Impi Ephakathi Kwe-Israel Lamazwe Aseduze Kwayo—IBhayibhili Lithini?

Impi ephakathi kwe-United States, le-Israel, le-Iran yindaba esegudwini ebantwini abanengi lamuhla. Kambe ukuthi impi le izaqina icine isiba yimpi yomhlaba wonke? Ohulumende bangenelisa yini ukuqeda izingxabano ezikhona, benze ukuthi kuhlale kulokuthula?

Abantu abazaziyo iziphrofetho eziseBhayibhilini bangacabanga ukuthi impi ephakathi kwe-Israel lamazwe aseduze kwayo yikuqala kwempi ye-Amagedoni okukhulunywa ngayo kuSambulo.

IBhayibhili lithini?

Ohulumende bangenelisa yini ukuqeda impi ephakathi kwe-Israel lamazwe aseduze kwayo?

IBhayibhili lithi: “Ungathembeli ezikhulwini kumbe komunye umuntu ngoba kalamandla okusindisa.”—IHubo 146:3.

Kuzabonakala ngokuya kwesikhathi ukuthi ohulumende bazakwenelisa yini ukwenza ukuthi isimo sibe ngcono emazweni la. Kodwa iBhayibhili likwenza kucace ukuthi akulamuntu wezombusazwe, loba uhulumende osemhlabeni kumbe abanye nje abantu abangenelisa ukuqeda izimpi balethe ukuthula. UNkulunkulu nguye kuphela ongenelisa ‘ukuqeda izimpi emhlabeni wonke.’—IHubo 46:9.

• Ukuze uthole okunengi, bala iNqabayokulinda elesihloko esithi “Ngubani Ozaqeda Izimpi?”

Impi ephakathi kwe-Israel lamazwe aseduze kwayo igcwalisa isiphrofetho yini?

IBhayibhili lithi: ‘Lizakuzwa izimpi lemibiko yezimpi. Isizwe sizavukela isizwe, lombuso uvukele umbuso.’—UMathewu 24:6, 7.

Impi ephakathi kwe-Israel lamazwe aseduze kwayo ngesinye isibonakaliso ‘sesiphetho somumo lo wezinto’ njalo itshengisa ukuthi siphila “ezinsukwini zokucina.” (UMathewu 24:3; 2 KuThimothi 3:1) Izimpi esizibona lamuhla zitshengisa ukuthi sekuseduze ukuthi uNkulunkulu aqede izimpi kanye lezinye inhlupho ezithwalise abantu amagabha avuzayo.

• Ukuze uthole okunengi, bala isihloko esithi “What Is the Sign of ‘the Last Days,’ or ‘End Times’?”

I-Amagedoni izaqalela e-Israel yini?

IBhayibhili lithi: “Basebewaqoqela ndawonye endaweni ebizwa ngokuthi yi-Amagedoni ngesiHebheru.”—ISambulo 16:16.

Impi ye-Amagedoni akusimpi ephakathi kwabohulumende ezaqalela e-Israel lamazwe aseduze kwayo, kodwa yimpi ephakathi kwabo bonke ohulumende abasemhlabeni besilwa loNkulunkulu.

• Ukuze uthole okunengi, bala isihloko esithi “Kuyini I-Amagedoni?”

Kuyini ongasinceda sihlaliseke lanxa sisebunzimeni?

IBhayibhili lithi: “Lingakhathazeki ngaloba yini kodwa bikelani uNkulunkulu zonke izicelo zenu ngomthandazo langokumncenga kanye lokumbonga.”—KwabaseFiliphi 4:6.

UJehovaa uNkulunkulu usitshela ukuthi sithandaze kuye. Uyayizwa imithandazo yethu njalo asincedise lokuthi silwisane lezinto ezisikhathazayo ngoba ulendaba lathi. (1 UPhetro 5:7) Usinceda sizwisise ukuthi yindaba izimpi zilokhu zikhona aphinde asitshele ukuthi uzaziqeda lokuthi uzasusa bonke ubuhlungu lokuhlupheka esikubonayo lamuhla.—ISambulo 21:3, 4.

• Ukuze uthole okunengi mayelana lokuthi uNkulunkulu usincedisa njani, bala isihloko esithi “You Can Find Words of Comfort in the Bible.”