¡XIMOMALUIJTOKAN!
¿Tlen techpaleuis matiyolpakikan maski techpanoua miak tlamantli? | ¿Tlen kijtoua Biblia?
Axkan techpanoua miak tlamantli uan ualeua amo tikmatij tlen tikchiuaskej. Pero tejuan tikpejpenaskej kox tiknekij tipakiskej noso kox san techtekipachojtos tlen techpanoua. Biblia kijtoua uelis tiyolpakiskej maski techpanos miak tlamantli (Proverbios 15:15). ¿Tlen techpaleuis matiyolpakikan? Matikitakan ken techpaleuia Biblia.
Amo sapanoua ximotekipacho
Biblia kijtoua: “Tlen kitekipachoua se tlakatl non tlen kiyolkokoua pero moyolchikaua ijkuak kiluiaj se kuali tlajtoli” (Proverbios 12:25).
Biblia mitspaleuis amo sapanoua ximotekipacho. Tla tikneki tikmatis ken mitspaleuis, xiktlajtolti tlamachtil “El punto de vista bíblico: La ansiedad”.
Xikintemo moyolikniuan
Biblia kijtoua: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokouaj” (Proverbios 17:17).
Biblia kijtoua tlen uelis tikchiuas para amo ximomachili moselti uan xikinpia moyolikniuan. Xiktlajtolti tlamachtil “Xikintemo moyolikniuan para ayakmo ximomachili moselti | Biblia uelis mitspaleuis”.
Xiktlasojtla toTajtsin Dios uan noijki xikintlasojtla oksekimej
Biblia kijtoua: “Xiktlasojtla Jehováa moDios ika nochi moyolo, ika nochi moyolilis uan ika nochi motlayejyekol. [...] Xikintlasojtla oksekimej ijkon ken te timotlasojtla” (Mateo 22:37-39).
Okachi tiktlasojtlaskej toTajtsin Dios tla iuan timotlapouiskej ikinon nochipa matiktlatlaujtikan. Tla tikneki okachi tikmatis, xiktlajtolti tlamachtil “¿Techkaki toTajtsin Dios ijkuak tiktlatlaujtiaj?”.
Matikintlasojtlakan oksekimej ijkon ken Jesús otlamachti. Tikmatis ken tikchiuas tla tiktlajtoltis tlamachtil “¿Qué es la Regla de Oro?”.
Ximomachti Biblia uan tiyolpakis maski axkan panoua miak tlamantli. Ikinon timitsyoleuaj ximomachti Biblia uan amitlaj tiktlaxtlauas.
a ToTajtsin Dios itoka Jehová (Salmo 83:18).