Okintlalijkej ome tokniuan mapouikan itech Cuerpo Gobernante

MIÉRCOLES 18 de enero 2023 omoijto itlaj miak ipati itech jw.org. Tokniuan Gage Fleegle uan Jeffrey Winder okintlalijkej mapouikan itech Cuerpo Gobernante tlen kipiaj iTlaixpantijkauan Jehová. Ninmej ome tokniuan yikipiaj miak xiuitl kitekichiuilijtokej Jehová.

Tokni Gage Fleegle omoskalti ik kanin motlatia tonaltsin ompa Pensilvania Estados Unidos. Ipapanuan okimachtijkej tlen kijtoua Biblia. Ijkuak okatka telpochtli oyajki iuan ipapanuan itech se altepetsintli ­kanin okachi omonekiaya tetlapouiskej. Amo miak xiuitl opanok uan omoapolakti 20 de noviembre 1988.

Ipapanuan nochipa okiyolchikajkej okachi makitekichiuili Jehová. Ipapanuan okinyoleuayaj inkalijtik tlayekankej itech circuito uan betelitas uan ijkon tokni Gage Fleegle okitaya tokniuan sapanoua opakiayaj. 1 de septiembre 1989 opejki tlapaleuia ken precursor regular. Opanok ome xiuitl uan octubre 1991 opejki tlapaleuia Betel tlen kajki Brooklyn ijkon ken okijtojka ijkuak okipiaya 12 xiuitl.

Otekipano chikueyi xiuitl kanin kinchijchiuaj amatlajkuilolmej uan satepan okipanoltijkej kanin moyekana tetlapouilistli. ­Ijkuakon otlapaleui seki xiuitl itech se tlanechikol kanin tlajtouaj ruso. Xiuitl 2006 omonamikti iuan Nadia uan san sekan tlapaleuiaj Betel. Yejuan otlapaleuijkej kanin tlajtouaj portugués uan kanaj majtlaktli xiuitl otlapaleuijkej kanin tlajtouaj español. Tokni Gage Fleegle otlapaleui miak xiuitl kanin moyekana tetlapouilistli. Satepan okipanoltijkej kanin katej akinmej kiyekanaj tlamachtil uan satepan okipanoltijkej kanin kiyekanaj tetlapouilistli. Marzo 2022 okitlalijkej makinpaleui akinmej kiyekanaj tetlapouilistli tlen kipia Cuerpo Gobernante.

Tokni Jeffrey Winder omoskalti itech se altepetl tlen itoka Murrieta tlen kajki California. Ipapanuan kitekichiuiliaj Jehová uan yejuan okimachtijkej tlen kijtoua Biblia. Ye omoapolakti 29 de marzo 1986. Opanok se metstli uan opejki tlapaleuia ken precursor auxiliar. Sapanoua okipakti ikinon 1 de octubre 1986 omochi precursor regular.

Ijkuak okatka telpochtli tokni Jeffrey Winder okintlajpaloto ome ikniuan tlen otlapaleuiayaj Betel. Non okiyolini makitemiti se amatl para ompa tlapaleuiskia ijkuak yikipiaskia xiuitl tlen moneki. Mayo 1990 okiyolejkej matlapaleuiti Betel tlen kajki Wallkill.

Tokni Jeffrey Winder okichi tlatlamantli tekitl. Otlapaleui kanin tlachipauaj, kanin kinmaluiaj yolkamej uan oficina Betel kanin kiyekanaj miak tlamantli. Xiuitl 1997 omonamikti iuan Angela uan san sekan tlapaleuiaj Betel. Pero 2014 okintitlankej Warwick uan ompa otlapaleui makichijchiuakan kali Betel. 2016 okititlankej kanin tlamachtiaj ika Biblia ompa Patterson. Ompa otekipano kanin kinchiuaj audios uan videos. Opanok naui xiuitl uan omokopkej Warwick. Tokni Jeffrey Winder okitlalijkej kanin kinpejpenaj akinmej tlapaleuiskej Betel. Marzo 2022 okitlalijkej makipaleui Comité de Personal tlen kipia Cuerpo Gobernante.

Ninmej ome tokniuan Jehová otechintliokoli (Efes. 4:8). Tiktlatlaujtiaj Jehová makinteochiua ninmej ome tokniuan porque kichiuaj miak tekitl para kipaleuiskej iTekiuajkayo.