“Zamani Ngamandla Wonke Ukuhlala Limanyene Emoyeni”
UMPHOSTOLI uPhawuli wakhuthaza amaKhristu ayese-Efesu wathi: “Libe lesineke komunye lomunye, litshengisa ukuthi liyathandana. Zamani ngamandla wonke ukuhlala limanyene emoyeni, lilokuthula okwenza libambane libe munye.”—Efe. 4:2, 3.
Umoya ongcwele kaNkulunkulu yiwo oyenza ukuthi simanyane. Lanxa kunjalo umphostoli uPhawuli wathi kufanele sizame ukuhlala simanyene. Lokhu sokusitsho ukuthi umKhristu ngamunye ulomlandu wokwenza ukuthi kube lokumanyana ebandleni.
Ake sithi omunye umuntu ukunike imota. Kambe ukuthi ubungakhangelela ukuthi kuphinde kube nguye futhi oba leqiniso lokuthi inakekelwa ngendlela efaneleyo ukuze ingafi? Hatshi. Ngitsho lalapho isifile ngeke umbeke icala ngoba nguwe oyabe wehluleke ukuyiphatha kuhle.
Kuyafanana ke lokumanyana okusebandleni. Lanxa kuyisipho esisiphiwe nguNkulunkulu, kumele sizame ngamandla ukuthi kungaphambaniseki kodwa kuhlale kukhona. Nxa kuyikuthi kulomfowethu loba udadewethu ongazwanani laye kumele uzibuze ukuthi, ‘Ngizama ngamandla wonke yini ukuthi kuhlale kulokuthula ebandleni?’
“ZAMANI NGAMANDLA WONKE UKUHLALA LIMANYENE”
Umphostoli uPhawuli watsho ukuthi ngezinye izikhathi kungadingeka ukuthi sizame ngamandla ukuze ebandleni kuhlale kulokumanyana. Phela kungabanzima ukuthi sihlale simanyene nxa kuyikuthi asizwanani labafowethu. Manje sokusitsho ukuthi ngaso sonke isikhathi nxa kube lokungazwanani phakathi kwethu lomunye umfowethu sokumele sihlale phansi sikhulume ngendaba yakhona? Kwesinye isikhathi kuyabe kungadingeki lokho. Nanku ongaqala uzibuze khona: ‘Ukukhuluma laye kuzalulungisa yini uhlupho kumbe kuzalubasela?’ Kwesinye isikhathi kungaba kuhle ukutshiyana layo indaba yakhona kumbe ukumxolela nje kudlule.—Zaga. 19:11; Mak. 11:25.
Zibuze ukuthi, ‘Ukukhuluma laye kuzalulungisa yini uhlupho kumbe kuzalubasela?’
Umphostoli uPhawuli wakhuthaza amaKhristu ukuthi abe ‘lesineke komunye lomunye futhi atshengise ukuthi ayathandana.’ (Efe. 4:2) Elinye ibhuku lithi umutsho lo ungahunyutshwa ngokuthi “libamukele benjengoba benjalo.” Lokhu kutsho ukuthi kumele sikwamukele ukuthi abafowethu balesono njengathi. Asiyali sibili ukuthi siyazama ‘ukugqoka ubuntu obutsha’ kodwa iqiniso esingeke silivike yikuthi sizahlala siwenza amaphutha. (Efe. 4:23, 24; Rom. 3:23) Nxa singahlala sikukhumbula lokhu kuzakuba lula ukuthi sibabekezelele abanye, sibaxolele futhi ‘sihlale simanyene’ ebandleni.
Nxa singazimisela ukuxolela abanye kuzakuba lula ukuthi sihlalisane ngokuthula. Ukubambana okukhulunywa ngakho ku-Efesu 4:3 kuhambelana lalokho okuqanjwa kuKholose 2:19. Evesini le ukubambana kufaniswa lemisipha ebambanisa amathambo. Yikho nxa sibathanda abafowethu futhi sizama ngamandla wonke ukuthi kuhlale kulokuthula sizahlala simanyene.
Nxa omunye angakunyathela ikhonzi, zama ukungacaphuki masinyane kumbe uzitshele ukuthi vele ukuqophile. (Kol. 3:12) Ungakhohlwa ukuthi lawe uyake ubazwise ubuhlungu abanye. Nxa ungahlala ukhumbula izinto lezi uzalwela ukuthi ‘kuhlale kulokumanyana’ ebandleni.