¿Akoni katka María Magdalena?
Tein Biblia kijtoua
María Magdalena katka semej itatojtokakauan Jesucristo akin amo kikauak. Xa kiluiayaj Magdalena, porin ualeuaya de ueyi xolal Magdala (xa Magadán), tein amo uejka moajsia den mar de Galilea uan xa ompa nemik.
María Magdalena katka semej siuamej akin iuan yajtinemik Jesús uan imomachtijkauan. Yejua kikuik tein kipiaya para kinpaleuis (Lucas 8:1-3). Yejua no yetoya keman kimiktijkej Jesús uan no katka semej akin achto kiitak Jesús keman oksepa nemik (Marcos 15:40; Juan 20:11-18).
¿Katka se siuat akin monamakaya iuan takamej?
Biblia amo kijtoua ke María Magdalena monamakaya iuan takamej. Biblia sayoj kijtoua ke Jesús kikalankixtilijka chikome amokuali ejekamej (Lucas 8:2).
Yejua ika, ¿keyej moijtoua ke yejua monamakaya iuan takamej? Miak xiujmej satepan ke momikilij, peuak moijtoua ke yejua katka siuat akin kimetspajpakak Jesús ika iixayo uan kimetsuajuatsak ika itson. Nejon siuat xa monamakaya iuan takamej (Lucas 7:36-38). Sayoj ke nion kanaj itech Biblia kiteajsikamatiltia nejon.
¿Katka semej itatitaniluan Jesús?
Amo. Católicos kiluiaj “Santa María Magdalena” uan semej itatitaniluan Jesús porin katka semej akin yekinika kinmatiltij tatitanilmej ke Jesús oksepa nemik (Juan 20:18). Sayoj ke nejon amo kijtosneki ke yejua semej tatitanilmej. Uan nion kanaj itech Biblia moijtoua ke yejua se tatitanil (Lucas 6:12-16).
Biblia motamiijkuiloj kemej itech xiuit 100. Sayoj ke itech xiuit 600 akin taixyekanayaj itech religión católica kiixtalijkej kinotsaskej María Magdalena kemej se santo. Itech seki tajkuilolmej tein mochijchiujkej kemej itech xiuit 200 oso 300 moijtoua ke seki itatitaniluan Jesús kinexikoluiayaj María. Sayoj ke nejon tajkuilolmej amo pouij itech Biblia. Sayoj kijtojkej tein yejuan kinemiliayaj uan amo tein Biblia kijtoua.
¿Katka isiuatsin Jesucristo?
Amo. Biblia kijtoua ke Jesús amo keman monamiktij.a
a Xikonita tamachtilis “¿Se casó alguna vez Jesús? ¿Tuvo hermanos carnales?”.