Febrero

Yejua ika, maj okachi tikinixmatikan. Maj iniuan titajtokan achto ke peuas nechikol uan keman tamis, maj iniuan titanojnotsatij uan komo ueli, maj tikinyoleuakan maj takuatij tochan. Keman tikchiuaskej nejin, xa tikmatiskej ke se tokniuj siuat akin moita ke amo semi kiuelita mouikas iniuan oksekin, tein melauj pinaua tajtos, ke se tokniuj takat akin kipia miak tomin, tein melauj amo kitemoua motomintis, ta kiuelita kitemakas tein kipia oso ke se tokniuj siuat akin miakpa amo niman ajsi nechikolmej, tein melauj kipia kuejmolmej ichan (Job 6:29). Melauj ke amo moneki nochipa tiktemoskej tikmatiskej nochi (1 Tim. 5:13). Sayoj ke komo tikmatij seki taman tein kinpanouani tokniuan, techpaleuis maj okachi tikinajsikamatikan. Keman okachi tikixmatij se tokniuj akin techkualantia tein kichiua, xa okachi tikajsikamatiskej. Ouij tekisa se kichiuas nejin. Sayoj ke, keman timochikauaj tikinixmatiskej tokniuan kemej Biblia tayolmajxitia, tikchiuaj kemej Jiova, akin kintasojta “nochi in taltikpakuani” (1 Tim. 2:3, 4; 2 Cor. 6:11-13). w20.04 16, 17 § 10-12

Youak achto ke kimiktiskiaj, Jesús kinelnamiktij itatojtokakauan ke monekia motasojtaskej. Yejua kimatia ke nejon kinpaleuiskia maj kisentokanij kuali mouikanij, uan maj taxikouanij keman taltikpakneminij kintauelitaskiaj. Maj itech titanemilikan nechikol tein moajsia Tesalónica, keman peuak moajsi nejon nechikol, niman peuak kintajyouiltiaj tokniuan. Nejon tokniuan kikaujkej se kuali neskayot porin kinextijkej netasojtalis uan taxikojkej (1 Tes. 1:3, 6, 7). Pablo kinyolchikauak maj kichiuanij nejin: “Kachi ok ma moueyiltijtiu namotetasojtalis” (1 Tes. 4:9, 10). Netasojtalis kinoliniskia maj kinyolseuianij akin tayokoxtoyaj uan maj kinpaleuianij “ten amo kipiaj ueyi takuautamatilis” (1 Tes. 5:14). Uan yejuan kichiujkej tein Pablo kiniluijka, porin se xiuit satepan kiniluij nejin itech ojpatika amat tein kintitanilij: “Namotetasojtalis ueyixtok tenika nanmotasojtatinemij se uan okse” (2 Tes. 1:3-5). Netasojtalis kinpaleuij maj taxikouanij keman kipiakej ouijkayomej uan keman kintajyouiltijkej. w21.03 22 § 11

Komo tiknekij titataniskej uan tinemiskej nochipaya, moneki tiyaskej itech ojti tein ixyetok, oso tinemiskej kemej Jiova kiixtalijtok (Hech. 20:24; 1 Ped. 2:21). Sayoj ke Satanás uan taltikpakneminij akin kichiuaj kemej yejua, kinekij maj oksekopa tiyakan uan maj tiksentokakan tinemikan kemej yejuan (1 Ped. 4:4). Keman kiitaj keniuj tinemij techpijpinaujtiaj uan kijtouaj ke yejuan okachi kuali nemij porin ueli kichiuaj tein kinekij. Sayoj ke nejon amo melauak (2 Ped. 2:19). Satanás amo kineki maj timotalokanok itech ojti tein “amo patauak” tein teuika “tech ne yek nemilis”, ta kineki maj timotalokan “tech ne patauak ojti” kampa miakej yajtokej. Itech nejin ojti amo ouijkan, sayoj ke teuika “tech ne ixpoliuilis”. Yejua ika semi moneki maj tikixpejpenakan ojti tein techpaleuis (Mat. 7:13, 14). Komo amo tiknekij maj nion teyi kichiua maj amo timotalokanok itech ojti tein tepaleuia, moneki titakuaujtamatiskej iuan Jiova uan tikakiskej tein techiluia. w20.04 26 § 1; 27 § 5, 7

Seki xiujmej achto, Rusia uan akin kipaleuiaj no peuak kalakij itech “Tal tein Kualtsin” (Dan. 11:41). ¿Keniuj? Itech xiuit 2017, nejin tekiuaj akin taixyekana norte kiixtalij maj itaixpantijkauan Jiova amo tanojnotsakanok nion maj monechikokanok uan kintsakuak sekin. No kiixtalij maj amo kikuikanok toamaixuan, hasta Traducción del Nuevo Mundo. Uan no, moaxkatilij Betel, seki Kalmej kampa tiMosentiliaj uan Kalmej kampa mochiuaj Uejueyi nechikolmej. Yejua ika, itech xiuit 2018, Oloch Taojtokaltianij kijtojkej ke tekiuaj akin taixyekana norte yejua Rusia uan akin kipaleuiaj. Sayoj ke, maski se tekiuajyot semi techtajyouiltis, tiitekitikauan Jiova amo tikixnamikij nion tiktemouaj maj mopata. Okachi kuali, ininka timotataujtiaj “nochin nekes tekiuani” kemej Biblia tayolmajxitia, okachiok keman tein kiixejekouaj uelis kichiuas maj amo techkauakanok maj tiksentokakan titanojnotsakan nion maj timonechikokan. w20.05 14 § 9

Tetatmej, nanmokoneuan moneki maj kineltokakan ke tein momachtiaj yejua tein melauak, yejuan no moneki maj kuali mouikakan iuan Dios uan maj senkis kineltokakan ke Biblia kijtoua tein melauak. Komo nankinmachtiaj nanmokoneuan tein melauak, moneki kiitaskej ke namejuan kuali nanmomachtiaj Biblia. Itech xitanemilikan tein nanmomachtiaj. Ijkon uelis nankinnextiliskej maj no kichiuakan nejon. Xikinnextilikan keniuj kikuiskej nepaleuilmej tein ika timomachtiaj, kemej nankinnextiliaj akin nankinmachtiaj ika Biblia. Ijkon nankinpaleuiskej maj kitasojtakan Jiova uan maj takuaujtamatikan iuan takeual takuaujtamach uan tamatkej, akin Jiova kiixtalijtok maj techmaka tamachtilis (Mat. 24:45-47). Amo sayoj xikinnextilikan tamachtilismej tein tayekantokej, ta xikinpaleuikan maj kiixmatikan “tamachilisme den kachi ouijke” kemej uelis kiajsikamatiskej. Ijkon uelis mochikauas inintakuaujtamatilis (1 Cor. 2:10). w20.07 11 § 10, 12, 13

Itech nejin tonalmej, millones taltikpakneminij kuali mouikaj iuan Jiova. Kuali mouikaj iuan Jiova porin takuaujtamatij itech inemilis Jesús tein kitemakak. Nejin techpaleuia maj ueli timotemaktikan iuan Jiova uan maj timoauikan. Keman tikchiuaj nejin, peua timoajsij iniuan millones tokniuan akin motemaktijkejya uan moauijkejya, uan ‘semi kuali mouikaj’ iuan akin okachi ueyichiujkej itech iluikak uan taltikpak. ¿Keniuj ueli tiknextiaj ke timotasojkamatij porin kuali timouikaj iuan Dios? Komo tikchiuaj kemej Abrahán uan Job. Yejuan kitekitilijkej Dios panoua cien xiujmej uan amo keman kikaujkej. Tejuan no moneki tikchiuaskej kemej yejuan, maski yankuixtok peuak tiktekitiliaj Jiova oso uejkaujya. No moneki tikchiuaskej kemej Daniel uan okachi tikpatiuitaskej tokuali uikalis iuan Jiova ke tonemilis (Dan. 6:7, 10, 16, 22). Ika inepaleuil Jiova, uelis titaxikoskej keman tikpanoskej tataman ouijkayomej uan tiksentokaskej kuali timouikaskej iuan (Filip. 4:13, TNM). w20.05 27 § 5, 6

Tekiuaj David kiitak se siuat akin motokaytiaya Bat-Seba akin mopaktoya uan katka inamik okse takat. Yejua kiixmatia tanauatil tein Jiova kitemakaka: “Amo xiknejneki isiuauj okse takat” (Éx. 20:17). Sayoj ke kisentokak kiitak. Iyolo kemej yeskia moxeloj porin kinekia iuan yetos Bat-Seba uan no kinekia kiyolpaktis Jiova. Maski miak xiujmej kitasojtak uan kimoujkatokak Jiova, ijkuak kitayekanaltij itanejnekilis. Nejon kichiuak maj kichiuani seki taman tein semi amo kuali. Kipitsotilij itokay Jiova uan semi kintajyouiltij akin amo teyi kichiujkaj, hasta ichankauan (2 Sam. 11:1-5, 14-17; 12:7-12). Jiova kimelauak oso kitakakiltij David, uan yejua oksepa kuali mouikak iuan (2 Sam. 12:13; Sal. 51:2-4, 17). David amo keman kielkauak kuejmolmej uan tajyouilis tein kiualkuik keman amo kimoujkatokak Dios ika nochi iyolo. Itajtoluan tein moajsij itech Salmo 86:11 no uelis ijkon moijtos: “Xinechmaka se noyolo tein amo xeliujtos”. ¿Kinankilij Jiova? Kemaj, porin satepan iTajtol kijtoua ke David “kitekitilij Jiova iDios ika nochi iyolo” (1 Rey. 11:4; 15:3). w20.06 11 § 12, 13

Biblia kijtoua ke netasojtalis tein Jiova kinpialia itekitikauan kemej yeskia se mekat oso lazo. ¿Keniuj? Maj tikitakan se neskayot. Xikonnemili ke tionatojtolojtok uan se taltikpaknenkej akin moajsi atentenoj mitsontamotilia se mekat. Xa semi tikontasojkamatilia porin nejon mitsonpaleuis maj at amo mitsonuika. Sayoj ke no moneki kichiuas okse taman. Kemej at ijsiujka motalojtok, monekis maj kitilana mekat uan maj mitsonpaleui xionajsi atentenoj. Kemej Jiova kijtoj itech tajkuilol tein axkan timomachtiaj kisentokak kintemouaj israelitas akin mouejkatilijkaj. Yejua nejon kineki kichiuas Dios iniuan akin amo tanojnotsajok nion monechikouajok uan kipiaj miak kuejmolmej uan miak taman kintekipachoua. Kineki maj kimatikan ke kintasojta uan kineki kinpaleuis maj mokepakan. Uan yejuatsin uelis kichiuas maj tikinpaleuikan maj kimachilikan nejon netasojtalis. Semi moneki maj tikinmatiltikan akin amo tanojnotsajok nion monechikouajok ke Jiova uan tejuan tikintasojtaj. w20.06 27 § 12, 13

Keman kimiktijkej Esteban, se imomachtijkauj Jesús, miakej tokniuan akin nemiaj Jerusalén “mochololtijke uan momoyauke kampa Judeajkopaka uan Samariajkopaka”. Sekin ajsikej hasta Chipre uan Antioquía (Hech. 7:58-8:1; 11:19). Maski nejon tokniuan xa kipiakej miak tataman ouijkayomej, kisentokakej tanojnotskej itech xolalmej kampa ajsikej uan tapaleuijkej maj moajsinij yankuik nechikolmej itech nejon xolalmej (1 Ped. 1:1). Sayoj ke nejon tokniuan kipiakej okseki ouijkayomej. Kemej neskayot, kemej itech xiuit 50, tekiuaj romano Claudio kintokak nochin judíos akin nemiaj Roma. Yejua ika, judíos akin mochiujkaj imomachtijkauan Jesús monekik mokaltalitiuij okseko (Hech. 18:1-3). Kemej itech xiuit 61, tatitanil Pablo kijkuiloj ke taltikpakneminij kinuijuikaltijkaj tokniuan ininixpan oksekin, kintsakkaj uan kinkuilijkaj tein kipiayaj (Heb. 10:32-34). Uan ijkon kemej okseki taltikpakneminij, seki tokniuan kipanokej tatasojtilis uan sekin mokokouayaj (Rom. 15:26; Filip. 2:25-27). w21.02 26, 27 § 2-4

Komo totakuaujtamatilis chikauak, Satanás oso akin kitojtokaj amo uelis kichiuaskej maj amo tinentinemikanok itech tein melauak (2 Juan 8, 9). Tikmatij ke akin amo kitekitiliaj Jiova techtauelitaskej (1 Juan 3:13). Juan techelnamiktia ke “nochi in taltikpakuani kinyekana ok yejua in amokuali Satanás” (1 Juan 5:19). Amo uejkaua ixpoliuis tein amo kuali, yejua ika Satanás okachi kualantok. Amo sayoj kitekitiltia seki taman kemej auilnemilis uan inintakajkayaualis akin kikaujkej uan kiixnamikij tamachtilis tein melauak, ta no kichiua maj techtajyouiltikan. Kemej kimati ke amo kipiaok miak tonalmej, okachi kitemoua maj amo motanojnotsaok oso maj amo titakuaujtamatikanok iuan Dios. Yejua ika, itech seki altepemej tokniuan amo kinkauaj maj kichiuakan seki taman tein ika kiueyichiuaj Jiova oso senkis maj nion teyi kichiuakan. Maski ijkon, amo mosenkauaj. Kinextiaj ke maski Satanás techchiuilis miak taman, amo keman tikauaskej Dios. w20.07 24 § 12, 13

Jiova kinekia maj taltikpakneminij nemikan nochipaya itech kualtsin taltikpak tein kichijchiuak. Sayoj ke, keman Adán uan Eva kiixnamikkej, tajtakol uan mikilis peuak moajsij itech taltikpak (Rom. 5:12). ¿Toni kichiuak Jiova? Niman kijtoj keniuj kinmakixtiskia taltikpakneminij (Gén. 3:15). Kiixtalij kitemakas iKonetsin maj kinmakixti itech tajtakol uan mikilis ikoneuan Adán uan Eva. Ijkon, kikauaskia maj sejse taltikpaknenkej kiixejeko ox kitekitilis uan nemis nochipaya (Juan 3:16; 1 Cor. 15:21, 22). Itechkopa iKonetsin, Jiova kichiuas maj millones akin momikilijkejya oksepa nemikan. Sayoj ke xa amo nochin moajokuiskej sepasaj. ¿Keyej amo? Porin komo sepasaj momiakiliskiaj taltikpakneminij, amo akin kimatiskia toni kichiuas. Uan Jiova amo kiuelita maj teisa amo moajsi kemej moneki. Kimati ke onkas yolseuilis komo nochi kuali moajsi (1 Cor. 14:33). w20.08 14 § 3; 15 § 5

Akin tikinmachtiaj moneki kiajsikamatiskej ke tiknekij tikinpaleuiskej maj mochiuakan itaixpantijkauan Jiova. Akin momachtijtok Biblia uan kineki moauis, achto kichiua miak taman. Yekinika, kiixmati Jiova uan peua kitasojta, uan iuan takuaujtamati (Juan 3:16; 17:3). Ompa, peua kuali mouika iuan uan no iniuan tokniuan itech nechikol (Heb. 10:24, 25; Sant. 4:8). No kikaua tein amo kuali uan moyolnonotsa oso moyolnemilia (Hech. 3:19). Uan no peua kintapouia oksekin tein kineltoka (2 Cor. 4:13). Satepan, motemaktia iuan Jiova uan moauia (1 Ped. 3:21; 4:2). Nejon tonal nochin semi yolpakij. Keman akin tikmachtiaj kichiujtias tein kipaleuis maj ueli moaui, maj tikiluikan ke kuali tein kichiujtok uan maj tikyolchikauakan maj ijkon kisentoka kichiua. w20.10 17, 18 § 12, 13

Komo tikitaj tein kichiuaj okseki tokniuan itech nechikol uan tein tejuan tikchiuaj, xa tiknemiliskej ke amo titapaleuiaj. Seki tokniuan kuali tamachtiaj, kuali taixyekanaj oso kimatij keniuj kinyolchikauaskej uan kinyolseuiskej oksekin, uan xa tiknemiliskej ke tejuan amo ueli tikchiuaj nejon. Nejin kinextia ke tiyolyemankej uan ke tikajsikamatij ke amo nochi ueli tikchiuaj (Filip. 2:3). Sayoj ke moneki timoyekpiaskej. Komo nochipa tiknemiliaj ke tejuan amo ueli tikchiuaj tein oksekin kichiuaj, amo kuali timomachiliskej. Kemej kijtoj tatitanil Pablo, xa hasta tiknemiliskej ke nion tepitsin titapaleuiaj itech nechikol. Itech yekinika siglo Jiova kinmakak seki tokniuan “tataman uelilisme” ika iyektikatsin espíritu (1 Cor. 12:4-11). Yejuatsin nochin kinpatiuitaya. Axkan amo tikpiaj “uelilisme” tein kitemaka Jiova ika iyektikatsin espíritu. Sayoj ke maski tataman tein tiuelij tikchiuaj, yejuatsin no techpatiuita tinochin. w20.08 23 § 13-15

Keman tionmotataujtia ika yolchikaualis, yejuatsin mitsonnankilis uan amo keman mitsonkauas (Hech. 4:29, 31). Nochipa mitsonpaleuis. No xikonnemili keniuj mitsonpaleuiani keman tikonpiani ouijkayomej uan keniuj mitsonpaleuij xikonkaua seki taman tein achto tikonchiuaya. Komo kinpaleuij israelitas maj kipanauianij ueyiat Chichiltik, no uelis mitsonpaleuis xionmochiua itatojtokakauj Cristo (Éx. 14:13). No xiontakuaujtamati iuan Jiova kemej salmista akin kijtoj tajtolmej tein moajsij itech tajkuilol tein axkan timomachtiaj. Jiova no uelis kinpaleuis akin yekin mochiuaj tanojnotsanij maj kipiakan yolchikaualis. Maj tikitakan tein kipanok se tokniuj siuat akin monotsa Tomoyo. Keman yekinika tanojnotsato kajkalpan, siuat akin kisak itech yekinika kali kitsajtsilij: “¡Amo nikneki nikinkakis itaixpantijkauan Jiova!”, uan kitatsakuilij. Tomoyo amo mouik, ta kiluij tokniuj siuat akin iuan yaya: “¿Tikitak tein panok? Ayamo teyi nikijtouaya, uan siuat kimatiaya ke niitaixpantijkauj Jiova. ¡Semi niyolpaki!”. Axkan Tomoyo precursora regular. w20.09 6 § 13, 14

Asá kiniluij akin nemiaj Judá ke Jiova kichiujka maj onkani “yolseuilis kampa yeski” (2 Crón. 14:6, 7). Sayoj ke amo kinemilij ke amo monekia kichiuas nion teyi, ta peuak kinchijchiua altepemej, tepamit tein kiyoualouayaj nejon altepemej uan puertas. Kiniluij akin nemiaj Judá: “Toaxkaok altepet”. ¿Toni kijtosnekia? Ke ueliskia yaskej kampa kinekiskiaj itech tal tein Dios kinmakaka uan tachijchiuaskej porin amo akin kinixnamikia. Yejua ika kinyolchikauak maj kuali kikuinij nejon tonalmej. Asá no kinsentilij okachi tateuianij uan tein ika tateuiskiaj (2 Crón. 14:8). ¿Kichiuak nejon porin amo takuaujtamatia iuan Jiova? Kemaj takuaujtamatia iuan, sayoj ke kimatia ke kemej katka tekiuaj monekia kichiuas tein kinpaleuiskia akin nemiaj Judá komo satepan kipiayaj ouijkayomej. Kimatia ke amo nochipa kipiaskiaj yolseuilis, uan kemej tikitaskej satepan, ijkon mochiuak. w20.09 15 § 4, 5

Se tayekankej no uelis kiniluis tokniuan toni moneki kichiuaskej. Sayoj ke onkak seki taman tein kemaj mopata ika tanauatil tein kipiaj tayekananij uan tetatmej. Se taman yejua ke Jiova kinixtalij tayekananij kemej tamelauanij. Yejuatsin kiixtalij maj kinkalankixtikan itech nechikol tokniuan akin tajtakolchiuaj uan amo moyolnonotsaj (1 Cor. 5:11-13). Sayoj ke Jiova kinnauatiani tetatmej maj kichiuakan seki taman tein tayekananij amo ueli kichiuaj. Se taman yejua ke tepopaj ueli kiixtalia toni moneki kichiuaskej ichankauan uan ueli kichiua maj kitakamatikan (Rom. 7:2, TNM). Kemej neskayot, ueli kiniluia ikoneuan toni hora moneki ajsiskej ininkalijtik youak, uan ueli kintakakiltia komo amo kitakamatij (Efes. 6:1). Sayoj ke se tepopaj tetasojtakej achto kiixejekoltia inamik keniuj kiita teisa tein kineki kiixtalis, porin yejua uan inamik “sayo se” (Mat. 19:6). w21.02 16-18 § 10-13

Okse tamachtilis tein moajsi itech iTajtol Dios no semi kipia ipatiuj porin Jiova sayoj kinmatiltia akin yolyemankej uan akin ‘kiyolnejnekij kiseliskej tein melauak’ (Hech. 13:48, TNM). Akin yolyemankej kikauaj maj kinmachti takeual takuaujtamach uan tamatkej (Mat. 11:25; 24:45). Amo ueli toselti tikajsikamatij tein tamachtia Biblia, uan se kiajsikamatis okachi kipia ipatiuj ke okseki taman (Prov. 3:13). Jiova no techmaka ueyi tatiochiualis maj tikinpaleuikan oksekin maj kiixmatikan yejuatsin uan tein kiixtalijtok kichiuas (Mat. 24:14). Tein tikinmachtiaj semi kipia ipatiuj porin kinpaleuia maj moajsikan kemej ichankauan Jiova uan maj kichiakan nemiskej nochipaya (1 Tim. 4:16). Komo ueli titanojnotsaj miak tonalmej oso amo, titapaleuijtokej maj mochiua tekit tein okachi moneki itech nejin tonalmej (1 Tim. 2:3, 4). ¡Se ueyi tatiochiualis maj ueli titekitikan iuan Dios! (1 Cor. 3:9). w20.09 26, 27 § 4, 5

Keman yajtoya Roma, Jiova miakpa kipaleuij inintechkopa tokniuan. Kemej neskayot, Aristarco uan Lucas, akin kuali mouikayaj iuan Pablo, kiixtalijkej no yaskej Roma. Maski Biblia amo kijtoua ke Jesús no kiniluijka ke kuali ajsiskiaj, yajkej iuan Pablo maski ueliskia momikiliskej. Kimatkej ke amo teyi kinpanoskia hasta keman peujkaya tetsaujkaejeka. Keman yejuan ajsikej Sidón, Julio “kikauak maj kinkalpanoti itasojikniuan uan maj yejuan kiyekpianij” (Hech. 27:1-3). Uan satepan, itech xolal Puteoli, Pablo uan akin iuan yayaj moajsikej iniuan seki tokniuan, akin kintataujtijkej maj mokauanij iniuan chikome tonalmej. Keman moajsiaj iniuan, nejon tokniuan xa semi kinyolpaktij kikakiskej tein Pablo kintapouij tein semi kinyolchikauak (no xikonita Hechos 15:2, 3). w20.11 15, 16 § 15-17

Tetatmej xikinnextilikan nanmokoneuan ke nankitasojtaj Jiova ika tein nankijtouaj uan ika tein nankichiuaj. Komo nankinpaleuiaj maj kitasojtakan Jiova yejua okachi kuali netetayokolil tein uelis nankinmakaskej. Uan semi kinpaleuis komo nankinmachtiaj keniuj uelis nochipa momachtiskej Biblia, kitataujtiskej Jiova, yaskej nechikolmej uan tanojnotsaskej (1 Tim. 6:6). Melauj ke moneki nankinmakaskej tein kinpoloua, kemej tomin oso okseki taman (1 Tim. 5:8). Sayoj ke xikelnamikikan nejin: amo tomin oso okseki taman kinpaleuis nanmokoneuan maj makisakan keman ixpoliuis tein amo kuali uan maj nemikan itech Xochital, ta ininkuali uikalis iuan Jiova (Ezeq. 7:19. Semi techyolpaktia tikitaskej ke miakej tetatmej kiixtaliaj kichiuaskej tein kinpaleuis ininkoneuan maj kuali mouikakan iuan Jiova. Miakpa, akin inintatuan kichiujkej nejin, kisentokaj ijkon kichiuaj keman moskaltiaj uan semi kitasojkamatij tein kinmachtijkej inintatuan (Prov. 10:22). w20.10 28, 29 § 10, 11

Kemansa, tatitanil Pedro amo kinemiliaya tein kijtouaya oso tein kichiuaya uan satepan amo kuali momachiliaya. Kemej neskayot, keman Jesús kiniluij itatitaniluan ke kitajyouiltiskiaj uan kimiktiskiaj, Pedro kijtoj tajtolmej tein achto tikijtojkej (Mat. 16:21-23). Jesús kitakaualtij. Uan keman miakej taltikpakneminij kikuitoj Jesús porin kiuikaskiaj ininixpan tamelauanij, Pedro niman kinakaskotonak se itakeual tayekankatiopixkat (Juan 18:10, 11). Jesús oksepa kitakaualtij. Uan no, Pedro kijtojka ke maski okseki tatitanilmej kikauaskiaj Jesús, yejua amo keman kikauaskia (Mat. 26:33). Sayoj ke amo katka yolchikauak kemej kinemiliaya, ta satepan mouik uan expa kijtoj ke amo kiixmatia Jesús. Nejon tein kichiuak semi kitayokoltij, uan yejua ika “kalan kisak uan peuak semi mochojchoktia” (Mat. 26:69-75). Xa motajtaniaya ox Jesús kitapojpoluiskia. Sayoj ke Pedro amo mosenkauak. Maski mopolojka, kisentokak kitekitilij Jiova iniuan okseki tatitanilmej (Juan 21:1-3; Hech. 1:15, 16). w20.12 20 § 17, 18

Komo se takat yolyemanik kinextia itech miak taman. Kemej neskayot, amo kichia maj inamik uan ikoneuan kichiuakan tein amo uelij. Kikaki tein kinemiliaj ke ueliskia kichiuaskej, maski yejua amo kinemilia nejon. Uan no, se takat akin yolyemanik kichiua tekimej tein onkak kalijtik, maski kampa nemi kinemiliaj ke nejon tekimej sayoj siuamej moneki kichiuaskej. Nejin uelis ouij kinkisas. ¿Keyej? Se tokniuj siuat akin monotsa Rachel kijtoua: “Kampa nikayot, komo se takat kipaleuia inamik maj tapajpaka oso maj tachipaua kalijtik, akin ompakauin nemij uan ichankauan kijtoskej ke amo ‘yekmelauj takat’. Kinemiliskej ke isiuauj tanauatia”. Komo kampa tionnemi miakej ijkon tanemiliaj, xikonelnamiki ke Jesús kinmetspajpakak imomachtijkauan, maski taltikpakneminij kiitayaj ke nejon tekit monekia kichiuaskej takeualmej. Se takat akin kuali kinixyekana ichankauan amo kitemos maj oksekin kuali kiitakan, ta kitemos maj ichankauan kuali momachilikan. w21.02 2 § 3; 4 § 11

Tikelnamikiskej tein kuali tein tikpanokej achto se inetetayokolil Jiova; sayoj ke, maski semi kuali tein tikpanokej, okachi kuali yeski tein tikpanoskej satepan. Maski oksekin techyolkokoskej, komo tikintapojpoluiaj uelis tiktayekanaltiskej tiktekitiliskej Jiova. Keman totanemilil kisentoka techkuejmoloua uelis kichiuas maj amo tiktekitilikan Jiova ika yolpakilis. Yejua ika, ijkon kemej tatitanil Pablo, moneki tikneltokaskej ke Jiova techtapojpoluijya (1 Tim. 1:12-15). Itech yankuik taltikpak kampa tinemiskej nochipaya, amo tikelnamikiskejok nion se taman tein amo kuali. Biblia kijtoua: “Tein achto panok amo moelnamikisok” (Is. 65:17). Sekin miak xiujmejya tiktekitilijtokej Jiova uan tixiuejkejya, sayoj ke itech yankuik taltikpak oksepa tiyeskij titelpochmej uan tiichpochmej (Job 33:25). Yejua ika, maj tikixtalikan amo tiksentokaskej itech titanemilijtoskej tein achto tikpanokej. Okachi kuali, maj itech titanemilikan tein tikseliskej satepan itech yankuik taltikpak uan maj tikchiuakan axkan tein techpaleuis maj ompa tinemikan. w20.11 24 § 4; 29 § 18, 19

¿Toni panos satepan? Itech okachi ueyi tajyouilis, Jiova kichiuas ome taman tein ika techmakixtis. Yekinika, kinmakixtis itekitikauan akin amo kikauaj keman kichiuas maj “reyes de nochi in taltikpak” kiixpolokan Ueyi Babilonia, tein kijtosneki, nochi taneltokalismej tein amo melaujkej (Apoc. 17:16-18; 18:2, 4). Uan ojpatika, kinmakixtis itekitikauan keman kiixpolos itech Armagedón nochi okseki taman tein Satanás kiixyekana (Apoc. 16:14, 16). Komo tiksentokaj kuali timouikaj iuan Jiova, Satanás amo uelis techchiuilis nion teyi tein uejkauas. Tein melauj, yejua akin senkis kiixpoloskej (Rom. 16:20). Yejua ika, maj nochipa timotalilikan taken uan maj nochipa tikuikan manamikmej tein Dios techmaka. Maj amo tiktemokan toselti tikixnamikiskej Satanás, maj tikinpaleuikan tokniuan uan maj tiksentokakan tiktakamatikan Jiova. Komo tikchiuaj nochi nejin, uelis titakuaujtamatiskej ke toTajtsin tetasojtakej techyolchikauas uan techyekpias (Is. 41:10). w21.03 30 § 16, 17

¿Keniuj uelis tiknextiskej ke titakuaujtamatij iuan Jiova? Keman tikchiuaj tein yejuatsin technauatia. Itech Biblia tikajsij miak neskayomej, tein kuali uan tein amo kuali, tein kinextiaj ke semi moneki se yolseujtos uan se takuaujtamatis iuan Jiova. Keman tionmomachtis kuali neskayot tein kikaujkej itekitikauan Dios, xikonita toni kinpaleuij maj yolseujtonij keman semi kinixnamikkej. Kemej neskayot, tatitanilmej amo moujkej keman tamelauanij judíos kiniluijkej maj amo tanojnotsanijok, ta ika yolchikaualis kijtojkej: “Moneki ke ma tiktakamatikan Totajtsin Dios uan ma amo achto tikintakamatikan in tagayot” (Hech. 5:29). Amo moujkej maski kinuijuitekkej. ¿Keyej? Porin kimatiaj ke Jiova kinpaleuijtoya uan ke kiyolpaktiaya tein kichiujtoyaj. Yejua ika kisentokakej kiteixmatiltijkej iTajtol Dios (Hech. 5:40-42). No ijkon, keman Esteban, akin katka itatojtokakauj Cristo, yaya kimiktitij, semi yolseujtoya ke “kitayaj iixko Esteban keme se ángel” (Hech. 6:12-15). ¿Keyej? Porin kimatia ke Jiova kiyolpaktiaya tein kichiujtoya. w21.01 4 § 10, 11

Nejin kijtosneki ke “uel miak tagayot” kipiaj chipauak inintanemilil uan ke Jiova kiyolpaktia tein kichiuaj (Is. 1:18). Yejuan motemaktijkejya, moauijkejya, senkis takuaujtamatij itech inemilis Jesús tein kitemakak uan kuali mouikaj iuan Jiova (Juan 3:36; 1 Ped. 3:21). Yejua ika Dios kiyolpaktia tein kichiuaj uan yejuan ueli “kitekitilijtokke [...] youalitonal” nikan taltikpak (Apoc. 7:15). Tein melauj, yejuan akin okachi kiteixmatiltiaj iTekiuajyo Dios uan kinpaleuiaj oksekin maj mochiuakan itatojtokakauan Cristo, uan kichiuaj ika yolpakilis porin semi kipatiuitaj iTekiuajyo Dios (Mat. 6:33; 24:14; 28:19, 20). “Uel miak tagayot” kimatij ke Dios kisentokas kinyekpias satepan ke panos okachi ueyi tajyouilis porin Biblia kijtoua ke “ten tokotsyetika tech ne tayekankatrono, Yejuatsin momasoutok inpan nochi nojonkes para kinpaleuijtiu”. Uan no, mochiuas nejin tein okseki ichkamej uejkaujya kichixtokej: Dios “kinelkaualtis de ninchokilisuan” (Apoc. 21:3, 4). w21.01 16 § 9, 10

Se taman tein kichiua maj tinochin tikpiakan yolseuilis yejua porin timochikauaj tikinpoujkaitaskej akin Jiova kinixtalij maj taixyekanakan. Biblia kinextia ke Jiova kinpatiuita takamej uan siuamej. Kemej neskayot, kijtoua ke itech yekinika siglo kinmakak takamej uan siuamej iyektikatsin espíritu tein kinpaleuij maj kichiuanij uejueyi tachiualismej, kemej tajtoskej itech tataman tajtolmej (Hech. 2:1-4, 15-18). No kinixpejpenak tokniuan takamej uan siuamej maj tekiuajtikan iuan Cristo (Gál. 3:26-29). Uan no, takamej uan siuamej uelis nemiskej nochipaya nikan taltikpak (Apoc. 7:9, 10, 13-15). Uan Jesús kinnauatij takamej uan siuamej maj kiteixmatiltikan iTekiuajyo Dios uan maj tamachtikan (Mat. 28:19, 20). Kemej neskayot, amatajkuilol Hechos ika tajtoua se tokniuj siuat akin monotsaya Priscila. Yejua uan inamik, Áquila, “kachi ok kiyekajsikamatiltijke” tein Biblia tamachtia se takat akin monotsaya Apolos, akin kimatia miak taman (Hech. 18:24-26). w21.02 14 § 1; 15 § 4

Tayekananij, namejuan moneki nankinpaleuiskej tokniuan maj kuali tanojnotsakan uan maj kuali tamachtikan. Komo se tokniuj kimouilia tamachtis keman iuan nanyouij, xikiluikan ke namejuan uelis nantamachtiskej. Tayekananij uelis semi kinyolchikauaskej tokniuan (1 Tes. 5:11). Maski axkan xa amo akin tikmachtijtokej ika Biblia, uelis tikpaleuiskej se akin momachtijtok maj kiixtali moauis. Uelis tikpaleuiskej tokniuj akin tamachtiti keman tikijtoskej seki taman tein semi tapaleuis maski amo semi titajtoskej. Maj tiktemokan kuali timouikaskej iniuan akin momachtijtokej Biblia keman yaskej nechikolmej, uan maj tikinkauilikan se kuali neskayot. Uan tayekananij uelis kinyolchikauaskej akin momachtijtokej keman iniuan tajtoskej, uan no uelis kinyolchikauaskej tokniuan keman kinpaleuiskej maj kuali tamachtikan uan keman kiniluiskej ke kuali tein kichiuaj. Semi tiyolpakij keman tikitaj ke no tepitsin tikpaleuijkej se taltikpaknenkej maj peuani kitasojta toTajtsin Jiova uan maj kiixtaliani kitekitilis. w21.03 13 § 18, 19

David kinextij ke uelia iuan takuaujtamatiaj. Kemej neskayot, keman okichpilok katka kinauatijkej maj kinyekpiani iichkauan ipopaj, uan mochikauak kuali kichiuas nejon tekit maski kemansa kipanok tein amo kuali. Satepan kitapouij tekiuaj Saúl: “Noteko, nejua nikinyekpia iichkauan nopopaj. Se tonal ualaj se león uan okse tonal se oso, uan kiuikakej se ichkat. Nejua nikintojtokak uan nikinuetsiltij, uan nikinkuilij ichkamej” (1 Sam. 17:34, 35). David kiitaya ke monekia kinyekpias ichkamej. Telpochmej uelis kichiuaskej kemej David komo kuali kichiuaj tein yeski tekit tein kinmakaskej. Uan no, David peuak kuali mouika iuan Jiova keman okichpilok katka. Kiitaya ke okachi monekia kuali mouikas iuan Jiova ke yeski yolchikauak oso kuali kitsotsonas arpa. David amo kiitaya Jiova sayoj kemej iDios, ta no kemej itasojikniuj. Telpochmej, no xiktayekanaltikan okachi kuali nanmouikaskej iuan namoTajtsin Jiova. w21.03 3 § 4, 5