Wayengubani UMariya Magadalena?
Impendulo yeBhayibhili
UMariya Magadalena wayengumlandeli othembekileyo kaJesu Khristu. Ibizo lakhe elithi Magadalena kumele ukuthi lavela ebizweni ledolobho leMagidala njalo idolobho leli laliseduze kolwandle lweGalile. IMagidala kungabe kuyiMagadani. Kungenzakala ukuthi uMariya wake wahlala edolobheni leli.
UMariya Magadalena wayengomunye wabesifazana abanengi ababehamba loJesu labafundi bakhe futhi bebancedisa ngezinto zokuziphilisa. (ULukha 8:1-3) Wabona uJesu ebulawa njalo wayengomunye wabantu abaqala ukumbona esevusiwe.—UMakho 15:40; UJohane 20:11-18.
UMariya Magadalena wayeyisifebe yini?
Akulandawo eBhayibhilini esitshelwa khona ukuthi uMariya Magadalena wayeyisifebe. Elikutshoyo yikuthi uJesu wamkhipha amadimoni ayisikhombisa.—ULukha 8:2.
Abantu bakuthatha ngaphi ukuthi wayeyisifebe? Kwathi sekudlule iminyaka leminyaka efile, abanye bathi nguye owesifazana ongaqanjwa ngebizo owamanzisa inyawo zikaJesu ngenyembezi zakhe wasezesula ngenwele zakhe njalo kumele ukuthi owesifazana lo wayeyisifebe. (ULukha 7:36-38) Kodwa eBhayibhilini akulabufakazi obutshengisa ukuthi nguMariya Magadalena.
UMariya Magadalena wayengumphostoli wabaphostoli yini?
Hatshi. Esontweni yeKatolika uMariya Magadalena ubonwa njengomuntu ongcwele lomphostoli wabaphostoli ngoba nguye owaba ngowokuqala ukutshela abaphostoli ngokuvuswa kukaJesu. (UJohane 20:18) Kodwa lokhu akutsho ukuthi wayengumphostoli njalo iBhayibhili alisitsheli ukuthi wayengumphostoli.—ULukha 6:12-16.
IBhayibhili laqedwa ukubhalwa ekupheleni kwesikhathi sabaphostoli. Kodwa ngemva kweminyaka engaba ngu-600 izikhulu zesonto zaqalisa ukuphakamisa uMariya Magadalena. Eminye imibhalo eyabhalwa ngeminyaka yabo-100 kusiya ku-300 C.E., ithi abanye abaphostoli bakaJesu babelomhawu ngoMariya. Kodwa imibhalo le kayisingxenye yeBhayibhili. Indaba lezo zokuzibumbela azisingxenye yeMibhalo engcwele.
UMariya Magadalena wayengumkaJesu Khristu yini?
Hatshi. IBhayibhili liyakucacisa ukuthi uJesu kazange atshade.a
a Khangela isihloko sesiZulu esithi, “Ingabe UJesu Wayeshadile? Wayenazo Yini Izingane Zakubo?”