Enero

Itakuaujtamatilis Timoteo kipaleuiaya maj mochikaua ikuali uikalis iuan Jiova. Tejuan no moneki timomachtiskej tein Biblia tamachtia keman ika tajtoua Jiova uan tiknemiliskej keyej melauak. Achto moneki tikneltokaskej ke melauak eyi tamachtilismej tein tayekantokej itech Biblia. Yekinika, ke Jiova kichijchiuak nochi tein onkak (Éx. 3:14, 15; Heb. 3:4; Apoc. 4:11). Ojpatika, ke Biblia kipia itanemililuan Dios tein kineki maj kimatikan taltikpakneminij (2 Tim. 3:16, 17). Uan expatika, ke Jiova kinpia itekitikauan akin kiueyichiuaj uan kinixyekana Cristo: itaixpantijkauan Jiova (Is. 43:10-12; Juan 14:6; Hech. 15:14). Amo moneki tikmatiskej nochi tein kijtoua Biblia, ta moneki itech titanemiliskej. Nejin techpaleuis maj senkis titakuaujtamatikan ke tein tikneltokaj yejua tein melauak (Rom. 12:1, TNM). w20.07 10 § 8, 9

Ompa moijtoua ke ininixko chapolimej kemej yeskia ininixko taltikpakneminij uan itech inintsontekon kipiaj tein kemej yeskia se corona tein chijchiujtok ika oro (Apoc. 9:7). Kintajyouiltiaj “ne tagayot ten amo taixkuaneskayotilme de Dios”, oso akin kiixnamikij Jiova, makuil metsti, tein uejkaua inemilis se chapolij (Apoc. 9:4). Nesi ke nejin kemaj kinixnextia itekitikauan Dios taixpejpenalmej, porin yejuan kiteixmatiltiaj ika yolchikaualis ke amo uejkaua Dios kiixpolos tein amo kuali. Nejin semi amo kiuelkakij akin kinyolpaktia tein mochiua nikan taltikpak. Nejin kinextia ke chapolimej tein ika tajtoua amatajkuilol Joel 2:7-9 uan tein ika tajtoua amatajkuilol Apocalipsis amo kiixnextiaj sayoj se taman. Kemansa, Biblia kikui se neskayot uan ika kiixnextia miak taman. Kemej neskayot, itech Apocalipsis 5:5 moijtoua ke Jesús “león [...] den ichankauan de ne uejkautat Judá”, sayoj ke itech 1 Pedro 5:8 moijtoua ke Satanás kemej yeskia se león oso “kuoutajtekuani ten kitemotinemi akoni kixixikos”. w20.04 3 § 8; 5 § 10

Agar, itakeual Sarái, kichiuak tein amo monekia satepan ke mochiuak inamik Abrán. Keman kimatik ke kipiaskia se konetsin, peuak kipijpinaujtia Sarái, akin amo kipiaya konemej. Yejua ika, Sarái kitatsakuiltij uan Agar monekik cholos (Gén. 16:4-6). Kemej titajtakolejkej, xa tiknemiliskej ke Agar moueyimatia uan ke kinamikia maj kitatsakuiltianij. Sayoj ke Jiova amo ijkon kiitaya. Kititanik se ángel maj kipaleuiti maj kipata itanemilil uan maj kimatiltiti ke Dios kichiuaskia maj momiakilikan ikoneuan. Agar kiajsikamatik ke Jiova kiitstoya uan ke kuali kimatia toni kipanotoya. Yejua ika, Agar kiluij Jiova: “Tejua se Dios tein nochi tikita” (Gén. 16:7-13). ¿Toni kiitak Jiova itech Agar? Yejuatsin kimatia tein achto kipanoka uan nochi tein kijyouijka. Maski Jiova kimatia ke tein Agar kichiuilijka Sarái amo kuali katka, no kiajsikamatia keniuj momachiliaya uan tein kipanotoya. w20.04 16 § 8, 9

Tatitanil Pablo kijtoj ke nochin akin yekmelauj tikchiuaj kemej Cristo timotalojtokej (Heb. 12:1). Tein melauj, maski tein yeski xiuit tikpiaskej oso ox tichikaujkejok oso amo, tinochin moneki titaxikoskej komo tiknekij tikseliskej netetayokolil tein Jiova kijtoua techmakas (Mat. 24:13). Pablo uelik kijtoj maj se taxiko keman se motalojtok porin yejua ‘motaloj hasta matamik’ (2 Tim. 4:7, 8, TNM). Sayoj ke ¿keyej kijtoj Pablo ke timotalojtokej? Kemansa, Pablo kikuia kemej neskayot seki taman tein mochiuaya ompa Grecia keman taltikpakneminij motataniaj ininixpan miakej, porin kinekia tamachtis seki taman tein semi monekia (1 Cor. 9:25-27; 2 Tim. 2:5). Kijtoj ke se itatojtokakauj Cristo kemej yeskia motalojtok iniuan oksekin (1 Cor. 9:24). Peua timotalouaj keman timotemaktiaj iuan Jiova uan timoauiaj (1 Ped. 3:21). Uan titatanij keman Jiova techmaka netetayokolil: maj ueli tinemikan nochipaya (Mat. 25:31-34, 46; 2 Tim. 4:8). w20.04 26 § 1-3

“Yejuatsin Yolmelauaktsin, uan Yejuatsin namechyolchikautiyas uan namechyekpixtiyas para ma amo xiuetsikan imako in amokuali Satanás.” (2 Tes. 3:3.) Jiova techmaka se taken uan manamikmej tein ueli ika timopaleuiaj keman Satanás techixnamiki (Efes. 6:11, 13-17). Nejin taken uan manamikmej kipiaj chikaualis uan semi tapaleuiaj, sayoj ke uelis ika timopaleuiskej komo nochipa timotaliliaj uan tikuij. Kemej neskayot, kuetax tein ika se motajkoilpia kiixnextia tamachtilis tein melauak tein moajsi itech iTajtol Dios, Biblia. ¿Keyej moneki timotaliliskej? Porin Satanás “tetat den nochi nekes ten xolopijtijtinemij” (Juan 8:44). Miak xiujmejya takajkayauani uan uelini kinkajkayauani “nochi in taltikpakuani” (Apoc. 12:9). Sayoj ke tein Biblia tamachtia techpaleuia maj amo techkajkayaua. ¿Keniuj timotaliliaj? Moneki tikixmatiskej Jiova, tikueyichiuaskej “ika espíritu uan ika tein melauak” uan “tichipaukanentinemiske” (Juan 4:24, TNM; Efes. 4:25; Heb. 13:18). w21.03 26, 27 § 3-5

Katka tal tein okachi kualtsin porin ompa kiueyichiuayaj Jiova. Sayoj ke, itech Pentecostés itech xiuit 33 hasta axkan, nejon “Tal” amo se xolal oso se altepet. Uan taixejekol nejin, porin itekitikauan Jiova moajsij itech nochi taltikpak. Axkan, “Tal tein Kualtsin” kijtosneki nochi tein kichiuaj itekitikauan Jiova itech ininnemilis. Se taman tein kichiuaj yejua kiueyichiuaskej Jiova itech nechikolmej uan tanojnotsalis. Itech itamian tonalmej, tekiuaj akin taixyekana norte miakpa kalakini itech “Tal tein Kualtsin”. Kemej neskayot, keman Alemania nazi katka tekiuaj akin taixyekana norte, okachiok itech Ojpatika Ueyi Neteuilis, kalakik itech “Tal tein Kualtsin” keman kintajyouiltij uan kinmiktij itekitikauan Dios. Keman Unión Soviética mochiuak tekiuaj akin taixyekana norte, satepan ke tamik Ojpatika Ueyi Neteuilis, kalakik itech nejin tal keman kintajyouiltij akin kiueyichiuayaj Jiova uan kinkixtij kampa nemiaj uan uejka kinuikak. w20.05 13 § 7, 8

Maj ininka titajtokan sekin akin kuali mouikakej iuan Dios oso katkaj itasojikniuan akin nenkej achto ke Jesús momikiliskia. Abrahán semi takuaujtamatik iuan Dios. Panoua mil xiujmej satepan ke momikilijkaya, Jiova kijtoj: “Notasojikniuj Abrahán” (Is. 41:8). Nejin kinextia ke maski se taltikpaknenkej momikilis, Jiova kisentoka kiita kemej itasojikniuj. Tein melauj, Jiova kisentoka kielnamiki Abrahán (Luc. 20:37, 38). Okse yejua Job. Se tonal keman ángeles senyetoyaj, Jiova kinextij ke takuaujtamatia iuan Job keman kijtoj: “Yejua se takat yolmelauak akin kimoujkatoka Dios uan kiixtopeua nochi tein amo kuali” (Job 1:6-8). ¿Uan keniuj kiitaya Daniel, akin kisentokak kitekitilij kemej ochenta xiujmej itech se altepet kampa kinueyichiuayaj tiotsitsin? Keman Daniel semi xiuejya katka, ángeles expa kiluijkej: “Dios semi mitstasojta” (Dan. 9:23; 10:11, 19). Senkis tikmatij ke Jiova kineki maj ejko tonal keman kichiuas maj oksepa nemikan itasojikniuan (Job 14:15). w20.05 26, 27 § 3, 4

Se akin momachtijtok Biblia kiixmatis itanauatiluan Dios uan hasta kinmoujkaitas. Sayoj ke ¿kitakamatis Jiova porin kitasojta? Maj tikelnamikikan tein kipanok Eva. Yejua kiixmatia itanauatil Dios, sayoj ke amo yekmelauj kitasojtaya Jiova. Uan no ijkon kipanok Adán (Gén. 3:1-6). Yejua ika, maj amo sayoj tikinmachtikan taltikpakneminij itanauatiluan Dios uan keniuj kineki maj tinemikan. Itanauatiluan Jiova uan kemej kineki maj tinemikan nochipa techpaleuia (Sal. 119:97, 111, 112). Sayoj ke akin momachtijtok Biblia amo ijkon kiitas komo amo kiajsikamati ke Jiova techmakak nejon tanauatilmej porin techtasojta. Yejua ika uelis tiktajtaniskej: “¿Keyej tiknemilia ke Dios techiluia maj tikchiuakan nejin oso maj amo tikchiuakan? ¿Toni mitsmachtia nejin kemej tanemilia yejuatsin?”. Komo tikpaleuiaj maj itech tanemili Jiova uan maj yekmelauj kitasojta itokay, tamachtilis xa okachi kiyololinis. Ijkon amo sayoj kipatiuitas itanauatiluan, ta no kitasojtas yejuatsin. Itakuaujtamatilis mochikauas uan uelis kixikos tein yeski ouijkayot tein kipanos (1 Cor. 3:12-15). w20.06 10 § 10, 11

Moneki amo tiyolijsiuiskej porin tokniuj xa amo niman mokepas iuan Jiova. Miakej tokniuan akin amo tanojnotsayajok nion monechikouayajok kijtouaj ke tayekananij uan okseki tokniuan monekik miakpa kinkalpanoskej achto ke mokepaskiaj iuan Jiova. Se tokniuj akin monotsa Nancy, akin kayot Asia, kijkuiloj: “Se akin kuali iuan nimouikaya itech nechikol semi nechpaleuij. Semi nechtasojtaya kemej yeskia niikniuj akin tayekanaya. Nechelnamiktiaya miak taman tein kualtsin tein tikpanokaj. Keman nikiluiaya keniuj nimomachiliaya, kuali nechkakia uan nechyolmajxitiaya. Kinextij ke yekmelauj katka notasojikniuj uan nochipa nechpaleuij keman monekik”. Keman tikinajsikamatij akin moyolkokojtokej kemej yeskia tikintaliliaj se pomada tein kinpaleuia maj kuali momachilikan. Seki tokniuan mouejkatilijkej porin se tokniuj kinyolkokoj, uan uejkaujya kualantokej. Yejua ika amo kinekij mokepaskej iuan Jiova. Oksekin xa kinemiliaj ke amo kuali tein kinchiuilijkej. Xa moneki maj se kinkaki uan maj se kinajsikamati. w20.06 26 § 10, 11

Nochipa keman nankiixtopeuaj tein amo kuali, okachi amo ouij namechkisas nankichiuaskej tein kuali. Amo xikelkauakan ke Satanás kichiujtok maj taltikpakneminij amo kiitakan auilnemilis kemej Jiova kiita. Yejua ika, komo amo nantanemiliaj kemej yejuan, “nankitanilijke ya in amokuali Satanás”. Tikmatij ke Jiova kinamiki kijtos toni tajtakol. Uan timochikauaj amo tikchiuaskej. Sayoj ke komo titajtakouaj tikiluiaj itech se netataujtil (1 Juan 1:9). Uan komo se ueyi tajtakol, tiktemouaj ininnepaleuil tayekananij, porin Jiova kinixtalijtok maj techyekpiakan (Sant. 5:14-16). Sayoj ke, maj amo tiksentokakan itech titanemilijtokan tajtakolmej tein achto tikchiujkej. ¿Keyej? Porin toTajtsin akin semi techtasojta kitemakak inemilis iKonetsin uan ijkon uelis techtapojpoluis totajtakoluan. Keman Jiova kijtoua ke kintapojpoluis akin moyolnonotsaj oso moyolnemiliaj, yekmelauj kintapojpoluia. Yejua ika uelis tiktekitiliskej ika se kuali tanemilil (1 Juan 2:1, 2, 12; 3:19, 20). w20.07 22, 23 § 9, 10

Maski Jiova uejkauak yetoya iselti, nejon amo kitayokoltij. Yejuatsin amo kipolouaya nion teyi. Sayoj ke no kinekia maj oksekin neminij uan maj yolpakinij. Yejua ika inetasojtalis kichiuak maj peuani tachijchiuani (1 Juan 4:19). Yekinika, Jiova kichijchiuak iKonetsin, Jesús. Ompa, Jesús kipaleuij maj kichijchiua nochi okseki taman, kemej ángeles (Col. 1:16). Jesús semi kiyolpaktij tekitis iuan iTajtsin (Prov. 8:30). Uan ángeles no semi yolpakkej porin kiitakej keniuj Jiova uan Jesús, akin tekitikej tein ixmach, kichijchiujkej iluikak uan taltikpak. ¿Keniuj momachilijkej ángeles? Biblia kijtoua ke kiueyichiujkej Jiova uan kisentokakej kiueyichiujkej keman kiitakej nochi okseki taman tein kichijchiujka, okachiok keman kinchijchiuak taltikpakneminij (Job 38:7; Prov. 8:31). Itech nochi tein kichijchiuak moita inetasojtalis uan itamatilis (Sal. 104:24; Rom. 1:20). w20.08 14 § 1, 2

Jiova techchijchiuak kemej uelis tikintasojtaskej oksekin uan no tiknekij maj yejuan techtasojtakan. Yejua ika techyolkokoua keman oksekin techtauelitaj uan xa hasta timouij. Se tokniuj kijkuiloj: “Keman tateuianij nechmakej, nechuijuikaltijkej uan nechiluijkej ke nechchiuiliskiaj tein amo kuali porin niitaixpantijkauj Jiova, nimouik uan semi nimopinaujmatik”. Maski techyolkokoua maj techtauelitakan, tikmattoyajya ke panoskia nejon, porin Jesús ijkon kijtojka. ¿Keyej taltikpakneminij kintauelitaj itatojtokakauan Jesús? Porin ijkon kemej Jesús, ‘amo tipoujtinemijok iuan in taltikpakuaniʼ (Juan 15:17-19). Yejua ika, maski tikinpoujkaitaj tekiuanij amo tikinpaleuiaj, amo tiktajpalouaj bandera nion timokuikatiaj himno nacional. Tejuan sayoj tikueyichiuaj Jiova. Tiknextiaj ke Dios kinamiki kinixyekanas taltikpakneminij, sayoj ke Satanás uan akin kinixyekana kiixnamikij (Gén. 3:1-5, 15). Tikteixmatiltiaj ke sayoj iTekiuajyo Dios kiajchiuas ouijkayomej tein kipiaj taltikpakneminij, uan ke amo uejkaua, ika iTekiuajyo, Dios kinixpolos nochin akin kiixnamikij (Dan. 2:44; Apoc. 19:19-21). Nejin kinextia ke akin yolkualmej kuali nemiskej satepan, sayoj ke akin amo yolkualmej amo kuali kinyas. w21.03 20 § 1, 2

¿Uan tokniuan siuamej? Jiova kinmaka se tekit tein semi moneki itech nechikol. Biblia ininka tajtoua miakej siuamej akin kiyolpaktijkej Dios porin kinextijkej tamatilis, takuaujtamatilis, yolchikaualis, kitekitilijkej ika yolpakilis uan kinpaleuijkej oksekin ika tein kipiayaj (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). No techyolpaktia maj moajsikan itech nechikol miakej tokniuan akin xiuejkejya. Miakej nejin tokniuan xa mokokouaj uan amo semi uelijok kitekitiliaj Jiova itech nechikol nion itech tanojnotsalis. Maski ijkon, mochikauaj tanojnotsaskej uan kinyolchikauaj uan kinmachtiaj oksekin. Jiova semi kinpatiuita tokniuan akin xiuejkejya, uan tejuan no (Prov. 16:31). Maj no ininka titajtokan tokniuan telpochmej uan ichpochmej. Yejuan kipanouaj miak kuejmolmej porin itech nejin taltikpak taixyekana Satanás uan miakkan moita itanemililuan. Sayoj ke semi techyolchikaua tikinitaskej itech tanojnotsalis uan tikakiskej inintanankililuan itech nechikolmej, uan no techyolchikaua tikmatiskej ke ika tajtouaj tein kineltokaj keman kinchiuiliaj netajtanilmej. Telpochmej uan ichpochmej, namejuan nankipiaj se tekit tein semi moneki itech inechikol Jiova (Sal. 8:2). w20.08 21, 22 § 9-11

Keman peua titanojnotsaj uan timoteixmatiltiaj kemej itaixpantijkauan Jiova, uelis tikpiaskej ouijkayomej: tochankauan xa techixnamikiskej, akin iniuan timouikayaj xa techpijpinaujtiskej uan taltikpakneminij xa amo kinekiskej techkakiskej. ¿Toni mitsonpaleuis xikonpia yolchikaualis? Yekinika, xikonneltoka ke Jesús kisentoka kiixyekana tanojnotsalis (Juan 16:33; Apoc. 14:14-16). Ompa, xiontakuaujtamati ke Jiova mitsonyekpias ijkon kemej yejuatsin kijtoua (Mat. 6:32-34). Komo okachi tiontakuaujtamati, okachi tikonpias yolchikaualis. Tejuatsin no tikonnextij ke tiontakuaujtamati keman tikoniluij akin iniuan tionmouika uan mochankauan ke tionmomachtijtok Biblia iniuan itaixpantijkauan Jiova uan tionyajtok ininnechikoluan. Uan xa amo tikonchiuaok miak taman tein achto tikonchiuaya porin tikonneki tikontakamatis itanauatiluan Jiova. Ijkon no tikonnextij ke tiontakuaujtamati uan ke tionyolchikauak. Komo tikonsentoka tikontemoua tikonpias yolchikaualis, uelis tiontakuaujtamatis ke Jiova nochipa mitsonpaleuis (Jos. 1:7-9). w20.09 5 § 11, 12

Tekiuaj Asá techkauilij se kuali neskayot porin senkis takuaujtamatik iuan Jiova. Amo sayoj kitekitilij keman onkaya ouijkayomej, ta no keman onkaya yolseuilis. Itech nochi inemilis, “kitekitilij Jiova ika nochi iyolo” (1 Rey. 15:14). Kinextij nejon keman kiixpoloj taueyichiualis tein amo melauak ompa Judá. Biblia kijtoua ke “kinajchiuak altares kampa kinueyichiuayaj inintiotsitsin okseki altepemej uan kalmej kampa taueyichiuayaj, kinixpoloj postes tein chijchiujtoyaj ika tet uan kouit” (2 Crón. 14:3, 5). Hasta kikuilij iueyinan, Maacá, tekit tein kipiaya itech tekiuajyot porin kichijchiujka se tiotsin uan kichiuak maj kiueyichiuanij (1 Rey. 15:11-13). Asá amo sayoj kiixpoloj taueyichiualis tein amo melauak, ta no kinpaleuij akin nemiaj Judá maj oksepa kiueyichiuanij Jiova. Yejua ika Jiova kichiuak maj onkani yolseuilis ompa Judá. Keman Asá tekiuajtitoya, majtakti xiujmej kipiakej yolseuilis (2 Crón. 14:1, 4, 6). w20.09 14 § 2, 3

Keman se taltikpaknenkej kipia se taman tein semi kipia ipatiuj, kemansa kimaka okse taltikpaknenkej maj kiyekpia. Kemej neskayot, xa kikauati itomin itech banco porin amo kineki kipolos nion kineki maj kiichtekilikan. Tatitanil Pablo kielnamiktij Timoteo ke kiselijka se taman tein semi kipia ipatiuj: Jiova kimatiltijka keniuj kiixtalijtok maj nemikan taltikpakneminij. Uan no kimakaka okse ueyi tatiochiualis: maj kiteixmatilti iTajtol (2 Tim. 4:2, 5). Pablo kiluij Timoteo ke monekia kiyekpias tein Dios kimaktilijka. Jiova no techmakani miak taman tein kipia ipatiuj. Kemej Jiova semi kualtakat, techpaleuiani maj tikixmatikan tamachtilis tein melauak tein moajsi itech iTajtol, Biblia. Nejin tamachtilis semi kipia ipatiuj porin techpaleuia maj tikmatikan keniuj uelis kuali timouikaskej iuan Jiova uan keniuj uelis tiyolpakiskej. Keman tikneltokaj nejon tamachtilis uan tiktakamatij, amo tikneltokajok tamachtilis tein amo melauak uan tichipaujkanemij (1 Cor. 6:9-11). w20.09 26 § 1-3

Akin tikmachtiaj moneki kiitas ke tikpatiuitaj uan ke tikneltokaj tein Biblia tamachtia. Nejin xa tapaleuis maj kineki kimatis okachi. Xa uelis tiktapouiskej keniuj techpaleuiani tein tamachtia Biblia, uan ijkon kiitas ke no uelis kipaleuis. Keman iuan timomachtijtoskej akin tikmachtiaj, maj tiktapouikan keniuj seki tokniuan uelik kiixnamikkej ouijkayomej kemej tein yejua kipanotok. Uelis tikyoleuaskej se tokniuj akin ineskayo uelis kipaleuis maj touan youi keman tikmachtitij. Maj tikpaleuikan maj kiita ke tein Biblia tamachtia semi tapaleuia. Komo akin tikmachtiaj kipia inamik uan amo momachtijtok, uelis tikyoleuaskej maj touan momachti. Uan no, maj tikyolchikauakan akin tikmachtiaj maj kintapoui tein momachtijtok ichankauan uan akin kuali iniuan mouika (Juan 1:40-45). w20.10 16 § 7-9

José uan María uelik kipaleuijkej Jesús maj kipiani itatiochiualis Dios porin kichiujkej tein Jiova kinnauatia tetatmej (Deut. 6:6). Yejuan semi kitasojtayaj Jiova uan kiitayaj ke monekia kinpaleuiskej ininkoneuan maj no kitasojtanij. José uan María nochipa kiueyichiuayaj Jiova iniuan ininkoneuan. Nochi semanas yayaj sinagoga tein moajsia Nazaret uan nochi xiujmej yayaj Jerusalén keman mochiuaya Pascua (Luc. 2:41; 4:16). Xa keman ojtokayaj hasta Jerusalén kinmachtiayaj Jesús uan iikniuan tein kipanok ixolal Jiova, uan xa yayaj tachiatij itech talmej tein ika motajtoua itech Biblia. Keman kinpiakej okseki konemej, xa okachi ouij kinkisaya kisentokaskej kiueyichiuaskej Jiova kemej momattoyaj. Sayoj ke semi tapaleuij maj kitayekanaltianij kichiuaskej nejon, porin ininchankauan kisentokakej kuali mouikakej iuan Jiova. w20.10 28 § 8, 9

Keman se tokniuj techyoleuas maj iuan titamachtitij ika Biblia, kuali yeskia maj achto timomachtikan tein tikitaskej (Esd. 7:10). Dorín, se precursora especial, kijtoj: “Niktasojkamati maj tokniuj akin nouan youi kuali momachtiani achto, porin ijkon tein kijtos semi tapaleuis”. Uan no, tokniuj akin tamachtijtok uan tokniuj akin iuan yajki kikauiliskej se kuali neskayot akin kimachtijtokej porin xa kiitas ke achto kuali momachtijkej. Uan komo amo ueli timoyekmachtiaj nochi tamachtilis, maj tiktemokan katiyejua tanemililmej tayekantokej. Netataujtil no semi tayekantok itech se nemachtil ika Biblia. Yejua ika, maj achto kuali tiknemilikan toni tikijtoskej komo tokniuj techiluia maj tikchiuakan netataujtil. Nejon techpaleuis maj tikmattokanya toni tikijtoskej (Sal. 141:2). Hanae, se tokniuj siuat akin nemi Japón, kielnamikiok inetataujtiluan se tokniuj siuat akin iuan yaya tokniuj akin kimachtiaya. Kijtoua: “Nikitaya ke semi kuali mouikaya iuan Jiova, uan niknekia nikchiuas kemej yejua. Uan no, keman nechtokaytiaya itech inetataujtiluan nikmachiliaya ke nechtasojtaya”. w21.03 9, 10 § 7, 8

Jesús kiluij tatitanil Pablo ke ajsiskia Roma. Sayoj ke seki judíos ompa Jerusalén kiixtalijkaj kimiktiskej. Keman Claudio Lisias, akin kinixyekanaya tateuianij romanos, kimatik tein kiixtalijtoyaj, kipaleuij Pablo. Niman kinnauatij miakej tateuianij maj kiuikanij Pablo Cesarea. Ompa, tekiuaj Félix “tanauatij ma kiyekpixtokan Pablo kampa ne ueyi kali kampa kalyetok in rey Herodes”. Yejua ika, akin kitauelitayaj Pablo amo uelik kimiktijkej (Hech. 23:12-35). Axkan Festo katka tekiuaj uan “keme in Festo kinekia moyekauas iuan in tayekanani judíos”. Yejua kitajtanij Pablo: “¿Xe tejua Pablo tikneki tiyas ne Jerusalén para ompa mitsixkomakaske de nijin neteluililis?”. Pablo kimatia ke komo yaya Jerusalén, xa kimiktiskiaj. Yejua ika kijtoj: “Ma nechixkomaka ne ueyi chiuke [...] César”. Kemej Festo kiixtalij maj Pablo kiuikanij Roma, akin kitauelitayaj amo uelikok kichiuilijkej nion teyi (Hech. 25:6-12). w20.11 13 § 4; 14 § 8-10

Kemansa tinochin uelis techkuejmolos totanemilil. Xa porin tikchiujkej tein amo kuali achto ke tikixmatiskiaj tamachtilis tein melauak oso satepan ke timoauijkej (Rom. 3:23). Tein melauj, maski semi timochikauaskej tikchiuaskej tein kuali, “tinochin timotajtakolmakaj ika miak tataman” (Sant. 3:2; Rom. 7:21-23). Maski amo kuali timomachiliaj keman techkuejmoloua totanemilil, nejon uelis techpaleuis. ¿Keyej? Porin tikauaskej tein amo kuali tein tikchiujtoyaj uan tikixtaliskej amo oksepa tikchiuaskej (Heb. 12:12, 13). Sayoj ke totanemilil xa kisentoka techkuejmoloua maski timoyolnonotskejya oso timoyolnemilijkejya uan Jiova techtapojpoluijya. Keman totanemilil kisentoka techkuejmoloua uelis kichiuas maj tiknemilikan tein amo melauj (Sal. 31:10; 38:3, 4). Sayoj ke moneki timochikauaskej maj totanemilil amo kisentoka techkuejmolo. Satanás semi kiyolpaktiskia maj amo tiktekitilikanok Jiova, maski Jiova techtasojta uan techtapojpoluijya (no xikonita 2 Corintios 2:5-7, 11). w20.11 27 § 12, 13

Salmista amo kinnexikoluiaya porin no kinekia kichiuas tein amo kuali, ta porin moitaya ke kuali nemiaj (Sal. 73:2-9, 11-14). Moitaya ke amo teyi kinpolouaya: kipiayaj tomin, uelia kipiayaj nochi tein kinekiaj uan amo teyi kintekipachouaya. Levita kiitak tein panotoya kemej Jiova kiita. Nejin kipaleuij maj yolseuini uan maj yolpakini. Satepan kiluij Jiova: “Itech taltikpak amo nikneki nikpias nion se taman, ta sayoj tejua ximoajsi itech nonemilis” (Sal. 73:25). No ijkon, maj amo tikinnexikoluikan akin amo yolkualmej akin moita ke kuali nemij. Yejuan amo yekmelauj yolpakij uan ininyolpakilis tamis (Ecl. 8:12, 13). Komo tikinnexikoluiaj, peuas timotayokoltiskej uan nejon uelis kichiuas maj amo kuali timouikakanok iuan Jiova. Komo se tonal timomachiliaj kemej momachilij levita, maj tikchiuakan tein kichiuak: maj tikakikan tein techyolmajxitia toDios tetasojtakej uan maj timosentilikan iniuan akin kitekitiliaj. Komo okachi tiktasojtaj Jiova ke okseki taman, yekmelauj tiyolpakiskej uan tiksentokaskej itech ojti tein teajxitia itech “ten melau nemilis” (1 Tim. 6:19). w20.12 19 § 14-16

Keman tikontapouis Jiova keniuj tionmomachilia, moneki no itech xiontanemili nochi tein kuali tein tikonpia uan xikontasojkamatili, maski tikonpanotok ouijkayomej. Komo kemansa amo tikonmati keniuj tikontapouis Jiova tein tikonmachilia, xikonelnamiki ke yejuatsin uelis mitsonnankilis maski sayoj uelis tikonijtos: “¡Ika kualtakayot, xinechpaleui!” (2 Crón. 18:31). Xiontakuaujtamati iuan Jiova, amo moselti xikontemo tikonyektalis ouijkayot. Itech itonaluan tanauatijkej Isaías, akin nemiaj Judá semi kimouiliayaj maj asirios kinixnamikinij uan maj kinchiuanij inintakeualuan. Yejua ika kintajtanijkej akin nemiaj Egipto maj kinpaleuianij (Is. 30:1, 2). Jiova kinnejmachtij ke nejon tein kichiujtoyaj amo kinpaleuiskia (Is. 30:7, 12, 13). Jiova kinauatij Isaías maj kiniluiani keniuj ueliskia kiajsiskej yekmelauj nepaleuil. Isaías kijtoj: “Nankipiaskej chikaualis komo nanyolseujtokej uan komo nantakuaujtamatij” iuan Jiova (Is. 30:15b). w21.01 3, 4 § 8, 9

Iikniuan Cristo taixpejpenalmej mochiuaj tekiuanij uan tiopixkamej ompa iluikak iuan Cristo. Nejin yejua netetayokolil tein kiseliaj porin nochipa tatakamatkej (Apoc. 20:6). Jiova, Jesús uan ángeles semi yolpakiskej keman 144,000 taixpejpenalmej kiseliskejya ininnetetayokolil ompa iluikak. Satepan ke tatitanil Juan ininka tajtoj 144,000 tekiuanij uan tiopixkamej, kiita okse taman tein semi kualtsin. Kinita “uel miak tagayot” akin makisaj itech Armagedón. Yejuan okachi miakej ke 144,000 uan amo senkis momati kanachimej (Apoc. 7:9, 10). “Takentokke ika istak tilma”, tein kijtosneki ke amo kichiuanij “pitsotik chiualisme de nikan taltikpak” kampa taixyekana Satanás uan kitakamatinij Dios uan Cristo (Sant. 1:27). Chikauak kijtouaj ke ika taxtauil tein kitemakakej Jiova uan Jesús, “ichkatsin de Dios”, yejuan makiskej. Uan no, “maaktokke kuouxiuit” uan ika kinextiaj ke ika pakilis kiseliaj Jesús kemej Tekiuaj akin Jiova kiixtalij (no xikonita Juan 12:12, 13). w21.01 15, 16 § 6, 7

Se takat kuali kinixyekanas ichankauan komo kikui tanauatil tein kipia kemej Jiova uan Jesús kikuij. Kemej neskayot, maj ika titajtokan yolyemanilis. Jiova yejua akin okachi kipia tamatilis, uan maski ijkon, kikaki tein kinemiliaj itekitikauan (Gén. 18:23, 24, 32). Maski Jiova nochi ueli kichiua, amo kichia maj tejuan tikchiuakan tein amo tiuelij. Okachi kuali, maski itekitikauan tajtakolejkej, kinpaleuia maj kuali kinyoui uan maj yolpakikan (Sal. 113:6, 7). Tein melauj, David kiluij nejin tajtolmej tein moajsij itech Biblia: “Tejua tinechpaleuia” (Sal. 27:9; Heb. 13:6). David kimatia ke nochi tein kichiuak uelik kichiuak porin Jiova yolyemanik uan kipaleuij. Maj tikitakan ineskayo Jesús. Yejua kinmetspajpakak imomachtijkauan maski katka ‘inintamachtijkauj uan inintekotsin’. Jesús kijtoj: “Nejuatsin axkan namechnextilij ya para kenin nankichiuaske namejuan. Uan ijkon xikchiuakan namejuan” (Juan 13:12-17). Maski kipiaya ueyi tanauatil, amo kichiaya maj kitekitilikan, ta yejua kintekitiliaya oksekin (Mat. 20:28). w21.02 3, 4 § 8-10

Telpochmej, namejuan uelis nankichiuaskej miak taman. Nanmiakej nankipiaj miak chikaualis. Nankichiuaj miak taman tein ika nankinpaleuiaj tokniuan, uan xa nankiuelitaskiaj nanmochiuaskej tapaleuianij itech nechikol. Sayoj ke sekin xa nankinemiliaj ke seki tokniuan kinemiliaj ke semi nantelpochmejok oso ke ayamo uelis nankichiuaskej seki tekimej tein semi monekij. ¿Ijkon mitspanoua? Maski titelpochok uelis tikchiuas seki taman tein tapaleuis maj tokniuan mouan takuaujtamatikan uan maj mitspoujkaitakan. Itech nejin tamachtilis ika titajtoskej tekiuaj David. No tikitaskej seki taman tein kichiujkej Asá uan Jehosafat, akin tekiuajtikej Judá. Tikitaskej toni ouijkayomej kipanokej, toni kichiujkej uan toni uelis kinmachtis telpochmej tein kichiujkej. No ijkon, miakej telpochmej ueli kichiuaj seki taman tein uelis ika kinpaleuiskej tokniuan. Kemej neskayot, seki tokniuan akin xiuejkejya kitasojkamatij maj kinnextilikan keniuj kitekitiltiskej tableta oso okseki teposmej, porin kinpaleuia keman momachtiaj uan keman youij nechikolmej. Tejua uelis semi tikinpaleuis itech nejin taman. Ika nochi tein tikchiuas, xikchiua maj moTajtsin yolpaki. w21.03 2 § 1, 3; 7 § 18

Maski siuat xa kiselij okachi tamachtilis itech kaltamachtiloyan, takat moneki kinixyekanas ichankauan maj kiueyichiuakan Jiova, kemej neskayot, moneki kiixyekanas taueyichiualis kemej kalyetouanij (Efes. 6:4). Maski siuat moneki kiajsikamatis ke inamik moneki kinixyekanas ichankauan maj kiueyichiuakan Jiova, yejua no moneki kichiuas tein kipaleuis maj kisentoka mochikaua itakuaujtamatilis. Yejua ika moneki kixelos tiempo uan momachtis iselti uan tanemilis. Nejin kipaleuis maj kisentoka kitasojta Jiova uan maj kipoujkaita, uan maj kiyolpakti kitakamatis inamik. Siuamej akin mokauaj maj ininnamik kinixyekana porin kitasojtaj Jiova okachi yolpakij ke siuamej akin amo mokauaj maj kinixyekanakan. Uan no, kinkauiliaj se kuali neskayot telpochmej uan ichpochmej, uan tapaleuiaj maj ininchankauan uan tokniuan itech nechikol motasojtakan uan maj kipiakan yolseuilis (Tito 2:3-5). Axkan, miakej itekitikauan Jiova siuamej (Sal. 68:11). w21.02 13 § 21-23

Tatitanil Pablo kikauak se kuali neskayot porin kinextij yolchikaualis uan taxikolis. Kemansa kimachilij ke amo kipiaya chikaualis, sayoj ke uelik taxikoj porin takuaujtamatia ke Jiova kimakaskia chikaualis (2 Cor. 12:8-10; Filip. 4:13, TNM). Tejuan no uelis tikpiaskej nejon chikaualis uan tiyeskij tiyolchikaujkej komo tikajsikamatij ika yolyemanilis ke moneki maj Jiova techpaleui (Sant. 4:10). Uelis senkis tikneltokaskej ke keman tikpanouaj ouijkayomej amo kijtosneki ke Jiova techtatsakuiltijtok. Santiago se imomachtijkauj Jesús kijtoj: “Maj amo akin kijto keman kipanotok se ouijkayot: ‘Dios nechyejyekojtok’. Porin amo akin ueli kiyejyekoua Dios ika tein amo kuali nion yejuatsin kiyejyekoua se taltikpaknenkej” (Sant. 1:13, TNM). Komo senkis tikneltokaj nejin, okachi kuali timouikaskej iuan toTajtsin Jiova. Jiova “amo motamachilispapatatinemi” (Sant. 1:17). Ijkon kemej kinpaleuij tokniuan itech yekinika siglo maj taxikouanij keman kipanokej ouijkayomej, tejuan no techpaleuis maj titaxikokan. Maj tiktataujtikan maj techmaka tamatilis, yolchikaualis uan takuaujtamatilis, uan yejuatsin technankilis. w21.02 31 § 19-21

Uelis tikyolchikauaskej akin tikmachtijtokej ika Biblia, akin youi nechikolmej maj tiknextilikan ke ika timotekipachouaj (Filip. 2:4). Xa ueliskia tiktajtaniskej keniuj yetokej ichankauan, keniuj kiyoui itech tekit oso itech inemachtil ika Biblia. Sayoj ke maj amo tiktajtanikan tein kichiuas maj mopinaujmati. No uelis tikiluiskej ke semi techyolpaktia tikitaskej ke mochikaujtok kichiuas tein momachtia. Nejon techpaleuis maj peua timouikakan iuan uan maj tikpaleuikan maj kiixtali moauis. Ijkon kemej akin momachtijtok Biblia kichiujtias seki taman tein momachtijtok, maj tikchiuakan maj kimachili ke no tikitaj kemej semej tokniuan akin moajsij itech nechikol. Nejin uelis tikchiuaskej komo tikyoleuaj maj touan kichiua seki taman (Heb. 13:2). Keman akin momachtijtok Biblia mochiuas tanojnotskej, uelis tikyoleuaskej maj touan tanojnotsati. Diego, se tokniuj takat kayot Brasil, kijtoua: “Miakej tokniuan nechyoleuayaj maj iniuan nitanojnotsati. Nejon nechpaleuij maj okachi kuali nikinixmatini. No nimomachtij miak taman uan nechpaleuij maj okachi nimotokiani iuan Jiova uan Jesús”. w21.03 12 § 15, 16

Jesús kijtoj ke moneki tikintasojtaskej akin techtauelitaj (Mat. 5:44, 45). Maski ouij techkisa tikchiuaskej nejin, iyektikatsin espíritu Dios techpaleuia maj ueli tikintasojtakan. Itakilo espíritu kipia kualneskayomej tein techpaleuiaj maj titaxikokan keman techtauelitaj, kemej netasojtalis, kualtakayot, yolnejmachkayot, amo se yolijsiuis uan se motsakuilis (Gál. 5:22, 23). Miakej akin achto kintauelitayaj itaixpantijkauan Jiova mopatakej, porin ininnamik, ininkoneuj oso se tokniuj akin nemi kampa ika yejuan nemij kinextij nejin kualneskayomej. Miakej hasta mochiujkej itaixpantijkauan Jiova. Yejua ika, komo semi ouij techkisa tikintasojtaskej akin techtauelitaj porin tiitaixpantijkauan Jiova, maj tiktajtanikan yejuatsin maj techmaka iyektikatsin espíritu (Luc. 11:13). Maj titakuaujtamatikan ke tiktakamatiskej Dios nochipa yejua tein okachi kuali (Prov. 3:5-7). Maski netauelitalis kipia chikaualis, netasojtalis okachi chikauak. Komo tikinnextiliaj netasojtalis akin techtauelitaj uelis mopataskej uan amo techixnamikiskejok. Keman titetasojtaj tikyolpaktiaj Jiova. Sayoj ke maski taltikpakneminij kisentokaskej techtauelitaskej, tejuan uelis tiksentokaskej tiyolpakiskej. w21.03 23 § 13; 24 § 15, 17

Tanauatijkej Joel ika tajtojtoya tein kichiuaskiaj miakej tateuianij (Joel 2:1, 8, 11). Jiova kijtoj ke kintitaniskia “miakej tateuianij” (tateuianij akin ualeuayaj Babilonia) ompa Israel uan ijkon kintatsakuiltiskia akin amo tatakamatiaj (Joel 2:25). Moijtoua ke nejin tateuianij ualeuaj “kampa ika norte” porin babilonios ompa ualeuaskiaj keman kalakiskiaj Israel (Joel 2:20). Nejin tateuianij kemej yeskiaj miakej chapolimej tein kuali ixyetok keniuj tateuiskej. Joel kijtoua: “Sejse takat youi itech ojti kampa moneki yas. [...] Kalakij itech xolal [...]. Tejkoj itech kalmej, kalakij itech ventanas kemej se tachtekkej” (Joel 2:8, 9). Xikonnemili nejin: moajsij tateuianij kampa yeski. Amo onkak kani motatiskej. Amo akin ueli kincholuia babilonios. Babilonios (oso caldeos) kalakkej Jerusalén itech xiuit 607 achto itech totonaluan kemej yeskiaj chapolimej. Biblia kijtoua tein kichiuak “inintekiuaj caldeos” itech nejin xolal: “Amo kiniknelij nion telpochmej nion ichpochmej, nion akin xiuejkejya nion akin mokokouaj”. w20.04 5 § 11, 12