Enero

¿Keyej Timoteo kuali kitekitilij Jiova? Porin kinextiaya kualneskayomej tein nochin kiitayaj (Filip. 2:​19-22). Ika tein tatitanil Pablo kijtoj de Timoteo, tikitaj ke katka yolyemanik, amo tekauaya, kuali tekitia uan katka takuaujtamach. Yejua yekmelauj ininka motekipachouaya. Yejua ika, Pablo semi kitasojtaya uan kimakak seki tekimej maski ouij katka porin kimatia ke ueliskia kichiuas. Jiova okachi techtasojtas komo tiknextiaj kualneskayomej tein kiyolpaktiaj uan okachi techmakas tekimej itech nechikol (Sal. 25:9; 138:6). Yejua ika, maj tiktataujtikan Jiova maj techpaleui maj tikmatikan toni kualneskayot moneki okachi kuali tiknextiskej. Maj tikixpejpenakan se uan maj timochikauakan okachi kuali tiknextiskej. ¿Xa moneki okachi tikinajsikamatiskej oksekin? ¿Xa moneki timochikauaskej okachi kuali timouikaskej iniuan oksekin oso okachi titetapojpoluiskej? Komo tiknekij tikmatiskej toni moneki tikpataskej oso toni moneki okachi tikyekchiuaskej, maj tiktajtanikan aksa akin kuali iuan timouikaj (Prov. 27:6). w22.04 23 § 4, 5

Jiova kineki maj tiyolpakikan. Tikmatij nejin porin ika iespíritu yejuatsin techpaleuia maj tiyolpakikan (Gál. 5:22). Uan kemej okachi tiyolpakij keman tiktemakaj teisa ke keman tikseliaj, kuali timomachiliaj keman timochikauaj tikteixmatiltiskej iTajtol Dios nochi tein tiueliskej uan keman tikinpaleuiaj tokniuan (Hech. 20:35). ¿Toni techpaleuis maj tiksentokakan tiyolpakikan? Tatitanil Pablo kijtoj ome taman tein uelis techpaleuis. Tikajsij itech tajkuilol tein axkan timomachtiaj. Yekinika, uelis tiyolpakiskej keman tiktekitiliskej Jiova komo tikchiuaj nochi tein tiuelij. Uan nejon tinochin moneki tikchiuaskej (Mat. 22:​36-38). Ojpatika, maj amo tikitakan tein oksekin kichiuaj ika tein tejuan tikchiuaj. Komo ueli tikchiuaj teisa porin tipaktokej, porin techmachtijkej seki taman oso porin ipa tiuelij, maj tiktasojkamatilikan Jiova. Uan komo okseki tokniuan okachi kuali kichiuaj seki taman itech tanojnotsalis ke tejuan, maj tiyolpakikan porin kichiuaj tein uelij para kiueyichiuaskej Jiova uan amo porin kinekij maj kinueyitalikan. w22.04 10 § 1, 2

Keman kinixpoloskej taneltokalismej tein amo melaujkej nochin kimoujkaitaskej (Apoc. 18:​8-10). Keman ixpoliuis Ueyi Babilonia, miakej momoujtiskej uan nejon kichiuas maj okachi motaouijkantali itech nochi taltikpak. Sayoj ke akin tiktekitiliaj Jiova, tiyolpaktoskej porin amo yetoskejok taneltokalismej tein amo melaujkej tein semi kiixnamikij Dios, uan no porin ejkotosya tonal keman timakisaskej. Daniel achtook kijtoj: “Momiakilis tein yekmelauj taixmatilis”. Nejon mochiujtokya porin kuali tikajsikamatijya tein achtook moijtojka ke mochiuaskia axkan (Dan. 12:​4, 9, 10). Keman tikitaj ke yekmelauj mochiua tein achtook moijtojka kichiua maj okachi tikpoujkaitakan Jiova uan iTajtol (Is. 46:10; 55:11). Yejua ika, maj timochikauakan timomachtiskej Biblia uan maj tikinpaleuikan oksekin maj kuali mouikakan iuan Jiova, nejon techpaleuis maj okachi titakuaujtamatikan. Jiova kinyekpias akin senkis itech mopaleuiaj uan kichiuas maj yolseujtokan nochipaya (Is. 26:3). w22.07 6, 7 § 16, 17

Amatajkuilol Apocalipsis kinextia ke iTekiuajyo Dios taixyekantokya ompa iluikak uan ke Satanás kiualpantamotkej nikan taltikpak (Apoc. 12:​1-9). Nejon kichiuak maj yolpakinij ompa iluikak, sayoj ke no kichiuak maj tejuan okachiok tikpiakan kuejmolmej. ¿Keyej? Porin kemej Satanás semi kualantok kinchiuilia tein amo kuali itekitikauan Jiova (Apoc. 12:​12, 15, 17). ¿Toni techpaleuis maj amo tikauakan Jiova maski Satanás techixnamikis? (Apoc. 13:10). Komo tikmatij tein panos satepan. Kemej neskayot, itech amatajkuilol Apocalipsis, tatitanil Juan ika tajtoj seki tatiochiualismej tein tikseliskej amo uejkaua. Se taman yejua keman kijtoj ke akin kiixnamikij Dios kinixpoloskej. Yekinika versículo tein kipia amatajkuilol Apocalipsis kiteajsikamatiltia ke tein ompa ijkuiliujtok kiixnextia seki taman (Apoc. 1:1). w22.05 8 § 1-3

Keman kiitaskej ke itaixpantijkauan Jiova senkis amo kinekij kinpaleuiskej, akin kiixnamikij Jiova semi kualaniskej. Yejua ika, oloch altepemej kinixnamikiskej itekitikauan Dios itech nochi taltikpak. Biblia kijtoua ke nejin yejua itaixnamikilis Gog akin ualeua Magog (Ezeq. 38:​14, 15). ¿Toni kichiuas Jiova keman kiitas ke kinixnamikij uan kintajyouiltiaj itekitikauan? Yejuatsin kijtoua: “Niknextis nochi nokualanyo” (Ezeq. 38:​18, 21-23). Apocalipsis capítulo 19 kijtoua tein panos. Jiova kiualtitanis iKonetsin maj kinpaleuiki itekitikauan uan maj kinixpoloki akin kinixnamikij. Uan Jesús amo iselti yetos, ta iuan yetoskej “soldados de ne iluikak”, tein kijtosneki ángeles iniuan 144,000 taixpejpenalmej (Apoc. 17:14; 19:​11-15, TNM). Itech nejin neteuilis senkis kinixpoloskej nochin akin kiixnamikij Jiova (Apoc. 19:​19-21). w22.05 17 § 9, 10

Tepitsin satepan ke Adán uan Eva tajtakojkej, Jiova kijtoj ke ininkoneuan ueliskia kichiaskej tein kuali. Tein kijtoj ke mochiuaskia moajsi itech Génesis 3:15: “Nikchiuas ximotauelitakan tejua uan siuat, uan mokoneuan iuan yejua ikonetsin. Yejua mitskuaxamanis, uan tejua tikotskejtsomas”. Nejin tein achtook moijtojka moajsi itech yekinika amatajkuilol tein kipia Biblia, uan nochi okseki amatajkuilolmej mouikaj ika tein ompa kijtoua. Ijkon kemej se mekat kisenilpia miak kouit, tein kijtoua Génesis 3:15 kemej yeskia kinsentilia nochi amatajkuilolmej tein kipia Biblia porin kitematiltiaj sayoj se taman. Ika tajtouaj ke Dios kititaniskia se temakixtijkej para kiixpolos Satanás uan nochin akin kipaleuiaj. ¡Nejin semi techyolchikaua nochin akin tiktasojtaj Jiova! Keman timomachtiskej Biblia techpaleuis maj tikajsikamatikan keniuj mochiuani tein ompa kijtoua uan keniuj techpaleuia axkan. w22.07 14 § 1-3

Moneki nankipiaskej tamatilis para nankinpaleuiskej namokoneuan maj kitasojtakan Jiova, yejua ika xiktajtanikan yejuatsin maj namechmaka (Sant. 1:5). Onkak miak taman keyej Jiova okachi kuali tayolmajxitia. Se taman porin uejkaujya kinpia ikoneuan (Sal. 36:9). Uan no, porin tein techyolmajxitia nochipa techpaleuia (Is. 48:17). Jiova namechmachtia ika iTajtol uan inechikol keniuj nankinpaleuiskej namokoneuan maj kitasojtakan yejuatsin (Mat. 24:45). Kemej neskayot, itech jw.org uelis nankiajsiskej kuali tayolmajxitilis itech taxelol “Ayuda para las familias” tein mokixtiaya itech amaix ¡Despertad! Ompa no tikonajsis videos kampa sekin kinchiuiliaj netajtanilmej uan tamouisolmej tein namechpaleuis xikiniskaltikan namokoneuan kemej Jiova kijtoua (Prov. 2:​4, 5). w22.05 27 § 4, 5

Amo akin tetapojpoluia kemej Jiova. Yekinika, porin yejuatsin nochipa kineki tetapojpoluis. Ojpatika, porin kuali techixmati, yejua ika kimati ox yekmelauj timoyolnonotsaj. Uan expatika, porin keman Jiova tetapojpoluia senkis kielkaua tein tikchiujkej. Nejon techpaleuia maj amo techkuejmolook totanemilil uan maj ueli tikyolpaktikan. Kemej titajtakolejkej tiksentokaskej timopoloskej. Sayoj ke semi techyolchikaua tein kijtoua amatajkuilol Perspicacia para comprender las Escrituras, volumen 1, página 209: “Jiova teiknelia uan kiajsikamati ke itekitikauan uelis niman mopoloskej, yejua ika amo moneki nochipa motayokoltijtoskej ika tein kichiuaj porin tajtakouanij (Sl 103:​8-14; 130:3). Uelis yolpakiskej komo mochikauaj kitakamatiskej Jiova (Flp 4:​4-6; 1Jn 3:​19-22)”. w22.06 7 § 18, 19

Sayoj ke, Satanás amo sayoj kitemoua maj timouikan keman techixnamikij tekiuanij. Sekin kimouiliaj keniuj kinitaskej ininchankauan komo mochiuaj itaixpantijkauan Jiova. Okachi kimouiliaj nejon ke maj kintajyouiltikan. Semi kintasojtaj ininchankauan uan kinekij maj kiixmatikan uan maj kitasojtakan Jiova, yejua ika kinyolkokoua keman kikakij ke amo kuali ika tajtouaj yejuatsin uan itekitikauan. Sayoj ke kemansa, akin achto kualaniaj satepan peuak momachtiaj Biblia. ¿Uan toni tikchiuaskej komo semej tochankauan techtauelita uan nion techitasnekiok? ¡Semi kualtsin uan techyolchikaua tein kijtoua Salmo 27:10! Komo nochipa tikelnamikij ke Jiova semi techtasojta, amo timouiskej keman oksekin techixnamikiskej uan tikneltokaskej ke Jiova techtatiochiuis porin titaxikouaj. Jiova techmakas nochi tein techpaleuis maj tiyoltokan, techpaleuis maj tiyolseujtokan, maj tiyolpakikan uan maj kuali timouikakan iuan. w22.06 16, 17 § 11-13

Keman Jesús yetoya nikan taltikpak kijtouilijkej ke ‘teltakuaya uan tayitinemia ne vino’, ke kitekitiliaya Amokuali, ke amo moseuiaya tonal sábado uan hasta ke kiuijuikaltiaya Dios (Mat. 11:19; 26:65; Luc. 11:15; Juan 9:16). Sayoj ke Jesús amo keman kintauelnankilij. Maj tikchiuakan kemej yejua, komo aksa techtauelnankilia, maj amo no ijkon tiknankilikan (1 Ped. 2:​22, 23). Sayoj ke kemansa xa ouij techkisa (Sant. 3:2). ¿Toni techpaleuis maj kuali titanankilikan? Komo aksa amo kuali mitsonnankilia keman tiontanojnotsa amo sayoj xikonita keniuj tanankilia. Se tokniuj takat akin monotsa Sam, kijtoua: “Nimochikaua niknemilis ke taltikpaknenkej moneki kikakis tein Biblia tamachtia uan ke uelis mopatas”. Uan no, taltikpaknenkej xa kualantoya porin kipanoka teisa nejon tonal. Keman techtauelnankiliskej uelis tiktataujtiskej Jiova maj techpaleui maj tiyolseujtokan uan maj amo tikijtokan teisa tein kinextis ke amo tikualtakamej oso ke amo titepoujkaitaj. w22.04 6 § 8, 9

Se taman kemej tetatmej uelis kinpaleuiskej ininkoneuan maj motokikan iuan Jehová, yejua komo mosenmachtiaj tein kijtoua Biblia (2 Tim. 3:​14-17). Biblia kinextia okse taman kemej telpochmej uelis okachi kiixmatiskej Jehová. Itech amatajkuilol Proverbios ika tajtoua keniuj se tepopaj kinojnotsa ikonetsin, uan kiyolchikaua maj nochipa kiita keniuj tamati Jehová ika tein kichijchiuak (Prov. 3:​19-21). Tetatmej, ¿melauj ke nankiuelitaj nanyetoskej iniuan namokoneuan keman nankisaj nannemitij? Keman nankisaskej, xikinpaleuikan maj kiitakan ke ‘tein Dios kichijchiuak’ kinextia keniuj tamati yejuatsin (Rom. 1:20). Xikitakan keniuj Jesús ika tamachtij tein Dios kichijchiuak. Se tonal kiniluij imomachtijkauan maj kinitanij tiltik totomej uan xochimej (Luc. 12:​24, 27-30). Kinnextilij imomachtijkauan ke iTajtsin kiuelita kitemakas tein kipia uan teiknelia: Jehová kinmakas tein kikuaskej uan tein motaliliskej itekitikauan akin amo kikauaj, ijkon kemej kinyekpia tiltik totomej uan xochimej ne koujtaj. w23.03 20, 21 § 1-4

Tiktasojkamatiliaj Jiova porin ueli tiktataujtiaj itokaykopa iKonetsin. Itechkopa Jesús yejuatsin techmaka tein tiktajtaniaj. Yejua ika keman tiktataujtiaj Jiova itokaykopa Jesús, yejuatsin techkaki uan technankilia uan techtapojpoluia totajtakoluan porin Jesús toka momikilij (Rom. 5:1). Biblia kijtoua ke Jesús toTayekankatiopixkauj uan ke yejua “motalij iyekmakopa toUeyi Dios akin motalia itech iueyi silla ne iluikak” (Heb. 8:​1, TNM). Biblia no kijtoua ke “tikpiaj se akin techpaleuia akin yetok iuan toTajtsin: Jesucristo” (1 Juan 2:​1, TNM). Semi tiktasojkamatiliaj Jiova porin techmakak se Tayekankatiopixkat akin techiknelia, techajsikamati uan techtajtouia (Rom. 8:34; Heb. 4:15). Komo Jesús amo toka momikiliskia amo ueliskia tiktataujtiskej Jiova porin titajtakouanij. Semi tiktasojkamatiliaj porin yejuatsin kitemakak iKonetsin akin semi kitasojta. w22.07 23 § 10-12

Akin takuaujtamach mochikaua kichiuas tein kijtoua uan nochipa kijtoua tein melauak (Sal. 15:4). Akin kiixmatij kiitaj ke uelis takuaujtamatiskej iuan. Tejuan no tiknekij maj tokniuan ijkon techitakan. Amo uelis tikinchikaujkauiskej oksekin maj touan takuaujtamatikan, ta moneki timotaniliskej. Nejin kemej yeskia tomin, yolik se kitani, sayoj ke niman uelis se kipolos. Jehová kinextiani ke uelis iuan titakuaujtamatiskej porin “nochi tein kichiua takuaujtamach” (Sal. 33:4). Uan kineki maj tikchiuakan kemej yejuatsin (Efes. 5:1). Semi tiktasojkamatij maj Jehová techkauani maj tipouikan iniuan miakej tokniuan akin semi motasojtaj uan takuaujtamachmej. Moneki nochipa timochikauaskej para maj tokniuan touan takuaujtamatikan. Komo tinochin titetasojtaj, amo timoueyimatij, kuali titaixejekouaj, nochipa tikijtouaj tein melauak uan tikmatij timotsakuiliskej, titapaleuiskej maj itech nechikol tokniuan takuaujtamatikan iniuan oksekin. Maj tikchiuakan kemej Jehová uan maj tiksentokakan tiknextikan ke titakuaujtamachmej. w22.09 8 § 1, 2; 13 § 17

Maski moajsij miakej tokniuan itech nechikol, kemansa uelis timomachiliskej toselti uan tisekimej xa amo kuali timomachiliaj oso timotayokoltiaj uan tiknemiliaj ke amo akin uelis techpaleuis. Sayoj ke Jiova amo kineki maj ijkon timomachilikan. Maj tikitakan tein kipanok tanauatijkej Elías. Jiova kichiuak miak taman tein ika kipaleuij Elías. Kemej neskayot, kiyolchikauak maj kijto keniuj momachiliaya keman ojpa kitajtanij: “¿Toni tikchiua nikan Elías?” (1 Rey. 19:​9, 13). No kimatiltij ke itech altepet onkayajok miakej akin kiueyichiuayaj (1 Rey. 19:​11, 12, 18). Elías semi yolseuik keman kiluij Jiova keniuj momachiliaya uan tein yejuatsin kinankilij. No kiluij maj kiixtaliani Hazael kemej tekiuaj ompa Siria, Jehú ompa Israel uan Eliseo kemej tanauatijkej (1 Rey. 19:​15, 16). Jiova kiluij Elías maj kichiuani nejon para maj oksepa yolpakini uan no kiixtalij maj Eliseo kipaleuiani. w22.08 8 § 3; 9 § 5

¿Tiontapaleuiani keman mochijchiuak oso moyektalij se Kali kampa tiMosentiliaj? Komo ijkon, xa tikonelnamiki yekinika nechikol tein mochiuak ompa. Semi tionmotasojkamatia iuan Jiova uan kemej semi tionyolpakia xa nion uelia tionmokuikatiaya. Kalmej kampa tiMosentiliaj kiueyichiuaj Jiova, sayoj ke onkak okse taman tein okachi kipia ipatiuj ke se kinchijchiuas Kalmej kampa tiMosentiliaj uan tein okachi kiueyitalia Jiova: keman se kinpaleuia akin mosentiliaj itech nejon kalmej. Tatitanil Pablo ika tajtoj nejin keman kijkuiloj texto tein axkan timomachtiaj. Komo tiknekij tikinpaleuiskej tokniuan, uelis tikitaskej tein kichiuak tatitanil Pablo. Yejua kiajsikamatia tein oksekin kipanouayaj. Maj tikitakan keniuj uelis tikchiuaskej kemej Pablo (1 Cor. 11:1). w22.08 20 § 1, 2

Komo se tokniuj kineki kichiuas tein kuali kemej Dios kineki, moneki amo takajkayauas itech tein yeski tekit tein kichiuas uan amo yolpakis keman oksekin kinchiuiliskej tein amo kuali. Uan achto ke kiixtalis teisa, kiitas tein Dios kinemilia porin kineki kiyolpaktis. Biblia kinextia ke sayoj Jiova ueli senkis kichiua tein kuali yetok (Jer. 50:7). Kemej Jiova techchijchiuak, sayoj yejuatsin ueli kiixtalia tein kuali uan tein amo kuali (Prov. 14:12; Is. 55:​8, 9). Sayoj ke ¿uelis tikchiuaskej tein yejuatsin kijtoua ke kuali yetok? Kemaj, porin techchijchiuak “kemej yejuatsin tamati” (Gén. 1:27). Uan techyolpaktia tikchiuaskej. Kemej semi tiktasojtaj toTajtsin timochikauaj tikchiuaskej kemej yejuatsin (Efes. 5:1). w22.08 27 § 5, 6

Keman timotekipachojtokej oso timotayokoltijtokej, xa tiknekiskej tikchiuaskej teisa tein ika tikelkauaskej tein tikpanotokej. Uan nejon kuali yetok. Sayoj ke moneki timoyekpiaskej para amo tikchiuaskej teisa tein Jehová kitauelita (Efes. 5:​10-12, 15, 16). Itech amat tein tatitanil Pablo kinijkuilouilij tokniuan akin nemiaj Filipos, kiniluij maj tanemilianij itech nochi tein Dios kiita ke kuali yetok, nochi tein chipauak, nochi tein kichiua maj se tetasojta uan nochi tein kuali (Filip. 4:8). Maski Pablo amo ika tajtojtoya tein ika se moixpetania, tein kijtoj moneki techpaleuis maj kuali tikixpejpenakan toni ika timoixpetaniskej. Maj tikchiuakan nejin, kampa nesi tajtol “nochi” itech nejin versículo, maj tikpatakan ika tajtolmej “tatsotson”, “películas”, “amatajkuilolmej” oso “videojuegos”. Nejin techpaleuis maj tikmatikan toni kiyolpaktia Dios uan toni amo. Tiknekij tiktakamatiskej tein Jehová tanauatia (Sal. 119:​1-3). w22.10 9 § 11, 12

Achto ke momikiliskiaj, sekin “akin amo yolmelaujkej” kichiujkej tein tel amo kuali. Monekis kitakamatiskej itanauatiluan Jehová. ITaixyekanalis Dios kichiuas maj motamachti itech nochi taltikpak kemej amo keman mochiuani para kinpaleuiskej akin amo yolmelaujkej. ¿Akonimej kinmachtiskej akin amo yolmelaujkej? Tel miakej akin makisaskej keman mochiuas Armagedón uan akin yolmelaujkej akin oksepa nemiskej. ¿Toni monekis kichiuaskej akin amo yolmelaujkej para maj inintokay moijkuilo itech amatajkuilol kampa ixnesij akin nemiskej? Monekis kuali mouikaskej iuan Jehová uan motemaktiskej iuan. Jesús uan akin iuan taixyekanaskej, akin yeskij kemej tamelauanij kiitaskej tein kichiuaskej akin amo yolmelaujkej (Apoc. 20:4). Komo aksa amo kineki tatakamatis, niman kiixpoloskej maski kipias 100 xiujmej (Is. 65:20). Kemej Jehová uan Jesús kimatij tein tiknemiliaj uan tein tikmachiliaj, kiitaskej maj amo akin kichiua tein amo kuali itech xochital (Is. 11:9; 60:18; 65:25). w22.09 17 § 11, 12

Itech nejin versículo keman kijtoua “tekiuanij akin taixyekanaj”, ininka tajtojtok akin kipiaj tanauatil para kinixyekanaskej oksekin. Akin tikchiuaj kemej Cristo moneki tikintakamatiskej nejin tekiuanij. Yejuan tapaleuiaj maj amo semi motakuejmolchiua, maj oksekin kitakamatikan tanauatil tein kiixtaliaj uan kemansa hasta kinpaleuiaj itekitikauan Jehová (Apoc. 12:16). Yejua ika, moneki tikixtauaskej impuesto, tikixtauaskej tein moneki, tikintakamatiskej uan tikintakachiuaskej (Rom. 13:7). Sayoj ke nochin tekiuanij kipiaj tanauatil porin Jehová kinkaujtok. Jesús senkis kinextij nejin keman Poncio Pilato kitatajtanijtoya. Yejua kiluij Jesús ke ueliskia kichiuas maj kimakixtikan oso maj kimiktikan. Sayoj ke Jesús kinankilij: “Amo tikpiaskia nion se tanauatil para tinechchiuilis teisa komo Dios amo mitsmakaskia” (Juan 19:11). Ijkon kemej Pilato, axkan ixyetoksaj toni ueli kichiuaj nochin tekiuanij ika tanauatil tein kipiaj. w22.10 14 § 6

Jehová kichiuak maj tekiuaj David kijkuilouani keniuj tinemiskej keman taixyekanas se tekiuaj akin tamatkej uan amo kikaua Jehová (Sal. 37:​11, 29). Keman tikiniluiaj oksekin ke Dios kichiuas se xochital, tikinixtajtoltiliaj Salmo 37:11. Uan nejon semi kuali porin Jesús ika tajtoj nejon texto keman tamachtij itech se tepet, ijkon kinextij ke tein ompa moijtoua mochiuas satepan (Mat. 5:5). Sayoj ke tein tekiuaj David kijkuiloj no kinextij keniuj nemiskiaj keman Salomón taixyekantoskia. Itech nejon tonalmej, israelitas yolseujkanemiaj uan kipiayaj nochi tein monekia itech se tal kampa meyaya “leche uan nekti”. Dios kiniluijka: “Komo nankitakamatij tein namechnauatia […], nikchiuas maj altepet yolseujto, namotekaskej uan amo akin namechmojmoujtis” (Lev. 20:24; 26:​3, 6). Nejin mochiuak keman Salomón taixyekantoya (1 Crón. 22:9; 29:​26-28). Tein kijtoua Salmo 37:​10, 11, 29 mochiuak ne uejkauj uan no mochiuas satepan. w22.12 10 § 8

Kemej tiitatojtokakauan Cristo, moneki maj tikchiuakan tein techiluiaj itech inechikol Jehová. Biblia techiluia nejin: “Komo kuali mitsixyekanaj uelis titatanis; keman miakej tayolmajxitiaj kuali kisa teisa” (Prov. 24:​6, notas). Maj tiknemilikan keniuj techpaleuia komo tikchiuaj tein kijtoua nejin texto keman titanojnotsaj uan titamachtiaj ika Biblia. Amo tikchiuaj kemej tejuan tiknekij, ta timochikauaj tikchiuaskej tein technauatia inechikol Jehová. Kuali techixyekanaj itech nechikolmej keman tikakij tanojnotsmej uan tamachtilismej tein mokixtiaj itech Biblia tein kipanoltiaj tokniuan. Uan no, inechikol Jehová techmaka amaixmej uan videos tein kinpaleuia oksekin maj kiajsikamatikan tein kijtoua Biblia. ¡Semi tiktasojkamatij uan tikpatiuitaj nochi tein techyolmajxitia Biblia! Maj tikixtalikan nochipa tikchiuaskej tein Dios techyolmajxitia (Prov. 3:​13-17). w22.10 23 § 18, 19

Keman titakuaj techpaleuia porin techchikaua, no ijkon keman timomachtiaj iTajtol Dios uan itech titanemiliaj techpaleuia porin okachi titakuaujtamatij. Yejuatsin kineki maj kemej yeskia ika timotamakakan iTajtol, tein kijtosneki maj kuali tikajsikamatikan. Uelis tikchiuaskej nejin komo tikchiuaj netataujtil, titaixtajtoltiaj uan itech titanemiliaj. Yekinika, tikchiuaj netataujtil para uelis kuali tikseliskej tein Dios kinemilia. Ompa, tikixtajtoltiajya Biblia uan satepan itech titanemiliaj. ¿Keniuj techpaleuis nejin? Keman okachi itech titanemiliaj tein tikixtajtoltiaj, techpaleuis maj okachi tikajsikamatikan iTajtol Dios uan maj okachi titakuaujtamatikan. ¿Keyej motelneki maj tikixtajtoltikan Biblia uan maj itech titanemilikan? Porin nejon techmakas chikaualis tein techpaleuis maj tiksentokakan tikteixmatiltikan tein kichiuas iTaixyekanalis Dios. Satepan no techpaleuis keman xa monekis tiktematiltiskej ke Dios kintatsakuiltis akin amo yolkualmej. Keman okachi itech titanemiliaj ikualneskayouan Jehová, okachi kuali timouikaj iuan. w22.11 6, 7 § 16, 17

Jesús kiyeknextij ke imomachtijkauan uan oksekin kimatiskiaj akonimej yekmelauj itatojtokakauan porin motasojtaskiaj se iuan okse. Uan maski tiitaixpantijkauan Jehová yekmelauj timotasojtaj, no timopolouaj porin titajtakolejkej (1 Juan 1:8). Yejua ika, keman okachi tikinixmatij tokniuan, xa okachi tikitaj ininnepololuan (Rom. 3:23). Sayoj ke timoyolkokouaj keman tikmatij ke sekin amo kitekitiliajok Jehová porin semi kiitakej nejon nepololmej. ¿Keniuj kinextij Jesús ke kintasojtaya itatitaniluan? ¿Uan keniuj uelis tikchiuaskej kemej yejua? Akin timoauijkejya no semi moneki maj timotajtanikan nejin. Komo ijkon tikchiuaj, techpaleuis maj okachi titetasojtakan uan okachiok keman oksekin mopolouaj (Efes. 5:2). w23.03 26, 27 § 2-4

Kemej amo uejkaua ixpoliuis tein amo kuali, itech nechikol xa ipa panos seki taman, uan ijkuak monekis tiknextiskej ox yekmelauj tiktasojtaj Jehová. Yejua ika moneki maj tiknextikan ke tiyektalnamikij. Komo tiknemiliaj ke se tokniuj techchiuilij teisa tein amo kuali, maj amo tikualantokan. Komo techmelaujkej maj amo sayoj tiknemilikan ke timopinaujtijkej, ta maj tikchiuakan tein techyolmajxitiaj uan maj tikpatakan tein monekis. Uan keman itech inechikol Jehová mopatas seki taman uan mopatas tekit tein tikchiuayaj, maj titatakamatikan uan maj tikchiuakan tein techiluiaj. Xiontakuaujtamati iuan Jehová uan inechikol maski panos seki taman tein ouij. Uelis tikonchiuas komo tikonnextia ke tionyektalnamiki, tein kijtosneki ke moneki amo tionyolijsiuis, tionyektanemilis uan tikonitas teisa kemej Jehová kiita. Xikontajtani Jehová maj mitsonpaleui uan xikonsentoka xionmosentili iniuan tokniuan. Uan ijkon, maski tikonpanos tein yeski taman, Satanás amo uelis kichiuas xikonkaua Jehová uan inechikol (Sant. 4:7). w22.11 24, 25 § 14-16

Tayekananij, xikinpaleuikan tokniuan maj kimatikan toni kichiuaskej achto ke mochiuas se tetsauit. Xikitakan maj nochin tokniuan itech nechikol kimatikan toni kichiuaskej para mopaleuiskej uan para uelis namechnotsaskej. ¿Toni uelis tikonchiuas? Komo kampa ika tionnemi mochiuak se tetsauit, xikontajtani tayekananij keniuj uelis tiontapaleuis. Xa uelis tiontetaneujtis mochan para maj ompa mokauakan tokniuan akin kiskej de ininchan oso akin tapaleuiaj keman mochiua se tetsauit. Xa uelis tiontapaleuis maj motemaka tein kikuaskej uan okseki taman tein moneki. Uan komo tetsauit mochiuak uejka, no uelis tiontapaleuis. ¿Keniuj? Ininka xionmotataujti akin tajyouijtokej uan xiontapaleui ika tomin (2 Cor. 1:​8-11; 8:​2-5). Uan komo ueli tionyoui kampa mochiuak se tetsauit, xikontajtani tayekananij keniuj uelis tiontapaleuis. Uan komo mitsonyoleuaj xiontapaleuiti, xa achto mitsonmachtiskej para ijkon tiontapaleuis keman okachi monekis uan kampa okachi monekis. w22.12 24 § 8; 25 § 11, 12

Nejin kinijkuilouilijkaj tokniuan kayomej Corinto tein axkan timomachtiaj. Achto ke momachtiskiaj, sekin auilnemiaj, motekayaj iniuan inintakaikniuan uan tauanayaj (1 Cor. 6:​9-11). Satepan ke moauijkej xa monekik amo itech tanemiliskejok tein amo kuali tein achto kichiuayaj. Maski nochin yaskiaj iluikak, katkaj tajtakolejkejok. Yejua ika monekia amo itech tanemiliskejok. Nejon uelis techyolchikauas porin kinextia ke sekin no kipanouanij seki taman kemej tejuan uan uelini kiixnamikinij. Yejua ika uelis ‘semi titakuaujtamatiskej uan tikmatiskej ke nochi tokniuan no kipanotokej tein tejuan tikijyouijtokej’ (1 Ped. 5:9). w23.01 12 § 15

Kemej Jesús kimatia ke imomachtijkauan no kipanoskiaj nejon, kitajtanij Jehová maj kinyekpia (Juan 17:11). ¿Keyej techpaleuia nejon maj tiyolchikaujkej? Porin Jehová okachi chikauak ke akin yeski akin techixnamikis (1 Juan 4:4). Uan yejua kiitstok nochi. Senkis tikmatij ke komo titakuaujtamatij iuan Jehová, tiknextiskej ke tiyolchikaujkej. ¿Kemansa tionpinaua tikoniluis akin iniuan tionmomachtia oso akin iniuan tiontekiti ke tionitaixpantijkauj Jehová? ¿Tikonmouilia tionpeuas tiontanojnotsas uan tionmoauis? Amo xikonkaua maj tein oksekin kijtoskej mitsontsakuili xikonchiua nejon. Xikontataujti Jehová maj mitsonpaleui uan maj mitsonyolchikaua para tikonchiuas itanejnekilis. Keman tikonitas ke yejua kinankilia monetataujtiluan, okachi tionmoyolchikauas uan amo tionmouis (Is. 41:​10, 13). w23.01 29 § 12; 30 § 14

Jesús kintajtanij fariseos ox amo kiitakaj tein kijtouaya Tajkuilolamatsin, ika nejin kinextij ke fariseos taixtajtoltiayaj sayoj para taijijtoskej (Mat. 12:​1-7). Nejon tonal, fariseos kijtojkej ke imomachtijkauan Jesús amo kitakamatiaj tanauatil tein ixyetoya itech tonal sábado. Jesús kinnankilij ika ome taman tein kijtouaj amatajkuilolmej uan ika se versículo tein kipia Oseas, ijkon kinextij ke fariseos amo teikneliayaj uan amo kiajsikamatiaj keyej moixtalijka nejon tanauatil. Maski yejuan kiixtajtoltiayaj iTajtol Dios, amo kinpaleuiaya. ¿Keyej? Porin moueyimatiaj uan sayoj kinekiaj taijijtoskej. Kemej amo kuali tanemiliayaj amo kiajsikamatiaj tein kiixtajtoltiayaj (Mat. 23:23; Juan 5:​39, 40). Itech Mateo 19:​4-6 tikonitas keman Jesús no kintajtanij fariseos ox amo kiitakaj tein kijtouaya Tajkuilolamatsin. Maski fariseos kimatiaj keniuj Dios kichijchiuak nochi, amo kitakamatiaj tein Dios kiixtalijka para se takat uan isiuatsin. Tein Jesús kijtoj techmachtia ke keman tikixtajtoltiskej Biblia moneki tiktemoskej maj techpaleui. Maj amo tikchiuakan kemej fariseos, ta maj tiyolyemankej uan maj tikauakan maj Jehová techmachti. w23.02 12 § 12, 13

Jehová kinnauatij israelitas seki taman tein kinpaleuiskia maj amo mokokokan keman yetoyaj ininkalijtik oso keman tekititoyaj (Éx. 21:​28, 29; Deut. 22:8). Komo aksa kimiktiaya okse maski amo kinekia, semi amo kuali tein kipanouaya (Deut. 19:​4, 5). Tanauatil no kijtouaya ke monekia kitatsakuiltiskej akin kikokouaya se konetsin akin ayamo yolia, maski amo kinekia kikokos (Éx. 21:​22, 23). Biblia kinextia ke Jehová kineki maj semi timoyekpiakan para amo timokokoskej. Tiknextiaj ke tiktasojkamatij maj Dios techmaka tonemilis keman tikchiuaj tein techpaleuis maj amo timokokokan tokalijtik oso kampa titekitij. Xa uelis tiktaliskej teisa tein tenej, pajti uan okseki taman tein tepajuia kampa amo maajsiskej konemej. Uan keman tiktamotaskej nejon, amo tikchiuaskej kemej kinijtakos oksekin. No timoyekpiaj keman tikchiuaj tit, keman tikmolontiaj at uan keman tikuij teposmej de electricidad, uan keman tikuitokej amo ompa titakaujteuaj. Uan komo titayitokej pajti tein uelis kichiuas maj amo tiyekijsatokan, komo titayikej tein teuintij oso timokochijsolouanij, amo tiknejnemiltiaj totepos. Amo no tikuij teléfono keman titanejnemiltijtokej. w23.02 21, 22 § 7-9

Jehová amo yolijsiui, kualtakat, teajsikamati uan nochipa kiita tein kuali tein kichiuaj akin kinmachtia (Sal. 130:3). Amo keman techtajtania maj tikchiuakan tein amo tiueliskej. Maj tikelnamikikan ke yejuatsin kichijchiuak totsontekon, se kualtsin netetayokolil (Sal. 139:14). Uan no, kineki maj tiksentokakan timomachtikan uan maj techyolpakti. Yejua ika desde axkan moneki ‘tiktelnejnekiskej’ okachi timomachtiskej iTajtol Dios (1 Ped. 2:2). ¿Toni uelis mitsonpaleuis? Xionmomachti uan xikonixtajtolti Biblia mojmostaj uan xikonixtali seki taman tein uelis tikonchiuas (Jos. 1:8). Jehová mitsonpaleuis maj mitsonyolpakti tikonixtajtoltis Biblia uan okachi tikonixmatis. Amo sayoj tiktemouaj tikmatiskej miak taman keman timomachtiaj, ta no tiknekij okachi tikixmatiskej Jehová, tiktasojtaskej uan iuan titakuaujtamatiskej (1 Cor. 8:​1-3). Xikonsentoka okachi xikonixmati Jehová uan nochipa xikontajtani maj mitsonpaleui okachi xiontakuaujtamati (Luc. 17:5). Yejuatsin kichiuas tein tikontajtanis. w23.03 10 § 11, 13

¿Toni monekia kichiujtoskej itatojtokakauan Jesús keman kichixtoyaj maj ixpoliuini Jerusalén uan templo? Jesús kinnauatij imomachtijkauan maj kichiujtonij se tekit. Maj kiteixmatiltianij kuali tanauatilmej “ompa Jerusalén, itech nochi Judea uan Samaria, uan itech nochi taltikpak” (Hech. 1:​6-8). Maski nejin katka se ueyi tekit, kuali kikuitoskiaj inintiempo komo nochipa tanojnotsaskiaj. Para timotachilijtoskej, moneki tikitaskej keniuj tikuitokej totiempo. Kemej kijtoua Eclesiastés 9:​11, tinochin uelis techpanos ‘tein amo tikchiayaj’. Hasta uelis ijsiujka timomikiliskej. Kuali tikuitokej totiempo komo tikchiujtokej tein Jehová kineki uan timochikaujtokej okachi kuali timouikaskej iuan (Juan 14:21). Moneki tikchiuaskej nejin tein Biblia tayolmajxitia: “Xiksentokakan xiyekijkatokan, amo ximotsinkixtikan uan nochipa xikchiujtokan itekiuj toTekotsin” (1 Cor. 15:58). Komo tikchiuaj nejin, maski timomikiliskej oso ejkosya tonal keman ixpoliuis tein amo kuali, amo timoyolkokoskej porin kuali tikuikej totiempo para tiktekitiliskej Jehová (Mat. 24:13; Rom. 14:8). w23.02 18 § 12-14