Noviembre

Satanás kijtoj ke taltikpakneminij sayoj kitekitiliaj Dios porin kinmaka miak taman tein kuali (Job 2:4, 5). Miak xiujmej satepan, keman Satanás kikalankixtijkej iluikak, kisentokaya kintakajkayauiliaya itekitikauan Dios akin amo kikauaj (Apoc. 12:10). Uan axkan kisentoka kijtoua ke sayoj tikueyichiuaj Dios porin techmaka miak taman tein kuali. Kitelneki maj tikixtopeuakan Dios kemej taixyekankej uan maj amo tiksentokakan tiktekitilikan. Yejua ika, keman tikpanoskej se kuejmol, uelis tiknemiliskej nejin. Sekopa moajsi Satanás uan iamokuali ejekauan, techitstokej uan kijtojtokej ke timosenkauaskej. Oksekopa moajsi Jiova, totekiuaj Jesucristo, taixpejpenalmej akin moajokkejya uan tel miakej ángeles. Yejuan no techitaj, sayoj ke techyolchikauaj maj amo timosenkauakan. Yolpakij kiitaskej ke amo tikauaj Jiova uan tiksentokaj titaxikouaj. Ompa Jiova techiluia tein moajsi itech tajkuilol tein axkan tikitaj. w16.04 2:8, 9

Komo moyektalia kuejmol tein tikpiaj iuan tokniuj, tikpaleuiskej. Sayoj ke ¿komo miakpaya iuan titajtojkej uan ayamo ueli tikyektaliaj kuejmol? Sayoj ijkuak tikiniluiskej tayekananij. Amo nochipa moneki se kichiuas nochi eyi taman tein kijtoua Mateo 18:15-17. ¿Keyej? Porin miakpa, akin tajtakoj kiajsikamati ke mopoloj uan kiyektalia kuejmol, yejua ika amo moneki kikalankixtiskej itech nechikol. Uan tokniuj akin kichiuilijkej tein amo kuali moneki kitapojpoluis uan ijkon kisentokaskej kuali yetoskej. Nejin techyolchikaua. Senkis nesi ke keman Jesús tayolmajxitij maj amo niman se tajto iniuan tayekananij semi tapaleuia uan ika se kinextia netasojtalis. Sayoj moneki tikintajtaniskej ininnepaleuil komo tikchiujkejya yekinika ome taman tein kijtoj Jesús uan komo onkak tein senkis kinextia ke tokniuj kichiuak teisa tein amo kuali. w16.05 1:15, 16

Sayoj tikpaleuiaj iTekiuajyo Dios. Komo tikpaleuiskiaj se taltikpaktekiuajyot, ¿keniuj ueliskia tikinyekiluiskej taltikpakneminij ke sayoj iTekiuajyo Dios kiyektalis kuejmolmej tein tikpiaj? Uan no, nejon tapaleuia maj amo tixexeliujtokan iniuan tokniuan itech nochi taltikpak. Taneltokalismej tein amo melaujkej kinxexelouaj taltikpakneminij porin kinpaleuiaj tataman tekiuajyomej (1 Ped. 2:17). Ijkon kemej okachi motokijtiuits tonal keman ixpoliuis nochi tein Satanás kiixyekana, okachi techouijmakas amo tikpaleuiskej nion se tekiuajyot. Itech nejin tonalmej taltikpakneminij amo kinekij kipataskej inintanemilil uan amo kitemouaj tepaleuiskej. Uan ijkon kemej panotiyaskej tonalmej okachi xexeliujtoskej (2 Tim. 3:3, 4). Uan no, ijsiujka uelis mopatas kemej motaixyekana itech se tekiuajyot. Nejin panouaniya itech seki altepemej, uan tokniuan kipanouanij uejueyi ouijkayomej. Yejua ika moneki axkan tikchiuaskej nochi tein techpaleuis maj tiksentokakan amo tikpaleuikan nion se tekiuajyot hasta keman okachi ouij yeski. w16.04 4:3, 4

Sekin kinemiliaj ke uelis kiixpejpenaskej tein yeski uan amo teyi panos. Sayoj ke tejuan tiknekij tikixpejpenaskej tein kiyolpaktis Jiova. Yejua ika, achto ke tikixpejpenaskej teisa, moneki tiknemiliskej toni kijtoua Biblia uan satepan tiktakamatiskej. Kemej neskayot, Biblia kijtoua keniuj Jiova kiita esti. Uan tejuan no ijkon titanemiliaj (Gén. 9:4; Hech. 15:28, 29). Uelis tiktajtaniskej Jiova maj techpaleui maj tikixpejpenakan tein kiyolpaktis. Komo kuali titaixpejpenaj, okachi kuali timouikaskej iuan Jiova. Komo amo kuali titaixpejpenaj, uelis tikijtakoskej tokuali uikalis iuan. Uan no, komo amo kuali titaixpejpenaj, uelis tikinkuejmoloskej tokniuan oso tikchiuaskej maj amo semi takuaujtamatikanok uan maj moxexelokan. Kemej tikitaj, semi moneki maj kuali titaixpejpenakan (Rom. 14:19). w16.05 3:4, 5

Xa amo nochipa ueli tikixtajtoltiaj ika nejmachkayot sejse amaix tein tikseliaj. Sayoj ke uelis tikyekmatiskej ke Jiova kiyolpaktia tein tikchiuaj keman kuali tikuij tiempo uan tikixtajtoltiaj uan timomachtiaj Biblia uan toamaixuan (Efes. 5:15, 16). Maski ijkon, moajsi se taman tein tamouilil tein moneki ika timoyekpiaskej. Komo amo timoyekpiaj, uelis tiknemiliskej ke seki tajkuilolmej tein kipia Biblia oso seki amaixmej amo uelis techmachtiskej teisa tein motelneki. Kemej neskayot, ¿toni tikchiuaskej komo tiknemiliaj ke tein kijtoua seki tajkuilolmej itech Biblia nion tepitsin mouika ika tein tikpanotokej? ¿Oso toni tikchiuaskej komo tikitaj ke tein kijtoua se amaix amo chijchiujtok kemej techpaleuis tejuan? ¿Ijsiujka tikixtajtoltiskej? ¿Oso nion tikixtajtoltiskej? Komo ijkon tikchiuaj, timopolouiliskej se tamachtilis tein techtelpaleuiskia. Maj tikelnamikikan ke nochi tamachtilis tein tikseliaj ualeua imako Jiova. w16.05 5:5, 6

Jiova techpaleuia maj timopatakan ika inechikol uan tayekananij. Kemej neskayot, keman tayekananij kiitaj ke se taman amo tikyekchiujtokej, kitemouaj techpaleuiskej. Sayoj ke amo techyolmajxitiaj ika tein yejuan kinemiliaj. Yejuan ika yolyemanilis kitajtaniaj Jiova maj kinmaka tamatilis uan taajsikamatilis. Ompa kitemouaj tamachtilis itech Biblia uan itech toamaixuan tein kinpaleuis maj kuali techyolmajxitikan. Komo tikajsikamatij keniuj Jiova techpaleuia maj timopatakan, okachi kuali timouikaskej iniuan tokniuan. Uan no, okachi kuali tikinitaskej akin tikinajsij itech tanojnotsalis uan akin tikinmachtiaj ika Biblia. Jiova amo kinchikaujkauia taltikpakneminij maj mopatakan, ta yolik kinnextilia itanauatiluan uan kinkaua maj kiixpejpenakan ox mopataskej. w16.06 1:13, 14

Tatitanil Juan kitemakak se tanejmachtilis keman ika tajtoj “tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok”. Tanejmachtij ke komo aksa kitasojta nejin, ‘amo kitasojta Totajtsin’ (1 Juan 2:15, 16). Yejua ika moneki miakpa tikitaskej keniuj titanemiliaj. Xa tikitaskej ke techyolnotsa iniuan timouikaskej akin amo kiixmatij Dios, timoixpetaniskej oso timotakentiskej uan timochijchiuaskej kemej yejuan. Oso xa tiknekij tiyaskej okachi ueyi kaltamachtiloyan uan ijkon tikpiaskej “uejueyi taman”. Sayoj ke amo uejkaua yetosya yankuik taltikpak. Yejua ika moneki tikelnamikiskej itajtoluan Moisés tein kijtoj itech Deuteronomio 6:4. Komo yekmelauj tikajsikamatij uan tikneltokaj ke “Jiova toDios sayoj se Jiova”, sayoj yejuatsin tikueyichiuaskej uan tiktekitiliskej kemej yejuatsin kineki (Heb. 12:28, 29). w16.06 3:14

Sayoj moneki tikpiaskej seki taman tein techpaleuis maj tiksentokakan tiyoltokan, kemej takual, tilmaj uan kani tinemiskej. Sayoj ke tein tiknekij tikpiaskej uelis yeski tel miak. Uan miakej amo kiajsikamatij ke tein melauj amo nochi tein kinekij yekmelauj kinpoloua. Akin nemij itech altepemej kampa tatasojti xa amo kinekij kipiaskej tein kinekij akin nemij itech altepemej kampa kuali motatani. Itech seki altepemej, taltikpakneminij kinekij kipiaskej se celular, se motocicleta oso se tal. Itech okseki altepemej, taltikpakneminij kinekij kipiaskej miak tilmaj tein patiyoj, se kali tein okachi ueyi oso se carro tein okachi patiyoj. Sayoj ke kampa yeski tinemiskej oso tikpiaskej miak tomin oso amo, uelis peuas tiknekiskej tikpiaskej okachi miak taman tein amo techpoloua oso tein amo ueli tikouaj (Heb. 13:5). w16.07 1:1, 2

Miakej kinemiliaj ke amo moneki kiixmatiskej Dios (Mat. 5:3). Sayoj kitemouaj kipiaskej miak taman (1 Juan 2:16). Tiknekij timoixyekanaskej ika itanemilil Dios, amo ika tanemilil tein poui nikan taltikpak. Ika iyektikatsin espíritu, Jiova techpaleuiani maj kuali tikajsikamatikan tein amo uejkaua panos (1 Cor. 2:12). Sayoj ke moneki timoyekpiaskej. Hasta tein tikchiuaj mojmostaj uelis techuikas maj amo senkis tiktekitilikanok Jiova (Luc. 21:34, 35). Sekin xa techiluiskej ke amo titamatij porin tikneltokaj ke tinemij itech itamian tonalmej (2 Ped. 3:3-7). Sayoj ke maj amo timosenkauakan. Komo tiknekij maj yektikatsin espíritu techixyekana, moneki nochipa tiyaskej nechikolmej. w16.07 2:13, 14

Miakej kitataujtiaj Dios porin ijkon kuali momachiliaj. Sayoj ke tein melauj amo kineltokaj maj kinkaki. Moneki kimatiskej ke Jiova kemaj kikaki netataujtilmej. Jesús kiniluij imomachtijkauan: “Notajtsin Dios namechmaktilis nochi ten nankitajtaniliske ika in chikaualis de notokaytsin” (Juan 16:23). Ika nejin tajtolmej, Jesús kinekik kijtos ke uelis tiktajtaniskej Jiova tein yeski taman tein mouika ika itanejnekilis. Juan kijkuiloj: “Tikpiaj ya se ueyi yoltakuautamatilis iuan Dios porin tikmatij ya ke komo tiktajtaniliaj Dios tensa ijkon keme yejua in itanejnekilis de Yejuatsin, ijkuakon Totajtsin Dios techkakilia” (1 Juan 5:14). Techyolpaktia tikinpaleuiskej taltikpakneminij maj kiajsikamatikan ke netataujtil amo sayoj se taman tein kichiua maj kuali momachilikan, ta se taman tein techpaleuia maj timotokikan itech itrono Dios (Heb. 4:16). Moneki tikinnextiliskej keniuj moneki motataujtiskej, akoni moneki kitataujtiskej uan toni uelis tajtaniskej. Ijkon tikinpaleuiskej maj kuali mouikakan iuan Jiova uan maj kipiakan yolseuilis keman tajyouiskej (Sal. 4:1; 145:18). w16.07 4:11, 12

Akin kitasojtaj Jiova uan amo kikauaj kinekij ika nochi ininyolo kinixmatiltiskej oksekin keniuj tamati yejuatsin. Sayoj ke komo tixiuejkejya oso timokokouaj xa amo uelis titanojnotsaskej kajkalpan ijkon kemej tiknekiskiaj. ¿Toni uelis tikchiuaskej? Nochipa maj tikelnamikikan ke tikueyichiuaj Jiova keman ika titajtouaj iniuan akin touan yetoskej, kemej tapajtianij. ¿Uan komo techtsakkej porin titanojnotsaj? Maski ijkon, xa uelis ika titajtoskej Jiova iniuan oksekin. Nejin semi kiyolpaktia (Prov. 27:11). Yejuatsin no kiyolpaktia maj tiktekitilikan maski tochankauan amo (1 Ped. 3:1-4). Hasta keman tikpanotoskej tein okachi ouij uelis tikueyichiuaskej Jiova, okachi kuali iuan timouikaskej uan tiktemoskej keniuj okachi tiktekitiliskej. Jiova techtatiochiuis komo tikinpaleuiaj taltikpakneminij maj kiixmatikan nochi tein kualtsin tein motenkaujtok. w16.08 3:19, 20

Siuat amo kinemilia ke tanauatil tein kipia takat kichiua maj moita ke yejua amo teyi chiujkej. Jiova kijtoj ke siuat kipia se tekit tein kitelpia ipatiuj. Yejuatsin kijtoj: “Amo kuali yetok maj takat kisentoka iselti. Nikchijchiuiliti se itapaleuijkauj, kemej itamajsikayo” (Gén. 2:18). Keman takat kinextia netasojtalis kemej Jesús, siuat okachi kuali momachilia. Uan no, okachi amo kiouijmaka kipoujkaitas itakauj uan kipaleuis keman taixpejpenas. Axkan tokniuan kichiuaj kemej Jesús keman motasojtaj ijkon kemej yejua kintasojtak imomachtijkauan (Juan 13:34, 35; 15:12, 13; Efes. 5:25). Tokniuan namikuanij moneki moteltasojtaskej hasta motemakaskej ika momikiliskej ininnamik. w16.08 2:3, 4

Kuali tajtolmej tein tikijtoskej uelis kinyolchikauas oksekin uan kinpaleuis maj kisentokakan kitekitilikan Jiova. Maj amo keman tikelkauakan ke komo titanankiliaj ika tajtolmej tein teyolchikauaj itech nechikol, uelis tikinyolchikauaskej tokniuan. Ika inepaleuil Jiova, Nehemías uan judíos kichikaujkej ininmauan uan kichiujkej tekit tein monekia kichiuaskej. Kitamichijchiujkej tepamit tein kiyoualouaya Jerusalén itech sayoj 52 tonalmej (Neh. 2:18; 6:15, 16). Sayoj ke Nehemías amo sayoj kiitstoya keniuj tekitiaj oksekin, ta no tekitik (Neh. 5:16). Axkan, miakej tayekananij kichiuaj kemej Nehemías keman tapaleuiaj itech kalchiualis oso tachipauaj uan tayektaliaj itech Kali kampa tiMosentiliaj. No kinyolchikauaj akin kipiaj kuejmolmej keman kinkalpanouaj oso keman iniuan tanojnotsaj (Is. 35:3, 4). w16.09 1:15, 16

Itekitikauan Dios mochikauaj kitakamatiskej nejin tayolmajxitilis: “Xiktajtamikan nijinkes tataman chiualisme: Ma amo xiauilnentinemikan [...]. Uan no amo xitanemilikan ika tamachilisme ten kualkui tajtakol” (Col. 3:2, 5). Achto ke mochiuaskiaj itaixpantijkauan Jiova, seki tokniuan auilnemiaj uan xa mochikaujtokejok moijkuaniliskej amo kuali tanejnekilismej. Komo amo kuali tikixpejpenaj tein timotaliliaj, nejon uelis kichiuas maj kinouijmaka kitakamatiskej tein Biblia tayolmajxitia uan maj moijkuanilikan nejon amo kuali tanejnekilis (1 Cor. 6:9-11). ¿Melauj ke amo tiknekij maj pano nejon? Keman tiyetokej iniuan tokniuan, tiyetokej iniuan taltikpakneminij akin chipaujkanemij, amo iniuan akin kitemouaj auilnemiskej. Melauak ke ueli tikixpejpenaj toni tilmaj timotaliliskej. Sayoj ke no moneki tikixpejpenaskej tilmaj tein kinpaleuis oksekin maj tanemilikan, maj ika tajtokan uan maj kichiuakan tein Dios kiita ke chipauak (1 Ped. 1:15, 16). w16.09 3:9, 10

Ompa Francia, seki namikuanij kijtojkej: “Tejuan tikneltokaj ke Jiova nemi, sayoj ke nejon amo kijtosneki ke tokoneuan no kineltokaskej. Takuaujtamatilis amo se mopanoltilia. Konemej yolik kichikaujtiyouij”. Ompa Australia, se tokniuj kijkuiloj ke se kinpaleuis konemej maj takuaujtamatikan xa yejua tekit tein okachi ouij tein kipiaskej tetatmej. Uan no kijtoj: “Uelis tiknemilis ke tanankilil tein tikmakak mokonetsin kiajsikamatik, sayoj ke, tikmoujkaita porin satepan oksepa mitschiuilia nejon netajtanil. Tanankililmej tein axkan kiyolseuiaj xa amo kiyolseuiskejok satepan. Xa monekis miakpa ika titajtos seki taman”. ¿Tikonpia konemej? Xa kemansa tionmotajtania ox uelis tikonnextilis maj kitasojtakan Jiova uan maj kitekitilikan nochi ininnemilis. Tein melauj, nion akin ueli kichiua nejin iselti (Jer. 10:23). Sayoj uelis kinpaleuis tetatmej komo takuaujtamatij itech inepaleuil Jiova. w16.09 5:1, 2

Akin uejka kayomej moneki mochikauaskej nemiskej kemej nemij itech altepet kampa mokaltalitoj. Uelis kitojtokaskej kuali neskayot tein kikauak Rut. Yekinika, yejua kinextij ke kipoujkaitaya tein momattoyaj kichiuaskej itech altepet kampa nemito. ¿Keniuj? Keman tajtanik maj kikauanij maj kiololouani tatet tein kikaujtiyayaj tekitinij (Rut 2:7). Amo kinemilij ke kinamikia kichiuas nejon nion ke oksekin monekia kipaleuiskej. Uan ojpatika, kitasojkamatik kualtakayot tein kinextilijkej (Rut 2:13). Komo akin uejka kayomej kichiuaj kemej Rut, nejon xa kichiuas maj tokniuan uan okseki taltikpakneminij kinpoujkaitakan. Semi techyolpaktia maj Jiova kinnextili ueyi netasojtalis nochin taltikpakneminij uan maj kinkaua maj kikakikan kuali tanauatilmej tein moajsij itech Biblia. Miakej akin uejka kayomej xa amo ueliaj momachtiayaj Biblia oso amo ueliaj monechikouayaj itech ininaltepeuj. Sayoj ke axkan ke ueli touan monechikouaj, moneki tikinpaleuiskej maj amo kimachilikan ke uejka kayomej itech nechikol. w16.10 1:17-19

Axkan, millones itaixpantijkauan Jiova kitojtokaj ineskayo Jesús. Itech tanemiliaj tein Dios motenkaua uan kisentokaj kitekitiliaj maski kipanouaj ouijkayomej. Maj itech titanemilikan Rudolf Graichen, akin yolik Alemania itech xiuit 1925. Yejua kielnamiki ke keman katka okichpilok, itatuan kitalijkej itech tepamit taixkopimej tein kinextiaya seki taman tein ika tajtoua Biblia. Yejua kijtoj: “Itech semej nejon taixkopimej nesia tepeitskuinti iuan ichkatsin, chivo iuan leopardo, kuakuejkonet iuan tekuani: nochin kuali senyetoyaj uan kinyekanaya se okichpiltsin” (Is. 11:6-9). Nejin kipaleuij Rudolf maj nochipa tanemiliani itech Xochital uan maj okachi takuaujtamati ke mochiuas, maski miak xiujmej nazis kiteltajyouiltijkej keman taixyekantoyaj ompa Alemania uan satepan comunistas. Rudolf kipanokok miak tajyouilismej. Imomaj momikilij porin kikuik se kokolis tein itokay tifus kampa nazis tetsakuayaj uan tetajyouiltiayaj. Uan ipopaj kiamatalij ke amo yeskiaok itaixpantijkauj Jiova. w16.10 3:12-14

Tiitaixpantijkauan Jiova semi tikpatiuitaj Biblia porin tikmatij ke yejua iTajtol Dios. Tein techyolmajxitia techpaleuia maj amo tikpiakan kuejmolmej uan techmelaua keman timopolouaj. ¿Keniuj tikitaj tein techyolmajxitia? Maj titanemilikan itech tein panok itech yekinika siglo iniuan Evodia uan Síntique, ome tokniuan siuamej akin katkaj taixpejpenalmej. Biblia kijtoua ke kipiakej se kuejmol. Nejin xa kichiuak maj tokniuan moxexelouanij. Pablo kinmelauak uan kinyolchikauak maj kiyektalianij ininkuejmol. Yejuan xa kitakamatkej uan kisentokakej kitekitilijkej Jiova ika yolpakilis (Filip. 4:2, 3). Axkan, tejuan no uelis tikpiaskej se kuejmol iuan se tokniuj. Sayoj ke uelis tikyektaliskej oso hasta amo tikpiaskej nejon kuejmolmej komo tiktakamatij tein techyolmajxitia Biblia. Ijkon, tiknextiaj ke yekmelauj tikpatiuitaj iTajtol Dios (Sal. 27:11). w16.11 3:1-3

Tinochin moneki maj techyolchikauakan, okachiok konemej. Se tamachtijkej kijtoua ke konemej “moneki se kinyolchikauas ijkon kemej xochimej moneki se kinatekis”. Uan no kijtoua: “Konemej akin kinyolchikauaj kimachiliaj ke kinpatiuitaj uan kintasojtaj”. Sayoj ke kemej tinemij itech itamian tonalmej, miakej sayoj kitayekanaltiaj inintanejnekilis uan “amo kipiaj ok tetasojtalis” (2 Tim. 3:1-5). Satanás kineki kichiuas maj tiitekitikauan Dios timosenkauakan porin kimati ke ijkon uelis kijtakos tokuali uikalis iuan. Satanás kitemoj kichiuas maj Job mosenkauani keman kiteltajyouiltij. Sayoj ke amo kuali kikisak (Job 2:3; 22:3; 27:5). Tejuan no uelis tikixnamikiskej Satanás. Komo tiksentokaj tikinyolchikauaj tochankauan uan tokniuan, tinochin okachi tiyolpakiskej. w16.11 1:4, 6

Kemej itech xiuit 1500, seki takamej yolchikaujkej kitajtolkepkej Biblia itech tajtolmej tein kiajsikamatiaj taltikpakneminij. Akin kipoujkaitayaj Dios kiixtajtoltijkej uan motajtanijkej seki taman kemej nejin: “¿Katiyejua tajkuilolmej itech Biblia ika tajtoua purgatorio uan ke moneki se kitaxtauis se tiopixkat uan ijkon kichiuas se misa keman aksa momikilia? ¿Itech katiyejua tajkuilolmej ininka tajtoua papas uan cardenales?”. Akin taixyekanayaj tiopan tel kualankej keman taltikpakneminij kiixtopeujkej inintamachtilis. Yejua ika kichiujkej maj kinmiktianij miakej takamej uan siuamej. Kinekiaj kichiuaskej maj taltikpakneminij amo kiixtajtoltianij Biblia uan maj amo kichiuanij netajtanilmej. Uan miakpa taltikpakneminij kintakamatkej. Maski ijkon, moajsikej taltikpakneminij yolchikaujkej akin amo kinekkej moajsiskejok imako Ueyi Babilonia. Kiixmatkej tein yekmelauj tamachtia iTajtol Dios uan kinekiaj okachi kimatiskej. w16.11 4:13

Moneki timonejnemiltiskej timelaujkej uan nochipa tikijtoskej tein melauak (Efes. 4:25). Satanás yejua “tetat den nochi nekes ten xolopijtijtinemij”. Uan Ananías uan inamik momikilijkej porin takajkayaujkej. Yejua ika tejuan amo titakajkayauaj (Juan 8:44; Hech. 5:1-11). Sayoj ke timonejnemiltiskej timelaujkej amo sayoj kijtosneki ke amo titakajkayauaskej. Komo yekmelauj tiktasojkamatij iueyi teiknelilis Dios, timonejnemiltiskej timelaujkej itech okseki taman. Jiova kiniluij israelitas: “Moneki amo xitachtekikan, moneki amo xitakajkayauakan, uan moneki amo ximokajkayauakan”. ¿Keyej? Yejuatsin kiniluij: “Moneki nanyeskij nanyektikej, porin nejua, Jiova nanmoDios, niyektik” (Lev. 19:2, 11). Maski amo titakajkayauaskej, amo tiknextiskej ke timonejnemiltiaj timelaujkej komo tikchiuaj maj oksekin kineltokakan se taman tein amo melauak. w16.12 1:17, 18

Itech iTajtol Dios tikitaj keniuj Jesús kinnojnotsaya oksekin. Taltikpakneminij kiteluelitayaj kikakiskej porin kinyolchikauaya uan kinyolseuiaya ika itajtoluan, okachiok akin yolkuetaujtoyaj uan akin tel tayokoxtoyaj (Mat. 11:28-30). Yejua semi kitekipachouaya keniuj momachiliayaj oksekin (Mar. 6:30-32). Kinpaleuij itatitaniluan, uan no techpaleuis tejuan. Melauak ke yejuan yetoyaj iuan uan tejuan amo. Sayoj ke amo moneki iuan tiyetoskej uan ijkon tikseliskej nepaleuil tein yejua motenkauak techmakas. Yejua toTekiuaj uan kisentoka technextilia netasojtalis maski moajsi ne iluikak. Yejua ika, keman teisa techteltekipachos maj tikyekmatikan ke Jesús touan yetos uan techpaleuis keman monekis. Yejua techiluia ke uelis tikchiaskej tein kuali satepan uan techyolchikaua, uan nejon techpaleuia maj amo timoteltekipachokan (Heb. 2:17, 18; 4:16). w16.12 3:4, 6

Itech itonaluan Noé taltikpakneminij tel tateuiayaj uan auilnemiaj (Gén. 6:4, 9-12). Yejua nochipa tanejmachtij tein Dios yaya kichiuati. Sayoj ke amo uelia kinchikaujkauiaya taltikpakneminij maj kikakinij. Uan amo no uelia kichiuaya maj Tetsaujkakiouit mochiuani okachi achto. Monekia takuaujtamatis ke Jiova kiixpoloskia nochi tein amo kuali ijkon kemej motenkaujka uan ke kichiuaskia keman monekiskia (Gén. 6:17). Itech nejin tonalmej, taltikpakneminij no kitelchiuaj tein amo kuali uan tikmatij ke Jiova motenkauak kinixpolos (1 Juan 2:17). Sayoj ke amo ueli tikinchikaujkauiaj maj kikakikan tein kuali tein kiualkuis iTekiuajyo Dios. Uan amo no ueli tikchiuaj maj “kachi ueyi tajyouilis” peua okachi achto (Mat. 24:14, 21). Kemej Noé, moneki semi titakuaujtamatiskej ke amo uejkaua Dios kiixpolos nochi tein amo kuali (Sal. 37:10, 11). Senkis tikneltokaj ke Jiova amo kikauas maj tein amo kuali uejkaua se tonal okachiok ke tein yejuatsin kiixtalij (Hab. 2:3). w17.01 1:5-7

Axkan, sekin amo kuali taixpejpenaj oso kiixpejpenaj kinijtakoskej oksekin. Biblia kijtoua ke itech itamian tonalmej taltikpakneminij amo motasojkamatiskiaj (2 Tim. 3:1, 2). Sayoj ke tejuan amo tiknekij ijkon titaixpejpenaskej nion tiknextiskej ke amo timotasojkamatij. ¿Keniuj uelis kuali tiktekitiltiskej nejin netetayokolil? Tinochin ueli tikixpejpenaj akonimej iniuan timouikaskej, keniuj timotilmajtiskej uan timochijchiuaskej, uan keniuj timoixpetaniskej. Sayoj ke moneki timoyekpiaskej uan amo tiknemiliskej ke kemej toselti tiuelij titaixpejpenaj uelis tikchiuaskej tein amo kiyolpaktia Dios oso tikchiuaskej tein kichiuaj akin amo kitekitiliaj (1 Ped. 2:16). Moneki tikixpejpenaskej tein techpaleuis maj tiktakamatikan nejin tayolmajxitilis: “Xikchiutiyakan sayo para ma xikueyikualnextikan Totajtsin Dios” (1 Cor. 10:31; Gál. 5:13). w17.01 2:12-14

Komo tikseliaj okachi tekimej oso techpatiliaj tekit tein tikchiujtoyaj, moneki tiyeskij tiyolyemankej kemej Nehemías. Yolyemanilis techpaleuis maj amo titakuaujtamatikan sayoj itech tein ueli tikchiuaj oso tein tikmatij. Kemej neskayot, se tayekankej uelis kichiuas seki taman itech nechikol uan amo achto kitajtanis Jiova maj kipaleui. Oso tisemej uelis achto tikixpejpenaskej tein tikchiuaskej uan ompa tiktajtaniskej Jiova maj kitiochiua tein tikixpejpenkej. Tokniuj akin yolyemanik amo takuaujtamati itech tein ueli kichiua oso kimati, hasta keman kichiua teisa tein miakpaya kichiuani. Nochipa kielnamiki ke tein ueli kichiua amo okachi kuali ke tein ueli kichiua Jiova (Prov. 3:5, 6). Axkan, miakej sayoj inintech tanemiliaj uan kitemouaj yeskij okachi ueyichiuanimej ke oksekin. Sayoj ke tiitekitikauan Jiova amo tiknemiliaj ke tekimej tein tikpiaj techchiuaj okachi tiueyichiuanimej ke tokniuan oso tochankauan, ta tikseliaj tekit tein tikpiaj itech ixolal Dios uan tisentekitij iniuan tokniuan (1 Tim. 3:15). w17.01 4:7, 8

Jiova kinekia maj taltikpakneminij nemikan nochipaya (Gén. 1:28; Sal. 37:29). Kemej semi kualtakat, kinmakak Adán uan Eva miak netetayokolilmej tein kitelpiaj ipatiuj (Sant. 1:17). Kinchijchiuak kemej ueliskiaj tanemiliskej uan ininselti taixpejpenaskej, tetasojtaskej uan kinpiaskej inintasojikniuan. Jiova iuan tajtouaya Adán uan kimelauilij keniuj ueliskia kichiuas tein kuali. Uan no, kinextilij keniuj moyekpias uan keniuj tatokas uan kinyekpias tapialmej (Gén. 2:15-17, 19, 20). Jiova kinchijchiuak Adán uan Eva kemej ueliskiaj kimatokaskej, kiitaskej, kiyekoskej, kikakiskej uan kijnekuiskej tein kuali tein yejuatsin kinchijchiuilijka. Ijkon ueliskiaj yolpakiskej kampa kintalijka maj nemikan kampa tel takualtsinkan katka. No kinmakak miak tekit tein kinyolpaktiskia kichiuaskej. Yejuan nochipa kiixmattoskiaj yankuik taman. Kinchijchiuak Adán uan Eva kemej ueliskiaj kinpiaskej konemej akin amo yeskiaj tajtakolejkej. Kintayokolij taltikpak uan nochi tein onkak. Nikan nemiskiaj nochipaya. w17.02 1:6, 7

¿Keniuj iTajtol Dios kinpaleuij akin taixyekanayaj itech ixolal? Maj titanemilikan itech tekiuaj Josías. Satepan ke kiajsikej amatajkuilol kampa ijkuiliujtoya tanauatil tein kiselij Moisés, itajkuilojkauj Josías peuak kiixtajtoltilia. ITajtol Dios kiolinij maj kinixpolo nochi tiotsitsin tein kinueyichiuayaj itech xolal uan maj kichiua okachi ueyi Pascua kemej amo keman ijkon mochiujtoya (2 Rey. 22:11; 23:1-23). Josías uan okseki taixyekananij kikaujkej maj iTajtol Dios kinixyekanani. Yejua ika motemakakej kipataskej kemej taixyekanayaj. Nejon tapaleuij maj israelitas kichiuanij tein Jiova kinekia. Sayoj ke amo nochin tekiuanij kitakamatkej tein yejuatsin kinnauatiaya. Kemansa, Jiova monekik kinmelauas oso kinixpatas (1 Sam. 13:13, 14). Sayoj ke satepan, Jiova kiixtalij se akin yeskia tel kuali taixyekankej. w17.02 3:11, 12, 14

Dios kinchijchiuak taltikpakneminij “kemej yejuatsin tamati” (Gén. 1:27). Yejua ika timiakej ueli tiknextiaj ikualneskayouan, kemej netasojtalis, kualtakayot uan teiknelilis. Uan no, Dios techchijchiuak maj tikpiakan totanemilil. Nejin se taman tein totech moajsi tein techmatiltia tein kuali uan tein amo kuali, tein melauak uan tein amo melauak (Rom. 2:14, 15). Timiakej tikuelitaj tein chipauak uan tein kualtsin, uan tiknekij tinemiskej ika yolseuilis. Nejin amo tikmoujkaitaj, porin Jiova techchijchiuak kemej uelis tikchiuaskej kemej yejuatsin itech miak taman. Yejua ika, tinochin technamiki maj techpoujkaitakan. Sayoj ke moneki tiknextiskej kuali taixejekolis itech nejin. w17.03 1:5, 6

Jiova amo taixpejpena keman kualantok, kemej kichiuaj miakej taltikpakneminij. Yejuatsin kipatak tein kiixtalijka keman kiitak ke akin nemiaj Nínive kipatakej kemej monejnemiltiayaj. Ijkon kinextij ke motemaka kipatas tein kiixtalia, ke yolyemanik uan teiknelijkej. Kemansa, tejuan no monekis oksepa tiknemiliskej ox kuali tein tikixpejpenkej. Xa monekis tiknemiliskej keman mopatas tein tikpanotoyaj. Maj tikelnamikikan ke kemansa Jiova kipatak tein kiixpejpenka (1 Rey. 21:20, 21, 27-29; 2 Rey. 20:1-5). Xa no monekis tikpataskej tein tikixpejpenkaj keman tikmatij se taman tein amo tikmatiaj. Tekiuaj David kijtoj maj kimakakan okse takat nochi tein iaxka katka Mefibóset porin kiluijkaj se taman tein amo melauak. Sayoj ke keman kimatik tein yekmelauj panok, kipatak tein kiixtalijka (2 Sam. 16:3, 4; 19:24-29). w17.03 2:14, 15

Achto ke titaixpejpenaskej, moneki titanemiliskej itech seki tayolmajxitilis tein kitemaka Biblia tein uelis techpaleuis. Maj tiknemilikan ke inamik se tokniuj siuat amo itaixpantijkauj Jiova. Tokniuj siuat kiixtalij se tonal keman tanojnotsatiuj (Hech. 4:20). Sayoj ke inamik kiluia maj amo tanojnotsati. Kiluia ke nejon tonal kiuelitaskia kiuikas kansaika maj paxalotij porin amo semi senyetonij. Tokniuj siuat tanemilia itech seki tajkuilolmej itech Biblia tein uelis kipaleuiskej maj kuali taixpejpena. Yejua kimati ke moneki kitakamatis Dios uan ke Jesús technauatij maj tikinpaleuikan oksekin maj mochiuakan itatojtokakauan (Mat. 28:19, 20; Hech. 5:29). Sayoj ke no kielnamiki ke siuat moneki kipoujkaitas tanauatil tein kipia itakauj uan ke itekitikauan Dios moneki kipataskej inintanemilil keman monekis (Efes. 5:22-24). Tokniuj siuat ueliskia motajtanis ox inamik amo kineki maj tanojnotsati oso sayoj kineki iuan yetos nejon tonal. Tiitekitikauan Jiova tiknekij titaixpejpenaskej ika tamatilis uan tein yejuatsin kiyolpaktis. w17.03 4:17