Kutshoni Ukuba “NgumSamariya Olungileyo”?
Impendulo yeBhayibhili
Umutsho othi “umSamariya Olungileyo” ujayele ukusetshenziswa nxa kukhulunywa ngomuntu othanda ukunceda abantu abasebunzimeni. Umutsho lo wasukela emzekelisweni owatshiwo nguJesu lapho efundisa ukuthi umakhelwane omuhle ngolesihawu njalo onceda abanye kungelani lokuthi bangumhlobo bani loba bavela ngaphi.a
Esihlokweni lesi uzabona ukuthi
Umayelana lani umzekeliso ‘womSamariya Olungileyo’?
Nansi ngamafitshane indaba eyalandiswa nguJesu: Indoda engumJuda yasuka eJerusalema isiya eJerikho. Ithe iphakathi komango yatshaywa yizigebenga zayithathela konke eyayilakho zayitshiya isibangwa lezibi.
Kwaqala kwadlula umphristi ongumJuda kwasekulandela omunye wabakhokheli benkolo yamaJuda futhi bobabili bayitshiya indoda le eyayilimele. Lanxa bobabili babedabuka esizweni sinye lendoda le, kabazange bazihluphe ngokuma bayincede.
Ngemva kwesikhathi kwathutsha indoda eyayingumSamariya. (ULukha 10:33; 17:16-18) UmSamariya wayizwela usizi indoda eyayilimele, waseyibopha amanxeba. Ngemva kwalokho watholela indoda le indawo eyayizalala kuyo njalo wayinakekela ubusuku bonke. Ngelanga elilandelayo, umSamariya wabhadala umgcini waleyondawo wamcela ukuthi anakekele indoda le eyayilimele, wasemtshela lokuthi wayezimisele ukubhadalela loba yiziphi ezinye izindleko ezazingasala zisiba khona.—ULukha 10:30-35.
Kungani uJesu walandisa umzekeliso lo?
UJesu wayephendula indoda eyayicabanga ukuthi abantu abangumhlobo wayo njalo abalokholo olunjengolwayo yibo kuphela abangomakhelwane bayo. Wayefuna ukufundisa indoda le isifundo esiqakathekileyo sokuthi ‘umakhelwane’ utsho labanye abantu abangasomaJuda. (ULukha 10:36, 37) Indaba le yalotshwa eBhayibhilini ukuze bonke abantu abafuna ukuthokozisa uNkulunkulu bafunde kuyo.—2 KuThimothi 3:16, 17.
Sifundani emzekelisweni lo?
Indaba le isifundisa ukuthi umakhelwane omuhle utshengisa ngezenzo ukuthi ulesihawu. Uyamnceda umuntu osebunzimeni ngalokho akudingayo—kungelani lokuthi lowomuntu usuka ngaphi, ungumhlobo bani loba uvela kuliphi ilizwe. Umakhelwane olungileyo uphatha abanye ngendlela yena abengafisa ukuphathwa ngayo.—UMathewu 7:12.
Ayengobani amaSamariya?
AmaSamariya ayehlala elizweni elalisenyakatho yeJudiya. Abanye bawo babengabazukulu bamaJuda ayesuke atshada labantu ababengasomaJuda.
Ngekhulu lokuqala C.E., amaSamariya ayesezibumbele inkolo yawo wodwa. Babekukholwa okwakutshiwo emabhukwini angu-5 okuqala eMibhalo yesiHebheru, kodwa eminye yonke babengayamukeli.
AmaJuda amanengi ngensuku zikaJesu ayewazonda amaSamariya njalo engadlelani lawo. (UJohane 4:9) Amanye amaJuda ayeze asebenzise ibala elithi “umSamariya” nxa ethuka abanye.—UJohane 8:48.
Yenzakala okweqiniso yini indaba ‘yomSamariya Olungileyo’?
IMibhalo kayisitsheli ukuthi indaba yomSamariya yinto eyenzakala okweqiniso yini. Kodwa uJesu wayejayele ukukhuluma ngemikhuba ejayelekileyo kanye lezindawo ezaziwayo nxa wayefundisa ukuze ababemlalele bakuzwisise masinyane ayebafundisa khona.
Okunengi kwakhona okwaqanjwa endabeni le kwakuliqiniso sibili. Ngokwesibonelo:
Umgwaqo owawusuka eJerusalema usiya eJerikho, owawungamakhilomitha adlula 20, wawulalapho ongumehlo khona okomango ongaba yikhilomitha. Ngakho indaba le iqondile nxa isithi izihambi ezazisiya eJerikho ‘zazisehla zisuka eJerusalema.’—ULukha 10:30.
Abaphristi labaLevi ababehlala eJerikho babekujayele ukuya eJerusalema besebenzisa umgwaqo lo.
Izigebenga zazijayele ukucatsha endleleni le eyayingahanjwa kangako zilindele ukuhlasela izihambi ezidlulayo, ikakhulu ezazihamba zodwa.
a Umzekeliso ‘womSamariya Olungileyo’ waziwa langokuthi ngumzekeliso “woMakhelwane Omuhle OngumSamariya.”