Enero

Tinochin tiitekitikauan Dios tiknekij timomachtiskej kuali tikchiuaskej tekit tein yejuatsin techmakani (2 Tim. 4:5). Nejin tekit yejua tein okachi kipia ipatiuj uan moneki maj axkan tikchiuakan. Sayoj ke, uelis techouijmakas titanojnotsaskej miak tonalmej ijkon kemej tikuelitaskiaj. Onkak okseki taman tein moneki tikchiuaskej kampa tikuij totiempo uan tochikaualis. Xa monekis titekitiskej miak horas uan ijkon tikinixpanoltiskej tochankauan. Xa no tikixnamikij ouijkayomej porin tejuan oso semej tokalyetouanij mokokoua, tikixnamikij tayokol oso porin tixiuejkejya. Maj amo timosenkauakan komo tein tikpanotokej techtsakuilia maj amo semi titanojnotsakan. Jesús kimatia ke amo tinochin ueliskia titanojnotsaskej miak tonalmej (Mat. 13:23). Jiova semi kipatiuita keman tikchiuaj nochi tein tiuelij itech itekiyo (Heb. 6:10-12). w19.04 2 § 1-3

Itakajkayaualis Satanás kichiua maj amo kuali ika tajtokan Jiova. Kichiuani maj miakej kineltokakan ke mikemej kintajyouiltiaj itech miktan. ¿Keyej nejon kichiua maj amo kuali ika tajtokan Dios? Porin kiteajsikamatiltia ke Jiova, Dios akin tetasojta tamati kemej Amokuali (1 Juan 4:8). ¿Keniuj timomachiliaj keman tikmatij nejon? Uan tein okachi moneki, ¿keniuj momachilia Jiova? Maj amo tikelkauakan ke yejuatsin kitauelita maj kintajyouiltikan taltikpakneminij (Jer. 19:5). Itakajkayaualis Satanás kichiua maj taltikpakneminij amo takuaujtamatikan itech inemilis Cristo tein kitemakak (Mat. 20:28). Amokuali takajkayaua keman tamachtia ke tikpiaj teisa tein kisentoka yoltok satepan ke timomikiliaj. Komo nejon yeskia melauak, tinochin nochipa tiyoltoskiaj uan amo monekiskia maj Cristo kitemakani inemilis tein kichiua maj tikpiakan nemilis nochipa. Maj tikelnamikikan ke inemilis Cristo tein kitemakak yejua tein okachi ika Jiova uan Jesús kinextijkej ke techtasojtaj (Juan 3:16; 15:13). ¿Keniuj momachiliaj keman kinijtouiliaj ke nejon tein kichiujkej amo monekia? w19.04 14 § 1; 16 § 8, 9

¿Kani moajsi tein Jesús tamachtij? Itech naui Evangelios tikajsij miak taman tein kichiuak uan tein kijtoj keman moajsia nikan taltikpak. Okseki amatajkuilolmej tein pouij itech Escrituras Griegas Cristianas techpaleuiaj maj okachi kuali tikajsikamatikan kemej tanemilia Jesús porin akin kijkuilojkej kinixyekanak yektikatsin espíritu uan kipiayaj ‘in tamachilis ten Cristo kitemaka’. Itamachtilis Jesús techpaleuia itech nochi tonemilis. Yejua ika, itanauatil Cristo techyekana itech tein tikchiuaj tokalijtik, totekipan oso kampa timomachtiaj uan itech nechikol (Gál. 6:2). Okachi tikixmatij nejin tanauatil keman tikixtajtoltiaj Escrituras Griegas uan itech titanemiliaj uan tiktakamatij keman tikchiuaj tein ompa motayolmajxitia uan motanauatia. Keman tiktojtokaj itanauatil Cristo, tein melauj tiktakamatij Jiova, Dios akin tetasojta akin itech ualeua nochi tein Jesús tamachtij (Juan 8:28). w19.05 3, 4 § 6, 7

Tetayokoltij maj taltikpakneminij kichiuakan tein Amokuali kiuelita. Sayoj ke Jiova kimati keniuj tekiti Satanás. Yejuatsin kiita totayokol uan ueli techyolseuia. Semi techyolpaktia tiktekitiliskej Dios akin “nachipa techyolpoxautinemi [oso techyolseuijtinemi] mientras tejuan titajyouijtinemij [...] para ke ma tejuan no tikinyolpoxautinemikan ne oksekin taneltokani ten yoltajyouijtinemij ika miak tataman toneukayot [...] ika mismo yolpoxauilis tenika Totajtsin Dios techyolseuijtinemi” (2 Cor. 1:3, 4). Xa okachi moneki maj se kinyolseui akin inintatuan amo kitemouayaj kinpaleuiskej maj amo ininka mauiltianij oso ininka mauiltij se akin kuali kiixmatiaj. Tekiuaj David kimatia ke sayoj Jiova uelis okachi techyolseuis (Sal. 27:10). Takuaujtamatia ke Dios kinpaleuia akin ininchankauan kinixtopeuaj uan amo kintasojtaj. ¿Keniuj kichiua? Itechkopa itekitikauan. Tokniuan itech nechikol kemej yeskia tokalyetouanij. Kemej neskayot, Jesús kijtoj ke akin iuan kiueyichiuayaj Dios katkaj iikniuan uan itatuan (Mat. 12:48-50). w19.05 15, 16 § 8, 9

¿Toni moneki tiktayekanaltiskej timomachtiskej? Moneki mojmostaj tikxeloskej tiempo uan timomachtiskej iTajtol Dios. Axkan, tein moixtajtoltia itech Biblia sejse semana itech nechikol okachi amo miak. Ijkon okachi tikpiaj tiempo titanemiliskej itech tein tikixtajtoltiaj uan tiktemoskej okachi tamachtilis. Amo sayoj moneki tikixtajtoltiskej capítulos tein ixyetok, ta tiktemoskej maj tamachtilis ajsi itech toyolo uan maj kichikaua tokuali uikalis iuan Jiova (Sal. 19:14). Keman timomachtiaj amaix Tanejmachtijkej techpaleuia maj tikajsikamatikan Biblia. Yejua ika, maj tikitakan ika miak nejmachkayot textos, okachiok tein moixtajtoltiskej keman timomachtiskej itech nechikol. Maj tikitakan keniuj textos kipaleuiaj tanemilil tein momelaua itech párrafo. Uan no, maj tikxelokan tiempo titanemiliskej itech textos uan keniuj tikuiskej itech tonemilis (Jos. 1:8). w19.05 27 § 5; 28 § 9

Jesús techkauilij se kuali neskayot porin nochipa kitemoj tanojnotsas. Kiitaya ke semi monekia kiteixmatiltis iTekiuajyo Dios. Semi uejka nejnemia uan ijkon ueliskia kinnojnotsas miakej. Tanojnotsaya kajkalpan uan kampa moajsiaj taltikpakneminij. Jesús nochipa kitayekanaltij itekiyo Dios. Tikchiuaj kemej Cristo keman tiktemouaj tikteixmatiltiskej iTekiuajyo Dios kampa yeski. Maski ueliskia tikchiuaskej miak taman okachi tiktayekanaltiaj tanojnotsalis (Mar. 6:31-34; 1 Ped. 2:21). Sekin tokniuan uelij kichiuaj tekit kemej precursores especiales, regulares oso auxiliares. Oksekin momachtianij okse tajtol oso youij kampa okachi monekij tanojnotsanij. Uan amo tikinelkauaj tokniuan tanojnotsanij, akin no mochikauaj kiteixmatiltiskej kuali tanauatilmej. Tikchiuaskej miak oso amo, Jiova amo techtajtania okachi ke tein uelis tikchiuaskej. w19.04 4 § 7, 8

Uelis timotajtaniskej: “¿Nitenexikoluia?” (1 Ped. 2:1). “¿Nimoueyineki porin nikayot itech se ueyi altepet, nikpiak se ueyi nemachtil oso nitominpixkej?” (Prov. 16:5). “¿Nikinita ke amo teyi chiuanimej akin amo kipiaj tein nejua nikpia oso porin okseko kayomej?” (Sant. 2:2-4). “¿Nikuelita tein onkak nikan taltikpak kampa taixyekantok Satanás?” (1 Juan 2:15-17). “¿Nikuelita nimoixpetanis ika tein kinextia auilnemilis uan tateuilis?” (Sal. 97:10; 101:3; Amós 5:15). Tein titanankiliskej xa uelis techmatiltis toni taman moneki tikpataskej. Akin iniuan timouikaj uelis techpaleuiskej oso techijtakoskej (Prov. 13:20). Itech kaltamachtiloyan oso totekipan, techyoualouaj akin amo techpaleuiaj maj titanemilikan kemej Jiova. Sayoj ke, itech nechikolmej tikinajsij kuali tasojiknimej akin techpaleuiaj maj tiknextikan netasojtalis uan maj tikchiuakan tein kuali (Heb. 10:24, 25). w19.06 12 § 13, 14

Jiova amo kinekia maj taltikpakneminij kipianij ouijkayomej kemej tein axkan kipiaj. Yejua ika, tikajsikamatij keyej se itekitikauj Dios kijtoua seki taman tein amo taixejekol keman tajyouijtok (Job 6:2, 3). Maski techijtouilis tein amo melauak tejuan oso Jiova, moneki amo niman tikualaniskej nion tikijijtoskej. Kemansa, se tokniuj akin semi tajyouijtok no moneki maj kiyolmajxitikan oso maj kimelauakan (Gál. 6:1). ¿Keniuj tayekananij uelis kipaleuiskej? Ijkon kemej kichiuak Elihú, yejua kikakik Job uan kiajsikamatik tein kipanotoya (Job 33:6, 7). Achto ke kiyolmajxitiskia, Elihú kitemoj kuali kiajsikamatis tein Job kinemiliaya. Tayekananij no uelis kikakiskej ika nejmachkayot akin tajyouijtok uan kitemoskej kiajsikamatiskej tein kipanotok, kemej kichiuak Elihú. Ijkon, xa okachi kinekis kichiuas tein kiyolmajxitiskej w19.06 22, 23 § 10, 11.

¿Keniuj tiksentokaskej tikueyichiuaskej Jiova keman tekiuanij amo techkauaskejok? Sucursal kinmakas tayekananij tanauatilmej uan kinyolmajxitis. ¿Uan toni kichiuaskej komo sucursal amo ueli kinmatiltia tein moneki? Yejuan techixyekanaskej ika tein kijtoua Biblia uan toamaixuan (Mat. 28:19, 20; Heb. 10:24, 25). Jiova motenkauani ke itekitikauan nochipa kipiaskej tamachtilis tein kichikauas inintakuaujtamatilis (Is. 65:13, 14; Luc. 12:42-44). Yejua ika, uelis senkis tikneltokaskej ke inechikol Dios techmakas tein techpaleuis maj amo keman tikauakan Dios. Sayoj ke tejuan no uelis tikchiuaskej seki taman. Keman tekiuanij techixnamikiskej maj tiktemokan kani uelis tiktatiskej Biblia uan okseki amaixmej. Maj amo keman tikauakan tamachtilismej tein tikpiaj itech amat oso itech tepos kampa niman techajxiliskej. Tinochin moneki tikchiuaskej tein techpaleuis maj kisentoka chikauak totakuaujtamatilis. w19.07 10 § 10, 11

Miakej nochipa kipianij inintaneltokalis. Sayoj ke yankuixtok mopatani nejon. Axkan okachi momiakiliaj akin amo kipiaj se taneltokalis. Itech seki altepemej, okachi onkakej akin kijtouaj ke amo pouij itech se taneltokalis (Mat. 24:12). ¿Keyej? Sekin xa sayoj kitemouaj moyolpaktiskej oso kiyektaliskej ininkuejmoluan (Luc. 8:14). Oksekin amo kineltokajok Dios. Sekin kemaj, sayoj ke kinemiliaj ke amo taixejekol maj se poui itech se taneltokalis, ke amo tapaleuiaok uan ke amo mouika ika tein kiajsinij tamatinij. Xa kinkakilianij tamachtianij, inintasojikniuan uan kampa moteixmatiltia miak taman ke nemilis iselti peuak. Sayoj ke amo semi kikakij tein kinpaleuis maj kineltokakan Dios. Oksekin kinkuejmoloua kiitaskej keniuj tayekananij itech taneltokalis sayoj kitemouaj kipiaskej tanauatil uan tomin. Uan itech seki altepemej, tekiuanij amo kinkauaj taltikpakneminij maj taueyichiuakan kemej kinekij. w19.07 20 § 1, 2

Maski amo tiyeskij titelchikaujkej uelis tiksentokaskej tiktekitiliskej Jiova. Miakej akin amo semi chikaujkejok, kisentokaj kichikauaj ininkuali uikalis iuan yejuatsin (2 Cor. 4:16). ¿Tiktekitilianij Jiova miak xiujmej uan axkan amo semi tiuelijok porin timokokouaj? Komo ijkon, maj amo timosenkauakan. Jiova kielnamiki uan kipatiuita nochi tein tikchiuanij (Heb. 6:10). Uan axkan maj tikelnamikikan ke Jiova amo kiita ke okachi tiktasojtaj porin okachi tiktekitiliaj. Ta tiknextiaj ke tiktasojtaj keman tiyolpakij tiktekitiliskej uan keman tikchiuaj nochi tein tiuelij (Col. 3:23). Yejuatsin kiajsikamati ke amo nochi ueli tikchiuaj (Mar. 12:43, 44). w19.08 3 § 6; 5 § 11, 12

Jiova kinpaleuia taltikpakneminij maj iuan motokikan ika ‘ininkuali tachiualisuan’ itekitikauan (Mat. 5:14, 15; 1 Ped. 2:12). Komo monamik amo itaixpantijkauj Jiova, ¿kinixmati akin pouij itech nechikol? Xikonyoleua monamik maj mouan youi nechikolmej (1 Cor. 14:24, 25). Tikchiaj maj se tonal tochankauan kitekitilikan Jiova. Sayoj ke maski timochikauaskej tikinpaleuiskej, xa amo keman kitekitiliskej. Komo ijkon panoua, maj amo tiknemilikan ke totajtakol. Tein melauj, amo akin ueli tikchikaujkauiaj maj kiseli totaneltokalis. Maski ijkon, maj amo tiknemilikan ke amo kinpaleuis kiitaskej ke tiyolpakij tiktekitiliskej Jiova. Maj ininka timotataujtikan, maj kuali tiknemilikan keniuj tikinnojnotsaskej uan maj tiksentokakan tikinpaleuikan (Hech. 20:20). Maj titakuaujtamatikan ke Jiova kitiochiuas tein tikchiuaskej. Uan komo tochankauan techkakij, momakixtiskej. w19.08 18, 19 § 15-17

¿Toni kijtosnekia Jesús? Ke moneki tinemiskej ika amo miak taman uan amo tikauaskej maj nion teyi techtapololti. Jesús kikauak se kuali neskayot porin nochipa kitayekanaltij itekiyo Dios uan kinnextilij itatojtokakauan maj no ijkon kichiuakan. Jesús kijtoj: “Xiktemokan achto iTekiuajyo Dios uan imelaujkayo”, komo ijkon tikchiuaj tiktojtokatoskej ineskayo (Mat. 6:33, TNM). Se taman kemej uelis tiktayekanaltiskej itekiyo Dios yejua komo tinemij ika amo miak taman, ijkon okachi tikinpaleuiskej oksekin maj kiixmatikan uan maj kitasojtakan Jiova. Kemej neskayot, ¿ueliskia amo titekitiskej oso timoixpetaniskej miak horas itech semana uan ijkon okachi titanojnotsaskej? w19.04 5, 6 § 12, 13

Yankuixtok, miakej tokniuan akin miak xiujmejya kitekitilianij Jiova monekini kichiuaskej okse taman tekit. Nejin tokniuan kinouijmakak kikauaskej tekit tein kichiuayaj. Kikauaskej semi kintayokoltij. Miakej, miak xiujmejya kitekitilijtoyaj Dios nochi tonalmej. Sayoj ke satepan momatkej. ¿Keyej? Porin kitasojtaj Jiova. Amo motenkaujkej ke kitekitiliskiaj Dios sayoj komo kipiayaj tekit tein kinekiaj (Col. 3:23). Yolpakij kisentokaskej kitekitiliskej Jiova itech tein yeski tekit. Nejin tokniuan ‘kipanoltiliaj Dios nochi ninyolkuejmololis’ porin kimatij ke yejuatsin ininka motekipachoua (1 Ped. 5:6, 7). Amo timoueyinekiskej techpaleuia tejuan uan no oksekin. Techpaleuia maj kuali timomachilikan uan tein okachi kuali, techpaleuia maj okachi timotokikan iuan toTajtsin Dios. w19.09 6, 7 § 15-17

Jiova amo sayoj kinauatij David maj kinixyekana ikalyetouanij, ta nochi xolal Israel. Kemej katka tekiuaj kipiaya ueyi tanauatil. Sayoj ke amo nochipa kuali kitekitiltij uan kichiuak ueyi tajtakolmej (2 Sam. 11:14, 15). Maski ijkon, kinextij ke kinekia maj Jiova kiixyekana porin mokauak maj kimelaua. Keman motataujtij, kitapouij nochi tein kimachiliaya uan mochikauak kichiuas tein yejuatsin kiyolmajxitij (Sal. 51:1-4). Uan no, amo moueyinekik porin mokauak maj kiyolmajxitianij takamej uan no siuamej (1 Sam. 19:11, 12; 25:32, 33). Ika nochi tein kipanok kiajsikamatik toni monekia kichiuas uan kitayekanaltij kitekitilis Jiova. David kimatia ke semi kipaleuiaya mokauas maj Jiova kiixyekana. Axkan, ueli tikitaj keniuj nemij akin mokauaj maj Jiova kinixyekana uan akin amo. Akin mokauaj maj Dios kinixyekana ‘yolpakkatsajtsij porin kuali moajsi ininyolo’ (Is. 65:13, 14). w19.09 17 § 15; 19 § 21

Itech xiuit 1935, itaixpantijkauan Jiova kuali kiajsikamatkej akonimej pouij itech “uel miak tagayot” tein kiitak Juan. Kiajsikamatkej ke amo monekia yaskej iluikak uan ijkon moajsiskej “iixpantsinko ne tayekankatrono uan iixpantsinko [...] ichkatsin de Dios”, ta ke nejin tajtolmej sayoj kiixnextiaj se taman. Maski akin pouij itech “uel miak tagayot” nemij nikan taltikpak moajsij “iixpantsinko ne tayekankatrono” komo kiseliaj Jiova kemej akin kinamiki maj taixyekana iluikak uan taltikpak uan mokauaj maj kinixyekana (Is. 66:1). Uan moajsij “iixpantsinko [...] ichkatsin de Dios” komo takuaujtamatij itech inemilis Jesús tein kitemakak. Moajsi okse texto tein techpaleuia maj tikajsikamatikan ke Apocalipsis 7:9 sayoj kiixnextia se taman. Mateo 25:31, 32 kijtoua ke “nochi in pueblojuani” hasta akin amo yolkualmej, “kinsentiliske” iixpan Jesús uan itrono. Nejon “pueblojuani” yetokej taltikpak, amo iluikak. Taixejekol nejon tein moajsikamatik itech xiuit 1935. Kimelaua keyej Biblia amo tamachtia ke “uel miak tagayot” yaskej iluikak. Sayoj motenkaujkej iniuan 144,000 ke yaskej iluikak uan ‘kinyekantinemiskej in taltikpakuani” iuan Jesús (Apoc. 5:10). w19.09 28 § 9

Jiova kichia maj tiitekitikauan nion tepitsin tikpaleuikan Ueyi Babilonia. Sayoj ke monekiok okse taman. Moneki tikixtaliskej tiksentokaskej tiktekitiliskej Dios. Maj tikitakan ome taman keniuj tikchiuaskej. Yekinika, moneki tiksentokaskej timonejnemiltiskej kemej Dios tanauatia. Amo tikitaj ke kuali yetok kemej monejnemiltiaj taltikpakneminij. Kemej neskayot, amo kuali tikitaj nion se taman auilnemilis, kemej ijkuak monamiktiaj ome takamej oso ome siuamej uan okseki tachiualismej tein mouikaj ika nejon (Mat. 19:4, 5; Rom. 1:26, 27). Ojpatika, moneki tiksentokaskej tikueyichiuaskej Dios iniuan tokniuan. Tikueyichiuaj itech Kalmej kampa tiMosentiliaj, uan komo moneki, itech ininchan tokniuan oso ichtaka. Tein yeski tein panos, nochipa timosentiliskej uan tikueyichiuaskej Dios. Uan moneki tikchiuaskej “porin tikitaj ke kachi motokijtiuits ya ne tonal” (Heb. 10:24, 25). w19.10 16 § 6, 7

Jiova kineki maj tiyolpakikan uan tein ika timoixpetaniaj uelis tapaleuis. Hasta Biblia kijtoua ke “amo onkak okse taman tein okachi kipaleuia takat, ta maj takua uan maj tatayi uan maj yolpaki ika chikauak tekit tein kichiua” (Ecl. 2:24). Sayoj ke, miak taman tein taltikpakneminij ika moixpetaniaj nion tepitsin tapaleuia porin kichiua maj miakej kiselikan oso kitasojtakan tein iTajtol Dios kijtoua ke amo kuali yetok. Tejuan tiknejnekij sayoj tikueyichiuaskej Jiova, yejua ika amo uelis titakuaskej itech “imesa Jiova” uan itech “ininmesa amokuali ejekamej” (1 Cor. 10:21, 22, TNM). Miakpa, keman titakuaj iuan aksa kinextia ke kuali iuan timouikaj. Komo timoixpetaniaj ika tateuilis, naualot, auilnemilis uan okseki amo kuali tanejnekilismej uan tachiualismej, kemej yeskia titakuajtoskiaj iniuan akin kitauelitaj Dios. Komo ijkon tikchiuaj, timoijtakouaj tejuan uan no tokuali uikalis iuan Jiova. w19.10 26 § 2; 29-30 § 11, 12

Komo se akin kinejnemiltia barco kineki maj ejekat kipaleui, moneki kichiuas ome taman. Yekinika, moneki kiuikas barco kampa ika taejeka porin komo amo kichiua amo moolinis barco. Ojpatika, moneki kiajokuis velas uan kinpatauas hasta kampa okachi uelis, porin sayoj ijkon ejekat peuas kiuikas barco. No ijkon, sayoj uelis tiksentokaskej tiktekitiliskej Jiova komo yektikatsin espíritu techpaleuia. Yejua ika, moneki tikchiuaskej ome taman. Yekinika, tiyaskej kampa ika taejeka, tein kijtosneki, tikchiuaskej tekimej tein Dios technauatia porin sayoj ijkon techixyekanas ika iyektikatsin espíritu. Ojpatika, tikajokuiskej velas hasta kampa okachi uelis, tein kijtosneki, tiktekitiliskej Jiova hasta kampa okachi tiueliskej (Sal. 119:32). Yektikatsin espíritu techpaleuis maj tiksentokakan tiktekitilikan Jiova maski techixnamikiskej oso tikpiaskej tayejyekolismej. w19.11 9 § 8; 10 § 11

Tonal achto ke momikiliskia, Jesús semi motekipachojtoya. Kimatia ke akin kitauelitayaj kitajyouiltiskiaj hasta maj miki. Sayoj ke no kitekipachouaya okse taman. Kemej semi kitasojtaya iPopaj kinekia kiyolpaktis uan kimatia ke komo kitakamatia keman kipanoskia nejon ouijkayot, tapaleuiskia maj moueyitali itokay Dios. Uan no, kintasojtaya taltikpakneminij uan kiajsikamatia ke ueliskia nemiskej nochipaya sayoj komo yejua amo kikauaya Dios maski kimiktiskiaj. Maski Jesús semi motekipachouaya, kisentokaya kipiaya yolseuilis. Kipiaya yolseuilis tein Dios kimaka akin kuali mouika iuan yejuatsin. Nejon kipaleuij Jesús maj yolseujto (Filip. 4:6, 7). Nion semej tikpanoskej tein Jesús kipanok. Sayoj ke tinochin tiitatojtokakauan tikpiaskej ouijkayomej (Mat. 16:24, 25; Juan 15:20). Uan ijkon kemej Jesús, kemansa semi timotekipachoskej. w19.04 8 § 1-3

Maj timotajtanikan: “¿Nimotasojkamati porin nipoui itech inechikol Dios nikan taltikpak?”. Jiova senkis kinextijtok ke axkan kitiochiujtok inechikol nikan taltikpak. Senkis tikitaj ke onkak miak taman tein moneki tiktasojkamatiskej (1 Tes. 5:18). ¿Keniuj tiknextiaj ke tikpaleuiaj inechikol Jiova? Keman tikchiuaj tein timomachtiaj itech Biblia, itech toamaixuan, itech nechikolmej uan uejueyi nechikolmej, uan keman timochikauaj titanojnotsaskej uan tikinchiuaskej imomachtijkauan Cristo (1 Cor. 15:58). Maj timochikauakan tikyolpaktiskej Jiova uan ijkon kiselis tekit tein tikchiuaj. Maj tiktekitilikan porin iuan timotasojkamatij. Maj tiksentokakan tikmakakan tein okachi kuali porin semi tiktasojtaj. Uan maj senkis tikpaleuikan inechikol tein kipia nikan taltikpak. Komo tikchiuaj nochi nejon, tiknextiliskej Jiova ke tikpatiuitaj tiktekitiliskej uan tiyeskij tiitaixpantijkauan. w19.11 25 § 17, 18

Jesús amo kijtosnekia ke kichiuaskiaj mouiskatekimej kemej yejua, ta ke okachi miakkan tanojnotsaskiaj uan tamachtiskiaj, kinojnotsaskiaj okachi taltikpakneminij uan kichiuaskiaj nejon tekit okachi xiujmej ke yejua. Komo tikpiaj se tekit, maj timotajtanikan: “¿Nechixmatij ke kuali nitekiti? ¿Niktamia tekit keman ixyetok uan nimochikaua kuali nikchiuas?”. Komo tikijtouaj ke kemaj, xa akin tiktekitiliaj touan takuaujtamati uan totekitikaikniuan techkakiskej keman tikinnojnotsaskej ika Biblia. Uan no, keman titanojnotsaj uan titamachtiaj, maj timotajtanikan: “¿Kiitaj ke nimochikaua kuali nikchiuas? ¿Kuali nimomachtia keniuj peuas nikinnojnotsas taltikpakneminij? ¿Oksepa nikinkalpanoua akin kinextiaj ke kinekij kimatiskej okachi? Uan ¿nitapaleuia kemej moixtalia motanojnotsas?”. Komo ijkon, xa techyolpaktia tikchiuaskej nejon tekit. w19.12 5 § 14, 15

Komo akin namikyejkej kiixtaliaj kinpiaskej konemej, moneki ika tajtoskej ome taman: yekinika, kemanian kinekij kinpiaskej uan ojpatika, kanachimej kinpiaskej. Sayoj ke, ¿kemanian moneki ika tajtoskej nejon? ¿Uan keyej semi moneki? Achto ke monamiktiskej se takat uan se siuat, moneki ika tajtoskej ox kinpiaskej konemej oso amo porin moneki maj omen kiixejekokan nejon. Uan no moneki kuali kiitaskej ox uelis kinyekpiaskej. Sekin keman monamiktiaj kiixtaliaj mochiaskej se oso ome xiuit porin keman kinpiaskej monekis panoskej tiempo iniuan uan kinyekpiaskej. Kiajsikamatij ke mochiaskej kinpaleuis maj kuali moixmatikan uan maj okachi kuali mouikakan. w19.12 23 § 4, 5

Noyampa taltikpak, miakej itekitikauan Jiova kipanouaj ouijkayomej tein kichiua maj motekipachokan uan maj semi motayokoltikan. Seki tokniuan semi mokokouaj oso momikiliani se akin kitasojtaj. Oksekin semi tajyouiaj porin semej ininchankauan oso inintasojikniuan kikauaj Jiova. Uan oksekin tajyouiaj porin kampa nemij mochiuani se tetsauit. Nochin nejin tokniuan moneki maj kinyolseuikan. ¿Keniuj uelis tikinpaleuiskej? Maj timochiuakan se yekmelauj tetasojikniuj. Akin kuali mouikaj kitemouaj nochipa mopaleuiskej. Maj tikitakan tein kipanok se tokniuj akin itokay Pedro. Yejua kiajxilijkej se ueyi kokolis tein ika mikiskia. Inamik Kathryn, kijtoua: “Se tokniuj takat iuan inamik akin touan monechikouaj techuikakej iuan tapajtijkej uan ompa tikmatkej tein Pedro kipiaya. Ijkuak, yejuan kiixtalijkej ke amo techsenkauaskiaj uan yekmelauj kisentokaj techpaleuiaj nochipa keman monekini”. ¡Semi techyolchikaua maj akin iniuan timouikaj techpaleuikan maj tikxikokan ouijkayomej! w20.01 8 § 1; 9 § 5; 10 § 6

Komo tiyeskiaj semej imomachtijkauan Jesús akin monechikojkej itech Pentecostés xiuit 33 uan itech se kali ompa Jerusalén,senkis tikneltokaskiaj ke Dios no techixpejpenak ika iespíritu (Hech. 2:5-12). Sayoj ke ¿no ijkon Dios kinixpejpena nochin akin kichiaj yaskej iluikak? Amo. Maj ika titajtokan kemanian Dios kiixpejpena se tokniuj ika iespíritu. Itech nejon tonal, Dios amo sayoj kinixpejpenak 120 itekitikauan, ta ijkuak kemej 3,000 no kiselijkej yektikatsin espíritu. Yejuan, Dios kinixpejpenak keman moauijkej (Hech. 2:37, 38, 41). Sayoj ke, xiujmej satepan oksekin amo kinixpejpenkej niman ke moauijkej. Kemej neskayot, samaritanos kinixpejpenkej seki tonalmej satepan ke moauijkej (Hech. 8:14-17). Cornelio uan akin moajsiaj ichan, kinixpejpenkej achto ke moauiskiaj, se taman tein amo panotoya (Hech. 10:44-48). w20.01 20, 21 § 2-4

Sayoj itech naui Evangelios miakpa kinotsak Jiova toTajtsin. ¿Keyej miakpa ijkon kinotsak? Se taman yejua porin kinekia maj taltikpakneminij kineltokanij ke Jiova se tePopaj akin tetasojta (Juan 17:25). Maj tikitakan toni techmachtia kemej Jiova kipaleuij iKonetsin, Jesús. Dios nochipa kikakik inetataujtiluan iKonetsin uan kinankilij (Juan 11:41, 42). Jesús nochipa kiitak ke iPopaj kitasojtaya uan kipaleuiaya keman kipanouaya ouijkayomej (Luc. 22:42, 43).Jiova kinextij ke se tePopaj akin tetasojta porin kichiuak maj Jesús kimatini ke kipaleuiaya (Mat. 26:53; Juan 8:16). Maski amo nochipa kimatampauij, kemaj kipaleuij maj taxiko keman kitajyouiltijkej. Jesús kimatia ke tein yeski tein kijyouiskia amo uejkauaskia (Heb. 12:2, TNM). Jiova kinextij ke kitasojtaya iKonetsin keman kikakia, kimakaya tein kipolouaya, kimachtiaya uan keman kipaleuiaya (Juan 5:20; 8:28). w20.02 3 § 6, 7, 9

Keman monekis tikixpejpenaskej ox titapaleuiskej itech se taman tein miakej momattokej kichiuaskej, moneki tikitaskej ox oksekin kinkuejmoloua inintanemilil uan okachiok komo tokniuan. Amo tiknekij tikinuetsiltiskej oksekin (Mar. 9:42). Uan no, amo tiktemouaj tikinyolxokoliskej akin amo itaixpantijkauan Jiova. Komo titetasojtaj, tikinnojnotsaskej ika poujkaitalis porin ijkon tikueyitaliaj Jiova. Amo iniuan timotajtolteuiskej nion timokejkeloskej ika tein kineltokaj. Maj tikelnamikikan ke netasojtalis semi tapaleuia. Komo tikinpoujkaitaj uan tikinajsikamatij akin techixnamikij uelis moyolyemaniskej. Maj tikiniluikan tochankauan uan akin nemij itech toxolal ke tiitaixpantijkauan Jiova (Is. 43:10). Komo yejuan kimatij nejon, amo techouijmakas tikixnamikiskej keman kinekiskej maj tikchiuakan se taman tein mouika ika mikemej. Maj amo keman timopinaujmatikan tikpaleuiskej tamachtilis tein melauak. (Rom. 1:16). w19.04 17, 18 § 14-16

Keman Jesús kichiuak itekiyo Dios nikan taltikpak, 12 tatitanilmej iuan yetoyaj, sayoj ke tatitanil Pablo peuak kitekitilia Dios satepan ke Jesús momikilij uan oksepa nemik. Maski satepan kiixtalijkej kemej se tatitanil akin kinnojnotsaskia akin amo judíos, amo keman kiixpejpenkej kemej se itatitanil Jesús (Rom. 11:13; Hech. 1:21-26). Sayoj ke, yolpakik ika tein kipiaya uan amo kinnexikoluij 12 tatitanilmej nion kualanik porin kuali mouikakej iuan Jesús. Komo amo timoueyimatij uan tiyolpakij ika tein tikpiaj, tiyeskij kemej Pablo uan tikinpoujkaitaskej tokniuan akin Jiova kinixtaliani maj taixyekanakan (Hech. 21:20-26). Yejuatsin kinixtalij tayekananij maj taixyekanakan itech inechikol. Maski tajtakolejkej, Jiova kinita kemej netetayokolilmej (Efes. 4:11). Keman tikinpoujkaitaj uan tikintakamatij, kuali timouikaj iuan Jiova uan kuali timouikaj iniuan tokniuan. w20.02 17 § 13, 14

Achto ke tionpeuaskia tionmomachtis iniuan itaixpantijkauan Jiova, tejuatsin tikonpatiuitayaya Biblia uan xa no tikontasojtaya Jesús. Uan axkan ke tikonixmati itaixpantijkauan Jiova, xa tikonuelita iniuan tionyetos. Sayoj ke nochi nejon tein tikonmachilia amo kichiuas xikonneki tionmotemaktis iuan Jiova uan tionmoauis. Tein okachi moneki techolinis maj timoauikan yejua netasojtalis tein tikpialiaj Jiova. Keman tejuatsin okachi tikontasojtas Jiova, amo tikonkauas maj nion akin uan nion teyi kichiua amo xikontekitili. Komo tikontasojta Jiova, tikonnekis tionmoauis uan mitsonpaleuis amo xikonkaua satepan ke tionmoauis. Jesús kijtoj ke moneki tiktasojtaskej Jiova ika nochi toyolo, tonemilis, totanemilil uan tochikaualis (Mar. 12:30). ¿Toni mitsonpaleuis ijkon xikontasojta uan xikonpoujkaita oso xikonmouiskaita? Komo tiontanemilia itech netasojtalis tein techpialia. w20.03 4 § 4, 5

¿Toni kijtosneki kuali tikchiuaskej tekit itech tanojnotsalis? Kijtosneki titanojnotsaskej uan titamachtiskej nochi tein tiueliskej. Sayoj ke Jiova amo sayoj kiita kanachi tiempo titanojnotsaj, ta no keyej tikchiuaj. Komo techolinia netasojtalis tein tikpialiaj Jiova uan oksekin, titanojnotsaskej nochi tein tiueliskej (Mar. 12:30, 31; Col. 3:23). Nejon kijtosneki ke tikuiskej nochi tochikaualis itech itekiyo Dios. Komo tikitaj tanojnotsalis kemej se tatiochiualis, tiktemoskej tikinmatiltiskej nochin kuali tanauatilmej. Xa amo tiueliskej titanojnotsaskej miak tonalmej kemej tiknekiskiaj. Sayoj ke, yejua nejon tein okachi tikuelitaj tikchiuaskej. Yejua ika timochikauaj tikinnojnotsaskej taltikpakneminij ika iTekiuajyo Dios kemej okachi kinpaleuis. Tejuan tiktayekanaltiaj tikchiuaskej itekiyo Dios. w19.04 2, 3 § 3, 4, 6

Itakajkayaualis Satanás kichiua maj okachi onka tekokojkayot uan tajyouilis. Kemej neskayot, keman momikilia se konetsin, xa kiniluiaj tetatmej ke Dios kiuikak iluikak porin kinekia okse iluikaknenkej. ¿Melauj ke nejon amo kinyolseuia tetatmej, ta okachi kinyolkokoua? Uan no, keman motamachtia ke mikemej tajyouitij miktan, kichiuani maj miakej kintajyouiltikan, kemej kinchichinoskej akin kiixnamikij tein motamachtia itech tiopan. Kemej kijtoua se amatajkuilol tein ika tajtoua Inquisición española, sekin akin kiixyekankej maj mochiua nejon nesi kineltokayaj ke akin kinchichinouayaj sayoj “kinnextilijtoyaj tepitsin tein kipanoskiaj nochipaya itech miktan” uan ijkon maj moyolnonotsanij achto ke momikiliskiaj uan amo tajyouiskiajok itech miktan. Uan no, itech seki xolalmej, miakej kimachiliaj ke moneki kinueyichiuaskej ininuejkaujtatuan, kinmouistiliskej oso kitemoskej inintatiochiualis. Oksekin kitemouaj kinyolseuiskej uan ijkon amo teyi kinchiuiliskej. Tetayokoltij tikijtoskej ke nejin tein Satanás ika kinkajkayaua taltikpakneminij amo kinyolseuia, ta okachi kintajyouiltia uan hasta kinmojmoujtia. w19.04 14 § 1; 16 § 10