Akin kuali mouika iniuan oksekin amo momachilia iselti | ¿Keniuj Biblia tapaleuia?

Itech xiuit 2023, seki taixmatinij kiitakej ke akin momachiliaj ininselti, moneki teisa kichiuaskej, porin akin ijkon momachiliaj, peua kinkui seki kokolis. ¿Uelis teisa kichiuaskej?

• “Akin momachilia iselti uan amo akin iuan mouika, uelis peuas tayokoyas uan kokolispeuas. Sayoj ke amo onkak keyej ijkon moajsis. Kipaleuis maj kuali moajsi komo kitemoua kuali mouikas iniuan oksekin”a (Vivek Murthy, director general de Salud Pública de Estados Unidos).

Sayoj ke aksa no uelis momachilis iselti maski moajsis iniuan miakej. Itech nochi nejin tein kichiua maj aksa momachili iselti, Biblia uelis kipaleuis. Nejin amatajkuilol techiluia keniuj uelis kuali timouikaskej iniuan oksekin, uan ijkon amo timomachiliskej toselti.

Tein kijtoua Biblia semi tapaleuia

Xikontemo tionmouikas iniuan oksekin. Keman tikontemos tionmouikas iuan aksa, moneki amo sayoj tikontapouis tein tikonmachilia, ta no monekis tikonkakis tein yejua mitsoniluia. Komo ininka tionmotekipachoua oksekin, semi kuali tionmouikas iniuan.

• Tein kijtoua Biblia: “Amo xiktemokan tein sayoj namejuan namechpaleuis, ta no tein kinpaleuis oksekin” (Filipenses 2:4).

Amo xionmouika sayoj iniuan sekin. No xikontemo tionmouikas iniuan akin okachi xiuejkejya oso ayamo semi xiuejkej uan akin okseko kayomej oso taman nemij.

• Tein kijtoua Biblia: “Xikpatauakan namoyolo” (2 Corintios 6:13, nota).

Para tikonmatis keniuj uelis timouikaskej iniuan oksekin, xikonlero tamachtilis “Cómo saciar la sed de amistad”.