Noviembre

Se motsakuilis no kijtosneki se mochikauas se kiyekchiuas teisa uan se yektanemilis. Keman tiyolij amo ueli tikchiuaj nejon, yejua ika moneki timomachtiskej keniuj tikchiuaskej. Keman tetatmej ika nejmachkayot ‘kinmachtijtiyouij uan kinmelaujtiyouij’ ininkoneuan itech itamachtilis Jiova, kinpaleuiaj maj mochiuakan tamatinij uan maj ueli motsakuilikan uan maj kiyekchiuakan teisa (Efes. 6:4). No ijkon panoua iniuan akin kiixmatij Jiova keman uejueykejya. Maski xa tepitsin motsakuiliaj uan kiyekchiuaj seki taman, ayamo chikauak inintakuaujtamatilis. Sayoj ke, keman peua motaliliaj “yankuik talnamikilis” uan mochikauaj kichiuaskej kemej Cristo, okachi mochikaua inintakuaujtamatilis (Efes. 4:23, 24). w18.03 29 § 3, 4

Jiova uan inechikol techyoleuaj maj tiyakan nechikolmej. Uan tejuan tiknekij maj nochin akin youij kuali momachilikan (Rom. 15:7). Okachi moneki nejin keman aksa yekinika touan monechikoua. Jiova no kiyoleuak yejua, yejua ika moneki tikchiuaskej maj kuali momachili, maski taman kemej mochijchiua oso motilmajtia (Sant. 2:1-4). Komo tikitaj ke iselti yetok, ¿ueliskia tikiluiskej maj touan motali? Xa kitasojkamatis maj tikpaleuikan maj kiajsikamati tein mochiujtok itech nechikol oso maj kiajsi tajkuilolmej tein moixtajtoltiaj. Ijkon tiktakamattoskej tein motayolmajxitia itech tajkuilol tein axkan tikitaj. Keman kitemakakij se tanojnots itech tonechikol tokniuan akin pouij itech okseki nechikolmej, tokniuj takalpanojkej uan kemansa, tokniuan akin tekitij Betel, uelis tiyeskij tikualtakamej (3 Juan 5-8). Se taman tein uelis tikchiuaskej yejua tikinyoleuaskej maj takuatij tochan oso tikinuantiskej okseki taman. w18.03 15 § 5, 7

Maj tikitakan tein kipanok se takat akin kintajyouiltiaya itatojtokakauan Cristo. Yejua katka judío, uan Dios kiixpejpenka xolal kampa pouia kemej iaxka. Sayoj ke, judíos amo kuali mouikayajok iuan Jiova porin amo tatakamatkej. Nejon takat kiteltayekanaltiaya kichiuas tein kichiuayaj judíos. Sayoj ke Jesús kiualpannojnotsak. Yejua ika, nejin takat kiselij inepaleuil se tokniuj akin monotsaya Ananías, “meuak uan kiauijke” (Hech. 9:17, 18; Gál. 1:14). Nejon judío satepan moixmatik kemej tatitanil Pablo. Yejua moauij niman keman kiajsikamatik keniuj Jesús tapaleuiani maj mochiua itanejnekilis Dios (Hech. 22:12-16). Axkan, no ijkon panoua iniuan akin kiselijtokej se nemachtil ika Biblia, yeskij telpochmej oso xiuejkejya. w18.03 5, 6 § 9-11

Jacob kipanok miak ouijkayomej. Iikniuj, Esaú, kinekik kimiktis. Uan no, imontat kitemoj kikajkayauas miakpa. Sayoj ke, amo kikauak maj akin kitayekanaltiayaj inintanejnekilis kichiuanij maj kielkaua tein Jiova motenkaujka (1 Cor. 2:14-16). Takuaujtamatia ke Dios kichiuaskia tein kiluijka Abrahán, uan nochipa kinyekpiak ichankauan, akin inintech mochiuaskia tein Dios kiixtalijtoya (Gén. 28:10-15). Tein kijtoj uan tein kichiuak kinextij ke semi kipatiuitaya itanauatiluan uan itanejnekilis Jiova. Kemej neskayot, keman kinemilij ke Esaú kiteuiskia, kitataujtij Dios maj kimakixtiani. Kiluij itech inetataujtil: “Tikijtoj: ‘Yekmelauj nimitschiuilis tein kuali, uan nikinchiuas mokoneuan kemej xal itech ueyiat, tein amo ueli se kipoua porin tel miak’” (Gén. 32:6-12). Jacob senkis kinextij ke takuaujtamatia itech tein Jiova motenkaujka. w18.02 20 § 9, 10

Itech inemilis Job mopatak miak taman. Katka “okachi ueyi ke nochin taltikpakneminij akin moajsiaj tonalkisayampa” (Job 1:3). Tominpiaya, kitelixmatiaj uan kitelpoujkaitayaj (Job 29:7-16). Maski ijkon, amo kinemilij ke okachi ueyichiujkej katka oso ke amo monekia maj Dios kipaleui. Tein melauj, Jiova kitokaytij “notekitikauj”. Satanás kitajyouiltij Job ika miak taman uan kitemoj maj kinemili ke Dios kitajyouiltijtoya (Job 1:13-21). Satepan, eyi takamej akin kijtouayaj ke katkaj itasojikniuan kiyolxokolijkej uan kiluijkej ke Dios kitatsakuiltijtoya porin amo yolkuali katka (Job 2:11; 22:1, 5-10). Maski ijkon, Job amo kikauak Jiova. Satepan, Jiova kimakak se achiok tein kipiaya achto uan kikauak maj nemiok ciento cuarenta xiujmej (Sant. 5:11). Itech nejon xiujmej, Job kisentokak kitekitilij Jiova ika nochi iyolo. w18.02 6 § 16; 7 § 18

Nejin taltikpakneminij kinekij maj oksekin kinmoujkaitakan. Se tamatkej kijtoj nejin keman ika tajtoj akin moueyineki: “Itech iyolo moajsi se tsikitsin altar kampa yejua motankuaketsa iixpan”. Sekin kijtouaj ke ueyinekilis tel amo kualtsin uan hasta akin moueyinekij amo kinyolpaktia keman oksekin moueyinekij. Jiova kitauelita ueyinekilis. Biblia kijtoua ke kitauelita “ixtololomej tein moueyinekij” (Prov. 6:16, 17). Akin moueyineki mouejkatilia iuan (Sal. 10:4). Uan nejon se taman tein kinextia Amokuali (1 Tim. 3:6). Sayoj ke hasta seki itekitikauan Dios tatakamatinij no moueyinekinij. Semej yejua Uzías, akin tekiuajtik Judá. Yejua kitakamatik Dios miak xiujmej, sayoj ke Biblia kijtoua ke “niman keman kipiak chikaualis, iyolo moueyinekik uan ika moijtakoj, uan amo kitakamatik Jiova iDios porin kalakik itech itemplo Jiova kichichinoto kopal”. Miak xiujmej satepan, tekiuaj Ezequías no moueyinekik, sayoj ke sayoj seki tonalmej (2 Crón. 26:16; 32:25, 26). w18.01 28 § 4, 5

Itech Biblia tikixtajtoltiaj ke itekitikauan Dios tapaleuijkej ika tein kipiayaj. Kemansa, tapaleuijkej keman mochiuaskia se taman tekit (Éx. 35:5; 2 Rey. 12:4, 5; 1 Crón. 29:5-9). Keman itech yekinika siglo tokniuan kimatkej ke monekia kinpaleuiskej tokniuan akin nemiaj Judea porin kipanotoyaj mayan, sejse tapaleuij ika tein uelik (Hech. 11:27-30). Nochi nejon nepaleuil miakkan ualeuaya. Sekin kinamakakej tein kipiayaj, kemej inintal oso ininchan, uan tomin kinmakakej tatitanilmej. Ompa, tatitanilmej kinxejxelouilijkej akin kinpolouaya (Hech. 4:34, 35). Oksekin kixelouayaj tomin tein satepan ika tapaleuiayaj maj mochiua itekiyo Dios. Nochin tokniuan, akin tominpiayaj uan akin amo, tapaleuiayaj ika tein ueliaj (Luc. 21:1-4). w18.01 18 § 7; 19 § 9

Xa ueli tikchiuaj miak taman, sayoj ke amo nochi ueli tikchiuaj toselti. Nejin se taman tein tinochin moneki tikajsikamatiskej. Tatitanil Pablo uelia kichiuaya miak taman, sayoj ke amo uelia kichiuaya nochi tein kinekia. Keman kiluij Dios keniuj momachiliaya, yejuatsin kinankilij: “Moueyinextia nochikaualis kuak in tagat kiyolmachilia yolkuetauilis”. Pablo kiajsikamatik nejon uan kijtoj: “Kuak kachi nikyolmachilia in kuetauilis, ijkuakon kachi ok Dios nechmachililtia [ichikaualis]” (2 Cor. 12:7-10). ¿Toni kijtosnekia? Pablo kiajsikamatia ke amo uelia kichiuaya miak taman komo amo kipaleuiaya aksa akin okachi chikauak. Dios kimakaskia chikaualis ika iyektikatsin espíritu keman yolkuetauiskia. Uan amo sayoj nejon. No ika kipaleuiskia maj kichiua tein iselti amo keman ueliskia kichiuas. No ijkon techpanoua axkan. Keman Jiova techmakas iyektikatsin espíritu, tikpiaskej chikaualis. w18.01 9 § 8, 9

Keman konemej kijtoskej ke kinekij moauiskej, tetatmej moneki momachtiskej tamachtilis tein itech inechikol Jiova kinchijchiuilianij yejuan. Nejin kinpaleuis maj kinajsikamatiltikan ke amo auil se motemaktis uan se moauis uan no toni tatiochiualismej kiualkui nejin. Tetatmej kipiaj se ueyi tekit uan se tatiochiualis: kinmachtiskej ininkoneuan uan kinojtokaltiskej kemej Jiova tanauatia (Efes. 6:4). Moneki kinmachtiskej tein kijtoua Biblia uan kinpaleuiskej maj kineltokakan. Keman inintakuaujtamatilis mochikauas, kinolinis maj motemaktikan iuan Jiova uan maj kitekitilikan ika nochi ininyolo. Maj Biblia, yektikatsin espíritu uan chikaujkayot tein nankichiuaskej kinpaleui nanmokoneuan maj kipiakan tamatilis tein kinpaleuis maj makisakan. w17.12 22 § 17, 19

Daniel kiajxitijtoyaya 100 xiujmej uan amo uejkaua momikiliskiaya. ¿Oksepa nemiskia? Kemaj. Itamiampa amatajkuilol Daniel, tikixtajtoltiaj ke Jiova kiyekmatiltij: “Xiyouj hasta tamilis. Timoseuis”. Daniel kimatia ke mikemej moseuijtokej uan ke itech Miketekoch amo onkak “teisa tein monemilia mochijchiuas nion taixmatilis nion tamatilis” (Ecl. 9:10). Sayoj ke amo ompa tamiskia inemilis. Dios motenkauak iuan ke kipanoskia se taman tein tel kualtsin satepan. Jiova no kiluij tein moajsi itech tajkuilol tein axkan tikitaj. Amo kiluij kemanian mochiuaskia. Monekia momikilis uan moseuis. Sayoj ke tajtolmej “timoketsas uan tikuis tein moaxka” senkis kijtosnekiaj ke moajokuiskia satepan. ¿Kemanian? “Itech itamian tonalmej”, tel miak xiujmej satepan ke momikiliskia. w17.12 7 § 17, 18

Jiova kinnauatij akin taixyekanayaj itech xolal Israel maj kinextianij melaujkayot ijkon kemej yejuatsin kichiua. Yekinika monekia kiitaskej toni panok. Ompa, keman kiixejekoskiaj ox kinextiliskiaj teiknelilis, monekia kiitaskej ika nejmachkayot keyej kichiujka, keniuj tanemiliaya uan keniuj monejnemiltiaya. Monekia kiitaskej ox tetauelitaya uan kiixtalijka temiktis (Núm. 35:20-24). Uan no, komo kintajtaniayaj oksekin akin kiitakaj tein panoka, monekia moajsiskej omen uan ijkon ueliskia moijtos ke temiktijka porin ijkon kiixtalijka. Satepan ke kiitaskiaj tein panoka, tayekananij monekia tanemiliskej itech taltikpaknenkej, amo sayoj itech tein kichiujka. Monekia ueliskej kiitaskej okachi ke tein moitaya uan ijkon ueliskia kiajsikamatiskej keyej temiktijka. Okachiok monekia maj Jiova kinmakani yektikatsin espíritu uan ijkon ueliskiaj kinextiskej taajsikamatilis, teiknelilis uan melaujkayot kemej yejuatsin (Éx. 34:6, 7). w17.11 16 § 13, 14

Keman peuak timomachtiaj Biblia, tikmatkej miak taman tein melauak tein kitelpia ipatiuj. Tikmatkej ke Jiova techchijchiuak uan keniuj kiixtalijtok maj nemikan taltikpakneminij. No tikmatkej ke kemej techteltasojta kitemakak iKonetsin maj techmakixti itech tajtakol uan mikilis, ke iTekiuajyo kijkuanis tajyouilis uan ke uelis tinemiskej nochipaya ika yolpakilis uan yolseuilis (Juan 3:16; Apoc. 4:11; 21:3, 4). Kemansa, mopatani kemej tikajsikamatiaj se taman tein moijtoj ke mochiuaskia oso se tajkuilol itech Biblia. Keman panoua nejin, moneki kuali timomachtiskej nejon tein mopatak uan itech titanemiliskej (Hech. 17:11). Amo sayoj tiktemoskej kuali tikajsikamatiskej tein okachi tayekantok kemej axkan moajsikamati se tamachtilis, ta no tein amo semi tayekantok uan toni taman mopatak. Komo ijkon tikchiuaj, nejon yankuik tamachtilis no pouis itech “taeualoni”. w17.06 12 § 15, 16

Moneki timoyekpiaskej keman timoajsij kampa uelis tiktapanauiliskej itanauatiluan Jiova. Kemej neskayot, semi kuali maj akin peua moixmatij senkis kiixtalikan ox monetechoskej, mopitsoskej oso motennamikiskej oso keniuj amo ininselti moajsiskej (Prov. 22:3). Tokniuan no uelis moajsiskej itech se ouijkayot keman kisaj uejka tekititij oso keman tekitij iuan okse takat oso iuan okse siuat (Prov. 2:10-12, 16). Okachi moneki timoyekpiaskej komo titayokoxtokej oso toselti timoajsij. Uelis tiktelnekiskej maj aksa techyolseui uan yejua ika tikauaskej maj akin yeski kichiua tein kinextis ke kineki touan yetos. Komo se tonal techpanoua se taman kemej nejon, maj tiktajtanikan nepaleuil Jiova uan tokniuan (Sal. 34:18; Pro. 13:20). w17.11 26 § 4, 5

Jiova kiitaya ke se ueyi tajtakol maj se israelita kimiktiani aksa. Komo aksa temiktiaya, takat akin itelchankauj akin kimiktijkej monekia kimiktis (Núm. 35:19). Ijkon, temiktijkej taxtauaya ika inemilis. Takat akin momakepaya monekia niman kimiktis temiktijkej uan ijkon Tal tein Dios motenkaujka kinmakas kisentokaskia chipauak, porin Jiova kijtojka ke se kitoyauas iesyo se taltikpaknenkej “kijtakoua tal”. Uan tanauatijka: “Moneki amo tikpitsotilis tal kampa nannemij” (Núm. 35:33, 34). ¿Toni panouaya keman se israelita kimiktiaya aksa maski amo kinekia? Maski ijkon, katka itajtakol porin kimiktijka aksa akin amo teyi kichiujka (Gén. 9:5). Sayoj ke, Jiova tanauatijka maj kinextilianij teiknelilis. Temiktijkej ueliskia cholos itech semej chikuasen xolalmej kampa mopaleuiayaj, kampa takat akin momakepaskia amo ueliskia kimiktis. Sayoj ke monekia mokauas ompa uan amo kisas hasta keman momikiliskia tayekankatiopixkat (Núm. 35:15, 28). w17.11 9 § 3-5

Se tokniuj siuat kayot Australia kijtoua ke imontat kitelixnamikia tamachtilis tein melauak uan kemansa tel kualania. Yejua ika achto ke kinotsaskiaj, yejua uan inamik kitajtaniayaj Jiova maj kinpaleuiani maj amo kitauelnankilianij. Uan no, amo semi uejkaua iuan monojnotsayaj, porin nejon kinpaleuiaya maj amo peua ika tajtouanij taneltokalis uan maj ika motajtolteuianij. Xa timotajtakoltiskej komo timotajtolteuiaj iniuan tochankauan, porin tikintasojtaj uan nochipa tiktemouaj tikinyolpaktiskej. Sayoj ke, maj tikelnamikikan ke tiktakamatiskej Jiova yejua tein moneki okachi tayekantos ke netasojtalis tein tikinpialiaj tochankauan. Ijkon, xa tikinpaleuiskej maj kiitakan ke motelneki se kitekitilis Jiova. Maj tikelnamikikan ke amo akin uelis tikchikaujkauiskej maj kitekitili. Sayoj ke, kemaj uelis tikinnextiliskej keniuj techpaleuiani tiktakamatiskej. Kemej semi tetasojta, Dios kinkaua maj kichiuakan tein tejuan tikchiujkej: kiixpejpenaskej ox kitekitiliskej (Is. 48:17, 18). w17.10 15, 16 § 15, 16

Amo sayoj moneki tikiluiskej aksa ke tiktasojtaj, ta kemansa moneki tiknextiskej ika tein tikchiuaj. Kemej neskayot, komo se tokniuj amo kipia miak takual oso tilmaj, amo sayoj moneki tikiluiskej teisa tein kiyolchikauas (Sant. 2:15, 16). No ijkon, kemej tiktasojtaj Dios uan taltikpakneminij, amo sayoj tiktajtaniaj yejuatsin maj kichiua maj moajsikan okachi tanojnotsanij, ta no timochikauaj titanojnotsaskej (Mat. 9:38). Tatitanil Juan kijtoj ke moneki “yek melau ma titetasojtakan ika nochi ten tikchiutinemij”. Ika okseki tajtolmej, moneki titetasojtaskej “amo ika ne taixkajkayaualis”, ta “ika nochi toyolo” (Rom. 12:9; 2 Cor. 6:6). Nejin kijtosneki ke amo uelis kemej yeskia sayoj tiknextiskej ke titetasojtaj. Komo ijkon tikchiuaj, titakajkayaujtoskej, uan nejon netasojtalis amo kipia ipatiuj. w17.10 8 § 5, 6

Komo tiknekij maj iTajtol Dios techpaleui, moneki timochikauaskej tikixtajtoltiskej mojmostaj. Melauak ke timiakej amo tikemantij, sayoj ke maj amo tikauakan maj nion teyi techtsakuili maj tikixtajtoltikan, nion tataman tekimej tein tikpiaskej (Efes. 5:15, 16). Uelis tikixtajtoltiskej Biblia kualkampa, okse hora itech tonal oso tayouak. Timomachiliaj kemej se akin kijkuiloj nejin: “¡Nikteltasojta motanauatil! Nochi tonal nimomachtia” (Sal. 119:97). No moneki titanemiliskej ika nejmachkayot itech tein tikixtajtoltiaj (Sal. 1:1-3). Sayoj ijkon uelis tiknextiskej tamatilis tein tikajsij itech iTajtol Dios. Yeski tikixtajtoltiskej itech amat oso itech tepos, moneki tiktemoskej maj techolini maj tikpatakan tein monekis. w17.09 24 § 4, 5

¿Kijtosneki nejin ke nochipa moneki titeyolikneliskej? Amo. Kemej neskayot, keman Jiova kinauatij Saúl maj kinmiktiani amalequitas, Saúl amo kimiktij tekiuaj. Xa kinemilij ke teyoliknelijtoya, sayoj ke Dios kiixtopeuak kemej tekiuaj itech xolal Israel porin amo kitakamatik (1 Sam. 15:3, 9, 15). Jiova se Tamelaujkej akin kichiua tein kinamiki. Ueli senkis kimati toni kinemiliaj taltikpakneminij, yejua ika kimati kemanian moneki amo se teyoliknelis (Lam. 2:17; Ezeq. 5:11). Amo uejkaua, kintatsakuiltis nochin akin amo kinekiskej kitakamatiskej (2 Tes. 1:6-10). Ijkuak, amo monekis maj Dios kinyolikneli akin amo yolkualmej. Tein melauj, keman kinixpolos, kinextis ke kinyoliknelia itekitikauan, akin kinmakixtis. Melauak ke tejuan amo tikixtaliaj ox Jiova moneki kitatsakuiltis oso kimakixtis aksa, ta moneki timochikauaskej tikinpaleuiskej taltikpakneminij axkan. w17.09 10, 11 § 10-12

Se kimatis se motsakuilis se kualneskayot tein Jiova uelis techpaleuis maj tikpiakan. Yejuatsin senkis ueli motsakuilia. Sayoj ke kemej titajtakouanij, ouij techkisa timotsakuiliskej. Tein melauj, miak kuejmolmej mochiuaj porin taltikpakneminij amo ueli motsakuiliaj. Nejin kichiua maj miakej amo niman kichiuakan seki taman tein motelneki uan maj amo kichiuakan tein moneki kampa tekitij oso kampa momachtiaj. No kichiua maj tauijuikaltikan, tauanakan, tateuikan, motajtauikaltikan, kikuikan drogas, kintsakuakan, tajyouijtinemikan, maj kinkui kokolis porin auilnemij, maj kipiakan se konet maski amo kinekiaj uan maj namikuanij mokakauakan (Sal. 34:11-14). Uan ijkon kemej panotiyouij tonalmej, okachi moita ke taltikpakneminij okachi amo kimatij motsakuiliskej. Nejin amo tikmoujkaitaj, porin itech Biblia moijtoj ke se taman tein kinextiskia ke tinemij itech itamian tonalmej yejua ke taltikpakneminij amo kimatiskiaj motsakuiliskej (2 Tim. 3:1-3). w17.09 3 § 1, 2

Keman tikpiaj yolseuilis tein Dios temaka, amo teyi techtekipachoua uan tiyolseujtokej. Tikyekmatij ke Jiova techyekpia uan kineki maj tiyolpakikan (1 Ped. 5:10). Tikmatiskej nejon techpaleuia maj amo timoteltekipachokan nion maj timouikan. Amo uejkaua, taltikpakneminij kijyouiskej “kachi ueyi tajyouilis” kemej amo keman onkani nion onkas (Mat. 24:21, 22). Amo tikmatij toni techpanos tisejsemej, sayoj ke moneki amo semi timotekipachoskej. Maski amo tikmatij nochi tein Jiova kichiuas, kemaj tikmatij keniuj tamati yejuatsin. Keman tikitaj keniuj kinpaleuij itekitikauan ne uejkauj, tikajsikamatij ke nochipa kichiua tein kiixtalia. Uan kemansa kichiua kemej amo tikchiayaj. Nochipa keman techpaleuia, ijkuak oksepa ueli tikmachiliaj ke techmaka “yolseuilis ten kachi kuika uelilis hasta amo uelis se kajsikamatis”. w17.08 12 § 16, 17

“¿Hasta kemanian, Jiova?”. Nejin netajtanil kichiujkej Isaías uan Habacuc, ome itanauatijkauan Dios (Is. 6:11; Hab. 1:2). Hasta Jesucristo no ijkon tajtanik keman kiitak ke tel miakej amo takuaujtamatiaj (Mat. 17:17). Yejua ika kemansa tejuan xa no titajtaniskej nejon. Xa aksa techchiuilij teisa tein amo kuali. Xa titajyouijtokej porin tixiuejkejya oso porin tikpiaj se kokolis. Xa semi timotekipachojtokej porin tinemij itech nejin tonalmej tein semi ouijkej (2 Tim. 3:1). Oso xa techtayokoltia tikitaskej ke tel miakej tel amo kuali monejnemiltiaj. Maski ijkon, techyolchikaua tikmatiskej ke itekitikauan Dios ne uejkauj kiluijkej keniuj momachiliayaj, uan yejuatsin amo kinajuak. ¿Toni uelis techpaleuis keman tikpanouaj ouijkayomej? Santiago tanankilij ika tajtolmej tein axkan tikitaj. w17.08 3 § 1-3

Jesús kinyolchikauak imomachtijkauan maj mochiuanij itasojikniuan yejua uan Jiova ika ‘ricojyot tein poujtok nikan taltikpak’. Se taman kemej tiknextiaj ke tiknekij tikyolpaktiskej Dios yejua keman titapaleuiaj ika tein tikpiaj maj mochiua tanojnotsalis noyampa taltikpak, tein Jesús kijtojka ke mochiuaskia (Mat. 24:14). Se siuapiltsin akin nemi itech altepet India, kipiaya se kaxontsin kampa kisentilijtiyaya tomin. Hasta amo mokouiliayaok auilmej. Keman amo akikok tomin itech ikaxontsin, kitetayokolij maj motekitilti itech tanojnotsalis. No ompa, se tokniuj akin kipia koujmej tein kitemakaj koujxiujtet no kinextia tamatilis. Yejua kitetayokolij tel miak koujxiujtet itech kali kampa motajtolkepaj amaixmej itech tajtol malayálam. Kemej tokniuan akin ompa tekitij kikouaj koujxiujtet, kiita ke okachi tapaleuia komo kintayokolia ke komo tapaleuia ika tomin. No ijkon, tokniuan akin nemij Grecia miakpa kintayokoliaj tokniuan akin tekitij Betel aceite de oliva, queso uan okseki taman takual. w17.07 8 § 7, 8

Israelitas akin moajsiaj Babilonia amo kinekiaj mokuikatiskej uan monekia maj kinyolseuianij. Sayoj ke, ijkon kemej Jiova kijtojka, Ciro, akin tekiuajtia Persia, moaxkatilij Babilonia uan kinkixtij israelitas. Keman ika tajtoj Jiova, kijtoj: “Nechnauatij maj nikchijchiuili se kali ompa Jerusalén [...]. Akin yeski akin moajsis namouan itech nochi ixolal, maj Jiova iDios yeto iuan, uan maj pankisa” (2 Crón. 36:23). Nochi nejin xa kinyolseuij israelitas keman moajsiaj ompa Babilonia. Jiova amo sayoj kinyolseuij israelitas kemej xolal, ta no kinyolseuij sejsemej. Axkan, Dios no “kinpajtia akin tayokoxtokej; kitetsiloua ika tilmaj kampa takojkokolmej” (Sal. 147:3). Keman timokokouaj oso titayokoxtokej, uelis titakuaujtamatiskej ke Jiova kineki techyolseuis uan kichiuas maj kuali timomachilikan (Sal. 34:18; Is. 57:15). Techmaka chikaualis uan tamatilis tein techpaleuia maj titaxikokan (Sant. 1:5). w17.07 18 § 4, 5

Nochi tein onkak iaxka Jiova (1 Crón. 29:11, 12). Kemej tel kualtakat, techmaka tel miak netetayokolilmej. Seki nejin netetayokolilmej yejua 1) iTekiuajyo Dios, 2) tanojnotsalis uan 3) tamachtilis tein melauak tein moajsi itech iTajtol. ¿Melauj ke semi tiktasojkamatij nejon? Sayoj ke, komo amo timoyekpiaj, xa tikelkaujtiyaskej ipatiuj tein kipiaj. Yejua ika moneki kuali tikintekitiltiskej uan okachi tikintasojtaskej. Timiakej monekik senkis timopataskej uan ijkon ueliskia tipouiskej itech iTekiuajyo Dios (Rom. 12:2). Sayoj ke, amo ompa tamik. Moneki timoyekpiaskej maj nion teyi kikaxani netasojtalis tein tikpialiaj iTekiuajyo Dios, kemej tiknekiskej timotomintiskej oso tiauilnemiskej (Prov. 4:23; Mat. 5:27-29). w17.06 9 § 1; 10 § 7

Itech nion se tajkuilol tikixtajtoltiaj maj Jiova kimelauiliani Job keyej tajyouijtoya, kemej yeskia motenpaleuijtoskia. Yejuatsin kinekia kipaleuis maj kiajsikamatini ke semi amo ueyi katka iixpan uan maj kiitani ke onkak okseki taman tein okachi tayekantok (Job 38:18-20). Itajtoluan kipaleuijkej Job maj kipatani kemej tanemiliaya. ¿Kinextij Jiova ke amo kitasojtaya Job keman ijkon kinojnotsak satepan ke tel tajyouijkaya? Amo, uan Job amo no kinemilij nejon. Yejua kiajsikamatik uan kitasojkamatik tein Jiova kiyolmajxitij uan ika kiyolseuij. Hasta kijtoj: “Maj amo teyi nikijtouani, uan nimoyolnonotsa ika talnex uan koujnex” (Job 42:1-6). Jiova kiitak ke Job kipatak itanemilil uan kijtoj ke semi kiyolpaktiaya porin amo kikauak (Job 42:7, 8). w17.06 24, 25 § 11, 12

¿Keniuj uelis tikmatiskej ox tikitaj tekit kemej moneki? Uelis timotajtaniskej: “¿Nechtelyolpaktia notekiuj, sayoj ke itekiyo Jiova nikita ke amo semi kipia ipatiuj uan hasta nitasemati?”. Kemej titanankiliskej techpaleuis maj tikitakan akoni oso toni yekmelauj tiktasojtaj. Jesús techmachtij toni okachi moneki tiktayekanaltiskej. Se tonal, kinkalpanoto María uan Marta, akin katkaj iknimej. Marta niman peuak kitakualchiuia Jesús, sayoj ke María motalij uan kikakik Jesús. Yejua ika, Marta kijtoj ke María amo kipaleuiaya. Sayoj ke Jesús kiluij Marta tein moajsi itech tajkuilol tein axkan tikitaj (Luc. 10:38-42). Ijkon, Jesús tamachtij se taman tein motelneki. Kinextij ke komo amo tiknekij maj nion teyi techtapololti uan tiknekij tiknextiskej ke tiktasojtaj, moneki tikixpejpenaskej “ten kachi kuali”, tiktayekanaltiskej tokuali uikalis iuan Jiova. w17.05 23 § 9, 10

Jiova kinnauatiani tetatmej maj kinmachtikan ininkoneuan tein melauak. Nejin amo kinnauatiani teueyitatmej nion okse aksa (Prov. 31:10, 27, 28). Sayoj ke maski tetatmej amo uelij tajtol tein mokui itech ueyi altepet kampa mokaltalitoj, uelis kinpaleuiskej ininkoneuan maj motokikan iuan Jiova. Keman tajtanij maj kinpaleuikan, amo kichiuaj porin amo kinekij kinmachtiskej ininkoneuan, ta porin kinekij kisentokaskej ‘kinmachtiskej uan kinmelaujtiyaskej’ itech itamachtilis Jiova (Efes. 6:4). Kemej neskayot, uelis kintajtaniskej tayekananij maj kinyolmajxitikan toni uelis kichiuaskej keman taueyichiuaj kemej kalyetouanij uan maj kinpaleuikan maj kinajsikan akin uelis kuali iniuan mouikaskej ininkoneuan. No uelis kinyoleuaskej okseki kalyetouanij maj iniuan taueyichiuakan. Miakej telpochmej uan ichpochmej momachtiaj miak taman tein kuali keman iniuan tanojnotsatij okseki tokniuan uan keman iniuan moixpetaniaj (Prov. 27:17). w17.05 13 § 17, 18

Jesús uan itatuan tepalnemitoj Egipto satepan ke iángel Jiova kinauatij José ke tekiuaj Herodes kinekia kimiktis Jesús. Yejua ika mokaujkej ompa hasta ke Herodes momikilij (Mat. 2:14, 19-21). Miak xiujmej satepan, imomachtijkauan Jesús “momoyauke kampa Judeajkopaka uan Samariajkopaka” porin kintajyouiltiayaj (Hech. 8:1). Jesús kimatia ke miakej itatojtokakauan monekiskia kisaskej itech ininxolal. Yejua kijtoj: “Kuak namechtajyouiltiske tech se pueblo, ijkuakon xicholokan uan xiyetotij okseko” (Mat. 10:23). Miakej itaixpantijkauan Jiova kinpanouani nejon. Ininchankauan miakej momikilianij uan kipolouanij tel miak taman tein kipiayaj. Oksekin kipanokej miak ouijkayomej itech ojti oso kampa motepalotijkej, porin miakej tauanayaj, mauiltiayaj ika tomin, tachtekiaj uan auilnemiaj. Maski ijkon, kinyolchikauaya kinemiliskej ke ijkon kemej israelitas amo nochipa nenkej taluakyan, yejuan no se tonal amo tepalyetoskiajok. Nejon kinpaleuij maj kipianij se kuali tanemilil (2 Cor. 4:18). w17.05 3, 4 § 2-5

Kemansa uelis moitas ke techchiuilijkej oso kichiuilijkej tein amo kuali se tokniuj itech nechikol. Maj nejin amo kichiua maj amo tiktekitilikanok Jiova. Okachi kuali, maj amo tikauakan, maj tiktajtanikan maj techpaleui uan maj iuan titakuaujtamatikan. Maj tikelnamikikan ke kemej titajtakolejkej, xa amo tikyekajsikamatkej tein panok uan xa amo tikmatij nochi tein mochiuak. Maj amo teyi tikinijtouilikan oksekin, porin nejon sayoj kiueyiltis kuejmol. Uan no, maj amo tiknemilikan ke tejuan uelis tikyektaliskej, ta maj tiktakamatikan Jiova uan maj tikchiakan maj yejuatsin kiyektali. Komo ijkon tikchiuaj, Jiova techtatiochiuis. Uelis tikyekmatiskej ke “Tamelaujkej itech nochi taltikpak” nochipa kichiuas tein melauak “porin nochi iojuan melaujkej” (Gén. 18:25; Deut. 32:4). w17.04 20 § 17

¿Toni panos iniuan akin amo kinekiskej mopataskej uan kipaleuiskej tein mochiua nikan taltikpak hasta keman peuas okachi ueyi tajyouilis? Dios motenkauak kinixpolos (Sal. 37:10). Miakej kimatinij keniuj kitatiskej tein amo kuali tein kichiuaj uan miakpa amo teyi kinpanouani (Job 21:7, 9). Sayoj ke Biblia techelnamiktia ke “iixtololouan Dios yetokej itech iojuan taltikpaknenkej, uan yejuatsin kiita nochi itaksalis. Amo onkak kampa tayouayan nion kampa yekauilaj kampa uelis motatiskej akin kichiuaj tein amo kuali” (Job 34:21, 22). Yejua ika amo akin uelis motatis iixpan Dios. Yejuatsin kiita nochi tein kichiuaj akin amo yolkualmej. Satepan ke panos Armagedón, yejuan amo nemiskejok. Amo keman tikinitaskejok (Sal. 37:12-15). w17.04 11 § 5