Enero

Tetatmej semi yolpakij keman yoli ininkonetsin. Yejuan semi kiuelitaj keniuj moita ininkonetsin keman tsikitsinok, sayoj ke no kinekij maj moskalti. Uan komo amo moskaltiskia semi motekipachoskiaj. No ijkon, Jehová semi yolpaki keman kiita ke tikixmatij, sayoj ke yejua kineki maj tiksentokakan okachi kuali tikixmatikan (1 Cor. 3:1). Uan kichia maj tikchiuakan tein techpaleuis maj okachi iuan titakuaujtamatikan. Keman itech 1 Corintios 14:20 kijtoua “akin moskaltijya” no kijtosneki “akin semi takuaujtamati”, “amo teyi kipoloua” uan “ajsitok” (1 Cor. 2:6). Ijkon kemej se konetsin kisentoka moskaltia, tejuan no moneki tiksentokaskej tikchiuaskej tein techpaleuis maj kuali timouikakan iuan Jehová, nejon techpaleuis maj kuali titaixejekokan (1 Tim. 4:15). w24.04 2 § 1, 3

Komo mitsoniluiskiaj keniuj tikonita Jehová, xa tikonijtoskia: “Jehová notasojikniuj, noTajtsin uan noDios”. Oso xa tikonijtoskia okseki taman kemej kinotsaj. Sayoj ke ¿tikonijtoskia ke yejua mitsonselijya ichan? Tekiuaj David kijtoj ke Jehová kemej yeskia aksa akin kuali kinselia akin mokauaj ichan. Yejua kijtoj: “Jehová noDios, ¿akoni uelis mokauas mochan? ¿Akoni uelis nemis itech tepet tein tikijitak?” (Sal. 15:1). Nejin tajtolmej kinextiaj ke tinochin uelis tietoskej ichan Jehová, tein kijtosneki ke uelis kuali iuan timouikaskej. Jehová yetoya iselti hasta ke kichijchiuak iKonetsin. Yejua akin yekinika kemej yeskia kalakik ichan Jehová, uan yejuatsin semi kiuelitak kiselis. Biblia kijtoua ke Jehová kiteltasojtaya iKonetsin uan ke Jesús no semi ‘yolpakia nochipa yetos iixpan’ (Prov. 8:30). w24.06 2 § 1-3

Xikonnemili ke mosentilijkej panoua 340 mil para kiixtaliskej David kemej tekiuaj ompa Israel. Eyi tonal takamej mokaujkej itech tepetsitsin tein amo uejka yetokej de Hebrón, mouetskitiaj, monojnotsaj uan mokuikatiaj para kiueyichiuaskej Jehová (1 Crón. 12:39). Ompa yetok se telpoch akin monotsa Sadoc, miakej xa amo kiitaj. Sayoj ke Jehová kiitak uan kinekia maj tikmatikan ke ompa yetoya (1 Crón. 12:​22, 26, 27). Sadoc katka se tiopixkat akin iuan tekitia tayekankatiopixkat Abiatar. No katka tamatkej uan kiajsikamatia tein Jehová kinekia porin yejuatsin kipaleuiaya (2 Sam. 15:27). No semi yolchikauak katka. Axkan, Satanás okachi kitemoua maj amo titakuaujtamatikanok iuan Jehová (1 Ped. 5:8). Yejua ika, moneki tiyeskij tiyolchikaujkej para titaxikoskej hasta maj Jehová kiixpolo Satanás uan nochi tein kiixyekana (Sal. 31:24). Keman tikchiuaskej, tiknextiskej ke tiyolchikaujkej kemej Sadoc. w24.07 2 § 1-3

Keman Jehová kinchijchiuak Adán uan Eva, kinekia maj yolpakikan. Yejua ika kinkauak maj nemikan kampa takualtsinkan, kinnamiktij uan kinnauatij maj momiakilianij uan maj itech nochi taltikpak kichiuanij se xochital kemej katka ompa Edén. Sayoj kinnauatij maj amo kichiuanij se taman uan kinnejmachtij ke komo amo kitakamatiaj momikiliskiaj. Uan tikmatijya ke se ángel akin amo tetasojta nion kitasojta Dios kinkajkayauak Adán uan Eva para maj amo kitakamatinijok yejuatsin. Yejuan kichiujkej tein nejon ángel kiniluij porin tajtakolchiujkej uan amo takuaujtamatkej iuan ininTajtsin akin semi kintasojtaya, ijkon mochiuak tein Jehová kijtojka. Kemej amo tatakamatkej, Adán uan Eva tajyouijkej hasta ke ueuentsintiakej uan momikilijkej (Gén. 1:​28, 29; 2:​8, 9, 16-18; 3:​1-6, 17-19, 24). w24.08 3 § 3

Jehová uan Jesús kinekij maj tiyolpakikan. Salmo 119:2 kijtoj: “Yolpakij akin kitakamatij tein tanauatia, akin kitemouaj ika nochi ininyolo”. Uan Jesús no kijtoj: “¡Yolpakij akin kikakij itajtol Dios uan kichiuaj!” (Luc. 11:28). Tiitekitikauan Jehová tiyolpakij porin nochipa tikixtajtoltiaj Biblia uan timochikauaj tikchiuaskej tein ompa timomachtiaj (Sant. 1:​22-25). Keman tikchiuaj tein timomachtiaj tikyolpaktiaj Jehová (Ecl. 12:13). Uan no, keman tikchiuaj tein Biblia tayolmajxitia techpaleuia maj okachi kuali timouikakan iniuan tochankauan uan iniuan tokniuan. Uan no, amo tikpiaj ouijkayomej kemej tein kipiaj akin amo kitakamatij Jehová. Keman tekiuaj David mokuikatij satepan ke ika tajtoj itanauatiluan Jehová uan tein kichiua keman tetatsakuiltia, kijtoj: “Se kitakamatis teualkuilia se ueyi taxtauil” (Sal. 19:​7-11). w24.09 2 § 1-3

Jehová kiita nochi tein kinpanoua itekitikauan. Kiita keman tiyolpakij uan keman timotayokoltiaj (Sal. 37:18). Semi tikyolpaktiaj keman kiita ke timochikauaj tiktekitiliskej maski semi timotekipachojtokej. Uan amo sayoj nejon, ta no kineki techyolseuis uan techpaleuis. Keman Salmo 147:3 ininka tajtoua “akin tayokoxtokej”, kijtoua ke Jehová “kitetsiloua ika tasal kampa takojkokolmej”. Nejin texto kijtoua keniuj Jehová kualtsin kemej kinyekpia akin motayokoltijtokej. ¿Toni moneki tikchiuaskej para maj techpaleui nochi tein Jehová toka kichiua? Maj tiknemilikan nejin: komo aksa motelkokoj, uelis kiitatiuj se kuali tapajtijkej. Sayoj ke para pajtis moneki kichiuas nochi tein kiluia tapajtijkej. Jehová kinnojnotsa akin moyolkokojtokej itechkopa iTajtol uan kinyolmajxitia. w24.10 6 § 1, 2

¿Toni kinpanos akin Jehová kinixpoloj porin amo yolmelaujkej katkaj, ijkon kemej akin nemiaj Sodoma uan Gomorra? Achto moijtojka ke yejuan amo oksepa nemiskiaj. Biblia no ininka tajtoua oksekin akin Jehová kinixpoloj porin amo yolmelaujkej katkaj. Kemej ijkuak momikilijkej nochin akin nemiaj itech taltikpak porin tetsaujkakiouik, uan sayoj momakixtijkej Noé uan ichankauan. Satepan, Jehová kinnauatij israelitas maj kinixpolouanij nochin akin nemiaj itech chikome xolalmej tein moajsiaj itech tal tein motenkaujka kinmakas. Uan no keman kichiuak maj se ángel kinmiktiani 185 mil soldados asirios itech sayoj se youal (Deut. 7:​2, 3; Is. 37:​36, 37). Biblia amo kiyekijtoua ke Jehová senkis kinixpolojya uan ke amo keman oksepa nemiskej. Maski tikmatij ke Jehová kinsenixpoloj, amo tikmatij keniuj kinitaya sejsemej uan ox uelik kiixmatkej yejuatsin uan moyolpatakej. w24.05 3 § 5-7

Jesús ika tajtoj se siuatsin akin amo kipiayaok itakatsin akin kiitato se juez para maj kipaleui porin kichiuiliayaj tein amo kuali. Imomachtijkauan Jesús kuali kiajsikamatiaj nejon siuatsin porin itech nejon tonalmej miakej kinchiuiliayaj tein amo kuali (Luc. 18:​1-5). Tejuan no ueli tikajsikamatij keniuj momachiliaya porin tinochin kemansa no techchiuiliaj tein amo kuali. Axkan miakej techikoitaj, kinchiuiliaj tein amo kuali oksekin uan kiixnejnekij tein amo ininaxka. Kemej miakej kichiuaj nejin, tikmatij ke no uelis techchiuiliskej tein amo kuali (Ecl. 5:8). Sayoj ke xa okachi techyolkokos keman se tokniuj techchiuilis nejon. Maski tikmatij ke tokniuan amo kiixnamikij tamachtilis tein melauak, yejuan tajtakolejkej uan kemansa no uelis techchiuiliskej tein amo kuali. Sayoj ke tein Jesús kichiuak keman kitajyouiltijkej akin kiixnamikiaj uelis techmachtis miak taman. Komo timochikauaj tikintapojpoluiskej akin techixnamikij keman techchiuiliaj tein amo kuali, ¿ueliskia no ijkon tikchiuaskej iniuan tokniuan? w24.11 2 § 1, 2

Pantsin yejua tein okachi kikuayaj ne uejkauj (Gén. 14:18; Luc. 4:4). Kemej semi kikuayaj, Biblia kijtoua ke kemej yeskia katka inintakual (Mat. 6:11). Jesús ojpa kikuik pantsin para kichiuas milagros (Mat. 16:​9, 10). Semej de nejon ome milagros tein moajsi itech Juan capítulo 6. Tatitanilmej yajkaj tanojnotsatoj uan matankajya. Jesús iniuan kipanauij mar de Galilea itech barco uan kinuikak amo uejka de Betsaida para ueliskia moseuiskej (Mar. 6:​7, 30-32; Luc. 9:10). Sayoj ke miakej kimatkej ke Jesús ompa yetoya uan niman kiitatoj. Uan yejua amo kinixtopeuak, ta kiniknelij uan peuak kinnojnotsa de iTaixyekanalis Dios uan kinpajtij akin mokokouayaj. Kemej tiotakya katka, tatitanilmej motajtaniayaj keniuj takuaskiaj nochin akin ompa yetoyaj. Sekin xa kiuikayaj tepitsin takual, sayoj ke miakej monekia yaskej okseko uan kikouaskej (Mat. 14:15). w24.12 2 § 1, 2

Yekinika totatuan, Adán uan Eva amo katkaj tajtakolejkej uan nemiaj itech se xochital (Gén. 1:27; 2:​7-9). Yejuan ueliskia nemiskej nochipaya uan yolpakiskej sayoj ke kichiujkej tein amo kuali. Adán uan Eva tajtakolchiujkej, yejua ika Jehová kinkixtij de xochital Edén uan amo ueliskiaok nemiskej nochipaya. ¿Toni kinkauilijteujkej ininkoneuan? Biblia techiluia: “Tajtakol kalakik nikan taltikpak itechkopa se takat [Adán] uan tajtakol kichiuak maj se miki, uan ijkon nochin momikilijtiajkej, porin nochin motajtakolmakakej” (Rom. 5:12). Adán techkauilijteuak tajtakol uan yejua ika timomikiliaj. Nejon tajtakol kemej yeskia tel miak titauikaskiaj uan amo keman uelis titaxtauaskej (Sal. 49:8). Biblia kijtoua ke totajtakoluan tamatij kemej ijkuak ‘timotauikaltiaj’ (Mat. 6:12; Luc. 11:4). Keman titajtakolchiuaj, kemej yeskia timotauikaltiaj iuan Jehová. Yejua ika komo amo akin techpaleuiskia, sayoj ueliskia tikixtauaskej keman timikiskiaj (Rom. 6:7). w25.02 2, 3 § 2, 3

Se ueyi tatiochiualis maj tikinnojnotsakan nochin de iTaixyekanalis Dios. Nejin amo nochin ueli kichiuaj. Keman Jesús yetoya nikan taltikpak amo kikauak maj amokuali ejekamej kiteixmatiltianij ke yejua katka Cristo (Luc. 4:41). Itech totonaluan para maj aksa ueli tanojnotsa iniuan itaixpantijkauan Jehová moneki kichiujtos tein yejuatsin kiyolpaktia. ¿Keniuj tiknextiaj ke tikpatiuitaj maj ueli titanojnotsakan? Komo titanojnotsaj kampa yeski uan keman yeski. Ijkon kemej Jesús, tejuan no tikchiuaj tein tiuelij para tikinnojnotsaskej oksekin uan tikinmachtiskej (Mat. 13:​3, 23; 1 Cor. 3:6). Inechikol Jehová no kichiua kemej yejua porin mochikaua nochin kinixmatiltis itokay Dios. Se taman tein kikui para kichiuas yejua Traducción del Nuevo Mundo, tein moajsi itech 270 tataman tajtolmej. w24.04 9 § 8, 9

Seki takamej akin semi yolpakij iniuan ininsiuatsin, nochipa kitemouaj kinnextiliskej ke semi kintasojtaj (1 Juan 3:18). Se tokniuj takat uelis kinextilis isiuatsin ke kitasojta ika seki taman tein amo ouij, kemej kimakitskis oso kinauas. Xa no uelis kitajkuilouilis uan kiluis “Nimitstemoua” oso “¿Keniuj tietok?”. Kemansa uelis kijkuilouilis se amatsin kampa kiluis ke semi kitasojta. Keman se takat kichiua nejin, kinextia ke kipatiuita isiuatsin uan okachi kuali mouikaj. Se takat kipatiuita isiuatsin keman kiluia keyej kitasojkamatilia uan keman kichiua maj kuali momachili. Xa keman nochipa kitasojkamatilia isiuatsin porin semi kipaleuia (Col. 3:15). Keman se takat kiluia isiuatsin keyej kitasojta, yejua kuali momachilia, kimati ke kitasojtaj uan kipatiuitaj. w25.01 11 § 15; 13 § 16

Kampa tami Salmo capítulo 15, kijtoua nejin: “Akin kichiua nejin amo teyi kipanos”. Ika nejin tajtolmej, salmista kijtoua ke Jehová kineki maj tikchiuakan tein axkan timomachtijkej para maj tiyolpakikan. Keman tikchiuaj tein Dios kineki, tiyolpakij uan yejuatsin techyekpias. Akin nemij kampa kemej yeskia ichan Jehová uan amo keman kikauaj, kiseliskej miak taman tein kuali amo uejkaua. Taijitalmej nemiskej ne iluikak, kampa Jesús kintachijchiuij (Juan 14:2). Uan nochin oksekin akin kichiuaj kemej Cristo semi yolpakiskej keman nemiskej nikan taltikpak uan kiseliskej tein kijtoua Apocalipsis 21:3. ¡Semi tiktasojkamatiliaj Jehová porin techyoleua maj nochipa tinemikan kampa kemej yeskia ichan! (Sal. 15:​1-5). w24.06 13 § 19, 20

Biblia kinextia ke Jehová se Dios akin semi ueyi. Tepitsin satepan ke kinmakixtij israelitas de Egipto kampa semi kintekitiltiayaj, kichiuak teisa para kinextis ke yejua semi ueyi. Maj itech titanemilikan nejin: millones de israelitas senyetokej itsintan tepet Sinaí para kikakiskej tein Dios kiniluiskia. Uan itech nochi tepet tel tamixtemik, semi talolinik uan tatileuik. Peua semi tatitikuini, tapepetani uan mokaki ke chikauak tapitsaj (Éx. 19:​16-18; 24:17; Sal. 68:8). Keman panok nejin, israelitas xa semi kimojkaitakej keman Jehová kinextij ke yejua semi ueyi. Axkan, tejuan no tikueyitaliaj Jehová keman tikintapouiaj oksekin chikaualis tein kipia uan keniuj tamati. No ijkon tikchiuaj keman tikueyitaliaj porin techpaleuia maj tikchiuakan seki tekimej (Is. 26:12). w25.01 2 § 2, 3

Keman israelitas yajtoyaj para ajsiskej itech tal tein Jehová motenkaujka kinmakas, seki takamej ueyichiuanimej kiixnamikkej Moisés uan tanauatil tein Jehová kinmakaka. Yejuan kijtojkej: “Nochi xolal [amo sayoj Moisés] yektik, uan Jehová iniuan yetok” (Núm. 16:​1-3). Maski Jehová kiitaya ke “nochi xolal” katka yektik yejua kiixpejpenka Moisés para maj kiixyekana ixolal. Yejua ika, keman kijijtojkej Moisés tein melauj kijijtojtoyaj Jehová. Amo kinemilijkej toni kinekia Jehová ta sayoj kinemiliayaj tein yejuan kinejnekiaj: kitemouayaj yejuan taixyekanaskej uan maj miakej kinixmatinij. Jehová kinixpoloj israelitas akin kiixnamikiaj uan akin kinixyekanayaj (Núm. 16:​30-35, 41, 49). Axkan Jehová no kinixtopeua akin amo kitakamatij tein inechikol tanauatia. w24.07 11 § 11

Tinemij itech tonalmej kampa miakej amo kineltokaj ke tamitiya nochi tein amo kuali uan hasta techkejkelouaj porin tikneltokaj ke yekmelauj mochiuati (2 Ped. 3:​3, 4). Maski miak taman amo tikmatij, moneki senkis titakuaujtamatiskej ke Jehová kiixtalijya kemanian tamis nochi tein amo kuali uan tikneltokaskej ke yejuatsin techyekpias. Tejuan no moneki okachi titakuaujtamatiskej ke Jehová kiixtalij “takeual takuaujtamach uan tamatkej” para maj techixyekana (Mat. 24:45). Tejuan xa no techiluiskej toni monekis tikchiuaskej para timakisaskej keman peuas tetsaujkatajyouilis. Axkan okachi moneki titakuaujtamatiskej iniuan akin kiixyekanaj inechikol Jehová. Komo axkan amo titatakamatij uan amo iniuan titakuaujtamatij, xa ouij techkisas tikintakamatiskej keman mochiujtos tetsaujkatajyouilis. w24.09 11 § 11, 12

Namokoneuan amo takuaujtamatiskej iuan Dios sayoj porin namejuan nantakuaujtamatij. Yejua ika uelis motajtaniskej nejin: “¿Keniuj nikmati ke nemi Dios? ¿Uelis nikneltokas tein kijtoua Biblia?”. Biblia techyoleua maj tikuikan ‘totanemilil’ uan maj ‘tikyekitakan nochi’ (Rom. 12:1; 1 Tes. 5:21). Sayoj ke, ¿keniuj uelis nankinpaleuiskej namokoneuan maj okachi takuaujtamatikan? Xikonpaleui mokonetsin maj kiita ke melauak tein tikneltokaj. Keman namokoneuan kinekiskej kimatiskej teisa, xikinpaleuikan maj ininselti kitemokan tanankililmej itech amaixmej kemej Nepaleuil tein ika momachtiaj itaixpantijkauan Jiova. Yejuan uelis kitemoskej kampa kijtoua “Biblia” uan itech taxelol “Moijkuiloj ika inepaleuil Dios” kampa kinextia ke Biblia amo sayoj kijkuilojkej takamej, ta “itajtol Dios” (1 Tes. 2:13). w24.12 14, 15 § 4, 5

¿Keniuj tokniuan tayekananij uelis kichiuaskej kemej Jesús? Moneki kinmachtiskej tokniuan takamej hasta akin okachi telpochmejok maj kichiuakan seki tekimej itech nechikol. Tayekananij moneki kiajsikamatiskej ke nejon tokniuan monekiok momachtiskej kichiuaskej okseki taman. Yejuan moneki maj kinyolmajxitikan tokniuan telpochmej para maj mochiuakan okachi yolyemankej, takuaujtamachmej, uan maj kinekikan kinpaleuiskej oksekin (1 Tim. 3:1; 1 Ped. 5:5). Jesús amo sayoj kinnauatij imomachtijkauan maj tanojnotsanij, ta no maj tamachtianij. Xa yejuan kinemiliayaj ke amo ueliskia kichiuaskej nochi nejon tekit. Sayoj ke Jesús kimatia ke kemaj ueliskiaj uan kemej kinekia maj kimatikan, kiniluij: “Ijkon kemej noTajtsin nechualtitanik nejua, nejua no namechtitani namejuan” (Juan 20:21). w24.10 16 § 15; 17 § 17

David katka se kuali tekiuaj. Yejua tatsotsonaya, tateuiaya, katka tajkuilojkej uan tanauatijkej. Uan no kipiak miak ouijkayomej. Miak xiujmej cholojtinemia porin tekiuaj Saúl kinekia kimiktis. Uan keman tekiuajtitoyaya, David oksepa monekik mocholtis para maj iokichpil Absalón amo kimiktiani porin yejua kinekia mochiuas tekiuaj. Maski David kipiak nejon ouijkayomej uan mopoloj, amo keman kikauak Jehová hasta keman momikilij. Jehová kijtoj ke David kiyolpaktiaya, yejua ika semi techpaleuis komo tikakij tein tayolmajxitij David (1 Rey. 15:5). Maj tikitakan tein tekiuaj David kiluij Salomón akin satepan mochiuaskia tekiuaj. Jehová kiixtalij Salomón maj kichijchiua se templo kampa ueliskia kiueyichiuaskej yejuatsin (1 Crón. 22:5). Kemej mochiuaskia miak tekit, monekia maj Jehová kipaleui Salomón para kiixyekanas ixolal. Maj tikitakan tein David kiyolmajxitij. David kiluij iokichpil ke komo kitakamatia Jehová kuali taixyekanaskia uan yejuatsin kitatiochiuiskia. ¿Toni kiluij David? (1 Rey. 2:​2, 3). w24.11 10 § 9-11

Uan no, se takat akin kiteuia isiuatsin oso kiyolkokoua ika tein kiluia, moneki kichiuas seki taman para uelis oksepa kuali iuan mouikas uan no iuan Jehová. ¿Toni moneki kichiuas? Se, moneki kiajsikamatis ke amo kuali tein kichiua. Jehová kikaki nochi tein kijtoua uan kiita tein kichiua (Sal. 44:21; Ecl. 12:14; Heb. 4:13). Ome, amo moneki kisentokas kitajyouiltis isiuatsin uan kipatas tein kichiua (Prov. 28:13). Eyi, moneki kiluis isiuatsin uan no Jehová ke tel amo kuali tein kichiuak uan kintajtanis maj kitapojpoluikan (Hech. 3:19). Moneki kitataujtis Jehová maj kipaleui para kipatas tein kinemilia, tein kijtoua uan tein kichiua, uan maj kineki mopatas (Sal. 51:​10-12; 2 Cor. 10:5; Filip. 2:13). Naui, moneki kichiuas ijkon kemej motataujtia uan kiixtopeuas tein yeski tateuilis uan amo kijtosok tein teyolkokoj (Sal. 97:10). Makuil, moneki niman kitemos maj kipaleuikan tayekananij itech nechikol (Sant. 5:​14-16). Uan chikuasen, kiixtalis toni kichiuas para maj amo oksepa kiyolkoko isiuatsin. w25.01 11 § 14

¿Tikontasojta Jehová, akin mitsonmakani nochi tein tikonpia, uan hasta kichiua xionyolto? ¿Tikonneki tikonnextilis ke tikontasojta? Uelis ijkon tikonchiuas komo iuan tionmotemaktia uan tionmoauia. Keman tikonchiuas nejon, peuas tionpouis iniuan ichankauan Jehová. Ijkon, moTajtsin uan motasojikniuj mitsonixyekanas uan mitsonyekpias porin yeski tiiaxka (Sal. 73:24; Is. 43:​1, 2). Uan no, komo tionmotemaktia iuan Dios uan tionmoauia uelis tikonchias tionnemis nochipaya (1 Ped. 3:21). Xa teisa kichiujtok amo xionmoaui, komo ijkon amo xionmotekipacho porin amo sayoj tejuatsin ijkon mitsonpanouani. Tel miakej akin moauijkejya no monekik kipataskej miak taman tein kichiuayaj uan tein kinemiliayaj uan axkan kuali kitekitilijtokej Jehová uan yolpakij. w25.03 2 § 1, 2

Biblia kijtoua ke totajtakoluan tamatij kemej teisa tein etik. Tekiuaj David kijtoj: “Nonepololuan nechkuasioujtijkejya, kemej se tamamal tel etik tein amo nikxikouaok” (Sal. 38:4). Sayoj ke Salmo 25:18 uan 32:5 kijtoua ke Jehová “kintapojpoluia” akin yekmelauj moyolpataj. Itech nejin versículos tajtol “kintapojpoluia” itech hebreo kijtosneki “kiajokui” oso “kiuika”. Yejua ika keman Jehová techtapojpoluilia totajtakoluan, amo timoyolkokojtokejok porin kemej yeskia techkuiliskia teisa tein tikechpanojtokej tein tel etik. ¿Uan kani kiuika Jehová totajtakoluan? Itech Salmo 103:12 ika tajtoua okse taman tein techpaleuia maj tikmatikan, kijtoua: “Uejka kitalij totajtakoluan, ijkon kemej ueuejka moajsij tonalkisayampa uan tonalkalakyampa”. Kampa ualkisa tonaltsin keman tanesi amo ompa pankalaki keman tapoyaui. Tel ueuejka moajsij kampa ualkisa uan kampa pankalaki. Yejua ika nejin versículo technextilia ke keman Jehová techtapojpoluia kemej yeskia tel uejka kinuika totajtakoluan, tein kinextia ke senkis techtapojpoluia. w25.02 9 § 5, 6

Satepan ke yejua mokepak iluikak, tatitanil Pedro kipajtij ika se milagro se takat akin yolik metskoxoj (Hech. 1:​8, 9; 3:​2, 6-8). Miakej kiitakej nejin milagro uan mosentilijkej kampa yetoya Pedro (Hech. 3:11). Sayoj ke yejua amo kinekia maj kiueyitalianij maski kampa moskaltijka miakej kinemiliayaj ke monekia maj kintelixmatikan. Yejua kinextij ke katka yolyemanik uan kiniluij maj kiueyitalianij Jehová uan Jesús keman kijtoj: “Itokaykopa Jesús uan porin itech titakuaujtamatij, metschijchikauayak nejin takat akin namejuan nankiitaj uan nankiixmatij” (Hech. 3:​12-16). Ijkon kemej Pedro, tejuan no uelis tiyeskij tiyolyemankej. Tikinpaleuiaj oksekin amo porin tiknekij maj techueyitalikan, ta porin tikintasojtaj uan no Jehová. Tiknextiaj ke tiyolyemankej keman tiyolpakij tiktekitiliskej Jehová uan tikinpaleuiaj tokniuan maski oksekin amo kiitaskej tein tikchiuaj (Mat. 6:​1-4). w25.03 10, 11 § 11, 12

Okachi tiyolpakiskej titanojnotsaskej komo okachi tiktasojtaj Jehová uan oksekin (Mat. 22:​37-39). Maj tiknemilikan keniuj yolpaki Jehová keman kiita ke tiksentokaj titanojnotsaj, uan keniuj yolpakij akin peua momachtiaj Biblia. Uan amo xikonelkaua ke akin techkakiskej uelis momakixtiskej (Juan 6:40). ¿Uan komo tejuatsin amo ueli tionkisaok? Xikonchiua tein kemaj tionueli para tikonnextilis Jehová ke tikontasojta yejua uan no oksekin. Keman mochiujtoya kokolis COVID-19, Samuel uan Dania monekik mokauaskej ininchan. Ijkuak monekik tanojnotsaskej ika teléfono, kijkuiloskej cartas uan tamachtiskej ika Zoom. Samuel uan Dania yolpakiaj maski amo ueliaj kichiuayaj miak taman. w24.04 18 § 15, 16

Maski amo moneki timonamiktiskej para tiyolpakiskej, miakej tokniuan takamej uan siuamej akin kipiaj tataman xiujmej kinekij monamiktiskej. Sayoj ke achto ke timonamiktis, moneki kuali iuan timouikas Jehová, tikmatis keniuj timoixpanoltis uan amo xitelpiliok para kuali titaixejekos (1 Cor. 7:36). No kuali maj se tikmatis keniuj tikneki maj tamati akin iuan timonamiktis. Komo amo ijkon tikchiua xa uelis peuas tikixmatis aksa akin amo kuali iuan timouikas uan xa tikixtopeuas se kuali tokniuj akin ueliskia iuan timonamiktis. Sayoj ke xikelnamiki ke moneki yeski se tokniuj akin moauijya (1 Cor. 7:39). Sayoj ke nejon amo kijtosneki ke uelis iuan timonamiktis akin yeski akin moauijya. Kuali yetok komo timotajtania nejin: “¿Toni nikneki nikchiuas? ¿Keniuj nikneki maj tamati akin iuan nimonamiktis? ¿Taixejekol tein nikneki?”. w24.05 20 § 1; 21 § 3

Kemej novios, ¿toni uelis nankichiuaskej komo amo namoajsikamatij? Komo kemansa tataman kemej nantanemiliaj, ¿kijtosneki nejon ke amo uelis namoyekuikaskej? Amo, porin se takat uan se siuat tataman kemej tanemiliaj. Komo omen kinekij kuali mouikaskej keman monamiktiskej, moneki mopoujkaitaskej uan mochikauaskej moajsikamatiskej. Tein nankichiuaskej keman nankipiaskej kuejmolmej kinextis keniuj namouikaskej keman namonamiktiskejya. Ximotajtanikan: “¿Tiyolseujtokej uan timopoujkaitaj keman timonojnotsaj? ¿Niman tikijtouaj ke timopolojkej uan timochikauaj amo tikchiuaskejok? ¿Tiyolyemankej, niman titajtanij maj techtapojpoluikan uan titetapojpoluiaj?” (Efes. 4:31). Sayoj ke, komo amo namoajsikamatij uan nochipa namokualantiaj keman nannovios, amo xiknemilikan ke nankiyektaliskej kuejmolmej keman namonamiktiskejya. Komo tikita ke amo kuali namouikaskej, okachi kuali yeskia para nanomen komo amo nannoviosok. w24.05 29 § 12

Komo nochipa tiktakamatij Jehová uan timoixyekanaj ika tein Biblia kijtoua, tikinpaleuiskej oksekin maj no ijkon kichiuakan. Komo timomachtiaj iTajtol Dios uan okachi iuan titakuaujtamatij, amo keman tikauaskej Jehová uan nochipa tiktakamatiskej. Nejon no techpaleuis maj amo tikneltokakan tein tamachtiaj akin amo kitekitiliaj Jehová uan maj amo no timoixyekanakan ika tein kinemiliaj (Efes. 4:14; Sant. 1:​6-8). Uan no uelis tikinpaleuiskej akin xa kipiaskej ouijkayomej (1 Tes. 3:​2, 3). Tayekananij moneki kuali kiixejekoskej tein kichiuaskej, yektalnamiktoskej, amo kitemoskej maj nochipa mochiua tein kinemiliaj uan kichiuaskej nochi ijkon kemej moneki. Keman yejuan ‘kikuij tajtolmej tein takuaujtamachmej’, kinpaleuiaj tokniuan maj amo semi motekipachokan uan maj okachi takuaujtamatikan iuan Jehová (Tito 1:9; 1 Tim. 3:​1-3). Keman tayekananij kinyolchikauaj tokniuan, youij nechikolmej, tanojnotsaj uan momachtiaj, tokniuan kiitaj uan kinpaleuia maj yejuan no ijkon kichiuakan. Keman tokniuan kipiaj se ouijkayot ten kichiua maj semi motekipachokan, tayekananij kinpaleuiaj maj takuaujtamatikan iuan Jehová uan maj tanemilikan itech tein motenkaua kichiuas. w24.06 31 § 16-18

Keman Jesús yetoya nikan taltikpak tamachtij ke iTajtsin semi kineki tetapojpoluis keman se tajtakolchiua uan kimelauak nejin keman ika tajtoj se tepopaj uan iokichpil akin poliujtoya. Nejon okichpil kinemilij kisas de ichan uan kichiuas tein tel amo kuali. Sayoj ke satepan oksepa peuak “yektanemilia” uan mokepak. ¿Toni kichiuak itat? Jesús kijtoj ke “keman ajsitiayaya, itat kiuejkaitak [...]. Tsikuinteuak kinamikito, kinauaj uan kimakak se beso porin semi kitasojtaya”. Telpoch yaya kiluiti ipopaj maj kikaua maj kitekitili. Sayoj ke ipopaj semi kinekia kitapojpoluis uan oksepa kiselij kemej ikoneuj, kijtoj: “Nookichpiltsin [...] poliujtoya uan mokepakya” (Luc. 15:​11-32). Achto ke Jesús ualaskia nikan taltikpak, xa kiitak keniuj Jehová kinikneliaya akin tajtakolchiuayaj uan moyolpatayaj. Tein Jesús kitetapouij semi teyolseuia uan kinextia ke toTajtsin Jehová semi teiknelia. w24.08 11 § 11, 12

¿Toni kijtosneki maj ‘kuali se talnamikto’ oso maj kuali se taixejeko? Komo kuali titaixejekouaj, tiknemiliskej keniuj kiita Jehová tein tiknekij tikixpejpenaskej. No tikitaskej ke okachi moneki maj kuali timouikakan iuan Jehová ke tikchiuaskej okseki taman. Komo kuali titaixejekouaj, amo tiknemiliskej ke okachi tiueyichiuanimej ke oksekin, nion tiknemiliskej ke amo akin moneki techmachtis teisa. Uan no tiktemoskej maj Jehová techpaleui keman tiktataujtiskej maj techixyekana. Moneki nochipa tiktajtaniskej maj techixyekana maski tiknemiliskej ke seki taman tiuelijya toselti. Moneki tikiluiskej Jehová maj techpaleui, okachiok keman moneki tikixpejpenaskej teisa tein motelneki porin tikmatij ke sayoj yejua kimati toni okachi techpaleuis. Jehová techchijchiuak kemej uelis titanemiliskej kemej yejua, kemej uelis tiyeskij tiyolyemankej uan kuali titaixejekoskej (Gén. 1:26). Tikmatij ke amo uelis tikchiuaskej senkis kemej Jehová (Is. 55:9). w25.03 11 § 13; 13 § 17, 18

Amo xikonnemili ke amo motasojkamatij. Komo tikpaleuiaj aksa uan amo techtasojkamatilia, uelis timotajtaniskej: “¿Yekmelauj amo kipatiuita tein nikchiuak oso sayoj kielkauak uan amo nechtasojkamatilij?”. Oso xa kipanotok okse taman uan yejua ika amo kichiuak. Xa kemaj motasojkamati, sayoj ke amo kimati keniuj kichiuas. Xa pinaua maj kipaleuikan porin xa achto yejua kinpaleuiaya oksekin uan axkan amo ueliok. Sayoj ke komo yekmelauj tikintasojtaj tokniuan amo tiknemiliskej tein amo kuali de yejuan uan tiksentokaskej tikinpaleuiskej (Efes. 4:2). Amo xionyolijsiui. Se tonal tekiuaj Salomón kijtoj: “Xiktamota mopantsin itech at, porin satepan ke panoskej miak tonalmej oksepa tikajsis” (Ecl. 11:1). Nejin tajtolmej techmachtiaj ke sekin xa techtasojkamatiliskej satepan ke “panoskej miak tonalmej”. w24.09 30 § 18, 19

Kemansa kitematiltiaj itech nechikol keman kimelauaj aksa. Keman ijkon panoua uelis tiksentokaskej iuan timouikaskej nejon tokniuj porin tikmatij ke moyolpatakya uan amo tajtakolchiuaok. Yejua kisentoka poui itech nechikol uan moneki maj tokniuan kiyolchikauakan para kisentokas kichiuas tein kuali (Heb. 10:​24, 25). Sayoj ke amo ijkon tikchiuaj keman kikalankixtiaj aksa de nechikol, porin amo iuan timouikajok nion iuan titakuajok (1 Cor. 5:11). ¿Kijtosneki nejin ke senkis tikixtopeuaskej? Amo. Tikmatij ke amo iuan timouikaskiaj nion uejkauak iuan tietoskiaj. Sayoj ke tisejsemej tikmatij toni tikchiuaskej uan tein timomachtianij itech Biblia techpaleuis maj tikmatikan ox tikyoleuaskej maj youi nechikol aksa akin kikalankixtijkej, xa se tochankauj oso aksa akin katka totasojikniuj. w24.08 30 § 13, 14