Watchtower BIBLIOTECA ITECH TEPOS
Watchtower
BIBLIOTECA ITECH TEPOS
náhuatl del norte de Puebla
  • BIBLIA
  • AMAIXMEJ
  • NECHIKOLMEJ
  • es19 págs. 7-17
  • Enero

Amo moajsi nion se video ika tein tikonixpejpenak

Xitechontapojpolui, se taman kitsakuilij maj amo moita video.

  • Enero
  • Maj timomachtikan iTajtol Dios mojmostaj 2019
  • Subtítulos
  • Martes 1 metsti enero
  • Miércoles 2 metsti enero
  • Jueves 3 metsti enero
  • Viernes 4 metsti enero
  • Sábado 5 metsti enero
  • Domingo 6 metsti enero
  • Lunes 7 metsti enero
  • Martes 8 metsti enero
  • Miércoles 9 metsti enero
  • Jueves 10 metsti enero
  • Viernes 11 metsti enero
  • Sábado 12 metsti enero
  • Domingo 13 metsti enero
  • Lunes 14 metsti enero
  • Martes 15 metsti enero
  • Miércoles 16 metsti enero
  • Jueves 17 metsti enero
  • Viernes 18 metsti enero
  • Sábado 19 metsti enero
  • Domingo 20 metsti enero
  • Lunes 21 metsti enero
  • Martes 22 metsti enero
  • Miércoles 23 metsti enero
  • Jueves 24 metsti enero
  • Viernes 25 metsti enero
  • Sábado 26 metsti enero
  • Domingo 27 metsti enero
  • Lunes 28 metsti enero
  • Martes 29 metsti enero
  • Miércoles 30 metsti enero
  • Jueves 31 metsti enero
Maj timomachtikan iTajtol Dios mojmostaj 2019
es19 págs. 7-17

Enero

Martes 1 metsti enero

Takamej akin amo yolkualmej amo ueli kiajsikamatij melaujkayot (Prov. 28:5).

Kemej tinemij itech itamian tonalmej, akin amo yolkualmej “ixuaj kemej xiuit” (Sal. 92:7). Yejua ika, amo tikmoujkaitaj maj taltikpakneminij okachi amo kipoujkaitakan itanauatiluan Dios. Pablo kiniluij tokniuan: “Xiyolmajsitokan de namotakuautamatilis. [...] Xinentinemikan keme ne koneme porin yejuan amo yoltanemilijtinemij ten amokuali” (1 Cor. 14:20). ¿Keniuj uelis tikchiuaskej nejin? Tanankilil moajsi itech tajkuilol tein axkan tikitaj, kampa kijtoua ke “akin kitemouaj Jiova ueli kiajsikamatij nochi”, tein kijtosneki ke kiajsikamatij keniuj uelis kiyolpaktiskej. Proverbios 2:7, 9 no techmachtia ke Jiova “kinmakas tamatilis tein uelis kitekitiltiskej” akin yolmelaujkej, uan ijkon kiajsikamatiskej “melaujkayot uan tamelaualis uan kuali taixejekolis, ojti tein kinextia tein kuali”. Noé, Daniel uan Job kipiakej itamatilis Dios (Ezeq. 14:14). Uan axkan itekitikauan no kipiaj. Uan tejuatsin, ¿tikonajsikamatikya keniuj uelis senkis tikonyolpaktis Jiova? Tikonajsikamatis komo kuali tikonixmati. w18.02 8 § 1-3

Miércoles 2 metsti enero

Motemaktijke ma kinauijkan ika in [...] tokaytsin de Totekotsin Jesús (Hech. 19:5).

Moneki maj amo akin kichikaujkaui se konetsin oso se akin momachtijtok Biblia maj moaui. Jiova amo akin kichikaujkauia maj kitekitili (1 Juan 4:8). Okachi kuali, keman tikmachtiskej aksa, moneki tikpaleuiskej maj kiajsikamati ke motelneki maj mochiua itasojikniuj Dios. Ijkon, komo yekmelauj kitasojkamati kiixmatis tamachtilis tein melauak uan yekmelauj kineki kichiuas nochi tein moneki kichiuas se itatojtokakauj Cristo, kinekis moauis (2 Cor. 5:14, 15). ¿Kanachi xiuit moneki kipias akin moauis? Amo ixyetok kanachi xiuit, porin sekin okachi niman kiajsikamatij tamachtilis ke oksekin. Semi tiyolpakij itech tonal keman aksa moauia. Sayoj ke ijkuak no moneki tanemilis itech nochi chikaujkayot tein monekis kichiuas uan ijkon kichiuas tein kijtoj keman motemaktij iuan Dios. Itatojtokakauan Jesús kitakamatij nejin tajtolmej: “Ma amo moyolpaktijtinemikan ok. Ta, para ke yejuan ma sayo Cristo kitekitilijtinemikan. Porin sayo Yejuatsin momikilij uan oksepa pankisak yoltok” (2 Cor. 5:15; Mat. 16:24). w18.03 6, 7 § 14-17

Jueves 3 metsti enero

Xikinselikan nekes namokalpanokauan [...]. Porin kuak sekin tokniuan taneltokani kiselijkaj takalpanoani, ijkuakon yejuan kinselijke iángeluan de Dios, maski yejuan amo momakakke cuenta (Heb. 13:2).

¿Ouij techkisa tiyeskij tikualtakamej? Komo ijkon, xa timopolouilianij tonalmej keman ueliskia timoyolpaktiskej iniuan oksekin uan peuas kuali timouikaskej iniuan akin yeskij totasojikniuan nochipaya. Tiyeskij tikualtakamej yejua se taman tein okachi tapaleuia maj amo timomachilikan toselti. Komo ijkon, ¿toni uelis kichiuas maj aksa amo kualtakat? Se taman yejua ke tiitekitikauan Jiova tikpiaj miak tekit. Yejua ika, sekin xa kinemiliaj ke amo kemantij uan ke amo kipiaj chikaualis tein kinpaleuis maj kualtakamej. Komo ijkon titanemiliaj, xa monekis tikitaskej keniuj tikuitokej totiempo. ¿Uelis tikpataskej seki taman uan ijkon tikpiaskej tiempo uan chikaualis tein techpaleuis maj tikinyoleuakan tokniuan oso tiyaskej keman techyoleuaskej? Biblia kijtoua maj amo tikelkauakan tiyeskij tikualtakamej. Moneki tiktemoskej tiyetoskej iniuan tokniuan. Sayoj ke xa monekis tikauaskej seki taman tein tikchiuaj tein amo tel tayekantok. w18.03 16 § 13, 14

Viernes 4 metsti enero

Moneki nitetapouitiuj kuali tanauatilmej ika iTekiuajyo Dios itech okseki altepemej, porin yejua ika nechualtitankej (Luc. 4:43, TNM).

Amo akin okachi kuali mouikani iuan Jiova kemej Jesús. Itech nochi inemilis uan keman tanojnotstinemik, kinextij ke kinekia kichiuas kemej iTajtsin, Jiova. Kemej tanemiliaya, tein kimachiliaya uan tein kichiuaya kinextij ke kitayekanaltiaya itanauatiluan uan itanejnekilis Jiova (Juan 8:29; 14:9; 15:10). Kemej neskayot, tein kijtoj Isaías ika iteiknelilis Dios mouika ika tein kijkuiloj Marcos ika tein kimachiliaya Jesús (Is. 63:9; Mar. 6:34). ¿Titanemiliaj kemej Jesús uan nochipa tikinikneliaj akin moneki maj se kinpaleui? ¿Tiktayekanaltiaj, ijkon kemej yejua, titanojnotsaskej uan titamachtiskej tein kichiuas iTekiuajyo Dios? Komo ijkon tikchiuaj, tiknextiaj ke titanemiliaj kemej Jiova. w18.02 21 § 12

Sábado 5 metsti enero

Xikinmachtijtiyakan uan xikinmelautiyakan [...] namokoneuan (Efes. 6:4).

Se kiniskaltis konemej semi ouij, okachiok itech nejin tonalmej (2 Tim. 3:1-5). Konemej amo kimatij tein kuali uan tein amo kuali keman yolij, porin ayamo kimachtiaj inintanemilil. Nejin sayoj ueli mochiua komo se kinmachtia, uan ijkon uelis kuali monejnemiltiskej keman uejueyiaskej (Rom. 2:14, 15). Yejuan kimachiliaj ke ininka motekipachouaj keman inintatuan kinmelauaj ika netasojtalis. Kiajsikamatij ke amo nochi ueli kichiuaj uan ke nochi tein kichiuaskej kiualkuis tein kuali oso tein amo kuali. Yejua ika motelneki maj tetatmej kitemokan itaixyekanalis Jiova keman kiniskaltiskej. Maj tikelnamikikan ke kemej sekin kinemiliaj ke moneki se kiniskaltis konemej mopata ijkon kemej panouaj tonalmej uan uelis yeski tataman itech sejse altepet. Sayoj ke, keman tetatmej kikakij Dios, amo moneki motajtanijtoskej keniuj kiniskaltiskej ininkoneuan nion moyekanaskej ika tein kinemiliaj akin amo kitekitiliaj Dios. w18.03 30 § 8, 9

Domingo 6 metsti enero

Xiksentokakan [...] xinentinemikan ika yolyemanalis uan xikmouistilijtiyakan Dios (Filip. 2:12).

Telpoch, komo timoauijya, tejua moneki tikchiuas tein mitspaleuis ximakisa, hasta komo tinemiok iniuan motatuan. ¿Keyej moneki tikelnamikis nejin? Porin xa tein tikmachilia uan ouijkayomej tein tikpia semi taman. Se ichpoch kijtoj: “Miakpa, keman se nojnel, amo teyolkokoua se yeski se itaixpantijkauj Jiova sayoj porin amo ueli se kikua pastel keman aksa xiuajsi itech kaltamachtiloyan. Sayoj ke, keman panouaj xiujmej uan okachi se kinejneki se motekas iuan aksa, moneki senkis se kineltokas ke se kitakamatis itanauatiluan Dios nochipa okachi kuali”. Akin moauiaj keman uejueykejya no kipanouaj ouijkayomej tein amo kichiayaj tein kinextia ox chikauak inintakuaujtamatilis. Xa kipiaj ouijkayomej iuan ininnamik, kampa tekitij oso xa mokokouaj. Tein melauj, tein yeski xiuit tikpiaskej, tinochin tikpanouaj ouijkayomej tein uelis kichiuas maj ouij techkisa tiktakamatiskej Jiova (Sant. 1:12-14). w17.12 24 § 4, 5

Lunes 7 metsti enero

Komo nanyolkualanij, ijkuakon amo ximotajtakolmakakan (Efes. 4:26).

Amo miakej tajyouianij kemej David. Sayoj ke nejon amo kichiuak maj nochipa yolkualantoni. Yejua kijkuiloj: “Ximoijkuanili kualanyot uan xikaua yolkualanyot; amo xikualani uan amo xikchiua tein amo kuali” (Sal. 37:8). Okachi moneki timoijkuaniliskej kualanyot porin moneki tikchiuaskej kemej Jiova, akin “amo kichiuani touan ijkon kemej totajtakoluan” (Sal. 103:10). Sayoj ke no techpaleuia ika okseki taman. Komo nochipa tikualantokej, toesyo uan toijtik uelis amo yektekitis uan techouijmakas kuali timijyotiskej, no uelis moijtakos toeltapach uan páncreas. Keman tikualanij, amo nochipa tiyektanemiliaj. Uelis tikijtoskej oso tikchiuaskej seki taman tein ika tikinyolxokoliskej oksekin, uan nejin uelis kichiuas maj uejkaua titeltayokoxtokan. Okachi kuali maj tiktemokan timoyolseuiskej. Biblia kijtoua ke “akin yolseujtok kimaka nemilis inakayo” (Prov. 14:30). Yejua ika, keman se tokniuj techyolxokolia, ¿toni techpaleuis maj tikyektalikan kuejmol iuan? Maj tikchiuakan tein Biblia tayolmajxitia. w18.01 10 § 14, 15

Martes 8 metsti enero

Amo tinechkauas itech Miketekoch. Tejua amo tikauas maj akin amo mitskaua kiita taltekoch (Sal. 16:10).

Nejin amo kijtosneki ke David amo keman momikiliskia oso ke amo keman moajsiskia itech Miketekoch. ITajtol Dios kiyekijtoua ke David ueuentsintiak, momikilij uan “kipachojkej itech iXolal David” iuan iuejkaujtatuan (1 Rey. 2:1, 10). Komo ijkon, ¿akoni ika tajtoua Salmo 16:10? Seki semanas satepan ke Jesús momikilij uan moajokuik, tatitanil Pedro ika kinnojnotsak Salmo 16:10 miakej judíos uan akin kiselijkaj inintaneltokalis judíos (Hech. 2:29-32). Yejua kinelnamiktij ke David momikilij uan kipachojkej. Ompa no kijtoj ke “David kitak nochi nijin desde ne achtopa ya uan technojnotsak de ne tonal kuak Cristo pankisas yoltok”. Biblia amo kijtoua ke aksa kijtoj ke nejon amo melauak katka. Pedro kiyeknextij ke melauak tein kijtojtoya ika tein David kijtoj itech Salmo 110:1 (Hech. 2:33-36). Yejua kintanemililtij uan nejon kinpaleuij maj kineltokanij ke Jesús yejua “Totekotsin uan no [...] Cristo”. Nochin kiajsikamatkej ke Salmo 16:10 mochiuak keman Jesús moajokuik. w17.12 10 § 10-12

Miércoles 9 metsti enero

Nochi mopouak uan motamachiuak, uan nochi tamachiuj moijkuiloj (Esd. 8:34).

Oloch Taojtokaltianij mochikauaj kitekitiltiskej tomin tein ika motapaleuia itech inechikol Dios ika kuali taixejekolis uan tamatilis (Mat. 24:45). Kichiuaj netataujtil uan kiixtaliaj ika miak nejmachkayot keniuj kitekitiltiskej (Luc. 14:28). Tatitanil Pablo kisentilij tomin tein ika kinpaleuiskiaj tokniuan akin nemiaj Judea uan kiitak maj kuali kixejxelouanij “amo sayoj iixpan Jiova ta no ininixpan takamej” (2 Cor. 8:18-21, TNM). Axkan, itech inechikol Dios no kichiuaj kemej Esdras uan Pablo uan kuali kitekitiltiaj tomin tein motemaka (Esd. 8:24-33). Itech xiujmej tein panouanij, moixtaliani seki taman. Itech inechikol Jiova kitemouaj keniuj amo semi kitekitiltiskej miak tomin, uan ijkon, totapaleuil tein kitelpia ipatiuj okachi kuali uelis motekitiltis. w18.01 19, 20 § 12, 13

Jueves 10 metsti enero

Cristo Jesús ma Yejuatsin namechyolyekantiu ika ne iyolseuilis (Col. 3:15).

Netasojtalis uan kualtakayot techpaleuiskej maj titetapojpoluikan. Kemej neskayot, komo techyolxokolij tein kijtoj oso kichiuak se tokniuj, maj tikelnamikikan keman tejuan tikijtojkej oso tikchiujkej tein kikuejmoloj aksa uan techtapojpoluij. Semi tiktasojkamatkej netasojtalis uan kualtakayot tein technextilij (Ecl. 7:21, 22). Okachi tiktasojkamatij kualtakayot tein kinextiani Jesús porin kinpaleuia akin yekmelauj kiueyichiuaj Dios maj kuali mouikakan. Tinochin tiktasojtaj sayoj se Dios, tikteixmatiltiaj sayoj se taman uan tikpanouaj miak kuejmolmej tein okseki tokniuan no kipanouaj. Komo tikintasojtaj tokniuan, tikualtakamej iniuan uan timotapojpoluiaj, titapaleuiaj maj amo tixexeliujtokan uan amo tikelkauaskej nemilis nochipaya tein tikseliskej kemej netetayokolil. Nexikolot uelis kichiuas maj amo tikselikan netetayokolil. Biblia kinextia keniuj semi tamouilil nejon. Caín kinexikoluij iikniuj Abel uan kimiktij. Coré, Datán uan Abiram kinexikoluijkej Moisés uan kiixnamikkej. Uan tekiuaj Saúl kinexikoluij David uan kitemoj kimiktis. w17.11 27 § 9, 10

Viernes 11 metsti enero

Moneki tikitas ika nejmachkayot nejin taman, kuali tiktemos uan titajtanis (Deut. 13:14).

Tayekananij akin kipaleuiaj se tokniuj akin ueyi tajtakoj moneki kiitaskej ika nejmachkayot ox moyolnonotsa. Kemansa ouij kisa. Moneki kiitaskej keniuj tanemilia, keniuj kiita tein kichiuak uan keniuj momachilia (Apoc. 3:3). Akin tajtakoj kinextiliskej teiknelilis komo moyolnonotsa. Jiova uan Jesús ueli kiitaj tein tiknemiliaj uan tikmachiliaj, sayoj ke tayekananij amo. Yejua ika, ¿keniuj uelis kimatiskej ox aksa yekmelauj moyolnonotsa? Yekinika, moneki kitajtaniskej Dios tamatilis uan taajsikamatilis (1 Rey. 3:9). Ojpatika, moneki kitekitiltiskej Biblia uan amatajkuilolmej tein kitemaka takeual takuaujtamach uan tamatkej uan ijkon uelis kimatiskej ox akin tajtakoj sayoj “moyoltayokoltia por ne momento” oso ox yekmelauj moyolnonotsa (2 Cor. 7:10, 11). Moneki kiitaskej keniuj Biblia kimelaua keniuj momachiliaj, tanemiliaj uan monejnemiltiaj akin kemaj moyolnonotsaj uan akin amo. w17.11 17 § 16, 17

Sábado 12 metsti enero

[Konemej] amo kintakamatiske ok nintatuan (2 Tim. 3:2).

Amatajkuilolmej, películas uan tein panoua itech televisión kinextiaj kemej se taman tein ipa mochiua uan ke kuali yetok. Sayoj ke tein melauj, amo se tatakamatis kichiua maj amo kuali se mouika kemej kalyetouanij, uan kinijtakoua nochin taltikpakneminij. Nejin uejkaujya ipa moajsikamati. Kemej neskayot, ne uejkauj ompa Grecia, komo se takat kinteuiaya itatuan, kitamikuiliayaj nochi tein kipiaya uan tein ueliskia kiselis. Uan inintanauatil romanos kijtouaya ke se kiteuis se ipopaj moitaya kemej yeskia se kimiktiskia aksa. Itech Escrituras Hebreas uan itech Escrituras Griegas Cristianas kinnauatiaj konemej maj kinpoujkaitakan inintatuan (Éx. 20:12; Efes. 6:1-3). ¿Toni kinpaleuis maj tatakamatikan maski oksekin amo kichiuaskej? Komo itech tanemiliaj tein inintatuan ininka kichiuanij. Uan no motasojkamatiskej komo kiajsikamatij ke Dios, toTajtsin tinochin, kineki maj titatakamatikan. Keman telpochmej kuali ininka tajtouaj inintatuan, kinpaleuiaj okseki telpochmej maj okachi kinpoujkaitakan inintatuan. w18.01 29 § 8, 9

Domingo 13 metsti enero

Sejsemej yeskij kemej kampa se motatis keman taejeka, kampa se mopaleuis keman kiouaejeka, kemej miak at tein motaloua kampa tauaktok, kemej iyekauil se ueyi tepejxit kampa tel tauaktok (Is. 32:2).

Axkan, tokniuj akin ueyi tajtakoj moneki kitemos ininnepaleuil tayekananij. ¿Keyej motelneki? Yekinika, porin Jiova kijtoua itech iTajtol ke tayekananij moneki kipaleuiskej aksa akin ueyi tajtakoj (Sant. 5:14-16). Ojpatika, porin yejuan kinixtalijkej maj kinpaleuikan akin moyolnonotsaj maj oksepa kipiakan itatiochiualis Dios uan maj amo kisentokakan kichiuakan nejon tajtakol (Gál. 6:1; Heb. 12:11). Uan expatika, porin tayekananij kinixtaliaj uan kinmachtiaj maj kinpaleuikan akin moyolnonotsaj maj amo kisentokakan motayokoltikan uan maj yolseuikan. Jiova kijtoua ke tayekananij tamatij kemej “kampa se mopaleuis keman kiouaejeka” (Is. 32:2). ¿Melauj ke nochi nejin kinextia iteiknelilis Dios? Miakej itekitikauan yolseuij keman tajtouaj iniuan tayekananij uan kiseliaj ininnepaleuil. w17.11 9, 10 § 8, 9

Lunes 14 metsti enero

Kuak Yejuatsin techmejmelautok, [...] tikmachilia[j] ne yolkokolis (Heb. 12:11).

Maski ouij techkisas, komo amo moneki, maj amo iuan titajtokan se tochankauj akin kikalankixtijkej, yeski ika teléfono, cartas, tiktajkuilouiliskej itech celular, correo electrónico oso itech redes sociales. Sayoj ke, maj amo tiknemilikan ke amo mokepasok. Akin tetasojta kichia nochi, uan yejua ika tiksentokaj tikchiaj maj mokepakan akin kikaujkej Jiova (1 Cor. 13:7). Komo tikitaj ke se tochankauj kipatatok itanemilil, uelis tiktajtaniskej Dios maj Biblia kipaleui maj kiseli nejin itayoleualis yejuatsin: “Ximokepa nouan” (Is. 44:22). Jesús kijtoj ke moneki okachi tiktasojtaskej yejua ke se taltikpaknenkej. Uan kiyekmatia ke imomachtijkauan amo kikauaskiaj Jiova maski ininchankauan kinixnamikiskiaj. Komo itech tokalyetouanij onkak “xejxelolis” porin tiktojtokaj Jesús, maj tiktajtanikan Jiova maj techpaleui (Is. 41:10, 13). Maj tiknemilikan ke Jiova uan Jesús kinyolpaktia tein tikchiuaj uan ke techtatiochiuiskej komo amo tikinkauaj. w17.10 16 § 19-21

Martes 15 metsti enero

Ximoyankuikatalilikan ne teiknelilis (Col. 3:12).

Keman tikitaj ke aksa tajyouia porin xiuejya oso mokokoua, tikyolikneliaj. Tiknekij maj ejko tonal keman tamis nejin kuejmolmej, yejua ika tiktajtaniaj Jiova maj uiki iTekiuajyo. Sayoj ke hasta maj ejko nejon tonal, timochikauaj tikinpaleuiskej akin mokokouaj uan akin xiuejkejya. Se tajkuilojkej kitetapouij tein kipanok imomaj, akin kipiaya kokolis tein moixmati kemej Alzheimer. Se tonal, imomaj amo ajsik nekalauiloyan uan kipitsotilij itilmaj. Keman yolik motachipauijtoya, ome tokniuan siuamej akin nochipa kikalpanouayaj ajsikej ichan. Keman kiitakej tein kipanoka, kitajtanijkej ox ueliskia kipaleuiskej. Imomaj kijtoj: “Nipinaua, sayoj ke kemaj”. Yejua ika kipaleuijkej, kitotonilijkej tsopekat uan iuan mokaujkej tepitsin. Nejin takat semi motasojkamatia uan kijtoj ke kinpoujkaitaya itaixpantijkauan Jiova porin kichiuaj tein tamachtiaj. ¿Timochikauaj tikinpaleuiskej akin xiuejkejya uan akin mokokouaj porin tikinyolikneliaj? (Filip. 2:3, 4.) w17.09 9 § 5; 12 § 14

Miércoles 16 metsti enero

Ma amo titetasojtakan sayo ika totajtoluan san nion sayo ika ten tikijtoaj ika tonenepil. Ta, de yek melau ma titetasojtakan ika nochi ten tikchiutinemij (1 Juan 3:18).

Moneki tikinpaleuiskej tokniuan kemej oksekin amo kimatiskej (Mat. 6:1-4). No moneki tikinpoujkaitaskej oksekin (Rom. 12:10). Jesús kikauak se kuali neskayot keman kinmetspajpakak itatitaniluan (Juan 13:3-5, 12-15). Hasta keman kiselijkej yektikatsin espíritu, uelik kuali kiajsikamatkej keyej Jesús kichiuak nejon (Juan 13:7). Tejuan moneki timochikauaskej tiyeskij tiyolyemankej kemej Jesús. Moneki amo tiknemiliskej ke okachi tiueyichiuanimej porin tikpiaj okachi nemachtil, miak tomin oso porin techmakanij seki tekimej itech nechikol (Rom. 12:3). Uan amo tikinnexikoluiaj akin kiniluiaj ke kuali kichiujkej teisa, ta tiyolpakij maski tiknemiliskej ke no moneki nesis ke titapaleuijkej. w17.10 9 § 9, 10

Jueves 17 metsti enero

Nochi nijin nikchiutinemi sayo ika porin Tajtoltsin de Dios [...] para no ijkon nikselijtiyas [nejua uan oksekin] miak tataman tatiochiualis (1 Cor. 9:23).

Miakej tokniuan kiitanij ke keman kitekitiltiaj iTajtol Dios itech tanojnotsalis semi kinpaleuia taltikpakneminij. Kemej neskayot, se takat akin xiuejya miak xiujmejya kiixtajtoltiaya toamaixuan. Se tonal, tokniuj akin kikalpanouaya kinemilij amo sayoj kikauilis amaix Tanejmachtijkej tein yankuixtok kiska, ta no kiixtajtoltilij itech Biblia se tajkuilol tein ixnesia itech nejon amaix. Katka 2 Corintios 1:3, 4, kampa kijtoua ke “Totajtsin Dios nachipa techyoliknelijtinemi” uan ke techyolseuia itech nochi totajyouilis. Takat kiteluelitak nejon tajkuilol uan kiluij tokniuj maj oksepa kiixtajtoltiliani. Ompa, kijtoj ke yejua uan inamik kitemojtoyaj maj kinyolseuikan uan ke kinekia okachi kimatis tein tamachtia Biblia. Kemej tikitaj, komo tiktekitiltiaj iTajtol Dios itech tanojnotsalis uelis kintelpaleuis taltikpakneminij (Hech. 19:20). w17.09 26 § 9, 10

Viernes 18 metsti enero

Xikxokoli iomiyo uan inakayo, uan yejua yekmelauj mitsuijuikaltis moixtenoj (Job 2:5).

Tein Satanás kijtoj keman kiixnamikik Jiova xa kinkualantij itekitikauan Dios ompa iluikak. Jiova amo kikauak maj ikualanyo kichiualtiani tein amo moneki. Kuali kinemilij tein kichiuas uan kemej kinamikia. Kinextij ke “amo niman kualani” uan ika taixejekolis kichiuak tein monekia (Éx. 34:6; Job 2:2-6). ¿Keyej kikaujtok maj panokan tonalmej? Porin amo kineki maj taltikpakneminij ixpoliuikan, ta “kimonekiltia ke tinochin ma timoyolnemilikan de totajtakoluan” (2 Ped. 3:9). Ineskayo techmachtia ke moneki achto kuali tiknemiliskej tein tikijtoskej uan tein tikchiuaskej. Keman tikixpejpenaskej teisa tein motelneki, maj kuali tiknemilikan uan maj tiktajtanikan Jiova maj techmaka tamatilis tein techpaleuis maj tikchiuakan oso maj tikijtokan tein moneki (Sal. 141:3). Komo tikchiuaj teisa keman tikualantokej, xa tikijtoskej oso tikchiuaskej teisa tein amo kuali. Yejua ika, timiakej tiknemiliaj maj amo tikijtouanij oso maj amo tikchiuanij teisa tein amo tikyeknemilijkej (Prov. 14:29; 15:28; 19:2). w17.09 4 § 6, 7

Sábado 19 metsti enero

Tikuatalilis [corona] Josué ikoneuj Jehozadaq, tayekankatiopixkat (Zac. 6:11).

¿Kijtosnekia nejin ke tayekankatiopixkat Josué mochiuaskia tekiuaj? Amo, porin amo ualeuaya itech ichankauan tekiuaj David. Keman kikuatalilijkej corona kiixnextij se taman tein satepan kipanoskia se tekiuaj uan tiopixkat akin amo keman momikilis akin kitokaytiaj “Itsmol”. Biblia senkis kinextia ke yejua Jesucristo (Is. 11:1; Mat. 2:23). Jesús kichiua tekit kemej tekiuaj uan tayekankatiopixkat, uan kinixyekana ángeles. Chikauak tekiti porin kitemoua maj itekitikauan Dios kuali momachilikan itech nejin taltikpak kampa tel onkak tateuilis (Jer. 23:5, 6). Amo uejkaua, kintanis tekiuajyomej uan ijkon kipaleuis iueyi taixyekanalis Jiova uan itekitikauan yejuatsin (Apoc. 17:12-14; 19:11, 14, 15). Sayoj ke achto ke ejkos nejon tonal, Jesús kipia se ueyi tekit tein moneki kichiuas. w17.10 28, 29 § 12-14

Domingo 20 metsti enero

Nanmoajchiuilijke ya nochi ne tachiualisme ten ualeutok ya tech namotalnamikilis de tajtakol (Col. 3:9).

¿Toni tikchiuaskiaj komo totilmaj amo chipauak uan hasta tsojyak? ¿Melauj ke niman timokixtiliskiaj? No ijkon, komo tikitaj ke tikchiujtokej tein Jiova kitauelita, motelneki maj niman timopatakan. Ne uejkauj, Pablo kiniluij tokniuan: “Xikyekauakan ya nochi nijin tajtakolme”. Semej tajtakolmej tein ika tajtoj yejua auilnemilis (Col. 3:5-9). Keman itech Biblia mokui tajtol auilnemilis, kijtosneki keman se takat uan se siuat akin amo namikuanij mosentekaj, uan keman ome takamej oso ome siuamej mosentekaj. Pablo kiniluij tokniuan: “Xiktajtamitiyakan ya ma miki [...] nijinkes tataman chiualisme: Ma amo xiauilnentinemikan”. Nejin kijtosneki ke moneki senkis timochikauaskej timokixtiliskej amo kuali tanejnekilis. Nejin uelis yeski ouij, sayoj ke uelis timokixtiliskej. w17.08 18 § 5, 6

Lunes 21 metsti enero

Niknextis ke niksentoka nikchia Dios akin nechmakixtia (Miq. 7:7).

Tein tikpanotokej tamati kemej tein kipanok tanauatijkej Miqueas. Yejua nemik itech itonaluan tekiuaj Acaz, akin tel amo yolkuali katka. Ijkuak, mochiuaya nochi taman teikamauiltilis uan taltikpakneminij “tel kuali kimati[aj] kichiuaskej tein amo kuali” (Miq. 7:1-3). Miqueas kimatia ke amo uelia kipataya nejon. Komo titakuaujtamatij kemej yejua, tiknekiskej tikchiaskej maj Jiova kichiua tein motenkauak. Maj titanemilikan itech se takat akin tsaktok uan kichixtok maj ajsi tonal keman kiixtalijkej kimiktiskej. Yejua mochia maski amo kineki maj ajsi nejon tonal. Tein techpanotok semi taman. Kemej tikmatij ke Jiova techmakas nemilis nochipaya ijkon kemej motenkauak uan ke kichiuas keman okachi kuali yeski, tikchiaj ika miak pakilis. Tikchiuaj kemej kijtoua nejin tayolmajxitilis: “[Xikxikokan] ika ueyi pakilis nochi tataman tajyouilis” (Col. 1:11, 12). Jiova semi amo kiyolpaktiskia maj tiktauelchiakan uan maj timokuejmolokan porin tiknemiliaj ke moteluejkaujtok (Col. 3:12). w17.08 4 § 6, 7

Martes 22 metsti enero

Jiova kinketsa akin yolnejmachmej (Sal. 147:6).

¿Keniuj uelis tikseliskej inepaleuil Jiova? Moneki kuali iuan timouikaskej. Uan uelis panos nejin komo tiyolnejmachmej (Sof. 2:3). Akin yolnejmachmej takuaujtamatij ke Jiova kiyektalis tein panoua keman ininka mauiltiaj uan kitamis inintajyouilis. Yejuatsin kintatiochiuia akin yolnejmachmej. Sayoj ke no, “kintamota talpan akin amo yolkualmej” (Sal. 147:6b). Amo tiknekij maj techpano nejin, ta tiknekij maj technextili inetasojtalis tein amo tekaua. Yejua ika moneki tiktauelitaskej tein yejuatsin kitauelita (Sal. 97:10). Kemej neskayot, moneki tiktauelitaskej auilnemilis. Nejin kijtosneki ke moneki amo tikchiuaskej tein yeski taman tein uelis techuikas maj tiauilnemikan, kemej se kiitas auilnemilis (Sal. 119:37; Mat. 5:28). Xa ouij techkisas, sayoj ke amo nenkaj yeski, porin tikpiaskej itatiochiualis Jiova. Uelis tikixtopeuaskej tein amo kuali komo tiktataujtiaj maj techpaleui. w17.07 19, 20 § 11-13

Miércoles 23 metsti enero

Akin kinextilia kualtakayot akin kipanotok tatasojtilis kitaneujtia Jiova (Prov. 19:17).

Ika tein tikpiaj uelis tikinpaleuiskej oksekin itech tanojnotsalis. Ijkon, komo amo tiuelij titanojnotsaj miak tonalmej oso titapaleuitij kampa monekij okachi tanojnotsanij, tiksentokaskej tikinpaleuijtoskej oksekin. Ika tomin tein tiktemakaj, titapaleuiaj maj mochijchiuakan uan maj momoyauakan amaixmej, uan maj motanojnotsa kampa semi tatasojti kampa taltikpakneminij kinekij momachtiskej Biblia. Itech uejueyi altepemej kemej Congo, Madagascar uan Ruanda, tel miak xiujmej tokniuan monekia kiixpejpenaskej ox kikouaskiaj tein kikuaskiaj ininchankauan oso biblias, tein kemansa ininpatiuj tein kitanij itech se semana oso se metsti. Sayoj ke tomin tein ika tapaleuiaj miakej tokniuan kichiua maj ‘momajxiti ne tapaleuilis tein kinpoloua’ okseki tokniuan. Nejin tapaleuij maj itech inechikol Jiova motajtolkepani Biblia uan kinmakanij sejsemej itech kalyetouanij uan akin kinekij kiixmatiskej Dios (2 Cor. 8:13-15). w17.07 9 § 11

Jueves 24 metsti enero

Xitamatkej, nokonetsin, uan xinechyolpakti, uan ijkon uelis niknankilis akin nechkejkeloua (Prov. 27:11).

Tein kipanok Job uelis techyolseuis porin kinextia ke tein tikpanouaj amo kijtosneki ke Dios touan kualantok, ta ika nejon ueli tiknextiaj ke tiknekij maj yejuatsin techixyekana. Komo titaxikouaj, tikseliskej itatiochiualis Jiova uan techpaleuis maj okachi titakuaujtamatikan ke mochiuas tein tikchiaj (Rom. 5:3-5). Tein kipanok Job kinextia ke Jiova “semi teyoliknelia uan teyoltasojta” (Sant. 5:11). Yejua ika uelis tikyekmatiskej ke yejuatsin kintatiochiuis nochin akin kipaleuiaj iueyitaixyekanalis. Tikmatiskej nejin techpaleuia maj tikxikokan nochi ouijkayomej ika yolpakilis uan maj amo tiyolijsiuikan (Col. 1:11). Melauak ke uelis ouij yeski tikelnamikiskej ke tayekantok iueyitaixyekanalis Jiova keman tikpanouaj ouijkayomej. Yejua ika, moneki nochipa tikelnamikiskej ke motelneki tikpaleuiskej. w17.06 25, 26 § 15, 16

Viernes 25 metsti enero

Ximoyekpiakan de nochi tataman yolnejxikolot (Luc. 12:15).

Axkan, miakej kinekij kipiaskej tilmaj tein yankuik kisa, teléfonos, computadoras uan okseki taman. Tiitekitikauan Dios moneki tikitaskej toni okachi tiktayekanaltiaj. Maj timotajtanikan: “¿Okachi itech nitanemilia carros oso okseki taman tein yankuixtok kiskej ke nimomachtis tein moitas itech nechikol? ¿Okachi nikchiua okseki taman uan amo semi nimotataujtiaok nion nikixtajtoltiaok Biblia?”. Komo tikitaj ke okachi tiktayekanaltiaj tikpiaskej miak taman uan amo semi tiktasojtajok Cristo, moneki titanemiliskej itech tajkuilol tein axkan tikitaj. Jesús kijtoj: “Amo aken uelis kintekitilis nijin ome patrones sepa san, ijkon keme Totajtsin Dios uan in ricojyot” (Mat. 6:24). Kemej titajtakouanij, moneki tiksentokaskej timoijkuaniliskej “totanejnekilis de tajtakol”, kampa no poui tiknekiskej tikpiaskej miak taman (Efes. 2:3). w17.05 25, 26 § 15, 16

Sábado 26 metsti enero

Nochi nijin nikchiutinemi sayo ika porin Tajtoltsin de Dios [...] para no ijkon nikselijtiyas [nejua uan oksekin] miak tataman tatiochiualis (1 Cor. 9:23).

Kemej titajtakouanij, titamatij kemej “se sokikomit”. Sayoj ke tein tikteixmatiltiaj kitelpia ipatiuj porin uelis kichiuas maj tejuan uan akin techkakij tikselikan nemilis nochipaya. Tatitanil Pablo mochikauak kinmachtis oksekin toni tatiochiualismej kiualkuis iTekiuajyo Dios (Rom. 1:14, 15; 2 Tim. 4:2). Kisentokak tanojnotsak maski kiteltajyouiltijkej (1 Tes. 2:2). ¿Keniuj no uelis tiknextiskej ke tikpatiuitaj tanojnotsalis? Pablo kinnojnotsaya taltikpakneminij kampa yeski moajsiskia. Ijkon kemej tatitanilmej uan okseki tokniuan itech yekinika siglo, tejuan no titanojnotsaj kampa yeski kampa moajsiskej taltikpakneminij, kampa miakej panouaj uan kajkalpan (Hech. 5:42; 20:20). Maj tiktemokan keniuj tikinnojnotsaskej okachi taltikpakneminij. Xa uelis tikchiuaskej tekit kemej precursor auxiliar oso regular, timomachtiskej okse tajtol oso titapaleuitiuij okseko itech toueyi altepeuj oso itech okse ueyi altepet (Hech. 16:9, 10). w17.06 10, 11 § 8, 9

Domingo 27 metsti enero

Nochi tepeme [...] uan nochi talme ten atsalan [...] majchiuke de kampa ijkatoyaj (Apoc. 6:14).

Miak taman tein amo kuali tein mochiua amo inintajtakol taltikpakneminij, ta inintajtakol taltikpaknechikolmej. Onkakej seki taneltokalismej kampa kinkajkayauaj millones taltikpakneminij. Amo kijtouaj tein melauak kemej tamati Dios uan tein kipanos taltikpak uan taltikpakneminij. No tamachtiaj ke amo uelis se takuaujtamatis itech tein kijtoua Biblia. Uan no, moajsij tekiuanij akin takajkayauaj uan kichiuaj maj onka neteuilismej uan maj kinijtakokan akin taman kemej ixtamatij. Kintajyouiltiaj akin amo kipiaj tomin uan amo ueli mopaleuiaj. Uan no, okachi motomintiaj uan okachi kipiaj tanauatil keman kinpaleuiaj sayoj sekin oso kichiuaj teisa keman kinmakaj tomin. No moajsij uejueyi tekitiloyamej kampa kitemouaj okachi motomintiskej uan amo kintekipachoua kipitsotiliskej taltikpak, kiixpolouaj nochi tein onkak uan ininka mauiltiaj taltikpakneminij uan ijkon sayoj sekin motomintiaj. Biblia kijtoua ke tekiuajyomej uan tein yeski taltikpaknechikol kampa amo kipaleuiskej iTekiuajyo Dios ixpoliuiskej (Jer. 25:31-33). w17.04 12 § 7, 8

Lunes 28 metsti enero

Amo nikualkuis tatsakuiltilis itech itonaluan (1 Rey. 21:29).

Kemej Jiova yejua “akin kiita toyolo”, amo niman kichiuak tein ika kitatsakuiltiskia Acab (Prov. 17:3). ¿Keniuj momachilijkej ichankauan uan itasojikniuan Nabot keman kimatkej nejin? Nejon ueliskia kichiuas maj ouij kinkisani kisentokaskej takuaujtamatiskej iuan. Komo panok nejon, yolyemanilis xa kinpaleuij maj kisentokanij takuaujtamatinij, maj kisentokanij kitekitilianij Jiova uan maj takuaujtamatinij ke yejuatsin amo keman kichiuas tein amo melauak (Deut. 32:3, 4). Satepan, ichankauan Nabot kipiaskej tatiochiualis oksepa kinitaskej yejua uan ikoneuan keman moajokuiskej. Ijkon senkis momelauas tein kinchiuilijkej (Job 14:14, 15; Juan 5:28, 29). Akin yolyemanik kimati ke “Dios akin melauak kimelauas nochi tachiualismej, hasta nochi tein amo moita, yeski kuali oso amo kuali” (Ecl. 12:14). Jiova kiita seki taman tein tejuan amo tikmatij. Yejua ika yolyemanilis techpaleuis maj tiksentokakan titakuaujtamatikan iuan Jiova. w17.04 22, 23 § 8, 9

Martes 29 metsti enero

Se yekmelauj tetasojikniuj nochipa tetasojta (Prov. 17:17).

Kemej onkak miak uejueyi ouijkayomej, miakej tokniuan moneki uejka motepalotiskej. Nejin uelis semi kinouijmakas porin moneki momachtiskej se yankuik tajtol uan nemiskej kemej ompa nemij. No moneki kimatiskej keniuj kiixtauaskej impuestos uan okseki taman, kani kintitaniskej ininkoneuan kaltamachtiloyan uan hasta keniuj kintakakiltiskej. ¿Uelis tikinpaleuiskej ika nejmachkayot uan poujkaitalis? (Filip. 2:3, 4.) Kemansa, tekiuanij kichiuaj maj ouij kinkisa kiajsiskej se nechikol. Seki taltikpaknechikolmej kinmojmoujtiaj keman kiniluiaj ke amo kinpaleuiskejok. Xa kiniluiaj ke komo amo kiseliaj se tekit tein kichiuas maj amo uelikan yakan nechikolmej, amo uelisok nemiskej ompa. Seki tokniuan kiseliaj nejin tekimej porin mouij uan kinemiliaj ke amo uelis kichiuaskej okse taman. Yejua ika, moneki tikintemoskej niman keman ejkoskej itech toueyi altepeuj. Moneki kiitaskej ke ininka timotekipachouaj. Komo tikinikneliaj uan tikinpaleuiaj uelis mochikauas inintakuaujtamatilis (Prov. 12:25). w17.05 5 § 9, 10

Miércoles 30 metsti enero

[Miakej] kikauaske ne tasojtalis (Mat. 24:12).

Keman Jesús moajsia nikan taltikpak, kijtoj ke itech itamian tonalmej “miakke [...] kikauaske ne tasojtalis” (Mat. 24:3). Nejin yekinika kinpanok judíos itech yekinika siglo. Yejuan kijtouayaj ke pouiaj itech ixolal Dios, sayoj ke kikaujkej maj kaxani netasojtalis tein kipialiayaj. Sayoj ke no, tel miakej tokniuan kiteixmatiltiayaj “ke Jesús Yejuatsin Cristo” uan kinextiayaj ke kitasojtayaj Dios, kintasojtayaj tokniuan uan akin ayamo kiixmatiaj tein melauak (Hech. 2:44-47; 5:42). Sayoj ke sekin kikaujkej maj kaxanini ininnetasojtalis. Jesús kiniluij tokniuan akin nemiaj Éfeso: “Amo [tinechtasojta] ok, keme ne achtopa tinechyoltasojtaya” (Apoc. 2:4). Nejin tokniuan xa peuak tanemiliaj kemej akin amo kitekitiliayaj Jiova (Efes. 2:2, 3). w17.05 15, 16 § 1-3

Jueves 31 metsti enero

Yek melau xikchiuati ten timoyektenkauak (Mat. 5:33).

Jefté katka se tel kuali taixyekankej uan se tateuijkej yolchikauak. Ana katka se siuat yolyemanik akin kiyekpiaya inamik uan ichan. Jefté kichiuak ome taman tein Ana no kichiuak. Se, ke kiueyichiuayaj Jiova. Uan okse, ke kichiuilijkej se netenkaualis uan kichiujkej tein motenkaujkej. Yejuan kinkauilijkej se kuali neskayot takamej uan siuamej akin axkan kiixtaliaj motenkauaskej teisa iuan Jiova. Biblia kinextia ke aksa uelia motenkauaya iuan Jiova ke kichiuaskia teisa, ke kimakaskia se netetayokolil, ke kichiuaskia se taman itech itekiyo oso ke amo kichiuaskia seki taman. Amo akin teiluia maj se motenkaua teisa, se motenkaua porin ijkon se kiixtalia. Sayoj ke moneki se kielnamikis ke Jiova kiita ke nejon amo auil uan moneki se kipoujkaitas uan se kichiuas (Gén. 14:22, 23; Heb. 6:16, 17). w17.04 3 § 1, 2

    Amaixmej itech Náhuatl (norte de Puebla) (2003-2025)
    Kampa se kisa
    Kampa se kalaki
    • náhuatl del norte de Puebla
    • Maj se kipanoltili okse
    • Kampa se kipata kemej se kineki
    • Copyright © 2025 Watch Tower Bible and Tract Society of Pennsylvania
    • Kemej kinamiki motekitiltis
    • Keniuj tikyekpiaj tein tikseliaj
    • Kampa mopata seki taman
    • JW.ORG
    • Kampa se kalaki
    Maj se kipanoltili okse