Tlamachtilmej para Toteki akinmej tikchiuaj ken Cristo
© 2024 Watch Tower Bible and Tract Society of Pennsylvania
3-9 DE MARZO
KEN TECHPALEUIA BIBLIA PROVERBIOS 3
Matikteititikan tikneltokaj Jehová
ijwbv-S tlamachtil 14 párrs. 4, 5
Proverbios 3:5, 6: “Amo xikchiua san tlen timokuayejyekoua”
“Xitlaneltoka itech Jehová ika nochi moyolo”. Tikteititiaj tikneltokaj Jehová ijkuak tiktlakamatij. Moneki tikneltokaskej Jehová ika nochi toyolo. Ijkuak Biblia kijtoua toyolo kijtosneki tlen tikmachiliaj, tleka tikchiuaj seki tlamantli uan tlen timokuayejyekouaj. Ikinon ijkuak tikneltokaj toTajtsin Dios ika nochi toyolo kijtosneki ijkon tikpejpenaj tikchiuaskej porque tikneltokaj techpaleuis tlen technauatia (Romanos 12:1).
“Amo xikchiua san tlen timokuayejyekoua”. Tejuan titlajtlakolejkej ikinon moneki tikneltokaskej toTajtsin Dios porque amo kuali tikpejpenaj tlen tikchiuaskej. Titlajyouiskej tla san tikchiuaskej tlen tejuan tiknekij noso tlen timokuayejyekouaj (Proverbios 14:12; Jeremías 17:9). ToTajtsin Dios ye okachi ixtlamatki (Isaías 55:8, 9). Ikinon okachi tipakiskej tla tikkauiliaj ye matechyekana (Salmo 1:1-3; Proverbios 2:6-9; 16:20).
ijwbv-S tlamachtil 14 párrs. 6, 7
Proverbios 3:5, 6: “Amo xikchiua san tlen timokuayejyekoua”
“Nochi tlen tikchiua xikchiua ken ye kineki”. Moneki matikitakan tlen mokuayejyekoua toTajtsin Dios ijkuak itlaj tikpejpenaskej tikchiuaskej. ¿Ken uelis ijkon tikchiuaskej? Matiktlatlaujtikan matechyekana uan matikchiuakan tlen techiluia iTlajtol (Salmo 25:4; 2 Timoteo 3:16, 17).
“Ye kichiuas kuali xikpia monemilis”. ToTajtsin Dios techpaleuia matikintlakamatikan itlanauatiluan uan non techpaleuia kuali matikpiakan tonemilis (Proverbios 11:5). Okachi tipakiskej tla ijkon tikchiuaskej uan amo titlajyouiskej (Salmo 19:7, 8; Isaías 48:17, 18).
be-S pág. 76 párr. 4
Matimochijchikauakan okachi matiktekichiuilikan Jehová
Ijkuak yotikixnamikej seki tlamantli uan oksepa techpanos, xamo tikijtoskej: “Yinikmati tlen nikchiuas porque ijkon yonechpanok”. ¿Kox kuali tla ijkon timokuayejyekouaj? Proverbios 3:7 kijtoua: “Amo ximokuayejyeko tiixtlamatki”. Ijkuak itlaj techpanoua, techpaleuia okachi matikajsikamatikan ken tikchiuaskej seki tlamantli. Tla timochijchikauaj okachi tiktekichiuiliskej Jehová, tikilnamiktoskej okachi kuali kisas tlen tikchiuaskej tla ye techpaleuia. Noijki tikteititiaj tikneltokaj Jehová tla tikkauiliaj matechyekana uan amo timokuayejyekouaj toselti uelis tikixnamikiskej tlen techpanoua. Tejuan tikilnamiktokej amo kuali kisas tlen tikchiuaskej tla amo techpaleuis Jehová.
Matiktemokan ken techpaleuia Biblia
Nochipa ma timotlasojtlakan ika nochi toyolo uan ma timopaleuikan
TECHPALEUIS tla timotlasojtlaj ika nochi toyolo. Pero ¿ken uelis tikchiuaskej? Amochtli Proverbios kijtoua: “Nochipa xitetlasojtla ika nochi moyolo uan amo xitekajkayaua [...]; uan ijkon toTajtsin Dios uan tlakamej kuali mitsseliskej uan nochtin kimatiskej tiixtlamatki”; “tlakatl tlen yolkuali mopaleuia” uan “akin mochijchikaua kichiuas tlen kuali uan tetlasojtla ika nochi iyolo, yoltos” (Prov. 3:3, 4; 11:17; 21:21).
2 Amochtli Proverbios kijtoua eyi tlamantli tlen kiteititia tleka moneki nochipa titetlasojtlaskej ika nochi toyolo. Se, Jehová techpatioita ijkuak titetlasojtlaj ika nochi toyolo. Ome, porque techpaleuia nochipa ma timouikakan iuan oksekimej uan noijki kuali tikatej. Uan eyi, tla nochipa titetlasojtlaj ika nochi toyolo satepan Jehová techteochiuas uan nochipa tiyoltoskej, ik non, ma tikchiuakan tlen Jehová technauatia: “Xitetlasojtlakan ika nochi namoyolo uan xiteiknomatikan” (Zac. 7:9).
10-16 DE MARZO
KEN TECHPALEUIA BIBLIA PROVERBIOS 4
“Xikmalui moyolo”
¿Ken uelis tikmaluiskej toyolo?
Ijkuak Proverbios 4:23 kijtoa “toyolo”, kijtosneki tlen “tikpiaj tlaijtik” noso tlen “san tejuan tikmatij” (xiktlajtolti Salmo 51:6). Nin kijtosneki tlen timokuayejyekoaj, tlen tikmachiliaj, tlen techpaktia uan tlen tiknekij tikchiuaskej. Nin amo san moneki motas ken toyelis. Noijki moneki ma mota ken tikatej ik tlaijtik.
¿Ken uelis tikmaluiskej toyolo?
10 Tla tiknekij tikmaluiskej toyolo, moneki tikmatiskej tlen techijtlakos uan san niman moneki itlaj tikchiuaskej. Tlen kijtoa Proverbios 4:23 techilnamiktia tlen okichiuayaj akinmej yiuejkika otlamaluiayaj. Yejuan otlamaluiayaj ipan tepamitl. San niman okintsajtsiliayaj oksekimej ijkuak okitayaj itlaj kinchiuiliskiaj. Tlen okichiuayaj techilnamiktia ma timomaluikan porque tlamo Satanás techijtlakolis totlalnamikilis.
11 Yiuejkika akinmej otlamaluiayaj ipan tepamitl, omopaleuiayaj iuan akinmej otlamaluiayaj kanin okatkaj puertas (2 Sam. 18:24-26). San sekan okitayaj ma tlatsakto ijkuak ualaskiaj akinmej okinekiayaj itlaj kinchiuiliskej (Neh. 7:1-3). Ma tikmachtikan totlalnamikilis ika tlen kijtoa Biblia uan ijkon yetos ken akinmej otlamaluiayaj yiuejkika. ¿Ken techpaleuis? Ijkuak Satanás kinekis kijtlakos toyolo, totlalnamikilis san niman techtsajtsilis. Nin kijtosneki techtsajtsilis ijkuak Satanás kinekis ma timokuayejyekokan tlen amo kuali, tlen tikmachiliaj, tlen techpaktia uan tlen tiknekij tikchiuaskej. Nochipa ma tikkakikan totlalnamikilis ijkuak techiluia tlen techijtlakos uan san niman ma tikixtopeuakan. Yetoskia ken san niman ma titlatsakuakan ken yiuejkika okichiuayaj.
¿Ken uelis tikmaluiskej toyolo?
14 Amo san tikixtopeuaskej tlen amo kuali tla tiknekij tikmaluiskej toyolo. Moneki noijki tikseliskej tlen kuali. Oksepa ma timokuayejyekokan itech tepamitl tlen okiyaualoaya altepetl. Akin otlamaluijtoka kanin okatka puerta otlatsakuaya ijkuak ikaj okinekiaya kalakis uan kichiuas tlen amo kuali. Pero okintlatlapoliayaj akinmej okiuikayaj tlakuali uan okseki tlamantli. Tla amo kintlatlapoliskiaj akinmej okiuikayaj tlakuali, apismikiskiaj akinmej ompa ochantiayaj. Tejuan noijki moneki nochipa ma tiktlapokan toyolo para ompa ma kalaki tlen techmachtia Jehová.
w12-S 1/5 pág. 32 párr. 2
Matikmaluikan ‘toyolo’
¿Tleka moneki tikmaluiskej toyolo? ToTajtsin Dios okinauati tekiua Salomón makijkuilo: “Onka miak tlamantli tlen moneki tikmaluis pero okachi xikmalui moyolo porque ompa kisa yolilistli” (Proverbios 4:23). Moneki matikmaluikan toyolo porque non techpaleuis axkan uan noijki satepan. ¿Tleka moneki ijkon matikchiuakan? Porque toTajtsin Dios kimati nochi tlen tikpiaj itech toyolo (1 Samuel 16:7). Ikinon ye kuali techitas tla timochijchikauaj tikpiaskej kualtsin toyolo (1 Pedro 3:4).
Matiktemokan ken techpaleuia Biblia
¿Tikmatij timochiaskej hasta ijkuak Jehová kichiuas tlen yokijto?
4 Proverbios 4:18 kijtoua: “Pero inmiojui akinmej yolmelauakej kajki ken ijkuak tlanestiuits okachi uan okachi tlanestiuits hasta kuali tlanesi”. Non techititia Jehová kimachtijti ialtepe tlen ye kineki. Non versículo noijki kiteititia ijkuak ikaj okachi mochikajti itlaneltokilis. Pero nochi non amo san niman uelis panos. Tla kuali timomachtiaj uan tikchiuaj tlen kijtoua iTlajtol toTajtsin Dios, yolik tikpiaskej tonemilis ijkon ken Cristo uan okachi kuali tikixmatiskej toTajtsin Dios. Ma tikitakan ken okiyekijto Jesús.
17-23 DE MARZO
KEN TECHPALEUIA BIBLIA PROVERBIOS 5
Matikixtopeuakan tlen kichiuas matiauilnemikan
w00-S 15/7 pág. 29 párr. 1
Matimomaluikan porque miakej auilnemij
Nin proverbio kitokayotia siuatl tlen auilnemi yetoskia ken amikaj kixmati. Ijkuak ye kineki ikaj iuan maauilnemi, kualtsin kitlapouia ken yetoskia tsopelik ken neujtli uan kualtsin kitlapouia ken yetoskia aceite de oliva. Ijkon kichiuaj akinmej kinekij auilnemiskej. Matikitakan tlen okipanok Amy ijkuak okipiaya 27 xiuitl. Ye otekipanouaya ken secretaria uan okijto: “Se tlakatl tlen iuan nitekipanoua nechkaki uan nechiluia tlen kuali nikchiua. Nechpaktia makitakan oksekimej tlen kuali nikchiua pero nikita ye san kineki nouan motekas. Amo nikkauilis manechkajkayaua”. Akin kineki matitlajtlakolchiuakan techiluis itlaj tlen techpaktis ikinon moneki matikitakan tleka ijkon kichiua. Tejuan uelis timomaluiskej tla kuali timokuayejyekouaj.
w23.06 págs. 22, 23 párrs. 9, 10
9 Miak ipati amo matiauilnemikan. Itech amochtli Proverbios ijkuilitok “siuatl tlen amo ixtlamatki” kijtoua: “Tsopelik atl tlen kichtekij”. ¿Tlen kineskayotia “atl tlen kichtekij”? Biblia kijtoua ijkuak akinmej yomonamiktijkej san sekan motekaj yetoskia ken atl tlen kinyolpaktiaj (Prov. 5:15-18). Se tlakatl uan se siuatl amo tlajtlakolchiuaj ijkuak san sekan motekaj tla yomonamiktijkej. Pero tlajtoli “atl tlen kichtekij” kijtosneki okse tlamantli. Xamo kijtosneki ijkuak sekimej auilnemij uan amo kintlakamatij itlanauatiluan toTajtsin Dios. Nochtin akinmej auilnemij kichiuaj san ichtaka ijkon ken ijkuak ikaj tlachteki. Akinmej amo kinextiaj tlen kichiuaj yetoskia ken non “atl tlen kichtekij” uan kimachiliaj tsopelik. Pero san yejuan mokajkayauaj porque Jehová kita nochi uan amo uelis kikajkayauaskej. Akinmej ijkon kichiuaj, Jehová ayakmo kinselia uan non yetoskia ken itlaj chichik (1 Cor. 6:9, 10).
10 Akinmej auilnemij xamo pinauaj, kimachiliaj ayakmo itlaj inpati, kinpiaj inkoneuan maski amo okinekiayaj uan kinyolkokouaj infamilias. Okachi kuali matiyetokan tiixtlamatkej uan amo matikchiuakan tlen kineki “siuatl tlen amo ixtlamatki”. Akinmej auilnemij ayakmo mouikaj iuan Jehová pero noijki mokokouaj uan hasta ixpoliuij (Prov. 7:23, 26). Proverbios capítulo 9 versículo 18 kijtoua: “Akinmej okinyole katej uejkatlan kanin toktokej akinmej yoixpolikej”. Pero ¿tleka miakej kichiuaj tlen amo kuali maski tlajyouiaj? (Prov. 9:13-18).
8 Itech Proverbios 5:8 toTajtsin Dios techiluia ma ticholokan itech auilnemilistli. Itech Proverbios tlakotonal 7, tikajsij ineskayo se telpochtli tlen ijkuak yiyoak opaxialoto ik kanin ochantiaya se siuatl tlen oauilnemiaya. Nin siuatl omotlakenti pampa kinyoltilanas tlakamej. Ijkuak okitak telpochtli omotoki inauak uan okixpipitso uan opejki kiluia tlamantli tlen okichi iuan ma auilnemi. Ijkuak telpochtli okiski itech ikalijtik amo omokuayejyekoaya auilnemis. Pero ken amo okixtope tlen omokuayejyekoaya, oauilnenki. Uan otlajyoui miak, tla mokuayejyekoskia tlen kipanoskia, amo panoskia ik kanin okatka non siuatl (Proverbios 7:6-27).
9 Tejuan noijki uelis amo kuali tikpejpenaskej tla amo timokuayejyekoaj titlajyouiskej. Se neskayotl, tla tikatej yiyoak amo kuali san tikpatilijtoskej canales tlen kipia televisión. ¿Tleka? Pampa uelis tikajsiskej kanin auilnemij. Uan tla tikatej itech Internet amo kuali tikchiuaskej clic itech páginas tlen amo tikinmixmatij, noso tikalakiskej kanin mota auilnemilistli. Tla ijkon tikchiuaj tikitaskej tlamantli tlen kichiuas ma tiknekikan tikchiuaskej tlen amo kuali uan amo tiktlakamatiskej Jehová.
10 Biblia techiluia ken uelis mouikaskej tlakamej uan siuamej (xiktlajtolti 1 Timoteo 5:2). Se iTlaixpantijka Jehová sapanoa kipatioita inamik. Uan akin yikin mokuayejyekoa monamiktis noijki ijkon kichiua. Sekimej kineltokaj tla se tlakatl uan se siuatl moixuetskiliaj, moixnotsaj noso nejnemij pampa oksekimej ma kinmitakan amo se tlajtlakoli tla amo mokitskiaj. Pero tla ok kichiuaj nin tlamantli uelis mokuayejyekoskej tlen amo kuali uan satepan auilnemiskej. Tejuan uelis ijkon techpanos pampa oksekimej ijkon yokinpanok.
Matiktemokan ken techpaleuia Biblia
¿Akinmej kijtoua Biblia uelis motekaskej san sekan?
Jehová kijtoua uelis motekas se tlakatl uan se siuatl uan ijkon moyolpaktiskej pero uelis san ijkon kichiuaskej tla yomonamiktijkej. Ijkuak se tlakatl moteka iuan isiua amo san para kinpiaskej inkoneuan noijki para kiteititiskej melauak motlasojtlaj. Ikinon Biblia kijtoua: “Xiyolpaki iuan siuatl akin iuan otimonamikti ijkuak otikatka titelpochtli” (Proverbios 5:18, 19). Jehová kineki akinmej yomonamiktijkej amo mamokajkayauakan. Ikinon akin kichiua ken Cristo amo moteka iuan akin amo inamik (xiktlajtolti Hebreos 13:4).
24-30 DE MARZO
KEN TECHPALEUIA BIBLIA PROVERBIOS 6
¿Tlen techmachtia tlen kichiuaj askamej?
it-1-S págs. 1175, 1176
Askatl
ToTajtsin Dios okinchijchi askamej mayetokan ixtlamatkej . Pero amo mokuayejyekouaj para yetoskej ixtlamatkej porque toTajtsin Dios ijkon okinchijchi mayetokan. Biblia kijtoua askamej kisasakaj intlakual ijkuak okachi tlatotonia uan ijkon kipiaj miak tlakuali (Prov. 6:8). Ompa Palestina miakej kinmixmatij askamej tlen tlaololouaj noso Messor semirufus. Nonmej askamej peua kololouaj intlakual ijkuak peua tlatotonia uan ijkon kichiuaj hasta ijkuak okachi tlatotonia. Ijkon kipiaj tlen kikuaskej ijkuak seua porque amo tlamochiua. Nonmej askamej katej kanin tlatokaj porque ompa onka semillas. Tla siaua semilla tlen okololojkej, kikixtiaj mauaki. Noijki kikixtiliaj iyolo semilla para amo maixua. Nonmej askamej kichiuaj se ojtli ik kanin panoskej uan kikauaj ieuayo semilla ik kanin kalakij.
Techpaleuia tlen kichiuaj askamej. Sekimej omomachtijkej tlen kichiuaj askamej uan okitakej melauak tlen kijtoua Biblia. Proverbios 6:6 kijtoua: “Te akin titlatsiui, ximotoki inauak askatl, kuali xikita tlen kichiua uan ximochiua tiixtlamatki”. Askamej amo san kololouaj intlakual. Yejuan noijki nochipa mochijchikauaj kichiuaskej inteki. Ualeua kiuikaj seki tlamantli tlen okachi etik maski yejuan tsikitsitsintin. Noijki amo mosotlauaj. Tekipanouaj maski ualeua uetsij porque moneki kanaj temoskej noso kanaj tlejkoskej. Nonmej askamej mopaleuiaj, tlachipauaj kanin chantij uan kipaleuiaj mamokopa askatl tlen mokokoua noso itlaj kipanoua.
w00-S 15/9 pág. 26 párrs. 3, 4
Matikchiuakan tlen kuali uan oksekimej kuali techitaskej
Tejuan noijki moneki matitekipanokan ijkon ken tekipanouaj askamej. Moneki kuali titekipanoskej maski oksekimej amo techitaskej. Ijkon moneki tikchiuaskej ijkuak timomachtitiuij, ijkuak titekipanotiuij noso ijkuak tikchiuaskej okseki tlamantli para tiktekichiuiliskej Jehová. Askamej chikauak tekipanouaj uan non kinpaleuia. ToTajtsin Dios noijki kineki tejuan “matipakikan ijkuak chikauak titekipanouaj” (Eclesiastés 3:13, 22; 5:18). Ijkon ijkuak chikauak titekipanouaj, techpaleuia amo matechkuejso totlalnamikilis uan kuali timomachiliaj (Eclesiastés 5:12).
Salomón okijto ome tlamantli tlen kiteititia ken kajki akin tlatsiui. Okijto: “Te akin titlatsiui, ¿hasta keman ompa tiuetos? ¿Hasta keman tiijsas? Amo uejkika tiuetos, tepitsin tikochis, tepitsin timoseuis uan amitlaj tikchiuas..., uan amitlaj tikpias ken yetoskia omitstlachtekilijkej uan nochi tikpolos ken yetoskia omitstlachteki se tlakatl tlen okipiaya iarma” (Proverbios 6:9-11). Ijkuak ikaj tlatsiui uan amo meua, amitlaj kipias ken yetoskia okitlachtekijkej. Noijki akin tlatsiui nochi kipolos ken yetoskia okitlachteki se tlakatl tlen okipiaya iarma. Itlala san niman moskaltis amo kuali xiuitl (Proverbios 24:30, 31). Ikinon maski tlanemakas amitlaj kitlanis. ¿Kimakaskej tekitl akin tlatsiui? ¿Kuali kisas tlen kichiua kanin momachtia?
Matiktemokan ken techpaleuia Biblia
w00-S 15/9 pág. 27 párr. 4
Matikchiuakan tlen kuali uan oksekimej kuali techitaskej
Proverbios kijtoua chikome tlamantli tlen amo moneki tikchiuaskej. Tlajtlakolchiua “akin moueyineki”uan “kineki kichiuas tlen amo kuali”. Noijki tlajtlakolchiua “akin tlakajkayaua” uan “se tlaixpanti tlen tekajkayaua”. Noijki tlajtlakoli “akin kinokia ieso akin amitlaj itlajtlakol” uan “ijkuak sekimej motlalouaj para kichiuaskej tlen amo kuali”. Okachi kikokolia Jehová akin kichiua oksekimej mamokualanikan uan amo kuali mamouikakan. Nin proverbio achto kijtoua chikuase tlamantli tlen Jehová amo kipaktia pero satepan kijtoua chikome tlamantli. Non kijtosneki mojmostla okachi momiaktilia tlen amo kuali.
31 DE MARZO-6 DE ABRIL
KEN TECHPALEUIA BIBLIA PROVERBIOS 7
Matimomaluikan amo matechyoltilana tlen amo kuali
Matiijsatokan uan ijkon amo tikchiuaskej tlen techyoltilana
8 ¿Ken uelis timomaluiskej para amitlaj matechyoltilana? Matikitakan tlen techmachtia Proverbios capítulo 7. Ompa kijtoua se telpochtli omotekak iuan se siuatl tlen oauilnemiaya. Itech versículo 22 kijtoua ye oyajki okitemoto siuatl. Pero achto versículos kijtouaj tlen tlamantli okichi non telpochtli uan ijkon otlajtlakolchi.
9 ¿Tlen okichi? Non telpochtli opanok yiyouak ik kanin ochantiaya non siuatl uan noijki oyajki ik kanin okatka ikalijtik (xiktlajtolti Proverbios 7:8, 9). Satepan ijkuak okitak non siuatl amo san niman oyajki. Okimokauili makipipitso non siuatl uan noijki okilui miak tlamantli kualtsin. Xamo non siuatl okinekiaya telpochtli mamokuayejyeko ye okatka yolkuali (xiktlajtolti Proverbios 7:13, 14, 21). Tla non telpochtli amo kichiuaskia non tlamantli amitlaj kiyoltilanaskia uan amo tlajtlakolchiuaskia.
Ximochijchikaua pampa amo tikchiuas tlen amo kuali
10 Itech Proverbios 5:8 toTajtsin Dios techiluia ma ticholokan itech auilnemilistli. Itech Proverbios tlakotonal 7, tikajsij ineskayo se telpochtli tlen ijkuak yiyoak opaxialoto ik kanin ochantiaya se siuatl tlen oauilnemiaya. Nin siuatl omotlakenti pampa kinyoltilanas tlakamej. Ijkuak okitak telpochtli omotoki inauak uan okixpipitso uan opejki kiluia tlamantli tlen okichi iuan ma auilnemi. Ijkuak telpochtli okiski itech ikalijtik amo omokuayejyekoaya auilnemis. Pero ken amo okixtope tlen omokuayejyekoaya, oauilnenki. Uan otlajyoui miak, tla mokuayejyekoskia tlen kipanoskia, amo panoskia ik kanin okatka non siuatl (Proverbios 7:6-27).
Nochipa techpaleuis tla tiktlakaitaj Jehová
10 Akinmej auilnemij xamo pinauaj, kimachiliaj ayakmo itlaj inpati, kinpiaj inkoneuan maski amo okinekiayaj uan kinyolkokouaj infamilias. Okachi kuali matiyetokan tiixtlamatkej uan amo matikchiuakan tlen kineki “siuatl tlen amo ixtlamatki”. Akinmej auilnemij ayakmo mouikaj iuan Jehová pero noijki mokokouaj uan hasta ixpoliuij (Prov. 7:23, 26). Proverbios capítulo 9 versículo 18 kijtoua: “Akinmej okinyole katej uejkatlan kanin toktokej akinmej yoixpolikej”. Pero ¿tleka miakej kichiuaj tlen amo kuali maski tlajyouiaj? (Prov. 9:13-18).
Matiktemokan ken techpaleuia Biblia
¿Ken uelis okachi tlaneltokaskej telpochmej?
5 Ximochijchikaua “xikmalui […] mokuayejyekolis” (Prov. 3:21). Tlakamej tlen ijkon kichiuaj achto mokuayejyekouaj tlen kipejpenaskej kichiuaskej. Ikinon nochipa ximochijchikaua kuali ximokuayejyeko. ¿Tleka? Axkan miakej telpochmej san kichiuaj tlen yejuan kinekij uan tlen kinpaktia (Prov. 7:7; 29:11). Noijki uelis mitsijtlakos tlen tikita itech televisión, películas, internet uan itech redes sociales. ¿Tlen uelis tikchiuas para kuali timokuayejyekos? Achto moneki timomachtis principios bíblicos uan timokuayejyekos tleka Jehová mitsiluia itlaj xikchiua. Satepan xikita tlen otimomachti uan xikpejpena tikchiuas tlen Jehová kipaktia (xiktlajtolti Salmo 119:9). Ijkon okachi titlaneltokas tla timochijchikaua kuali timokuayejyekos (Prov. 2:11, 12; Heb. 5:14). Matikitakan ken mitspaleuis tla kuali timokuayejyekoua. Kuali ximouika inuan tokniuan siuamej uan kuali ximoyektlakenti.
7-13 DE ABRIL
KEN TECHPALEUIA BIBLIA PROVERBIOS 8
Matikkakikan akin ixtlamatki
cf-S pág. 131 párr. 7
“Niktlasojtla noTajtsin”
7 Versículo 22 kijtoua ixtlamatilistli otlajto uan okijto: “Jehová achto onechchijchi ne, ijkuak ayamo itlaj okatka”. Nin tlajtoli amo san kijtosneki ixtlamatilistli. ¿Tleka ijkon tikijtouaj? Porque Jehová nochipa kajki uan ye nochipa ixtlamatki. Ikinon ixtlamatilistli nochipa kajki (Salmo 90:2). Pero Jehová okichijchi iKone. Ye achto okichijchi ijkuak ayamo itlaj okatka (Colosenses 1:15). Ijkon ken kijtoua amochtli Proverbios toTajtsin Dios okichijchi iKone ijkuak ayamo okatka iluikak nion tlaltikpak. Ye okatka Tlajtoli porque okinmiluiaya oksekimej tlen okinekiaya toTajtsin Dios. Ijkon okiteititi toTajtsin Dios ixtlamatki (Juan 1:1).
cf-S pág. 131 párrs. 8, 9
“Niktlasojtla noTajtsin”
8 ¿Tlen okichiuaya iKone toTajtsin Dios ijkuak ayamo oualaya tlaltikpak? Versículo 30 kijtoua okatka iuan iTajtsin uan okipaleuiaya. ¿Tlen kijtosneki okipaleuiaya? Colosenses 1:16 kiyekijtoua: “Ye okipaleui toTajtsin Dios ijkuak okichijchi nochi tlen onka iluikak uan ipan tlaltikpak. [...] Nochi okseki tlamantli otlapaleui makichijchiuakan uan ye iaxka”. Non kijtosneki Jehová okilui iKone makipaleui makinchiuakan ángeles uan noijki makichijchiuakan nochi tlen onka. Okichijchi tlaltikpak, miakej yolkamej, tlatlamantli xochitl uan tejuan noijki otechchijchi. Yejuan san sekan otekipanojkej ken yetoskia akin kijtoua ken mokauas se kali uan akin kalchiua. Akin kalchiua mochijchikaua kichiuas ijkon ken okilui akin kijtoua ken mokauas se kali. Techtlajtlachialtia miak tlamantli tlen onka ikinon tiktlasojkamatiliaj akin otlanauati ijkon matlachijchito (Salmo 19:1). Pero noijki techilnamiktia Jehová uan Jesús sapanoua opakej ijkuak omopaleuijkej san sekan otlachijchijkej.
9 Ualeua amo timoyekuikaj ijkuak san sekan titekipanouaj porque titlajtlakolejkej. Pero Jehová uan iKone nochipa omoyekuikakej. Jehová uan Jesús sapanoua miak xiuitl san sekan otekipanojkej. Ikinon Jesús okijto: “Ixpan nochipa oniyolpaktoka” (Proverbios 8:30). Non kiteititia yejuan opakiayaj san sekan yetoskej. Porque Jesús omochijchikauaya kichiuas ijkon ken iTajtsin kichiua ikinon kuali omouikayaj. Non kijtosneki san yejuan okachi motlasojtlaj uan kuali mouikaj porque yimiak xiuitl motlasojtlaj.
w09-S 15/4 pág. 31 párr. 14
Matikpatioitakan tlen otlamachti Jesús
14 Salomón okatka ixtlamatki pero Jesús ye okachi ixtlamatki. Ikinon ye okijto: “Nikan nankipiaj ikaj okachi ueyititok uan amo ijkon ken Salomón” (Mat. 12:42). Porque Jesús okijto “tlen techpaleuis nochipa matiyoltokan” (Juan 6:68). Ijkuak Jesús otlamachti itech tepetl okinyekijto seki principios tlen katej itech Proverbios. Salomón okijto seki tlamantli tlen techpaleuia matipakikan akinmej tiktekichiuiliaj Jehová (Prov. 3:13; 8:32, 33; 14:21; 16:20). Pero Jesús okiyekijto okachi tipakiskej tla timouikaj iuan Jehová uan tiktekichiuiliaj. Noijki okachi tipakij ijkuak tikmatij tlen kichiuas Jehová. Jesús okijto: “Pakij akinmej kimatij moneki kixmatiskej toTajtsin Dios, porque yejuan inmiaxka Tekiuajkayotl tlen kajki iluikak” (Mat. 5:3). Okachi timotokiskej inauak Jehová tla tikchiuaj tlen otlamachti Jesús porque itech Jehová “uits yolilistli” (Sal. 36:9; Prov. 22:11; Mat. 5:8). “Cristo kiteititia [...] ixtlamatilis toTajtsin Dios” (1 Cor. 1:24, 30). Ye toueyi Tekiua tlen okipejpenkej mayeto Mesías uan ‘iespíritu Jehová [...], kimaka ixtlamatilistli’ (Is. 11:2).
Matiktemokan ken techpaleuia Biblia
“Ixtlamatilistli tlen melauak, chikauak mokaki itech ojtli”
ITECH miakej altepemej tokniuan oyolpakiayaj kintemakaskej amatlajkuilolmej kanin miakej panouaj. Tejuan noijki ijkon otikchiuayaj uan timokuayejyekouaj tlen kijtoua Proverbios: “Ixtlamatilistli tlen melauak, chikauak mokaki itech ojtli” (xiktlajtolti Proverbios 1:20, 21). Jehová kichiua matiyetokan tiixtlamatkej ika Biblia uan toamatlajkuiloluan. Tla miakej momachtiaj, uelis nochipa yoltoskej. Tiyolpakij ijkuak sekimej kiseliaj toamatlajkuiloluan pero amo nochtin kinpaktia. Sekimej mokuayejyekoua yiuejkika Biblia okijkuilojkej ikinon kijtoua ayakmo kinpaleuiaj, noijki kijtouaj akinmej kitlakamatij tlen kijtoua Biblia amo moyolpaktiaj uan kinteneuaj tlen oksekimej kichiuaj. Pero Jehová kinkauilia nochtin mayetokan ixtlamatkej. ¿Ken kichiua?
2 Jehová techmakatok iTlajtol para matiyetokan tiixtlamatkej uan miakej yiuelis kipiaskej. Sapanoua tiktlasojkamatiliaj Jehová porque techteochijtok ikinon axkan katej amatlajkuilolmej ika kanaj 1,000 tlajtolmej. Akinmej kintlajtoltiaj sapanoua kinpaleuia ijkuak kichiuaj tlen kijtoua Biblia uan amatlajkuilolmej. Pero miakej amo kinekij Jehová makinpaleui mayetokan ixtlamatkej. Ijkuak moneki itlaj kipejpenaskej san kichiuaj tlen yejuan kinekij noso kintlajtlaniaj oksekimej tlen kichiuaskej. Tejuan tiktlakamatij tlen kijtoua Biblia ikinon xamo techteneuaj. Axkan tikitaskej ken Jehová uelis techpaleuis matiyetokan tiixtlamatkej uan tleka miakej amo kinekij yetoskej ixtlamatkej.
14-20 DE ABRIL
KEN TECHPALEUIA BIBLIA PROVERBIOS 9
Xiyeto tiixtlamatki uan amo xitepinaui
Xikinkakikan akinmej ixtlamatkej
4 Tikajsikamatij tinochtin titlajtlakolejkej pero ijkuak ikaj techiluia tlen amo kuali otikchijkej, amo techpaktia uan xamo hasta tikualanij. Ijkuak ijkon techiluis xamo amo tikneltokiliskej (xiktlajtolti Eclesiastés 7:9). Xamo san tikiluiskej tleka ijkon otikchijkej noso xamo tikmachiliskej otechajuak. Xamo noijki tikijtoskej: “Ye noijki motlapololtia, ik non, ¿tleka ijkon nechiluia?”. Xamo amo tikchiuaskej tlen otechilui uan hasta tikiluitiuij okse tokni uan tiknekiskej ma techilui san tlen tejuan tiknekij tikkakiskej.
Xikinkakikan akinmej ixtlamatkej
12 Tla tiyolyamankej, tikinkakiskej tokniuan ijkuak touan motlapouiskej, tikilnamikiskej titlajtlakolejkej uan ualeua amo timokuayejyekouaj ken moneki. Yotikitakej Job amo omokuayejyekouaya ken moneki pero satepan kuali omokuayejyeko. Okatka yolyamanki uan okikak tlen okilui Elihú maski ye okatka telpochtli (Job 32:6, 7). Jehová okiteochi Job porque okatka yolyamanki. Tla tiyolyamankej, tikchiuaskej tlen techiluiskej tokniuan maski timokuayejyekoskej amo moneki itlaj techiluiskej uan maski akin otechilui se telpochtli noso se ichpochtli. Se tokni tlen ialtepe Canadá okijto: “Tejuan amo tikitaj tlen tikchiuaj, ik non, ¿ken uelis ayakmo itlaj tikchiuaskej tla amikaj itlaj techiluia?”. Tinochtin moneki timochijchikauaskej tikpiaskej iespíritu santo Jehová uan noijki moneki timochijchikauaskej para okachi kuali tikinmachtiskej oksekimej (xiktlajtolti Salmo 141:5).
13 Ma tikitakan Jehová techtlasojtla ijkuak tokniuan itlaj techiluiaj. Jehová kineki kuali ma tiyetokan (Prov. 4:20-22). Ye techtlasojtla, ik non, techtlapouia ika tlen kijtoua Biblia, ika se amatlajkuilol noso ijkuak techtlapouia se tokni. Hebreos 12:9, 10 kijtoua ijkon kichiua Jehová porque kineki techpaleuis.
14 Ma timokuayejyekokan tlen techiluiaj uan amo ma timotekipachokan ken techiluiaj. Xamo timokuayejyekoskej akin itlaj otechilui amo kuali ken otechilui. Noijki akin kineki kiluis itlaj se tokni, moneki kuali kitlapouis para ye kinekis kikakis (Gál. 6:1). Uan tla tejuan ikaj techiluia itlaj moneki tikkakiskej, maski tikijtoskej amo okijto ken omonekiaya. Ma timotlajtlanikan: “Maski amo onechpakti tlen onechilui, ¿melauak tlen kijtoua? ¿Nechpaleuis tlen onechilui maski amo okijto ken omonekiaya?”. Kuali tla tikchiuaj tlen tokniuan techiluiaj porque non techpaleuis (Prov. 15:31).
w01-S 15/5 pág. 30 párrs. 1, 2
Kuali tiyetoskej tla tiixtlamatkej
Akin ixtlamatki kuali tlakaki ijkuak kiyektlaliaj pero amo ijkon kichiua akin tepinauia. Salomón okijto: “Xikyektlali akin ixtlamatki uan ye mitstlasojtlas. Xikmachti akin ixtlamatki uan okachi mochiuas ixtlamatki” (Proverbios 9:8b, 9a). Akin ixtlamatki kimati “tejuan timoyolkokouaj ijkuak techyektlaliaj uan amo tipakij. Pero tla tikseliaj matechyektlalikan techpaleuis matiyeknemikan uan kuali matiyetokan” (Hebreos 12:11). Xamo timoyolkokoskej ijkuak ikaj techyektlalis pero techpaleuis matiyetokan tiixtlamatkej.
Salomón noijki okijto: “Xikmachti akin yolkuali uan okachi miak tlamantli kimatis” (Proverbios 9:9b). Tejuan ok uelis timomachtiskej okseki tlamantli maski yitikpiaj miak xiuitl noso yitiixtlamatkej. Sapanoua tipakij ijkuak ikaj peua momachtia tlen kijtoua Biblia uan motemaka ixpan Jehová maski yikipia miak xiuitl. Ikinon matimochijchikauakan nochipa itlaj matimomachtikan.
w01-S 15/5 pág. 30 párr. 5
Kuali tiyetoskej tla tiixtlamatkej
Tisejse tikijtoskej kox tiknekij tiyetoskej tiixtlamatkej. Salomón okiyekijto: “Mitspaleuis tla timochiuas tiixtlamatki pero san titlajyouis tla titepinauia” (Proverbios 9:12). Akin ixtlamatki kipaleuia pero akin tepinauia tlajyouia pero san ye ineuian itlajtlakol. Porque non yetoskia ken tikololouaj tlen tiktokaj. Ikinon miak ipati matikinkakikan akinmej ixtlamatkej (Proverbios 2:2).
Matiktemokan ken techpaleuia Biblia
Nochipa techpaleuis tla tiktlakaitaj Jehová
9 Miak ipati amo matiauilnemikan. Itech amochtli Proverbios ijkuilitok “siuatl tlen amo ixtlamatki” kijtoua: “Tsopelik atl tlen kichtekij”. ¿Tlen kineskayotia “atl tlen kichtekij”? Biblia kijtoua ijkuak akinmej yomonamiktijkej san sekan motekaj yetoskia ken atl tlen kinyolpaktiaj (Prov. 5:15-18). Se tlakatl uan se siuatl amo tlajtlakolchiuaj ijkuak san sekan motekaj tla yomonamiktijkej. Pero tlajtoli “atl tlen kichtekij” kijtosneki okse tlamantli. Xamo kijtosneki ijkuak sekimej auilnemij uan amo kintlakamatij itlanauatiluan toTajtsin Dios. Nochtin akinmej auilnemij kichiuaj san ichtaka ijkon ken ijkuak ikaj tlachteki. Akinmej amo kinextiaj tlen kichiuaj yetoskia ken non “atl tlen kichtekij” uan kimachiliaj tsopelik. Pero san yejuan mokajkayauaj porque Jehová kita nochi uan amo uelis kikajkayauaskej. Akinmej ijkon kichiuaj, Jehová ayakmo kinselia uan non yetoskia ken itlaj chichik (1 Cor. 6:9, 10).
21-27 DE ABRIL
KEN TECHPALEUIA BIBLIA PROVERBIOS 10
Okachi miak ipati matechteochiua Jehová
w01-S 15/7 pág. 25 párrs. 1-3
Kiteochiuaj akin yolkuali
Akin yolkuali noijki kipaleuia ijkuak kichiua okseki tlamantli. Proverbios 10:4, 5 kijtoua: “Amitlaj kipias akin amo tekipanoua pero akin chikauak tekipanoua kipias miak tlamantli. Ixtlamatki tekone tla kololoua tlen okitokak ijkuak tlatotonia pero kipinauiskej tekone tlen san kochi ijkuak kololouaj tlen okitokakej”.
Tekiua kijtoua sapanoua miak ipati tlen kichiuaj akinmej kololouaj tlen okitokakej. Akinmej kololouaj tlen okitokakej tekipanouaj miak uan amo san kochij. Moneki san niman tekipanoskej.
Ijkuak Jesús okinmilui idiscípulos matlaololokan, amo okinmiluijtoka makololokan trigo, ye okinmiluijtoka makinmachtikan oksekimej. Ye okijto: “Moneki tikololoskej miak tlatoktli pero amo katej miakej tlakeualmej. Ikinon xiktlatlaujtikan akin iaxka tlatoktli [toTajtsin Dios] makinualtitlani tlakeualmej makololokan” (Mateo 9:35-38). Xiuitl 2000 omonechikojkej kanaj catorce millones para kilnamikiskej imikilis Jesús. Non kijtosneki okachi omonechikojkej tlen amo iTlaixpantijkauan Jehová. Ikinon uelis tikijtoskej “tlatoktli yochikauak uan yiuelis kololoskej” (Juan 4:35). Akinmej melauak kitekichiuiliaj Jehová kitlatlaujtiaj makinualtitlani oksekimej tlakeualmej matlaololokan pero yejuan noijki mochijchikauaj kichiuaskej tlen motlatlaujtiaj uan tlamachtiaj (Mateo 28:19, 20). Jehová sapanoua yokinteochi tokniuan porque mochijchikauaj kitekichiuiliskej. Porque xiuitl 2000 omoapolaktijkej kanaj doscientos ochenta mil personas tlen opejkej kichiuaj ken Cristo. Yejuan noijki mochijchikauaj tlamachtiskej iTlajtol toTajtsin Dios. Ikinon matipakikan ijkuak timochijchikauaj tikinmachtiskej oksekimej porque non yetoskia ken tikololouaj tlatoktli.
w01-S 15/9 págs. 24, 25 párrs. 3, 4
Matimochijchikauakan tiyetoskej tiyolkualmej
Salomón okijto miak ipati matiyetokan tiyolkualmej. Ye okijto: “Kipia kanin mopaleuis akin kipia miak tlamantli pero san tlajyouia akin amitlaj kipia. Kipaleuis mayolto tlen kichiua akin yolkuali pero tlen kichiua akin amo yolkuali kichiuas matlajtlakolchiua” (Proverbios 10:15, 16).
Tla tikpiaj miak tlamantli techpaleuis ijkuak itlaj tikixnamikiskej ijkon ken se altepetl tlen kipia se tepamitl kinpaleuia akinmej ompa chantij. Pero tla amitlaj tikpiaj uelis titlajyouiskej ijkuak itlaj techpanos (Eclesiastés 7:12). Pero tekiua Salomón noijki okijto uelis tlajyouis akin kipia miak tlamantli uan akin amitlaj kipia. Akin kipia miak tlamantli kineltoka kipaleuis ijkuak itlaj kixnamikis porque kita ken yetoskia se tepamitl tlen kimaluia (Proverbios 18:11). Pero akin amitlaj kipia xamo mokuayejyekoua amo kuali yetos satepan. Akin kipia miak tlamantli uan akin amitlaj kipia kiteititiaj amo kineltokaj toTajtsin Dios uelis kinpaleuis.
Pero kuali yetos akin yolkuali maski kipias miak tlamantli noso amo. ¿Tleka ijkon tikijtouaj? Porque akin yolkuali paki porque kipia tlen moneki. Ye okachi kipatioita mouikas iuan toTajtsin Dios maski kipia miak tlamantli noso amo. Ikinon paki uan kimati nochipa yoltos satepan (Job 42:10-13). Pero akin amo yolkuali amo kipaleuia nochi tlen kipia. Ye amo kitlasojkamati tlen kipia uan amo kichiua tlen kineki toTajtsin Dios. Nochi tlen kipia san kinejneki para tlajtlakolchiuas.
it-1-S pág. 309
Tlateochiualistli
Jehová techteochiua. “Itlateochiualis Jehová non tlen okachi tlapaleuia uan ye amo tetlajyouiltia” (Prov. 10:22). Jehová nochipa kinteochiua akinmej kinselia. Kinmaluia, kinpaleuia, kinyekana, kichiua kuali makisa tlen kichiuaj uan kinmaka tlen kinpoloua.
Matiktemokan ken techpaleuia Biblia
Jehová kinyolitis akinmej yoixpolikej uan ijkon kiteititia techtlasojtla, ixtlamatki uan kimati mochias
12 Ijkuak ualtlanauatis iTekiuajkayo toTajtsin Dios nochtin kitaskej mochiuas tlen kijtoua Proverbios 10:22: “Itlateochiualis Jehová non tlen okachi tlapaleuia uan ye amo tetlajyouiltia”. Iespíritu santo Jehová kinpaleuis ma kipiakan chikauak intlaneltokilis. Nin kijtosneki kipiaskej inyelis ken Cristo uan noijki ayakmo yetoskej tlajtlakolejkej (Juan 13:15-17; Efes. 4:23, 24). Kipiaskej kuali inyelis uan chikajtoskej. ¡Sapanoua yolpakiskej! (Job 33:25). ¿Ken techyolchikaua ma timokuayejyekokan ijkuak kinyolitiskej akinmej yoixpolikej?
28 DE ABRIL-4 DE MAYO
KEN TECHPALEUIA BIBLIA PROVERBIOS 11
Amo matikijtokan tlen amo moneki
w02-S 15/5 pág. 26 párr. 4
Matiyetokan tiyolkualmej
Akin yolkuali kinpaleuia oksekimej pero akin amo yolkuali kintlajyouiltia oksekimej. “Kintlajyouiltia oksekimej tlen kijtoua akin okika toTajtsin Dios uan kixnamiki, pero ixtlamatilistli kinpaleuia akinmej yolkualmej” (Proverbios 11:9). Akin amo yolkuali kinteneua oksekimej para amo kuali makinmitakan, kijtojtinemi tlen kinpanoua oksekimej, tlauijuikaltia uan kijtoua tlen amo kinpaleuia oksekimej. Pero akin yolkuali kijtoua tlen kinyolchikaua oksekimej, kuali mokuayejyekoua tlen kijtos uan kintlakaita oksekimej ijkuak kintlapouia. Ye kichiua tlen kuali ikinon ye kiteititia amo melauak tlen kijtouaj ijkuak kinteneuaj oksekimej.
w02-S 15/5 pág. 27 párrs. 2, 3
Matiyetokan tiyolkualmej
Akinmej yolkualmej kinpaleuiaj oksekimej kuali mayetokan, kuali mamomachilikan uan kinyolchikauaj. Ijkuak ijkon tlapaleuiaj akinmej yolkualmej, kuali momachiliaj akinmej chantij itech altepetl. Pero akinmej amo yolkualmej kinteneua oksekimej para amo kuali makinmitakan, itlaj kintoktiaj oksekimej, kichiuaj oksekimej amo mayolpakikan, texexelouaj uan tetlajyouiltiaj. Ijkon kichiuaj tlen miakej kinmixmatij. Non kichiua akinmej chantij itech se altepetl amo kuali mayetokan, kichiuaj tlen amo kuali, kichiuaj tlen pitsotik uan xamo noijki tlajyouiaj porque amo kipiaj tomin.
Tlen kijtoua Proverbios 11:11 noijki techpaleuia akinmej tiktekichiuiliaj Jehová porque timonechikouaj uan yetoskiaj ken tichantij itech se altepetl. Ijkuak akinmej pouij itech se tlanechikol mochijchikauaj kichiuaskej tlen kuali, nochtin pakij, kuali kitekichiuiliaj Jehová uan kiueyitlaliaj itoka. Jehová kiteochiua totlanechikol uan okachi timomiaktiliaj. Pero ualeua sekimej amo kinpaktis ken mochiua seki tlamantli itech tlanechikol ikinon xamo tlateneuaskej. Ijkon yetoskia ken moneluayotis tlen amo kuali itech tlanechikol uan kinmijtlakos oksekimej tlen amo ijkon mokuayejyekouaj (Hebreos 12:15). Akinmej ijkon kichiuaj ualeua kinekij makinueyitlalikan noso kinekij tlanauatiskej. Yejuan kijtouaj akinmej pouij itech tlanechikol amo kichiuaj tlen kuali noso techikoitaj uan kijtouaj noijki ijkon kichiuaj tlayekankej. Ikinon san kinxexelouaj tokniuan. Pero tejuan amo matikinkakikan akinmej ijkon kichiuaj uan matimochijchikauakan kuali matimouikakan iuan Jehová. Ijkon tikinpaleuiskej tokniuan kuali mayetokan uan amo matimoxexelokan.
¿Keman moneki titlajtoskej?
12 ¿Tlen tikchiuaj ijkuak se tokni itlaj kimati tlen amo moneki kijtos? Tla tikixmatij se tokni tlen kajki kanin amo kinkauiliaj tokniuan ma tetlapouikan nion ma monechikokan, ¿tiknekij tiktlajtlaniskej ken tetlapouiaj? Xamo tiknekij tikmatiskej porque tikintlasojtlaj tokniuan uan techtekipachoua tlen kinpanoua. Noijki tiknekij tikmatiskej tlen intoka uan ijkon tikiluiskej Jehová ma kinpaleui. Pero amo ma tiktlajtlanikan tokni uan amitlaj ma tikijtokan. Tla tikiluiskej se tokni ma techilui tlen amo moneki kijtos, amo tikteititiskej tiktlasojtlaj nion oksekimej tokniuan tlen kineltokiliaj. Amo tiknekij okachi tikinmouijtiliskej tokniuan kanin amo kinkauiliaj ma tetlapouikan nion ma monechikokan. Noijki tokniuan tlen ompa chantij amitlaj ma kijtokan tla kintlajtlaniaj ken tetlapouiaj noso ken kichiuaj okseki tekitl.
13 Tlayekankej moneki moyekanaskej ika tlen kijtoua Proverbios 11:13 (xiktlajtolti). Amo kijtojtinemij tlen amo moneki kimatiskej oksekimej. Xamo oui ijkon kichiuaskej tlayekankej tlen yomonamiktijkej. Porque akinmej yomonamiktijkej kuali mouikaj uan nochi kimoiluiaj tlen mokuayejyekouaj, tlen kimachiliaj uan tlen kintekipachoua. Pero tlayekankej kimatij amo moneki kijtojtinemiskej tlen kinpanoua tokniuan. Tla kijtojtinemiskej, tokniuan ayakmo kinneltokiliskej uan ayakmo kintlakaitaskej. Akinmej kipiaj se tekitl itech tlanechikol amo ma kipapatlakan tlen kijtouaj (1 Tim. 3:8). Nin kijtosneki amo ma tlakajkayauakan nion ma kijtojtinemikan tlen kinpanoua tokniuan. Tla se tlayekanki kitlasojtla isiua, amo kiluis tlen amo moneki kimatis.
Matiktemokan ken techpaleuia Biblia
g20.1 pág. 11, recuadro
¿Tlen techpaleuis amo san ma timotekipachokan?
AMO OKACHI TIMOTEKIPACHOSKEJ TLA TIYOLKUALMEJ
“Tlakatl tlen yolkuali mopaleuia pero akin amo yolkuali ineuian motlajyouiltia” (PROVERBIOS 11:17).
Moneki tiyetoskej tiyolkualmej uan non techpaleuis amo okachi ma timotekipachokan. Ijkon okijkuilo se tepajti itoka Tim Cantopher itech iamoch tlen itoka Overcoming Stress (Cómo superar el estrés). Okachi kuali tikatej uan tiyolpakij ijkuak tiyolkualmej. Pero akinmej tetlajyouiltiaj amo yolpakij uan amikaj iuan mouikaj.
Noijki amo okachi timotekipachoskej tla tikajsikamatij tlen uelis tikchiuaskej uan tlen amo. Amo ma tiknekikan tikchiuaskej tlen amo tiuelij, amo ma tikijtokan amitlaj topati uan amo san ma tikijtojtinemikan tlen amo ueli tikchiuaj. Jesús okijto: “Xiktlasojtla mokni kemi te timotlasojtla” (Marcos 12:31).