Izingxabano Zezombusazwe Zigcwalisa Iziphrofetho EziseBhayibhilini

Lamuhla abantu bayaphikisana ezindabeni ezimayelana lezombusazwe. Lemithetho abayiphiwayo okumele bayilandele kabavumelani layo futhi nxa belemibono etshiyeneyo ngendaba ethile kabayibeki kuhle, bacina besilwa. Izikhathi ezinengi izisebenzi zikahulumende lababeka imithetho kanye lezinye iziphathamandla bajayele ukuphikisana njalo akula oyabe efuna ukwamukela umbono womunye. Konke lokhu kwenza kube nzima ukuthi uhulumende enze umsebenzi wakhe.

Esihlokweni lesi sizaxoxa ikakhulu ngezingxabano zezombusazwe ezenzakala elizweni le-United States lokwenzakala eBritain ebizwa langokuthi yi-United Kingdom. Ngenxa yani? Ngenxa yokuthi iBhayibhili lavele lakhuluma ukuthi emazweni la kwakuzakwenzakala njalo, futhi kwakuzabe kuyisikhathi lapho uhulumende osezulwini obekwe nguNkulunkulu esetshintsha izinto emhlabeni.

Ingxabano zombusazwe “ekucineni kwezinsuku”

EBhayibhilini sithola isiphrofetho esikuDanyeli lapho uNkulunkulu asitshela khona “okuzakwenzakala ekucineni kwezinsuku.” Ngesikhathi uDanyeli ebhala amazwi la, wayesitsho isikhathi lapho okwakuzakwenzakala khona utshintsho olumangalisayo ebantwini.—UDanyeli 2:28.

UNkulunkulu wenza ukuthi inkosi yaseBhabhiloni iphuphe isiphrofetho leso. Ephutsheni layo, inkosi le yabona inkalakatha yesithombe esasibunjwe ngezinto ezitshiyeneyo. Ngemva kwesikhathi, umphrofethi uDanyeli wachasisa ukuthi isithombe leso kusukela ekhanda kuze kuyefika enyaweni zaso sasimela imibuso elamandla eyayizabusa emhlabeni okwesikhathi esithile iphinde iwe.a Ekucineni, isithombe leso sasizatshabalaliswa lilitshe elimela uMbuso kumbe uhulumende obekwe nguNkulunkulu.—UDanyeli 2:36-45.

Isiphrofetho sikaDanyeli sithi uMbuso kaNkulunkulu uzasusa bonke ohulumende abasemhlabeni. UMbuso lo yiwo uJesu afundisa abalandeli bakhe ukuthi bawuthandazele ngesikhathi esithi: “UMbuso wakho kawuze.”—UMathewu 6:10.

Kodwa kungaphi eBhayibhilini lapho esitshelwa khona ukuthi kwakuzakuba lezingxabano kwezombusazwe? Unanzelele yini ukuthi inyawo zesithombe ‘zaziyinsimbi ehlangene lebumba’? (UDanyeli 2:33) Indlela ezazibunjwe ngayo yayitshiyene lezinye insimbi ezazibumba isithombe, okutsho ukuthi kwakuzakuba lombuso olamandla owawuzabe utshiyene leminye. Njani? Isiphrofetho sikaDanyeli sithi:

Isiphrofetho lesi sitshengisa ukuthi umbuso olamandla omelwa zinyawo zesithombe wawuzakuba lezingxabano zezombusazwe. Lanxa wawuzabe ulamandla, abantu ababezabe bebuswa yiwo babezakwenza ukuthi ungaqini kangako.

Isiphrofetho sikaDanyeli sigcwaliseka njani lamuhla?

Inyawo zesithombe zimela umbuso we-United States leBritain olamandla kulayo yonke. Okwenzakala namuhla kutshengisa njani ukuthi lokho kuliqiniso?

Inyawo zesithombe zenziwe ‘ngensimbi ehlangene lebumba,’ okutsho ukuthi aziqinanga kangako. (UDanyeli 2:42) Namuhla ilizwe le-United States leleBritain awalamandla kangako ngenxa yokuthi abantu bawo abamanyananga. Ngokwesibonelo emazweni la womabili kuyake kube lezingxabano phakathi kwabantu. Baba lodlakela nxa belwela amalungelo abo njalo labo abayabe bebavotele ukuthi babamele, izikhathi ezinengi abavumelani. Yikho ohulumende laba ababili kwezinye izikhathi besehluleka ukwenza lokho abayabe bekuhlosile ngenxa yokuthi abantu ababambananga.

Ake sibone okunye okutshiwo yisiphrofetho sikaDanyeli lokuthi kugcwaliseka njani namuhla:

Isiphrofetho: “Umbuso lo uzakwehlukana phakathi kodwa enye ingxenye yawo izaqina njengensimbi.”—UDanyeli 2:41.

Esikutshoyo: Lanxa e-United States laseBritain kusiba lezingxabano zezombusazwe, amazwe la alamabutho alamandla. Yikho esenelisa ukubusa umhlaba wonke ngamandla anjengawensimbi.

Ukugcwaliseka kwaso

Ngo-2023 imali eyasetshenziswa yi-United States le-United Kingdom kwezempi iyedlula khatshana imali eyasetshenziswa ngamazwe angu-12 esehlangene.—Stockholm International Peace Research Institute.

‘Akula obunye ubudlelwano obedlula obelizwe le-United States lobe-United Kingdom. Amazwe la azimisele ukuvikelana lokuhambelana lezempucuko. Sisebenza ndawonye, siyasekelana futhi silwa ndawonye.’—Strategic Command, U.K. Ministry of Defence, April 2024.

Isiphrofetho: “Njengoba nje amazwane enyawo zesithombe abeyinsimbi ehlangene lebumba, umbuso lo uzakuba lamandla nganxanye, ube buthakathaka nganxanye.”—UDanyeli 2:42.

Esikutshoyo: E-United States laseBritain kuhanjwa ngentando kazulu. Yikho lanxa amazwe la elamabutho amakhulu, nxa abanengi bengavumelani lalokho okuhloswe ngohulumende laba, kuba nzima ukuthi benze abakuhlosileyo.

Ukugcwaliseka kwaso

“Ezinye izazi zezombusazwe zithi ukwehlukana kwemibono yabantu abakuhulumende [we-United States] kwenza kube nzima ukuthi yenze lokho ejayele ukutshela umhlaba wonke ukuthi izakwenza, ngokwesibonelo endabeni zokuvikeleka kumbe kwezamabhizimusi.”—“The Wall Street Journal.”

‘[EBritain] sekube lenhlupho zezombusazwe ezingakaze zibe khona njalo lokhu sekubangele ukuthi kube nzima ukuthi izisebenzi zikahulumende zenze imisebenzi enceda umphakathi.’—Institute for Government.

Isiphrofetho: ‘Ingxenye [yombuso] izaxubana labantu kodwa akusoze kube lokumanyana.—UDanyeli 2:43, amabala angaphansi.

Esikutshoyo: Kwabanye ohulumende kwenziwa intando kazulu kodwa izikhathi ezinengi iziphathamandla kumbe abanye abavotayo bayabe bengasuthiseki ngakho.

Ukugcwaliseka kwaso

“Lamuhla abantu abanengi eMelika kabazizwisisi ezombusazwe futhi kabazithandi leziphathamandla eziyabe zikhethiwe.”—Pew Research Center.

‘Lamuhla abantu beBritain abasamthembi uhulumende labezombusazwe, ikakhulu nxa sesiqathanisa indlela ababesenza ngayo eminyakeni engu-50 edlulileyo’—“National Centre for Social Research.”

Isiphrofetho sikaDanyeli sizagcwaliseka njani esikhathini esizayo?

Isiphrofetho sikaDanyeli sitshengisa ukuthi umbuso we-United States leBritain yiwo ozabe uzibambile emhlabeni wonke nxa uMbuso kaNkulunkulu usususa bonke ohulumende abakhona namuhla.—UDanyeli 2:44.

Esinye isiphrofetho esisebhukwini leSambulo sitshengisa ukuthi ‘amakhosi omhlaba wonke’ azamanyana ukuze alwe loJehovab uNkulunkulu empini ye-Amagedoni, ‘impi yosuku olukhulu lukaNkulunkulu uSomandla.’ (ISambulo 16:14, 16; 19:19-21) Empini le uJehova uzatshabalalisa bonke ohulumende abasemhlabeni, besekusiba yikuphela kwayo yonke imibuso yomhlaba emelwa yisithombe esisephrofethweni sikaDanyeli.

Ukuze uthole okunengi khangela isihloko esithi “Kuyini I-Amagedoni?”

Isiphrofetho sikaDanyeli esimayelana lezingxabano zezombusazwe sisinceda ngani?

Okwakhulunywa liBhayibhili kwatshengisa ukuthi e-United States laseBritain kwakuzakuba lezingxabano kwezombusazwe.

• Uzazwisisa ukuthi yindaba uJesu wayengafuni abalandeli bakhe bangene kwezombusazwe. (UJohane 17:16) Uzaphinda uzwisise lokuthi kungani uJesu okhethwe nguNkulunkulu ukuthi abe yiNkosi yoMbuso wakhe wathi: “UMbuso wami awusiwo walumhlaba.”—UJohane 18:36.

• Kuzakukhuthaza ukwazi ukuthi uMbuso kaNkulunkulu usuzatshintsha izinto emhlabeni lokuthi sekuseduze ukuthi sithole zonke izibusiso asithembisa zona.—ISambulo 21:3, 4.

• Awusoze uthandabuze ukuthi sizakuba lekusasa elihle njalo awusoze ukhathazeke ngokuthi imibuso yomhlaba izaphambanisa izinto emhlabeni.—IHubo 37:11, 29.

Isiphrofetho sikaDanyeli sitshengisa ukuthi umbuso we-United States leBritain omelwa zinyawo zesithombe yiwo ozaba ngumbuso olamandla wokucina ukubusa umhlaba. Ngemva kwalokho kuzabusa uMbuso kaNkulunkulu, okutsho uhulumende ongelasici ozabe ubusa usezulwini.

Ukuze uthole okunengi ngokuthi uMbuso kaNkulunkulu uzabenzelani abantu, bukela ividiyo ethi Uyini UMbuso KaNkulunkulu?