Noviembre

Tla tikinpia mokoneuan, uelis tikinpaleuis kuali mamoyektlalikan uan ijkon uelis tlanankiliskej. Ualeua timomachtiaj seki tlamantli tlen oui kajsikamatiskej konemej. Timomachtiaj kixnamikij ouijkayotl akinmej yomonamiktijkej uan okseki tlamantli. Ijkuak ijkon timomachtiskej, konemej uelis tlanankiliskej se noso ome párrafos. Noijki uelis nankinyekiluiskej namokoneuan amo nochipa kinmiluiskej matlanankilikan ijkuak kajkokuij inma. Ijkon amo moyolkokoskej ijkuak amo kinmiluiskej matlanankilikan (1 Tim. 6:18). Nochtin uelis timoyektlaliskej para ijkuak titlanankiliskej makiueyichiua Jehová uan makinyolchikaua tokniuan (Prov. 25:11). Xamo ualeua tikijtoskej tlen otechpanok pero amo san non matikijtojtokan (Prov. 27:2; 2 Cor. 10:18). Okachi matitlajtokan itech Jehová, iTlajtol uan ialtepe (Apoc. 4:11). w23.04 24, 25 párrs. 17, 18

Tla titetlasojtlaj, timotlachilijtoskej uan kuali timokuayejyekoskej (Mat. 22:​37-39). Tla tiktlasojtlaj toTajtsin Dios, nochipa titetlapouiskej maski tikitaskej oui (2 Tim. 1:​7, 8). Tejuan noijki tikintlasojtlaj akinmej amo iTlaixpantijkauan Jehová. Ikinon timochijchikauaj para tikintlapouiskej maski ika teléfono noso ika carta. Amo tikijtouaj amo keman kitekichiuiliskej Jehová porque timokuayejyekoua uelis se tonal ijkon kichiuaskej (Ezeq. 18:​27, 28). Tejuan tikintlasojtlaj tokniuan uan ijkon tikteititiaj ijkuak san sekan timoyolchikauaj (1 Tes. 5: 11). Soldados san sekan moteuiaj uan ijkon mopaleuiaj. Tejuan noijki amo tikinyolkokoskej tokniuan nion tikinchiuiliskej tlen amo kuali san porque tiknekij, ualeua ijkon tikchiuaj porque timotlapololtiaj (1 Tes. 5:​13, 15). Noijki tikteititiaj tikintlasojtlaj tokniuan ijkuak tikintlakaitaj akinmej techyekanaj (1 Tes. 5:12). w23.06 9 párr. 6; 11 párrs. 10, 11

Uelis okachi titlaneltokaskej tla timokuayejyekouaj tlen topatka okichi Jesús. Non kiteititia toTajtsin Dios melauak kichiuas tlen yokijto. Moneki timajxiliskej timokuayejyekoskej tleka Jehová topatka okitemakak iKone. Ijkon okachi tikneltokaskej Jehová uelis kichiuas kuali matiyetokan uan ayakmo matiixpoliuikan. ¿Tleka ijkon tikijtouaj? Matimokuayejyekokan tlen okichi Jehová. Ye kuali omouikaya iuan iKone pero okiualtitlanki nikan tlaltikpak manesiki ken se tlakatl tlen amo kipia tlajtlakoli. Jehová sapanoua omoyolkoko ijkuak otlajyoui Jesús uan hasta okimiktijkej. Jehová sapanoua miak otechtlaxtla. Tla amo techtlasojtlaskia, amo kitemakaskia iKone san para kuali matiyetokan uan satepan matiixpoliuikan (Juan 3:16; 1 Ped. 1:​18, 19). Tlen okichi Jehová sapanoua ipati, ikinon kichiuas nochipa matiyoltokan itech xochitlali. w23.04 27 párrs. 8, 9

¿Jehová kineki kinyolitis akinmej yoixpolikej? Kema ijkon kichiuas. Ye okinnauati sekimej tlakamej makijkuilokan kinyolitiskej akinmej yoixpolikej (Is. 26:19; Apoc. 20:​11-13). Jehová kichiua ijkuak kijtoua itlaj kichiuas (Jos. 23:14). Jehová yikineki kinyolitis akinmej yoixpolikej. Matimokuayejyekokan tlen okijto Job. Ye okineltokaya Jehová kiyolitiskia tla ixpoliuiskia (Job 14:​14, 15, nota). Jehová kinyolitis akinmej yiuejkika okitekichiuilijkej porque kineki kuali mayetokan uan mayolpakikan. ¿Tlen kinpanos akinmej yoixpolikej uan amo okixmatkej Jehová? ToTajtsin Dios tetlasojtla uan noijki kineki kinyolitis (Hech. 24:15). Ye kineki iuan mamouikakan uan kineki nochipa mayoltokan nikan tlaltikpak (Juan 3:16). w23.04 9 párrs. 5, 6

¿Tlen uelis tikchiuaskej para okachi titlaneltokaskej? Tla tikchia nochipa tiyoltoskej ipan tlaltikpak, matiktlajtoltikan tlen kijtoua Biblia itech xochitlali uan matimokuayejyekokan ompa yitikatej (Is. 25:8; 32:​16-18). Matimokuayejyekokan ken tiyetoskej ipan tlaltikpak ijkuak Jehová kichiuas se xochitlali. Tla timokuayejyekouaj ken tichantiskej satepan, tlen techtlajyouiltia tikitaskej “amo uejkaua uan amitlaj ipati” (2 Cor. 4:17). Techyolchikauas tlen Jehová yokijto kichiuas satepan. Yotechmakak miak tlamantli para techyolchikauas. Ikinon matiktlatlaujtikan ika nochi toyolo uan matimomachtikan iTlajtol ijkuak tikitaskej oui tiktekichiuiliskej, tla tikmachiliaj amo titlaxikouaj noso ayakmo tiyolpakij ijkuak tiktekichiuiliaj. Noijki matikinkauilikan tokniuan matechpaleuikan uan matikilnamiktokan tlen Jehová kichiuas satepan. Jehová “manamechyolchikaua ika ichikaualis ueyititok. Manamechmaka chikaualistli tlen moneki para ximochiakan uan nochi xikxikokan ika pakilistli” (Col. 1:11). w23.10 16, 17 párrs. 19, 20

Uelis tiktlasojkamatiliskej Jehová ijkuak timotlatlaujtiaj porque tikpiaj miak tlamantli. Matiktlasojkamatilikan nochi tlen kuali tikpiaj porque ye techmaka (Sant. 1:17). Uelis tiktlasojkamatiliskej porque tikpiaj se kuajkualtsin tlaltikpak. Kuajkualtsin otlachijchi, tiyoltokej, tikpiaj tofamilia, tikinpiaj akinmej inmiuan timouikaskej uan tlen tikchiaj tikseliskej. Noijki tiktlasojkamatiliskej porque techkauilia iuan matimouikakan. ¿Tleka moneki tiktlasojkamatiliskej Jehová nochi tlen techmaka? Xamo oui timotlasojkamatiskej porque axkan miakej amo motlasojkamatij. Miakej san kinekij kipiaskej tlen kinpaktia uan amo motlasojkamatij ika tlen kipiaj. Tla ijkon timokuayejyekouaj, ijkuak timotlatlaujtiskej san tiktlajtlaniskej tlen tiknekij tikpiaskej. Amo tiknekij ijkon matechpano ikinon moneki timochijchikauaskej tiktlasojkamatiliskej Jehová nochi tlen techmaka (Luc. 6:45). w23.05 4 párrs. 8, 9

ToTajtsin Jehová techtlasojtla uan amo kipaktia kitas ijkuak titlajyouiaj (Is. 63:9). Pero amo techkixtilia nochi tlen techtlajyouiltia. Biblia kijtoua tlen techtlajyouiltia yetoskia ken aueyatl uan tlitl (Is. 43:2). Jehová techiluia techpaleuis ijkuak titlajyouiskej uan amo kitekauilis nochipa matitlajyouijtokan. Noijki techmakas espíritu santo para matitlaxikokan (Luc. 11:13; Filip. 4:13). Ikinon tikmatij nochipa techpaleuis matitlaxikokan uan nochipa matiktekichiuilikan. Jehová kineki matikneltokakan (Heb. 11:6). Ualeua xamo sapanoua titlajyouiaj uan timotlajtlaniaj kox Jehová melauak techpaleuis. Pero Biblia techiluia toTajtsin Dios techmakas chikaualistli. Ijkon uelis titlaxikoskej uan yetoskia ken ‘titlejkoskej itech se tepamitl’ (Sal. 18:29). Ikinon amo keman matikijtokan Jehová amo techpaleuis. Matiktlatlaujtikan Jehová ika nochi toyolo uan matikneltokakan ye technankilis (Sant. 1:​6, 7). w23.11 22 párrs. 8, 9

¡Kualtsin tlen kijtoua Biblia! Non kijtosneki akinmej yomonamiktijkej uelis nochipa san sekan yetoskej uan nochipa motlasojtlaskej. Se tlakatl uan isiua moneki mochijchikauaskej nochipa motlasojtlaskej uan ijkon san sekan yetoskej. Non yetoskia ken tlitl. Tlitl moneki nochipa kitlaliliskej kouitl para amo maseui. Se tlakatl uan isiua noijki moneki nochipa motlasojtlaskej. Pero ualeua tlajyouiaj, amo kipiaj tomin, mokokouaj uan kitaj oui. Para okachi motlasojtlaskej akinmej yomonamiktijkej moneki mochijchikauaskej kuali mouikaskej iuan Jehová. w23.05 20 párrs. 1-3

Amo kijtosneki tiyetoskej tiyolchikauakej tla totatajuan yolchikauakej uan techiluiaj noijki ijkon matikchiuakan. Tejuan moneki timochijchikauaskej tla tiknekij tiyetoskej tiyolchikauakej ijkon ken ijkuak timomachtiaj itlaj tikchiuaskej. Para timomachtiskej moneki kuali tikitaskej akin techmachtia uan tikchiuaskej ijkon ken ye kichiua. Noijki para tiyetoskej tiyolchikauakej moneki timomachtiskej tlen okichijkej akinmej okatkaj yolchikauakej uan tikchiuaskej tlen yejuan okichijkej. Tlen okichi Daniel techmachtia moneki kuali matimomachtikan Biblia, matiktlatlaujtikan Jehová para kuali iuan timouikaskej uan matikneltokakan ika nochi toyolo ye nochipa techpaleuis. Non techpaleuis matiyetokan tiyolchikauakej ijkuak techyejyekoskej. Axkan miakej kintlakaitaj akinmej yolchikauakej. Noijki uelis kinpaleuiskej oksekimej makinekikan kixmatiskej Jehová. Non techmachtia miak ipati matimochijchikauakan tiyetoskej tiyolchikauakej. w23.08 2 párr. 2; 4 párrs. 8, 9

Ika griego tlajtoli tlen motlajtolkopa “kuali xikkakikah” kijtosneki ijkuak ikaj kitaj kox melauak itlaj chijchitok ika oro noso plata. Tejuan noijki moneki kuali tikitaskej kox melauak tlen techiluiaj uan tlen tiktlajtoltiaj. Axkan tejuan moneki okachi ijkon tikchiuaskej porque yipeuas ueyi tlajyouilistli. Amo matikneltokakan nochi tlen techiluiaj. Okachi kuali matikitakan kox kajki itech Biblia tlen techiluiaj noso tlen tiktlajtoltiaj uan kox ijkon yokijto ialtepe Jehová. Tla ijkon tikchiuaskej, amo techkajkayauaskej amo kuali ejekamej (Prov. 14:15; 1 Tim. 4:1). Tejuan tikmatokej akinmej kitekichiuiliaj Jehová momakixtiskej ijkuak panos ueyi tlajyouilistli pero amo tikmatij tlen techpanos tisejse (Sant. 4:14). Tla amo keman tikkauaskej Jehová, ye kichiuas nochipa matiyoltokan maski timomakixtiskej ijkuak matlami ueyi tlajyouilistli noso tla achto tiixpoliui. Axkan matikilnamiktokan tlen tikseliskej satepan uan matikchixtokan itonal Jehová. w23.06 13 párrs. 15, 16

Amo tikmatij ken mochiuaskej okseki profecías (Dan. 12:​8, 9). Pero amo kijtosneki amo mochiuas se profecía maski amo kuali tikajsikamatij. Tikneltokaj Jehová techiluijtias tlen moneki tikmatiskej ijkuak ye kijtos. Ijkon ken yiuejkika okichi. Ajsis tonal kijtoskej: “Axa kema ya tikateh ika kuali, iwa ya tikpiah yolsewílistli” (1 Tes. 5:3). Ijkuakon tekiuajkej kinmixnamikiskej religiones tlen tlakajkayauaj uan kinpojpoloskej (Apoc. 17:​16, 17). Satepan kitlajyouiltiskej ialtepe toTajtsin Dios (Ezeq. 38:​18, 19). Saiktlami peuas guerra tlen itoka Armagedón (Apoc. 16:​14, 16). Tikneltokaj ayakmo miak poliui ijkon panos. Ikinon matikteititikan tikinpatioitaj profecías ijkuak tikitaj ken mochiuaj uan matikinpaleuikan oksekimej ijkon makichiuakan. w23.08 13 párrs. 19, 20

Apóstol Pablo okijto matitlaneltokakan, matikchiakan toTajtsin Dios matechpaleui uan matitetlasojtlakan pero okijto “okachi ipati titetlasojtlaskej” (1 Cor. 13:13). ¿Tleka ijkon okijto? Porque ijkuak toTajtsin Dios kichiuas tlen yokijto ayakmo monekis titlaneltokaskej. Pero monekis nochipa tiktlasojtlaskej Jehová uan noijki oksekimej. Ijkuak tiyetoskej itech xochitlali okachi titetlasojtlaskej. Ijkuak timotlasojtlaj tikteititiaj melauak tikchiuaj ken Cristo. Jesús okinmilui iapóstoles: “Tla nanmosepantlasojtlaj, nochtin kimatiskej namejuan nannodiscípulos” (Juan 13:35). Noijki tla timotlasojtlaj techpaleuis san sekan matiyetokan. Ikinon Pablo okijto “non kinpaleuia nochtin kuali mamouikakan” (Col. 3:14). Apóstol Juan okijto: “Akin kitlasojtla toTajtsin Dios noijki makitlasojtla ikni” (1 Juan 4:21). Ikinon ijkuak tikintlasojtlaj tokniuan tikteititiaj noijki tiktlasojtlaj Jehová. w23.11 8 párrs. 1, 3

Biblia kijtoua akinmej tiktekichiuiliaj Jehová yetoskia ken timotlalouaj. Akinmej tlatlaniskej nochipa yoltoskej (2 Tim. 4:​7, 8). Moneki okachi timochijchikauaskej timotlaloskej porque ayakmo uejka poliui para tiajsiskej. Apóstol Pablo okijto tlen techpaleuis matitlatlanikan. Ye okijto: “Matiktlakaltechokah nochi tlan techtsakuilia [...]. Iwa ika miak yolchikawálistli matimotlelokah itech nin ojtli non kajki toyakapa”. Pablo amo okijto akinmej tiktekichiuiliaj toTajtsin Dios amo moneki itlaj tikchiuaskej. Ye okijto moneki ‘tiktlakaltechoskeh’ tlen amo techpaleuia. Non tlamantli amo techpaleuis matimotlalokan uan techsotlauas. Moneki tikitaskej kox onka itlaj tlen techtsakuilia uan moneki san niman tikkauaskej para uelis timotlaloskej. Pero onka okseki tlamantli tlen miak ipati uan amo moneki tikkauaskej. Tla tikkauaskej amo titlatlaniskej ijkuak timotlaloskej (2 Tim. 2:5). w23.08 26 párrs. 1, 2

Tla titeajsikamatij, amo oui tikitaskej tiktlakaitaskej tlen oksekimej mokuayejyekouaj. Sekimej tokniuan kinpaktia kimotlaliliskej maquillaje pero oksekimej amo kinpaktia. Noijki sekimej tokniuan konij tepitsin alcohol pero oksekimej amo konij. Tinochtin tiknekij kuali tiyetoskej pero tlatlamantli timopajtiaj. Tla san tiknekij tikchiuaskej tlen tejuan techpaktia uan tikinchiualtiaj oksekimej noijki ijkon makichiuakan, tikinyolkokoskej tokniuan noso inmiuan timokualaniskej (1 Cor. 8:9; 10:​23, 24). Tla tikchiuaj tlen kijtoua principios bíblicos, tikchiuaskej tlen moneki uan timoyolseuijtoskej inmiuan tokniuan. Matikitakan ken uelis tikchiuaskej. Jehová amo techiluia ken moneki timotlakentiskej pero kema techmaka principios bíblicos tlen techpaleuia. Tla timotlakentiaj ken moneki uelis tikueyichiuaskej toTajtsin Dios, tikteititiskej tiktlakamatij uan titeajsikamatij (1 Tim. 2:​9, 10). Amo tiknekij oksekimej san matechitakan porque amo kuali timotlakentiaj. Principios bíblicos kinpaleuis tlayekankej amo matlanauatikan ken moneki motlakentiskej tokniuan. w23.07 23, 24 párrs. 13, 14

Jehová techpaleuia matikmatikan tlen tikchiuaskej para uelis tiyolpakiskej satepan. Akinmej kichiuaj tlen kinmiluia “siuatl tlen amo ixtlamatki” san moyolpaktiaj ijkuak auilnemij uan kimachiliaj ken itlaj tsopelik. Yejuan kinpanos tlen kijtoua Biblia. Ajsiskej “uejkatlan kanin toktokej akinmej yoixpolikej” (Prov. 9:​13, 17, 18). Pero kuali katej akinmej kichiuaj tlen kinmiluia siuatl tlen ixtlamatki (Prov. 9:1). Tejuan tikpatioitaj tlen Jehová kipatioita uan tikkokoliaj tlen ye kikokolia (Sal. 97:10). Tiyolpakij tikinyoleuaj oksekimej noijki mayetokan ixtlamatkej. Tejuan tikchiuaj ken tlakeualmej tlen kijtoua Proverbios capítulo 9. Yejuan chikauak mokakij “uejkapan kanin kajki altepetl”. Tejuan noijki tikijtouaj: “Akin amo ixtlamatki mauiki nikan”. Nochtin akinmej kichiuaj tlen kijtoua siuatl tlen ixtlamatki kinpaleuis axkan uan satepan. Uelis nochipa tiyoltoskej tla ‘tinejnemij itech ojtli tlen techpaleuis matiyetokan tiixtlamatkej’ (Prov. 9:​3, 4, 6). w23.06 24, 25 párrs. 17, 18

¿Ken timomachiliaj ijkuak techtlajtlaniaj tlen tikneltokaj akinmej inuan titekipanouaj noso kanin timomachtiaj? ¿Timomojtiaj? Timiakej ijkon techpanoua. Ijkuak itlaj techtlajtlaniaj techpaleuia matikmatikan tlen mokuayejyekouaj oksekimej uan tlen kineltokaj. Ijkon amo okachi oui tikintlapouiskej. Pero ualeua xamo itlaj techtlajtlaniskej tlen yejuan amo kinpaktia porque san kinekij touan mokualaniskej. Xamo ijkon techiluiskej porque oksekimej kinmiluiaj amo kuali tlen tikchiuaj. Pero yitikmatij uelis ijkon techpanos (Hech. 28:22). Noijki tikmatij tikatej itlamian tonalmej uan miakej amo teajsikamatij uan kualanij (2 Tim. 3:​1, 3). ¿Tlen techpaleuis amo san niman matikualanikan ijkuak techtlajtlaniskej tleka tikneltokaj seki tlamantli? Techpaleuis tla tiyolyamankej. Akin yolyamanki amo san niman kualani. Amo kualani ijkuak itlaj kiluiaj noso amo kimati tlen tlanankilis. w23.09 14 párrs. 1, 2

Ualeua ialtepe Jehová techiluia tlen techpaleuis para amo tikixnekiskej tikpiaskej miak tlamantli. Noijki techpaleuia matikintlakamatikan itlanauatiluan toTajtsin Dios para ijkon amitlaj tikchiuaskej tlen uelis kiyolkokos Jehová (Is. 48:​17, 18; 1 Tim. 6:​9, 10). Jehová okintlali sekimej tlakamej makiyekanakan ialtepe ijkuak panos ueyi tlajyouilistli uan ijkuak Jesucristo tlanauatis mil xiuitl. Ijkuak ajsis non tonal, ¿tikchiuaskej tlen technauatiskej maski amo techpaktis? Amo oui tikitaskej ijkon tikchiuaskej tla axkan titetlakamatij. Ikinon nochipa matikkauilikan Jehová matechyekana. Non kijtosneki noijki tikintlakamatiskej tlakamej tlen yokintlali matechmaluikan (Is. 32:​1, 2; Heb. 13:17). Uelis tikneltokiliskej Jehová techyekana, techpaleuia kuali iuan matimouikakan uan techyekana matikselikan yolilistli tlen amo keman tlamis. w24.02 25 párrs. 17, 18

Apóstol Pablo oyolpakiaya ijkuak okitekichiuili Jehová pero ualeua noijki otlajyoui. Ye uejka oyaya maski uelis itlaj kipanoskia. Otlajyoui ijkuak opanouaya itech aueyatl uan porque kanin oyaya okatkaj ichtekej. Ualeua akinmej okikokoliayaj okitlajyouiltiayaj (2 Cor. 11:​23-27). Noijki otlajyoui porque ualeua tokniuan amo okipatioitayaj tlen ye inpatka okichiuaya (2 Cor. 10:10; Filip. 4:15). Pero ¿tlen okipaleui Pablo nochipa makitekichiuili Jehová? Ye okitekichiuili porque omomachtiaya iTlajtol uan non okipaleui kuali makixmati. Noijki tlen okipanok okipaleui makixmati uan okineltokaya ye okitlasojtlaya (Rom. 8:​38, 39; Efes. 2:​4, 5). Ikinon Pablo okitlasojtlaya Jehová uan ijkon okiteititi ijkuak okinpaleui tokniuan (Heb. 6:10). w23.07 9 párrs. 5, 6

Miakej kineltokaj tekiuajkej techpaleuiaj uan moneki tikintlakamatiskej seki tlanauatilmej tlen yejuan kintlaliaj. Pero amo kinekij kitlakamatiskej se tlanauatil tla kitaj amo kinpaleuiaj noso sapanoua oui. Biblia kijtoua tekiuajkej tetlajyouiltiaj, katej imak Satanás uan san niman kinmixpoloskej (Sal. 110:​5, 6; Ecl. 8:9; Luc. 4:​5, 6). Pero Biblia noijki kijtoua “akinmej kinmixnamikij tekiuajkej kijtosneki kixnamikij toTajtsin Dios”. Axkan Jehová kinkauilia matlanauatikan para matechpaleuikan uan ye kineki matikintlakaitakan. Ikinon moneki ‘matikinmakakan tlen kinnamiki’. Non kijtosneki moneki tikintlakaitaskej tekiuajkej, tikintlakamatiskej uan titlatlaxtlauaskej (Rom. 13:​1-7). Xamo tikijtoskej amo moneki tiktlakamatiskej se tlanauatil porque amo techpaleuis. Noijki sapanoua oui tiktlakamatiskej non tlanauatil noso tikitaj amo technamiki tiktlakamatiskej. Pero tejuan tiktlakamatij Jehová uan ye kineki matikintlakamatikan tekiuajkej. Pero amo moneki tikintlakamatiskej tla technauatiaj matikchiuakan itlaj tlen amo kipaktia Jehová (Hech. 5:29). w23.10 8 párrs. 9, 10

Sansón oneski ijkuak filisteos okinnauatiayaj israelitas uan okintlajyouiltiayaj (Juec. 13:1). Filisteos sapanoua okintlajyouiltiayaj israelitas ikinon Jehová okipejpenki Sansón para makinpaleui (Juec. 13:5). Sansón omonekiaya kineltokas Jehová kipaleuiskia porque okatka sapanoua oui tlen kichiuaskia. Miakej soldados filisteos oyajkej Lehí para kikitskiskiaj Sansón. Lehí xamo okatka Judá. Akinmej ochantiayaj Judá sapanoua omomojtijkej ikinon okilpijkej Sansón uan okinmaktilijkej akinmej okikokoliayaj. Israelitas okilpijkej ika ome yankuik mekatl uan okinuikilijkej filisteos (Juec. 15:​9-13). Pero Jehová okimakak chikaualistli Sansón uan ototonki mekatl tlen ika oilpitoka. Satepan okajsik ikamachal se burro tlen ayamo ouakiaya uan ika okinmikti 1,000 filisteos (Juec. 15:​14-16). w23.09 2, 3 párrs. 3, 4

Jehová yokijto tlen kichiuas ikinon tiktlasojkamatiliaj porque techititia ika Biblia tlen kineki kichiuas. Nochipa mochiua tlen ye kineki porque “okichi nochi tlamantli para mamochiua itlanekilis” (Prov. 16:4). Uan nochi tlen kichiuas Jehová nochipa yetos. Ikinon ¿tlen kineki kichiuas toTajtsin Dios uan tlen yokichi para ijkon kichiuas? Ijkuak Jehová otlachijchi okinmilui Adán uan Eva tlen okinekiaya kichiuas. Ikinon okinmilui: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan […] nochtin tlen moliniaj itech tlaltikpak” (Gén. 1:28). Maski Adán uan Eva otlajtlakolchijkej non amo okichi Jehová makipatla tlen okinekiaya kichiuas. Ye san okipatlak seki tlamantli para ijkon kichiuas. Uan san niman okitlali se Tekiuajkayotl ompa iluikak para mamochiua tlen okijto (Mat. 25:34). w23.10 20 párrs. 6, 7

Jehová noijki uelis techpaleuis amo matimosotlauakan. Ualeua oui porque xamo yiuejkika timochijchikauaj para amo tikchiuaskej itlaj tlen amo kuali. Xamo tikitaj tejuan okachi timotlapololtiaj amo ijkon ken Pedro. Pero Jehová uelis techpaleuis amo matimosotlauakan (Sal. 94:​18, 19). Matikitakan tlen okipanok se tokni. Ijkuak ayamo okixmatiaya Jehová miak xiuitl ye omosiuakopki. Satepan ayakmo oauilnenki pero ualeua okiyoltilanaya tlen amo kuali. ¿Tlen okipaleui amo mamosotlaua? Ye okijto Jehová techpaleuia. Noijki okijto: “Ika iespíritu Jehová [...], yonikitak uelis nochipa [...] tikchiuaskej tlen kuali”. Saiktlami okijto: “Jehová yonechkauili maniktekichiuili [...] uan ye nechyolchikaua maski nimotlapololtia”. w23.09 23 párr. 12

Tla ok titelpochtli xikilnamikto moneki timochijchikauas para okachi titlaneltokas. Xikchiua ken akinmej kichiuaj tlen kuali, kuali ximokuayejyeko, xikchiua tlen mitsnauatiaj, ximomachti seki tlamantli uan ximoyektlali para kuali tiyetos satepan. Xamo timosotlauas ijkuak timokuayejyekos nochi tlen moneki tikchiuas. Pero ximoyolchikaua porque te uelis ijkon tikchiuas. Xikilnamikto Jehová kineki mitspaleuis (Is. 41:​10, 13). Noijki uelis mitspaleuiskej tokniuan tlen katej kanin timonechikoua. Ijkuak kuali timouikas iuan Jehová, tiyolpakis uan kuali kisas tlen tikchiuas. ¡Sapanoua timitstlasojtlaj! Tiknekij Jehová mamitsteochiua porque timochijchikaua okachi titlaneltokas. w23.12 29 párrs. 19, 20

Matikijtokan timoyolpaktijtok inuan sekimej tokniuan uan tikneki inuan tikmokixtilis se foto. Te tikinkixtia eyi fotos pero tikita se foto amo kuali okiski se tokni. Ikinon tikpojpoloua non foto uan tikinmokauia ome fotos kanin nochtin kuali okiskej. Ualeua tikilnamiktokej ijkuak otimoyolpaktiayaj inuan tokniuan. Pero xamo tikilnamikij se tokni okijto noso okichi itlaj tlen amo kuali. ¿Tlen tikchiuaskej? Uelis tikilkauaskej ijkon ken ijkuak tikpojpolouaj se foto (Efes. 4:32). Matikilnamikikan kuali iuan timouikaj. Okachi kuali tla tikintlatiaj “fotos tlen kuali okiskej”. w23.11 12 párrs. 16, 17

Ika griego kijtosneki siuamej kuali mamotlakentikan uan mamokuayejyekokan ken momachiliskej oksekimej ijkuak kinmitaskej. Tiyolpakij ijkuak tikinmitaj siuamej kiueyichiuaj Jehová porque kuali kipejpenaj intlaken. Xikita tlen kuali uan tlen amo kuali. Nin kijtosneki kuali timokuayejyekos para tikmatis tlen kuali uan tlen amo kuali. Non mitspaleuis xikchiua tlen okachi kuali. Matikitakan tlen okichi Abigaíl. Inamik amo kuali okipejpenki tlen okichi pero Abigaíl san niman omokuayejyeko tlen uelis kinpanoskia akinmej inuan ochantiayaj. Ikinon ye san niman itlaj okichi para oksekimej amitlaj makinpano (1 Sam. 25:​14-23, 32-35). Tla tikitaj tlen kuali uan tlen amo kuali, techpaleuis matikmatikan keman itlaj tikijtoskej. Noijki techpaleuis matikitakan ken tikinpaleuiskej oksekimej uan amo tikinyolkokoskej (1 Tes. 4:11). w23.12 20 párrs. 8, 9

Ijkuak apóstol Pablo okintlajkuilili tokniuan tlen omonechikouayaj Roma. Yejuan yokixmatiayaj Jehová uan okimatiayaj akin Jesús, otlaneltokayaj uan okichiuayaj ken Cristo. Ikinon toTajtsin Dios okinmitaya yolkualmej porque otlaneltokayaj uan okinpejpenki ika iespíritu santo (Rom. 5:1). Desde ijkuakon yokimatiayaj melauak mochiuas tlen okinmiluijkej. Pablo okinmilui tlapejpenalmej tlen okatkaj Éfeso ken mochiuaskia tlen okichiayaj. Okinyekilui kiseliskiaj se “kualtsin tlateochiuali [...] akinmej yolchipauakej” (Efes. 1:18). Noijki tokniuan tlen okatkaj Colosas okinmilui kanin kiseliskiaj tlen okichiayaj. Okinmilui kinmakaskiaj ‘intetliokolil ompa iluikak’ (Col. 1:​4, 5). Ikinon tokniuan tlapejpenalmej kinyolitiskej, nochipa chantiskej iluikak uan ompa tlanauatiskej iuan Cristo (1 Tes. 4:​13-17; Apoc. 20:6). w23.12 9 párrs. 4, 5

Tlajtoli ‘kimaluia’ okijtouayaj para kijtoskej soldados okimaluiayaj se altepetl uan ijkon amitlaj makitoktikan. Ijkon akinmej ompa ochantiayaj amo omomojtiayaj porque okimatiayaj soldados otlamaluijtokaj. Tejuan noijki kuali timomachiliaj uan timoyolseuiaj ijkuak “iyolseuilis toTajtsin Dios” kimaluia toyolo uan totlayejyekol (Sal. 4:8). Uelis timoyolseuiskej maski amo san niman moyektlalis tlen techpanotok ijkon ken okipanok Ana (1 Sam. 1:​16-18). Ijkuak kuali timomachiliaj okachi kuali timokuayejyekouaj uan kuali tikpejpenaj tlen tikchiuaskej. ¿Tlen moneki tikchiuaskej? Akinmej ochantiayaj itech se altepetl ueli okiluiayaj se soldado makinmalui. Tejuan noijki uelis tikiluiskej Jehová matechmalui. Matiktlatlaujtikan hasta matechmaka “iyolseuilis” (Luc. 11:9; 1 Tes. 5:17). Nochipa xiktlatlaujti Jehová tla itlaj mitspanotok. Ijkon tikitas ken mitsyolseuia, kimaluia moyolo uan motlayejyekol (Rom. 12:12). w24.01 21 párrs. 5, 6

Jesús okixiko makitlajyouiltikan, makiuijuikaltikan uan makijtokan okichi tlen amo kuali. Otlaxiko porque okinekiaya kichipauas itoka iTajtsin. Jesús okimatiaya amo omonekiaya pinauas porque nochipa otetlakamatki (Heb. 12:2). Noijki okimatiaya Satanás okitlajyouiltiaya ijkuak okipanouaya itlaj amo kuali (Luc. 22:​2-4; 23:​33, 34). Satanás okinekiaya Jesús makikaua Jehová pero ye amo ijkon okichi. Jesús okiteititi Satanás san tlakajkayaua uan katej itekipanojkauan Jehová tlen tlaxikouaj maski sapanoua tlajyouiaj. ¿Tejuatsin tikneki tikyolpaktis toTekiua Jesucristo? Xikueyichiua itoka Jehová uan xikinpaleui oksekimej makimatikan ken iyelis. Ijkon tikchiuas ken Jesús okichi (1 Ped. 2:21). Tikyolpaktis Jehová tla ijkon tikchiua uan tikteititis Satanás san tlakajkayaua. w24.02 11 párrs. 11-13

Makuili xiuitl tlen yopanok omoapolaktijkej kanaj se millón uan ijkon omochijkej iTlaixpantijkauan Jehová. Ijkuak tejuan otimotemakakej ixpan Jehová, otikpejpenkej tiyetoskej idiscípulos Jesús. Noijki otikpejpenkej tiktekichiuiliskej toTajtsin Dios. ¿Tlen kijtosneki non tlamantli? Jesús okijto: “Tla ikaj kineki nouan uits, ayakmo makichiua san tlen ye kineki” (Mat. 16:24). “Ayakmo makichiua san tlen ye kineki” omotlajtolkopki ika griego uan noijki uelis motlajtolkopas “ayakmo makichiua tlen kipaktiskia kichiuas”. Ijkuak timotemakas ixpan Jehová ayakmo tikchiuas tlen Jehová amo kipaktia (2 Cor. 5:​14, 15). Ikinon amo tikkauas mamitsyoltilana tlen oksekimej kichiuaj uan nin kijtosneki ijkuak auilnemij (Gál. 5:​19-21; 1 Cor. 6:18). ¿Tikita oui ijkon tikchiuas? Amo oui tikitas tla tiktlasojtla Jehová uan tikneltoka mitspaleuiskej itlanauatiluan tla tikintlakamatis (Sal. 119:97; Is. 48:​17, 18). w24.03 2 párr. 1; 3 párr. 4

Jehová kinmaka iespíritu santo akinmej kiyolpaktiaj (Mat. 12:18). Uelis timotlajtlaniskej kox tikteititiaj techyekana iespíritu santo toTajtsin Dios. Kox axkan okachi tikmatij timochiaskej. Matikneltokakan tikyolpaktiaj toTajtsin Dios tla tikkauaj matechyekana iespíritu santo. Jehová okitlaxtla mamomakixtikan akinmej kiyolpaktiaj (1 Tim. 2:​5, 6). Pero ¿tlen tikchiuaskej tla tikitaj oui tikneltokaskej tikyolpaktiaj Jehová maski yokitlaxtla matechmakixtikan uan maski yotimoapolaktijkej? Matikneltokakan tlen Jehová techiluia maski ualeua amo kuali timomachiliaj. Jehová yokijto kinteochiuas akinmej yolkualmej porque kineltokaj ye yokintlaxtla mamomakixtikan (Sal. 5:12; Rom. 3:26). w24.03 30 párr. 15; 31 párr. 17