¿Ok techpaleuia tlen kijtoa Biblia?
SEKIMEJ KIJTOAJ AMO. Se tlakatl tlen tlapajtia okijto tla tiktekitiltiskej Biblia para ika timoyekanaskej, yetoskia ken ikaj tlamachtis itech Química ika se amochtli tlen okijkuilojkej itech 1920. Akin amo kipatioita Biblia uelis mitstlajtlanis kox tiktlajtoltis se amatl tlen kijtoa ken tekiti se computadora tlen ayakmo motekitiltia para tikmatis ken tiktekitiltis se yankuik computadora. Nin kijtosneki sekimej kijtoaj Biblia ayakmo techpaleuia.
Ikaj uelis kijtos amo moneki moyekanas ika se amochtli tlen yiuejkika okijkuilojkej uan axkan onka miak tlamantli yankuik. Se neskayotl, itech Internet onka miak tlamantli uan kijtoaj ken uelis tikixnamikiskej ouijkayotl. Noijki itech televisión kintlajtlaniaj psicólogos tlen sapanoa ixtlamatkej uan akinmej tlajkuiloaj kinmiluiaj tlen kichiuaskej oksekimej. Yejuan kijtoaj amochmej techpaleuiskej uan ijkon sapanoa kitlanij tomin.
Ken nochi mopatlati, xamo sekimej kijtoskej amo itlaj ipati ma kitlajtoltikan Biblia porque yikipia kanaj dos mil xiuitl omoijkuilo. ¿Kox melauak tlen kijtoaj tla moyekanaskej ika Biblia yetoskia ken tiktlajtoltiaj se amochtli itech química tlen ayakmo kitekitiltiaj? ¿Noso yetoskia ken se amatl tlen kijtoa ken tekiti se computadora tlen ayakmo kichiua? Amo melauak tlen mokuayejyekoaj. Nochi mopatlati uan noijki tlen kijtoaj ixtlamatkej. Pero ¿mopatla tlen kinekij tlaltikpaktlakamej? Nochtin kinekij yolpakiskej, kuali momachiliskej, kichiaskej tlen kuali, kinekij ma yolpakikan inkalchanejkauan uan kinpiaskej inyolikniuan.
Biblia kijtoa ken uelis ijkon tiyetoskej maski yiuejkika omoijkuilo. Noijki kijtoa toTajtsin Dios otlanauati ma kijkuilokan. Tlen ompa ijkuilitok techpaleuia itech nochi tonemilis uan techpaleuia ma tikixnamikikan san tlen ouijkayotl (2 Timoteo 3:16, 17). Tlen kijtoa nochipa techpaleuis, amo ikaj kijtos ayakmo itlaj ipati. Uan Biblia ijkin kijtoa: “Itlajtol Dios yolitok” (Hebreos 4:12).
¿Melauak tlen kijtoa? ¿Ayakmo itlaj ipati Biblia noso okachi techpaleuia ken yetoskia yolitok? Nin revista uan okseki tlamachtilmej mitspaleuiskej xikinnankili ninmej tlajtlanilmej.