“Tokniuan okiteititijkej techtlasojtla”

TOKNIUAN Yomara, Marcelo uan Hiver amo tlachiaj, yejuan chantij itech se altepetsintli ompa Guatemala. Yomara opejki momachtia inmiuan iTlaixpantijkauan Jehová uan satepan noijki ikniuan opejkej momachtiaj. Pero amo okimatiayaj kitlajtoltiskej braille. Ikinon akin okinmachtiaya omonekiaya kintlajtoltilis párrafos uan textos.

Noijki oui okitakej monechikoskej porque kanin monechikoskiaj okatka kanaj 40 minutos uan amo uelis yaskia inselti. Pero tokniuan tlen inmiuan omonechikouayaj omopatlatiayaj para kinuikaskej. Ijkuak nonmej eyi tokniuan tlamachtiskiaj kanin omonechikouayaj, tokniuan achto okinpaleuiaya mamomachtikan para ijkon kimatiskiaj tlen kijtoskiaj.

Mayo 2019 iTlaixpantijkauan Jehová opejkej monechikouaj inmialtepe. Se tokni uan isiua tlen okatkaj precursores regulares ompa ochantitoj. Maski tokni uan isiua amo okimatiayaj braille okijtojkej kinpaleuiskiaj eyi tokniuan mamomachtikan kitlajtoltiskej uan kijkuiloskej. Tokniuan oyajkej kanin okinpiayaj amochmej para momachtiskej braille uan ijkon uelis kinpaleuiskiaj tokniuan.

Opanok san seki metstli tokniuan yokimatiayaj kitlajtoltiskej braille, non okinpaleui okachi makitekichiuilikan Jehová.a Axkan Yomara, Marcelo uan Hiver tlapaleuiaj ken precursores regulares, tokni Marcelo noijki tlapaleuia ken siervo ministerial. Sejse semana tokniuan sapanoua yolpakij kitekichiuiliskej Jehová ikinon oksekimej tokniuan ijkuak kitaj yolpakij noijki kinekij ijkon kichiuaskej.

Yomara, Marcelo uan Hiver sapanoua kintlasojkamatiliaj tokniuan tlen inmiuan monechikouaj, yejuan okinmititijkej kintlasojtlaj. Yomara okijto: “Ijkuak tokniuan yikin otikinmixmatkej san niman okiteititijkej techtlasojtlaj”. Marcelo noijki okijto: “Kanin timonechikouaj tikinpiaj toyolikniuan tlen techtlasojtlaj uan itech nochi tlaltikpak tikinpiaj tokniuan tlen motlasojtlaj”. Yomara uan ikniuan yikinekij maajsi tonal ijkuak kitaskej tlaltikpak yetos se xochitlali (Sal. 37:10, 11; Is. 35:5).