Unjani UDeveli?

Impendulo yeBhayibhili

UDeveli uyisidalwa somoya, yikho ngeke simbone ngoba kalamzimba ofanana lowethu.—Kwabase-Efesu 6:11, 12.

Umfanekiso ojayelekileyo kaDeveli ebambe ifologwe. Uyinyamazana enjengembuzi elempondo lomsila.

Abantu bandise ukudweba uDeveli eyinyamazana enjengembuzi elempondo lomsila njalo ethwele ifologwe. Abanye bathi imifanekiso le yaqalisa ukudwetshwa ngabadwebi abaphila eminyakeni engu-1000 eyadlulayo futhi kukhanya badweba imifanekiso enjalo ngenxa yezinganekwane ababezizwa.

IBhayibhili lithi uDeveli unjani?

IBhayibhili lisebenzisa iziqathaniso ezimayelana loDeveli ezisinceda sizwisise ubuntu bakhe hatshi ukuthi ukhangeleka njani. Nanzi ezinye iziqathaniso zakhona:

Ingilosi yokukhanya. Wenza angathi unika abantu okuhle esenzela ukuthi balandele imfundiso zakhe hatshi ezikaNkulunkulu.—2 KwabaseKhorinte 11:14.
Isilwane esibhongayo. Uhlasela abantu bakaNkulunkulu ngesihluku esikhulu.—1 UPhetro 5:8.
Umgobho. Uyesabeka, ulamandla njalo udala umonakalo omkhulu.—ISambulo 12:9.

Amavesi akhuluma ngoDeveli

2 Khorinte 11:14: ‘USathane uqhubeka ezenza ingilosi yokukhanya.’

Ingcazelo: USathane uzenza olungileyo ukuze ayenge abantu ukuthi balandele izimfundiso zakhe kulokuthi balandele ezikaNkulunkulu.
U-Efesu 6:11: “Gqokani zonke izigqoko zokuzivikela empini eliziphiwe nguNkulunkulu ukuze lenelise ukuma liqine, limelane lezenzo zikaDeveli zobuqili.”

Ingcazelo: UDeveli wenza amacebo okuthi abantu bangalaleli uNkulunkulu.
UJakhobe 4:7: “Zehliseni kuNkulunkulu kodwa melanani loDeveli uzalibalekela.”

Ingcazelo: Umuntu anganqoba uSathane ngokulalela uNkulunkulu kulokuthi alalele uDeveli.
1 UPhetro 5:8: “Isitha senu uDeveli siyahambahamba njengesilwane esibhongayo sidinga esingamudla.”

Ingcazelo: UDeveli uyabazonda labo abalalela uNkulunkulu futhi ufuna ukubenza bangabi ngabangane bakaNkulunkulu.