Kutshoni Ukuba NgumKhristu?—IBhayibhili Lithini?

Abantu abanengi bazithi bangamaKhristu kodwa besenza izinto ezizwisa abanye ubuhlungu. Abanye balobuqili, kabalamusa futhi bagijimisa okufunwa yibo kuphela bengelandaba labanye. Abanye abatshadileyo kabathembekanga kubomkabo. Konke lokhu kwenza abanye bacine sebezibuza umbuzo lo: ‘Kutshoni sibili ukuba ngumKhristu?’

Kutshoni sibili ukuba ngumKhristu?

Lanxa abanengi bezithi bangamaKhristu, kumele kukhanye ngezenzo ukuthi umuntu ungumKhristu. IBhayibhili lithi umKhristu kumele abe ngumfundi kaJesu Khristu. (ImiSebenzi 11:26) UJesu wathi: “Nxa lingahlala liselizwini lami, liyabe lingabafundi bami sibili.” (UJohane 8:31) Kodwa iqiniso yikuthi akulamuntu ongenelisa ukwenza khona kanye uJesu ayekwenza. Lanxa kunjalo, umKhristu kuyabe kumele enze konke okusemandleni akhe ukuthi alandele lokho okwakufundiswa nguJesu futhi azame ukuphila ngendlela ayephila ngayo. Ake sixoxe ngokunye okumele kwenziwe ngamaKhristu.

AmaKhristu alendaba labanye futhi ayabathanda

Okwakhulunywa nguJesu: “Ngilinika umlayo omutsha wokuthi lithandane. Thandanani ngendlela lami engilithande ngayo. Nxa lithandana, abantu bonke bazakwazi ukuthi lingabafundi bami.”—UJohane 13:34, 35.

Okwenziwa nguJesu: UJesu watshengisa ukuthi uyabathanda bonke abantu kungelani lokuthi bavela ngaphi, banothile yini kumbe bangabayanga. Wasilisa abagulayo, wanika abalambileyo ukudla waze wanikela ngokuphila kwakhe ukuze ancede abantu.—UMathewu 14:14-21; 20:28.

Okumele kwenziwe ngamaKhristu: AmaKhristu kumele atshengise ukuthi ayabathanda abanye ngokuphana, ngokungabandlululi langokubathethelela. Kumele bancedise labaswelayo njalo bazimisele lokuzincitsha ezinye izinto ukuze bancede abanye.—1 UJohane 3:16.

AmaKhristu athembekile

Okwakhulunywa nguJesu: ‘Mina ngiliqiniso.’—UJohane 14:6.

Okwenziwa nguJesu: UJesu wayekhuluma iqiniso sonke isikhathi futhi wayethembekile kukho konke ayekwenza. Kazange aqile abanye njalo kazange abaqambele amanga. Abantu babekwazi ukuthi uthembekile futhi wayengatshintshi lanxa wayekwazi ukuthi ukuthembeka kungamthwalisa nzima.—UMathewu 22:16; 26:63-67.

Okumele kwenziwe ngamaKhristu: AmaKhristu akumelanga aqambe amanga njalo akumelanga atshontshe. Kumele abhadale imithelo futhi athembeke kubaqhatshi babo. (KwabaseRoma 13:5-7; Kwabase-Efesu 4:28) Okunye okungamelanga kwenziwe ngamaKhristu yikuqila abanye imali zabo, ukuqila emihlolisweni kumbe ukubhala amanga nxa edinga imisebenzi loba nxa efila amanye amafomu.—KumaHebheru 13:18.

AmaKhristu alomusa

Okwakhulunywa nguJesu: “Wozani kimi lina lonke elikhatheleyo lelisindwayo, ngizaliphumuza. Thwalani ijogwe lami lifunde kimi ngoba ngimnene futhi ngithobekile enhliziyweni. Lingenza njalo lizathola ukuphumula ngoba ijogwe lami lilula, lomthwalo wami awusindi.”—UMathewu 11:28-30.

Okwenziwa nguJesu: UJesu wayelomusa njalo abantu babekhululekile ukumlanda bakhulume laye. Abantwana labo babengamesabi. Wayeduduza abakhathazekileyo futhi wayehlonipha wonke umuntu.—UMakho 10:13-15; ULukha 9:11.

Okumele kwenziwe ngamaKhristu: AmaKhristu akhuluma kuhle labanye, aphatha kuhle wonke umuntu, awalalunya kuloba ngubani. (Kwabase-Efesu 4:29, 31, 32) Alendaba labanye futhi ayadinga indlela zokubancedisa zikhathi zonke.—KwabaseGalathiya 6:10.

AmaKhristu ahlala ethembekile kubomkawo

Okwenziwa nguJesu: “Lokho uNkulunkulu asekuhlanganisile akungabi lomuntu okwehlukanisayo.”—UMakho 10:9.

Okwenziwa nguJesu: Lanxa uJesu engazange atshade, wakhuthaza abatshadileyo ukuthi bathembeke komunye lomunye. (UMathewu 19:9) Waphinda wabatshela lokuthi bananzelele izinto ezingadiliza imizi yabo.—UMathewu 5:28.

Okumele kwenziwe ngamaKhristu: AmaKhristu kumele abalekele ukwenza izinto ezitshengisa ukuthi ababahloniphi abatshade labo. (KumaHebheru 13:4) Kumele bahlale bethandana futhi behloniphana.—Kwabase-Efesu 5:28, 33.