo kualtiaya (Prov. 17:3). Kiitak ke Saulo katka kemej sokit tein ika ueliskia kichijchiuas se kualtsin tapalkat “para yas kinnojnotstinemitiu [...] pueblojme ten amo pouij judíos [...,] uejueyi chiuanime uan no inixpan in pueblojuani de Israel” (Hech. 9:15). Jiova no kinixpejpenak okseki taltikpakneminij uan kinpaleuij maj mopatanij uan maj mochiuanij kemej yeskia se tapalkat tein “semi kualtsin tachijchiu uan takualnextil”. Sekin tachtekiaj, tauanayaj uan auilnemiaj (Rom. 9:21; 1 Cor. 6:9-11). Sayoj ke keman kiixmatkej Dios, kichikaujtiyajkej inintakuaujtamatilis uan mokaujkej maj yejuatsin kinpaleuiani maj mopatanij. w16.06 1:4

Ika Biblia, nechikol uan tanojnotsalis, Dios techpaleuia maj tiksentokakan timoajsikan kemej sokit tein yemanik. Komo mojmostaj tikixtajtoltiaj Biblia uan itech titanemiliaj uelis techpaleuis maj timochiuakan kemej sokit tein yemanik imako Jiova. Yejuatsin kinnauatij akin tekiuajtiaj Israel maj kimaijkuilouanij Tanauatil uan maj mojmostaj kiixtajtoltianij (Deut. 17:18, 19). Tatitanilmej kimatiaj ke komo kiixtajtoltiayaj iTajtol Dios uan itech tanemiliayaj kintelpaleuiskia itech tanojnotsalis. Yejua ika keman kijkuilojkej Escrituras Griegas, miakpa ika tajtojkej tajkuilolmej tein moajsij itech Escrituras Hebreas. Uan keman tanojnotsayaj, kinyoleuayaj taltikpakneminij maj kiixtajtoltianij iTajtol Dios (Hech. 17:11). Tejuan no tikitaj ke motelneki mojmostaj tikixtajtoltiskej Biblia uan itech titanemiliskej (1 Tim. 4:15). Nejin techpaleuia maj tiksentokakan tiknextikan yolyemanilis uan kichiua maj Jiova techpaleui maj timopatakan. w16.06 2:10

Itech totonaluan, itekitikauan Jiova kinextianij netasojtalis hasta keman mochiuanij neteuilismej. Kemej neskayot, itech Ojpatika Neteuilis tein Mochiuak itech Nochi Taltikpak momikilijkej kemej 55 millones taltikpakneminij. Sayoj ke itaixpantijkauan Jiova amo kimiktijkej nion se taltikpaknenkej itech nejon neteuilis (Miq. 4:1, 3). Nejon kinpaleuiani maj amo inintajtakol maj momikiliani nion semej nejon taltikpakneminij (Hech. 20:26). Axkan, itekitikauan Dios kisentokaj momiakiliaj maski kinixnamiki se tetauelitakej akin tel chikauak, Satanás, “ten tayekantinemi nikan taltikpak” (2 Cor. 4:4). Ika taltikpaktekiuajyomej uan kampa kiteixmatiltiaj tanauatilmej, Satanás kitemoua kitsakuilis tanojnotsalis. Sayoj ke yejua amo ueli kitsakuilia. “Kuali kimati ke amo kipia ok miak tonalme”, yejua ika kisentoka kitemoua kichiuas maj amo tiktekitilikanok Jiova (Apoc. 12:12). w16.06 4:3, 4

Jesús kinelnamiktij imomachtijkauan ke Jiova kiyekpia nochi tein kichijchiuak. Yejua kintalilij kemej neskayot “milajxochimej”. Nejin xochimej “amo motekitiliaj nion no tajkitij”. Kemej semi kualtsitsin, Jesús kijtoj: “Ne ueyi rey Salomón ika nochi nikualtsinyo motakentiaya pero amo keman uelik kinejneuilis kualtsin keme nijin xochit”. Satepan Jesús kintajtanij: “¿Xe kachi amo namechpaleuis Dios uan ke ne milajxochime? [...] ¿Keye amo majsitok namotakuautamatilis?” (Mat. 6:29, 30). Kemaj kinpaleuiskia maj kipianij tein motaliliskej. Sayoj ke imomachtijkauan Jesús monekia okachi takuaujtamatiskej (Mat. 8:26; 14:31; 16:8; 17:20). Monekia takuaujtamatiskej ke Jiova kinekia kinyekpias uan ke ijkon kichiuaskia. Moneki titanemiliskej itech nejin uan timotajtaniskej: “¿Yekmelauj nikneltoka ke Jiova nechyekpias?”. w16.07 1:15, 16

Maski tikpiaskej tein yeski kuejmol, Jiova techmaka nochi tein techpaleuis maj titaxikokan (1 Ped. 1:6). Kemej yejuatsin technextilia iteiknelilis ika miak taman, tikseliaj miak tatiochiualismej. Semej nejon tatiochiualismej yejua ke Jiova techtapojpoluia, sayoj ke moneki timoyolnonotsaskej uan timochikauaskej amo tikchiuaskej tein amo kuali (1 Juan 1:8, 9). Pablo kijtoj: “Dios techkixtij ya [...] kampa ne sayo mochiutok chikaualis den tajtakol ten kualkui tayouayanilot. Uan no Yejuatsin techpanoltij ya kampa iuelilispan de Itasojkonetsin para ma techyekantinemi in Cristo Jesús. Uan Cristo techmakixtij [...] kuak mimilauik iesyotsin. Ika ya nojon Totajtsin Dios techtapojpoluij” (Col. 1:13, 14). Komo tiktasojkamatij tein Dios toka kichiuak, tiknextiskej ika totaueyichiualis. Uan kemej yejuatsin techtapojpoluia, uelis tikseliskej okseki miak tatiochiualismej. w16.07 3:7-9

Maski Satanás takuejmolchiuak ompa Edén, Jiova kichiuak tein tapaleuiskia maj taltikpakneminij uelikan kichiakan tein kuali satepan. Jiova kiixpejpenaskia semej ángeles maj kiixpolo Satanás uan maj kichiua maj akin tatakamatiskej kipiakan tein Adán uan Eva kipolojkej. Yejuan uelis nemiskej nochipaya nikan taltikpak, ijkon kemej Jiova yekinika kiixtalijka (Juan 3:16). Kemej Adán uan Eva taixnamikkej kinualkuilij miak kuejmolmej yejuan uan nochin namikuanij. Kemej neskayot, Eva uan nochin siuamej tel tajyouiskiaj keman yoliskia se ininkonetsin. Uan no, kitelnekiskiaj maj inintakauj kintasojta. Uan no, takamej kinitaskiaj ininnamik kemej amo teyi chiuanimej uan kemansa hasta kintajyouiltiskiaj, kemej axkan tikitaj (Gén. 3:16). Jiova kijtoua itech Biblia ke takamej moneki kinixyekanaskej ininchankauan ika netasojtalis uan ke siuamej moneki kipoujkaitaskej tanauatil tein kipia ininnamik (Efes. 5:33). Keman tokniuan namikuanij kichiuaj tein sejse moneki kichiuas, amo semi kipiaj kuejmolmej. w16.08 1:6, 7

Biblia kinextia keyej namikuanij moneki amo mokakauaskej nion ijkuak semej amo kiueyichiua Jiova (1 Cor. 7:12-14). Akin amo itaixpantijkauj Jiova kemej yeskia “kiyolpaktijtinemi uan kitekitilijtok Dios” porin inamik kitekitilia Jiova. Uan ininkonetsitsin “yolchipauke iixpantsin Dios”, yejua ika yejuatsin kinmatampauia. Miakej tokniuan kinpaleuianij ininnamik maj mochiuakan itaixpantijkauan Jiova. Tatitanil Pedro kinyolmajxitij tokniuan siuamej maj kinpoujkaitakan ininnamik. Yejua kijtoj keyej: “Takan sekin namoyokichuan amo kitakamatij in Tajtoltsin de Dios, ijkuakon namejuan nantesiuauan nankintaneltoktiske namoyokichuan ika namochipaukanemilis” (1 Ped. 3:1-4). w16.08 2:14, 15

Jiova kineki maj tiitekitikauan timotasojtakan kemej tiiknimej uan maj timopaleuikan (Luc. 22:24-27). Jesús kichiuak nochi tein uelik kemej kinpaleuis taltikpakneminij. Hasta toka kitemakak inemilis (Mat. 20:28). Dorcas nochipa kinpaleuiaya oksekin (Hech. 9:36, 39). Uan María kintelpaleuij tokniuan akin nemiaj Roma (Rom. 16:6). ¿Keniuj uelis tikinpaleuiskej akin yankuikej maj kiajsikamatikan ke motelneki kinpaleuiskej tokniuan? Uelis tikinyoleuaskej maj tikinkalpanotij tokniuan akin xiuejkejya oso akin mokokouaj. Tetatmej uelis kinuikaskej ininkoneuan, komo kiitaj ke uelis. Tayekananij uelis kiniluiskej telpochmej oso akin yankuikej maj kinuikilikan takual akin xiuejkejya oso maj kiyektalikan teisa ininchan. Komo telpochmej uan akin yankuikej kiitaj ke tokniuan mosenyekpiaj, no ijkon kichiuaskej uan kitemoskej keniuj kinpaleuiskej tokniuan (Rom. 12:10). w16.08 4:13, 14

Itech ueyi altepet Francia, se tokniuj ichpoch kijtoj: “Tamachtianij itech kaltamachtiloyan semi kimoujkaitaj maj moajsikanok momachtianij akin kineltokaj tein kijtoua Biblia”. Axkan, miakej amo kineltokaj ke Dios techchijchiuak. Komo titelpoch oso tiichpoch uan tiktekitilijtok Jiova oso yankuixtok peuak timomachtia keniuj tamati yejuatsin, xa kemansa timotajtania keniuj uelis tiknextis ke yejuatsin toTachijchiujkauj. Biblia techpaleuia maj titanemilikan ika nejmachkayot itech tein tikixtajtoltiaj uan tein tikakij, uan techpaleuia maj tikajsikamatikan tein techmachtia. ITajtol Dios kijtoua: “Mokuali tanemililis mitsnejmachpias”. ¿Keniuj? Keman mitspaleuis xikixtopeua tanemililmej tein amo melaujkej uan xikchikaua motakuaujtamatilis iuan Jiova (Prov. 2:10-12). Moneki kuali tikixmatiskej Jiova, porin nejon techpaleuis maj okachi titakuaujtamatikan iuan (1 Tim. 2:4). Yejua ika, keman tikixtajtoltis Biblia uan toamaixuan, motelneki ximotsakuili uan xitanemili. Xiktemo tikajsikamatis tein tikixtajtoltia. w16.09 4:1-3

Moneki tiksentokaskej titaxikoskej maski titajyouijkej keman timoskaltijkej oso tikmachiliaj ke tokuejmoluan amo moyektaliskej. Sayoj ke uelis tikyekmatiskej ke Jiova techtatiochiuis komo amo timosenkauaj (Gén. 39:21-23). Xa titajyouijtokej porin techchiuiliaj tein amo kuali, techchikoitaj, techkejkelouaj oso aksa techtakajkayauilij porin technexikoluia. Sayoj ke maj amo timosenkauakan. Maj tikelnamikikan toni kinpaleuij Jacob, Raquel uan José maj kisentokakan kitekitilijtokan Jiova ika yolpakilis. Yejuan kitelpatiuitayaj ininkuali uikalis iuan Jiova, uan yejua ika yejuatsin kinmakak chikaualis uan kintatiochiuij. Kisentokakej taxikojkej uan monejnemiltijkej ijkon kemej tajtaniaj itech ininnetataujtiluan. Kemej tejuan tinemij itech itamian tonalmej, motelneki maj tiksentokakan titakuaujtamatikan itech tein tikchiaj satepan. ¿Tikixtalijkejya timochikauaskej tikpiaskej itatiochiualis Jiova? w16.09 2:8, 9

Keman mokoneuan kiitaskej ke tejuatsin semi tiontakuaujtamati iuan Jiova, kintelpaleuis. Yejuan kiitaskej tein tejuatsin tikonchiuas. Yejua ika, xikonsentoka xikonchikaujto motakuaujtamatilis uan xikonkaua maj kiitakan ke tejuatsin tikonmati ke Jiova yekmelauj nemi. Xiontanemili itech ininneskayo seki namikuanij kayomej islas Bermudas. Keman yejuan kintekipachoua teisa, iniuan ininichpochuan kitataujtiaj Jiova maj kinyekana. No kinyoleuaj ininichpochuan maj kitataujtikan Jiova. Uan no, kiluiaj ininichpoch akin tayekana maj senkis takuaujtamati iuan Jiova, maj senkis kitekitilijto uan maj amo semi motekipacho. Yejuan kijtouaj: “Keman yejua kiita tein kiualkui nejon, kiajsikamati ke Jiova techpaleuijtok. Semi se kimoujkaita ke nejin kichikauani itakuaujtamatilis iuan Dios uan itech Biblia”. Tetatmej, nochipa xikelnamikikan ke amo uelis nankinchikaujkauiskej nanmokoneuan maj takuaujtamatikan. Namejuan uelis nankitokaskej se xochit uan nankiatekiskej, sayoj ke sayoj Jiova uelis kichiuas maj moskalti (1 Cor. 3:6). Yejua ika, ximochikauakan nankinnextiliskej keniuj tamati Dios uan xiktajtanikan yejuatsin maj kinpaleui ika iyektikatsin espíritu maj takuaujtamatikan. Senkis xikmatikan ke Jiova kitiochiuas tein nanmochikauaskej nankichiuaskej (Efes. 6:4). w16.09 5:16-18

Serge uan inamik, Muriel, kiuikayajya panoua eyi xiuit itech se nechikol kampa motajtoua okse tajtol. Sayoj ke kiitakej ke inintelpoch akin kipiaya 17 xiujmej amo kiuelitayaok tanojnotsas nion yas nechikolmej. Serge kijtoua ke yetoskej itech se nechikol kampa motajtoua okse tajtol amo kipaleuiaya itelpoch maj kichikaua ikuali uikalis iuan Jiova. Yejua ika kiixtalijkej mokepaskej itech nechikol kampa achto yetoyaj. ¿Toni moneki itech tanemiliskej tetatmej keman kiixpejpenaskej mokepaskej? Yekinika, moneki kiitaskej ox kipiaj tiempo uan chikaualis tein moneki uan ijkon kinmachtiskej ininkoneuan maj kitasojtakan Jiova uan no kinmachtiskej okse tajtol. Uan ojpatika, moneki kiitaskej ox ininkoneuan kinekij tanojnotsaskej, yaskej nechikolmej oso tapaleuiskej itech se nechikol kampa motajtoua okse tajtol. Satepan ke itech tanemiliskej nejin, seki tetatmej xa kiixtaliskej mokepaskej itech nechikol kampa motajtoua tajtol tein ininkoneuan kuali kiajsikamatij hasta keman kipiaskej se kuali uikalis iuan Jiova (Deut. 6:5-7). w16.10 2:14, 15

Akin nemiaj kampa ika Noé nemia xa kitajtaniayaj keyej kichijchiujtoya se ueyi arca. Uelis tikyekmatiskej ke yejua kinmelauilij keyej, porin Biblia kijtoua ke “tanojnotstinemia ika ten melauak tajtoltsin” (2 Ped. 2:5). Kinmatiltij ke Dios kiualkuiskia se tetsaujkakiouit tein ika kiixpoloskia tein amo kuali. Xa hasta kiniluij tajtolmej tein Jiova kiluijka: “Nikixtalij nikixpolos nochi tein yoltok, porin itech taltikpak tel onkak tateuilis”. Jiova no kiluijka Noé: “Nikualkuiti se tetsaujkakiouit itech taltikpak, uan ika nejon nikixpoloti iluikaktampa nochi tein mijyotijtok. Nochi tein moajsi itech taltikpak momikilis”. Ompa, Noé xa kinmelauilij tein monekia kichiuaskej komo kinekiaj makisaskej. Jiova kiluijka: “Moneki tikalakis itech arca” (Gén. 6:13, 17, 18). w16.10 4:7

Itech Biblia, Jiova kiniluia tetatmej keniuj moneki kinmachtiskej ininkoneuan. Tokniuan tetatmej kinextiaj ke kinekij kiyolpaktiskej Jiova keman kitakamatij. Moneki amo tanemiliskej kemej tanemiliaj akin amo kitekitiliaj Jiova (Efes. 2:2). Kemej neskayot, itech seki altepemej se tepopaj xa kijtos ke siuamej moneki kinmachtiskej ininkoneuan. Sayoj ke Biblia senkis kijtoua ke tepopaj moneki kinpaleuis ikoneuan maj kiixmatikan Jiova (Efes. 6:4). Takamej uan siuamej akin kipiaj konemej uan kitasojtaj Jiova kinekij maj ininkoneuan kuali mouikakan iuan, ijkon kemej Samuel peuak kuali mouika iuan keman nojnelok katka (1 Sam. 3:19). Achto ke tikixpejpenaskej teisa tein mouika ika tekit uan tochankauan, moneki tiknemiliskej tein kijtoua Biblia. Moneki maj toTajtsin techyekana. w16.11 3:14, 15

Keman titanemiliaj itech tein Jiova kichijchiuak, tikitaj ke yejuatsin kuali kiixtalia tein kichiuas. Proverbios 3:19 kijtoua ke yejuatsin “ika tamatilis kichijchiuak taltikpak” uan kichijchiuak “iluikak ika kuali taixejekolis”. Sayoj ke amo nochi tikixmatij tein Dios kichijchiuak. Yejua ika Biblia kijtoua ke sayoj se “ichtakatajtolis mokakini kemej tamati” (Job 26:14). Sayoj ke, tein tikixmatij kemej chijchiujtok iluikak uan taltikpak, maski amo miak, techpaleuia maj tikitakan ke nochi kuali ixyetok. Maj titanemilikan itech millones sitalimej tein mooliniaj ejekaixko uan amo motelouaj, uan keniuj planetas kitojtokaj se ojti keman kiyoualouaj Tonaltsin. Tel kuali nochi ixyetok porin Jiova ijkon kinekik. Keman tiknemiliaj ke Jiova kichijchiuak nochi ika miak tamatilis techolinia maj tikueyichiuakan uan maj amo keman tikauakan (Sal. 136:1, 5-9). w16.11 2:3

ITajtol Dios kimelaua tein kinpanok Momachtianij ika Biblia itech xiuit 1914 hasta ipeujyan xiuit 1919 itech Malaquías 3:1-3. Itech nejin tajkuilol, “toTeko akin melauak” yejua Jiova, uan “tanauatijkej itech netenkaualis” yejua Jesucristo. Yejuan kinitakoj “ikoneuan Leví”, akin kinixnextiaj taixpejpenalmej. Satepan ke Jiova kinmelauak uan kinchipauak, axkan kemaj ueliskia kiseliskej se yankuik tekit. Itech xiuit 1919, Jesús kiixtalij se takeual takuaujtamach uan tamatkej maj kinmachtiani uan maj kinixyekanani akin pouiskiaj itech ixolal Dios (Mat. 24:45). Itekitikauan Dios kiskajya imako Ueyi Babilonia. Ijkuak uan hasta axkan kisentokaj kiajsikamatij katiyejua itanejnekilis Dios, uan okachi kitasojtaj yejuatsin. ¡Semi kitasojkamatij maj Jiova kintatiochiui! w16.11 5:14

ToTajtsin Jiova motenkaua kintatiochiuis itekitikauan akin amo kikauaj. Nejin se taman kemej kinextia ke techtasojta. Uan tejuan tiktasojtaj porin “Yejuatsin achto techtasojtak” (1 Juan 4:19). Komo okachi tiktasojtaj Dios, okachi iuan titakuaujtamatiskej uan okachi tikneltokaskej ke kintatiochiuis akin kintasojta (Heb. 11:6). Jiova kineki kintatiochiuis itekitikauan. Nejin se taman tein kiixnextia kemej tamati uan tein kichiua. Komo tiknekij maj totakuaujtamatilis ajsito, moneki senkis tikneltokaskej nejin, porin “kuak titakuautamatij iuan Dios, ijkuakon timoyekmatiltiaj ya ke se tonal tikselijtiue nochi ne ten axkan tikyolikachixtokke” (Heb. 11:1). Se takuaujtamatis kijtosneki senkis se kineltokas ke Dios kintatiochiuis akin amo kikauaj. Kemej kinextia tajkuilol tein axkan tikitaj, yejuatsin techyoleua maj tiktemokan itatiochiualis. Keman tikseliaj nejin itayoleualis Dios, tiknextiliaj ke timotasojkamatij. w16.12 4:1-3

Aksa akin miak xiujmejya kitekitiliani Jiova uelis peuas ‘moyekantinemis ika ne chikaualis de nitalnamikilis de tajtakol’. Sayoj ke Romanos 8:6 amo kijtosneki ke amo kuali yetok maj se tanemili itech takual, tekit, neixpetanilis oso maj se monextili netasojtalis kemej namikuanij. Nejin seki taman tein ipa se kichiua. Jesús no moyolpaktij ika takualis uan hasta kintamakak tel miakej. Uan kemansa, no monekik moseuis. Uan no, Pablo kijtoj ke namikuanij moneki mosentekaskej. Tajtol griego tein Pablo kikuik kijtosnekia se tel tanemilis uan se kiixtalis tein se kichiuas itech se taman. Se tamatkej kimelauak ke tajtolmej tein moajsij itech Romanos 8:5 mouikaj iniuan akin tanemiliaj sayoj itech inintanejnekilis uan nochipa ika tajtouaj. Yejuan kiitaj ke okachi moneki tein kinejnekij uan kikauaj maj nejon kinyekana. w16.12 2:5, 9, 10

Komo amo timoijkuaniliaj toamo kuali tanejnekilis, no uelis peuas timoueyinekiskej. Miakej peua moueyinekij porin kinnexikoluiaj oksekin, niman kualanij oso kinekij maj kinueyitalikan. Yejua nejin kinpanok sekin akin ininka motajtoua itech Biblia, kemej Absalón, Uzías uan Nabucodonosor. Jiova senkis kinajsikamatiltij ke monekia kinextiskej yolyemanilis (2 Sam. 15:1-6; 18:9-17; 2 Crón. 26:16-21; Dan. 5:18-21). No moajsi okseki taman tein xa kichiua maj taltikpakneminij kemansa amo kinextikan yolyemanilis. Maj titanemilikan itech Abimélec uan Pedro (Gén. 20:2-7; Mat. 26:31-35). ¿Moueyinekkej? ¿Xa amo kimatiaj seki taman? ¿Oso xa amo kinemilijkej tein kichiujkej? Kemej amo ueli tikmatij tein oksekin kinemiliaj, moneki amo tikijtoskej ke kinolinia tein amo kuali. w17.01 3:9, 10

Kemej siuat akin amo nemiaok inamik akin kipanotoya tatasojtilis, miakej tokniuan itech nejin tonalmej takuaujtamatij ke Jiova kinmakas tein kinpoloua komo kitayekanaltiaj iTekiuajyo (Mat. 6:33, TNM). Maj itech titanemilikan se tokniuj akin monotsa Malcolm. Itech nochi xiujmej tein yejua uan inamik kitekitilijkej Jiova, kipanokej seki taman tein kuali uan tein amo kuali. Yejua kijtoj: “Itech se inemilis amo se kimati toni uelis panos uan teualkuilis kuejmolmej, sayoj ke Jiova kintatiochiuia akin iuan takuaujtamatij”. Uan tayolmajxitij: “Moneki tiktajtaniskej Dios maj techkaua maj tiktekitilijtokan kemej okachi uelis. Maj tiktayekanaltikan tein ueli tikchiuaj, amo tein amo ueli tikchiuaj”. Kemej itech nejin taltikpak okachi mochiujtiuj tein amo kuali, satepan tikpiaskej okachi kuejmolmej (2 Tim. 3:1, 13). Axkan okachi moneki maj amo tikauakan maj kuejmolmej techtsakuilikan, ta moneki senkis titakuaujtamatiskej iuan Jiova uan tiktayekanaltiskej tein ueli tikchiuaj. w17.01 1:17-19

David kitelnekia kichijchiuas se tel kualtsin templo kampa kiueyichiuaskiaj Jiova. Sayoj ke Jiova taman tanemiliaya, kemej ixnesi itech tajkuilol tein axkan tikitaj. Melauak ke Jiova motenkauak iuan David ke kisentokaskia kitatiochiuijtoskia, sayoj ke kiluij ke semej ikoneuan kichijchiuaskia templo. ¿Keniuj momachilij David? (1 Crón. 17:1-4, 8, 11, 12; 29:1.) Xa tel tayokoyak porin amo ueliskia kichijchiuas. Maski ijkon, senkis kipaleuij Salomón ika tekit tein yaya kiixyekanati. Kiixtalij keniuj tekitiskiaj nochin uan kisentilij kouit, tepos, cobre, plata uan oro. David amo kitekipachoj akoni kiueyitaliskiaj porin kichijchiuak templo, tein satepan moixmatik kemej templo tein kichijchiuak Salomón, ta kiyolchikauak ikoneuj keman kiluij: “Maj Jiova yeto mouan, uan maj kuali kisa tein tikchiua uan xikchijchiua ichan Jiova” (1 Crón. 22:11, 14-16). w17.01 5:6, 7

Hasta keman techtajyouiltiaj, timochikauaj tinemiskej kemej Jiova techmachtia. Keman tiktakamatij itanauatiluan, tikueyitaliaj itokay (Mat. 5:14-16). Uan no, tiknextiaj ke itanauatiluan melaujkej uan ke Satanás se takajkayaujkej. Melauak ke timopolouaj porin titajtakouanij. Sayoj ke timoyolnonotsaj uan timochikauaj amo tikchiuaskej tein yeski tein kichiuas maj amo kuali ika motajto Jiova. Yejuatsin techtapojpoluia komo titakuaujtamatij itech inemilis Jesús tein kitemakak. Kinselia maj kiueyichiuakan akin iuan motemaktiaj. Kinita ke melaujkej tokniuan taixpejpenalmej uan kinselia kemej ikoneuan. Uan no kinita ke melaujkej akin pouij iniuan ‘okseki ichkamej’ uan kinselia kemej itasojikniuan (Juan 10:16; Rom. 5:1, 2; Sant. 2:21-25). Hasta itech nejin tonalmej, inemilis Jesús tein kitemakak techpaleuia maj ueli kuali timouikakan iuan toTajtsin uan maj tikueyitalikan itokay. w17.02 2:5, 6