Noviembre

Tayekananij kichiuaj kemej Jehová porin yejua kiniknelia akin kinkalankixtijkej de nechikol. Ne uejkauj keman israelitas amo tatakamatiaj, Jehová niman kitemouaya keniuj kinpaleuis maski yejuan ayamo moyolpatayaj. Yejuatsin kintitania itanauatijkauan hasta achto ke yejuan moyolpataskiaj. Jehová kiluij tanauatijkej Oseas maj kitapojpolui isiuatsin uan maj oksepa iuan mokepani maski yejua kisentokaya tajtakolchiujtoya. Ijkon kinnextilij itekitikauan ke semi teiknelia (Os. 3:1; Mal. 3:7). Ijkon kemej Jehová, tayekananij semi kinekij maj akin tajtakolchiuak moyolpata uan maj mokepa itech nechikol uan yejuan kitemouaj kipaleuiskej maj ijkon kichiua. Tein kichiuak tepopaj akin Jesús ika tajtoj keman ikonetsin mokepak. Itat kiuejkaitak, “tsikuinteuak kinamikito, kinauaj uan kimakak se beso porin semi kitasojtaya” (Luc. 15:20). Tepopaj kinextij ke semi kitasojtaya ikonetsin uan amo kichiak maj kiluiani maj kitapojpolui, ta yejua achto kinextij ke kitapojpoluiaya. w24.08 28 § 7, 8

Kemej kijtoua tajkuilol tein axkan timomachtiaj, Jehová kinpaleuia oksekin maj no mochiuakan tamatinij. Uan no, “amo kualani iniuan akin kitajtaniaj”, yejuatsin amo kineki maj timopinaujmatikan porin tiktajtaniaj maj techpaleui. Ta yejua kineki maj tiktajtanikan (Prov. 2:​1-6). ¿Tejuan no uelis tikchiuaskej kemej Jehová uan tikinnextiliskej oksekin tein tikmatij? (Sal. 32:8). ¡Kemaj! Uelis tikinmachtiskej oksekin miak taman. Akin yekin peua tanojnotsaj uelis tikinmachtiskej keniuj kichiuaskej. Tayekananij no kinmachtiaj tokniuan tapaleuianij uan okseki tokniuan akin moauijkejya maj kichiuakan tekimej tein kipiaj itech nechikol. Uan no, miakej tokniuan takamej uan siuamej akin miak xiujmejya tapaleuianij maj mochijchiuakan uan maj moyekchijchiuakan kalmej kampa titaueyichiuaj, kinmachtiaj oksekin maj no kichiuakan seki tekimej uan ijkon uelis tapaleuiskej keman kalchijchiuaskej. w24.09 28, 29 § 11, 12

Para maj aksa ueli mochiua tayekankej, “moneki kuali nemis para maj amo akin kijijto”. Nejin kijtosneki ke tokniuan itech nechikol kuali ika tajtoskej porin kichiua tein kuali uan amo akin kijtouilis ke kichiua tein amo kuali (1 Tim. 3:2). Uan no, “maj kuali ika tajtokan akin amo taneltokaj”. Akin amo kitekitiliaj Jehová xa ipa amo kiuelitaskej tein kineltoka, sayoj ke amo keman moneki kijtouiliskej ke takajkayaua oso ke amo yolkuali (Dan. 6:​4, 5). Xionmotajtani: “¿Nechitaj tokniuan itech nechikol uan akin amo momachtiaj ke niyolkuali uan ke amo nitakajkayaua?”. ‘Semi se kiuelitas tein kuali’ kijtosneki maj se kiita tein kuali tein kichiuaj oksekin uan maj tikiniluikan (Tito 1:8). No kijtosneki se kiuelitas se kinpaleuis oksekin uan maj se kichiua maski amo kichiaskej. ¿Keyej se tayekankej semi moneki maj kiuelita tein kuali? Porin kipaleuis maj yolpaki keman kikuis itiempo para kinyekpias tokniuan uan kuali kichiuas tekit tein kipia itech nechikol (1 Ped. 5:​1-3). Maski kipias miak tekit, semi yolpakis kinpaleuis oksekin (Hech. 20:35). w24.11 20 § 3; 21 § 4, 5

Tokniuan tapaleuianij itech nechikol kichiuaj se tel kuali tekit. Tatitanil Pablo kitasojkamatia tekit tein kichiuayaj nejon takamej. Yejua ika, keman kintajkuilouilij tokniuan de Filipos, kintajpaloj tayekananij uan no tapaleuianij (Filip. 1:1). Miakej tokniuan takamej kiuelitaj tekitiskej kemej tapaleuianij itech nechikol. Sekin okichpipilok uan sekin xiuejkejya. Devan kipiaya 18 xiujmej keman kiixtalijkej kemej tapaleuijkej, uan Luis kipiayaya panoua 50 xiujmej. ¿Keniuj kiita Luis tekit tein kichiua? Yejua kijtoua: “Semi niyolpaki ijkon nikinpaleuis tokniuan itech nonechikol. Yejuan kinextiaj ke nechtasojtaj, uan axkan nejua no ueli nikinnextilia ke nikintasojta”. Miakej tokniuan tapaleuianij no ijkon momachiliaj. Tokniuj takat, komo tionmoauijya uan ayamo tiontekiti kemej tapaleuijkej, ¿no ueliskia ijkon tiontapaleuis? w24.11 14 § 1-3

Keman tekiuaj Ezequías de Judá kipiaya 39 xiujmej, semi kokolispeuak. Itechkopa tanauatijkej Isaías, Jehová kiluij ke momikiliskia ika nejon kokolis (2 Rey. 20:1). Moitaya ke Ezequías amo pajtiskia. Keman kimatik tein kipanoskia semi motayokoltij uan mochoktij uan peuak kitataujtia Jehová maj kipaleui. Jehová semi kiiknelij Ezequías keman kikakik inetataujtil uan keniuj mochoktij. Itechkopa Isaías kiluij: “Nimitskakik keman tinechtataujtij uan nikitak ke titelchokak. Yejua ika nejua Jehová nimitspajtiti”. Kinextilij ke kiikneliaya keman motenkauak ke kikauaskia maj nemiok uan ke kimakixtiskia Jerusalén den asirios (2 Rey. 20:​4-6). ¿Toni uelis tikchiuas komo tikokolispeuak uan amo tipajtiok? Xikilui Jehová keniuj timomachilia, yejuatsin mitskakis maski tichokatos keman tiktataujtis. Biblia kijtoua ke “toTajtsin akin semi teiknelia uan Dios akin nochipa teyolseuia”, techyolchikauas keman tikpiaskej ouijkayomej (2 Cor. 1:​3, 4). w24.12 24 § 15-17

¡Tel kualtsin yeski keman tikinseliskej akin oksepa nemiskej! Uan semi tiyolpakiskej tiksentokaskej okachi tikixmatiskej Jehová uan nochi tein kichijchiuak (Sal. 104:24; Is. 11:9). Uan okachi kualtsin yeski porin amo titajtakolchiuaskejok, yejua ika amo monekisok tiktajtaniskej Jehová maj techtapojpolui uan uelis tikueyichiuaskej. ¿Melauj ke amo tikonixtopeuaskia tionnemis itech xochital sayoj para ‘tionmoyolpaktis ika tajtakol’ tein panotikisa? (Heb. 11:25). Keman ompa tinemiskej yeski okachi kualtsin ke tein yeski taman tein uelis tikpiaskej axkan. Xikonelnamiki ke xochital amo nochipa tikchixtoskej, ta ejkos tonal keman ompa tinemiskejya. Uan nejin ueli mochiua porin Jehová semi techtasojta uan kitemakak iKonetsin maj toka momikili. w25.01 29 § 12

Amatajkuilol Hebreos ininka tajtoua miakej itekitikauan Jehová akin semi takuaujtamatkej. Semej katka Moisés (Heb. 3:​2-5; 11:​23-25). Moisés kisentokak iuan takuaujtamatik. Uan ijkon kichiuak porin Jehová nochipa kinmakak israelitas tein kikuaskiaj uan at para maj amo momikilianij taluakyan (Éx. 15:​22-25; Sal. 78:​23-25). Kemej se xiuit satepan ke kinkixtijkej israelitas de Egipto, Jehová kijtoj ke kinmakaskia nakat. Moisés semi takuaujtamatia sayoj ke amo uelia kineltokaya keniuj Jehová kinmakaskia nakat millones itech taluakyan. Yejua ika Dios kitajtanij: “¿Timoluia ke Jehová amo uelis kichiuas nejin?” (Núm. 11:​21-23). Kemej yeskia kijtojtoskia: “Nejua ueli nikchiua nochi tein nikneki”. w25.03 26 § 1, 2

¿Uelis tiknemiliskej ke nochi tein panok keman tetsaujkakiouik kiixnextia tein panos satepan? Amo, porin Biblia amo ijkon kijtoua. Jesús kijtoj ke keman mokepas yeski “kemej katka keman nemia Noé”. Sayoj ke amo kijtoj ke nochi tein panok keman Noé nemia mochiuaskia satepan, kemej ijkuak Jehová kitsakuak arca. Maski ijkon, tein panoka uelis techmachtis miak taman (Mat. 24:​37-39). ¿Tonikichiuak keman Noé kikakik tein Jehová tanejmachtij? Yejua kinextij ke iuan takuaujtamatia porin kichijchiuak arca (Heb. 11:7; 1 Ped. 3:20). No ijkon, akin kikakij kuali tanauatilmej moneki kinextiskej ke takuaujtamatij ika tein kichiuaj (Hech. 3:​17-20). Pedro kijtoj ke Noé katka se takat “akin kiteixmatiltiaya tein kuali”. No ijkon, axkan timochikauaj titanojnotsaskej itech nochi taltikpak, uan semi tiyolpakij ijkon tikchiuaskej. Sayoj ke amo uelis tikinnojnotsaskej nochin achto ke Dios kiixpolos tein amo kuali. w24.05 9, 10 § 4, 5

Monekiskia tiktemoskej keniuj tiknextiskej ke tiyolkualmej iniuan itasojikniuan Jehová uan tikinpatiuitaj (Rom. 12:10). ¿Keniuj uelis tikchiuaskej? Salmo 15:4 kijtoua ke akin mokaua ichan Jehová “nochipa kichiua tein motenkaua maski tapolos”. Komo amo tikchiuaj tein timotenkauaj ueliskia tikinyolkokoskej oksekin (Mat. 5:37). Jehová kichia maj se takat uan isiuatsin kichiuakan tein motenkaujkej keman monamiktijkej. Jehová no kineki maj tetatmej mochikauakan kichiuaskej tein motenkauaj iniuan ininkoneuan. Kemej tiktasojtaj Dios uan oksekin, timochikauaj tikchiuaskej tein timotenkauaj. No tiknextiaj ke tikinpatiuitaj itasojikniuan Dios keman kuali tikinseliaj uan tiyolkualmej iniuan (Rom. 12:13). Amo sayoj moneki timonechikoskej uan iniuan titanojnotsaskej tokniuan, ta no moneki timosentiliskej para timoixpetaniskej, ijkon okachi kuali iniuan timouikaskej uan no iuan Jehová. Uan no, tikchiuaj kemej Jehová keman kuali tikinseliaj oksekin. w24.06 12 § 15, 16

Jehová kinmatiltia tein melauak akin yolyemankej (Mat. 11:25). Keman timomachtijtoyaj tein melauak, tiknextijkej ke tiyolyemankej uan tikaujkej maj oksekin techpaleuikan (Hech. 8:​30, 31). Maski ijkon, moneki timoyekpiaskej para amo timoueyimatiskej. Komo timoueyimatij ueliskia tikitaskej ke tein tiknemiliaj no semi tapaleuia kemej tein tamachtia Biblia uan tein inechikol Jehová tanauatia. ¿Toni techpaleuis maj tiksentokakan tiknextikan ke tiyolyemankej? Maj tikelnamikikan ke Jehová okachi ueyi ke tejuan (Sal. 8:​3, 4). No uelis tiktajtaniskej Jehová maj techpaleui maj tiyolyemankej para maj timokauakan maj techmachtikan. Jehová techpaleuis maj okachi tikpatiuitakan itanemililuan uan amo tein tejuan tiknemiliaj. Tein Biblia tamachtia uan inechikol techpaleuiskej maj tikmatikan toni kinemilia. Keman tikonixtajtoltis Biblia xikontemo toni kinextia ke Jehová kiuelita maj se yolyemanik uan ke kitauelita akin moueyimati. Uan xionmochikaua tikonnextis ke tionyolyemanik keman mitsonmakaskej se tekit kampa monekis tikonixyekanas oksekin oso tein miakej kimatiskej. w24.07 10 § 8, 9

Itech xiuit 1919, Jesús kinixpejpenak seki tokniuan para maj kiixyekananij tanojnotsalis uan maj kinmakanij imomachtijkauan tein kinpaleuiskia maj kuali mouikakan iuan Jehová (Luc. 12:42). Uan moita keniuj Jehová kitiochiuani tekit tein kichiujtokej nejon tokniuan (Is. 65:​13, 14). Komo amo ixyetoskia keniuj titanojnotsaskej amo ueliskia tikchiuaskej tekit tein Jesús techmakak (Mat. 28:​19, 20). Komo itech tonechikol amo kiixtaliskiaj kani titanojnotsaskej, tinochin kampa yeski tiaskiaj. Uan xa sayoj seko titanojnotsaskiaj uan okseko amo keman tiaskiaj. ¿Tikonnemilia okseki taman kemej tapaleuia maj ixyeto keniuj tekitis inechikol Jehová? Axkan, Jesús kiixyekana ixolal Dios kemej kinixyekanak imomachtijkauan keman yetoya nikan taltikpak. w24.04 8, 9 § 2, 4

Ininkoneuj Adán uan Eva akin tayekanaya katka Caín. Uan yejua no kinejnekia tajtakolchiuas ijkon kemej itatuan. Uan no, Biblia kijtoua ke “kichiuaya tein amo kuali” (1 Juan 3:12). Xa yejua ika Jehová “amo kiyolpaktiaya keniuj katka Caín uan amo no kiyolpaktij tein kimaktilij”. Sayoj ke yejua amo kipatak tein kichiuaya, ta “tauelmikik uan moixtayokoltij”. Uan, ¿toni kichiuak Jehová? Iuan tajtoj (Gén. 4:​3-6). Jehová kuali kinojnotsak Caín uan kiluij ke kitatiochiuiskia komo kichiuaya tein kuali. Sayoj ke no kiluij ke komo kisentokaya kualantoya ueliskia kichiuas tein amo kuali. Maski ijkon, Caín amo kikakik Jehová uan amo no mokauak maj yejuatsin kipaleuiani maj moyolpata. ¿Toni kichiuak Jehová keman kiitak ke Caín amo mokauak maj kipaleui? ¿Kinemilij ke amo oksepa kipaleuiskia aksa maj moyolpata? ¡Amo! w24.08 10 § 8

Moisés kinelnamiktij israelitas ke ueliskia kichiaskej tein kuali. Jehová kintatiochiuiskia uan kichiuaskia maj nemikan miak xiujmej itech tal tein motenkaujka kinmakas. Ompa takualtsinkan katka uan moteltachiuaya. Moisés kijtoj nejin keman ika tajtoj nejon tal: “Itech nejon tal yetokej uejueyi uan kuajkuali xolalmej tein amo tejua tikinchijchiuak. Ompa no onkakej kalmej tein pexontokej ika miak taman tein kuali tein amo tikinchijchiuak, talkoyokmej tein amo tikinchijchiuak uan uvajkoujmej uan olivojkoujmej tein amo tikintokak” (Deut. 6:​10, 11). Sayoj ke Moisés no kinnejmachtij israelitas se taman. Komo kinekiaj kisentokaskej ompa nemiskej monekia kitakamatiskej tein kinnauatiaya Jehová. Moisés kinyolchikauak maj ‘kiixpejpenanij nemiskej’ uan ijkon kichiuaskiaj komo kikakiaj Jehová uan ‘amo kikauayaj’ (Deut. 30:20). Sayoj ke israelitas amo kitakamatkej. Yejua ika satepan, Dios kinkauak asirios uan satepan babilonios maj moinaxkatilianij uan maj kinuikanij okseko (2 Rey. 17:​6-8, 13, 14; 2 Crón. 36:​15-17, 20). w24.11 9 § 5, 6

Miakej akin kijtouaj ke kichiuaj kemej Cristo kinemiliaj ke sayoj komo kineltokaj Jesús uan kiitaj kemej inintemakixtijkauj uelis makisaskej (Juan 6:29). Sayoj ke amo yejuasan moneki, porin miakej ompa Galilea iuan takuaujtamatiaj Jesús sayoj ke satepan kikaujkej. ¿Keyej ijkon kichiujkej? Miakej kitojtokayaj Jesús para maj kinmakani tein yejuan kinekiaj. Kinekiaj maj kinpajti, maj kintamaka uan maj kiniluiani tein kinekiaj kikakiskej. Sayoj ke Jesús kiniluij ke amo sayoj ualajka nikan taltikpak para kinmakas tein yejuan kinekiaj, ta kinmachtiko tein monekia kichiuaskej para yeskiaj yekmelauj imomachtijkauan. Yejuan monekia motokiskej iuan Jesús, tein kijtosneki kikakiskej uan kichiuaskej tein tamachtiaya (Juan 5:40). w24.12 12 § 12, 13

¿Toni uelis kipaleuis se tokniuj maj amo kiyolkokook isiuatsin uan maj kitakachiua? Moneki mochikauas kichiuas kemej Jesús. Yejua tel kuali mouikak iniuan imomachtijkauan uan nejon kinnextilia takamej keniuj no uelis ijkon kichiuaskej. Maj tikitakan keniuj Jesús mouikaya iniuan itatitaniluan, keniuj kinnojnotsaya uan keniuj takamej akin monamiktijkejya no uelis ijkon kichiuaskej. Jesús nochipa kuali kinnojnotsaya itatitaniluan uan kintakachiuaya. Amo keman kinchiuilij tein amo kuali. Amo keman kikuik ichikaualis para kinmojmoujtis, ta katka yolyemanik uan hasta kinpaleuiaya ika seki taman (Juan 13:​12-17). Kiniluij imomachtijkauan: “Ximokauakan maj namechmachti, porin niyolnejmach uan niyolyemanik uan ijkon nanyolseuiskej” (Mat. 11:​28-30). Akin yolnejmach xa moitas ke amo chikauak, sayoj ke tein melauj ueli motsakuilia uan kipaleuia maj yolseujto keman ueliskia kualanis. w25.01 10 § 10, 11

Kemej amo uejkaua tamitiya nochi tein amo kuali, xa satepan okachi tatasojtis. Xa tekiuanij kichiuaskej tein amo tapaleuis, okachi mochiuaskej neteuilismej uan tetsaujmej oso momoyauaskej okseki kokolismej. ¿Keniuj uelis tikixpejpenaskej teisa tein kinextis ke titakuaujtamatij ke Jehová nochipa techpaleuis? Semi moneki maj tiktapouikan Jehová tein techtekipachoua, nejon semi techpaleuis. Maj tiktajtanikan maj techpaleui maj kuali titaixpejpenakan uan maj tiyolseujtokan para maj amo ‘timoteltekipachojtokan’ (Luc. 12:​29-31). Maj tiktataujtikan maj techpaleui maj tiyolpakikan ika tein tikpiaj (1 Tim. 6:​7, 8). Maj tiktemokan tamachtilismej itech toamaixuan tein techpaleuis maj tikmatikan toni tikchiuaskej keman amo tikpiaskej tomin. Miakej semi kinpaleuiani videos uan tamachtilismej tein ika tajtouaj nejon, tein moajsij itech jw.org. w25.03 28, 29 § 10, 11

Dios kiixtalijkaya ke kinseliskia itech ixolal akin amo katkaj judíos. Uan kiluij tatitanil Pedro maj kinojnotsati Cornelio, yejua yeskia semej de yekinika tokniuan akin amo katkaj judíos. Ijkuak, judíos amo mouikayaj iniuan akin amo katkaj judíos, yejua ika Pedro xa ouij kikisak kichiuas tein Jehová kinauatijka. Sayoj ke keman kiajsikamatik toni kinekia Jehová, kipatak kemej tanemiliaya. Keman Cornelio kiluij Pedro maj kikalpanoti, yejua yajki uan amo kijtoj ‘ke amo ueliskia’ (Hech. 10: 28, 29). Kinmatiltij kuali tanauatilmej Cornelio uan nochin akin nemiaj ichan, uan yejuan moauijkej (Hech. 10:​21-23, 34, 35, 44-48). Seki xiujmej satepan, Pedro kinyolmajxitij tokniuan nejin: “Nochin xikpiakan sayoj se tanemilil” (1 Ped. 3:8). Itech Biblia kijtoua keniuj uelis titanemiliskej kemej Jehová. Komo tikchiuaj kemej yejua, nochin tokniuan uan tejuan sayoj se taman kemej titanemiliskej. w25.03 9, 10 § 7, 8

Kemej tanemiliaj uan tein kichiuaj akin nemij nikan taltikpak, okachi kiixnamiki kemej tanemilia Jehová (Prov. 17:15). Yejua ika, moneki tikmatiskej keniuj takajkayauaj uan maj amo tikakikan tein kijtouaj para maj amo timosenkauakan oso maj tikauakan tein melauak. Tatitanil Pablo kiniluij tokniuan ke monekia okachi takuaujtamatiskej, uan tejuan no moneki ijkon tikchiuaskej. ¿Keniuj? Komo okachi kuali timomachtiaj Biblia uan komo timochikauaj okachi titanemiliskej kemej Jehová. Uan maski timotemaktijkejya uan timoauijkejya, moneki tiksentokaskej tikchiujtoskej nejin. Yejua ika, maski yekin oso ne uejkaujya tikixmatij tamachtilis tein melauak, tinochin moneki tikixtajtoltiskej uan timomachtiskej Biblia mojmostaj (Sal. 1:2). Komo kuali timomachtiaj Biblia techpaleuis maj okachi titakuaujtamatikan, yejua nejon tein Pablo no kiniluij tokniuan hebreos ke monekia kinextiskej (Heb. 11:​1, 6). w24.09 10 § 7, 8

Komo tikneltokaj ke Jehová yekmelauj nemi, techpaleuis maj amo tikchiuakan tein amo kiyolpaktia. Ijkon kipanok José, akin amo kinekik auilnemis, porin kiitaya ke Dios yekmelauj nemi uan kinekia kitakamatis (Gén. 39:9). Komo tejuan no tiknekij ijkon tikitaskej Jehová, moneki tikxeloskej tiempo para timotataujtiskej uan timomachtiskej Biblia. Ijkon okachi kuali iuan timouikaskej. Komo kuali timouikaj iuan Jehová ijkon kemej José, amo keman tikchiuaskej tein amo kiyolpaktia. Akin amo kichiuaj cuenta ke Jehová yekmelauj nemi uelis niman kikauaskej. Maj tikitakan toni kinpanok israelitas keman yetoyaj taluakyan. Kimatiaj ke Jehová nemia, sayoj ke peuak amo kineltokaj ke yejua kinmakaskia tein kinpolouaya (Éx. 17:​2, 7). Satepan kikaujkej Dios. Tejuan amo tiknekij tikchiuaskej ijkon kemej israelitas (Heb. 3:12). w24.06 24 § 14, 15

Kemej tinemij itech tonalmej keman tatamitiya, techpanos miak taman tein techchoktis. Jehová techita keman tichokaj uan kimachilia tein tikmachiliaj. Jehová kielnamiki keman tichoka, yejua ika keman tikpias ouijkayomej xiktapoui keniuj timomachilia. Nochipa xiktemo tietos iniuan tokniuan akin semi mitstasojtaj. Xiksentoka xikixtajtolti Biblia uan ijkon Jehová mitsyolseuis. Uelis tikmatis ke komo titaxikoua, yejuatsin mitstatiochiuis. Amo uejkaua tikitaskej keniuj Jehová kiuatsa toixayo (Apoc. 21:4). Uan itech xochital sayoj tichokaskej porin tiyolpakiskej. w24.12 20 § 3; 25 § 19

Tejuan tiitaixpantijkauan Jehová porin yejua ijkon kinekik (Is. 43:​10, 11). Uan yejuatsin motenkaua ke techpaleuis maj tiyolchikaujkej. Maj tikitakan naui taman kemej techpaleuia. Yekinika, Jesús techpaleuia keman tikteixmatiltiaj kuali tanauatilmej (Mat. 28:​18-20). Ojpatika, Jehová kinnauatia ángeles maj techpaleuikan (Apoc. 14:6). Expatika, Jehová techpaleuia ika ichikaualis, uan ijkon ueli tikelnamikij tein timomachtijkejya (Juan 14:​25, 26). Naujpatika, Jehová techmaka tokniuan akin iniuan titanojnotsaj. Jehová uan tokniuan techpaleuiaj maj tiyolchikaujkej uan maj tiksentokakan titanojnotsakan.Sayoj ke komo tikonneki tionmosenkauas keman amo semi tikinajsi ininchan, xionmotajtani: “¿Kani yetokej? ¿Tekititokej oso takouatoj?” (Hech. 16:13). Komo ijkon, xikonixtali tiontanojnotsas itech ojti. w24.04 17 § 10, 11

Komo se tokniuj akin monamiktijya kineki mochiuas tayekankej, isiuatsin uan ichankauan no moneki maj kuali ininka tajtokan, yejua ika moneki ‘kuali kinixyekanas ichankauan’. Oksekin moneki kiixmatiskej ke kuali kinixyekana, ke kintasojta uan kuali kinyekpia. Moneki iniuan taueyichiuas, kiitas maj yakan nochi nechikolmej uan maj mochikauakan tanojnotsaskej. Komo tokniuj kinpia ikoneuan akin konemejok uan ayamo kiajxitiaj 18 xiujmej, moneki maj ‘kitakamatikan uan maj kichiuakan tein kuali’ (1 Tim. 3:4). Keman kinmachtis moneki kinnextilis ke kintasojta. Nochin konemej kiuelitaj uetskaskej uan mauiltiskej, sayoj ke komo kuali kinmachtiaj, no tatakamatiskej, tapoujkaitaskej uan kichiuaskej tein kuali. Uan no, tepopaj moneki kinpaleuis ikoneuan maj kuali mouikakan iuan Jehová, maj mochikauakan kichiuaskej tein kijtoua Biblia uan maj kiixtalikan moauiskej. w24.11 22 § 10, 11

Komo okachi titanojnotsaj tikitaskej keniuj Jehová techpaleuia uan okachi iuan titakuaujtamatiskej (1 Cor. 3:9). Xikonelnamiki ke Jehová amo kinemilia ke oksekin okachi kitekitiliaj ke tejuatsin. Yejua kiita tein tikonpia moyolijtik uan semi yolpaki porin kimati ke semi tionmotasojkamati maj Jesús taxtauani para mitsonmakixtis (1 Sam. 16:7; Mar. 12:​41-44). Kemej Jesús toka momikilij, Jehová ueli techtapojpoluilia totajtakoluan, ueli kuali iuan timouikaj uan satepan uelis tinemiskej nochipaya. Maj nochipa tiknextikan ke tiktasojkamatiliaj Jehová porin techtasojta uan kineki techmakas miak taman tein kuali (1 Juan 4:19). Uan no, maj tiknextikan ke tiktasojkamatiliaj Jesús porin semi techtasojtak uan toka momikilij. w25.01 31 § 16-18

Xikonnemili keniuj momachilij akin kijkuiloj Salmo 73. Yejua kinitaya ke akin amo kitekitiliayaj Jehová amo kokolispeuayaj, tominpiayaj uan moitaya ke amo teyi kintekipachouaya (Sal. 73:​3-5, 12). Kemej kinitaya ke semi yolpakiaj salmista kinemilij ke nenkaj kitekitilijtoya Jehová. Yejua kijtoj ke “motekipachouaya nochin tonal” porin sayoj kinemilijtoya tein amo kipaleuiaya. ¿Toni kichiuak? Salmista yajki itech kaltsin kampa kiueyichiuayaj Jehová (Sal. 73:​16-18). Uan ompa uelik yektanemilij uan kiajsikamatik ke maski moitaya ke sekin kuali nemiaj, amo kichiayaj tein kuali satepan. Yejua ika moyolchikauak uan kiitak ke okachi kuali yetoya maj kitekitiliani Jehová, nejon kipaleuij maj yolseujto uan maj kisentoka kitekitili (Sal. 73:​23-28). w24.10 27 § 11, 12

Jehová techixpejpenak maj tiitaixpantijkauan (Is. 43:​10-12). Seki xiujmej achto, tokniuan Oloch Taojtokaltianij kijkuilojkej nejin: “Semi techyolpaktia maj techixmatikan kemej itaixpantijkauan Jehová”. Maj tiknemilikan ke aksa techpantia ke tikchiujkej tein amo kuali uan moneki maj aksa kijto ke tein techijtouilijkej amo melauj. Xa tikixpejpenaskiaj aksa akin kuali tikixmatij, iuan titakuaujtamatij uan akin kuali ika tajtouaj para maj kineltokilikan. No ijkon, kemej Jehová kuali techixmati uan touan takuaujtamati techixpejpenak para maj tikteixmatiltikan ke yejua Dios akin melauak. Semi tikuelitaj tiyeskij tiitaixpantijkauan, yejua ika tikteixmatiltiaj itokay uan tiknextiaj ke tein kijtouiliaj amo melauj. Ijkon tikchiuaj kemej se itaixpantijkauj Jehová (Sal. 83:18; Rom. 10:​13-15). w24.05 18 § 13

Jesús semi kiyolpaktiaya kinpaleuis oksekin. Se tonal, Jesús amo sayoj kinmachtij oksekin, ta no kinpaleuij ika okseki taman. Se tonal kichiuak se milagro uan kimiakiltij tein kikuaskiaj uan kinnauatij imomachtijkauan maj kixejxelouanij (Mar. 6:41). Ijkon tamachtij keniuj kinpaleuiskej oksekin. Uan no, kinnextilij ke no moneki se kinpaleuis oksekin ika tein kinpolos. Tatitanilmej semi yolpakkej porin kipaleuijkej Jesús keman kixejxelojkej takual tein kimiakiltij hasta ke “nochin tamajseujkej uan ixuikej” (Mar. 6:42). Amo sayoj nejon tonal Jesús kitayekanaltij kinpaleuis oksekin, ta nochipa ijkon kichiuak (Mat. 4:23). Yejua semi kiyolpaktiaya kinmachtis oksekin uan kinpaleuis ika okseki taman tein kinpolouaya. w24.11 16 § 10, 11

Itech nejin “tonalmej keman tatamitiya” okachi motaouijkantalis, yejua ika okachi uelis timosenpaleuiskej. No uelis tikinyolchikauaskej tokniuan uan tikinnextiliskej ke tikintasojtaj. Nejin uelis tikchiuaskej keman iniuan titajtoskej itech nechikol para maj kuali momachilikan, ijkon tinochin timotasojtaskej uan kuali timouikaskej. Yejua ika, keman tokniuan youij nechikolmej tiknekij tikinyolchikauaskej uan tikinnextiliskej ke tikintasojtaj. Tayekananij kinpaleuiaj tokniuan keman kipiaj ouijkayomej. Keman mochiua se tetsauit oso se tokniuj kokolispeua, tayekananij niman kitemouaj keniuj kipaleuiskej. No kinpaleuiaj uan kinyolchikauaj ika Biblia. Tokniuan okachi kinekiskej maj kinpaleui se tayekankej komo yejua kualtakat, teajsikamati uan kuali tekaki. Ijkon tokniuan kimachiliskej ke yekmelauj kintasojtaj uan amo kinouijmakas kichiuaskej tein tayekankej kinyolmajxitis ika Biblia (1 Tes. 2:​7, 8, 11). w24.06 29 § 12, 13

Jehová amo kikuik ichikaualis para kitsakuilis maj amo kitajyouiltianij iKonetsin, sayoj ke nejon amo kijtosneki ke amo kitasojtaya. Jehová techchijchiuak kemej uelis tikmachiliskej itech toyolo miak taman, uan kemej techchijchiuak ijkon kemej yejua, kijtosneki ke no kimachilia miak taman. Biblia kijtoua ke “miakej miakpa kiyolkokojkej” (Sal. 78:​40, 41).¿Uan keniuj momachilij Jehová keman kiitak ke kitajyouiltijtoyaj iKonetsin uan hasta kimiktijkej? Jehová xa semi motayokoltij uan moyolkokoj. Kemej Jehová taxtauak para techmakixtis kinextia ke yejua semi techtasojta, okachiok ke se totasojikniuj oso se tochankauj (Rom. 8:​32, 38, 39). Tejuan ipa timotasojtaj sayoj ke Jehová okachiok techtasojta. Xikonnemili nejin: ¿tikonneki tionnemis nochipaya? Jehová okachiok kineki xionnemi nochipaya. ¿Tikonneki maj Jehová mitsontapojpoluili motajtakoluan? Yejua okachiok kineki mitsontapojpoluis. Yejua sayoj kineki maj tiktasojkamatilikan tein toka kichiuak, maj tiktakamatikan uan maj iuan titakuaujtamatikan. Kemej Jehová taxtauak para techmakixtis kinextia ke semi techtasojta (Ecl. 3:11). w25.01 22, 23 § 8, 9

Tinochin kemansa titaixpejpenaj ika tein tikitaj, tein tikakij uan tein tikmachiliaj. Tein tikitaj uan tein tikakij amo nochipa tapaleuia. Uan no komo titaixpejpenaj ika tein tikitaj, tein tikakij uan tein tikmachiliaj, xa tikchiuaskej tein Jehová amo kineki maj tikchiuakan (Ecl. 11:9; Mat. 24:​37-39). Sayoj ke komo nochipa tiknextiaj ke titakuaujtamatij tikixpejpenaskej tein “kiyolpaktia toTekotsin”. Komo tikchiuaj tein Dios techyolmajxitia, tiyolseujtoskej uan semi tiyolpakiskej (Sal. 16:​8, 9; Is. 48:​17, 18). Uan komo tiksentokaj tiknextiaj ke titakuaujtamatij iuan Jehová uelis tinemiskej nochipaya (2 Cor. 4:18). ¿Keniuj uelis tikmatiskej ox tiknextiaj ke yekmelauj titakuaujtamatij iuan Jehová keman titaixpejpenaj? Tinochin uelis timotajtaniskej nejin: “¿Toni ika nimoixyekana keman nitaixpejpena? ¿Sayoj ika tein ueli nikita oso ika tein Jehová nechyolmajxitia?”. w25.03 20, 21 § 3, 4

Tinochin uelis tikchiuaskej teisa para maj okachi miakej kinekikan kiueyichiuaskej Dios. ¿Keniuj? Komo tikchiuaj kemej Jehová. Yejua amo akin kichikaujkauia maj kiueyichiua, ta iuan motokiaj porin kiitaj keniuj yejua kinnextilia ke kintasojta (Jer. 31:3; Juan 6:44). Akin momachtiaj keniuj tamati Jehová uan kiitaj ke techtasojta, kinpaleuia maj iuan motokikan. ¿Toni uelis tikchiuaskej para maj oksekin no kinekikan kiueyichiuaskej? Se taman yejua komo tikinnextiliaj tokniuan ke tikintasojtaj. Akin amo taneltokayaj uan yajkej nechikol ompa Corinto kijtojkej nejin: “Dios yekmelauj namouan yetok”. Tejuan no tiknekij maj ijkon momachilikan akin yekinika yaskej nechikolmej (1 Cor. 14:​24, 25; Zac. 8:23). Yejua ika semi moneki maj tikchiuakan nejin tein Biblia tayolmajxitia kemej tein tikitaj itech tajkuilol tein axkan timomachtiaj. w24.04 23, 24 § 16, 17