Febrero

Noé amo keman kichijchiujtoya se arca. Yejua ika monekia takuaujtamatis iuan Jiova uan kichiuas nochi tein kinauatijka. ¿Keniuj kipaleuij nejon? Yejua uan ichankauan momakixtijkej itech arca. Uan no, kemej takuaujtamatik itech itaixyekanalis Jiova kuali kiniskaltij ikoneuan. Kuali kinmachtij uan kinkauilij se kuali neskayot. Nejon ouij katka itech nejon tonalmej achto ke mochiuaskia Tetsaujkakiouit (Gén. 6:5). Komo tikonpia konemej, ¿keniuj uelis tikonchiuas nochi tein Jiova mitsonnauatia? Xikonkaki, uan xionmokaua maj mitsonpaleui xikoniskalti mokoneuan ika tein tayolmajxitia itech iTajtol uan itech inechikol. Sayoj ke, maski tetatmej semi mochikauaskej, seki konemej kikauaj Jiova. Maski ijkon, uelis yolseujtoskej. Uan no, uelis kichiaskej maj satepan ininkonetsin mokepa iuan Jiova. w18.03 30 § 10, 11

¿Kemansa tiknekinij tiyeskij tikualtakamej sayoj ke tiknemiliaj ke amo tiuelij? Xa amo semi titajtouaj uan techtekipachoua maj amo tikmatikan toni ika titajtoskej uan maj tasematikan akin tikinyoleujkej. Oso xa amo semi tikpiaj tomin uan tiknemiliaj ke amo keman uelis tikinmakaskej tein kinmakaskiaj okseki tokniuan itech nechikol. Tochan amo moneki tel kuali chijchiujtos. Akin tikinyoleuaskej yolpakiskej komo tachipaujkan uan nochi kuali tayekyetok, uan komo tikchiuaj maj kuali momachilikan. Amo onkak keyej timotekipachoskej, porin tein yekmelauj tayekantok yejua maj tikinnextilikan netasojtalis akin tikinyoleuaj. Maj tikelnamikikan ke nochipa tapaleuia maj tiktemokan maj kuali momachilikan (Filip. 2:4). Miakej kiuelitaj ika tajtoskej tein kipanouanij itech ininnemilis. Uan uelis okachi kuali tikinkakiskej komo iniuan timosentiliaj. Se tayekankej kijkuiloua: “Maj nochan ualakan tokniuan itech nechikol nechpaleuia maj okachi kuali nikinajsikamati uan ueli okachi kuali nikinixmati, okachiok ueli nikmati keniuj kiixmatkej tein melauak”. Komo ininka timotekipachouaj akin tikinyoleuaj, uelis tikyekmatiskej ke tinochin tiyolpakiskej. w18.03 17 § 15-17

Tetatmej kinekij kinpaleuiskej ininkoneuan maj kuali taixpejpenakan. Komo se konet mochia maski uelisya moauis, uelis moijtakos ikuali uikalis iuan Jiova (Sant. 4:17). Achto ke ininkoneuan moauiskej, tetatmej kinekij kiyekmatiskej ke ininkoneuan uelisya mochiuaskej itatojtokakauan Cristo. Seki tokniuan takalpanouanij kiitanij ke miakej telpochmej akin kipiaj kemej 20 xiujmej ayamo moauiaj maski inintatuan itaixpantijkauan Jiova. Miakej youij nechikolmej, tanojnotsaj uan moteixmatiltiaj kemej itaixpantijkauan Jiova. Sayoj ke, ayamo motemaktianij nion moauianij. ¿Keyej? Kemansa, xa porin inintatuan kiniluiaj maj ayamo moauikan. w18.03 8 § 1, 2

Komo tiknekij tiyeskij kemej Cristo, moneki tikixmatiskej keniuj tanemiliaya uan keniuj kichiuaya teisa. Yejua okachi kitayekanaltiaya ikuali uikalis iuan Dios. Tiyeskij kemej yejua okachi techtokia iuan Jiova. Yejua ika, motelneki maj timochikauakan titanemiliskej kemej Jesús. ¿Keniuj? Imomachtijkauan kiitakej keman kichiuak uejueyi tachiualismej, keman kitemakak tanojnotsmej, keniuj kinitaya nochi tataman taltikpakneminij uan keniuj moixyekanaya ika itanemilil Jiova (Hech. 10:39). Tejuan amo ueli tikitaj. Sayoj ke Jiova kichiuak maj tikpiakan amatajkuilolmej Mateo, Marcos, Lucas uan Juan tein techpaleuiaj maj tikmatikan keniuj tanemiliaya. Komo tikinixtajtoltiaj uan itech titanemiliaj, okachi tikmatiskej nejon. Uan ijkon uelis tiktojtokaskej ineskayo ika miak nejmachkayot tein techpaleuis maj titanemilikan kemej yejua (1 Ped. 2:21; 4:1). w18.02 22 § 15, 16

Satepan ke Adán uan Eva peuak kinpiaj konemej, taltikpakneminij kiixmatinij Dios ika eyi taman: keman kiitaj tein kichijchiuak, keman kinkakij okseki itekitikauan uan keman kiseliaj tatiochiualismej porin kitakamatij (Is. 48:18). Keman Noé kiitak itachijchiualis Dios, uelik kiitak miak taman tein kinextia ke yejuatsin nemi uan ke kipia miak kualneskayomej. Ijkon uelik kiajsikamatik ke Jiova kipia miak chikaualis uan ke sayoj yejua Dios akin melauak (Rom. 1:20). Yejua ika, amo sayoj kineltokak Dios, ta senkis iuan takuaujtamatik. ¿Akoni kipaleuij maj kiixmatini Jiova? Xa ichankauan kimachtijkej, kemej ipopaj, Lamec, akin takuaujtamatia iuan Dios uan yolik keman Adán yoltoyaok. Okse yejua Matusalén, akin katka iueyitat, uan Jared, iueyitat Matusalén, akin momikilij keman Noé kipiaya trescientos sesenta y seis xiujmej (Luc. 3:36, 37). Noé kitelpatiuitak tein momachtij uan nejon kiolinij maj kitekitili Dios (Gén. 6:9). w18.02 9 § 4, 5

Komo se tokniuj oso se tochankauj techchiuilia oso techijtouilia teisa, uelis semi techyolkokos. Maj tiknemilikan ke amo ueli tikelkauaj tein techchiuilijkej. ¿Tel miak xiujmej tikualantoskej? ¿Oso niman tikyektaliskej kuejmol kemej tayolmajxitia Biblia? Komo amo niman tikyektaliaj, okachi techouijmakas tikyektaliskej satepan. ¿Toni mitsonpaleuis xikonyektali? Yekinika, xikontataujti Jiova uan xikontajtani maj mitsonpaleui kuali xiontajto iuan tokniuj. Xikonelnamiki ke yejua no itasojikniuj Dios (Sal. 25:14). Jiova kintasojta itasojikniuan uan kichia maj no ijkon tikchiuakan (Prov. 15:23; Mat. 7:12; Col. 4:6). Satepan, kuali xikonnemili tein tikonijtos. Amo xikonnemili ke tokniuj ipa kinekia mitsonyolxokolis. Uan no xikonnemili ke tejuatsin xa no tikonchiuak maj mochiua kuejmol. w18.01 10 § 15, 16

Maski miakej amo tetasojtaj, akin kiueyichiuaj Jiova kinextiaj ke yekmelauj kintasojtaj oksekin. Nejin ipa ijkon mochiuani. Jesús kijtoj ke tanauatilmej tein okachi tayekantoyaj itech tanauatil tein kiselij Moisés yekinika katka maj se kitasojta Dios uan ojpatika maj se kintasojta oksekin (Mat. 22:37-39). No kijtoj ke akin yekmelauj kichiuaj kemej Cristo kinixmatiskiaj porin motasojtaskiaj (Juan 13:35). Hasta kintasojtaskiaj akin kinixnamikij (Mat. 5:43, 44). Jesús kinextij ke kinteltasojtaya taltikpakneminij. Kiteixmatiltijtinemik itech tataman xolalmej tein kuali tein kichiuas iTekiuajyo Dios. Kinpajtij akin amo tachiayaj, koxojmej, akin kipiayaj lepra uan akin amo uelia takakiaj, uan hasta kinajokuik mikemej (Luc. 7:22). Hasta ininka momikilij nochin taltikpakneminij. Senkis kinextij netasojtalis tein kinextia iPopaj. Axkan, itaixpantijkauan Jiova itech nochi taltikpak kichiuaj kemej Jesús uan kinextiaj ke kintasojtaj oksekin. w18.01 29, 30 § 11, 12

Telpoch, xa timoauij keman tikonetok tikatka. Maski ijkon, amo nochipa uelis tikmatis toni ouijkayomej tikpias satepan. Mitspaleuis nochipa xiktakamati Jiova komo tikelnamiki ke timotenkauak iuan akin tekiuajti itech iluikak uan taltikpak ke nochipa tiktekitilis, hasta komo motatuan oso motasojikniuan amo kitekitiliskejok (Sal. 27:10). Itech tein yeski ouijkayot, uelis tiktajtanis Jiova maj mitspaleui xiksentoka xikchiua tein timotenkauak iuan. Yejuatsin kineki ximochiua xiitasojikniuj. Sayoj ke moneki timochikauas tikyekpias nejon kuali uikalis uan tikchiuas tein mitspaleuis ximakisa. Filipenses 2:12 kijtoua: “Xinentinemikan ika yolyemanalis uan xikmouistilijtiyakan Dios”. Yejua ika, moneki kuali tiknemilis keniuj tikyekpias mokuali uikalis iuan Jiova uan keniuj tiksentokas tiktakamatis maski tikpias ouijkayomej. Uan amo xiknemili ke amo teyi mitspanos. Xikelnamiki ke hasta sekin akin miak xiujmej kitekitilijkej Dios kikaujkej. w17.12 24 § 4, 6, 7

Jiova techmaka tatiochiualis maj titapaleuikan itech ueyi tekit tein mochiujtok itech itekiyo. Techiluia ke komo ijkon tikchiuaj techtatiochiuis (Mal. 3:10). Uan motenkaua ke akin kiuelita kitemakas teisa kuali kiyas (Prov. 11:24, 25). No kijtoua ke tiyolpakiskej, porin “kachi yolpaktok in tagat ten tapaleuijtinemi [...] uan ke ne tagat ten sayo kiselia tapaleuilis” (Hech. 20:35). Uan no, ika tein tikijtouaj uan tein tikchiuaj uelis tikinmachtiskej tokoneuan uan akin yankuikej keniuj no uelis tapaleuiskej uan kiseliskej miak tatiochiualismej. Nochi tein tikpiaj Jiova techmaka. Keman tikmakaj tein tikpiaj tiknextiaj ke tiktasojtaj uan ke tiktasojkamatij nochi tein toka kichiuani. Keman israelitas kitemakakej tein ika mochijchiuaskia templo, “xolal yolpakik kitemakas nejin netetayokolilmej” (1 Crón. 29:9). Maj tejuan no tiksentokakan tiyolpakikan keman tikmakaj Jiova tein techmakani. w18.01 21 § 18, 19

Ininneajokuilis akin yaskej iluikak mochiuaskia tepitsin satepan ke peuaskia iyetolis Cristo. Taixpejpenalmej akin yetoskejok nikan taltikpak keman mochiuas okachi ueyi tajyouilis ‘kinuikaskej ejekaixko’ (1 Tes. 4:13-17). Biblia kijtoua: “Dios techtakayojpatas ika ne ijsiukayot ijkon keme kuak se tetsilijkopi [...,] kuak mokakis ne ten sayo tapitsalis den trompeta” (1 Cor. 15:51, 52; Mat. 24:31). Axkan, miakej tokniuan amo taixpejpenalmej uan amo tekiuajtiskej iuan Cristo ompa iluikak. Kichiaj maj ixpoliui itech itonal Jiova tein amo kuali tein mochiujtok. Amo akin ueli kimati kemanian ejkos tamilis, sayoj ke nochi kinextia ke amo uejkaua ejkos (1 Tes. 5:1-3). Satepan, mochiuas okse taman neajokuilis. Millones taltikpakneminij moajokuiskej uan nemiskej itech Xochital nikan taltikpak. Kichiaskej maj Dios kinijkuanili tajtakol uan maj amo kemanok momikilikan. w17.12 11 § 15; 12 § 18, 19

Techpaleuis maj amo titenexikoluikan komo tiknextiaj netasojtalis uan kualtakayot. ITajtol Dios kijtoua ke akin tetasojta “yolyemanik uan kixikoa tajyouilis” uan “amo no kiyolmachilia nexijkolot” (1 Cor. 13:4). No techpaleuis komo tikitaj teisa kemej Jiova kiita. Moneki tikajsikamatiskej ke iniuan tokniuan tipouij itech sayoj se nechikol. Nejin techpaleuis maj tikmachilikan tein oksekin kimachiliaj ijkon kemej kinextiaj nejin tajtolmej: “Kuak se toomiyotsin tikmouiskapixtinemij porin kuali tekititinemi, ijkuakon nochi in oksekin toomiyotsitsin iuan mopaktiaj” (1 Cor. 12:16-18, 26). Ijkon, amo titenexikoluiskej, ta techyolpaktis maj tokniuan kiselikan tatiochiualismej. Jonatán, se ikoneuj tekiuaj Saúl, amo kinexikoluij David porin Jiova amo kiixpejpenak yejua maj mochiua tekiuaj, ta kinextilij netasojtalis uan kualtakayot, uan kiyolchikauak uan kipaleuij (1 Sam. 23:16-18). ¿Uelis tikchiuaskej kemej yejua? w17.11 27 § 10, 11

Jiova kichiuak maj moajsini Tanauatil itech Biblia. Yejuatsin kineki maj tikajsikamatikan uan maj tikchiuakan “tanextililisme ten kachi ueyi”, tein kijtosneki, tamachtilis tein moajsi itech Tanauatil (Mat. 23:23). Tanauatil tein kiselij Moisés kipia “nochi in tamachilis ten yek melauak” tein techpaleuia maj tikixmatikan Jiova uan itanauatiluan tein melaujkej (Rom. 2:20). Kemej neskayot, xolalmej kampa mopaleuiayaj kinmachtia tayekananij maj tamelauakan “ika yekmelauj melaujkayot”. No techmachtiaj tinochin maj timonextilikan “netasojtalis tein amo tekaua uan teiknelilis” (Zac. 7:9). Maski amo monekiok tikchiuaskej tein kijtouaya Tanauatil, Jiova kisentoka kiita ke moneki onkas melaujkayot uan teiknelilis, porin yejuatsin amo mopata. ¡Se ueyi tatiochiualis tiktekitiliskej toDios! Yejua ika, maj tiknextikan ikualtsitsin kualneskayouan uan maj itech timopaleuikan. w17.11 13, 14 § 2, 3; 17 § 18, 19

Tokniuan akin tamachtiaj itech nechikol moneki kiyekitaskej maj Biblia tayekanto itech inintanojnots (Juan 7:16). Yejua ika, kemej tiontemakas tanojnots oso tein tiontetapouis oso neskayomej tein tikontalis xikontemo maj amo okachi tayekanto ke tajkuilolmej tein tikonixtajtoltis. Uan no, xikonelnamiki ke amo sayoj se taman kijtosneki se kiixtajtoltis Biblia ke se tamachtis ika Biblia. Tein melauj, komo tikonixtajtoltia miak tajkuilolmej, miakej akin mitsonkakiskej amo kielnamikiskej. Yejua ika, kuali xikonixpejpena tajkuilolmej uan ika nejmachkayot xikonixtajtolti, xikonmelaua, xikontali neskayomej uan xikonijto keniuj uelis se kitekitiltis (Neh. 8:8). Xikontemo tikonajsikamatis keniuj mouikaj tanemililmej tein kipia bosquejo uan tajkuilolmej tein mokixtiaj itech Biblia. Sayoj ke okachi moneki xikontajtani Jiova maj mitsonpaleui uan ijkon kuali tiontamachtis itanemililuan tein moajsij itech Biblia (Esd. 7:10). w17.09 26 § 11, 12

Itech xiuit 537 achto itech totonaluan israelitas tel yolpakiaj. Moajsikej temako ompa Babilonia setenta xiujmej, sayoj ke axkan kinkaujkaj maj kisanij. Semi kinyolpaktiaya mokepaskej Jerusalén uan kiyekchijchiuaskej templo uan ompa kiueyichiuaskej Dios. Se xiuit satepan kitalijkej itatsineualoni templo. Dieciséis xiujmej satepan, itemplo Jiova ayamo yekchijchiujtoya. Jiova monekik kinelnamiktis ke monekia amo kisentokaskej kitayekanaltiskej inintanejnekilis uan ke monekia mokepaskej iuan. Yejua ika itech xiuit 520 Jiova kititanik tanauatijkej Zacarías maj kinelnamiktiti israelitas keyej kinkixtijka Babilonia. Tokayit Zacarías kijtosneki “Jiova Kielnamikik”. Maski yejuan kielkaujkaj keniuj Jiova kinpaleuijka, yejuatsin amo kinelkaujka (Zac. 1:3, 4). Dios motenkauak ke kinpaleuiskia maj oksepa kiueyichiuanij kemej yejuatsin kiyolpaktia. Sayoj ke no senkis kinnejmachtij ke kiseliskia inintaueyichiualis sayoj komo kiueyichiuayaj ika nochi ininyolo. w17.10 21, 22 § 2, 3

Tamatinij akin kiitaj keniuj tekiti se itanemilil kijtouaj ke se teyoliknelis tepaleuia maj okachi amo tekui kokolis uan maj okachi kuali se mouika iniuan oksekin. Keman tikinpaleuiaj akin tajyouiaj, okachi tiyolpakij uan tikpiaj se kuali tanemilil, amo toselti timomachiliaj uan okachi amo tiknemiliaj tein amo kuali. Semi techpaleuia komo titeyolikneliaj. Komo tikintasojtaj oksekin uan tiktemouaj keniuj tikinpaleuiskej, kuali timomachiliskej porin tikmattoskej ke tikchiujtokej tein Jiova kineki. Uan nejon kichiuas maj timochiuakan okachi kuali tetatmej, namikuanij uan tasojiknimej. Uan no, akin teyolikneliaj nochipa kinpaleuiaj keman moneki (Mat. 5:7; Luc. 6:38). Melauak ke amo titeyolikneliaj sayoj porin techpaleuia, ta porin tiknekij tikueyitaliskej uan tikchiuaskej kemej Jiova, akin itech ualeua netasojtalis uan teyoliknelilis (Prov. 14:31). w17.09 12 § 16, 17

Jesús amo sayoj kiixtalijkej kemej tekiuaj uan tayekankatiopixkat, ta no kiixtalijkej maj kichijchiua “itemplo Jiova”. Itech xiuit 1919, kichiuak nejin keman kikixtij ixolal Dios itech Ueyi Babilonia uan oksepa kiixtalij nechikol. No kiixtalij takeual takuaujtamach uan tamatkej maj kiixyekana tekit tein mochiua itech inechikol Dios nikan taltikpak (Mat. 24:45). Jesús no tachipauani itech ixolal Jiova uan kinpaleuiani itekitikauan maj kitekitilikan Jiova kemej kiyolpaktia (Mal. 3:1-3). Itech iTekiuajyo tein uejkauas Mil Xiujmej, Jesús uan 144,000 tekiuanij uan tiopixkamej kinpaleuiskej taltikpakneminij maj amo kipiakanok tajtakol. Satepan, itech taltikpak sayoj moajsiskej akin kiueyichiuaj Dios. Sayoj moajsis taueyichiualis tein melauak. w17.10 29 § 15, 16

Komo temiktijkej kinekia maj kinextilianij teiknelilis, monekia niman cholos itech xolal kampa mopaleuiayaj tein okachi amo uejka moajsia (Jos. 20:4). Amo kimiktiskiaj komo niman ajsia itech xolal uan mokauaya ompa hasta keman tayekankatiopixkat momikiliskia. Nejon kijtosnekia ke kikauaskia miak taman, kemej tekit tein kipiaya, ichan uan amo ueliskia yajtinemis okseko. Sayoj ke nochi nejon amo nenkaj yeskia. Axkan, tajtakolchiujkej akin moyolnonotsa no moneki kichiuas tein kipaleuis maj Dios kiikneli. Moneki senkis kikauas tajtakol tein kichiujtoya uan amo kichiuas tein uelis kiuikas maj tajtako. Komo tejuan no timochikauaj amo tiksentokaskejok tiueyitajtakoskej, tiknextiliskej Jiova ke techtekipachoua kemej timoajsij uan ke amo tiknemiliaj ke ipa techiknelis (2 Cor. 7:10, 11). w17.11 10, 11 § 10, 11

Jiova technauatia ke moneki tiyeskij tikualtakamej iniuan tokniuan (1 Juan 3:17). Sayoj ke moneki techolinis tein kuali. Maj timotajtanikan: “¿Nikinyoleua nochan sayoj notasojikniuan uan akin kipiaj se ueyi tekit itech nechikol? ¿Nikinyoleua sayoj akin niknemilia ke satepan nechpaleuiskej? ¿Oso nikualtakat iniuan tokniuan akin amo nikinyekixmati oso akin amo uelis nechpaleuiskej satepan?” (Luc. 14:12-14). Maj tiknemilikan ke se tokniuj moneki se kipaleuis porin amo kuali taixpejpenak oso ke aksa akin tikyoleuaj tochan amo keman techtasojkamatiliani. Ijkuak moneki tikchiuaskej tein techyolmajxitia tajkuilol tein axkan tikitaj uan tiyolpakiskej porin techolinia tein kuali (Hech. 20:35). w17.10 9 § 12

Inamik Potifar kiueuelitak José porin “tel chikauak uan kuakualtsin” katka, uan miakpa kitemoj maj iuan moteka. Sayoj ke José amo kitajtolkakik. Uan keman inamik Potifar kikitskij itech itilmaj, José cholojteuak. Ineskayo techmachtia ke kemansa kemej yeskia monekis ticholoskej uan ijkon amo tiktapanauiliskej itanauatiluan Dios (Prov. 1:10). Achto ke mochiuaskiaj itaixpantijkauan Jiova, seki tokniuan tel takuayaj oso tauanayaj, tachichinayaj, kikuiaj drogas oso auilnemiaj. Xa maski moauijkejya, kemansa kinyolnotsas oksepa kichiuaskej nejon. Komo ijkon techpanoua, moneki tikyeknemiliskej ke uelis tikijtakoskej tokuali uikalis iuan Jiova komo amo timoijkuaniliaj tein amo kuali tein tiknejnekij. Maj achto tiknemilikan toni uelis techuikas maj titajtakokan uan keniuj tikixtopeuaskej (Sal. 26:4, 5; Prov. 22:3). Uan komo kemansa timoajsij kampa uelis tikchiuaskej tein amo kuali, maj tiktajtanikan Jiova maj techmaka tamatilis uan maj techpaleui maj ueli timotsakuilikan. w17.09 4, 5 § 8, 9

Se taman tein techpaleuis maj timochiuakan tiitasojikniuan Jiova yejua komo amo tikteltemouaj timotomintiskej uan tikchiuaj tein yekmelauj kipia ipatiuj. Abrahán, akin semi takuaujtamatik iuan Jiova, kinekia mochiuas itasojikniuj. Yejua ika, kitakamatik, kisak itech xolal Ur uan nemik itech takenkalmej (Heb. 11:8-10). Nochipa takuaujtamatik iuan Jiova uan amo itech tomin oso okseki taman (Gén. 14:22, 23). Satepan, Jesús kiluij se telpoch akin tominpiaya maj no ijkon takuaujtamatini. Yejua kiluij: “Komo tikneki tiyekchipaukanemis, ijkuakon xiyo xiknamakati nochi ten moaxka uan xikinxejxeluili in taka ten amo teyi kipiaj ten kuaske. Uan ijkon tikpias in ueyi pakilis uan yek yetolis nepa eluiyaktsinko. Uan xiuiki nouan” (Mat. 19:21). Nejon telpoch amo takuaujtamatia kemej Abrahán, sayoj ke oksekin kemaj kinextianij ke senkis takuaujtamatij iuan Jiova. w17.07 10 § 12

Satepan ke Abrahán kipanauij ueyiat Éufrates, panokej cuatrocientos treinta xiujmej hasta keman ikoneuan mopoujkej kemej altepet tein moajsiskia itech Tal tein Dios motenkaujka kimakas (Éx. 12:40-42; Gál. 3:17). Abrahán amo kiitak keniuj mochiuak nochi tein Dios motenkaujka iuan, sayoj ke mochiak ika nejmachkayot porin takuaujtamatia iuan (Heb. 11:8-12). ¿Tiknemiliaj keniuj semi yolpakis keman moajokuis itech Xochital? Kimoujkaitas keniuj Biblia ika tajtoua yejua uan ikoneuan. No semi yolpakis keman kiajsikamatis ke itechkopa mochiuak tein Jiova kiixtalijtoya ika Mesías. Tein melauj, kiitas ke maski uejkauak mochiak, amo nenkajtik. w17.08 5, 6 § 10, 11

Itech Biblia, nejin tajtolmej amo sayoj kijtosneki auilnemilis. Uelis kijtosnekis tachiualismej kemej tachichinalis oso komo nochipa se kamanaloua ika tajtolmej tein pitsotikej (2 Cor. 7:1; Efes. 5:3, 4). No uelis kijtosnekis tein amo kuali tein kichiuaj taltikpakneminij keman moajsij ininselti, kemej kiixtajtoltiskej amaixmej tein kichiua maj kinekikan auilnemiskej oso kiitaskej auilnemilis. Nejin uelis kichiuas maj aksa peua momajmatoka. Akin kiitaj auilnemilis okachi kinejnekij motekaskej iuan aksa uan amo ueli motsakuiliaj. Seki motelmachtianij kiitanij ke akin kiteluelitaj kiitaskej auilnemilis tamatij kemej akin kikuij droga oso tauanaj. Yejua ika, taixejekol maj no kintelijtako, porin uelis semi mopinaujmatiskej, amo kuali tekitiskej, amo yolpakiskej iniuan ininchankauan, kikauaskej ininnamik uan hasta momiktiskej. w17.08 19 § 8, 9

Akin kijkuiloj nejin itech tanemilijtoya keniuj Jiova kinpaleuijtoya israelitas keman mokepkej Jerusalén. Semi kiyolseuiaya kimatis ke Dios kichiuaskia maj puertas tein moajsiaj Jerusalén moajsinij chikaujkej uan ijkon kinmatampauiskia itekitikauan. Xa tikpanouaj ouijkayomej tein semi techtekipachouaj. Sayoj ke Jiova uelis techmakas tamatilis. Akin kijkuiloj Salmo 147 kijtoj ke Dios “kititani itanauatil itech taltikpak; itajtol ijsiujka motaloua”. No kijtoj ke “kititani sekti kemej tojmit”, “kimoyaua sekti kemej yeskia koujnex” uan “kipankajkaua tesiuit”. Satepan tajtanik: “¿Akoni ueli kixikoua isesekyo?”. Uan ika tamik, kijtoj ke Jiova “kititani itajtol, uan yejuan patij” (Sal. 147:15-18). Jiova ueli kichiua maj uetsi sekti uan tesiuit porin kiixmati nochi uan nochi ueli kichiua. Yejua ika no uelis techpaleuis maj tikxikokan tein yeski ouijkayot. w17.07 20 § 14, 15

Jiova kinamiki taixyekanas, uan itaixyekanalis yejua tein okachi kuali uan kinamiki maj tikpaleuikan ika nochi toyolo. ¿Keyej? Porin kichijchiuak nochi. Yejua ika senkis kinamiki kinixyekanas taltikpakneminij uan ángeles. Satanás nion tepitsin kinamiki taixyekanas porin amo teyi kichijchiuak. Keman yejua uan Adán uan Eva kiixnamikkej iueyitaixyekanalis Jiova, kinextijkej ke moueyinekiaj (Jer. 10:23). Melauak ke ueliaj ininselti taixpejpenayaj uan yejua ika ueliskiaj ininselti moixyekanaskej, sayoj ke ¿kinnamikia ininselti moixyekanaskej? Amo. Tejuan ueli tikixpejpenaj mojmostaj tein tikchiuaskej, sayoj ke nejon amo kijtosneki ke uelis tikixnamikiskej toTachijchiujkauj. Komo ijkon tikchiuaskiaj, tiktekitiltijtoskiaj totaixpejpenalis kemej amo technamiki. Tinochin moneki maj Dios techixyekana. w17.06 27, 28 § 2-4

Komo tikpatiuitaj tanojnotsalis, ijkon kemej Pablo, tiksentokaskej titanojnotsaskej maski techtajyouiltiskej (Hech. 14:19-22). Itech xiuit 1930 hasta 1944, tokniuan kayomej Estados Unidos semi kintajyouiltijkej. Sayoj ke, kisentokakej tanojnotskej. Keman tekiuanij kinekiaj kintsakuiliskej, tokniuan yajkej ininixpan tamelauanij uan miakpa tatankej. Itech xiuit 1943, tokniuj Nathan Knorr ika tajtoj keman se tonal tatankej itech Tribunal Supremo de Estados Unidos. Yejua kijtoj ke komo tokniuan amo kisentokanij tanojnotsanij amo onkaskia nion teyi tein moitaskia ininixpan tamelauanij uan ke kinextijkej ke amo teyi uelis kintsakuilis. Kemaj, kemej tikpatiuitaj tanojnotsalis, tiksentokaskej titanojnotsaskej maski techtajyouiltiskej. Uan no, amo sayoj techtekipachos kanachi horas titemakaskej, ta titanojnotsaskej nochi tein tiueliskej (2 Tim. 4:5). w17.06 11, 12 § 11, 12

Netasojtalis tein tikpialiaj Jiova techolinia maj tiktakamatikan, techpaleuia maj tikxikokan ouijkayomej uan maj tiktauelitakan tein amo kuali (Sal. 97:10). Sayoj ke Satanás uan nochi tein kiixyekana kitemouaj maj amo tiktasojtakanok Dios. Akin amo kiixmatij Jiova taman kiitaj netasojtalis. Yejuan amo kitasojtaj Dios, ta ‘motasojtatinemij yejuan san’ (2 Tim. 3:2). Kitayekanaltiaj “tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok” (1 Juan 2:16). Tatitanil Pablo technejmachtij tein uelis techpanos komo tiktayekanaltiaj totanejnekilis keman kijtoj: “Kuak tikyoltanemilijtinemij sayo itech totalnamikilis ten kualkui tajtakol, ijkuakon yejua ne techuika ya tech in ixpoliuilis”. Uan no kijtoj ke akin kitayekanaltiaj inintanejnekilis kiixnamikij Dios (Rom. 8:6, 7). Akin sayoj kitemouaj motomintiskej oso auilnemiskej semi amo yolpakij (1 Cor. 6:18; 1 Tim. 6:9, 10). w17.05 16 § 5, 6

Keman tokniuan tepalyetonij amo tel tajtanij uan kitasojkamatij maj kinpaleuikan, tokniuan kinpaleuiskej ika pakilis. Sayoj ke motelneki maj satepan kitemokan ininselti moitaskej. Ijkon, kuali momachiliskej uan kisentokaskej kuali mouikaskej iniuan okseki tokniuan (2 Tes. 3:7-9). Maski ijkon, moneki tikinpaleuiskej. Amo moneki tikpiaskej miak tomin, ta okachi kitasojkamatiskej komo iniuan tiyetokej uan tikintasojtaj. Uelis tikinnextiliskej keniuj yaskej itech tepos oso keniuj kikouaskej kuajkuali takual tein amo patiyoj. Oso uelis tikinnextiliskej keniuj kiajsiskej manamikmej tein ika tekitiskej oso keniuj uelis kichiuaskej seki taman tein kinpaleuis maj ika moixpanoltikan. Uan tein okachi moneki, uelis tikinpaleuiskej maj kuali momachilikan itech nechikol. Komo ueli, uelis tikinuikaskej nechikolmej. No uelis iniuan titanojnotsaskej uan tikinnextiliskej keniuj okachi kuali uelis kinnojnotsaskej akin nemij itech toxolal. w17.05 6 § 11, 12

Miakej senkis kitayekanaltiaj inintanejnekilis, yejua ika kiteltemouaj motomintiskej, porin amo ueli kiitaj toni Dios kiita ke okachi moneki (1 Cor. 2:14). Kemej amo yektanemiliaj, amo ueli kiitaj tein kuali yetok uan tein amo kuali yetok (Heb. 5:11-14). Xa okachi kinekij kipiaskej okachi miak taman. Uan keman kipiajya, okachi kinekij okseki (Ecl. 5:10). Sayoj ke uelis timoijkuaniliskej nejin tanemilil. ¿Keniuj? Moneki tikixtajtoltiskej Biblia. Jesús tanemiliaya itech itamatilis Jiova, yejua ika uelik taxikoj keman Amokuali kitemoj kichiuas maj tajtako (Mat. 4:8-10). No ijkon tejuan, komo amo tiknekij tiktayekanaltiskej tikpiaskej okachi miak taman, moneki tikchiuaskej tein Jiova techyolmajxitia. Ijkon, tiknextiliskej Jesús ke okachi tiktasojtaj yejua ke okseki taman. w17.05 26 § 17