KwabaseFiliphi 4:8—“Qhubekani Licabanga Ngakho Konke Okuliqiniso”

“Okokucina bafowethu, qhubekani licabanga ngakho konke okuliqiniso, konke okuqakathekileyo, konke okulungileyo, konke okumsulwa, konke okuthandekayo, konke okukhulunywa kuhle ngakho, konke okuhle, langakho konke okubabazekayo.”—KwabaseFiliphi 4:8, INguqulo Yomhlaba Omutsha.

“Okokucina, bazalwane, konke okuliqiniso, konke okulesithunzi, konke okulungileyo, konke okuhlambulukileyo, konke okuhle, konke okubukekayo uma ulutho luluhle kakhulu loba lubongeka cabangani ngezinto ezinje.”—KwabaseFiliphi 4:8, Holy Bible in Ndebele.

Okutshiwo nguFiliphi 4:8

UNkulunkulu ulendaba lokuthi kuyini esikucabangayo ngoba izikhathi ezinengi lokho esikucabangayo sicina sikwenzile. (IHubo 19:14; UMakho 7:20-23) Ngakho abantu abafuna ukuthokozisa uNkulunkulu kumele balahle imicabango emibi, bacabange ngalokho okumthokozisayo.

Ivesi le iqamba izinto ezingu-8 okumele amaKhristu ‘aqhubeke ecabanga ngazo.’

• “Okuliqiniso.” Lapha kutshiwo izinto eziqondileyo lezingathenjwa, ngokwesibonelo ulwazi esiluthola eLizwini likaNkulunkulu iBhayibhili.—1 KuThimothi 6:20.

• “Okuqakathekileyo.” Lapha kutshiwo izinto ezilusizo hatshi ezingakhiyo kumbe ezingaqakathekanga. Yizinto ezinceda umKhristu ukuthi azimisele ukwenza okuqondileyo.—KuThithusi 2:6-8.

• “Okulungileyo.” Lapha kutshiwo amacebo kumbe izenzo ezihambelana lalokho uJehova athi kuqondile hatshi okuvela ekuhlakanipheni kwabantu.—IZaga 3:5, 6; 14:12.

• “Okumsulwa.” Lapha kutshiwo imicabango kumbe inhloso ezihlanzekileyo futhi ezingcwele. Kumele sibe msulwa kukho konke hatshi endabeni zemacansini kuphela.—2 KwabaseKhorinte 11:3.

• “Okuthandekayo.” Lapha kutshiwo ukuba lemicabango emihle enza umuntu abe lothando hatshi ukuzonda abanye, ukubamba izikhwili kumbe ukuxabana labanye.—1 UPhetro 4:8.

• “Okukhulunywa kuhle ngakho.” Lapha kutshiwo ukwenza izinto ezingenza abantu bakhulume kuhle ngathi futhi ezamukelwa yilabo abahlonipha uNkulunkulu.—IZaga 22:1.

• “Konke okuhle.” Lapho kutshiwo indlela yokuziphatha eqondileyo futhi eyamukelwa nguNkulunkulu.—2 UPhetro 1:5, 9.

• “Okubabazekayo.” Lapha kutshiwo izinto ezincomekayo, ikakhulu phambi kukaNkulunkulu. Kutshiwo lokucabanga langezinto ezenziwa nguNkulunkulu esingamdumisa ngazo.—IHubo 78:4.

Amanye amavesi asinceda sizwisise uFiliphi 4:8

Umphostoli uPhawuli wayebotshiwe eRoma ngesikhathi ebhalela abaseFiliphi incwadi le. Lanxa wayebotshiwe, indlela ayibhala ngayo kanye lamabala awasebenzisayo iyahlabusa, yikho labo abahlolisisa iBhayibhili besithi “yincwadi emumethe intokozo.”—KwabaseFiliphi 1:3, 4, 7, 8, 18; 3:1; 4:1, 4, 10.

UPhawuli wayebathanda abafowabo labodadewabo beFiliphi efuna babe lentokozo futhi babe lokuthula njengaye. (KwabaseFiliphi 2:17, 18) Waphetha incwadi yakhe ngokubakhuthaza ukuthi babe ngabantu abathokozayo, abazwisisayo labathembele kuNkulunkulu. Lokhu bangakwenza ngokuhlala bethandaza kuye njalo beqhubeke becabanga ngezinto ezazizakwenza bahlaliseke futhi babe ngabangane bakaNkulunkulu.—KwabaseFiliphi 4:4-9.

Bukela ividiyo le emfitshane ukuze ubone okumunyethwe libhuku labaseFiliphi.