Diciembre

Ika nejin tajtolmej, tatitanil Pedro kinyolchikauak tokniuan maj kixikokan itaixnamikilis Satanás. Yejua ika semi kuali maj tikixmatikan ininnemilis “nekes ten taxikoaj”, porin techpaleuis maj amo tikauakan Dios uan maj tikelnamikikan ke Jiova techtatiochiuis komo amo tikauaj (Sant. 5:11). Xa sekin techixnamikij oso techtajyouiltiaj porin tiktekitiliaj Jiova. Oso komo titapaleuiaj kemej tayekananij oso takalpanouanij, xa techteltekipachoua nochi tekit tein moneki tikchiuaskej. Ineskayo Pablo uelis techpaleuis. Yejua kiteltajyouiltijkej. Uan no, semi ininka motekipachouaya tokniuan (2 Cor. 11:23-29). Sayoj ke amo keman mosenkauak, uan kuali neskayot tein kikauak kinpaleuij oksekin maj taxikokan (2 Cor. 1:6). Komo tejuan titaxikouaj, tokuali neskayo no kinpaleuis okseki tokniuan. w16.04 2:11, 14

Jesús kijtoj ke itech itamian tonalmej noyampa moteixmatiltiskia tein kuali tein kichiuas iTekiuajyo Dios. Axkan, miakej kimatij ke tiitaixpantijkauan Jiova noyampa taltikpak titanojnotsaj. Sekin kiuelitaj tein tikteixmatiltiaj. Oksekin amo kiuelitaj, maski ijkon, techpoujkaitaj porin tikchiuaj nejin tekit (Mat. 24:14). Itech miakej taneltokalismej kijtouaj ke kiteixmatiltijtokej tein Jesús tamachtij. Kinemiliaj ke se tanojnotsas kijtosneki se kitemakas se tanojnots itech tiopan, itech televisión oso itech Internet. Sekin kinemiliaj ke tanojnotsaj keman kintapouiaj oksekin keniuj kinpaleuij itech ininnemilis kiixmatiskej Jesús. Uan oksekin, keman kinpaleuiaj akin tajyouijtokej oso tapaleuiaj kemej tapajtianij oso tamachtianij. Sayoj ke ¿ijkon Jesús kiniluij imomachtijkauan ke monekia tanojnotsaskej? w16.05 2:1, 2

Taltikpaktekiuajyomej kiixnamikij iTekiuajyo Dios, tein peuak taixyekana itech xiuit 1914. Amo uejkaua, iTekiuajyo Dios kinixpoloti nochi taltikpaktekiuajyomej (Sal. 2:2, 7-9). Dios kikaua maj moajsikan taltikpaktekiuajyomej porin tapaleuiaj maj onka tepitsin yekyetolis uan maj amo semi mochiua tein amo kuali. Nejin techpaleuia maj ueli tikteixmatiltikan iTekiuajyo Dios (Rom. 13:3, 4). Jiova hasta techiluia maj ininka timotataujtikan tekiuanij uan ijkon amo teyi techtsakuilis maj ueli tikueyichiuakan (1 Tim. 2:1, 2). Komo aksa techchiuilia tein amo kuali, uelis tikintajtaniskej tekiuanij maj techpaleuikan, ijkon kemej kichiuak tatitanil Pablo. Uan maski Biblia kijtoua ke Satanás kinixyekana taltikpaktekiuajyomej, amo kijtoua ke yejua kichiualtia sejse tekiuaj tein kineki (Luc. 4:5, 6). Yejua ika moneki amo keman tikijtoskej ke Satanás kichiualtijtok teisa se tekiuaj. Biblia kijtoua maj amo tikinijijtokan tekiuanij uan maj tikinpoujkaitakan (Tito 3:1, 2). w16.04 4:5, 6

¿Keniuj uelis tikmatiskej tein kiyolpaktis Jiova? Komo itech Biblia amo senkis moajsi se tanauatil tein kinextia toni moneki tikchiuaskej itech se taman, moneki tiktemoskej tikajsikamatiskej katiyejua itanejnekilis Dios. ¿Keniuj uelis tikmatiskej? Komo tiktataujtiaj uan tikauaj maj iespíritu techixyekana. Jesús nochipa mochikauaya kimatis tein Jiova kinekia maj kichiua. Kemej neskayot, Biblia ika tajtoua ome tonal keman Jesús kimiakiltij takual tein ika kintamakak miakej, sayoj ke achto kichiuak netataujtil (Mat. 14:17-20; 15:34-37). Sayoj ke keman mayanak ijkuak moajsia taluakyan uan Amokuali kinauatij maj seki tet kikepa pan, yejua amo kinekik kichiuas (Mat. 4:2-4). ¿Keyej? Porin kuali kiixmatia iPopaj uan kimatia ke amo kiyolpaktiskia maj kitekitilti yektikatsin espíritu kemej sayoj yejua mopaleuiskia. Senkis kimatia ke Dios kiixyekanaskia uan kimakaskia takual keman monekiskia. w16.05 3:7, 8

Seki tajkuilolmej tein kipia Biblia kinijkuilouilijkej sayoj se oso seki taltikpakneminij. Yejua ika achto ke tikixtajtoltiskej, maj tiktajtanikan Jiova maj techpaleui maj tikpiakan se kuali tanemilil uan maj techmaka tamatilis tein techpaleuis maj tikitakan tein kineki techmachtis (Esd. 7:10; Sant. 1:5). Keman tikixtajtoltiskej Biblia, uelis timochiuiliskej nejin netajtanilmej: “¿Toni nechmachtia nejin kemej tanemilia Jiova? ¿Keniuj uelis nechpaleuis itech nonemilis? ¿Keniuj uelis ika nikinpaleuis oksekin?”. Komo itech titanemiliaj nejin netajtanilmej, okachi tiktemoskej keniuj techpaleuis tein tikixtajtoltiskej itech Biblia. Maj tikitakan se neskayot. Biblia kitekpana seki taman tein moneki kichiuaskej tayekananij itech nechikol (1 Tim. 3:2-7). Melauak ke timiakej amo titapaleuiaj kemej tayekananij. Yejua ika xa tiknemiliskej ke nejin tajkuilolmej amo semi techpaleuiaj. Sayoj ke uelis techpaleuiskej tinochin. w16.05 5:7, 8

Keman judíos kinuikakej Babilonia, kiitakej ke ompa onkayaj miakej tiotsitsin uan taltikpakneminij kinueyichiuayaj amokuali ejekamej. Sayoj ke seki judíos kisentokakej kitakamatkej Jiova uan amo kichiujkej kemej akin ompa nemiaj. Sekin katkaj Daniel uan eyi itasojikniuan (Dan. 1:6, 8, 12; 3:16-18). Nejin naui telpochmej kiitakej Jiova kemej Sokikonchiujkej akin monekia kitakamatiskej uan sayoj yejuatsin kiueyichiujkej. Maski Daniel nemik tel miak xiujmej itech nejon altepet, se ángel kijtoj ke Daniel katka se takat akin kitelpiaya ipatiuj (Dan. 10:11, 19). Ne uejkauj, se sokikonchiujkej uelia kikalakiaya sokit itech se teisa tein kichiuaya maj tapalkat mokaua kemej yejua kinekia. Axkan, akin yekmelauj tikchiuaj kemej Cristo tikmatij ke kemej Jiova Tekiuaj itech iluikak uan taltikpak, kinamiki kichiuas maj itech altepemej kichiuakan tein yejuatsin kiyolpaktia (Jer. 18:6). Jiova no kinamiki kichiuas maj tisejsemej tikchiuakan tein kiyolpaktia. Sayoj ke amo techchikaujkauia maj timopatakan, ta kineki maj tejuan tikixejekokan ox timokauaskej maj techpaleui maj timopatakan. w16.06 2:1, 2

Satanás kineki maj tiknemilikan ke sayoj uelis tiyolpakiskej komo tikpiaj miak taman. Yejua ika kikui tein onkak nikan taltikpak uan “taixnejnekilis” uan ika kitemoua maj nochipa tiknejnekikan tikpiaskej miak taman (1 Juan 2:15-17; Gén. 3:6; Prov. 27:20). Nochipa tikitaj uan tikakij tanauatilmej tein kitemouaj techtanejnektiskej maj tikouakan tein yankuik kisa. ¿Kemansa tikouanij teisa sayoj porin kualtsin moitaya oso porin kiteixmatiltijtoyaj kansaika? Komo ijkon, xa satepan tikitakej ke amo yekmelauj techpolouaya. Komo tiksentokaj tikouaj tein amo techpoloua, timoouijtiskej. Nejon uelis kichiuas maj amo semi tiktekitilikanok Jiova. Kemej neskayot, xa amo semi tiueliskejok timomachtiskej Biblia, timomachtiskej tein tikitaskej itech nechikol uan tiyaskej, uan amo semi tikisaskejok titanojnotsatiuij. Maj tikelnamikikan ke tatitanil Juan tanejmachtij ke ixpoliuis tein onkak nikan taltikpak uan nochi taman tanejnekilis. w16.07 1:3, 4

Itech yekinika siglo, miakej itatojtokakauan Cristo katkaj judíos, griegos, romanos oso kayomej itech okseki uejueyi altepemej. Tataman tanemilil kipiayaj uan tataman kemej nemiaj. Yejua ika sekin kinouijmakaya kichiuaskej tein momachtijtoyaj oso kipataskej kemej monejnemiltiayaj. Yejua ika tatitanil Pablo monekik kinelnamiktis ke tikpiaj sayoj se Dios, Jiova. ¿Toni panoua itech nechikol itech nejin tonalmej? Tanauatijkej Isaías kijtoj ke “itech itamian tonalmej” taltikpakneminij akin kayomej itech nochi altepemej kisenueyichiuaskiaj Jiova. Yejuan kijtoskiaj: “Yejuatsin techmachtis iojuan, uan tinentinemiskej itech iojuan” (Is. 2:2, 3). Semi techyolpaktia tikitaskej keniuj mochiujtokya nejin tein moijtoj ne uejkauj. Axkan, tokniuan kayomej itech tataman altepemej uan tajtouaj tataman tajtolmej. Sayoj ke tinochin tiksenueyichiuaj Jiova. w16.06 3:15, 16

Amo ueli tiknemiliaj nochi tein kuali tein Jiova kinmakas taixpejpenalmej keman taixyekanaskej iuan Cristo ompa iluikak (Luc. 22:28-30; Filip. 3:20, 21; 1 Juan 3:2). Yejuan yeskij “in yankuik pueblo de Jerusalén” uan “tesiuajtanti ten monamiktiti” iuan Cristo (Apoc. 3:12; 17:14; 21:2, 9, 10). Yejuan sentekitiskej iuan Cristo “keman kinpajtiskej altepemej”. Nejin kijtosneki ke kinpaleuiskej taltikpakneminij maj amo kipiakanok tajtakol nion maj momikilikanok (Apoc. 22:1, 2, 17, TNM). Se taman kemej Jiova okachi kinextis iueyi teiknelilis yejua keman kinajokuis akin momikilijkejya (Job 14:13-15; Juan 5:28, 29). ¿Akonimej oksepa nemiskej? Sekin yeskij itekitikauan Dios akin amo kikaujkej akin momikilijkej achto ke Cristo momikiliskia. No moajokuiskej ‘okseki ichkamej’ akin momikiliskej itech itamian tonalmej. Nochin yejuan oksepa nemiskej uan kisentokaskej kitekitiliskej Jiova (Juan 10:16). w16.07 4:13-15

Tiksentokaskej titachixtoskej komo yekmelauj tiknejnekij tikchiuaskej tein kuali. Uan amo sayoj nejon. Seki tonalmej achto ke momikiliskia, Jesús kiniluij imomachtijkauan ke monekia kisentokaskej kitajtaniskej Jiova maj kinpaleuiani (Luc. 21:36). No techpaleuis komo nochipa tiktataujtiaj Jiova (1 Ped. 4:7). Keman Jesús ika tajtoj poliuilis, kiniluij itatitaniluan: “Nimoualuikas ya kuak namejuan amo nanyoltanemilijtoske” (tejuan tiktalilijkej cursivas; Mat. 24:44). Yejua ika nochipa moneki titachixtoskej. Moneki amo tiktemojtoskej tein onkak nikan taltikpak kampa Satanás taixyekana, maski miakej kichiuaj maj tiknemilikan ke nejon techualkuilis yolpakilis. Jiova uan Jesús techiluiaj itech Biblia toni techpaleuis maj titachixtokan. Yejua ika, moneki tikitaskej toni kijtojka Biblia ke mochiuaskia uan keniuj mochiujtok. Maj tiksentokakan tikchikaujtokan tokuali uikalis iuan Jiova uan maj tiktayekanaltikan iTekiuajyo. Ijkon, tikchiujtoskej tein moneki keman ejkos poliuilis (Apoc. 22:20). Nejon techpaleuis maj timakisakan. w16.07 2:15-17

¿Toni kinpaleuis namikuanij maj nochipa kuali mouikakan? Kemej takat uan siuat tajtakouanij, mopoloskej uan kipiaskej kuejmolmej. Sayoj ke nejin uelis kinpaleuis maj amo oksepaok kichiuakan, maj motapojpoluikan uan maj kisentokakan monextilikan netasojtalis tein ‘kinsepanpoualtia se uan okse’ (Col. 3:14). Yejua ika namikuanij moneki amo yolijsiuiskej uan yeskij kualtakamej, uan amo moelnamikiliskej ininnepololuan (1 Cor. 13:4, 5). Moneki mochikauaskej niman kiyektaliskej tein yeski kuejmol, achto ke tamis tonal (Efes. 4:26, 27). Komo se yolyemanik uan se yolchikauak uelis se kijtos: “Xinechtapojpolui porin nimitsyolxokolij”. Nejon kinpaleuia namikuanij maj kiyektalikan kuejmolmej uan maj okachi kuali mouikakan. w16.08 2:6

Jesús semi mochikauak kiteixmatiltis tein kuali tein kichiuas iTekiuajyo Dios. Sayoj ke no kinmachtiaya itatojtokakauan maj kuali tamachtianij uan maj kinyekpianij itekitikauan Dios (Mat. 10:5-7). Felipe katka se itatojtokakauj Cristo akin nochipa tanojnotsaya. Sayoj ke no kinnextilij iichpochuan keniuj tanojnotsaskej (Hech. 21:8, 9). Axkan, tejuan no moneki tikinnextiliskej oksekin keniuj kichiuaskej tekit. ¿Keyej? Itech nochi nechikolmej semanauak taltikpak moajsij miakej akin yankuixtok peuak momachtiaj Biblia uan ayamo moauiaj. Yejuan moneki maj se kinpaleui maj kiajsikamatikan keyej moneki momachtiskej Biblia ininselti. No moneki tikinnextiliskej keniuj tanojnotsaskej uan keniuj tamachtiskej. Tokniuan akin yankuixtok moauijkej no moneki se kinnextilis maj kichiuakan seki tekimej tein kinpaleuis maj se tonal mochiuakan tapaleuianij uan tayekananij. Nochin tokniuan itech nechikol uelis kinpaleuiskej akin yankuikej. w16.08 4:1, 2

Titekitiskej iniuan tokniuan techpaleuia maj okachi kuali timouikakan iniuan uan maj nejon kuali uikalis uejkaua. No kichiua maj okachi titakuaujtamatikan itech tatiochiualismej tein Dios amo uejkaua techmakas ika iTekiuajyo. Keman tikchikauaj ininmauan oksekin, tikinpaleuiaj maj kixikokan kuejmolmej uan maj kisentokakan kichiakan kiseliskej tein kuali (Is. 35:4). No ijkon, nejon kichikaua tomauan uan techpaleuia maj okachi itech titanemilikan tein tikseliskej satepan. Keman tiknemiliaj keniuj Jiova kinpaleuij uan kinmatampauij itekitikauan ne uejkauj akin amo keman kikaujkej, okachi titakuaujtamatij iuan. Yejua ika, keman tikpiaskej kuejmolmej uan timoteltekipachoskej, maj amo tikauakan maj temokan tomauan (Sof. 3:16). Uelis tikyekmatiskej ke komo tiktajtaniaj Jiova maj techpaleui, imay tein kipia chikaualis techyolchikauas uan amo uejkaua techkauas maj tikselikan tatiochiualismej tein kiualkuis iTekiuajyo (Sal. 73:23, 24). w16.09 1:16-18

Keman tikixpejpenaj keniuj timotakentiskej, tiitekitikauan Dios tikelnamikij nejin tajkuilol. Amo sayoj se taman tilmaj uelis timotaliliskej komo timoajsij kampa tel tona oso taseseya oso tikchiujtokej okseki taman. Sayoj ke itanauatiluan Jiova amo keman mopataj (Mal. 3:6). Itech altepemej kampa tel tona uelis teouijmakas se kiajsis tilmaj tein kuali moita. Tokniuan takamej uan siuamej kitasojkamatij maj amo timotalilikan tilmaj tein tel kopitstik oso tein tel kakapaxtik tein kichiua maj moita tonakayo (Job 31:1). Hasta komo timoakalakitij kansaika, moneki timotaliliskej tilmaj tein kuali tepiki (Prov. 11:2, 20). Miakej akin amo kitekitiliaj Jiova motaliliaj tilmaj tein kitelnextia ininnakayo. Sayoj ke tejuan moneki tikyekitaskej maj totilmaj kiueyitali Jiova, Dios akin yektik. w16.09 3:11, 12

Jesús kintajtaniaya itatitaniluan tein kinemiliayaj. Tejuatsin uelis tikonchiuas kemej yejua. ¿Keniuj? Keman tiontajtojtos oso tikonchiujtos teisa iniuan mokoneuan, xikontajtani toni kinemiliaj uan xikonkaua maj mitsoniluikan tein yekmelauj kinemiliaj. Komo kinouijmaka kineltokaskej teisa tein tamachtia Biblia, amo xionyolijsiui. Xikonpaleui maj kinankilikan ininnetajtaniluan. Semi kuali maj mokoneuan mitsonchiuilikan netajtanilmej, porin nejon kijtosneki ke kinekij kimatiskej okachi. Hasta Jesús kichiuak netajtanilmej keman katka se okichpiltsin (Luc. 2:46). Kuali xikonixmati mokoneuan. Amo xikonnemili ke yejuan takuaujtamatij iuan Jiova sayoj porin youij nechikolmej uan tanojnotsatij. Xionmochikaua tikonmatis ox onkak teisa tein kichiua maj ouij kinkisa kitakamatiskej Jiova. Mojmostaj iniuan ika xitajto Dios keman nankisenchiujtoskej teisa. Xikontajtani Jiova maj kinpaleui keman iniuan tionyetos uan keman moselti tionyetos. w16.09 5:3-5

Itech nejin tonalmej, miakej itaixpantijkauan Jiova tapaleuijtokej maj mochiua tein kijtoua Apocalipsis 14:6. Nejin tajkuilol kijtoua ke tein kichiuas iTekiuajyo Dios kinmatiltiskiaj nochin taltikpakneminij. Miakej nejin tokniuan momachtijtokej okse tajtol. Sekin tekitij kemej misioneros oso tapaleuitoj itech altepemej kampa monekij okachi tanojnotsanij. Oksekin peua youij nechikolmej kampa motajtoua okse tajtol itech altepet kampa nemij. Nochin itekitikauan Dios kiitaj ke okachi moneki kiyekpiaskej kuali uikalis tein yejuan uan ininchankauan kipiaj iuan. Kemansa xa tikpiaj miak tekit uan ouij techkisa tikxeloskej tiempo keman timomachtiskej Biblia toselti. Sayoj ke tokniuan akin tapaleuiaj itech se nechikol kampa motajtoua okse tajtol no kipiaj okseki ouijkayomej. Amo sayoj moneki ueliskej se yankuik tajtol, ta no moneki nochipa momachtiskej tamachtilismej tein okachi ouijkej tein kipia iTajtol Dios (1 Cor. 2:10). w16.10 2:1-3

Axkan, miakej tokniuan yolpakij kitekitiliskej Jiova maski kintajyouiltijtokej. Tel miakej tsaktokej ompa Eritrea, Singapur uan Corea del Sur porin amo kinekij kikuiskej teposmej tein ika temiktiskej. Okachi miakej tokniuan amo tsaktokej nion kintajyouiltiaj. Sayoj ke miakej tajyouiaj porin kipanouaj tatasojtilis, mochiuaj tetsaujmej oso neteuilismej itech ininaltepeuj. Oksekin kichiuaj kemej Abrahán, Isaac, Jacob uan Moisés uan kikauaj kuali nemilis tein kipiayaj uan amo kitemouaj moteixmatiltiskej itech nejin taltikpak. ¿Toni kinpaleuia maj kitekitilikan Jiova ika yolpakilis? Netasojtalis tein kipialiaj uan porin senkis takuaujtamatij ke kichiuas nochi tein motenkauak. Kimatij ke Jiova kinmakas itekitikauan akin amo kikauaj nemilis nochipaya itech yankuik taltikpak. Ijkuak, amo akin kichiuasok tein amo kuali (Sal. 37:5, 7, 9, 29). w16.10 3:15, 16

Keman Jeremías mouik uan kinekia mosenkauas, Jiova kiluij ke kipaleuiskia (Jer. 1:6-10). Jiova no kiyolchikauak Daniel akin xiuejya katka keman kititanik se ángel. Nejin ángel kiluij ke katka se takat akin Dios kiteltasojtaya (Dan. 10:8, 11, 18, 19). ¿Uelis tikchiuaskej kemej Jiova uan tikinyolchikauaskej tokniuan, kemej akin kichiuaj tekit kemej precursor uan tokniuan akin xiuejkejya akin amo semi ueli kitekitiliajok? Jiova uan Jesús senyetoyaj miak xiujmej ompa iluikak. Maski ijkon, Jiova kimatia ke monekia kisentokas kiyolchikauas iKonetsin keman yetoskia nikan taltikpak. Yejua ika, ojpa ualpantajtoj uan kijtoj: “Nijin Notasojkonetsin tenika semi nimoyolpakiltia” (Mat. 3:17; 17:5). Jesús semi moyolchikauak keman kikakik ke iTajtsin kitasojtaya uan kiluiaya ke kuali tein kichiujtoya. Jiova no kiyolchikauak Jesús youak achto ke momikiliskia. Kemej Jesús semi motekipachojtoya, Jiova kiualtitanik se ángel maj kiyolchikauaki uan maj kiyolseuiki (Luc. 22:43). w16.11 1:7, 8

Kemansa techouijmaka amo niman tikualaniskej keman aksa techyolxokolia oso techchiuilia tein amo kuali porin okseko tikayomej, amo tiixtamatij kemej yejua oso taman kemej timoitaj. Nejin uelis okachi techyolxokolis komo se tokniuj techchiuilia nejon. Maj tiknemilikan nochi kuejmolmej tein amo tikpiaskej komo amo niman tikualanij (Prov. 16:32). Biblia no techiluia maj tikintapojpoluikan oksekin. Jesús kijtoj ke komo amo titetapojpoluiaj, Jiova amo no techtapojpoluis (Mat. 6:14, 15). ¿Moneki okachi amo tiyolijsiuiskej uan okachi tiknekiskej titetapojpoluiskej? Komo niman timoyolxokoliaj, uelis nochipa tikualantoskej uan hasta tiktauelitaskej aksa. Hasta uelis tikchiuaskej maj okseki tokniuan no momachilikan kemej tejuan uan xa amo kinekiskejok mouikaskej touan (Lev. 19:17, 18). w16.11 3:4-6

Kemej kinekiaj momachtiskej Biblia, itech xiuit 1870, Charles Taze Russell uan okseki taltikpakneminij peuak momachtiaj Biblia ika miak nejmachkayot. Yekinika, tokniuj Russell kinekik kimatis katiyejua taneltokalis tamachtiaya tein melauak. Ika nejmachkayot kiitak tein tamachtia Biblia ika tein tamachtiayaj itech miakej taneltokalismej kampa kijtouaj ke kitojtokaj Cristo uan kampa amo. Niman kiitak ke itech nion se taneltokalis motamachtiaya tein yekmelauj kijtoua iTajtol Dios. Se tonal, iniuan tajtoj akin taixyekanayaj itech tataman taneltokalismej uan kiniluij tein yejua uan akin iniuan momachtiaya kiajsikaj itech Biblia. Yejua kichiaya maj nejon taixyekananij kiselianij nejin tamachtilismej uan maj yejua nejon tamachtianij itech inintiopan. Sayoj ke amo kinekkej. Momachtianij ika Biblia niman kiajsikamatkej ke amo ueliaj kiueyichiuayaj Dios iniuan akin pouiaj itech taneltokalis tein amo melauak. w16.11 4:14

Tejuan tikixtopeuaj auilnemilis, tauanalis uan okseki uejueyi tajtakolmej. Sayoj ke komo tiktasojkamatij iueyi teiknelilis Dios, no amo tikchiuaskej tein yeski taman tein amo kiyolpaktia (1 Cor. 6:9-11). Kemej neskayot, amo sayoj amo tiauilnemij, ta no amo timoixpetaniaj ika tein pitsotik. Uan amo sayoj amo titauanaj, ta no amo titeltayij tayil tein teuintij. Xa techouijmakas amo tikchiuaskej nejin, sayoj ke uelis tikixtopeuaskej. Melauak ke amo ueli senkis tikixtopeuaj tajtakol. Sayoj ke keman timochikauaj amo tikchiuaskej nion se taman tajtakol tiknextiaj ke tiktasojkamatij ueyi teiknelilis Jiova. Maj timochikauakan tiktakamatiskej nejin tayolmajxitilis tein kitemakak Pablo: “Amo xiktakauilikan ok ne tajtakol ke ma namechmapachojtiu tech namotakayo. Uan amo no [...] ma namechyoltanejnekiltij” (Rom. 6:12; 7:18-20). w16.12 1:19-21

Jesús motenkauak ke toTajtsin techmakas iespíritu komo tiktajtaniaj (Luc. 11:10-13). ToDios akin nochi ueli kichiua techpaleuia maj tiknextikan kualtsitsin kualneskayomej tein yejuatsin kipia ika iyektikatsin espíritu (Col. 3:10). Itech Biblia moixmatij nejin kualneskayomej kemej itakilo espíritu. Keman tiknextiaj nejon kualneskayomej, okachi kuali timouikaj iniuan oksekin uan amo tikchiuaj tein uelis techtekipachos. Moneki tiyeskij tiyolyemankej porin nejon techpaleuis maj timotemaktikan “imako Dios porin Yejuatsin nochi kipixtok chikaualis” uan maj tikauilikan nochi tein techtekipachoua (1 Ped. 5:6, 7). Komo tiyolyemankej, Jiova techyekpias. Keman tikajsikamatij ke seki taman ueli tikchiuaj uan okseki taman amo, tiknextiaj ke amo totech titakuaujtamatij. Nejon techpaleuia maj amo semi timotekipachokan porin titakuaujtamatij iuan Jiova (Miq. 6:8). w16.12 3:7, 12

Ika takuaujtamatilis, Noé kiteixmatiltij tein Jiova yaya kichiuati. Tikyekmatij ke nejin kipaleuij maj chikauak moajsini itakuaujtamatilis. No kitakamatik Jiova keman kinauatij keniuj kichijchiuaskia arca (Heb. 11:7). Kemej Noé, tejuan no okachi tikchiuaj “tekitsin ten Totekotsin Cristo technauatilij” (1 Cor. 15:58). Kemej neskayot, sekin titapaleuiaj maj mochijchiua uan maj moyektali Kalmej kampa tiMosentiliaj uan Kalmej kampa mochiuaj Uejueyi Nechikolmej. Oksekin titapaleuiaj keman mochiuaj uejueyi nechikolmej, titapaleuiaj itech sucursales oso itech se Kali kampa Motajtolkepaj Amaixmej. Sayoj ke okachi titanojnotsaj, porin nejin kichiua maj okachi titakuaujtamatikan itech tein tikchiaj tikseliskej. Tein melauj, techpaleuia maj tiksentokakan timochikauakan tikseliskej nemilis nochipaya (1 Cor. 9:24). w17.01 1:8, 9

Oksekin no ueli ininselti taixpejpenaj uan moneki tikpoujkaitaskej nejon. ¿Keyej? Porin tinochin techmakakej nejon netetayokolil. Yejua ika, moajsikamati maj okseki tokniuan amo taixpejpenakan kemej tejuan. Nejin uelis panos hasta itech seki taman tein mouika ika totaueyichiualis uan kemej timonejnemiltiaj. Tisejsemej akin tikchiuaj kemej Cristo titanankiliskej ika tein tikchiuaskej. Komo tikajsikamatij nejin, tikpoujkaitaskej tein oksekin kiixpejpenaskej hasta itech seki taman tein amo motelneki (1 Cor. 10:32, 33). Maj toselti tiuelikan titaixpejpenakan se netetayokolil tein Jiova techmaka (2 Cor. 3:17). Tikpatiuitaj nejin netetayokolil porin techkaua maj tiknextikan ika tein tikixpejpenaj ox tiktasojtaj Jiova. Maj tikixpejpenakan tein kiueyitalis uan maj tikpoujkaitakan tein oksekin kiixpejpenaskej. Ijkon tiknextiskej ke tikpatiuitaj nejin tel kualtsin netetayokolil. w17.01 2:15, 17, 18

Moneki amo timoueyinekiskej nion tiktemoskej tiknextiskej ke okachi tiueyichiuanimej ke oksekin, ta ‘tiyolyemankanemiskej uan tiyolseujtinemiskej’ (1 Ped. 3:3, 4; Jer. 9:23, 24). Komo amo tiyolyemankej, kemej titajtouaj uan timonejnemiltiaj se tonal kinextis ke tikmachiliaj ke tiueyichiuanimej. Kemej neskayot, ¿tiktemouaj maj oksekin kinemilikan ke tiueyichiuanimej ika tein tikchiuaj, ika tein tikmatij oso porin tikinixmatij seki tokniuan? ¿Oso tiktemouaj maj oksekin kinemilikan ke toselti tikchiujkej se taman tein motelneki, maski tein melauj oksekin techpaleuijkej? Jesús ueliskia kichiuas maj taltikpakneminij kimoujkaitanij porin kimatia miak taman. Sayoj ke amo kichiuak nejon, ta miakpa ika tajtouaya iTajtol Dios porin amo kinekia maj taltikpakneminij kiueyitalianij yejua, ta Jiova. w17.01 4:12

Nejin tanauatil amo kinouijmakaya kiajsikamatiskej nion ouij kinkisaya kitakamatiskej, porin itech xochital onkaya okseki miak taman takilomej tein uelik tein ueliskia kikuaskej. Ika se kouat, Satanás kikajkayauak Eva uan kichiuak maj amo kitakamatini iTajtsin, Jiova (Gén. 3:1-5; Apoc. 12:9). Kichiuak maj moitani ke amo kuali yetoya maj Dios amo kinkauani ikoneuan nikan taltikpak maj kikuanij “itakilo nochi koujmej tein moajsij itech xochital”. Kemej yeskia kijtoj: “¿Yekmelauj amo ueli nankichiuaj tein nankinekiskej?”. Satepan kikajkayauak Eva ika nejin tajtolmej: “Yekmelauj amo nanmikiskej”. Ompa kitemoj kichiuas maj kineltoka ke amo monekia kitakamatis Dios. Yejua kiluij: “Dios kimati ke itech tonal keman nankikuaskej koujtakilot, nanixtajtapouiskej”. Ika nejin tajtolmej, Satanás kiteajsikamatiltij ke Jiova amo kinekia maj kikuanij koujtakilot porin komo kikuayaj kinmakaskia se taman taixmatilis tein amo keman kipiaskiaj. Uan ika tamik, Satanás motenkauak nejin tein amo melauak: “Nanmochiuaskej kemej Dios, uan nankiixmatiskej tein kuali uan tein amo kuali”. w17.02 1:8, 9

Isaías kijtoj ke nejin tanauatijkej mochiuaskia se “taixyekankej uan akin kinyekana tateuianij” (Is. 55:4). Daniel ika tajtoj keman ejkoskia “Mesías Tayekankej” (Dan. 9:25). Uan Jesús kijtoj ke yejua katka ‘iTayekankauj’ ixolal Dios (Mat. 23:10). Imomachtijkauan kitojtokakej ika yolpakilis, uan kiyekmatiaj ke Jiova kiixpejpenka maj kiixyekana ixolal (Juan 6:68, 69). ¿Keyej kiyekmatiaj nejon? Keman Jesús moauij, Juan Taauijkej kiitak ke tatapouik itech iluikak uan “kitak in [y]ektikatsin [e]spíritu ual temoaya keme se tototsin paloma” uan motalij itech Jesús (Mar. 1:10-12). Keman Jesús moajsia nikan taltikpak, yektikatsin espíritu kipaleuij maj tamachti uan maj kichiua uejueyi tachiualismej (Hech. 10:38). Uan no, kipaleuij maj kinexti kualneskayomej kemej netasojtalis, yolpakilis uan takuaujtamatilis (Juan 15:9; Heb. 12:2). Nion se taixyekankej senkis kinextij ke kipiaya iyektikatsin espíritu Dios. Senkis nesia ke Jiova kiixpejpenka Jesús kemej Taixyekankej. w17.02 3:15, 16

Itech Pentecostés itech xiuit 33, tatitanilmej peuak taixyekanaj itech nechikol kampa kichiuaj kemej Cristo. Biblia kijtoua ke “Pedro moketsak intsalan in okse majtaktionsenme” uan kinmachtij tel miakej tein ueliskia kinpaleuis maj makisakan (Hech. 2:14, 15). Miakej peuak kitojtokaj Cristo. Uan satepan, nejin yankuik tokniuan “momachtijtiayaj uan kitakamatiayaj nochi in tajtolme ten in tatitanilme de Jesús kinnextiliayaj” (Hech. 2:42). Tatitanilmej kiitayaj keniuj motekitiltis tomin itech nechikol (Hech. 4:34, 35). Uan no, tamachtiayaj itech ixolal Dios uan kitataujtiayaj maj kinpaleui nochin tokniuan. Yejuan kijtojkej: “Tejuan tiksentokatij timotatautilitij iuan Dios, uan titamachtijtinemiske ika in Tajtoltsin de Dios” (Hech. 6:4). No kinixtaliayaj tokniuan akin kuali tanojnotsayaj maj tanojnotsatij kampa amo keman akin yajtoya (Hech. 8:14, 15). Satepan, okseki tayekananij taixpejpenalmej kinpaleuijkej tatitanilmej maj kinyekpianij tokniuan itech nechikolmej. Nochin nejin tayekananij mopoujkej iniuan oloch taojtokaltianij, akin kinixyekanayaj nochi nechikolmej (Hech. 15:2). w17.02 4:4

Tel miakej moyekanaj ika tanemilil tein miakej kipiaj itech nejin taltikpak kampa taixyekantok Satanás. Kemej neskayot, kinitaj seki takamej uan siuamej kemej inintiotsitsin uan kintelueyitaliaj. Sekin motakentiaj uan monejnemiltiaj kemej akin kintelixmatij, kemej taixyekananij itech tekiuajyot oso itech taneltokalis, akin nesij itech televisión oso mauiltianij. Akin yekmelauj tikchiuaj kemej Cristo tikmatij ke amo kuali yetok maj tikinueyitalikan okseki taltikpakneminij. Nikan taltikpak sayoj nemini se takat akin techkauilij se tel kuali neskayot: Cristo (1 Ped. 2:21). Maj tikelnamikikan ke “tinochin timotajtakolmakakke [...] uan uejka tinentinemiaj de ne chipaukanemilis ten Dios kimonekiltia” (Rom. 3:23). Yejua ika nion se taltikpaknenkej kinamiki maj kiueyichiuakan. w17.03 1:6-8

¿Keniuj tikmatij ox tiktekitilijtokej Jiova ika nochi toyolo? Uelis timotajtaniskej: “¿Niktakamati Jiova hasta keman ouij nechkisa? ¿Senkis nikixtalijtok nitapaleuis maj nechikol moajsi chipauak?”. Kemej neskayot, ¿toni tikchiuaskiaj komo se tochankauj oso se totasojikniuj kikalankixtiaj itech nechikol? ¿Amo iuan titajtoskiajok? ¿Toni techoliniskia toyolo maj tikchiuakan? Kemej Asá, kemansa uelis tikmachiliskej ke nochin techixnamikij. Xa akin iniuan timomachtiaj oso tamachtianij techpijpinaujtiaj porin tiitaixpantijkauan Jiova. Oso xa akin iniuan titekitij techkejkelouaj keman amo titekitij seki tonalmej porin tiyouij se ueyi nechikol oso porin amo titekitij okachi horas uan ijkon okachi titataniskej. Keman panos nejon, maj titakuaujtamatikan iuan Dios ijkon kemej Asá (2 Crón. 14:11). Maj tiktataujtikan Jiova, maj tiyolchikaujkej uan maj tiksentokakan tikchiujtokan tein kuali. Maj tikelnamikikan ke Jiova techyolchikauas kemej kiyolchikauak Asá. w17.03 3:6-8

Biblia techyolmajxitia maj amo ijsiujka tikixpejpenakan se taman tein motelneki. Moneki titanemiliskej ika nejmachkayot itech nochi tein iuan mouika. Ijkon uelis tikixpejpenaskej tein okachi kuali (1 Tes. 5:21). Kemej neskayot, takamej akin kipiaj ininnamik moneki kitemoskej tein kijtoua Biblia uan amaixmej achto ke taixpejpenaskej. No kuali yeskia maj kikakikan tein ininchankauan kinemiliaj. Maj tikelnamikikan ke Dios kiyolmajxitij Abrahán maj kikakini inamik (Gén. 21:9-12). Tayekananij no moneki kiixtaliskej kemanian momachtiskej. Keman kiajsij yankuik tamachtilis tein kinextia ke moneki kipataskej tein kiixpejpenkaj, kichiuaj uan amo kimouiliaj maj tokniuan amo kinpoujkaitakanok. Tayekananij akin kipataj tein kiixtaliaj uan yolyemankej moneki kipataskej kemej tanemiliaj uan tein kiixpejpenkej komo moneki. Kuali yeskia maj tinochin tikchiuakan kemej yejuan, porin nejon tapaleuis maj onka yolseuilis itech nechikol uan maj amo tixexeliujtokan (Hech. 6:1-4). w17.03 2:16