Diciembre

¿Jehová kipia chikaualistli uan uelis kinyolitis akinmej yoixpolikej? Kema porque ye “nochi weleti kichiwa” (Apoc. 1:8). Ye uelis kintlanilis nochtin akinmej kikokoliaj uan noijki kitlanilis mikilistli (1 Cor. 15:26). Jehová amitlaj kilkaua ikinon uelis tikneltokaskej kinyolitis akinmej yoixpolikej. Biblia kijtoua sitlalimej kinnotsa ika intoka (Is. 40:26). Jehová kinmilnamiktok nochtin akinmej yoixpolikej (Job 14:13; Luc. 20:38). Jehová kilnamiki ken okatkaj akinmej yoixpolikej, tlen okichiuayaj uan tlen okinpaktiaya. Axkan yotikitakej uelis tikneltokaskej Jehová kinyolitis akinmej yoixpolikej porque ye kineki uan kipia chikaualistli ijkon kichiuas. Noijki tikneltokaj ijkon kichiuas porque ye yiuejkika okinyoliti sekimej. Okinpaleui sekimej tlakamej uan noijki Jesucristo makinyolitikan akinmej yoixpolikaj. Matimomachtikan Juan capítulo 11 uan ompa kijtoua Jesús okiyoliti se tlakatl. w23.04 9, 10 párrs. 7-9

Ijkon uelis tikchiuaskej ijkuak kuali tikinnankiliaj akinmej itlaj techtlajtlaniaj uan amo tikualanij. Ijkon akin tiktlapouijtokej ok kinekis techkakis. Pero amo moneki matimotlapouikan iuan akin san techpinauia noso kineki touan mokualanis (Prov. 26:4). Ijkon xamo miakej kinekiskej techkakiskej. Miak ipati matiyetokan tiyolyamankej ijkon ken yotimomachtijkej. Matikiluikan Jehová matechpaleui amo matikualanikan ijkuak oksekimej itlaj techtlajtlaniskej noso kinekiskej techpinauiskej. Matiyetokan tiyolyamankej ijkuak itlaj techtlajtlaniskej uan amo matikualanikan. Tla kuali titlanankiliskej uan amo tikualaniskej, xamo non kinpaleuis makinekikan kimatiskej tlen tlamachtia Biblia. Ikinon ‘matikmatikah kenomi tikinnankiliskeh nochteh akimeh [itlaj] techtlajtlaniah’ (1 Ped. 3:15). w23.09 19 párrs. 18, 19

Matikitakan naui tlamantli tlen kichiua akin kimati mochias. Amo san niman kualani. Amo momakopa ijkuak oksekimej kikualaniaj uan amo san niman kualani ijkuak sotlaua (Éx. 34:6). Akin kimati mochias moyolseuia. Amo sapanoua motekipachoua nion amo kualani ijkuak itlaj amo san niman panoua (Mat. 18:​26, 27). Akin kimati mochias amo san niman itlaj kichiua. Pero tla moneki tikchiuaskej itlaj sapanoua ipati, akin kimati mochias amo san niman peua kichiua nion amo san niman kitlamia. Ye achto kuali mokuayejyekoua para kimatis tlen kipejpenas uan satepan yolik kichiua tlen okipejpenki para kuali makisa. Akin kimati mochias tlaxikoua ijkuak tlajyouia uan amo san kualani. Akin kimati mochias amo san kitekipachoua tlen kipanoua uan yolpaki kitekichiuilia Jehová (Col. 1:11). Tinochtin tlen tiktekichiuiliaj Jehová moneki tikchiuaskej naui tlamantli tlen yotikitakej uan ijkon tikteititiskej tikmatij timochiaskej. w23.08 20, 21 párrs. 3-6

Jehová kita tlen tikpiaj itech toyolo ikinon moneki tikmaluiskej. Ye kita nochi tlen tikpiaj toijtik pero tejuan amo tikitaj nion oksekimej uelij kitaj. Jehová techtlasojtla ijkuak kita amo tikilkauaj tlen ye techmachtia. Non techpaleuis matiyetokan tiixtlamatkej uan uelis nochipa tiyoltoskej. Noijki amo tikkauiliskej Satanás matechkajkayaua nion akinmej ye kinyekana (Juan 4:14; 1 Juan 5:​18, 19). Tejuan okachi tiktlasojtlaskej Jehová uan tiktlakaitaskej tla inauak timotokiaj. Ijkon amo tikyolkokoskej nion amo timokuayejyekoskej titlajtlakolchiuaskej. Se tokni tlen itoka Marta uan chanti Croacia okinekiaya tlajtlakolchiuas. Ye okijkuilo: “Amo kuali onimokuayejyekouaya. Onikitaya oui amo nitlajtlakolchiuas porque onechyoltilanaya tlen amo kuali. Pero ne niktlakaita Jehová uan non onechpaleui”. Marta okijto okitlakaitaya Jehová ikinon omokuayejyeko ken tlajyouiskia tla kichiuaskia tlen amo kuali. Tejuan noijki uelis ijkon tikchiuaskej. w23.06 20, 21 párrs. 3, 4

Jesús okimatiaya Jehová kineki kichipauas itoka. Non kijtosneki omonekiaya kiteititis san tlakajkayauaj akinmej kijtouaj tlen amo melauak. Ikinon okinmilui imachtijkauan ken moneki motlatlaujtiskej. Okinmilui makijtokan: “ToTajtsin Dios tlen tika iluikak, nochtin makitlakaitakan motoka” (Mat. 6:9). Jesús okimatiaya sapanoua ipati mamochipaua itoka iTajtsin. Amikaj mochijchikaua ijkon ken Jesús para kichipauas itoka Jehová. Ijkuak okikitskijkej akinmej okikokoliayaj Jesús okijtojkej ye okiuijuikalti toTajtsin Dios. Non kijtosneki okisokioti itoka. Pero Jesús okitaya sapanoua otlajtlakolchiuaya akin ijkon okichiuaya. Achto kikitskiskiaj ye omoyolkokouaya porque okimatiaya kijtoskiaj ye okisokioti itoka iTajtsin. Xamo ikinon ye “sapanoua omotekipachouaya” (Luc. 22:​41-44). w24.02 11 párr. 11

Tejuan moneki okachi tikintlasojtlaskej Jehová uan Jesús uan amo okachi tiktlasojtlaskej tofamilia (Mat. 10:37). Pero non amo kijtosneki amo tikpaleuiskej tofamilia. Amo matikijtokan amo uelis tiktekichiuiliskej Jehová tla tikpaleuiskej tofamilia. Moneki tikpaleuiskej tofamilia tla tiknekij tikinyolpaktiskej Jehová uan Jesús (1 Tim. 5:​4, 8). Okachi tiyolpakiskej tla ijkon tikchiuaskej. Jehová kimati familias yolpakiskej tla siuatl uan inamik motlasojtlaj uan motlakaitaj. Noijki tla tetajmej kintlasojtlaj inkoneuan uan kuali kinmachtiaj. Noijki yolpakiskej konemej tla kintlakaitaj intatajuan (Efes. 5:33; 6:​1, 4). Matikneltokakan Biblia uelis techpaleuis kuali matimouikakan iuan tofamilia. Amo matimokuayejyekokan okachi kuali tlen tejuan tikijtouaj, okachi kuali tlen kichiuaj kanin otimoskaltijkej noso okachi kuali tlen kijtouaj ixtlamatkej. Matimomachtikan tlen kijtouaj amatlajkuilolmej porque ompa techiluiaj ken uelis timoyekanaskej ika principios bíblicos. w23.08 28 párrs. 6, 7

Siuamej noijki kinpaleuis tla momachtiaj kichiuaskej seki tlamantli. Seki tlamantli tlen momachtiaj ijkuak ok takotsitsintin satepan kinpaleuis. Ximomachti xiktlajtolti se amatl uan xitlajkuilo. Itech seki altepemej amo kuali kitaj tla se siuatl kineki momachtis kitlajtoltis se amatl uan tlajkuilos. Pero nochi non tlamantli techpaleuia akinmej tikchiuaj ken Cristo (1 Tim. 4:13). Ikinon ximochijchikaua ximomachti xiktlajtolti se amatl uan xitlajkuilo. ¿Ken mitspaleuis tla ijkon tikchiuas? Non mitspaleuis san niman xikajsi kanin titekipanos para tikpias tlen ika timopanoltis. Noijki mitspaleuis okachi kuali ximomachti Biblia uan kuali tikinmachtis oksekimej. Pero noijki mitspaleuis kuali ximouika iuan Jehová ijkuak tiktlajtoltis Biblia uan timokuayejyekos tlen timomachtia (1 Tim. 4:15). w23.12 20 párrs. 10, 11

Matikiluikan Jehová matechpaleui amo matechyoltilana tlen amo kuali. Tejuan titlajtlakolejkej ikinon moneki timochijchikauaskej amo matechyoltilana tlen amo kuali. Satanás mochijchikaua kichiuas matitlajtlakolchiuakan. Ye kineki matikitakan tlen amo kuali uan ijkon ayakmo kuali matimokuayejyekokan. Tla timoyolpaktiskej ika tlen amo kuali, ayakmo kuali timokuayejyekoskej uan Jehová ayakmo techitas tichipauakej. Noijki non uelis kichiuas matitlajtlakolchiuakan (Mar. 7:​21-23; Sant. 1:​14, 15). Toselti amo uelis titlaxikoskej ikinon moneki matechpaleui Jehová para amo tikchiuaskej tlen amo kuali. Jesús okijto ijkuak omotlatlaujti: “Amo xiktekawili matechyoltilana n tlajtlákoli, yej techmakixti imak n amokualitlakatl” (Mat. 6:13). Jehová kineki techpaleuis pero moneki tiktlatlaujtiskej matechpaleui uan matikchiuakan tlen tikiluiaj. w23.05 6, 7 párrs. 15-17

Tla kipatioitaj kuali mouikaskej iuan Jehová, kinpaleuis makitlakamatikan. Ijkon kuali mouikaskej maski kinpanos itlaj tlen kichiuas ayakmo mamotlasojtlakan. Akinmej mouikaj iuan Jehová mochijchikauaj kichiuaskej ken ye. Yejuan kichiuaj tlen kuali, kimatij mochiaj uan motlapojpoluiaj (Efes. 4:32–5:1). Akinmej yomonamiktijkej nochipa motlasojtlaskej tla ijkon kichiuaskej. Se tokni tlen yikipia 25 xiuitl omonamikti uan itoka Lena, okijto: “¡Amo oui tiktlasojtlaskej uan tiktlakaitaskej akin kuali mouika iuan Jehová!”. Matikitakan tlen kijtoua Biblia. Jehová okinpejpenki José uan María para makiskaltikan iKone tlen yetoskia Mesías. Yejuan okatkaj ixuiuan David. ¿Tleka okinpejpenki? Porque kuali iuan omouikayaj. Noijki Jehová okimatiaya yejuan kuali omoyekanayaj ika itlanauatiluan. w23.05 20, 21 párrs. 3, 4

Jesús ye akin techyekana uan amo tlajtlakole. Pero akinmej ye okinpejpenki matechyekanakan tlajtlakolejkej. Ikinon ualeua tikitaj oui tikintlakamatiskej ijkuak technauatiaj matikchiuakan itlaj tlen amo tiknekij tikchiuaskej. Ijkon okipanok apóstol Pedro. Se ángel okilui makinkua yolkamej tlen iTlanauatil Moisés okijtouaya amo makinkuakan. Pedro amo okinekiaya kikuas nakatl maski eyi uelta yokiluijkaj ijkon makichiua (Hech. 10:​9-16). Amo kuali okitaya tlen okinauatijkej. Apóstol Pablo okintlakamatki tlayekankej tlen okatkaj Jerusalén ijkuak okiluijkej makiteititi okitlakamatiaya Tlanauatil. Ikinon omonekiaya kinuikas naui tlakamej uan mamochipauakan ijkon ken okijtouaya iTlanauatil Moisés. Pablo okimatiaya ayakmo omonekiaya kichiuaskej tlen okijtouaya Tlanauatil uan ye amo okichiuaya tlen amo kuali. Pero ye san niman otetlakamatki: “Mostlatika, Pablo okinuikak nonmej tlakamej uan omochipauatoj ijkon ken kijtoua iTlanauatil Moisés” (Hech. 21:​23, 24, 26). Ijkon okinpaleui tokniuan san sekan mayetokan (Rom. 14:​19, 21). w23.10 10 párrs. 15, 16

Moneki timotlakaitaskej para kuali timouikaskej inmiuan oksekimej. Akinmej kinekij mouikaskej iuan Jehová noijki moneki kitlakaitaskej. Tinochtin moneki tiktlakaitaskej Jehová maski yimiak xiuitl tiktekichiuilijtokej noso amo. Pero ¿tlen kijtosneki tiktlakaitaskej toTajtsin Dios? Ijkuak Jesús okatka nikan tlaltikpak okiteititi okitlakaitaya iTajtsin, noijki ijkon akin kitlakaita Jehová amo kichiua itlaj tlen kiyolkokos (Heb. 5:7). Jesús okitlakaitaya iTajtsin amo porque okimauiliaya (Is. 11:​2, 3). Ye okitlasojtlaya iTajtsin ika nochi iyolo ikinon nochipa okitlakamatki (Juan 14:​21, 31). Tejuan noijki sapanoua tiktlakaitaj toTajtsin Dios uan tiktekichiuiliaj porque ye tetlasojtla, ixtlamatki, kichiua tlen kuali uan sapanoua chikauak. Noijki tikmatokej tlen tikchiuaj uelis kiyolpaktis noso kiyolkokos porque ye sapanoua techtlasojtla (Sal. 78:41; Prov. 27:11). w23.06 14 párrs. 1, 2; 15 párr. 5

Ijkuak Uzías opejki okachi tlanauatia okilka Jehová okipaleuiaya makichiua miak tlamantli. Tlen okipanok techmachtia moneki tikilnamiktoskej Jehová techmaka nochi tlen kuali tikpiaj uan ye techpaleuia matiktekichiuilikan. Moneki ye tiktlasojkamatiliskej nochi tlen tikchiuaj uan amo moneki timoueyinekiskej (1 Cor. 4:7). Moneki tiyetoskej tiyolyamankej uan tikilnamiktoskej tejuan titlajtlakolejkej ikinon moneki oksekimej matechpaleuikan. Se tokni tlen yikipia kanaj 60 xiuitl okijkuilo: “Yonikajsikamatki amo moneki nikualanis tla oksekimej nechiluiaj amo kuali tlen nikchiua. Nimochijchikaua nimoyektlalis tla ikaj nechiluia itlaj amo kuali onikchi”. Kuali tiyetoskej tla nochipa tiyolyamankej uan tiktlasojtlaj Jehová (Prov. 22:4). w23.09 10 párrs. 10, 11

Tokniuan tlen okatkaj itech achto omonekiaya tlaxikoskej. Yejuan okintekipachouaya seki tlamantli pero noijki otlajyouiayaj porque okiueyichiuayaj toTajtsin Dios. Miakej tokniuan otlajyouiayaj porque infamilia, tekiuajkej romanos uan tlayekankej judíos okintlajyouiltiayaj (Mat. 10:21). Noijki amo omonekiaya kinkakiskej akinmej okikajkej Jehová uan okixnamikiayaj. Porque yejuan otlamachtiayaj tlen amo melauak uan okinekiayaj kinxexeloskej tokniuan (Hech. 20:​29, 30). Pero tokniuan otlaxikojkej maski ijkon okinpanok (Apoc. 2:3). ¿Tlen okinpaleui matlaxikokan? Yejuan omokuayejyekouayaj ken otlaxiko Job uan oksekimej itekipanojkauan Jehová tlen yiuejkika okatkaj (Sant. 5:​10, 11). Noijki okitlatlaujtiayaj Jehová makinyolchikaua (Hech. 4:​29-31). Yejuan noijki okilnamiktokaj Jehová kinteochiuaskia tla tlaxikoskiaj (Hech. 5:41). Tejuan noijki uelis titlaxikoskej tla nochipa timokuayejyekouaj ken otlaxikojkej itekipanojkauan Jehová tlen kijtoua Biblia uan amatlajkuilolmej. w23.07 3 párrs. 5, 6

Jehová uan Jesús nochipa techpatioitaskej. Pedro omonekiaya kipejpenas itlaj miak ipati ijkuak ye yokijto amo okixmatiaya Jesús. ¿Mosotlauaskia noso ok yetoskia idiscípulo Cristo? Jesús okitlatlaujti Jehová makipaleui Pedro para nochipa matlaneltoka. Jesús okilui Pedro ipatka omotlatlaujti uan ye okimatiaya satepan uelis kinyolchikauaskia ikniuan (Luc. 22:​31, 32). Pedro omoyolchika ijkuak okilnamik tlen okijto Jesús. Tejuan noijki moneki tikpejpenaskej itlaj miak ipati. Ijkuak moneki itlaj tikpejpenaskej, Jehová xamo kichiuas matechyolchikauakan tokniuan tlayekankej para matikchiuakan tlen kuali (Efes. 4:​8, 11). Yotikitakej Jehová okinmakak tlen ika mopanoltiskej Pedro uan oksekimej apóstoles. Jehová noijki techteochiuas tla nochipa tiktekichiuiliaj. w23.09 24, 25 párrs. 14, 15

Jehová kimati tlen tikchiuaj maski amo sapanoua ueyi. Kita ken timochijchikauaj uan kineki techteochiuas. ¿Otikatka titlayekanki noso siervo ministerial? Jehová amo kilkaua tlen otikchi uan ken otikteititi titetlasojtla (1 Cor. 15:58). Noijki kita ken ok titetlasojtla. Jehová kineki tinochtin okachi matiktlasojtlakan uan matikintlasojtlakan oksekimej. Para okachi tiktlasojtlaskej Jehová moneki tiktlajtoltiskej Biblia, timokuayejyekoskej tlen tiktlajtoltiaj uan mojmostla timotlatlaujtiskej. Noijki moneki tikinpaleuiskej tokniuan para tikteititiskej tikintlasojtlaj. Ijkuak okachi titetlasojtlaj, okachi timouikaj iuan Jehová uan noijki inmiuan tokniuan. Ijkon uelis nochipa inmiuan timouikaskej. w23.07 10, 11 párrs. 11, 13; 13 párr. 18

Tisejse moneki tikpejpenaskej ken timopajtiskej. Ijkuak timopajtiskej moneki timoyekanaskej ika tlen kijtoua Biblia uan amo tikmotlaliliskej estli nion amo tikinmitatiuij akinmej tetlajchiuiaj (Hech. 15:20; Gál. 5:​19, 20). Tisejse moneki tikpejpenaskej ken timopajtiskej. Maski tejuan yitikmatij ken timopajtiskej moneki tiktlakaitaskej ken oksekimej tokniuan mopajtiaj. Ikinon matikilnamiktokan: Se, san ika iTekiuajkayo toTajtsin Dios timopajtiskej uan ayakmo timokokoskej (Is. 33:24). Ome, “nochteh kuali makimatokah” tlen moneki tikchiuaskej (Rom. 14:5). Eyi, amo matikinteneuakan tokniuan uan amo matikchiuakan itlaj tlen makinyolkoko (Rom. 14:13). Naui, tinochtin timotlasojtlaj uan tikmatij okachi ipati timouikaskej inmiuan tokniuan uan amo tlen tejuan timokuayejyekouaj (Rom. 14:​15, 19, 20). w23.07 24 párr. 15

¿Tikpatioita timouikas iuan Jehová? Tikneltokaj tikpatioita pero amo san tejuatsin ijkon tikchiua. Yiuejkika noijki miakej okipatioitayaj mouikaskej iuan Jehová (Sal. 104:​33, 34). Miakej okikajkej seki tlamantli para kitekichiuiliskej. Ijkon okichijkej nazareos tlen yiuejkika opouiayaj itech altepetl Israel. Ikaj omotemakaya para kichiuas itlaj miak ipati. Nin tlajtoli kinnamiki ijkon makinmiluikan akinmej okatkaj nazareos porque yejuan okikauayaj seki tlamantli para kitekichiuiliskej Jehová. Tlanauatil tlen okijkuilo Moisés okijtouaya se tlakatl noso se siuatl uelis kiluiskia Jehová kitekichiuiliskia ken nazareo kanaj keski xiuitl (Núm. 6:​1, 2). Akin omochiuaya nazareo omonekiaya kintlakamatis seki tlanauatilmej tlen israelitas amo omonekiaya kintlakamatiskej. ¿Tlen okiyoliniaya ikaj mamochiua nazareo? Ikaj omochiuaya nazareo porque okitlasojtlaya Jehová uan omotlasojkamatiaya porque okiteochiuaya (Deut. 6:5; 16:17). w24.02 14 párrs. 1, 2

Itech Biblia tlajtoli hebreo “amo tekaua” noso “nochipa tetlasojtla”, kijtosneki ijkuak ikaj kuali mouika inmiuan oksekimej uan sapanoua tetlasojtla. Biblia miak uelta ijkon kiteititia ijkuak kijtoua toTajtsin Dios kintlasojtla akinmej kitekichiuiliaj. Noijki ijkon kiteititia ijkuak kijtoua akinmej kitekichiuiliaj toTajtsin Dios motlasojtlaj (2 Sam. 9:​6, 7). Jehová noijki kineki nochipa iuan matimouikakan. Tla ijkon tikchiuaj, nochipa timouikaskej iuan Jehová ijkon ken Daniel okichi. Daniel miak uelta okiteititi omouikaya iuan Jehová. Ye sapanoua otlajyoui ijkuak yokipiaya kanaj 90 xiuitl. Sekimej tlen okipaleuiayaj tekiua okikokoliayaj Daniel uan amo okitlakaitayaj Jehová. Ikinon yejuan omotlapouijkej tlen kichiuaskiaj. Yejuan okiluijkej tekiua Darío makitlali ifirma itech se tlanauatil tlen kiteititiskia kox Daniel okitlakamatiaya toTajtsin Dios noso tekiua. Non tlanauatil okijtouaya amikaj makitlatlaujti toTajtsin Dios 30 tonal uan Daniel omonekiaya ijkon kichiuas tla okinekiaya kiteititis okitlakamatiaya tekiua. Daniel amo okichi tlen otlanauati (Dan. 6:​12-15, 20-22). ¿Tlen techpaleuis nochipa matimouikakan iuan Jehová ijkon ken Daniel okichi? w23.08 5 párrs. 10-12

Jehová kineki matikintlasojtlakan tokniuan. Amo matimokuayejyekokan se tokni amo yolkuali porque itlaj otechtokti. Matimokuayejyekokan mochijchikaua kichiuas tlen kuali uan amo san kineki techyolkokos (Prov. 12:18). Jehová techtlasojtla maski titlajtlakolejkej. Ye touan mouika maski timotlapololtiaj uan amo san techkualankaitok (Sal. 103:9). Sapanoua miak ipati matitetlapojpoluikan ijkon ken toTajtsin Dios kichiua (Efes. 4:32–5:1). Matikilnamiktokan moneki san sekan matiyetokan inuan tokniuan porque yitlamis tlen amo kuali. Techtlajyouiltiskej uan xamo hasta techtsakuaskej. Ijkuak ijkon panos okachi monekis tiyetoskej inuan tokniuan (Prov. 17:17). w24.03 15, 16 párrs. 6, 7

Biblia kijtoua telpochmej noijki omouikayaj iuan Jehová, okiyolpaktijkej uan kuali okatkaj. David ijkon okichi. Ye opejki mouika iuan Jehová ijkuak okatka telpochtli uan satepan omochi tekiua tlen nochipa okitlakamatki (1 Rey. 3:6; 9:​4, 5; 14:8). Tla timomachtis tlen okichi David, mitspaleuis nochipa xiktekichiuili Jehová. Noijki uelis timomachtis tlen okichijkej Marcos uan Timoteo para okachi kuali tikinmixmatis. Yejuan opejki kitekichiuiliaj Jehová ijkuak okatkaj telpochmej uan nochipa okitekichiuilijkej. Non okinpaleui kuali mayetokan uan okiyolpaktijkej Jehová. Tlen axkan tikchiuas mitspaleuis satepan. Jehová mitspaleuis xikchiua tlen kuali tla tikneltokas uan amo tikchiuas tlen te timokuayejyekoua. Te uelis tiyolpakis uan xikilnamikto Jehová mitspatioita porque tiktekichiuilia. Amo onka okse tlamantli tlen uelis mitsyolpaktis ijkon ken tiktekichiuilia Jehová. w23.09 13 párrs. 18, 19

Apóstol Pablo okimatiaya tokniuan tlajtlakolejkej. Ijkon opanok ijkuak opejki monechikoua ompa Jerusalén porque miakej amo okineltokiliayaj tlen okijtouaya uan okimouiliayaj (Hech. 9:26). Miakej okijtouayaj miak tlamantli ijkuak Pablo amo inuan okatka (2 Cor. 10:10). Satepan Pablo okijto se tokni opejki kichiua tlen amo kuali uan non amo kinpaleuiskia tokniuan makitekichiuilikan Jehová (Gál. 2:​11, 12). Marcos noijki okiyolkoko Pablo maski okatka iyolikni (Hech. 15:​37, 38). Pablo uelis kijtoskia ayakmo mouikaskia inuan tokniuan tlen okiyolkokojkej. Pero maski ijkon okipanok Pablo amo okika Jehová uan ok okintlasojtlak tokniuan. ¿Tlen okipaleui ijkon makichiua? Pablo okintlasojtlaya tokniuan ikinon ye okitaya yejuan kuali inyelis uan amo san okitaya tlen amo kuali okichiuayaj. Ye okintlasojtlaya ikinon okinmilui tlen kijtoua texto tlen axkan timomachtijtokej. w24.03 15 párrs. 4, 5

Biblia kijtoua miakej okatkaj yolyamankej. Matikitakan tlen okipanok Isaac ijkuak ochantiaya altepetl Guerar. Filisteos tlen ik ompa ochantiayaj opejkej kikokoliaj uan okintlalpachojkej atekochmej tlen okinmichkuakej itlakeualuan itajtsin. Isaac oksekan ochantito uan okinmichkuak okseki atekochmej uan amo omokualani inuan filisteos (Gén. 26:​12-18). Pero filisteos noijki okijtojkej non atl okatka inmiaxka. Isaac okatka yolyamanki uan amo inuan omokualani (Gén. 26:​19-25). ¿Tlen okipaleui amo makikualanikan? Sapanoua okipaleui tlen itatajuan okimachtijkej. Abrahán amo okualaniaya uan Sara okatka yolyamanki (1 Ped. 3:​4-6; Gén. 21:​22-34). w23.09 15 párr. 4

Jehová okiualtitlanki ikone ipan tlaltikpak uan ijkon okiteititi sapanoua techtlasojtla. Jesús otetlapoui tlen kijtosneki non Tekiuajkayotl uan noijki okitemakak iyolilis para techmakixtis imak tlajtlakoli uan mikilistli. Satepan Jehová okiyoliti uan okitlali ken tekiua itech iTekiuajkayo. Miak ipati tlen techmachtia Jehová ijkuak kijtoua kiueyichiuas itoka ijkuak kichiuas tlen okijto nikan tlaltikpak ika iTekiuajkayo tlen kiyekana Jesucristo. Amitlaj uelis kitsakuilis Jehová ijkon makichiua uan yokijto ijkon kichiuas (Is. 46:10 nota; Heb. 6:​17, 18). Amo miak poliui toTajtsin Dios kikopas se xochitlali tlaltikpak uan ixuiuan Adán uan Eva ayakmo yetoskej tlajtlakolejkej uan nochipa yoltoskej (Sal. 22:26). Pero Jehová amo san non kineki kichiuas. Ye kichiuas nochtin mamouikakan uan makimatikan san ye kinamiki kinnauatis akinmej chantij iluikak uan tlaltikpak (Efes. 1:​8-11). ¿Amo melauak kualtsin tlen Jehová yokijto kichiuas? w23.10 20 párrs. 7, 8

Ijkuak judíos okiskej Babilonia uan oajsito Jerusalén amo okipiayaj miak tlamantli, tekiuajkej amo kuali otlanauatiayaj uan oksekimej okinkokoliayaj. Okixnamikej miak tlamantli ikinon miakej israelitas amo okachi otlapaleuiayaj ijkuak okiyektlalijtokaj itemplo Jehová. Ikinon Jehová okintitlanki profetas Ageo uan Zacarías makinyolchikauatij israelitas non okinpaleui (Ageo 1:1; Zac. 1:1). Pero opanok 50 xiuitl uan israelitas oksepa omosotlajkej. Ikinon Esdras tlen kuali okijkuilouaya Tlanauatil, omokopki Jerusalén okinyolchikauato israelitas uan okinpaleui okachi makiueyichiuakan Jehová (Esd. 7:​1, 6). Profecías tlen okinmijkuilojkej Ageo uan Zacarías okinpaleui israelitas nochipa makineltokakan Jehová maski kixnamikiskiaj miak tlamantli. Tejuan noijki techpaleuiskej nonmej profecías matikneltokakan Jehová techpaleuis maski tikixnamikiskej miak tlamantli (Prov. 22:19). w23.11 14, 15 párrs. 2, 3

¿Ken uelis tikteititiskej tikintlasojtlaj tokniuan? Uelis ijkon tikchiuaskej tla tikinyolchikauaj. Pero moneki tikinmiknomatiskej uan ijkon nochipa tikinyolchikauaskej (1 Tes. 4:18). ¿Tlen techpaleuis melauak matimotlasojtlakan? Matimochijchikauakan matikintlapojpoluikan oksekimej ijkuak motlapololtiaj. ¿Tleka miak ipati axkan matimotlasojtlakan? Matikitakan tlen okijto Pedro: “Yitlamis nochi tlen onka, ikinon [...]. Okachi ipati sapanoua ximosepantlasojtlakan” (1 Ped. 4:​7, 8). ¿Tlen uelis panos ijkuak yitlamis tlen amo kuali? Jesús okijto: “Itech nochi altepemej namechkokoliskej porque nankichiuaj ken ne nikchiua” (Mat. 24:9). Moneki san sekan tiyetoskej para nochipa tiktekichiuiliskej Jehová ijkuak techkokoliskej. Satanás kineki techxelos pero amo uelis ijkon kichiuas tla melauak timosepantlasojtlaj (Filip. 2:​1, 2). w23.11 13 párrs. 18, 19

Kipia miak chikaualistli tlen tlamachtia Biblia. Tetlajtlachialti tlen panoua ijkuak tikinmachtiaj oksekimej akin Jehová uan ken iyelis. Ijkuak kajsikamatij tlen tikinmachtiaj ayakmo kinkajkayaua Satanás uan peua kitaj toTajtsin Dios ijkon ken tejuan tikitaj. Kintlajtlachialtia ijkuak kimatij ye sapanoua kipia chikaualistli (Is. 40:26). Kuali momachiliaj ijkuak kimatij ye nochipa kichiua tlen kuali (Deut. 32:4). Pakij ijkuak kimatij ye sapanoua ixtlamatki (Is. 55:9; Rom. 11:33). Noijki moyolseuiaj ijkuak momachtiaj ye tlasojtlalistli (1 Juan 4:8). Ijkuak kixmatij Jehová, peua kineltokaj nochipa yoltoskej uan satepan uelis yetoskej ikoneuan. Sapanoua tikpatioitaj tikinpaleuiskej oksekimej mamotokikan inauak toTajtsin Dios. “Tikpaleuiaj” toTajtsin Dios ijkuak ijkon tikchiuaj (1 Cor. 3:5). w24.02 12 párr. 15

¿Timomachtijtok Biblia? ¿Mitsmachtiaj Biblia mopapanuan porque yejuan iTlaixpantijkauan Jehová? Maski san akin mitsmachtia xamo yotimokuayejyeko timoapolaktis. Kuali tlen tikneki tikchiuas pero achto moneki timotemakas ixpan Jehová uan ijkon uelis timoapolaktis. ¿Ken uelis timotemakas ixpan Jehová? Tiktlatlaujtis Jehová uan tikiluis san ye tikueyichiuas uan tikchiuas tlen ye kineki. Non kijtosneki tikiluis Jehová nochipa tiktekichiuilis ika nochi moyolo, moyolilis, motlayejyekol uan mochikaualis (Mar. 12:30). San te moneuia timotemakas ixpan Jehová ikinon san ye kimatis. Pero ijkuak timoapolaktis nochtin kitaskej uan ijkon kimatiskej yotimotemakak ixpan Jehová. Amo san ajauili timotemakas ixpan Jehová. Moneki tikchiuas tlen yotikilui uan ye kichia ijkon xikchiua (Ecl. 5:4). w24.03 2 párr. 2; 5 párr. 5

Nochtin akinmej yomonamiktijkej “kixnamikiskej ouijkayotl” ijkon ken kijtoua Biblia (1 Cor. 7:28). ¿Tleka? Porque siuatl uan tlakatl tlajtlakolejkej. Noijki kipiaj tlatlamantli inyelis uan amo san se tlamantli kinpaktia. Xamo tlatlamantli inmialtepe uan tlatlamantli okinmiskaltijkej. Xamo ijkuak okatkaj novios amo okitakej seki tlamantli tlen amo kinpaktis. Ikinon xamo san mokualanijtoskej. Xamo san motlajtlakoltiskej noso mokuayejyekoskej okachi kuali moxeloskej noso mokajkauaskej inmixpan tekiuajkej. Pero ¿okachi yolpakiskej tla moxeloskej noso mokajkauaskej inmixpan tekiuajkej? Amo. Jehová kineki mamotlakaitakan akinmej yomonamiktijkej maski kitaj oui mouikaskej. w24.03 16 párr. 8; 17 párr. 11

Maski yotimoapolaktijkej uelis okachi tikneltokaskej mochiuas tlen tikchiaj. Porque yotimomachtijkej miak tlamantli uan okachi tikpiaj chikauak totlaneltokilis (Heb. 5:​13–6:1). Xamo yotechpanok ijkon ken kijtoua Romanos 5:​2-4, yotikitakej Jehová techselia maski tikixnamikij seki tlamantli oui. Okachi tikneltokaj Jehová kichiuas tlen yokijto porque techtlasojtla uan kipaktia tlen tikchiuaj. Axkan okachi tikneltokaj mochiuas tlen Jehová yokijto kichiuas. Non techpaleuia kuali matimouikakan iuan tofamilia, kuali matikpejpenakan tlen tikchiuaskej uan amo matimotonalpolokan. Pablo okijto okachi tikneltokaj mochiuas tlen tikchiaj ijkuak tikmatij toTajtsin Dios techselia. Pero noijki okijto okse tlamantli miak ipati. Ye okijto melauak mochiuas tlen tikchiaj tikseliskej (Rom. 15:13). w23.12 12, 13 párrs. 16-19

Ijkuak itlaj tikixnamikij xamo amo kuali timomachiliaj uan amo kuali timokuayejyekouaj. Xamo timomachiliaj ijkon ken se barco tlen kajki ijtik mar uan chikauak kitlauiteki ejekakiauitl. ¿Ken techpaleuia Jehová ijkuak amo kuali timomachiliaj uan amo tikmatij tlen tikchiuaskej? Ye yokijto techpaleuis kuali matimomachilikan. Se barco tlen kajki ijtik mar uelis chikauak molinis ijkuak ejekakiaui. Para amo okachi mamolini, inajnakastlan barco kipia seki tlamantli tlen kajki ijtik mar tlen kipaleuia amo okachi mamolini. Ijkon akinmej ompa yauij amo momojtiaj uan amitlaj kinpanoua. Pero non tlamantli tlen kipia barco okachi kipaleuia ijkuak kinejnemitijtokej. Noijki Jehová techpaleuis kuali matiyetokan ijkuak itlaj techpanoua pero moneki nochipa matiktekichiuilijtokan. w24.01 22 párrs. 7, 8

Ijkuak timomojtiaj, matimotlajtlanikan: “¿Tlen yokichi Jehová?”. Matimokuayejyekokan tlen yokichijchi. Noijki techpaleuia okachi matikneltokakan Jehová ijkuak tikitaj kinmaluia totomej uan xochitl maski amo ueli kiueyichiuaj uan amo kipiaj inyelis ijkon ken ye. Non techititia tejuan okachi techmaluis (Mat. 6:​25-32). Noijki matimokuayejyekokan ken yokinpaleui akinmej kitekichiuiliaj. Xamo uelis timomachtiskej ken yokinpaleui itekipanojkauan tlen okatkaj yiuejkika noso ken kinpaleuia axkan tokniuan. Noijki matimokuayejyekokan ken yotechpaleui. ¿Ken otechpaleui matikmatikan tlen tlamachtia Biblia? (Juan 6:44). ¿Ken yotechnankili ijkuak tiktlatlaujtiaj? (1 Juan 5:14). ¿Ken techpaleuia tlen okichi Jehová porque okitekauili topatka makimiktikan iKone? (Efes. 1:7; Heb. 4:​14-16). w24.01 4 párr. 6; 7 párr. 17