Febrero

Taltikpakneminij kiitakej ke Jesús semi kinikneliaya, yejua ika kuali kiselijkej keman kinnojnotsaya ika iTekiuajyo Dios. Komo tikchiuaj ijkon kemej yejua, okachi kuali techseliskej itech tanojnotsalis. Uelis tikinajsikamatiskej akin tikinnojnotsaj komo tiktemouaj tikmatiskej tein kinemiliaj uan tein kimachiliaj, uan tikinchiuiliskej tein tikuelitaskiaj maj techchiuilikan (Mat. 7:12). Maj tiknemilikan tein kipoloua sejse taltikpaknenkej. Tejuan amo tikinnojnotsaj taltikpakneminij sayoj ika se taman, ta tikpapataj tein tikijtouaj ijkon kemej sejse okachi kipaleuis. Maj tikinchiuilikan netajtanilmej tein techpaleuiskej maj tikinixmatikan (Prov. 20:5). Ijkon tikmatiskej katiyejua tamachtilis okachi kinpaleuis uan uelis tiktemoskej keniuj tikinpaleuiskej ijkon kemej kichiuak Jesús (no xikonita 1 Corintios 9:19-23). w19.03 20 § 2; 22 § 8, 9

Adán uan Eva kinextijkej ke senkis amo kitasojkamatiliayaj Jiova nochi tein kinmakaka. Tinochin uelis tiknextiskej ke amo techpaktia tein yejuan kiixpejpenkej kichiuaskej. Keman timoauiaj, tiknextiliaj Jiova ke tikneltokaj ke sayoj yejuatsin kinamiki kiixtalis tein kuali uan tein amo. No tiknextiliaj ke tiktasojtaj uan ke iuan titakuaujtamatij. Satepan ke timoauiaj, mojmostaj moneki timoixyekanaskej ika itanauatiluan Jiova uan amo ika tein tejuan tiknemiliaj. Xa ouij yeski, sayoj ke millones taltikpakneminij kichiuaj. Uan tejua no uelis tikchiuas komo timochikaua okachi tikajsikamatis Biblia, timouikas iniuan tokniuan uan tikteixmatiltis Jiova (Heb. 10:24, 25). Uan keman tikixpejpenas se taman, xikchiua kemej mitsyolmajxitia Jiova itechkopa iTajtol uan inechikol (Is. 30:21). Ijkon, tein tikchiuas kuali kisas (Prov. 16:20). w19.03 7 § 17, 18

Jiova techmaka miak tamachtilis tein techpaleuia maj kuali iuan timouikakan. Kemej neskayot, tikseliaj miak tamachtilis itech nechikolmej, amaixmej uan itech Internet. ¿Tikakinij se tanojnots, tikixtajtoltianij se tamachtilis oso tikitanij se video itech JW Broadcasting tein semi techpaleuiani? ¿Keniuj uelis tiktasojkamatiliskej Jiova nochi tein techmakani? (Col. 3:15.) Se taman, yejua keman itech tonetataujtiluan nochipa tiktasojkamatiliaj. Okse taman kemej tiktasojkamatiliaj Jiova yejua keman titachipauaj uan titapaleuiaj maj tayekyeto itech Kali kampa tiMosentiliaj. Yejua ika, nochipa titapaleuiaj. Uan no, akin kitekitiltiaj teposmej tein ika tikakij nechikol uan tikitaj videos kuali kinyekpiaj. Nejin tapaleuia maj okachi uejkauakan Kalmej kampa tiMosentiliaj uan maj amo niman moyekchijchiuakan. Ijkon, tomin tein ika titapaleuiaj mokui keman mochijchiuaj oso moyektaliaj okseki Kalmej kampa tiMosentiliaj noyampa taltikpak. w19.02 18 § 17, 18

Job tanemiliaya itech nochi tein Jiova kichijchiuak (Job 26:7, 8). Keman tanemilij keniuj chijchiujtoya taltikpak, iluikak, mixti uan keman tatikuini semi kimoujkaitak, maski kiajsikamatik ke semi tepitsin kiixmatia itachijchiualis Dios. No semi kipatiuitak tein Jiova kimachtiaya, yejua ika kijtoj: “Nikpatiuitani itajtoluan” (Job 23:12). Kemej kimoujkaitaya Jiova uan kipoujkaitaya nejon kichiuak maj okachi kitasojta uan maj kiyolpakti. No kipaleuij maj okachi kinekini amo kikauas Dios. Kemej Job, no moneki titanemiliskej itech itachijchiualis Jiova. Axkan, taltikpakneminij okachi kimatij keniuj chijchiujtok taltikpak uan iluikak ke itech itonaluan Job. Uan no, tikpiaj Biblia ajsitok tein techpaleuia maj kuali tikixmatikan Dios. Nochi tein timomachtiskej techpaleuis maj tikpoujkaitakan uan maj tikmoujkaitakan Jiova. Ijkon tiktasojtaskej uan tiktakamatiskej uan okachi tiknekiskej amo tikauaskej (Job 28:28). w19.02 5 § 12

Ijkon kemej panouanij xiujmej, miakej tekiuanij kitajyouiltianij ixolal Jiova. ¿Keyej? Xa kijtouaj ke tiktapanauiliaj se tanauatil, sayoj ke tein melauj techtatsakuiltiaj porin tikixtalianij ‘tiktakamatiskej Totajtsin Dios uan [...] amo achtoʼ taltikpakneminij (Hech. 5:29). Xa techkejkeloskej, techtsakuaskej oso hasta techkojkokoskej. Sayoj ke, Jiova techpaleuia maj amo timomakepakan, ta maj tiyolseujtokan keman techtajyouiltijtoskej. Maj titanemilikan itech neskayot tein kikaujkej eyi telpochmej hebreos akin kinuikakej Babilonia: Hananías, Misael uan Azarías. Ika yolseuilis uan poujkaitalis kimelauilijkej tekiuaj keyej amo motankuaketsaskiaj iixpan tiotsin tein kichijchiujka. Yejuan kiixtalijkej tatakamatiskej maski semi kintajyouiltiskiaj (Dan. 3:1, 8-28). ¿Keniuj uelis tikchiuaskej kemej nejon eyi hebreos keman techyejyekoskej? Maj tiknextikan yolyemanilis uan maj titakuaujtamatikan ke yejuatsin techyekpias (Sal. 118:7). Uan keman aksa techijtouilia tein amo melauak, titanankiliaj ika yolseuilis uan poujkaitalis (1 Ped. 3:15). Uan no, tikixtopeuaj nochi tein uelis kijtakos tokuali uikalis iuan toueyiTajtsin Jiova. w19.02 10, 11 § 11-13

Techpaleuis maj okachi tiyolchikaujkej komo itech titanemiliaj tein tikchiaj tikseliskej porin Jesús kitemakak inemilis (Juan 3:16; Efes. 1:7). Itech semanas achto ke tikelnamikiskej imikilis, uelis tikchiuaskej seki taman tein techpaleuis maj okachiok tiktasojkamatikan inemilis tein kitemakak. Maj tikixtajtoltikan tein ixyetok moixtajtoltis itech nejon tonalmej uan maj titanemilikan ika nejmachkayot itech tein panok achto ke kimiktiskiaj. Nejin techpaleuis keman moelnamikis imikilis, porin okachi kuali tikajsikamatiskej tein kijtosneki pantsin uan vino uan netetayokolil tein kiixnextiaj tein amo moajsi okse kemej yejua. Keman tikajsikamatij tein Jesús uan Jiova toka kichiuanij, ijkon kemej tatiochiualismej tein techualkuilia tejuan uan akin tikintasojtaj, okachiok tikneltokaj ke mochiuas tein tikchiaj uan okachiok tikixtaliaj titaxikoskej ika yolchikaualis hasta keman ejkos tamilis (Heb. 12:3). Semi tiktasojkamatij maj kisentoka kinexti nejin kualtsitsin kualneskayomej axkan ke techtajtouia kemej toTayekankatiopixkauj ompa iluikak (Heb. 7:24, 25). Tiknextiskej ke yekmelauj timotasojkamatij komo nochipa tikelnamikij imikilis kemej yejua tanauatij (Luc. 22:19, 20). w19.01 22 § 8; 23, 24 § 10, 11

Jiova techmakatok tinochin tatiochiualis maj tikueyichiuakan. Ika totanankililuan ‘tikueyipanchiuaj toTajtsin Dios’, uan nejon amo akin uelis toka kichiuas (Heb 13:15). Jiova amo kichia maj tinochin sayoj se taman kemej titanankiliskej. Nechikolmej tamatij kemej keman tisentakuaj iniuan totasojikniuan. Komo seki tokniuan techyoleuaj maj iniuan titakuatij uan techiluiaj maj tikuikakan teisa tein amo ouij se kichijchiua, ¿toni tikchiuaskej? Xa tepitsin tiyolmouiskej, sayoj ke timochikauaskej uan tikuikaskej tein nochin kiueliliskej. Itech nechikolmej, Jiova yejua akin techyoleua, uan techchijchiuilia miak taman tein kuali (Sal. 23:5; Mat. 24:45). Yejuatsin kiyolpaktia maj tiktemakakan teisa, tein okachi kuali tein uelis tiktemakaskej. Yejua ika, maj kuali timomachtikan uan maj titanankilikan nochipa keman tiueliskej. Ijkon, amo sayoj tikseliskej tein Jiova techmaka, ta no titapaleuiskej maj oksekin no kiselikan. w19.01 8 § 3; 13 § 20

Ne uejkauj, auilnemilis miakpa pouia itech taueyichiualis tein amo melauak (Os. 4:13, 14). Miakej kinueyichiuayaj tiotsitsin porin kiuelitayaj auilnemiskej. Sayoj ke nejon amo kichiuaya maj yolpakikan. David kijtoj ke akin kinueyichiuaj tiotsitsin tel tajyouiaj. Nejon taltikpakneminij hasta kintemaktiayaj ininkoneuan ininixpan tiotsitsin (Is. 57:5). Jiova kiteltauelitaya maj ijkon kintajyouiltianij (Jer. 7:31). Axkan, itech taneltokalis tein amo melauak kuali kiitaj maj taltikpakneminij auilnemikan uan maj motasojtakan iniuan inintakaikniuj oso ininsiuaikniuj (1 Cor. 6:18, 19). Maski taltikpakneminij kinemiliaj ke ueli kichiuaj tein kinekij, tein melauj okachiok tajyouiaj. Uan xa tikitaniya nejon. Yejua ika, xikaki Jiova. Senkis xikneltoka ke komo tiktakamati yejua tein okachi mitspaleuis. Amo keman xikelkaua ke komo tikchiua tein amo kuali okachi ueyi yeski tajyouilis ke yolpakilis (Gál. 6:8). w18.12 27, 28 § 16-18

Komo se tokniuj auilnemi, inamik moneki kiixpejpenas toni kichiuas. Jesús kijtoj ke akin kikajkayaujkej uelis kitsayanas amat ininixpan tekiuanij uan uelis oksepa monamiktis (Mat. 19:9). Sayoj ke no uelis kitapojpoluis inamik, uan kuali yetok komo ijkon kichiua. Biblia kijtoua ke Oseas oksepa kiuikak Gómer ichan. Ijkuak, Gómer monekia amo auilnemisok. Oseas seki tonalmej amo iuan motekak (Os. 3:1-3, nota, Traducción del Nuevo Mundo itech tajtol inglés). Sayoj ke satepan, xa oksepa motekak iuan. Nejon kiixnextij keniuj Dios motemakak oksepa kinselis israelitas uan kisentokas kuali mouikas iniuan (Os. 1:11; 3:4, 5). Nejin techmachtia ke komo akin kikajkayaujkej oksepa moteka iuan inamik, kinextia ke kitapojpoluijya (1 Cor. 7:3, 5). Ijkuak, amo uelisok kitsayanas amat ininixpan tekiuanij uan omen monekis mochikauaskej kiitaskej nemilis kemej namikuanij kemej Jiova kiita. w18.12 13 § 13

Keman timomachtiskej, moneki tiknemiliskej keniuj tanemilia Jiova porin nejin uelis techpaleuis maj kuali titaixpejpenakan satepan. Ijkon, komo techpanoua se taman kampa moneki ijsiujka titaixpejpenaskej, tikmatiskej toni tikchiuaskej. Maj tiknemilikan tein kipanok José. Inamik Potifar kitemoj maj iuan moteka, sayoj ke José niman kiixtopeuak. Ijkon kinextij ke kinemilijkaya keniuj kiita Jiova nemilis kemej namikuanij (Gén. 39:8, 9). Maj no tikelnamikikan tein kiluij: “¿Keniuj ueliskia nikchiuas nejin tein tel amo kuali uan yekmelauj nitajtakos iixpan Dios?”. Nejin kinextia ke tanemiliaya kemej Jiova. Axkan maj tiknemilikan ke se akin iuan titekitij technextilia ke techueuelita oso ke techtitaniliaj itech toteléfono se tajkuilol kampa senkis ika tajtoua auilnemilis oso se taixkopin kampa monextia nejon. Okachi amo ouij tikchiuaskej tein Jiova kiyolpaktia komo achto tiknemilijkejya keniuj kiita Jiova uan tikixtalianij toni tikchiuaskej. w18.11 25 § 13, 14

Seki motelmachtianij kinemiliaj ke nejin tajtolmej kijtosnekij ke Habacuc ajkotsijtsikuiniskia uan mijtotiskia ika yolpakilis porin iDios kipaleuiaya. ¿Melauj ke ineskayo techmachtia se taman tein motelneki? Jiova amo sayoj kichiuani kualtsitsin netenkaualismej, ta no techyekmatiltia ke amo uejkaua kichiuas. Amatajkuilol Habacuc techmachtia ke motelneki titakuaujtamatiskej iuan Jiova (Hab. 2:4). ¿Toni techpaleuis maj tiksentokakan titakuaujtamatikan? Moneki tikchikauaskej tokuali uikalis iuan. Yejua ika moneki tikchiuaskej eyi taman. Yekinika, nochipa tiktataujtiskej Dios uan tiktapouiskej nochi tein techtekipachoua. Ojpatika, tikakiskej ika nejmachkayot iTajtol uan tikseliskej itaixyekanalis tein techmaka itechkopa inechikol. Uan expatika, maj tikchiakan ika takuaujtamatilis uan nejmachkayot maj yejuatsin techpaleui. Yejua nejon tein kichiuak Habacuc. Maski moteltekipachojtoya keman peuak iuan tajtoua Jiova, satepan yolpaktoya uan okachi iuan takuaujtamatia. Maj tikchiuakan kemej yejua uan ijkon no tikmachiliskej keniuj toTajtsin Jiova kemej yeskia technaua. Amo onkak okse taman tein uelis techyolseuis itech nejin taltikpak kampa motelchiua tein amo kuali. w18.11 17 § 18, 19

Moajsi okse taman tein kinextia ke Jiova techtasojta. Juan 3:16 kijtoua: “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin [...] para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa”. Uan Jesús kinextij ke semi techtasojta keman toka momikilij. ITajtol Dios kijtoua ke “in tajyouilis nion no in ouijkayot” uelis “techtsinkixtis itech ne itetasojtalistsin de Cristo” (Rom. 8:35, 38, 39). Kemansa tikpanouaj kuejmolmej tein techsioujtiaj, kichiuaj maj tiyolkuetauikan oso maj amo techyolpaktiok tiktekitiliskej Jiova. Sayoj ke komo tikelnamikij ke Cristo semi techtasojta uelis techpaleuis maj titaxikokan (2 Cor. 5:14). Nejin netasojtalis techolinia maj tiknekikan tiksentokaskej tiyoltoskej uan tiktekitilijtoskej Jiova. No techpaleuis maj amo timosenkauakan hasta keman mochiuas se tetsauit, techtajyouiltiskej, amo panos tein tikchiayaj oso semi timotekipachojtoskej. w18.09 14 § 8, 9

Uelis tiksentokaskej tinentinemiskej itech tein melauak komo tikseliaj uan tiktakamatij nochi tein Jiova techmachtia. Moneki tiktayekanaltiskej tein melauak uan tiktakamatiskej tein Biblia techyolmajxitia. Ijkon kemej David, moneki senkis tikixtaliskej tiksentokaskej tinentinemiskej itech tein melauak. Komo amo, uelis peuas titanemiliskej itech tein monekik tikauaskej keman tikixmatkej uan hasta xa tiknekiskej oksepa tikpiaskej seki taman. Sayoj ke tikmatij ke amo ueli tikixpejpenaj toni tamachtilis tikseliskej uan toni amo, porin moneki tinentinemiskej itech “nochi tanextililisme ten melau” (Juan 16:13). Techpaleuis maj amo keman tikauakan tein melauak komo kuali tiktekitiltiaj totiempo. Komo amo timoyekpiaj, uelis miak horas timoixpetaniskej, tikchiuaskej tein tikuelitaj, tiktekitiltiskej Internet oso tikitaskej televisión. Amo kijtosneki ke amo kuali yetok maj tikchiuakan nejin, sayoj ke uelis techkuiliskej tiempo tein achto ika timomachtiayaj uan tikchiuayaj itekiyo Dios. w18.11 10 § 7, 8

Keman itech tonemilis teisa ijsiujka mopata, uelis timoteltekipachoskej (Prov. 12:25). Uan xa ouij techkisas tikajsikamatiskej keyej mopatak. ¿Toni techpaleuis maj tiyolseujtokan? (Sal. 131:1-3.) Maski semi ouij tein tikpanotoskej, “yolseuilis” tein Dios temaka uelis kiyekpias totanemilil uan techpaleuis maj tiyolseujtokan (Filip. 4:6, 7). Yejua ika, maj tiktajtanikan Jiova maj techpaleui keman timoteltekipachojtoskej, uan yolseuilis tein yejuatsin temaka techolinis maj tiksentokakan tiktekitilikan uan techpaleuis maj amo timosenkauakan. Iespíritu Dios uelis techpaleuis maj tiyolseujtokan, uan no maj tikajsikan tajkuilolmej itech Biblia tein techpaleuiskej maj tikajsikamatikan toni yekmelauj tayekantok (Juan 14:26, 27). w18.10 27 § 2; 28 § 5, 8

¿Katiyejua taman okachi kijtakouani taltikpaknenkej uan tein tel uejkaujya moajsi? Takajkayaualis. Nejin yejua keman se kijtoua tein se kimati ke amo melauak. Akin yekinika takajkayauak yejua Amokuali, akin Jesucristo kitokaytij kemej “tetat den nochi nekes ten xolopijtijtinemij” (Juan 8:44). ¿Kemanian yekinika takajkayauak? Nejin panok tel miak xiujmej achtoya, itech xochital tein moajsia Edén. Adán uan Eva kualtsin nemiaj itech xochital tein Dios kinmakaka. Sayoj ke kinnauatijka maj amo kikuanij “itakilo kouit tein kiixnextia taixmatilis ika tein kuali uan tein amo kuali”. Komo amo kitakamatiaj, mikiskiaj. Maski Satanás kimatia nochi nejin, kichiuak maj se kouat kiluiani Eva yekinika takajkayaualis: “Yekmelauj amo nanmikiskej”. Uan no kijtoj: “Porin Dios kimati ke itech tonal keman nankikuaskej koujtakilot, nanixtajtapouiskej uan nanmochiuaskej kemej Dios, uan nankiixmatiskej tein kuali uan tein amo kuali” (Gén. 2:15-17; 3:1-5). w18.10 6 § 1, 2

Komo tiknekij tiyeskij tiyolchipaujkej, moneki tiknemiliskej uan tiknejnekiskej tein kuali. Nejin motelneki komo tiknekij maj Jiova kiseli totaueyichiualis (2 Cor. 4:2; 1 Tim. 1:5). Biblia kijtoua ke nion se taltikpaknenkej uelis kiitas Dios uan kisentokas yoltos (Éx. 33:20). Komo ijkon, ¿keyej kijtoj Jesús ke akin yolchipaujkej “kixitatiue in Totajtsin Dios”? Tajtol griego tein mokepa kemej “kixitatiue” uelis kijtosnekis se kinemilis, se kiajsikamatis uan se kiixmatis. Yejua ika, se kiitas Dios kijtosneki se kiajsikamatis keniuj tamati uan se kipatiuitas ikualneskayouan. No ueli tikitaj Dios keman tikitaj keniuj techpaleuia (Job 42:5). Uan no, keman itech titanemiliaj kualtsitsin tatiochiualismej tein kinmakas akin mochikauaj chipaujkanemiskej uan kitakamatiskej. w18.09 20 § 13, 15, 16

Komo tikchiuaj tein tikmatij ke kuali yetok, Jiova techtatiochiuis. Maski taixmatilis tepaleuia maj se kipia tamatilis, kemej titaixpejpenaj kinextia ke titamatinij, amo taixmatilis tein tikpiaskej. Biblia kijtoua ke hasta askamej tamattokej, porin itech tonalmej keman tel tona kisentiliaj tein kikuaskej (Prov. 30:24, 25). Cristo yejua “in tamachilis de Dios” uan nochipa kichiua tein kiyolpaktia iTajtsin (1 Cor. 1:24; Juan 8:29). Yejuatsin kintatiochiuia akin kisentokaj kinextiaj yolyemanilis uan kichiuaj tein kimatij ke kuali yetok (Mat. 7:21-23). Yejua ika, maj timochikauakan tiyeskij tiyolyemankej. Ijkon, tikinyolchikauaskej tokniuan maj kitekitilikan Jiova ika yolyemanilis. Amo niman uelis tikchiuaskej tein tikmatij ke kuali yetok uan moneki amo tiyolijsiuiskej. Sayoj ke, ijkon tiknextiskej ke tiyolyemankej uan tiyolpakiskej axkan uan nochipaya. w18.09 7 § 18

Keman Jiova techchijchiuak, kinekia maj iuan titekitinij. Maski axkan titajtakouanij, tiitekitikauan Dios akin tiktakamatij ueli titekitij iuan mojmostaj. Kemej neskayot, Biblia kijtoua ke iuan titekitij Dios keman titanojnotsaj uan tikinpaleuiaj oksekin maj mochiuakan itatojtokakauan Cristo (1 Cor. 3:5-9). Se tel ueyi tatiochiualis maj Akin kichijchiuak nochi tein onkak techixpejpenani maj tikchiuakan se tekit tein motelneki. Okseki taman kemej ueli titekitij iuan Jiova yejua keman tikinpaleuiaj tochankauan uan tokniuan, keman kuali titeseliaj, keman titapaleuiaj itech seki tekimej tein mochiua itech inechikol Dios uan keman tikixtaliaj okachi tiktekitiliskej Jiova (Col. 3:23, TNM). Sayoj ke, maj amo tikitakan tein tiuelij tikchiuaj tejuan itech itekiyo Jiova ika tein oksekin ueli kichiuaj. Maj amo tikelkauakan ke sekin timokokouaj, tataman xiujmej tikpiaj, tataman tein tikpanouaj uan tataman tein tiuelij tikchiuaj. w18.08 23 § 1, 2

Jiova kiyekmatiltij Habacuc ke kinankiliskia inetajtaniluan. Amo uejkaua, nochi tein kitekipachouaya poliuiskia. Tein melauj, kiluij tanauatijkej: “Amo xiyolijsiui uan nouan xitakuaujtamati. Maski moitas ke niuejkaua, niknankilis monetataujtil”. Jiova kielnamiktij ke kiixtalijkaya tonal keman kichiuaskia tein motenkaujtoya uan kiyolmajxitij maj kisentokani mochiani. Satepan, mochiuaskia nochi tein kichixtoya. Komo tikchiaj ika nejmachkayot maj Jiova techpaleui uan kuali tikakij tein techiluia, titakuaujtamatiskej uan tiyolseujtoskej maski tikpanoskej ouijkayomej. Jesús kijtoj maj amo tiktayekanaltikan tikmatiskej “in tonal nion in metsti kuak Totajtsin Dios kichiuas” tein motenkaujtok (Hech. 1:7). Maj titakuaujtamatikan ke yejuatsin kimati kemanian okachi kuali. Yejua ika, maj amo timosenkauakan uan maj tiksentokakan timochiakan ika yolyemanilis, takuaujtamatilis uan nejmachkayot. Uan keman timochixtokej, maj kuali tiktekitiltikan totiempo uan maj tiktekitilikan Jiova kemej okachi kuali tiueliskej (Mar. 13:35-37; Gál. 6:9). w18.11 16 § 13, 14

Kampa moskaltij Pedro nochin kinitayaj akin amo katkaj judíos ke amo chipaujkej. Sayoj ke kipanoka seki taman tein kipaleuij maj kipata itanemilil. Kemej neskayot, Dios kiitaltij se taman (Hech. 10:9-16). Ijkon kemej Pedro, moneki tikitaskej ika nejmachkayot keniuj titanemiliaj uan timokauaskej maj oksekin techpaleuikan maj tikitakan ox itech toyolijtik tiksentokaj titechikoitaj. ¿Toni no uelis tikchiuaskej? Komo yekmelauj titetasojtaj techpaleuis maj amo titechikoitakan (2 Cor. 6:11-13). ¿Sayoj timouikaj iniuan akin tajtouaj totajtol, akin ixtamatij kemej tejuan, akin no maseualmej, oso kayomej itech toaltepeuj? Komo ijkon, maj tiktemokan no iniuan timouikaskej oksekin akin okseko kayomej oso taman kemej moskaltijkej. ¿Uelis tikinyoleuaskej maj touan tanojnotsatij, maj takuatij tochan oso keman timosentiliskej iniuan okseki tokniuan? (Hech. 16:14, 15.) Komo ijkon tikchiuaj, itech toyolo sayoj onkas netasojtalis uan amo uelis kalakis tachikoitalis. w18.08 9 § 3, 6; 10 § 7

Seki tokniuan kinextiaj ika okseki taman ke amo senkis kiixtopeuanij kemej monejnemiltiaj akin amo itekitikauan Dios. Kemej neskayot, keman youij iluimej, mijtotiaj uan monejnemiltiaj kemej amo kinamiki kichiuas se itekitikauj Dios. Kitaliaj itech redes sociales taixkopimej kampa nesij yejuan uan kijkuilouaj miak taman tein kinextia ke tanemiliaj kemej akin amo itekitikauan Dios. Nejon uelis kijtakos ininkuali uikalis iuan Jiova akin mochikaujtokej kuali monejnemiltiskej (1 Ped. 2:11, 12). Nochi tein onkak itech taltikpak chijchiujtok kemej techolinis maj tiktayekanaltikan “tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok” (1 Juan 2:16). Sayoj ke tejuan tiiaxkauan Jiova, uan yejua ika yejuatsin technauatia maj “tiksekokautiyakan ne amokuali nemilis uan ma tikmajpeutiyakan ne tanejnekilisme ten ualeutok iuan in taltikpakuani san. Uan [...] ma tiyekchipaukanemikan ika ne kuali taixejekolis, uan ma tikpiakan ne yolmelaukanemilis uan ma tikmouistilijtiyakan Totajtsin Dios nikan taltikpak” (Tito 2:12). Nochi itech tonemilis, kemej titajtouaj, kemej titakuaj uan titatayij, kemej timotilmajtiaj uan kemej timochijchiuaj, uan kemej titekitij, moneki kinnextilis akin techitaj ke tiiaxkauan Jiova. w18.07 25 § 13, 14

Komo tiksentokaj tikitaj Jiova, amo tikauaskej maj inintachiualisuan oksekin techkualantikan oso techuikakan maj tikchiuakan teisa tein uelis kijtakos tokuali uikalis iuan. Nejin okachiok moneki kielnamikiskej akin kipiaj se tekit itech inechikol Dios, ijkon kemej Moisés. Tein melauj, tisejsemej moneki timochikauaskej tiktakamatiskej Jiova uan ijkon timakisaskej (Filip. 2:12). Komo tikpiaj okachi tekimej, Jiova okachiok kichia maj kuali timonejnemiltikan (Luc. 12:48). Komo yekmelauj tiktasojtaj Jiova, nion teyi techtapololtis nion kichiuas maj amo techtasojtaok (Sal. 119:165; Rom. 8:37-39). Itech nejin tonalmej tein semi ouijkej, maj tiksentokakan tikitakan akin tokotsyetok itech itrono ne iluikak uan ijkon tikajsikamatiskej katiyejua itanejnekilis (Sal. 123:1). Maj amo keman tikauakan maj inintachiualisuan oksekin kijtako tokuali uikalis iuan Dios. w18.07 16 § 19, 20

Semi techyolpaktia tikmatiskej ke okachi momiakiliaj akin kiueyichiuaj Jiova. Nejon kinextia ke itekitikauan Dios petanij. Itech xiuit 2017, tikpiakej panoua diez millones nemachtilmej ika Biblia. Uan no, tel miakej touan monechikojkej keman tikelnamikkej imikilis Cristo uan kiitakej ueyi netasojtalis tein Dios kinextij keman kitemakak iKonetsin maj techmakixti (1 Juan 4:9). Itech ixolal Jiova, titajtouaj miak tataman tajtolmej. Sayoj ke nejon amo techtsakuilia maj tinochin tikueyichiuakan kemej yeskia tikalyetouanij (Apoc. 7:9). Tein yeski tajtol titajtoskej oso kampa yeski tinemiskej, ueli tipetanij itech taltikpak (Filip. 2:15). Totanojnotsalis, tokuali uikalis uan kemej tiksentokaj titachixtokej tapaleuia maj tikueyitalikan Jiova. w18.06 21 § 1-3

Kemej Jesús kitelyolpaktijtoya kimachtis samaritana amo itech tanemiliaya takual. Yejua kiitaya kemej takual kichiuas itanejnekilis iTajtsin uan tanojnotsas, hasta kinojnotsas se samaritana (Juan 4:32-34). Santiago uan Juan amo kiajsikamatkej tein Jesús kinekik kinmachtis. Keman tatitanilmej uan yejua panotoyaj itech xolal Samaria, tatitanilmej kitemojkej kani mokauaskej nejon youak. Samaritanos amo kinekkej maj ompa mokauanij, yejua ika Santiago uan Juan tel kualankej uan kiluijkej Jesús maj tajtanini maj chichinouini nejon xolal. Sayoj ke Jesús kintakaualtij (Luc. 9:51-56). Santiago uan Juan xa amo kualaniskiaj komo nejon panoskia Galilea, kampa kayomej katkaj. Xa tel kualankej porin amo kinyekitayaj samaritanos. Satepan, tatitanil Juan tanojnotsato kampa nemiaj samaritanos, uan miakej kikakkej. Xa mopinaujmatik keman kielnamikik tein kinekia maj kinpano (Hech. 8:14, 25). w18.06 10, 11 § 12, 13

Kemej tikpatiuitaj tein tamachtia iTajtol Dios, tiktakamatij tein kijtoua uan nochipa tikijtouaj tein melauak. ¿Keyej? Porin Satanás okachi kitekitiltia takajkayaualis uan ika kinuetsiltiani miakej. Akin takajkayaua moijtakoua yejua uan kinijtakoua oksekin (Juan 8:44). Yejua ika, maski titajtakouanij, timochikauaj amo keman titakajkayauaskej (Efes. 4:25). Kemansa uelis yeski ouij. Abigail, akin kipia 18 xiujmej, kijtoua: “Xa amo nochipa moitas ke tapaleuia maj se kijto tein melauak, okachiok keman takajkayaualis uelis kichiuas amo xikpia se ouijkayot”. Komo ijkon, ¿keyej mochikaua amo takajkayauas? Victoria, akin kipia 23 xiujmej, kijtoua: “Keman tikijtoua tein melauak uan tikchiua tein tikneltoka, uelis mitskuejmoloskej. Sayoj ke nochipa tikselia okachi nepaleuilmej: okachi amo tiomeyolouas ika tein tikchiuas, okachi tikmachilis ke Jiova amo uejka yetok uan akin mitstasojtaj mitspoujkaitaskej”. Kemej tikitaj, amo nenkaj komo tikui “melauak Tajtoltsin de Dios ijkon keme se soldado kuak [...] motajkoilpia”. w18.05 28 § 3, 5

Ijkon kemej okachi onkas ouijkayomej, monekis okachiok titachixtoskej. Dios kiixpolos nochi tein amo kuali itech tonal tein kiixtalijya (Mat. 24:42-44). Sayoj ke hasta maj ejko nejon tonal, moneki timochiaskej uan nochipa titachixtoskej. Maj mojmostaj tikixtajtoltikan Biblia uan maj nochipa tikchiuakan netataujtil (1 Ped. 4:7). Maj tikitakan ininkuali neskayo tokniuan akin tachixtokej uan petanij. Maj nochipa tikchiujtokan itekiyo Jiova, maj tikinpaleuikan oksekin uan maj tiktemokan iniuan tiyetoskej tokniuan. Ijkon okachi tiyolpakiskej uan amo tikmachiliskej ke tel yolik panouaj tonalmej (Efes. 5:16). Maski miakpa timopolouaj, Jiova techkaua maj tiksentokakan tiktekitilikan. Yejuatsin techpaleuia inintechkopa tayekananij itech nechikol (Efes. 4:11, 12). Yejua ika, keman se tayekankej techkalpanos, maj tikakikan nochi kuali tayolmajxitilis tein techmakas. w18.06 24, 25 § 15-18

Jesús kiniluij imomachtijkauan maj kisentokanij itech inetasojtalis. ¿Keyej? Porin moneki se taxikos uan ijkon uelis se nemis kemej se yekmelauj itatojtokakauj Cristo. Itech Juan 15:4-10, Jesús kinextij ke moneki se taxikos keman kikuik tajtol se kisentokas uan okseki tajtolmej kemej nejon. ¿Keniuj tiknextiaj ke tiknekij tiksentokaskej itech inetasojtalis Cristo uan maj kiyolpakti tein tikchiuaj? Komo tiktakamatij itanauatiluan. Jesús sayoj techtajtania maj tikchiuakan tein yejua no kichiuak. Yejua kijtoj: “Kuak Nejuatsin niktakamatiu itanauatiluan de Notajtsin Dios, ijkuakon Nejuatsin niksentoka nikselijtiyas itetasojtalis”. Jesús technextilij keniuj tikchiuaskej (Juan 13:15). Keman titanojnotsaj kemej tanauatij Jesús, no tiknextiaj ke tiktasojtaj Dios. ¿Keyej? Porin tein Cristo technauatia maj tikchiuakan mouika ika tein kinemilia iTajtsin (Mat. 17:5; Juan 8:28). Uan keman tikinnextiliaj Jiova uan Jesús ke tikintasojtaj, yejuan kisentokaj techtasojtaj. w18.05 18 § 5-7

Keman titelpochok oso tiichpochok, moneki tikixpejpenas toni timomachtis, kani titekitis uan okseki taman kemej nejon. Komo senkis tikmati toni tikneki tikchiuas, okachi amo ouij mitskisas titaixpejpenas. Komo niman tikixtalia tein tikchiuas uan kuali tein tikixtalia, okachi niman tikselis tein kuali. Noyampa taltikpak moajsij tel miakej telpochmej akin kinnamiki maj tikiniluikan ke kuali tein kichiuaj porin kitekitiliaj Jiova ika nochi ininyolo uan kitayekanaltiaj kichiuaskej tein kiixtalijkej. Yejuan yekmelauj yolpakij. Uan no momachtiaj keniuj kitojtokaskej itaixyekanalis Jiova itech nochi, kemej itech nemilis kemej kalyetouanij. Tekiuaj Salomón tayolmajxitij maj titakuaujtamatikan iuan Jiova ika nochi toyolo. Uan no kijtoj: “Itech nochi tein tikchiuas xiktemo, uan yejuatsin kimelauas moojuan” (Prov. 3:5, 6). Jiova kintelpatiuita telpochmej uan ichpochmej. Kinteltasojta, uan yejua ika kinmatampauia, kinixyekana uan kintatiochiuia. w18.04 26 § 7; 27 § 9

Tatitanil Juan no tel tapaleuij itech nechikol tein moajsia itech yekinika siglo. Yejua tel kualtsin kijkuiloj tein kichiuak Jesús itech itanojnotsalis. Nejin kinyolchikauani tokniuan ijkon kemej panouanij xiujmej uan kisentoka techyolchikaua axkan. Kemej neskayot, sayoj itech iamatajkuilol moijtoua ke Jesús kijtoj ke netasojtalis kinixnextia akin yekmelauj itatojtokakauan (Juan 13:35). Eyi amamej tein Juan kijkuiloj no tamachtiaj miak taman tein kitelpia ipatiuj. Kemej neskayot, keman amo kuali timomachiliaj porin timopolouaj, ¿melauj ke techyolseuia tikixtajtoltiskej ke iesyo Jesús “techchipautinemi de nochi totajtakol”? (1 Juan 1:7.) Uan komo tiksentokaj timotajtakoltiaj tein tikchiujkej, ¿melauj ke techyolseuia tikixtajtoltiskej ke “Dios ojkachi ok ueyi uan ke ne teluililis den toyolo”? (1 Juan 3:20.) Sayoj Juan kijkuiloj ke “Dios Yejuatsin tetasojtatinemi” (1 Juan 4:8, 16). Uan itech ojpatika uan expatika amat tein kijkuiloj kinyolchikaua tokniuan akin kisentokaj “chipaukanemij, ijkon keme techmachtia in melauak Tajtoltsin” (2 Juan 4; 3 Juan 3, 4). w18.04 18 § 14, 15