Tikchiuaskej tlen kuali: Biblia techiluia tlen kuali uan tlen amo kuali

Biblia kijtoua tleka ualeua amo kuali kisa tlen tikchiuaj ijkuak san tikchiuaj tlen timokuayejyekouaj noso tikchiuaj tlen oksekimej techiluiaj. Pero noijki techiluia tlen tikchiuaskej para kuali makisa tlen tikpejpenaskej uan kuali matimomachilikan. ITlajtol toTajtsin Dios techiluia tlen melauak techpaleuis.

MONEKI MATECHYEKANA TOTAJTSIN DIOS

Jehováa techiluia itech iTlajtol amo uelis san toselti timoyekanaskej porque amo ijkon otechchijchi ikinon moneki ye matechyekana (Jeremías 10:23). Ikinon otlanauati makijkuilokan iTlajtol para matikmatikan tlen tikpejpenaskej tikchiuaskej. Ye techtlasojtla uan amo kineki matimotlapololtikan porque kimati uelis timoyolkokoskej uan titlajyouiskej (Deuteronomio 5:29; 1 Juan 4:8). Ye kimati tlen techpaleuis porque ye otechchijchi uan okachi ixtlamatki (Salmo 100:3; 104:24). Pero ye amo keman technauatia moneki matiktlakamatikan.

Jehová okinchijchi Adán uan Eva ikinon okinmakak nochi tlen omonekiaya para mayolpakikan (Génesis 1:28, 29; 2:8, 15). Noijki okinmakak seki tlanauatilmej tlen amo oui pero okinkauili yejuan makipejpenakan kox kintlakamatiskiaj (Génesis 2:9, 16, 17). Pero amo okitlakamatkej uan okichijkej tlen yejuan okinekej (Génesis 3:6). ¿Melauak tiyolpakij ijkuak san tejuan tikpejpenaj tlen tikchiuaskej? Amo. Porque desde ijkuak Adán uan Eva amo okitlakamatkej toTajtsin Dios, yomotak amo tiyolpakij nion timoyolseuiaj ijkuak amo tikintlakamatij itlanauatiluan (Eclesiastés 8:9).

Biblia techiluia tlen tikchiuaskej tla tiknekij kuali makisa tlen tikpejpenaskej maski san kanin tichantij noso maski san kanin tiyetoskej (2 Timoteo 3:16, 17; xikita recuadro “Tinochtin uelis tikpiaskej iTlajtol toTajtsin Dios”). Matikitakan ken techyekana iTlajtol toTajtsin Dios.

Xikita tleka tikijtouaj Biblia “iTlajtol toTajtsin Dios” (1 Tesalonicenses 2:13). Xikalaki itech jw.org uan xikita video tlen itoka ¿Akin iaxka tlen ijkuilitok itech Biblia?

¿TLEKA SEKIMEJ AMO KINELTOKAJ BIBLIA UELIS TECHPALEUIS?

Sekimej kijtouaj Biblia amo uelis techpaleuis matikchiuakan tlen kuali. Ualeua kijtouaj nin tlamantli.

Sekimej kijtouaj: “Biblia motlajtolnamiki”.

Amo melauak tlen mokuayejyekouaj: Xamo seki tlamantli tlen kijtoua Biblia mota motlajtolnamiki. Pero tikitaj Biblia amo motlajtolnamiki ijkuak tiktlajtoltiaj nochi tlen opanok, keman okijkuilojkej, tlen okichiuayaj akinmej okijkuilojkej uan tlen omokuayejyekouayaj.

Tla tikneki okachi tikmatis tleka tikijtouaj Biblia amo motlajtolnamiki, xikalaki itech jw.org uan xiktlajtolti tlamachtil tlen itoka “¿Se contradice la Biblia?”.

Sekimej kijtouaj: “Akinmej kitlajtoltiaj Biblia noijki kichiuaj tlen amo kuali ikinon amo uelis techyekanas”.

Amo melauak tlen mokuayejyekouaj: Biblia kijtoua miakej amo kichiuaskej tlen momachtiaj. Noijki ijkon kichiuaskej hasta akinmej kinyekanaj religiones. Kijtoua miakej ‘kiuijuikaltiskej’ tlen tlamachtia Biblia (2 Pedro 2:1, 2).

Tla tikneki tikmatis amo kichiuaj tlen kijtoua Biblia sekimej tlen kinyekanaj religiones, xikalaki itech jw.org uan xiktlajtolti tlamachtil tlen itoka “La religión, ¿un gran negocio?”.

Sekimej kijtouaj: “Biblia kijtoua amo matitetlakaitakan”.

Amo melauak tlen mokuayejyekouaj: Biblia techiluia nochtin matikintlakaitakan. Noijki techiluia:

Amo matimoueyinekikan (Filipenses 2:3).
Matikintlakaitakan oksekimej maski amo kineltokaj tlen tejuan tikneltokaj uan kichiuaj okseki tlamantli (1 Pedro 2:17).
Amo matikinmiluikan oksekimej moneki mokuayejyekoskej ijkon ken tejuan timokuayejyekouaj (Mateo 10:14).

Biblia kiteititia toTajtsin Dios yolkuali uan nochtin kintlakaita. Ikinon noijki kineki ijkon matikchiuakan (Romanos 9:14).

Tla tikneki okachi tikmatis, xikalaki itech jw.org uan xiktlajtolti tlamachtil tlen itoka “¿Techpaleuia Biblia matiteajsikamatikan?”.

TOTAJTSIN DIOS TECHYEKANA IKA BIBLIA

Biblia kijtoua toTajtsin Dios touan mouika desde ijkuak okinchijchi Adán uan Eva. Ijkuak tiktlajtoltiaj iTlajtol toTajtsin Dios, tikitaj ken mokuayejyekoua uan tikajsikamatij tlen kuali uan tlen amo kuali. Porque ye kimati tlen techpaleuis noso tlen techijtlakos (Salmo 19:7, 11). Tla timoyekanaskej ika iTlajtol toTajtsin Dios, techpaleuis matikchiuakan tlen kuali.

Matikitakan tlen kijtoua Proverbios 13:20. Ompa kijtoua: “Akin nemi iuan akin ixtlamatki ye noijki yetos ixtlamatki uan akin mouika inuan akinmej amo yolkualmej kipanos tlen amo kuali”. Nin texto miakej yokinpaleui uan tejuan noijki techpaleuia. Itech Biblia tikinmajsiskej miakej textos tlen techpaleuiaj (xikita recuadro “Nochipa techpaleuia tlen kijtoua Biblia”).

Xamo timotlajtlania: “¿Kox uelis nechpaleuis tlen kijtoua Biblia?”. Itech okse tlamachtil tikitaskej ken yokinpaleui oksekimej.

a ToTajtsin Dios itoka Jehová (Lucas 4:8).

NOCHIPA TECHPALEUIA TLEN KIJTOUA BIBLIA

Tinochtin tiknekij tiyolpakiskej uan kuali tiyetoskej (Eclesiastés 1:9). Ikinon Biblia ok techpaleuia maski yikipia kanaj 2,000 xiuitl otlanki okijkuilojkej. Biblia techiluia miak tlamantli tlen nochipa techpaleuis.

Amo matitlakajkayauakan

“Tejuan amo keman tiknekij titlakajkayauaskej” (Hebreos 13:18).
“Akin tlachteki ayakmo matlachteki. Mamochijchikaua kuali matekipano” (Efesios 4:28).

Kuali matimouikakan inuan oksekimej

“Nochipa xikchiuakan tlen kinpaleuis oksekimej uan amo san tlen namejuan namechpaleuis” (1 Corintios 10:24).
“Nochipa xikxikokan tlen oksekimej kichiuaj uan xikintlapojpoluikan ika nochi namoyolo” (Colosenses 3:13).

Kuali matikpejpenakan tlen tikchiuaskej

“Akin amo ixtlamatki kineltoka nochi tlen kiluiaj pero akin ixtlamatki mokuayejyekoua itech sejse tlamantli tlen kichiua” (Proverbios 14:15).
“Akin ixtlamatki kita ouijkayotl uan motlatia pero akin xoxo yaui uan moneki kixikos ouijkayotl” (Proverbios 22:3).