Diciembre

Imomachtijkauan Jesús kineltokayaj tein kijtoua iTajtol Dios uan mochikauayaj kitakamatiskej Jehová (Juan 17:6). Sayoj ke amo kiajsikamatiaj keyej Jesús kimiktijkaj kemej aksa akin amo yolkuali. Jesús kimatia ke imomachtijkauan takuaujtamatiaj iuan Jehová uan kitasojtayaj, sayoj ke kiitak ke amo semi kiajsikamatiaj tein kijtoua iTajtol Dios (Luc. 9:​44, 45; Juan 20:9). Yejua ika kinpaleuij maj kiajsikamatinij tein kiixtajtoltiayaj. Maj tikitakan toni kichiuak keman monextij ininixpan ome imomachtijkauan akin yayaj Emaús. Jesús amo niman kiniluij nejon ome takamej akoni katka yejua, ta kintajtanij seki taman. ¿Keyej? Porin xa kinekia kinkauas maj kijtokan tein kinemiliayaj uan tein kimachiliayaj, uan ijkon kichiujkej. Kiluijkej ke yejuan kinemiliayaj ke Jesús mochiuaskia inintekiuaj israelitas uan ke yejua kinixyekanaskia uan amo romanosok (Luc. 24:​18-27). Jesús kinkauak maj kiluianij keniuj momachiliayaj. Satepan, ika iTajtol Dios kinpaleuij maj kiajsikamatinij ke mochiujkaya seki taman tein moijtojka. Uan nejon youak keman moajsik iniuan okseki imomachtijkauan, no kiniluij toni kijtosnekia tein mochiujtoya (Luc. 24:​33-48). w24.10 14 § 9, 10

Kemej Jesús kiitaya iTajtsin kimatik toni monekia kichiuas uan kijtos. Tein tamachtia uan tein tayolmajxitia inechikol Jehová ualeua itech iTajtol Dios (2 Tim. 3:​16, 17). No techelnamiktia maj nochipa tikixtajtoltikan Biblia uan maj tikchiuakan tein timomachtiaj. Semi techpaleuia maj timomachtikan Biblia uan toamaixuan, porin tikitaj ke tein technauatiani inechikol Dios yejua tein tamachtia Biblia. Keman tikitaj ke nejon tanauatilmej mokixtiaj itech iTajtol Dios techpaleuia maj okachi titakuaujtamatikan itech inechikol Jehová (Rom. 12:2). Jesús kiteixmatiltij “kuali tanauatilmej tein ika tajtoua iTaixyekanalis Dios” (Luc. 4:​43, 44). Uan kinnauatij imomachtijkauan maj no tanojnotsakan (Luc. 9:​1, 2; 10:​8, 9). Axkan akin pouij itech inechikol Jehová kiteixmatiltiaj iTaixyekanalis Dios maski tataman kampa yeski nemiskej. w24.04 9 § 5-7

Xiontakuaujtamati itech inechikol Jehová. Ne uejkauj Jehová kinmatiltij israelitas itanauatiluan itechkopa Moisés uan satepan itechkopa Josué (Jos. 1:17). Israelitas kuali yetoyaj keman kinpoujkaitayaj takamej akin Jehová kinixpejpenka. Xiujmej satepan, katkaj 12 tatitanilmej akin taixyekanayaj keman peuak moajsi nechikol kampa kichiuayaj kemej Cristo (Hech. 8:​14, 15). Satepan no kinpaleuiayaj oksekin tayekananij de Jerusalén. Kemej tokniuan kichiuayaj tein kinnauatiayaj “kisentokakej okachi takuaujtamatkej uan mojmostaj momiakilijtiayaj” (Hech. 16:​4, 5). Axkan Jehová no techtatiochiuia keman tikchiuaj tein technauatia inechikol. w24.07 10 § 10

Jehová semi kitasojtaya tekiuaj David. Yejua ika kijtoj: “David [...] nechyolpaktia”. Sayoj ke David semi tajtakolchiuak porin auilnemik uan temiktij uan kemej kijtouaya iTanauatil Moisés, monekia kimiktiskej (Lev. 20:10; Núm. 35:31). Sayoj ke kemej Jehová tel yolkuali, kinekik kipaleuis David para maj moyolpatani. Uan kititanilij itanauatijkauj Natán para maj iuan tajtouani maski David ayamo kijtouaya tein kichiujka nion moyolpataya. Natán kitapouij se taman para maj kiitani ke semi tajtakolchiujka, ijkon tekiuaj kimatik ke semi kiyolkokojka Jehová uan moyolpatak (2 Sam. 12:​1-14). David kijkuiloj se salmo kampa kinextij ke tel amo kuali momachilij porin tajtakolchiujka (Sal. 51, encabezamiento). Miakej akin tajtakolchiuaj semi kinyolseuia nejin salmo uan moyolpataj. Semi tiktasojkamatij maj Jehová kitasojtani itekitikauj uan maj kipaleuiani maj moyolpata. w24.08 10 § 9

Miakej kijtouaj ke para se kiniskaltis konemej moneki miak tiempo. Komo tejuatsin tiontepopaj tikmatij ke semi tionmochikaujtok tikonpaleuis mokoneuan maj okachi takuaujtamatikan iuan Jehová, yejua ika tel kuali tein tikonchiujtok (Deut. 6:​6, 7). Xa ijkon kemej moskaltijtiaskej mitsontajtaniskej seki taman tein tikneltokaj, xa kinekiskej kimatiskej keyej Jehová amo kineki maj tikchiuakan seki taman. Xa tikonnemilis ke mokoneuan tajtanij nejon porin amo semi takuaujtamatij iuan Dios uan itech Biblia. Sayoj ke para okachi takuaujtamatiskej, konemej ipa moneki tajtaniskej tein amo kimatij (1 Cor. 13:11). Keman tajtaniskej seki taman uelis tikonpaleuis maj okachi momachtikan uan maj okachi takuaujtamatikan iuan Dios uan itech Biblia. w24.12 14 § 1, 2

Tokniuan semi monekia maj takuaujtamatikan para ueliskia momakixtiskej keman romanos kintajyouiltiskiaj akin nemiaj Judea (Heb. 10:​37, 38). Jesús kiniluij imomachtijkauan maj cholouanij itech tepemej keman kiitaskiaj ke miakej soldados kiyoualojtoskiaj Jerusalén. Uan nejin monekia kichiuaskej nochin tokniuan akin nemiaj Jerusalén uan akin nemiaj kalampa (Luc. 21:​20-24). Ne uejkauj keman kinteuiayaj, akin nemiaj kalampa de se xolal yayaj kampa tatsaktoya ika tepamit, kemej Jerusalén. Yejua ika, tokniuan semi monekia takuaujtamatiskej para kitakamatiskej Jesús uan yaskej itech tepemej maski xa moitaskia ke okachi kuali yeskia maj mokauanij ompa Jerusalén. Nejon tokniuan no monekia takuaujtamatiskej iniuan akin Jesús kiixtalij maj kinixyekana. Xa tokniuan akin kinixyekanayaj kiniluijkaj kemanian uan keniuj choloskiaj (Heb. 13:17). w24.09 10 § 9, 10

Jesús kichiuak nochi tein iTajtsin kinauatijka (Juan 17:4). Sayoj ke amo keman kinemilij ke sayoj yejua ueliskia kichiuas tein Jehová kinekia. Yejua kinmachtij oksekin keniuj kichiuaskiaj. Jesús iniuan takuaujtamatia imomachtijkauan. Yejua ika kinnauatij maj tamachtianij, maj kiteixmatiltianij kuali tanauatilmej, uan maj kinyekpianij itekitikauan Jehová akin semi kinpatiuita. Jesús amo kinajuak imomachtijkauan keman kinyolmajxitij, ta kuali kichiuak. Kimatik ke seki imomachtijkauan amo kineltokayaj ke oksepa nemia. Yejua ika kinyolmajxitij para kinpaleuis maj kineltokanij (Luc. 24:​25-27; Juan 20:27). Kiniluij maj okachi kiitanij keniuj kinyekpiaskej itekitikauan Dios uan maj amo kitemouanij motomintiskej (Juan 21:15). No kinyolmajxitij maj amo kiitanij tein yejuan kichiujtoyaj uan tein oksekin ueliaj kichiuayaj para kitekitiliskej Jehová (Juan 21:​20-22). Kemej miakej kinemiliayaj ke Jesús yaya kiixtalitia maj aksa taixyekana, kinmelauak uan kinpaleuij maj okachi tanojnotsanij (Hech. 1:​6-8). w24.10 15, 16 § 13, 14

Komo tiktakamatij Jehová uelis tinemiskej nochipaya. Ijkon kemej israelitas yaya kalakitijya itech tal tein Dios motenkaujka kinmakas, amo uejkaua tejuan no tinemiskej itech xochital tein Dios motenkauak kichiuas. Tikitaskej ke taltikpak yeski se kualtsin xochital (Is. 35:1; Luc. 23:43). Satanás uan amokuali ejekamej amo nemiskejok (Apoc. 20:​2, 3). Uan nion se taneltokalis kitakajkayauilisok Jehová (Apoc. 17:16). Amo no taixyekanaskejok akin techtajyouiltiaj (Apoc. 19:​19, 20). Uan Jehová amo kikauas maj nion akin takuejmolchiua itech xochital (Sal. 37:​10, 11). Nochin akin nemiskej itech xochital kitakamatiskej tein Jehová tanauatia. Yejua ika kuali mouikaskej uan yolseujkanemiskej. Nejon tapaleuis maj nochin motasojtakan uan maj takuaujtamatikan iniuan oksekin (Is. 11:9). ¡Tiktelnekijya ijkon tinemiskej! Uan no, komo tiktakamatij Jehová uelis tinemiskej itech xochital nochipaya (Juan 3:16). w24.11 9 § 7

Axkan mochiujtok nejin tajtolmej tein axkan timomachtiaj. Tikteixmatiltiaj iTaixyekanalis Dios itech panoua mil tataman tajtolmej, uan kemej kalakij itech jw.org, okachi miakej kiixmatij kuali tanauatilmej. Sayoj ke, Jesús no kiniluij imomachtijkauan: “Akin yolik kemej takat ejkos achto ke nantaminemiskej itech nochin uejueyi xolalmej tein pouij Israel”. Nejin kijtosnekia ke amo ueliskia kinnojnotsaskej nochin achto ke ualaskia (Mat. 10:23; 25:​31-33). Axkan miakej nemij kampa amo ueli se tanojnotsa, uan no, mojmostaj yolij miakej pilimej. Yejua ika, maski semi timochikauaskej titanojnotsaskej “itech tataman altepemej, itech tataman uejueyi kalyetonij, akin tajtouaj tataman tajtolmej uan tataman ininxolal”, ipa amo uelis tikinnojnotsaskej nochin achto ke ixpoliuis nochi tein amo kuali (Apoc. 14:6). w24.05 10 § 6, 7

Keman Jesús kinnojnotsaya oksekin kinyolchikauaya uan kiniluiaya tein kichiuaskia maj kuali momachilikan. Amo keman kintauelnojnotsak imomachtijkauan (Luc. 8:​47, 48). ¡Tel kuali tein Jesús kinnextilij tokniuan takamej! Jesús kiniluij takamej maj amo kikajkayauakan ininsiuatsin iuan okse siuat. Kijtoj nejin tein iTajtsin kijtojka: “Takat […] nemis [oso mosentilis] iuan isiuatsin” (Mat. 19:​4-6 uan nota). Tajtol griego tein motajtolkepa kemej “mosentilis” kijtosneki “pepechiujtos”. Nejin kijtosneki ke se takat iuan isiuatsin moneki kemej yeskia tel pepechiujtoskej porin semi motasojtaj. Komo semej kichiua tein kiyolkokoua okse, nochin omen tajyouiaj. Se takat akin kiteltasojta isiuatsin senkis kiixtopeua pornografía. Nimantsin moixijkuania para amo kiitas “tein amo kualtia” (Sal. 119:37). Ijkon kemej Job, senkis kiixtalia amo kiitas se siuat uan kinemilis iuan auilnemis (Job 31:1). w25.01 10 § 12, 13

Xa akin tikyolkokojkej kinextis ke uelis tiksentokaskej kuali iuan timouikaskej, oso xa kinextis ke techtapojpoluijya sayoj ke amo uelisok kuali iuan timouikaskej kemej achto. Tel taman tein kichiua Jehová keman tetapojpoluia. Nion akin tetapojpoluia kemej yejua. Se salmista kiluij Jehová: “Tejua yekmelauj titetapojpoluia, yejua ika mitsmojkatokaj” (Sal. 130:4). Semi kualtsin tein kichiua Jehová porin sayoj yejua ‘yekmelauj tetapojpoluia’. Komo tiknekij tikmatiskej keniuj uelis yekmelauj titetapojpoluiskej moneki tikitaskej tein Jehová kichiua. Itech seki versículos tein moijkuiloj itech tajtol hebreo, mokuik se tajtol para moijtos keniuj tetapojpoluia Jehová, sayoj ke nejon tajtol amo keman mokuik para moijtos keniuj tetapojpoluia aksa. Keman Jehová kitapojpoluia aksa, senkis kiixpoloua itajtakol uan kikaua maj oksepa kuali iuan mouika. Jehová senkis tetapojpoluia uan miakpa ijkon kichiua. ¡Semi tiktasojkamatij maj nochipa techtapojpolui! w25.02 8 § 1-3

Maski amo techkakiskej keman titanojnotsaskej, tejuan ipa tikchiujtokejya tein moneki tikchiuaskej. ¿Keyej? Porin tikchiujtokej tein Jehová uan iKonetsin technauatiaj: maj titanojnotsakan. Yejua ika, amo moneki timotekipachoskej komo amo akin ueli tiknojnotsaj oso komo amo akin kineki techkakis. Nochipa uelis tiyolpakiskej porin tikchiuaj tein Jehová technauatia (Prov. 27:11). No tiyolpakij keman oksekin tokniuan kiajsij aksa akin kineki kimatis okachi. Amaix Tanejmachtijkej kijtoua ke keman titanojnotsaj kemej yeskia tiktemouaj se okichpilkonet akin poliuj. Miakej kitemouaj uan miakkan youij kitemotij. Uan keman kiajsij okichpilkonet, nochin yolpakij amo sayoj akin kiajsik. No ijkon, tinochin itech inechikol Jehová titapaleuiaj maj oksekin no mochiuakan imomachtijkauan Jesús. Titapaleuiaj maj motanojnotsa uan tinochin tiyolpakij keman aksa peua youi nechikolmej. w24.04 18 § 13, 14

Techyolpaktia tikmatiskej tein panos amo uejkaua. Uan tiknekij maj Jehová okachi miakej kinpaleui maj kinekikan kimatiskej tein Biblia tamachtia achto ke peuas tetsaujkatajyouilis. Sayoj ke, no techyolpaktia tikmatiskej ke sekin xa no kinekiskej touan kiueyichiuaskej Jehová keman mochiujtos tetsaujkatajyouilis. Sayoj ke axkan tikpiaj se tekit tein moneki tikchiuaskej, moneki tikteixmatiltiskej kuali tanauatilmej itech nochi taltikpak, nejin amo keman oksepa mochiuas. Uan no, moneki tikinmatiltiskej oksekin ke amo uejkaua ixpoliuis nochi tein amo kuali. Kemej semi tiktasojtaj tein Biblia tamachtia, tikintasojtaj akin tikinnojnotsaj, uan okachiok Jehová uan itokay, tiksentokaskej nochipa titanojnotsaskej hasta keman Dios kijtos maj amo tikchiuakanok. w24.05 19 § 14-16

Se youak achto ke kimiktiskiaj Jesús, kinmachtij Pedro uan oksekin itatitaniluan maj yolyemankej. Tatitanilmej xa semi kimojkaitakej keman kiitakej ke mokixtilij ipantaken, motajkoilpilij se tasal, kipantekak at itech ueyi kaxit uan peuak kinmetspajpaka (Juan 13:​4, 5). Jesús kinmetspajpakak 12 itatitaniluan uan xa semi uejkauak, no kimetspajpakak Judas akin satepan kitemaktiskia. ¡Jesús semi yolyemanik katka! Satepan kinmelauilij keyej kichiuak nejin: “¿Nankimatij keyej namechmetspajpakak? Namejuan nanechiluiaj Tamachtijkej uan toTekotsin, uan melauak tein nankijtouaj. Yejua ika, komo nejua namoTekotsin uan namoTamachtijkauj, uan namechmetspajpakak, namejuan no moneki namometspajpakaskej se iuan okse” (Juan 13:​12-14). w25.03 10 § 9-11

Tein axkan panoua kichiua maj techouijkisa tiktekitiliskej Jehová. Miakej kijtouaj ke Dios amo yekmelauj nemi, uan moita ke okachi kuali yetokej porin amo kitakamatij. Nochi nejin uelis kichiuas maj amo titakuaujtamatikanok. Maski tiksentokaskej tikneltokaskej ke Dios nemi, xa tiknemiliskej ke amo techpaleuis. Ijkon kipanok akin kijkuiloj Salmo 73. Kiitak ke miakej akin amo kitakamatiaj Dios, kisentokayaj yolpakiaj uan amo teyi kintekipachouaya. Yejua ika motajtanij ox nenkaj katka komo kisentokaya kitekitiliaya Jehová (Sal. 73:​11-13). ¿Toni kipaleuij salmista? Yejua itech tanemilij toni kinpanoskia akin amo takuaujtamatiskiajok iuan Jehová (Sal. 73:​18, 19, 27). No kinemilij keniuj kipaleuiskia komo kitekitiliaya. w24.06 25 § 16, 17

Ne uejkauj, sekin kintajtaniayaj miak tomin akin pobres maski amo miak kintaneujtijkaj. Uan seki jueces kiseliayaj tomin tein kinmakayaj para kinpantiskej sekin ke kichiujkaj tein amo kuali. Jehová amo kiuelita maj aksa kichiua nejon (Ezeq. 22:12). Moneki maj tiknemilikan keniuj tikitaj tomin. Maj timotajtanikan: “¿Nochipa ika nitanemilijtinemi tomin uan tein nikneki nikouas? Komo aksa nechtaneujtia tomin, ¿semi niuejkaua para nikepilis porin niknemilia ke yejua amo kipoloua? ¿Nimoueyimati porin nikpia tomin? ¿Nechouijkisa ika nikinpaleuis oksekin? ¿Niknemilia ke tokniuan akin kipiaj tomin amo kitasojtaj Jehová uan sayoj kinejnekij kipiaskej miak taman? ¿Sayoj kuali nimouika iniuan akin kipiaj tomin uan amo iniuan akin pobres?”. Semi moneki maj timotajtanikan nejin porin tejuan kemej yeskia tietokej ichan Jehová. Komo ijkon tikchiuaj, Jehová amo keman techkauas. w24.06 12, 13 § 17, 18

¿Toni no techpaleuis maj amo tiknejnekikan titajtakolchiuaskej? Moneki tiknejnekiskej tikchiuaskej tein kuali. Komo ‘tiktauelitaj tein amo kuali uan tiktasojtaj tein kuali’, tikixtaliskej amo keman tikchiuaskej teisa tein ika titajtakoskej (Amós 5:15). Komo tiknejnekij tikchiuaskej tein kuali, no techpaleuis maj tikixtopeuakan tein yeski tein ika ueliskia titajtakolchiuaskej. Komo tikchiujtokej tein techpaleuis maj okachi tiktasojtakan Jehová. Keman tiouij nechikolmej uan keman titanojnotsatij techpaleuia maj tiknejnekikan tikyolpaktiskej Jehová, uan amo teyi kichiuas maj tiknejnekikan titajtakolchiuaskej (Mat. 28:​19, 20; Heb. 10:​24, 25). Komo tikixtajtoltiaj uan timomachtiaj Biblia uan itech titanemiliaj, no techpaleuia maj tiknekikan tikchiuaskej tein kuali uan maj tikixtopeuakan tein amo kuali (Jos. 1:8; Sal. 1:​2, 3; 119:97). Uan no, maj tikelnamikikan ke Jesús tayolmajxitij nejin: “Nochipa ximotataujtijtokan para amo namotajtakolmakaskej” (Mat. 26:41). Ijkon, tikauaj maj Jehová techpaleui uan okachi tiknejnekij tikyolpaktiskej (Sant. 4:8). w24.07 17, 18 § 14-16

Keman tikinmachtiaj oksekin, moneki tikchiuaskej kemej Jehová. Kemej tikitakejya, Jehová techpaleuia maj timochiuakan titamatinij. Tejuan no tikinmachtiaj oksekin tein tikmatij tikchiuaskej. Amo timouij tikinnextiliskej oksekin tein tejuan tikmatij uan maj satepan okachi kuali kichiuakan se tekit oso maj techkuilikan totekiuj, uan amo no tiknemiliaj: “Maj momachti iselti, ¡nejua amo akin nechmachtij!”. Tiitekitikauan Jehová amo moneki ijkon tiknemiliskej. Amo sayoj tikinnextiliaj tein tikmatij, ta no tikinmachtiaj keniuj uelis kichiuaskej se tekit (1 Tes. 2:8). Komo ijkon tikchiuaj yejuan no “kuali kimatiskej keniuj kinmachtiskej oksekin” (2 Tim. 2:​1, 2). Komo tinochin tikinmachtiaj oksekin, okachi tiyolpakiskej. w24.09 29 § 12, 13

Komo tikonnemilia ke amo ueli tikonchiua miak taman, amo xionmotekipacho. Kemaj uelis tikonchiuas seki taman tein kinpaleuis tokniuan. Uelis tikontataujtis Dios uan tikonitas tein kijtoua 1 Corintios 12:​12-30. Ompa Pablo kijtoua ke nochin itekitikauan Jehová tapaleuiaj uan amo nenkaj yetokej itech nechikol. Xikontemo tikonchiuas nochi tein tionuelis para tikontekitilis Jehová uan tikonpaleuis tokniuan. Tayekananij kiitaskej toni ueli tikonchiua achto ke mitsonmakaskej se tekit (Rom. 12:​4-8). Tinochin moneki kuali timouikaskej iuan Jehová, tiyolpakiskej keman titapaleuiskej uan tinemiskej kemej kiyolpaktia. w24.11 17 § 12, 13

Ana kipanok miak taman tein semi ouij uan chokaya porin itakauj no iuan monamiktijka Peniná akin semi kitauelitaya Ana. Yejua amo uelia kinpiaya konemej uan Peniná kinpiaya miakej (1 Sam. 1:​1, 2). Yejua ika miakpa kikejkelouaya. Ana semi tajyouijtoya, yejua ika “semi chokaya uan amo takuaya” (1 Sam. 1:​6, 7, 10). ¿Toni kichiuak Ana? Yajki itech kaltsin kampa kiueyichiuayaj Jehová. Uan keman moajsiaya kaltenoj, “peuak kitataujtia Jehová uan tel chokaya”. Kitajtanij maj amo kielkaua uan kiluij: “Tejua tikmati ke semi nitajyouijtok” (1 Sam. 1:11). Jehová, kiajsikamatik Ana, kikakik inetataujtil uan satepan kichiuak maj kipia se konetsin (1 Sam. 1:​19, 20; 2:21). w24.12 21 § 5-7

Keman Jesús taxtauak para techmakixtis kinextij ke ininka motekipachoua nochin, uan okachiok ininka imomachtijkauan (Juan 13:1). Jesús kimatia ke keman yetoskia nikan taltikpak, kipiaskia miak ouijkayomej uan semi tajyouiskia keman kimiktiskiaj. Yejua amo sayoj kichiuak miak taman tein ouij porin Jehová ijkon kinauatijka, ta porin semi tetasojta. Nejin kinextij keman tanojnotsak, tamachtij uan keman kinpaleuij oksekin. Uan se youak achto ke kimiktiskiaj, kixeloj tiempo para kinmetspajpakas itatitaniluan, kinyolchikauas uan kinmachtis (Juan 13:​12-15). Uan keman kikoujpampilojkej, kiyolchikauak tachtekkej akin yetoya inakastan, uan no kinextij ke ika motekipachouaya imomaj keman kiluij Juan maj kiyekpiani (Luc. 23:​42, 43; Juan 19:​26, 27). Jesús amo sayoj kinextij ke tetasojta keman toka momikilij, ta no ika tein kichiuaya keman yetoya nikan taltikpak. w25.01 23 § 11

Keman Jehová techtapojpoluia semi kuali timomachiliaj. Biblia ika tajtoua okse taman tein techpaleuia maj tikajsikamatikan nejon. Tinochin kemej yeskia ‘tietokej imako tajtakol’ porin titajtakolejkej. Sayoj ke keman Jehová techtapojpoluia kemej yeskia kikotona tein ika tiilpitokej para ‘techmakixtis den tajtakol’ (Rom. 6:​17, 18; Apoc. 1:5). Keman tikmatij ke Jehová techtapojpoluijya semi tiyolpakij ijkon kemej se takeual keman amo yetokok temako. Sayoj ke Jehová kemej yeskia techpajtij keman kitemakak iKonetsin. Nejon techpaleuia maj oksepa kuali iuan timouikakan, porin keman titajtakolchiuaj amo ueli iuan timouikajok (1 Ped. 2:24). Semi yolpaki aksa akin motelkokouaya keman pajti. Ijkon timomachiliaj keman Jehová techtapojpoluia uan oksepa kuali iuan timouikaj. w25.02 11 § 16; 13 § 17

Jesús ininka tajtoj ome takeualmej akin kitakamatkej ininteko uan se akin amo (Mat. 25:​14-30). Ome takeualmej akin tatakamatkej kinixnextiaj tokniuan taijitalmej akin amo keman kikauaj Jehová. Ininteko Jesús, kiniluia sejsemej: “Xiuiki uan xiyolpaki nouan”. Nejin kijtosneki ke yaskej nemitiuij ompa iluikak (Mat. 25:​21, 23; Apoc. 20:5a). Uan no, tein kichiuak takeual akin tatsiuia kinnejmachtij se taman taijitalmej. Maj tikitakan keyej. Moneki tikonnextis ke kuali tiontekiti. Keman Jesús ininka tajtoj takeualmej akin kinkauilijkej bolsa tomin, amo kinekia kijtos ke taijitalmej mochiuaskiaj tatsiuinij. Ta kinnejmachtijtoya, ijkon kemej kichiujka keman ininka tajtoj majtakti ichpochmej. Yejua kinmelauilijtoya toni panoskia komo amo yolpakiajok kitekitiliskej Dios: yejuatsin amo ‘kinnotsaskiaok nion kinijitaskiaok’ uan amo ueliskiaj kalakiskej itech iTaixyekanalis Dios ompa iluikak. w24.09 22 § 10; 23 § 12, 13

Tinochin tiknekij tikpiaskej se tekit tein techpaleuis maj timoixpanoltikan tejuan uan tochankauan (Ecl. 7:12; 1 Tim. 5:8). Keman tikixpejpenaj se tekit ipa tikitaj kanachi tiktaniskej, sayoj ke komo sayoj itech titanemiliaj nejon timoixyekantoskiaj ika tein tikitaj. Komo tiknextiaj ke titakuaujtamatij iuan Jehová keman tikitaskej ox tikseliskej se tekit, no tikitaskej maj ueli tiksentokakan kuali iuan timouikakan. Maj timotajtanikan: “Keman nikselis nejon tekit, ¿monekis nikchiuas seki taman tein Jehová kitauelita? ¿Amo uelis nias nochi nechikolmej, amo semi nitanojnotsasok, nion nimomachtisok Biblia? Uan ¿uejkauak monekis nikinkauas nochankauan?” (Prov. 6:​16-19). Komo ijkon, okachi kuali maj amo tikselikan maski ouij se kiajsi se tekit. Kemej titakuaujtamatij iuan Jehová, tein tikixpejpenaj kinextis ke senkis tikmatij ke yejua kichiuas teisa para techmakas tein techpolos (Mat. 6:33; Heb. 13:5). w25.03 21 § 5, 6

No moneki timochikauaskej tikinitaskej tokniuan kemej kinita Jehová. Yejua ika, tikitaj tein kuali tein kichiuaj uan amo sayoj keman mopolouaj, porin satepan amo mopoloskejok. Komo tikintasojtaj techpaleuis maj tikyektalikan tein yeski kuejmol. Nochin akin kinekiskej maj kinnextilikan ke kintasojtaj, kinekiskej touan kiueyichiuaskej Jehová. Maj nochipa tiktasojkamatilikan Dios porin techkaua maj tikueyichiuakan. Komo tiknekij kuali tietoskej, tiyolpakiskej, tiyolseujtoskej uan amo timouiskej, moneki tikueyichiuaskej Jehová uan amo keman tikauaskej. Sayoj ke moneki timoyekpiaskej porin Satanás kineki techkajkayauas para maj tikauakan inechikol Dios (1 Ped. 5:8; Apoc. 12:9). Maj amo tikauakan maj techkajkayaua. Maj timochikauakan kuali timouikaskej iniuan akin kiueyichiuaj Jehová uan maj amo tixexeliujtokan. w24.04 24, 25 § 18, 19

Tetatmej, uelis nankinpaleuiskej namokoneuan maj kinekikan kitekitiliskej Jehová. Tein nankijtoskej uan tein nankichiuaskej, kinpaleuis namokoneuan maj kiitakan ke nankitekitiliskej Jehová yejua tein okachi moneki. Uelis ijkon nankichiuaskej komo namomachtiaj Biblia, nanyouij nechikolmej uan nantanojnotsaj. Komo amo ijkon nankichiuaj, namokoneuan uelis kinemiliskej ke yejuan no moneki mochiuaskej itaixpantijkauan Jehová sayoj porin namejuan nanitaixpantijkauan Jehová. Sayoj ke satepan xa kinemiliskej ke amo moneki kiueyichiuaskejok uan hasta amo kitekitiliskejok. Keman aksa kikaua Jehová, ¿kijtosneki ke amo kemanok uelis oksepa iuan mouikas? Amo, porin uelis moyolpatas uan oksepa kiueyichiuas Jehová. Sayoj ke moneki moyolyemanis uan mokauas maj kipaleuikan tayekananij (Sant. 5:14). Uan tein kichiuas amo nenkaj yeski, porin kipaleuis maj oksepa kuali mouika iuan Jehová. w24.07 24, 25 § 18, 19

¿Toni namechpaleuis amo xitajtakolchiuakan? Keman okachi namotasojtaskej okachi nankinekiskej nansenyetoskej. Sayoj ke amo nankinekij nankichiuaskej teisa tein amo kiyolpaktia Jehová. Yejua ika, amo ika xitajtokan auilnemilis, amo xietokan namoselti uan amo xiteltayikan tein teuintij (Efes. 5:3). Nochi nejin uelis kichiuas xiknekikan xiauilnemikan uan xitajtakokan. Yejua ika nochipa ika xitajtokan toni uelis nankichiuaskej para nankitakamatiskej Jehová keman nanyeskij nannovios (Prov. 22:3). Uelis namonextiliskej ke namotasojtaj kemej okachi namoixmatiskej (Cant. 1:2; 2:6). Sayoj ke komo semi tiknejneki iuan timotekas, xa okachi ouij mitskisas tikchiuas tein kuali uan amo tikitasok tein kichiua monovio oso monovia. Uan no, komo ijkon mitspanoua xa amo uelis timotsakuilis uan hasta uelis tiauilnemis (Prov. 6:27). Yejua ika, desde keman namochiuaskej novios moneki namoiluiskej toni kemaj nankichiuaskej para nankitakamatiskej tein Jehová namechyolmajxitia (1 Tes. 4:​3-7). w24.05 29 § 10, 11

Tiknekij maj tokniuan kimatikan ke nochipa tikinpaleuiskej, hasta keman kipiaskej se ueyi ouijkayot (Prov. 17:17). ¿Keniuj oksekin uelis kiitaskej ke titakuaujtamachmej? Komo mojmostaj timochikauaj tikchiuaskej kemej Jehová, uan nejin tiknextiaj keman tikchiuaj tein timotenkauaj uan keman hora tiajsij kampa moneki tiaskej. Tayekananij semi kinpaleuiaj tokniuan itech nechikol keman takuaujtamachmej. Keman tokniuan kimatij ke uelis kinnotsaskej tayekananij keman monekis, kinpaleuia maj amo semi motekipachokan. Tokniuan kimachiliaj ke kintasojtaj keman kiitaj ke tayekananij nochipa kitemouaj kinpaleuiskej. Tokniuan okachi takuaujtamatij iniuan tayekananij keman kinyolchikauaj ika Biblia uan toamaixuan uan amo ika tein yejuan kinemiliaj. Uan no keman tayekananij amo kijtojtinemij tein tokniuan kintapouiaj uan kichiuaj tein motenkauaj. w24.06 30 § 14, 15

Yejuatsin amo kiixpolos nochi ouijkayomej tein tikpiaj, sayoj ke tikmatij ke techpaleuis maj titaxikokan (Sal. 41:3). Ika ichikaualis techpaleuis maj titaxikokan, maj timochiuakan tamatinij uan maj tiyolseujtokan (Prov. 18:14; Filip. 4:13). Uan Jehová no motenkaua ke satepan kichiuas maj amo akin kokolispeuaok (Is. 33:24). Jehová kichiuak maj moijkuilo tein uelis techyolchikauas keman tikpiaskej ouijkayomej (Rom. 15:4). Maj tikitakan tein kipanok se tokniuj siuat de África Occidental akin tel chokaya porin kiajxilijkej cáncer. Yejua kijtoua: “Tein kijtoua Isaías 26:3 semi nechpaleuij. Nejin texto kijtoua ke Jehová uelis techpaleuis maj tiyolseujtokan uan techpaleuis maj tikxikokan tein yeski ouijkayot”. ¿Tikelnamiki se texto tein mitsyolchikauak keman tikpiaya se ouijkayot uan tikmachiliaya ke amo titaxikoskiaok? w24.12 24 § 17, 18

Tayekananij ijkon momachiliaj keman se tokniuj tajtakolchiua uan mochikauaj kipaleuiskej maj mokepa iuan Jehová (Luc. 15:​22-24, 32). Keman aksa akin tajtakolchiuak mokepa, Jehová, Jesús, ángeles uan nochin tokniuan semi yolpakij (Luc. 15:7). Jehová amo kinkaua maj kisentokakan itech inechikol akin tel tajtakolchiujkej uan amo moyolpataj. Uan no, kisentoka kinpaleuia porin kineki maj mokepakan. Uan Oseas 14:4 kijtoua keniuj momachilia Jehová keman moyolpataj: ‘Nikchiuas maj amo nechkauakanok, semi nikintasojtas porin amo nikualantosok’. Kemej kimatij keniuj momachilia Jehová, tayekananij kiitaj tein yeski taman tein kinextia ke aksa peua moyolpata. Uan nejin texto uelis kinyolchikauas akin kikaujkej Jehová maj kimatikan ke yejuatsin kintasojta uan kineki maj iuan mokepakan. w24.08 28 § 8, 9

Sayoj ke moneki tikelnamikiskej ke xa amo nochin techtasojkamatiliskej. Xa tikuiskej totiempo, tochikaualis oso tein tikpiaj para tikpaleuiskej aksa, uan satepan tikitaskej ke akin tikpaleuijkej amo motasojkamati. Komo ijkon panoua, ¿toni techpaleuis maj tiksentokakan tiyolpakikan uan maj amo tikualanikan? Amo tiyolpakij porin oksekin techtasojkamatiliaj tein tikchiuaj, ta tiyolpakij porin tikinpaleuiaj oksekin (Hech. 20:35). Uelis tiksentokaskej tikinpaleuiskej oksekin uan tiyolpakiskej maski tikitaskej ke amo techtasojkamatiliaj. Maj tikitakan seki taman tein uelis techpaleuis. Xikonelnamiki ke keman tiontapaleuia, tikonchiujtok kemej Jehová. Yejuatsin kitemaka tein kipia maski sekin kitasojkamatiliaj uan sekin amo (Mat. 5:​43-48). Jehová motenkaua iniuan itekitikauan ke komo tapaleuiaj uan amo kichiaj maj ‘kinkepilikan nion teyi’, “inintaxtauil yeski ueyi” (Luc. 6:35). Yejua ika, amo xionmoyolkoko keman oksekin amo mitsontasojkamatiliskej. Xikonelnamiki ke Jehová mitsontatiochiuis porin tikonpaleuia oksekin uan porin ‘tikontemaka ika miak pakilis’ (2 Cor. 9:7; Prov. 19:17). w24.09 29 § 14-16