Tlamachtilmej para Toteki akinmej tikchiuaj ken Cristo
© 2024 Watch Tower Bible and Tract Society of Pennsylvania
6-12 DE ENERO
KEN TECHPALEUIA BIBLIA SALMOS 127-134
Tetajmej xikinpatioitakan namokoneuan tlen Jehová onamechintliokoli
Ma tikpatioitakan tipouiskej iuan ifamilia Jehová
9 Jehová otechchijchi para uelis tikinpiaskej tokoneuan uan moneki tikinmachtiskej ma kitlasojtlakan uan ma kitekichiuilikan. Tla tejuatsin tikinpia mokoneuan, ¿tikpatioita tlen Jehová omitsmakak? Maski Jehová okinmakak chikaualistli ángeles para uelis kichiuaskej miak tlamantli tlen techtlajtlachialtia, amo okinchijchi para ma kinpiakan inkoneuan. Ik non, tetajmej moneki motlasojkamatiskej porque toTajtsin Dios okinmakak se kualtsin tetliokolil. Ye kineki tetajmej ma kinmiskaltikan inkoneuan ika “tlanonotsálistli iwa ika itlajtol” (Efes. 6:4; Deut. 6:5-7; Sal. 127:3). Ialtepe Jehová kinpaleuia tetajmej, ik non, kinmaka miak tlamantli tlen kisa itech Biblia, amatlajkuilolmej, videos, tlatsotsonali uan tlamachtilmej tlen katej itech internet. Non kiteititia Jehová uan Jesús kintlasojtlaj konemej (Luc. 18:15-17). Jehová kiyolpaktia ijkuak kita tetajmej tlaneltokaj uan mochijchikauaj kinmaluiaj inkoneuan. Akinmej ijkon kichiuaj kinpaleuiaj inkoneuan ma kipejpenakan ma pouikan nochipa iuan ifamilia Jehová.
Tetajmej xikinmachtikan namokoneuan ma kitlasojtlakan Jehová
20 Kuali xikinmixmatikan namokoneuan. Salmo 127 kijtoua konemej yetoskiaj ken flechas (xiktlajtolti Salmo 127:4). Konemej tlatlamantli kipiaj inyelis ijkon ken flechas tlatlamantli kinchijchiuaj, sekimej uejueyij uan oksekimej amo. Ik non, tetajmej moneki kitaskej ken kinmachtiskej sejse inkoneuan. Se tokni uan isiua tlen chantij Israel, okijtojkej ken okinpaleuijkej ome inkoneuan ma kitekichiuilikan Jehová. Yejuan okijtojkej: “Sejse inmiuan otimomachtiayaj Biblia”. Pero tokni tlakatl moneki kitas kox ijkon kinmachtiskej.
Matiktemokan ken techpaleuia Biblia
Ma tiyolpakikan ika tlen tejuan ueli tikchiuaj
6 Tetajmej uelis momachtiskej seki tlamantli ipati tlen kijtoua Salmo 131:1, 2 (xiktlajtolti). Tekiua David okijto amo omokuayejyeko itlaj miak ipati kipiaskia nion okinekiaya tlen amo keman uelis kipiaskia. Okatka yolyamanki, ik non, oyolpakiaya uan kuali omomachiliaya. Nin kinmachtia tetajmej uelis yetoskej yolyamankej, amo ma mokuayejyekokan inkoneuan kichiuaskej itlaj tlen amo ueliskej nion ma kinmiluikan tlen amo uelis kichiuaskej. Ma kimatokan tetajmej tlen uelij kichiuaj inkoneuan uan tlen amo, ijkon kuali momachiliskej ika tlen uelis kichiuaskej. Se tokni tlen itoka Marina okijto: “Nonantsin amo keman okijto ne amitlaj ueli onikchiuaya uan nokniuan kema nion okijtouaya oksekimej konemej okachi okimatiayaj uan ne amo. Onechmachti tlatlamantli uelis tikchiuaskej uan Jehová tinochtin techtlasojtla. Ye onechpaleui amo keman ma nimokuayejyeko oksekimej okachi okimatiayaj itlaj kichiuaskej uan ne amo”.
13-19 DE ENERO
KEN TECHPALEUIA BIBLIA SALMOS 135-137
ToTajtsin Dios okachi ueyititok uan amo oksekimej dioses
“Cristo ye ichikawalis [toTajtsin] Dios”
15 Jehová okimakak chikaualistli Jesús pampa uelis kinauatis nochi tlen onka itech Tlaltikpak. Ik non, tikneltokaj Jehová noijki uelis kinauatis nochi tlen onka itech Tlaltikpak. Se neskayotl, chikome tonal achto mochiuaskia ueyi apachiuilistli Jehová okijto 40 tonalmej uan 40 yoak chikauak kiauiskia (Génesis 7:4). Uan noijki itech Éxodo 14:21 kijtoa Jehová okitekitilti chikauak ejekatl uan ijkon okitlajkoxelo mar rojo. Uan itech Jonás 1:4 kijtoa: “Jehová okichi ma uala se ueyi ejekatl itech atl”. Techyolseuia tikmatiskej itech Xochitlali toTajtsin Dios kinauatis nochi tlen onka itech Tlaltikpak.
Jehová nochipa techtlasojtla ika nochi iyolo
16 Tla tikneltokaj Jehová techmaluis, amo timomojtiskej. Pero xamo ualeua timoyolkokouaj uan timokuayejyekouaj nochipa ijkon timomachiliskej. Ijkuak ijkon techpanos, ¿ken techpaleuis Jehová? (xiktlajtolti Salmo 136:23). Yetoskia ken ika imauan techpaleuis (Sal. 28:9; 94:18). ¿Ken techpaleuia? Ma tikilnamiktokan toTajtsin Dios nochipa techpaleuis uan ijkon kichiua ika ome tlamantli. Se, maski san kanin tichantiskej ye nochipa uelis techmaluis. Ome, Jehová kiteititia kitekipachoua tlen techpanoua.
Matiktemokan ken techpaleuia Biblia
Yolpakij akinmej kipiaj inyolo ajsitok ixpan Jehová
12 Jehová miak uelta yokiteititi ye okachi Ueyititok uan amo ken tekiuajkej. Matikitakan tlen opanok yiuejkika. Ijkuak faraón otlanauatiaya ompa Egipto okintlajyouilti israelitas uan amo okinkauiliaya makiueyichiuakan Jehová. Pero ye okinmakixti uan okichi maixpoliui faraón itech Mar Rojo (Éx. 14:26-28; Sal. 136:15). Tekiua Belsasar tlen otlanauatiaya ompa Babilonia okichi se iluitl, okinueyichi teotsitsintin uan amo okiueyichi Jehová (Dan. 5:22, 23). Pero non youak toTajtsin Dios okipinaui Belsasar porque okimiktijkej uan ijkon medos uan persas opejkej tlanauatiaj (Dan. 5:28, 30, 31). Tekiua Herodes Agripa I okimikti apóstol Santiago uan noijki okinekiaya kimiktis apóstol Pedro ikinon otlanauati makitsakuakan. Pero Jehová amo okikauili ijkon makichiua, se iángel okichi mamokoko uan oixpoliuik (Hech. 12:1-5, 21-23).
20-26 DE ENERO
KEN TECHPALEUIA BIBLIA SALMOS 138, 139
Amo matimomojtikan tikueyichiuaskej Jehová
Ma tikueyichiuakan Jehová ijkuak timonechikoaj
10 ¿Timomojtiaj ijkuak tiknekij titlanankiliskej? Xamo tinochtin ijkon techpanoa. Tinochtin timomojtiaj ijkuak tiknekij titlanankiliskej. Ik non, moneki tikmatiskej tleka ijkon techpanoa. ¿Timomojtiaj porque amo ok tikilnamikij tlen tikijtoskej? Noso ¿timomojtiaj amo kuali titlanankiliskej? ¿Timomojtiaj porque amo titlanankiliaj ken oksekimej? Tla ijkon techpanoa, tikteititiaj tiyolyamankej uan tikinmitaj oksekimej okachi ixtlamatkej. Jehová kipaktia ma tiyetokan tiyolyamankej (Sal. 138:6; Filip. 2:3). Pero Jehová kineki ma tikueyichiuakan uan ma tikinyolchikauakan tokniuan ijkuak timonechikoaj (1 Tes. 5:11). Jehová techtlasojtla uan techpaleuis amo ma timomojtikan ijkuak titlanankiliskej.
Tinochtin matimoyolchikauakan ijkuak timonechikouaj
7 Uelis mitspaleuis seki tlamachtilmej tlen yokiskej itech nin revista Akin Tetlapouijtok. Ompa kijtoua moneki kuali timoyektlalis para titlanankilis (Prov. 21:5). Ijkon tikmatis tlen tikijtos uan amo timomojtis. Noijki mitspaleuis tla amo miak tlamantli tikijtos (Prov. 15:23; 17:27). Ijkon tokniuan kajsikamatiskej tlen tikijtoua pero amo kilnamiktoskej tlen tikijtos tla miak titlapoua. Tokniuan kitaskej tikajsikamati tlen otimomachti tla titlanankilis tlen timokuayejyekoua.
Matiktemokan ken techpaleuia Biblia
Jehová kinyolitis akinmej yoixpolikej uan ijkon kiteititia techtlasojtla, ixtlamatki uan kimati mochias
13 Axkan yotikitakej akinmej kinyolitis Jehová yetoskej ken achto okatkaj. ¿Tlen kijtosneki non? Jehová sapanoua techtlasojtla uan kimati tlen timokuayejyekouaj, tlen tikmachiliaj, tlen tikijtouaj uan tlen tikchiuaj. Ik non, tla monekis techyolitis, amo kilkauas tlen tikmatij, ken toyelis uan tlen timokuayejyekouaj. Tekiua David okimatiaya Jehová kuali techixmati (xiktlajtolti Salmo 139:1-4). ¿Ken timomachiliaj ijkuak tikitaj Jehová kimati nochi tlen techpanoua?
27 DE ENERO-2 DE FEBRERO
KEN TECHPALEUIA BIBLIA SALMOS 140-143
¿Tlen tikchiuas ijkuak yotimotlatlaujti?
Xikinkakikan akinmej ixtlamatkej
13 Ma tikitakan Jehová techtlasojtla ijkuak tokniuan itlaj techiluiaj. Jehová kineki kuali ma tiyetokan (Prov. 4:20-22). Ye techtlasojtla, ik non, techtlapouia ika tlen kijtoua Biblia, ika se amatlajkuilol noso ijkuak techtlapouia se tokni. Hebreos 12:9, 10 kijtoua ijkon kichiua Jehová porque kineki techpaleuis.
14 Ma timokuayejyekokan tlen techiluiaj uan amo ma timotekipachokan ken techiluiaj. Xamo timokuayejyekoskej akin itlaj otechilui amo kuali ken otechilui. Noijki akin kineki kiluis itlaj se tokni, moneki kuali kitlapouis para ye kinekis kikakis (Gál. 6:1). Uan tla tejuan ikaj techiluia itlaj moneki tikkakiskej, maski tikijtoskej amo okijto ken omonekiaya. Ma timotlajtlanikan: “Maski amo onechpakti tlen onechilui, ¿melauak tlen kijtoua? ¿Nechpaleuis tlen onechilui maski amo okijto ken omonekiaya?”. Kuali tla tikchiuaj tlen tokniuan techiluiaj porque non techpaleuis (Prov. 15:31).
Uelis okachi tiktekichiuiliskej Jehová
5 Matimokuayejyekokan ken yotechpaleui Jehová (Sal. 143:5). Apóstol Pablo omokuayejyeko Jehová kitlasojtla non okiyolini okachi makitekichiuili ika nochi iyolo (1 Cor. 15:9, 10; 1 Tim. 1:12-14). Noijki tla timokuayejyekouaj Jehová techtlasojtla, non okachi techyolinis matiktekichiuilikan (Sal. 116:12). Matikitakan tlen okipaleui se tokni tlen chanti ompa Honduras makitekichiuili Jehová ken precursora regular. Ye okijto: “Onimokuayejyeko Jehová sapanoua nechtlasojtla. Onechkauili manipoui itech ialtepe, nechmaluia uan nechpaleuia. Ijkuak ijkon onikchi, opejki okachi niktlasojtla Jehová uan okachi oniknekiaya niktekichiuilis ken precursora”.
Ximonamikti san iuan akin “kineltoka Toteko Dios” ¿uelis ijkon tikchiuas?
Uelis ualeua timomachilis ken David. Se tonal ye sapanoa omoyolkokoaya uan okilui Jehová san niman ma kipaleui pampa ayakmo okipiaya chikaualistli (Salmo 143:5-7, 10). Pero amo ximosotlaua. Xikchia Jehová ma mitsnankili. Xiktlajtolti Biblia uan ximokuayejyeko itech tlen tiktlajtoltia. Ijkon tikmatis tlen kineki Jehová xikchiua, uan noijki tikmatis ken okinpaleui itekipanojkauan. Nin mitspaleuis itech xitlaneltoka uan noijki xiktlakamati.
Matiktemokan ken techpaleuia Biblia
Tiyolpakij tikueyichiuaj Jehová ken ye kineki
7 Ijkuak tiktlatlaujtiaj Jehová tikueyichiuaj. Biblia kijtoua ijkuak ikaj motlatlaujtia yetoskia ken ijkuak yiuejkika ikaj okitlatiaya kopali ompa tabernáculo uan satepan ompa teokali (Sal. 141:2). Tlen ompa okitlatiayaj okiyolpaktiaya Jehová, noijki ijkon ijkuak tiktlatlaujtiaj ika nochi toyolo “kiyolpaktia” maski amo tikiluiaj miak tlamantli (Prov. 15:8; Deut. 33:10). Onka miak tlamantli tlen kiteititia Jehová kiyolpaktia ma tikiluikan tiktlasojtlaj uan tiktlasojkamatiliaj. Ye kineki ma tikiluikan tlen tiknekij, tlen techtekipachoua uan tlen tikneltokaj kichiuas satepan. Ik non, ijkuak tiktlatlaujtiskej moneki kuali ma timokuayejyekokan tlen tikiluiskej, ijkon yetoskia ken tiktlatiliaj kopali tlen okachi kuali.
3-9 DE FEBRERO
KEN TECHPALEUIA BIBLIA SALMOS 144-146
“¡Yolpaki altepetl akin iDios ye Jehová!”
Sekimej techtlajtlaniaj
1. Ma tikitakan tlen kijtoaj okseki versículos. Ijkuak versículo 12 kitekitiltia akin, kijtosneki tlateochiualistli tlen kijtoaj versículos 12 a 14 uan nin kipiaj akinmej yolmelauakej, yejuan kijtoaj itech versículo 11 ma kinmakixti toTajtsin Dios porque kintlajyouiltiaj. Ik non, tlajtoli “yolpaki” moajsi ome uelta itech versículo 15 uan san kinnamiki akinmej yolmelauakej noso altepetl akin iDios ye Jehová.
2. Nin mouika iuan okseki versículos kanin kijtoa toTajtsin Dios kinteochiuas akinmej amo kikauaj. Salmo 144 kiteititia David okineltokaya toTajtsin Dios kinmakixtiskia israelitas uan kinmakaskia miak tlateochiualistli (Lev. 26:9, 10; Deut. 7:13; Sal. 128:1-6). Se neskayotl tikajsij itech Deuteronomio 28:4, kijtoa: “Kinteochiuaskej mokoneuan uan noijki tlen tiktokas uan noijki kinteochiuaskej inkoneuan moyolkauan uan inkoneuan mochkauan”. Ijkon opanok ijkuak ikone David omochi ueyi tekiua. Ijkuakon akinmej ochantiayaj itech non altepetl sapanoa oyolpakej uan amo keman ijkon okinpanoaya. Ijkon ken otlanauati Salomón, okiteititi ken tlanauatis Mesías (1 Rey. 4:20, 21; Sal. 72:1-20).
Matikneltokakan tikseliskej tlen Jehová yokijto techmakas
16 ToTajtsin Dios kineki satepan nochipa matiyoltokan uan non se kualtsin tetliokolil. Tinochtin tiknekij maajsi non tonal uan tikneltokaj melauak ijkon mochiuas. Tlen tikneltokaj tikseliskej yetoskia ken se ancla tlen techpaleuia matitlaxikokan, ijkuak techtlajyouiltiaj uan ijkuak ixpoliui akin tiktlasojtla. Noijki tlen tikneltokaj tikseliskej yetoskia ken se casco porque techpaleuia matimokuayejyekokan tlen kuali. Tlen Biblia kijtoua tikseliskej techpaleuia okachi matimouikakan iuan Jehová noijki ijkon tikitaj ye sapanoua techtlasojtla. Kuali timomachiliaj porque tikneltokaj tikseliskej tlen Jehová yokijto.
17 Ijkuak apóstol Pablo okintlajkuilili tokniuan tlen ochantiayaj Roma, okinmilui: “Xipaktinemikah ika tlan nomechchia” (Rom. 12:12). Pablo oyolpakiaya porque okimatiaya tla nochipa okitlakamatiaya Jehová yaskia iluikak. Tejuan noijki tiyolpakij porque tikneltokaj tikseliskej tlen Jehová yokijto techmakas. Se salmista okijto: “Yolpaki akin [...] mochia itech Jehová uan kipia ken iDios [...] nochipa kichiua tlen kijtoua” (Sal. 146:5, 6).
¿Tlen kichiua melauak ma tiyolpakikan?
19 Yikanaj 6,000 xiuitl Satanás uan nochi tlen kiyekantok tetlajyouiltijtok. Axkan tikatej itlamian tonalmej uan san kanin katej akinmej san intech motekipachoaj, akinmej sapanoa kinpaktia tomin uan san kinekij moyolpaktiskej. San kintekipachoa tlen kinekij uan ken uelis kipiaskej non tlamantli. Pero non amo keman kinyolpaktis. San yolpakiskej akinmej kichiuaj ken kijtoa Biblia: “Yolpaki akin mopaleuia itech iDios Jacob, akin mochia itech Jehová uan kipia ken iDios” (Sal. 146:5).
20 Tejuan mojmostla okachi tiktlasojtlaj Jehová. Uan sejse xiuitl miakej kixmatij uan noijki kitlasojtlaj. Nin kiteititia iTekiuajkayo toTajtsin Dios yitlanauatijtok uan ayakmo miak poliui techteochiuas miak uan techmakas tlen axkan amo ueli timokuayejyekoaj. Okachi tiyolpakiskej axkan uan satepan tla tikchiuaj tlen Jehová kineki uan tla tikyolpaktiaj. Chikome timomachtiskej ken kipiaj inyelis akinmej san intech motekipachoaj uan ken kipiaj inyelis itekipanojkauan Jehová.
Matiktemokan ken techpaleuia Biblia
bh tlamachtil 13 pág. 128 párr. 9
Xikita yolilistli ken kita toTajtsin Dios
9 ¿Ken kita toTajtsin Dios inyolilis yolkamej? Noijki kipatioita inyolilis. Ye kitekauilia ma kinmiktikan yolkamej pampa kinkuaskej, ika motlakentiskej noso ijkuak se yolkatl uelis techmiktis (Génesis 3:21; 9:3; Éxodo 21:28). Maski ijkon, akinmej kintlajyouiltiaj noso kinmiktiaj san pampa kinekij moyolpaktiskej, amo kuali kichiuaj uan kiteititiaj amo kipatioitaj yolilistli (Proverbios 12:10).
10-16 DE FEBRERO
KEN TECHPALEUIA BIBLIA SALMOS 147-150
Onka miak tlamantli tlen kiteititia moneki matikueyichiuakan Jehová
¿Tleka moneki tikijtoskej “xikueyichiuakan Jah”?
5 Jehová amo san okinyolchika israelitas, noijki sejse intech omotekipacho. Ijkon ken axkan panoa. Salmista okijkuilo itech Jehová: “Ye kinpajtijtok akinmej moyolkokoaj uan kinmilpia kanin kinkokoa” (Sal. 147:3). Ijkuak timokokoaj noso timoyolkokoaj, ma tikmatokan Jehová kineki techyolchikauas uan techpaleuis (Sal. 34:18; Is. 57:15). Techyolchikaua uan kichiua ma tiyetokan tiixtlamatkej uan ijkon tikixnamikiskej san tlen ouijkayotl (Sant. 1:5).
6 Nin salmista oajkotlachixki uan okijto Jehová “kinpojtok sitlalimej uan nochtin kinnotsa ika intoka” (Sal. 147:4). ¿Tleka salmista opejki tlajtoa itech sitlalimej? Ma timokuayejyekokan itech nin tlamantli: salmista ueli okinmitaya sitlalimej, pero amo okimatiaya keski okatkaj. Axkan akinmej ixtlamatkej okachi miakej kinmitaj sitlalimej. Akinmej ixtlamatkej kineltokaj katej sapanoa miakej sitlalimej itech semanauak. Pero amo ueli kinpoaj. San akin okichijchi nochi ueli kinpoa uan ye kintokayotia. Nin kijtosneki nochtin kinmixmati (1 Cor. 15:41). ¿Tlen techmachtia nin? Ijkon ken toTajtsin Dios kimati kanin katej sitlalimej, noijki kimati kanin tikatej, ken timomachiliaj uan tlen moneki techmakas.
¿Tleka moneki tikijtoskej “xikueyichiuakan Jah”?
7 Jehová kuali kimati tlen ouijkayotl tikixnamikij uan uelis techpaleuis porque kipia chikaualistli (xiktlajtolti Salmo 147:5). Ualeua uelis tikitaskej amo uelis tikixnamikiskej ouijkayotl tlen tikpiaj. Pero toTajtsin Dios kimati hasta kanin uelis titlaxikoskej “porque ye kuali kimati ken tichijchitokej uan kilnamiki tejuan titlali” (Sal. 103:14). Titlajtlakolejkej, ik non, ualeua oksepa tikchiuaj tlen amo kuali. Uelis timoyolkokoaj porque itlaj amo kuali otikijtojkej, otimokuayejyekojkej itlaj amo kuali noso tichauatij. Maski Jehová amo ijkon kichiua kuali techajsikamati (Is. 40:28).
¿Tleka moneki tikijtoskej “xikueyichiuakan Jah”?
18 Salmista okimatiaya israelitas okipiayaj se tlateochiualistli porque Jehová okinpejpenki kinmakas iTlajtol uan itlanauatiluan (xiktlajtolti Salmo 147:19, 20). Noijki tikpiaj se tlateochiualistli porque Jehová san tejuan otechpejpenki ma tikpiakan itoka. Tikixmatij uan techyekana ika iTlajtol. Ik non, tiktlasojkamatilia iuan timouikaj. Ijkon ken salmista tlen okijkuilo Salmo 147, onka miak tlamantli tlen kiteititia moneki tikijtoskej “xikueyichiuakan Jah” uan noijki ma tikinmiluikan oksekimej ijkon ma kijtokan.
Matiktemokan ken techpaleuia Biblia
Matikitakan nochi tlen onka uan ijkon okachi tikixmatiskej Jehová
6 Jehová nochi kichiua ijkuak moneki. Sejse xiuitl itlamian febrero hasta tlajko mayo, israelitas okitayaj cigüeñas oyayaj ik norte. Jehová okinmilui israelitas: “Cigüeña tlen patlantinemi iluikak kimati keman moneki oksekan yas” (Jer. 8:7). Ijkon ken Jehová yokijto keman oksekan yaskej totomej, noijki yokijto keman tlaixkomakas. Ijkuak tikitaj totomej oksekan yauij, techilnamiktia Jehová yokitlali tlen tonal kipojpolos nochi tlen amo kuali uan uelis tikneltokaskej kichiuas (Hab. 2:3).
17-23 DE FEBRERO
KEN TECHPALEUIA BIBLIA PROVERBIOS 1
Telpochtli uan ichpochtli, ¿akin tikkakis?
Amo ikaj ma techkixtili totetliokolil
16 Tla motatajuan iTlaixpantijkauan Jehová, uelis timokuayejyekoa amo mitsajsikamatij noso sapanoa mitsmaluiaj. Uelis tikijtos kox melauak okachi kuali tiktekichiuilis Jehová. Pero tla tikkauas Jehová, tikitas san motatajuan uan tokniuan melauak motech motekipachoskej.
17 Tla motatajuan amo keman itlaj mitsiluiskej, ¿kiteititiskej melauak mitstlasojtlaj? (Heb. 12:8). Motatajuan noijki tlajtlakolejkej pero tla mitsyektlaliaj, non mitspaleuis maski ok titsikitsin. Amo san xikita ken mitsyektlaliaj. Ximokuayejyeko tleka ijkon kichiuaj uan tlen mitsiluiaj uan amo san niman xikualani. ITlajtol toTajtsin Dios kijtoa: “Se tlakatl ixtlamatki amo sapanoa tlajtoa uan akin kuali mokuayejyekoa kipia yolseuilistli” (Prov. 17:27). Ximochijchikaua kuali timokuayejyekos, xikkaki tlen mitsnauatiaj uan amo san xikita ken mitstlapouiaj motatajuan (Prov. 1:8). Amo keman xikilkaua motatajuan kitlasojtlaj Jehová uan kinekij mitspaleuiskej xikpia yolilistli tlen amo keman tlamis.
w05-S 15/2 págs. 19, 20 párrs. 11, 12
Matikyolpaktikan toTajtsin Dios uan amo oksekimej
11 Matimochijchikauakan matikyolpaktikan san toTajtsin Dios. Tejuan tikchiuaj seki tlamantli porque timouikaj inuan akinmej noijki ijkon kichiuaj. Tinochtin tiknekij tikinpiaskej toyolikniuan uan techpaktia makinpakti tlen tikchiuaj. Miakej telpochmej uan ichpochmej kinmiluiaj makichiuakan ijkon ken kichiuaj akinmej inuan mouikaj. Yejuan kichiuaj tlen oksekimej kichiuaj porque kinekij inuan mouikaskej. Pero moneki momaluiskej uan kuali makitakan tlen kichiuaskej porque oksekimej san kinekiskej techouijtiliskej. Porque ualeua sekimej san kinekij mouikaskej inuan oksekimej para kichiuaskej tlen amo kuali (Proverbios 1:11-19). Ijkuak se tokni kichiua tlen amo kuali, kitlatia tlen amo kuali okichi (Salmo 26:4). Pablo okijto: “Ayakmo xikchiuakan tlen kichiuaj akinmej chantij tlaltikpak” (Romanos 12:2). Jehová techyolchikaua para amo matikchiuakan tlen oksekimej kichiuaj (Hebreos 13:6).
12 Matikilnamiktokan okachi ipati matiktlakamatikan Jehová uan ijkon tikyolpaktiskej. Ikinon amo matikchiuakan tlen oksekimej kichiuaj san para matechselikan noso kuali matechitakan. Éxodo 23:2 kijtoua amo matikchiuakan tlen amo kuali kichiuaj oksekimej. Caleb amo okichi ijkon ken israelitas ijkuak amo okineltokakej Jehová kichiuaskia tlen okijto. Ye okineltokaya toTajtsin Dios kichiuaskia nochi tlen okijto ikinon okiteochijkej (Números 13:30; Josué 14:6-11). ¿Tejuan noijki tikpatioitaj timouikaskej iuan toTajtsin Dios uan timochijchikauaskej amo tikchiuaskej tlen oksekimej kichiuaj?
Matiktemokan ken techpaleuia Biblia
“Ixtlamatilistli tlen melauak, chikauak mokaki itech ojtli”
7 Akinmej amo ixtlamatkej san niman kinneltokiliaj oksekimej (Prov. 14:15, nota). Miakej ijkon tikinmajsi ijkuak titetlapouiaj. Akinmej kinyekana religiones uan tekiuajkej miakej yokinkajkayajkej uan sekimej moyolkokouaj ijkuak kimatij. Pero sekimej kichiuaj tlen kijtoua Proverbios 1:22 amo kinekij yetoskej ixtlamatkej (Jer. 5:31). Yejuan kichiuaj san tlen kinyolpaktiaj uan amo kinekij kichiuaskej tlen kijtoua Biblia. Miakej mokuayejyekouaj ken se siuatl tlen chanti Quebec Canadá, tlen kipia ireligión, ye okilui se tokni: “Tejuan amo totlajtlakol tla teopixki techkajkayauaj”. ¡Amo tiknekij tikchiuaskej ken akinmej amo ixtlamatkej! (Prov. 1:32; 27:12).
24 DE FEBRERO-2 DE MARZO
KEN TECHPALEUIA BIBLIA PROVERBIOS 2
¿Tleka moneki matechpakti timomachtiskej?
Okachi matimomachtikan tlen melauak tlamachtia Biblia
16 Amo tinochtin techpaktia timomachtiskej Biblia pero Jehová kineki matimochijchikauakan matimomachtikan para tikajsikamatiskej tlen melauak tlamachtia (xiktlajtolti Proverbios 2:4-6). Tla ijkon tikchiuaj, techpaleuis. Se tokni tlen itoka Corey ijkuak momachtia Biblia, san se versículo kitlajtoltia. Ye okijto: “Nikintlajtoltia notas tlen uitsej tlakxitlan uan referencias marginales, ijkon okachi kuali nimomachtia”. Tla timomachtiaj ijkon ken tokni noso amo, tikteititiskej tikpatioitaj tlen melauak tlamachtia Biblia, tla timochijchikauaj timomachtiskej (Sal. 1:1-3).
“Ixtlamatilistli tlen melauak, chikauak mokaki itech ojtli”
3 Tla tiixtlamatkej, kuali tikpejpenaskej tlen tikchiuaskej. Pero tla tiknekij Jehová matechpaleui matiyetokan tiixtlamatkej, moneki tikchiuaskej okseki tlamantli. Biblia kijtoua: “Tipeuaj timochiuaj tiixtlamatkej ijkuak tiktlakaitaj Jehová uan tla tikixmatij akin Santo, timochiuaj tiixtlamatkej” (Prov. 9:10). Ijkuak itlaj tikpejpenaskej moneki tikitaskej “tla tikixmatij akin Santo” non kijtosneki timokuayejyekoskej ken Jehová uan ijkon tikchiuaskej tla tiktlajtoltiaj Biblia uan amatlajkuilolmej. Ijkon tikteititiskej melauak tiixtlamatkej (Prov. 2:5-7).
4 San Jehová techpaleuis matiyetokan tiixtlamatkej (Rom. 16:27). ¿Tleka ijkon tikijtoua? Se, Jehová otechchijchi uan ye kixmati nochi tlen okichijchi (Sal. 104:24). Ome, nochi tlen Jehová okichijchi kiteititia ye ixtlamatki (Rom. 11:33). Eyi, techpaleuis tla tikchiuaj tlen ye techiluia (Prov. 2:10-12). Melauak tiyetoskej tiixtlamatkej tla timoyekanaj uan tikchiuaj non eyi tlamantli.
w16.09 págs. 20, 21 párrs. 2, 3
Telpokamej uan ichpokamej, xikpiakan chikauak namotlaneltokilis
2 Axkan miakej tlaltikpaktlakamej amo kineltokaj kox toTajtsin Dios otechchijchi. Tla te titelpochtli noso tiichpochtli tlen tiktekichiuilia Jehová noso yikin timomachtijtok Biblia, uelis timotlajtlania ken tikteititis Jehová ye akin otechchijchi. Biblia techpaleuia kuali ma timokuayejyekokan tlen tiktlajtoltiaj, tlen tikkakij uan noijki techpaleuia ma tikajsikamatikan miak tlamantli. ITlajtol toTajtsin Dios kijtoa: “Tla kuali timokuayejyekoa non mitsmaluis”. ¿Ken mitsmaluis? Mitspaleuis amo xikseli tlen amo melauak uan okachi xitlaneltoka itech Jehová (xiktlajtolti Proverbios 2:10-12).
3 Tla tiknekij tikpiaskej chikauak totlaneltokilis, moneki kuali ma tikixmatikan Jehová (1 Timoteo 2:4). Ik non, ijkuak tiktlajtoltis Biblia uan toamatlajkuiloluan, moneki kuali ximokuayejyeko itech tlen tiktlajtoltia. Ximochijchikaua xikajsikamati tlen tiktlajtoltia (Mateo 13:23). Itech nin tlamachtil tikitaskej tla ijkon timomachtis, tikitas miak tlamantli tlen kiteititia Jehová ye akin otechchijchi uan iaxka tlen ijkuilitok itech Biblia (Hebreos 11:1).
Matiktemokan ken techpaleuia Biblia
Okachi matimomachtikan tlen melauak tlamachtia Biblia
Amo tinochtin techpaktia timomachtiskej Biblia pero Jehová kineki matimochijchikauakan matimomachtikan para tikajsikamatiskej tlen melauak tlamachtia (xiktlajtolti Proverbios 2:4-6). Tla ijkon tikchiuaj, techpaleuis. Se tokni tlen itoka Corey ijkuak momachtia Biblia, san se versículo kitlajtoltia. Ye okijto: “Nikintlajtoltia notas tlen uitsej tlakxitlan uan referencias marginales, ijkon okachi kuali nimomachtia”. Tla timomachtiaj ijkon ken tokni noso amo, tikteititiskej tikpatioitaj tlen melauak tlamachtia Biblia, tla timochijchikauaj timomachtiskej (Sal. 1:1-3).