Diciembre

Ne uejkauj, taltikpakneminij momattoyaj kinyoleuaskej oksekin maj takuatij ininchan porin ijkon kinextiayaj ke kinekiaj kuali mouikaskej iniuan (Gén. 18:1-8; Juec. 13:15; Luc. 24:28-30). ¿Akonimej okachi moneki tikinyoleuaskej? Tokniuan itech nechikol. Moneki tikinpiaskej totasojikniuan akin amo techkauaskej uan kuali timouikaskej iniuan nochin, porin keman ejkoskej tonalmej tein ouijkej monekis timosenpaleuiskej. Tokniuan takalpanouanij, tokniuan akin kiseliaj se tamachtilis tein motemaka itech inechikol Dios uan akin tapaleuiaj itech kalchiualis moneki kipiaskej kani mokauaskej. Uan no, keman mochiuaj tetsaujmej, sekin moneki kipiaskej kani mokauaskej hasta maj kinyekchijchiuilikan ininchan. Moneki amo tiknemiliskej ke sayoj akin kipiaj uejueyi kalmej uelis tapaleuiskej. Tein melauj, xa miakpaya kichiuanij. ¿Uelis tejuan tikinseliskej maski tochan amo ueyi? w18.03 15 § 6; 16 § 9

¿Keniuj uelis moajokuis akin uetsi? Amo ika ichikaualis, ta ika inepaleuil iyektikatsin espíritu Dios (2 Cor. 4:7). Itech itakilo espíritu poui maj ueli se motsakuili. No kipaleuis komo kitataujtia Dios, momachtia Biblia uan tanemilia. Sayoj ke ¿toni uelis mitsonpaleuis komo ouij mitsonkisa tionmomachtis Biblia oso amo tikonuelita tionmomachtis? Amo xionmosenkaua. Jiova mitsonpaleuis xikonneki tikonixmatis iTajtol komo tejuatsin tikonselia inepaleuil (1 Ped. 2:2). Yekinika, xikontajtani maj mitsonpaleui xikonixtali tionmomachtis iTajtol. Xa uelis peuas tionmomachtis seki minuto. Yolik, okachi amo ouij mitsonkisas tionmomachtis uan mitsonyolpaktis keman tiontanemilis itech itanemililuan Jiova ijkuak amo teyi mitsonkuejmolojtos (1 Tim. 4:15). w18.03 29 § 5, 6

Achto ke moauis, akin momachtijtok Biblia moneki kiajsikamatis keniuj yekmelauj tamati Dios, tein kiixtalijtok kichiuas uan toni kichiuak tein ika techmakixtis (1 Tim. 2:3-6). Ompa moneki kipias takuaujtamatilis, tein kipaleuis maj kitakamati itanauatiluan Dios uan maj amo kichiuaok tein kitauelita (Hech. 3:19). Nejin motelneki, porin yejuatsin amo kiselia inetemaktilis akin kisentoka kichiua tein amo kuali (1 Cor. 6:9, 10). Sayoj ke amo sayoj moneki maj kitakamati itanauatiluan Dios. No moneki yas nechikolmej, tanojnotsas uan tamachtis (Hech. 1:8). Satepan ke peuas kichiuas nochi nejin, uelis kichiuilis Jiova se netataujtil kampa motemaktis iuan, uan satepan moauis. w18.03 6 § 12

¿Keyej Jiova kiixpejpenak María maj mochiua imomaj Jesús? Porin kikauak maj iespíritu kiixyekanani. Yejua kiueyitalij Jiova ika kualtsitsin tajtolmej keman kinkalpanoj ichankauan, Zacarías uan Elisabet (Luc. 1:46-55). Tein kijtoj kinextia ke semi kitasojtaya iTajtol Dios uan ke kuali kiixmatia Escrituras Hebreas (Gén. 30:13; 1 Sam. 2:1-10; Mal. 3:12). Uan keman yejua uan José monamiktijkej, amo mosentekkej hasta satepan ke yolik Jesús. Nejin kinextia ke yejuan okachi kitayekanaltiayaj itanejnekilis Jiova ke inintanejnekilis (Mat. 1:25). Uan no, María kiitak ika nejmachkayot tein kichiuak uan kijtoj Jesús. Semi itech tanemiliaya keniuj mochiuaskia tein Dios motenkaujka ke panoskia iuan Mesías. Maj tikchiuakan kemej yejua uan maj tiknemilikan keniuj tiktayekanaltiskej itanejnekilis Dios. w18.02 21 § 11

¿Keniuj uelis titakuaujtamatiskej uan titatakamatiskej kemej Job? Itech tein yeski ouijkayot, maj nochipa tiktayekanaltikan Jiova, maj senkis iuan titakuaujtamatikan uan maj tiktakamatikan ika nochi toyolo. Tein melauj, tikpiaj okachi miak taman ke Job tein techolinia maj tikchiuakan nejon. Tejuan tikmatij miak taman kemej tamati Satanás uan kemej takajkayaua (2 Cor. 2:11). Ika tein kijtoua Biblia, kemej itech amatajkuilol Job, tikmatij keyej Dios kikaua maj onka tajyouilis. Uan no, tein kijkuiloj Daniel techpaleuia maj tikajsikamatikan ke iTekiuajyo Dios se taixyekanalis tein moajsi imako Jesucristo (Dan. 7:13, 14). Uan tikmatij ke amo uejkaua nejon Tekiuajyot senkis kitamis nochi tajyouilis. Tein kipanok Job no kinextia ke moneki tikinikneliskej tokniuan akin tajyouiaj. Kemansa xa amo kinemiliskej tein kijtoskej, kemej kichiuak Job (Ecl. 7:7). Sayoj ke, maj amo tikinijijtokan oso maj tikijtokan ke kichiujkej tein amo kuali, ta maj tiktemokan tikinajsikamatiskej. Ijkon, tikchiujtoskej kemej Jiova, toTajtsin tetasojtakej uan teiknelijkej (Sal. 103:8). w18.02 6 § 16; 7 § 19, 20

Sekin peua moueyinekij porin kualtsin moitaj, kintelixmatij, ueli tatsotsonaj, chikaujkej oso porin oksekin kinmoujkaitaj. Maski David kipiaya nochi nejon, nochipa kinextij yolyemanilis. Kemej neskayot, keman kimiktij Goliat, tekiuaj Saúl kiluij ke ueliskia monamiktis iuan iichpoch. Sayoj ke David kinankilij: “¿Niakoni nejua [...], uan ijkon maj nimochiua imontikauj tekiuaj?” (1 Sam. 18:18). Tiitekitikauan Jiova timochikauaj tiyeskij tiyolyemankej kemej David. Tikmoujkaitaj tikmatiskej ke Jiova yolyemanik maski yejuatsin akin okachi Ueyichiujkej. Timochikauaj tiktakamatiskej nejin tajtolmej: “Ximoyankuikatalilikan ne teiknelilis uan ne tetasojtalis. Uan amo no ximoueyinektinemikan. Ta, xikpixtiyakan ne yolyemanilis uan no xikijyouikan nochi tataman ouijkayot” (Col. 3:12). Uan no, tikmatij ke akin tetasojta “amo moueyinektinemi uan amo no moueyimatinemi” (1 Cor. 13:4). Taltikpakneminij uelis kinekiskej kiixmatiskej Jiova komo kiitaj ke tiyolyemankej. w18.01 28 § 6, 7

Xa monekis titapaleuiskej ika tomin keman mochiuas se taman tekit (Hech. 4:34, 35; 1 Cor. 16:2). Kemej neskayot, itech tonechikol xa moixtalijtok mochijchiuas se Kali kampa tiMosentiliaj. Oso xa moneki tomin tein ika motaxtauas tein moneki itech toueyi nechikol oso tein ika kinpaleuiskej tokniuan kampa mochiuak se tetsauit. Tomin tein titemakaj no ika kinpaleuiaj misioneros, precursores especiales, takalpanouanij uan akin tekitij itech ueyi kali kampa techixyekanaj uan itech sucursales tein moajsij itech nochi taltikpak. Tinochin uelis titapaleuiskej maj mochiua itekiyo Jiova itech nejin itamian tonalmej. Tomin tein miakpa motemaka, amo momati akoni kitemakak. Keman tiktaliaj itech kaxomej tein moajsij itech Kali kampa tiMosentiliaj oso tiktitanij itech jw.org, amo tikchiuaj maj oksekin kimatikan kanachi titemakakej. Xa tiknemiliskej ke tepitsin tomin tein titemakaj amo semi tapaleuia. Sayoj ke tein melauj, miak tapaleuil tein kiselia inechikol Jiova mosentilia porin miakej tokniuan tapaleuiaj ika tepitsin tomin uan amo porin sayoj seki tokniuan tapaleuiaj ika miak tomin. w18.01 19 § 10, 11

Nochin akin kichiuaj kemej Cristo moneki moauiskej, porin tepaleuia maj se makisa (Mat. 28:19, 20). Telpoch, keman timoauij timotenkauak ke tiktasojtas Jiova uan tiktayekanaltis itanejnekilis. Amo keman xiknemili ke amo kuali tein tikchiuak porin tikixpejpenak maj Jiova mitsixyekana. Tein melauj, komo amo tiktekitilia Jiova, tikauas maj Satanás mitsixyekana. Uan yejua amo kitemoua ximomakixti, ta kitelyolpaktiskia xikpolo nemilis nochipaya tein tikchia tikselis porin yejua tikpaleuia uan tikixtopeuak Jiova. Xiknemili toni tatiochiualismej tikseliani porin timotemaktij uan timoauij. Axkan ke timotemaktijya iuan Jiova, uelis tikijtos ika takuaujtamatilis: “Jiova nouan yetok; amo nimouis. ¿Toni uelis nechchiuilis taltikpaknenkej?” (Sal. 118:6). Amo onkak okse okachi ueyi tatiochiualis ke se kitekitilis Dios uan se kipias itatiochiualis. w17.12 23, 24 § 1-3

Kemansa, tokniuan kichiuaskej oso kijtoskej seki taman tein techkualantis uan kemansa tejuan tikinkualantiskej. Nejin uelis yeski se ueyi ouijkayot. Sayoj ke no techpaleuia maj tiknextikan ke tiktakamatij Jiova. ¿Keniuj? Keman timochikauaj tisentekitiskej iniuan tokniuan. Jiova kintasojta maski tajtakouanij, uan tejuan no ijkon moneki tikchiuaskej. Jiova kikaua maj itekitikauan kipanokan ouijkayomej, ijkon kemej kinextia tein kipanok José. Keman telpochok katka, kiuikakej Egipto porin itakpaikniuan kinamakakej kemej takeual porin kinexikoluiayaj (Gén. 37:28). Dios semi kiyolkokoj kiitas keniuj kitajyouiltiayaj itasojikniuj uan itekitikauj. Sayoj ke amo kitsakuilij nejon. Uan amo no kimakixtij keman satepan kipantijkej ke kinekia ika mauiltis inamik Potifar uan kitsakkej. Sayoj ke ¿Dios kisenkauak José? Amo. Biblia kijtoua ke “Jiova kichiuak maj kuali kikisa tein yeski tein kichiuaya” (Gén. 39:21-23). w18.01 9, 10 § 12-14

¿Toni tein tikneltokaj okachi tayekantok? Xa tikijtoskiaj ke Jiova kichijchiuak nochi tein onkak uan ke yejuatsin techmakatok tonemilis. No tikijtoskiaj ke tikneltokaj Jesucristo, akin kiixtauak totajtakoluan keman momikilij, uan ke satepan tinemiskej nochipaya itech Xochital. Sayoj ke ¿ika titajtoskiaj neajokuilis? Maski tikchiaj timakisaskej keman mochiuas okachi ueyi tajyouilis uan tinemiskej nochipaya nikan taltikpak, onkak miak taman tein kinextia ke uelis tikijtoskej ke neajokuilis no se tamachtilis tein tayekantok. Nejin tamachtilis motelneki. Komo Jesús amo moajokuiskia, axkan amo tekiuajtitoskia uan nenkaj yeskia tikteixmatiltiskej (1 Cor. 15:12-19). Sayoj ke tikyekmatij ke Jesús moajokuik uan tiksentokaj titakuaujtamatij itech neajokuilis (Mar. 12:18; Hech. 4:2, 3; 17:32; 23:6-8). w17.12 8 § 1, 2

Fariseos sayoj kiitayaj tein tajtakolchiujkej kichiujka uan amo keniuj yekmelauj katka. Keman Jesús takuato ichan Mateo, fariseos kintajtanijkej imomachtijkauan: “¿Keye namotamachtijkau takuajtok iuan ne tatopaluiani uan in taka ten amo tatakamatinemij[?]”. Jesús kinnankilij: “Ten mopouaj yolpaktokke, yejuan nojonkes amo monekij tepajtijke. Ta, namechilia ke sayo in kokoyani monekij tepajtijke. [...] Xiyakan uan xikyekajsikamatikan toni kijtosneki nijin tajtol de Tajtoltsin de Dios: ‘Nikneki xiteyoliknelikan uan amo nikneki sayo xinechtayokolikan tapialme para ika nannechmouistiliske’. Nejuatsin amo niuala nikintemoko naken mopouaj yolchipauke. Ta, sayo nikintemoko tajtakolejke” (Mat. 9:9-13). ¿Kintenpaleuijtoya Jesús tajtakolchiuanij? Amo. Yejua kinekia maj moyolnonotsanij. Tein melauj, yejua nejon se taman tein tayekantoya itech itanojnotsalis (Mat. 4:17). Sayoj ke Jesús kiitaya ke seki “tatopaluiani uan in taka ten amo tatakamatinemij” kinekiaj mopataskej. Amo sayoj yajkaj takuatoj ichan Mateo, ta miakej katkaj itatojtokakauan (Mar. 2:15). Sayoj ke, miakej fariseos amo kinitayaj kemej Jesús kinitaya. w17.11 13 § 2; 16 § 15

Tinochin tiyolpakij tipouiskej itech inechikol Dios. Nemachtil ika iTajtol Dios itech nechikolmej uan keman timopaleuiaj ika netasojtalis uan kualtakayot techpaleuia maj amo tikelkauakan netetayokolil tein tikchiaj. Sayoj ke, keman amo kuali moajsikamati tein se tokniuj kichiua oso kijtoua, kemansa uelis kichiuas maj onka kuejmolmej. Komo amo tikyektaliaj nejin kuejmolmej, uelis nochipa tikualantoskej iniuan (1 Ped. 3:8, 9). ¿Toni techpaleuis maj tokualanyo amo kichiua maj amo tikselikan netetayokolil? Pablo tayolmajxitij: “Dios namechyoltasojtak uan namechijitak para iuantsin xipoutinemikan uan no namechyolchipauak. Ika ya nojon ximoyankuikatalilikan ne teiknelilis uan ne tetasojtalis. Uan amo no ximoueyinektinemikan. Ta, xikpixtiyakan ne yolyemanilis uan no xikijyouikan nochi tataman ouijkayot. Uan no ximoijyouilijtiyakan se uan okse in tataman de namotamachilisuan. Uan no ximotapojpoluijtiyakan se uan okse, ijkon keme kuak se aksa kiyolxokolia. Uan ijkon keme [Jiova, TNM] namechtapojpoluij ya, namejuan no ximotapojpoluijtiyakan” (Col. 3:12, 13). w17.11 27 § 7, 8

Keman se israelita kimiktiaya aksa maski amo kinekia, monekia cholos itech se xolal kampa mopaleuiayaj uan ikalakyan xolal monekia kinmelauilis tayekananij tein kichiujka. Yejuan monekia kuali kiseliskej. Tepitsin satepan, monekia oksepa kititaniskej kampa temiktijka uan ompa kimelauaskiaj tayekananij (Núm. 35:24, 25). Komo tayekananij kiitayaj ke amo kiixtalijka temiktis, kikauayaj maj mokepa itech xolal kampa mopaleuijka. ¿Keyej temiktijkej monekia tajtos iniuan tayekananij? Porin yejuan monekia kichiuaskej maj xolal Israel moajsini chipauak uan kipaleuiskej temiktijkej maj kiseliani iteiknelilis Jiova. Se motelmachtijkej kimelauak ke komo temiktijkej amo iniuan tajtouaya tayekananij, ueliskia kimiktiskej porin amo kitemojka kiselis nepaleuil tein Dios kiixtalijka. Komo amo mopaleuiaya itech semej nejon xolalmej, takat akin momakepaya ueliskia kimiktis. w17.11 9 § 6, 7

Jiova kinmatampauia itekitikauan uan kinyolchikaua ika ininnepaleuil ángeles (Mal. 3:6; Heb. 1:7). Keman itech xiuit 1919 ixolal Jiova peuak amo moajsiok imako Ueyi Babilonia, taneltokalis tein melauak kisentokani moskaltiani maski taixnamikinij kitemouanij kitsakuiliskej (Apoc. 18:4). Kemej ángeles techmatampauiaj, amo onkak keyej tikmouiliskej maj ixolal Dios oksepa moajsi imako taneltokalis tein amo melauak (Sal. 34:7). Tikyekmatij ke tiksentokaskej tiktekitiliskej toDios ika yolpakilis. Itateuijkauan Jiova techpaleuiskej. Keman mochiujtos okachi ueyi tajyouilis, ángeles kinmatampauiskej itekitikauan Dios uan kinixpoloskej akin kiixnamikij iueyi taixyekanalis (2 Tes. 1:7, 8). ¡Tel kualtsin yeski nejon tonal! w17.10 28 § 10, 11

Komo se tochankauj kikalankixtiaj itech nechikol oso kijtoua ke amo kineki maj kiixmatikanok kemej itaixpantijkauj Jiova, techteltayokoltia, techkokoua kemej yeskia techtsoponiaj ika se espada. ¿Toni uelis tikchiuaskej? Moneki tiksentokaskej tikchikauaskej totakuaujtamatilis. Yejua ika moneki nochipa tikixtajtoltiskej Biblia, timomachtiskej tein moitas itech nechikolmej uan tiyaskej, tiksentokaskej titanojnotsaskej uan tiktajtaniskej Dios chikaualis tein techpaleuis maj titaxikokan (Jud. 21). Sayoj ke ¿komo tiksentokaj titayokoyaj? Maj amo timosenkauakan. Maj tiksentokakan tiktayekanaltikan itekiyo Jiova, porin nejon techpaleuis maj amo tiksentokakan itech titanemilikan uan maj kuali timomachilikan. Maj tikitakan tein kipanok akin kijkuiloj Salmo 73. Yejua peuak kiita nochi ika se amo kuali tanemilil, uan nejon kichiuak maj moteltekipacho. Sayoj ke kemej kisentokak kitekitilij Jiova, nejon kipaleuij maj kipatani itanemilil (Sal. 73:16, 17). Nejon no uelis techpaleuis tejuan. w17.10 16 § 17, 18

Keman Satanás tajtoj iuan Eva itech xochital tein moajsia Edén, kinextij ke kemej yeskia kinekia kipaleuis. Sayoj ke tein melauj kikajkayaujtoya (Gén. 3:4, 5). Ahitofel kinextij ke kemej yeskia katka itasojikniuj tekiuaj David, sayoj ke kinekepilij keman kiitak ke okachi kuali nemiskia (2 Sam. 15:31). Axkan, akin kikaujkej uan kiixnamikij tamachtilis tein melauak uan oksekin akin kitemouaj kinxexeloskej tokniuan “kinxochinojnotsaj” uan kinueyitaliaj tokniuan uan ika kichiuaj maj kinemilikan ke kintasojtaj. Sayoj ke tein melauj sayoj kitayekanaltiaj inintanejnekilis (Rom. 16:17, 18). Semi tepinaujtij komo se kinextia ke kemej yeskia se tetasojta. Xa uelis tikinkajkayauaskej oksekin, sayoj ke amo Jiova. Jesús kijtoj ke “kichikaukatatsakuiltis” akin takajkayaua (Mat. 24:51). Yejua ika moneki timotajtaniskej: “¿Yekmelauj nitetasojta uan amo sayoj notech nitanemilia nion niktemoua nitekajkayauas?”. w17.10 8 § 6-8

Keman tikixtajtoltiliaj Biblia se taltikpaknenkej, kemej yeskia tikauaj maj Jiova kinojnotsa. Se tajkuilol tein kuali tikixpejpenaskej kipia okachi chikaualis ke tein yeski taman tein tikijtoskej (1 Tes. 2:13). Yejua ika maj timotajtanikan: “Itech tanojnotsalis, ¿nimochikaua nikixtajtoltis tajkuilolmej itech Biblia nochipa keman niueli?”. Sayoj ke moneki amo sayoj tikixtajtoltiskej tajkuilolmej. Ijkon kemej panouaya itech yekinika siglo, axkan tel miakej amo kiajsikamatij tein kijtoua Biblia. Yejua ika moneki amo tiknemiliskej ke aksa kiajsikamati se tajkuilol sayoj porin tikixtajtoltilijkej. Uelis tikpaleuiskej komo oksepa tikijtouaj tajtolmej tein tayekantokej uan tikmelauiliaj. Ijkon, iTajtol Dios uelis senkis kipaleuis (Luc. 24:32). w17.09 25 § 7, 8

Jiova kinnauatia itekitikauan maj kinyoliknelikan tokniuan uan oksekin (Juan 13:34, 35). “Se teyoliknelis” uelis momelauas kemej “se tajyouis iuan aksa”. Akin teyoliknelia kitemoua kinpaleuis akin tajyouiaj. Maj tiktemokan keniuj uelis tikchiuaskej. Miakej tokniuan kinyolikneliaj akin tajyouiaj keman mochiua se tetsauit. Miakej kimatij ke itekitikauan Jiova tapaleuiaj keman panoua nejon (1 Ped. 2:17). Se tokniuj siuat kayot Japón nemia itech se xolal kampa tel tauejueliuik porin talolinik uan ueyiat uejkapan moajkotamotak itech xiuit 2011. Kijtoj ke semi kiyolchikauak uan kiyolseuij kinitas tel miakej tokniuan kayomej ompa Japón uan okseki uejueyi altepemej kiyekchijchiujtoyaj ininchan oksekin uan Kalmej kampa tiMosentiliaj. Yejua no kijtoj: “Nochi tein nikpanok nechajsikamatiltij ke Jiova techtasojta uan ke tiitaixpantijkauan ininka timotekipachouaj oksekin. Miakej tokniuan noyampa taltikpak toka kichiujtokej netataujtil”. w17.09 11 § 12, 13

¿Keyej moneki tikmatiskej timotsakuiliskej? Maj tikitakan ome taman tein motelneki. Yekinika, keman taltikpakneminij kimatij motsakuiliskej amo semi kipiaj uejueyi kuejmolmej. Okachi amo ouij kinkisa kuali mouikaskej iniuan oksekin uan amo kualaniskej, amo motekipachoskej uan amo motayokoltiskej. Ojpatika, uelis kuali timouikaskej iuan Dios komo tikixtopeuaj tein uelis kichiuas maj titajtakokan uan timoijkuaniliaj amo kuali tanejnekilis. Tajtakol tein kichiujkej Adán uan Eva kinextia ke nejin melauak (Gén. 3:6). Kemej yejuan, axkan miakej kipiaj uejueyi kuejmolmej porin amo ueli motsakuiliaj. Jiova kimati ke titajtakouanij uan ke ouij techkisa timotsakuiliskej. Sayoj ke kineki techpaleuis maj timoijkuanilikan toamo kuali tanejnekilis (1 Rey. 8:46-50). w17.09 3, 4 § 3, 4

Achto, tekiuanij ompa Sudáfrica amo kinkauayaj maj sayoj seko mosentilianij akin ixchijchipaujkej uan akin amo. Nejin no kinijtakouaya itaixpantijkauan Jiova. Sayoj ke, itech tonal domingo 18 metsti diciembre xiuit 2011, panoua 78,000 tokniuan akin tataman kemej ixtamatij kayomej Sudáfrica uan itech okseki uejueyi altepemej, mosentilijkej itech se ueyi kali itech xolal Johannesburgo porin mochiuak se ueyi nechikol. Semej akin taixyekana itech nejon ueyi kali kijtoj: “Amo keman nikinitstoya tel miakej taltikpakneminij maj tel kuali monejnemiltikan. Nochin tel kualtsin takentokej. Uan semi tachipaujkan nankikaujkej nejin kali. Sayoj ke okachi nikmoujkaita ke amo nanmochikoitaj”. Nejin tein kijtouaj akin amo itaixpantijkauan Jiova kinextia ke amo onkak okse nechikol kampa nochin moitaj kemej iknimej maski seseko kayomej (1 Ped. 5:9). ¿Keyej amo onkak okse nechikol kemej nechikol kampa tipouij? Porin Biblia uan iyektikatsin espíritu Dios techpaleuiaj maj timochikauakan timokixtiliskej ‘soltik talnamikilis’ uan maj timotalilikan “chipauak talnamikilis” (Col. 3:9). w17.08 17, 18 § 2, 3

Biblia kinextia ke amo se yolijsiuis yejua se kualneskayot tein tiknextiaj keman Dios techmaka iyektikatsin espíritu. Komo amo tikpiaj inepaleuil Dios, semi techouijmaka amo tiyolijsiuiskej itech uejueyi ouijkayomej. Nejin kualneskayot se inetetayokolil Dios, uan se taman tein motelneki tein ika tiknextiaj ke tiktasojtaj Jiova uan taltikpakneminij. Keman amo ueli timochiaj oso tiyolijsiuij, kaxani netasojtalis tein timopialiaj iniuan oksekin (1 Cor. 13:4; Gál. 5:22). Amo se yolijsiuis mouika ika okseki kualneskayomej tein motelnekij. Kemej neskayot, kijtosneki se kixikos uejueyi ouijkayomej ika se kuali tanemilil (Col. 1:11; Sant. 1:3, 4). No techpaleuia maj amo tikauakan Jiova itech tein yeski ouijkayot uan maj amo timomakepakan keman titajyouiskej. Uan no, Biblia kijtoua ke moneki tiknekiskej tikajsikamatiskej ke moneki timochiaskej. Nejin se taman tein motelneki tein techmachtia Santiago 5:7, 8. w17.08 4 § 4

Telpoch, xa no tikijtos ke achto ke se paxalotiuj kansaika, achto moneki se kiixtalis kani se yas. Nemilis tamati kemej keman se paxaloti, uan keman se telpochok, ijkuak kemej yeskia moneki se kiixtalis kani se yas. Sayoj ke se kiixtalis tein se kichiuas uelis yeski ouij. Sayoj ke ximoyolchikaua. Xikita tein Jiova kijtoua itech tajkuilol tein axkan tikitaj. Yejuatsin mitsyoleua xikixtali ika tamatilis tein tikchiuas satepan (Ecl. 12:1; Mat. 6:20). No kineki xiyolpaki. Ueli tikmati nejon keman tikita, tikaki uan tikyekoua tein kichijchiuak. No techyolmajxitia uan techmachtia keniuj okachi kuali tinemiskej. Akin kiixtopeuaj itayolmajxitilis kiniluia: “Nankiixpejpenkej tein amo nechyolpaktij. [...] ¡Xikitakan! Notekitikauan yolpakiskej, sayoj ke namejuan nankijyouiskej pinaujkayot. ¡Xikitakan! Notekitikauan yolpakkatsajtsiskej porin kuali moajsi ininyolo” (Is. 65:12-14). Keman tikixtaliaj ika tamatilis tein tikchiuaskej, tikueyitaliaj Jiova (Prov. 27:11). w17.07 22 § 1, 2

Ijkon kemej Dios kimati kani moajsi sejse sitalij, no senkis kimati kani timoajsij, keniuj timomachiliaj uan toni techpoloua. Jiova kiajsikamati kuejmolmej tein tikpanouaj tisejsemej uan kipia chikaualis tein ika techpaleuis (Sal. 147:5). Kemansa, xa tikitaj ke amo uelis tikxikoskej tein tikpanotokej. Sayoj ke Dios kimati hasta kani uelis titaxikoskej uan “kielnamiki ke tichijchiujtokej ika talnex” (Sal. 103:14). Kemej titajtakouanij, miakpa timopolouaj itech sayoj se taman. Xa tinochin timoyolnonotsaj satepan ke tikijtojkej teisa, keman tikpiaj se amo kuali tanejnekilis uan keman tikinnexikoluiaj oksekin. Maski Jiova amo kipia nion semej nejin kuejmolmej, senkis techajsikamati (Is. 40:28). Xa kemansa tikitanij keniuj techpaleuiani ika ichikaualis maj tikxikokan ouijkayomej (Is. 41:10, 13). w17.07 18 § 6-8

Se tokniuj takat kayot Sri Lanka nemi okseko. Kemej kampa kayot kipia se kali uan se tal, kinkaua tokniuan maj ompa kichiuakan nechikolmej uan uejueyi nechikolmej, uan maj ompa mokalotikan tokniuan akin kitekitiliaj Dios miak tonalmej. Maski tomin yejua temaka, ijkon kintelpaleuia tokniuan akin amo semi kipiaj tomin. Okseko kampa tokniuan amo kinkauaj maj tanojnotsakan, kichiuaj nechikolmej ininchan. Ijkon, miakej precursores uan tanojnotsanij akin amo semi kipiaj tomin kipiaj kani mosentiliskej uan amo moneki taneuiskej se kali uan taxtaujtoskej. Se tokniuj siuat akin nochipa tapaleuia ika tomin kimachilia ke ijkon kemej panouanij xiujmej kiseliani se tatiochiualis tein kitelpia ipatiuj. Yejua kijtoua: “Nikitani ke, keman okachi nitemaka tein nikpia, okachi amo nechouijmaka nitetapojpoluis, amo niyolijsiuis uan amo nikualanis komo amo mochiua tein nikchia uan no nikchiuas tein nechyolmajxitiaj”. w17.07 9 § 9, 10

Maski Job xa kiajsikamatik keyej tajyouij, kemansa xa motajtaniaya keyej Dios kikaujka maj tel tajyoui. Maski kinemiliskia nejon oso amo, uelia tanemiliaya itech tein Dios kiluijka. Nejon kipaleuij maj kipia se kuali tanemilil uan kiyolseuij (Sal. 94:19). Tein Job kipanok uelis techpaleuis maj tikpiakan se kuali tanemilil uan techyolseuis. Jiova kichiuak maj moijkuilo amatajkuilol Job “para tejuan ika timomachtiske kachi ok. Ika ya nojon tikpiaske kachi ok takuautamatilis iuan Dios porin ompa tikajsij de keniu titaxikojtiyaske ika ne tajyouilis uan no tikajsij de keniu timoyoltalijtiyaske” (Rom. 15:4). Nejin techmachtia ke moneki amo semi itech titanemiliskej tein techpanoua porin uelis tikelkauaskej iueyitaixyekanalis Jiova. Uan maj tikelnamikikan ke tiknextiaj ke tikpaleuiaj itaixyekanalis Dios keman amo tikauaj hasta ijkuak tikpanouaj uejueyi ouijkayomej, ijkon kemej Job. w17.06 24 § 9; 25 § 13, 14

Jesús kimatia ke imomachtijkauan monekia moseuiskej. Satepan ke miak tonalmej tanojnotskej, kiniluij tajtolmej tein axkan tikitaj. Neixpetanilis techpaleuia maj timoseuikan uan maj kuali timomachilikan. Sayoj ke moneki timoyekpiaskej maj amo yejua tiktayekanaltikan. Itech yekinika siglo, miakej kinemiliayaj nejin: “Ma titatakuakan san uan ma timouintikan san porin mosta timikiske” (1 Cor. 15:32). Axkan, miakej no ijkon tanemiliaj. ¿Toni uelis techpaleuis maj tikmatikan ox tikitaj neixpetanilis kemej moneki? Itech se semana uelis tikijkuiloskej kanachi horas tikchiuaj itekiyo Dios. Satepan, uelis tikijkuiloskej kanachi horas itech nejon semana timauiltiaj, tikitaj televisión, timauiltiaj ika videojuegos oso timoixpetaniaj ika okse taman. Ijkuak, tikitaskej ox monekis tikpataskej teisa (Efes. 5:15, 16). w17.05 24 § 11-13

Jesús ika tajtoj se takat akin kinkouaya uan kinnamakaya tetsitsin tein petanij tein tel patiyojkej. Se tonal, kiajsik se tein okachi patiyoj uan kiteluelitak. Kemej kinekia kikouas, kinamakak nochi tein kipiaya. Nejon kinextia ke semi kipatiuitak. ITekiuajyo Dios tamati kemej nejon tetsin tein petani. Komo tiktelpatiuitaj ijkon kemej tanamakakej kitelpatiuitak nejon tetsin, tikauaskej tein yeski taman uan ijkon uelis techixyekanas iTekiuajyo Dios nochipaya (Mar. 10:28-30). Kemej neskayot, Zaqueo kipiaya miak tomin porin ika takajkayaualis kinkuiliaya inintomin taltikpakneminij (Luc. 19:1-9). Sayoj ke, keman kikakik Jesús ke ika tajtoj iTekiuajyo Dios, kiitak ke kitelpiaya ipatiuj uan niman kinekik mopatas. Zaqueo kijtoj: “Xikonita Notekotsin, axkan para taixpan tajko de noricojyo nikinmakajtiyas naken amo teyi kipia. Uan takan aksa [nikichtekilij], ijkuakon nikuepilis naui achichi ok ten nikuilij”. Yejua kinkepilij taltikpakneminij tein kinichtekilijka uan amo kinejnekikok tein teaxka. w17.06 10 § 3-5

Tokniuan akin tetatmej kintajtaniskej maj kinpaleuikan ininkoneuan nochipa moneki kinyolchikauaskej konemej maj kinpoujkaitakan inintatuan. Uelis kichiuaskej keman kuali ininka tajtoskej uan amo kitapanauiliskej inintanauatil. Uan no, moneki amo kichiuaskej nion teyi tein se tokniuj oso aksa akin amo itaixpantijkauj Jiova uelis kiitas ke amo chipauak (1 Ped. 2:12). Maski tetatmej uelis kintajtaniskej oksekin maj kinpaleuikan, yejuan akin moneki maj kinmachtikan tein melauak ininkoneuan. Moneki kiitaskej toni nepaleuil kiseliaj ininkoneuan. Tetatmej, xiktajtanikan Jiova maj namechpaleui uan xiksentokakan ximochikauakan (2 Crón. 15:7). Amo xiktayekanaltikan tein namejuan nankinekij, ta xiktemokan maj nanmokoneuan kuali mouikakan iuan Jiova. Ximochikauakan maj tein kijtoua iTajtol Dios ajsi itech ininyolo. Xitakuaujtamatikan ke yejuan uelis mochiuaskej itekitikauan Jiova. w17.05 14 § 19, 20

Ome takamej amo yolkualmej kipantiaj se takat ke kichiuak se taman tein tel amo kuali. Maski nejon amo melauak, moixtalia maj takat kimiktikan. Maj tiknemilikan keniuj xa momachilijkej akin kinekiaj maj mochiua tein melauak keman kiitakej ke kintetemayaj nejin takat akin amo teyi kichiujka uan ikoneuan. Nejin yekmelauj mochiuak. Kipanok Nabot, se itekitikauj Jiova akin amo keman kikauak uan nemik keman tekiuaj Acab taixyekanaya Israel (1 Rey. 21:11-13; 2 Rey. 9:26). Acab kinekia se iuvajtal Nabot. Yejua ika kiluij ke kinekia kikouilis oso kipatilis ika se okachi kuali uvajtal. Sayoj ke Nabot amo kinekik. ¿Keyej? Porin tanauatil tein Jiova kinmakaka israelitas kijtouaya ke monekia amo senkis kinamakaskej talmej tein inintatuan kinkauiliskiaj (Lev. 25:23; Núm. 36:7). Kemej tikitaj, Nabot kitakamatia Jiova. w17.04 21 § 1; 22 § 4

¿Akonimej makisaskej keman ixpoliuiskej akin amo yolkualmej? Jiova motenkaua: “Akin yolnejmachmej ininaxkatis taltikpak uan yekmelauj yolpakiskej porin kipiaskej ueyi yolseuilis”. Uan satepan kijtoua: “Akin yolmelaujkej ininaxkatis taltikpak, uan ompa nemiskej nochipaya” (Sal. 37:11, 29). “Yolnejmachmej” yejuan akin yolyemankej akin kiixmatij Jiova uan kitakamatij. Yejuan no moixmatij kemej “yolmelaujkej” porin kinekij kichiuaskej tein yejuatsin kijtoua ke kuali yetok. Itech nejin tonalmej, okachi moajsij akin amo yolkualmej ke akin yolmelaujkej. Sayoj ke itech yankuik taltikpak sayoj moajsiskej akin yolnejmachmej uan yolmelaujkej. Yejuan kichiuaskej maj nejin taltikpak mochiua se xochital. w17.04 11 § 5, 6

“Tetasojtalis de Dios” techolinia maj tikintasojtakan tokniuan, okachiok keman kipanouaj ouijkayomej (1 Juan 3:17, 18). Itech yekinika siglo mayan semi kinijtakoj tokniuan kayomej Judea. Yejua ika okseki tokniuan kintitanilijkej nepaleuil (Hech. 11:28, 29). Tatitanilmej Pablo uan Pedro no kinyoleujkej tokniuan maj kinextianij kualtakayot (Rom. 12:13; 1 Ped. 4:9). Komo tikinseliaj ika netasojtalis tokniuan akin techkalpanouaj, okachiok moneki tikinseliskej ika netasojtalis tokniuan akin kipanotokej ouijkayot oso kintajyouiltiaj porin kitekitiliaj Dios. Yankuixtok, tel miakej itaixpantijkauan Jiova kayomej itech seki xolalmej ompa Ucrania monekik kisaskej itech ininxolal porin onkaya neteuilis uan kintajyouiltiayaj. Techtayokoltia tikijtoskej ke sekin kinmiktijkej. Sayoj ke miakej uelik mokaujkej ininchan tokniuan kayomej itech okseki xolalmej ompa Ucrania uan Rusia. Tokniuan itech nejin ome uejueyi altepemej amo kipaleuijkej nion se tekiuajyot, uan ijkon kinextijkej ke ‘amo poujtinemijok iuan in taltikpakuanij’. Uan no, kisentokakej “tanojnotstinenke ika in Tajtoltsin de Dios” (Juan 15:19; Hech. 8:4). w17.05 4, 5 § 6, 7