Febrero

Tokniuan takamej akin kichiuaj tein Biblia kijtoua semi tapaleuiaj itech nechikol. Tokniuj takat akin ‘amo kitemoua maj nochipa mochiua tein kinemilia’ kinpaleuia oksekin maj yolseujkanemikan. Komo tejuatsin amo tikontemoua maj nochipa mochiua tein tikonnemilia, tikonkakis tein oksekin kijtouaj uan tikonajsikamatis. Keman tionmonechikos iniuan tayekananij, ¿tikonpaleuis maj mochiua tein yejuan kiixtaliaj komo amo kitapanauilia tein kijtoua Biblia? Se tayekankej ‘amo moneki moueyimatis’. Nejin kijtosneki ke amo moneki kitemos maj mochiua nochipa tein yejua kineki, ta kiajsikamati ke moneki kikakis tein oksekin kinemiliaj (Gén. 13:​8, 9; Prov. 15:22). Amo moneki “motajtolteuis” nion ‘niman kualanis’. Nejin kijtosneki ke kinpoujkaita oksekin uan amo motajtolteuia, ta yolkuali iniuan. Kemej yolseujkanemi mochikauas nochipa kuali mouikas iniuan oksekin hasta keman kipias se ueyi kuejmol (Sant. 3:​17, 18). Kemej tajtoua kinextia ke kualtakat uan nejon kinpaleuia oksekin maj yolseujtokan hasta akin techixnamikij (Juec. 8:​1-3; Prov. 25:15; Mat. 5:​23, 24). w24.11 23 § 13

Cristo “sayoj sepa momikilij [...] uan amo kemanok monekis momikilis”, sayoj ke yejua kisentokani techpaleuiani hasta axkan (Rom. 6:10). Uan kisentoka tekiti para techmakas miak taman tein kuali porin toka momikilij. Xikonnemili nochi tein kichiua kemej Tekiuaj, Tayekankatiopixkat uan kemej taixyekankej itech nechikol (1 Cor. 15:25; Efes. 5:23; Heb. 2:17). Yejua moneki kinsentilis nochin taijitalmej uan no akin nemiskej nikan taltikpak, uan nejin kichiuas achto ke tamis tetsaujkatajyouilis (Mat. 25:32). Jesús no techmaka nochi tein moneki para tiksentokaskej tiktekitiliskej Jehová itech nejin tonalmej keman tatamitiya (Mat. 24:45). Uan keman tekiuajtitos mil xiujmej kisentokas techpaleuis. Keman Jehová kitemakak iKonetsin, amo sayoj kichiuak para maj toka momikiliani, ta no para techpaleuis ika okseki taman. w25.01 24 § 12

Keman Jehová techtapojpoluia kemej yeskia amo keman titajtakolchiuaskiaj, uan amo no kitemojtos techtatsakuiltis satepan. Nejin techpaleuia maj kuali iuan timouikakan toTajtsin. Sayoj ke moneki tikelnamikiskej ke Jehová techtapojpoluia porin techtasojta uan yolkuali, uan amo porin tejuan timotaniliaj, uan amo no uelis tikchikaujkauiskej maj ijkon kichiua. ¡Semi tiktasojkamatiliaj Jehová maj techtapojpolui! (Sal. 130:4; Rom. 4:8). Sayoj ke komo tiknekij maj Jehová ‘yekmelauj techtapojpolui’ moneki tikakiskej tein Jesús tanejmachtij: “Komo amo nankintapojpoluiaj oksekin, namoTajtsin amo no namechtapojpoluis” (Mat. 6:​14, 15). Yejua ika, semi moneki maj titetapojpoluikan kemej Jehová kichiua. w25.02 13 § 18, 19

Maj tikitakan toni kinpanos akin nemiaj Sodoma uan Gomorra. Tikmatij ke ompa Sodoma nemia Lot, akin kichiuaya tein kuali. Sayoj ke amo tikmatij ox kinnojnotsak nochin akin ompa nemiaj. Yejuan amo yolkualmej katkaj, sayoj ke ¿yekmelauj nochin kimatiaj toni kuali yetok uan toni amo? Nesi ke amo porin Biblia kijtoua ke miakej takamej akin nemiaj Sodoma, kinekiaj iniuan auilnemiskej akin kikalpanotoj Lot. Ompa no yetoyaj miakej akin telpochmejok katkaj uan yejuan xa amo kiajsikamatiaj ke tel amo kuali tein kichiuayaj (Gén. 19:4; 2 Ped. 2:7). ¿Uelis tikijtoskej ke Jehová akin semi teiknelia kiixtalij maj nion akin oksepa nemi? Jehová kiluij Abrahán ke itech nejon xolal amo moajsiaj nion majtakti akin katkaj yolmelaujkej (Gén. 18:32). Yejuan amo katkaj yolmelaujkej uan Jehová kichiuak tein kuali porin kinixpoloj. Sayoj ke, ¿ueli tikijtouaj ke nion semej de yejuan oksepa nemis keman oksepa nemiskej akin amo yolmelaujkej? Amo tikmatij. w24.05 2 § 3; 3 § 8

Kemej axkan okachi onkak tatsojtilis, sekin kiselianij seki tekimej kampa moneki yetoskej uejka de ininchankauan, sayoj ke satepan kiitaj ke okachi kuali maj amo yanij. Yejua ika, achto ke tikonselis se tekit, amo sayoj xikonita kanachi mitsontaxtauiskej, ta no ox mitsonpaleuis xikonsentoka kuali xionmouika iuan Jehová (Luc. 14:28). Xionmotajtani nejin: “Komo uejka nietok, ¿uelis niksentokas kuali nimouikas iuan notakatsin oso nosiuatsin? ¿Uelis nias nochi nechikolmej, nitanojnotsatiuj uan nietos iniuan tokniuan?”. Komo tikonpia mokoneuan, moneki xionmotajtani nejin: “¿Uelis nikinpaleuis nokoneuan maj kuali mouikakan iuan Jehová uan maj kitakamatikan komo amo iniuan nietok?” (Efes. 6:4). Keman tikonitas toni tikonchiuas, xikonita keniuj tanemilia Dios, uan amo xikonchiua tein kijtouaj mochankauan oso motasojikniuan akin amo kichiuaj tein kijtoua Biblia. w25.03 29 § 12

Akin amo kuali taixejekouaj uelis niman kinneltokiliskej “akin kimatij keniuj tekajkayauaskej”. Xa niman kineltokaskej nochi tein techijtouiliaj akin takajkayauaj uan tein kijtouaj akin kiixnamikij tamachtilis tein melauak. Xa no tenexikoluiaj, kiuelitaj takuejmolchiuaskej, niman kualanij oso amo taxikouaj uan niman tajtakolchiuaj (1 Cor. 3:3). Biblia kijtoua ke keman aksa amo kuali taixejekoua tamati kemej ijkuak aksa yolik moskaltia (Efes. 4:15). Se konetsin amo kimati miak taman. Yejua ika moneki maj kiyekpiakan. Kemej keman moneki panoskej itech se ojti kampa panouaj miak carros, se temomaj xa kiluis isiuapiltsin maj kimakitski. Xa ijkon kemej moskaltijtiuj, imomaj uelis kikauas maj pano iselti, maski ijkon nochipa kiluia maj kuali motachili. Keman siuapil moskaltiaya ueli panouaya iselti porin kimatia ke moneki moyekpias. No ijkon, tokniuan akin kuali taixejekouaj tanemiliaj itech seki textos para kiitaskej toni kinemilia Jehová de seki taman uan ijkon kuali taixpejpenaskej. w24.04 3 § 5, 6

Miak xiujmej, sayoj akin nemiaj ne iluikak ueliaj mouikayaj iuan Dios. Sayoj ke satepan, no kinyoleuak sekin akin nemiaj nikan taltikpak para maj yetonij ichan. Sekin akin kuali iuan mouikakej katkaj Enoc, Noé, Abrahán uan Job. Biblia kijtoua ke sejsemej kuali mouikakej iuan Dios oso ke ‘kichiujkej tein toTajtsin Dios kinekia’ (Gén. 5:24; 6:9; Job 29:4; Is. 41:8). Miak xiujmejya, Jehová kisentokani kinyoleuani oksekin maj no yetokan ichan (Ezeq. 37:​26, 27). Tein kijtoj Ezequiel techmachtia ke Dios semi kineki maj itekitikauan kuali mouikakan iuan. Jehová motenkauak iniuan “ke nochipa yolseujtoskiaj”. Nejin mochiuaskia keman taijitalmej uan akin nemiskej nikan taltikpak ‘senyetoskiaj’ uan kuali mouikaskiaj itech ichan Jehová (Juan 10:16). Uan yejua nejon tein panotok axkan. w24.06 2 § 2, 4; 3 § 5

Akin tiktekitiliaj Jehová moneki tiyeskij tiyolchikaujkej para tiktayekanaltiskej iTaixyekanalis Dios (Mat. 6:33). Kemej axkan semi mochiua tein amo kuali, moneki maj tiyolchikaujkej para tikchiuaskej tein Jehová technauatia uan para titanojnotsaskej. Axkan miakej amo kuali mouikaj porin kinpaleuiaj tataman políticos, yejua ika moneki maj tiyolchikaujkej para amo tikpaleuiskej nion se (Juan 18:36). Uan no, miakej itekitikauan Jehová amo kipiaj miak tomin, kinmaganij oso kintsakuanij porin amo mokalakiaj itech política oso porin amo mochiuaj soldados. Semi techyolchikaua keman tiknemiliaj tein kichiujkej itekitikauan Jehová para kipaleuiskej iTaixyekanalis. Keman Jesucristo nemia nikan taltikpak kampa Satanás taixyekana, amo mokalakij itech política (Mat. 4:​8-11; Juan 6:​14, 15). Nochipa takuaujtamatik ke Jehová kiyolchikauaskia. w24.07 3 § 4; 4 § 7

Tel amo kualtsin tein panok, sayoj ke Jehová kichiuak maj moijkuilo itech Biblia para techmachtis teisa tein motelneki, nejin techpaleuia maj tikajsikamatikan keyej Jehová semi kitauelita tajtakol. Tajtakol amo techpaleuia maj kuali iuan timouikakan toTajtsin uan no timomikiliaj (Is. 59:2). Satanás semi kitauelita Jehová uan tejuan no, yejua ika kichiuak maj Adán uan Eva tajtakolchiuanij uan hasta axkan kisentoka kitemoua maj no titajtakolchiuakan. Yejua ika keman Adán uan Eva tajtakolchiujkej, Satanás xa kinemilij ke Jehová amo ueliskiaok kichiuas tein kiixtalijka. Sayoj ke amo senkis kiajsikamatia keniuj Jehová semi tetasojta. Dios amo keman kipatak kemej kinekia maj nemikan ikoneuan Adán uan Eva. Yejuatsin techtasojta tinochin uan yejua ika niman kitemoj techpaleuis (Rom. 8:​20, 21). Jehová kimatia ke sekin kitasojtaskiaj uan kitemoskiaj kitakamatiskej. Yejua ika kichiuak maj ueli iuan motokikan uan kinmakixtij den tajtakol uan mikilis. w24.08 3 § 3, 4

Tiitekitikauan Jehová tikpiaj miak tekit. Moneki titekitiskej para timotekipanoskej uan tikintekipanoskej tochankauan (1 Tim. 5:8). Miakej tokniuan kinyekpiaj ininchankauan akin mokokouaj oso akin xiuejkejya. Uan tinochin moneki timoyekpiaskej para maj tipaktokan. Uan no, moneki tikchiuaskej seki taman tein semi moneki, kemej tikteixmatiltiskej kuali tanauatilmej. Tiitekitikauan Jehová tikitaj ke semi “tayekantok” maj tikixtajtoltikan Biblia, yejua ika moneki timochikauaskej ijkon tikchiuaskej. Amatajkuilol Salmos kijtoua ke yolpaki takat akin “kitakamati itanauatil Jehová, tonayan uan youak kiixtajtoltia itanauatil uan itech tanemilia” (Sal. 1:​1, 2). Nejon kijtosneki ke semi moneki maj tikxelokan tiempo para tikixtajtoltiskej Biblia. Sayoj ke, ¿toni hora kuali yeskia maj tikixtajtoltikan? Tejuan tikmatij toni hora okachi tiuelij. Sayoj ke semi moneki maj tikixtalikan se hora keman yekmelauj tiueliskej. w24.09 3 § 5, 6

¿Akin kuali taixejekouaj monekiok maj kinpaleuikan kemansa? Kemaj. Ta kemansa moneki maj kinpaleuikan. Akin amo kuali taixejekoua kichia maj oksekin kiixpejpenakan tein kichiuas oso maj kiluikan tein moneki kichiuas. Sayoj ke se tokniuj akin kuali taixejekoua kikaki tein kiluiaj tokniuan akin yekyolmajsitokej, sayoj ke yejua moneki kiixtalis toni kichiuas. Ijkon kemej tinochin titatamamej, tokniuan akin kuali taixejekouaj no tatamamej. Sekin kinextiaj ke tamatinij, sekin ke yolchikaujkej, sekin ke kualtakamej uan oksekin ke teajsikamatij. Uan no, xa kemansa ome tokniuan akin kuali taixejekouaj, tataman tein kiixtaliskej kichiuaskej, okachi keman moneki kiixpejpenaskej teisa tein oksekin amo kuali kiitaj. Uan xa tein kiixtalis kichiuas sejse tokniuj amo kitapanauilis itanauatiluan Jehová. Yejua ika, amo moijijtoskej komo tataman tein kiixpejpenkej kichiuaskej, ta mochikauaskej kuali mouikaskej (Rom. 14:10; 1 Cor. 1:10). w24.04 4 § 7, 8

¿Toni uelis tikchiuas komo tiknemilijtok ke amo teyi tichiujkej? Xikixtajtolti textos tein mitsmatiltiaj ke Jehová mitspatiuita uan itech xitanemili. Komo amo tiuelik tikchiuak tein tikixtalijka oso amo ueli tikchiua tein oksekin kichiuaj, amo ximosenkaua nion itech xitanemili tein amo ueli tikchiua. Jehová amo kichia xikchiua tein amo tiueli (Sal. 103:​13, 14). Komo mitschiuilijkaj tein amo kuali oso moka mauiltijkaj, amo xiknemili ke motajtakol tein mitspanok. Amo tejua motajtakol uan amo monekia maj ijkon mitschiuilikan. Xikelnamiki ke Jehová kinmelauas akin kinchiuiliaj tein amo kuali oksekin. Sayoj ke kinpaleuia akin ininka mauiltiaj (1 Ped. 3:12). Xikelnamiki ke Jehová uelis kichiuas xikinpaleui oksekin. Yejuatsin mitskaua iuan xitekiti keman titanojnotsa (1 Cor. 3:9). Kemej tikpiani ouijkayomej uelis okachi tikinajsikamatis akin tajyouijtokej. w24.10 7, 8 § 6, 7

Jehová amo kiuelita maj techchiuilikan tein amo kuali uan kiita keman ijkon techchiuiliaj. “Jehová kiuelita maj mochiua tein kuali yetok”. Jesús kijtoj ke Dios “kiitas maj nimantsin kinpaleuikan” itekitikauan keman monekis. Uan amo uejkaua kiixpolos tein techtajyouiltia uan amo kikauas maj techchiuilikanok tein amo kuali (Sal. 72:​1, 2). Moneki timochiaskej hasta maj Jehová kiixpolo nochi tein techtajyouiltia, maski ijkon yejuatsin techpaleuia maj tikmatikan toni moneki tikchiuaskej keman techchiuiliskej tein amo kuali (2 Ped. 3:13). Techmachtia toni moneki tikchiuaskej para amo timokuejmolkalakiskej keman techtajyouiltiaj. Uan no, tein Jesús kichiuak uelis semi techpaleuis. Jehová no techyolmajxitia itech Biblia tein uelis tikchiuaskej keman techchiuiliskej tein amo kuali. w24.11 2, 3 § 3, 4

Nejin tein kijtoj Jesús ouij katka porin ompa yetoyaj kemej makuil mil takamej, uan xa ajsiaj kemej 15 mil iniuan siuamej uan konemej (Mat. 14:21). Andrés kijtoj: “Nikan yetok se okichpiltsin akin kipia makuil pantsin tachijchiuj ika cebada uan ome pescadojtsitsin. Sayoj ke amo kinajsis nochin” (Juan 6:9). Pantsin tachijchiuj ika cebada amo patioj katka uan miakej kichijchiuayaj, uan pescadojtsitsin xa katka poyek uan tauatsmej. Maski ijkon, amo ajsiskia para kintamakaskej nochin. Kemej Jesús kinekia maj kuali momachilikan kiniluij maj motajtalikan itech sakat (Mar. 6:​39, 40; Juan 6:​11-13). Biblia kijtoua ke Jesús kitasojkamatilij iTajtsin porin kipiayaj pantsin uan pescadojtsitsin. Keman kichiuak nejin kinextij ke Jehová yejua akin kinmakatoya toni kikuaskej uan ke motasojkamatia. Nejin techelnamiktia ke moneki tikchiuaskej kemej Jesús uan timotataujtiskej achto ke titakuaskej. Satepan, Jesús kichiuak maj moxelouani takual uan takuajkej uan nochin ixuikej. w24.12 2, 3 § 3, 4

Keman Jesús yetoya nikan taltikpak, kiueyitalij iTajtsin porin nochipa kiniluiaya oksekin ke Dios kimakaya chikaualis para kichiuas milagros (Mar. 5:​18-20). No kiueyitaliaya keman kuali ika tajtouaya Jehová uan keman katka kualtakat iniuan oksekin. Se tonal, Jesús tamachtijtoya kampa taueyichiuayaj judíos, uan ompa yetoya se siuatsin akin 18 xiujmejya semi kitajyouiltijtoya se amokuali ejekat, yejua ika semi pantomotstik katka uan amo uelia momelauaya. Jesús semi kiiknelij nejon siuatsin akin semi tajyouijtoya, yejua ika kiluij: “Siuatsin, nimitspajtijya”. Satepan itech kitalij imay uan nimantsin momelauak uan “peuak kiueyitalia Dios” (Luc. 13:​10-13). Kemej nejon siuatsin pajtik, semi kinekik kiueyitalis Jehová, uan tejuan no tiknekij ijkon tikchiuaskej. w25.01 2, 3 § 3, 4

Toselti amo uelis tikchiuaskej nion teyi para oksepa tikpiaskej tein Adán uan Eva kipolojkej (Sal. 49:​7-9). Komo amo akin techpaleuiskia, amo ueliskia tikchiaskej tinemiskej nochipaya nion no ueliskia oksepa tinemiskej komo timomikiliaj. Tonemilis tamiskia ijkon kemej kinpanoua tapialmej (Ecl. 3:19; 2 Ped. 2:12). ToTajtsin Jehová akin semi techtasojta techtayokolij teisa tein kiixtaua tajtakol tein techkauilij Adán. Jesús ijkon kimelauak: “Dios semi kintasojtak akin nemij nikan taltikpak, yejua ika kitemakak iKoneuj akin yojtsin uan ijkon akin itech takuaujtamatis amo ixpoliuis, ta nemis nochipaya” (Juan 3:16). Tein Jehová techtayokolij no techpaleuia maj kuali iuan timouikakan. Uelis techpaleuis tein Jehová techtayokolij para techtapojpoluis totajtakoluan. w25.02 3 § 3-6

¿Toni kipaleuij Saulo maj ueli moaui? Keman Jesús kiualnojnotsak desde iluikak, se tanex kiixmiktij Saulo (Hech. 9:​3-9). Eyi tonalmej amo kikuaj nion teyi, uan xa itech tanemilijtoya tein kipanok. Kineltokak ke Jesús katka Mesías uan ke taneltokalis tein melauak yejuan akin kichiuayaj kemej Cristo. Tein kichiuak Saulo techmachtia miak taman. Yejua amo moauiskia komo moueyimatiskia oso mouiskia. Sayoj ke amo kichiuak nejon. Yejua kiixtalij kitojtokas Cristo maski kimatia ke kitajyouiltiskiaj (Hech. 9:​15, 16; 20:​22, 23). Satepan ke moauij, kisentokak takuaujtamatik iuan Jehová keman kiixnamikik miak taman tein amo kuali (2 Cor. 4:​7-10). Keman tejuatsin tionmoauis para tionmochiuas itaixpantijkauj Jehová, xa mitsontajyouiltiskej oso mitsonixnamikiskej, sayoj ke amo tionyetos moselti. Jehová uan Jesús nochipa mitsonpaleuiskej (Filip. 4:13). w25.03 4 § 8, 9

Kuali yetok maj tikixtalikan tikixtajtoltiskej Biblia. Sayoj ke, komo tiknekij maj techpaleui tein tikixtajtoltiaj moneki tikchiuaskej okseki taman. Maj itech titanemilikan nejin. Kiouit semi kinpaleuia xiujtsitsin, sayoj ke komo tel kioui niman taapexoni uan nejin amo kinpaleuiaok xiujtsitsin, yejua ika okachi kuali keman mixkioui porin at kalaki itech tal uan tapaleuia maj xiujtsitsin moskaltikan. No ijkon amo moneki ijsiujka tikixtajtoltiskej Biblia porin xa niman tikelkauaskej, amo teyi tikelnamikiskej uan amo tikchiuaskej tein timomachtiaj (Sant. 1:24). Xikonnemili ke keman tikonixtajtoltijtok Biblia tikonita ke ijsiujka tikonchiujtok. ¿Toni uelis tikonchiuas? Okachi yolik xiontaixtajtolti para uelis itech tiontanemilis, oso satepan ke tionmatamisya xikonxelo tiempo para itech tiontanemilis. Uelis tikonixtalis okachi tiempo para tionmomachtis uan itech tiontanemilis. w24.09 4 § 7-9

Keman kuali kiixtajtoltiaj tein kinnauatiaj uan kitakamatij. Tayekananij kinnauatiaj keniuj moneki mopanoltiskej seki tamachtilismej itech nechikol uan keniuj mochiuaskej netataujtilmej, uan no kiniluiaj keniuj moneki kinyekpiaskej tokniuan. Keman tayekananij kitakamatij nochi tanauatilmej tein kinmaka inechikol Jehová, tokniuan kimachiliaj ke Jehová kintasojta uan kinyekpia. Keman tayekananij technauatiskej maj tikchiuakan teisa, tejuan moneki tikchiuaskej. Ijkon tikinpaleuiskej maj kuali kichiuakan inintekiuj. Biblia kijtoua maj tikintakamatikan uan maj timokauakan maj techyekanakan (Heb. 13:​7, 17). Xa ouij tikchiuaskej nejon porin tayekananij no tajtakolejkej. Sayoj ke maj tikelnamikikan ke komo nochipa tikitaj ininnepololuan uan amo tein kuali tein kichiuaj, tikchiujtoskej tein kinekij akin techtauelitaj. ¿Keyej tikijtouaj nejin? Porin komo amo kuali tikinitaj tayekananij, kichiuas maj amo titakuaujtamatikanok itech inechikol Dios. w24.04 10 § 11, 12

¿Toni kinpanos akin mikiskej keman mochiujtos tetsaujkatajyouilis? ¿Ixpoliuiskej nochipaya uan amo uelis oksepa nemiskej? Biblia kijtoua ke akin kiixnamikiskej Jehová, yejua uan iángeles kinixpoloskej itech Armagedón uan amo oksepa nemiskej (2 Tes. 1:​6-10). Sayoj ke, ¿toni kinpanos akin mikiskej keman mochiujtos tetsaujkatajyouilis porin xiuejkejya yeskij, kokoxkakuiskej, kinpanos teisa oso aksa kinmiktis? (Ecl. 9:11; Zac. 14:13). ¿No yeskij semej “akin amo yolmelaujkej” akin oksepa nemiskej itech xochital? (Hech. 24:15). Tein melauj, amo tikmatij. Onkak miak taman tein kemaj tikmatij ke panos satepan. Tikmattokej ke itech Armagedón nochin kiseliskej tein kinnamiki komo achto kinextijkej ke kinpaleuijkej iikniuan Cristo oso amo (Mat. 25:40). Akin kinextiskej ke kinpaleuijkej taijitalmej uan Cristo kinitaskej kemej ichkamej (Apoc. 12:17). w24.05 10, 11 § 9-11

Biblia kijtoj ke tein mochiuaskia axkan ‘semi ouij yeskia uan tamouilil’ (2 Tim. 3:1). Kampa yeski kipiaj ouijkayomej, sayoj ke okachiok itekitikauan Dios porin kinixnamikij uan kintajyouiltiaj. ¿Toni techpaleuis maj tiksentokakan tikueyichiuakan Jehová? Se taman yejua komo tikelnamikij ke Jehová yejua “Dios akin nochipa yoltok” (Jer. 10:10; 2 Tim. 1:12). Jehová kiita nochi ouijkayomej tein tikpiaj uan kitemoua nochipa techpaleuis (2 Crón. 16:9; Sal. 23:4). Komo tikitaj ke Jehová yejua Dios akin nochipa yoltok techpaleuis maj tikxikokan tein yeski ouijkayot. w24.06 20 § 1, 2

Miak taman techpaleuia maj titakuaujtamatikan itech inechikol Jehová. Keman akin kiixyekanaj nechikol kiitaj ke moneki mopatas kemej tikajsikamatiaj se tamachtilis de Biblia oso maj mopata seki taman, niman kichiuaj. Uan kichiuaj nejin porin kinekij kiyolpaktiskej Jehová. Uan no, mochikauaj moixyekanaskej ika tein kijtoua Biblia keman kiixtaliaj teisa. Nochin tiitekitikauan Jehová moneki ijkon tikchiuaskej. Tatitanil Pablo tayolmajxiti: “Nochipa xikelnamikto kuali tajtolmej tein ipa ixyetokya” (2 Tim. 1:13). ¿Toni “tajtolmej tein ipa ixyetokya”? Yejua tein tamachtia Biblia (Juan 17:17). Nochi tein tikneltokaj yejua tein Biblia tamachtia. Inechikol Jehová techmachtiani maj tikyekitakan ke nochi tein tikneltokaj yejua tein tamachtia Biblia. Komo nochipa ijkon tikchiuaj kuali tietoskej. w24.07 11, 12 § 12, 13

Tatitanil Pedro kimatia keniuj se momachilia keman se moyolpata uan keman tetapojpoluiaj. Yejua ika kinmachtij oksekin tein yejua momachtijka. Satepan, itech iluit tein monotsa Pentecostés, Pedro kiniluij miakej judíos ke yejuan kimiktijkaj Mesías, kinyolchikauak uan kiniluij: “Yejua ika, ximoyolpatakan uan ximokepakan iuan Dios para maj namechtapojpoluili namotajtakoluan, uan ijkon Jehová namechyolseuis” (Hech. 3:​14, 15, 17, 19). Pedro tamachtij ke akin tajtakolchiua uan moyolpata oksepa mokepa iuan Dios, nejin kijtosneki amo kinemiliaok tein amo kuali, amo kichiuaok tein amo kuali uan peua kichiua tein Dios kiyolpaktia. Tatitanil no kinextij ke Jehová kintajpojpoluiskia uan kemej yeskia senkis kiixpoloskia tajtakol. Semi kualtsin timomachiliaj keman tikmatij ke Jehová ueli senkis techtapojpoluia keman timoyolpataj, uan ijkon kichiua maski kemansa titeltajtakolchiuaj. w24.08 12 § 14

Komo titakuaujtamatij ke amo uejkaua Jehová kiixpolos tein amo kuali, techpaleuis maj amo tiknemilikan ke moneki tikpiaskej miak taman uan tomin. Keman peuas tetsaujkatajyouilis, tomin amo techpaleuis. Biblia kijtoua ke miakej “kitamotaskej ininplata itech ojti” keman kiitaskej ke “nion ininplata nion ininoro uelis kinmakixtis itech iueyi tonal Jehová” (Ezeq. 7:19). Amo moneki sayoj tiknemilijtoskej keniuj tiktaniskej okachi tomin, ta moneki tikixtaliskej tikchiuaskej tein techpaleuis maj timotekipanokan, maj tikintekipanokan tochankauan, uan maj ueli tiktekitilikan Jehová. Amo no moneki timotajtauikaltiskej oso nochipa timotekipachojtoskej keniuj tikyekpiaskej nochi tein tikpiaj. Amo no moneki sayoj tiktayekanaltiskej tein tikpiaj (Mat. 6:​19, 24). Amo uejkaua ixpoliuis nochi tein amo kuali, yejua ika monekis tiknextiskej ox titakuaujtamatij iuan Jehová oso itech tein tikpiaj. w24.09 11 § 13, 14

Xa seki taman tein techyoltilanaya amo tikchiuajok, sayoj ke okseki taman xa techouijmakaok tikixtopeuaskej. Yejua nejon kipanok tatitanil Pedro porin kinmouilij oksekin. Yejua expa kijtoj ke amo kiixmatia Jesús (Mat. 26:​69-75). Satepan Pedro amo mouikok porin kiteixmatiltij akoni katka Jesús ininixpan Uejueyi Tamelauanij. Moitaya ke amo kinmouiliayaok oksekin (Hech. 5:​27-29). Sayoj ke seki xiujmej satepan, peuak amo iniuan takuaok tokniuan akin amo katkaj judíos porin “kinmouiliaya judíos” (Gál. 2:​11, 12). Pedro oksepa peuak moui, uan amo tikmatij ox kemansa amo mouikok. Ijkon kemej Pedro, xa kemansa oksepa tikchiuaskej tein tiknemiliayaj ke amo keman tikchiuaskiajok. Komo tiknejnekijok tikchiuaskej tein amo kuali, ¿toni techpaleuis maj amo titajtakolchiuakan? Maj ‘tiijsatokan’ ijkon kemej tayolmajxitij Jesús (Mat. 26:41). Maski tikonnemilis ke amo keman tikonchiuasok teisa tein amo kuali, xikonsentoka xionmoyekpia para amo tiontajtakolchiuas. Xikonsentoka xikonchiua tein ipa mitsonpaleuiani (2 Ped. 3:14). w24.07 18, 19 § 17-19

Amo akin semi kinpaleuiani oksekin ijkon kemej Jesús kichiuani. Keman yetoya nikan taltikpak, kikuik ichikaualis uan kichiuak milagros para kinpaleuis miakej (Luc. 9:​12-17). Uan techmakak tein okachi kipia ipatiuj keman motemakak maj kimiktikan (Juan 15:13). Uan satepan ke oksepa nemik kisentoka techpaleuia. Uan ijkon kemej Jesús motenkaujka kichiuas, kitajtaniani Jehová maj ika ichikaualis techyolseui uan maj techmachti (Juan 14:​16, 17). Uan no, itech nechikolmej Jesús techmachtia keniuj titamachtiskej noyampa uan tikinchiuaskej imomachtijkauan (Mat. 28:​18-20). Tatitanil Pablo kijkuiloj ke keman Jesús yajki iluikak, “kintemakateuj [takamej] kemej tatiochiualismej” (Efes. 4:​7, 8). Yejua kimelauak ke Jesús kinixtalij nejin takamej para maj kichiuakan tataman tekimej itech nechikol (Efes. 1:​22, 23; 4:​11-13). Maski ijkon, yejuan no tajtakolejkej uan mopolouaj (Sant. 3:2). Sayoj ke Jesús kichiua maj nejin takamej akin kemej yeskia tatiochiualismej techpaleuikan. w24.10 18 § 1, 2

David kiluijka Salomón ke kuali kisaskia nochi tein kichiuaya komo kitakamatia Jehová. Sayoj ke, keman Salomón xiuejya katka peuak kinueyichiua tatadiosmej. Jehová amo kiuelitak tein kichiuak Salomón, yejua ika amo kipaleuijok maj mochiua tamatkej para kuali kiixyekanas ixolal (1 Rey. 11:​9, 10; 12:4). ¿Toni techmachtia? Keman tiktakamatij Jehová yejuatsin techtatiochiuia uan techpaleuia (Sal. 1:​1-3). Jehová amo motenkaua ke kichiuas maj tikpiakan miak tomin oso maj semi techixmatikan kemej Salomón. Sayoj ke komo tiktakamatij, techixyekanas uan techpaleuis maj kuali titaixpejpenakan (Prov. 2:​6, 7; Sant. 1:5). Tein Jehová techyolmajxitia uelis techpaleuis maj kuali tikixpejpenakan toni tekit tikchiuaskej, ox tiksentokaskej okachi timomachtiskej, ox tiktayekanaltiskej tiktaniskej miak tomin uan toni ika timoixpetaniskej. Komo tikchiuaj tein techyolmajxitia techpaleuis maj tiksentokakan kuali iuan timouikakan uan maj tinemikan nochipaya (Prov. 2:​10, 11). Tikinpiaskej totasojikniuan akin techpaleuiskej uan uelis tiyolpakiskej iniuan tochankauan. w24.11 10, 11 § 11, 12

Xikontemo kemanian uelis tikonnojnotsas mokonetsin den Biblia uan keyej uelis titakuaujtamatiskej iuan Dios. Uelis ijkon tikonchiuas keman nanyaskej nantachiatiuij se museo. Keman nankiitaskej tein panok ne uejkauj uan tein ika tajtoua Biblia, kinpaleuis mokoneuan maj okachi kineltokakan ke Biblia kijtoua tein melauak. ¿Kimatij mokoneuan ke itokay Dios ixnesi itech se tet tein moixmati kemej piedra moabita uan kayot 3 mil xiujmejya? Uan nejin no ika tajtoua itech video “La Biblia y el nombre divino” tein kinextiaj itech ueyi kali kampa techixyekanaj ompa Warwick (Nueva York). Nejin tet moabita kijtoua ke tekiuaj Mesá de Moab kinixnamikik israelitas. Uan Biblia no kijtoua nejon (2 Rey. 3:​4, 5). Keman mokonetsin kiitas ke Biblia kijtoua tein melauak, okachi takuaujtamatis iuan Jehová. w24.12 14 § 4; 15 § 6