AXKAN PANOUA TLEN AMO KUALI

4 | Xikneltoka satepan kuali tiyetos

¿TLEKA MONEKI IJKON TIKCHIUAS?

Uelis amo kuali timomachiliskej uan timokokoskej porque axkan panoua tlen amo kuali. Akinmej sapanoua tlajyouiaj xamo ayakmo kineltokaj satepan kuali yetoskej. ¿Tlen kinpanoua?

Sekimej amo kinekij mokuayejyekoskej tlen kinpanos satepan.
Oksekimej konij alcohol noso kimotlaliliaj drogas para ayakmo mokuayejyekoskej tlen kintekipachoua.
Sekimej mokuayejyekouaj ayakmo ipati yoltoskej, ik non, kinekij momiktiskej.

¿Otikmatiaya?

Xamo satepan ayakmo mitspanos tlen axkan mitstlajyouiltia uan amo tikmati kox san niman moyektlalis.
Tla amo moyektlalia tlen axkan mitspanotok, uelis tikitas tlen mitspaleuis xitlaxiko.
Biblia kijtoua moyektlalis nochi tlen axkan mitspanoua uan ayakmo keman ijkon mitspanos.

¿Tlen uelis tikchiuas?

Biblia kijtoua: “Amo ximotekipachokah kenomi nontlanexiliskeh, porke mostla ok se welta nonmotekipachoskeh. Nochi tonati saman yetos itla tlan ika weletis nonmotekipachoskeh” (Mateo 6:34).

Mojmostla xikchiua tlen moneki. Tla san mitstekipachoua tlen panos amo uelis tikchiuas tlen axkan moneki.

Tla sapanoua mitstekipachoua tlen uelis panos, ayakmo tikneltokas satepan kuali tiyetos.

¿TLEN MITSPALEUIS? Nikan kijtoua seki tlamantli

XIYOLPAKI MASKI ITLAJ OMITSPANOK

Biblia kijtoua: “Akin moyolkokoua amo kuali kita nochi tonalmej; pero akin yolkuali kipia se ueyi iluitl” (Proverbios 15:15). Tla san timokuayejyekojtok tlen mitspanotok amo tikitas ken uelis tikyektlalis. Pero tla tiyolpaki, xamo tikitas tlen uelis tikchiuas para titlaxikos.

Amo okachi xikita nion xikkaki noticias.
Mojmostla ximokuayejyeko tlen tlamantli kuali omitspanok uan ximotlasojkamati.
Mojmostla xikijkuilo tlen moneki tikchiuas. Sejse tonal xikxelo tlen tikchiuas, ijkon uelis tikitas otikchi tlen otimokuayejyeko.

XIKILUI IKAJ MAMITSPALEUI

Biblia kijtoua: “Akin moxeloua [...] kixtopeua nochi ixtlamatilistli tlen tepaleuia” (Proverbios 18:1). Akin uetsi ijtik tekochtli amo uelis san iselti kisas, moneki ikaj makipaleui.

Xikinmilui mofamiliares uan moyolikniuan mamitspaleuikan.
Xikilnamikto tejuatsin noijki uelis tikinpaleuis. Tla tikinpaleuia oksekimej, amo san timokuayejyekojtos tlen mitspanotok.
Tla ayakmo tikneltoka satepan kuali tiyetos uan ayakmo tikneki tiyoltos, xikitati tepajti. Xamo timokokoua, ik non, timoyolkokoua. Miakej yokinpaleui kuali mamomachilikan porque okitatoj tepajtia.

a Revista ¡Ma titlachixtokan! amo kijtoua tlen pajtli uelis tikselis.

Biblia techpaleuia matikneltokakan satepan kuali tiyetoskej

Akin okijkuilo se salmo noso se tlakuikali, okilui toTajtsin Dios: “Motlajtol se lámpara para nokxi uan se tlauili para noojui” (Salmo 119:105). ¿Tlen kijtosneki tlen ompa kijtoua?

Tla tikuikaj se lámpara, ijkuak yiyouak uelis timotlauiliskej. Noijki ijkon Biblia techititia tlen uelis tikchiuaskej ijkuak itlaj tikpejpenaskej.

Ijkon ken ika se tlauili ueli tikitaj kanin tiaskej, noijki ijkon Biblia yetoskia ken se tlauili porque techiluia tlen tikseliskej satepan.

Biblia amo san kijtoua ken okinchijchijkej tlakatl uan siuatl, noijki techiluia tlen panos satepan uan kinankilia tlen nikan ijkuilitok.

¿Ken?

¿Ken opejki titlajyouiaj? Biblia kijtoua: “Por itlajtlakol se tlakatl n tlajtlákoli okalak itech nin tlaltíkpaktli iwa okualík mikílistli, ijkó noiwa nochteh mikkih porke nochteh otlajtlakolchijkeh” (Romanos 5:12).

¿Tleka?

¿Tleka san tejuan amo ueli tikyektlaliaj tlen techtlajyouiltia? Biblia kijtoua: “Tlakatl amo kinamiki monauatis nion kinamiki kiyekanas kanin tlaksas” (Jeremías 10:23). Tlen ompa kijtoua melauak ijkon panotok.

¿Tlen?

¿Tlen kichiuas toTajtsin Dios para tlayektlalis? Biblia kijtoua: “Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli, porke nochi tlan yowejka okatka, nochi yotlatlajtlanki” (Apocalipsis 21:4).